1. Le i bika byālaile Yehova bifikidila mu kino kyetu kitatyi?

YEHOVA wālaile amba, mu kino kyetu kitatyi “bantu dikumi ba ndimi yonso ya mizo bakakwata, bine, bakakwata bininge ku munkukumba wa Muyuda umo, kebanena’mba: ‘Tusaka kwenda nenu, mwanda tubaivwana’mba Leza udi nenu.’” (Zek. 8:23) “Muyuda” welekeja boba bashingilwe māni na Leza kupityila ku mushipiditu wandi ujila. Betwanga ne bu “Isalela wa Leza.” (Ngt. 6:16) “Bantu dikumi” nabo belekeja boba badi na lukulupilo lwa kwikala na būmi bwa nyeke pano pa ntanda. Bayukile amba Yehova i mwesele kino kisumpi kya bashingwe māni kadi bamwene amba kutōta Leza pamo nabo i dyese.

2. Le “bantu dikumi” ‘bendanga’ na bashingwe māni namani?

² Nansha byobidi bikomo kuyuka majina a bashingwe māni bonso badi’ko pano pa ntanda dyalelo, * boba badi na lukulupilo lwa kwikala pano pa ntanda babwanya ‘kwenda’ na bashingwe māni. Namani? Bible unena amba, “bantu dikumi” “bakakwata, bine, bakakwata bininge ku munkukumba wa Muyuda umo, kebanena’mba: ‘Tusaka kwenda nenu, mwanda tubaivwana’mba Leza udi nenu.’” Uno vese wa mu Bible utela Muyuda umo. Ino panena’mba “nenu” ne “udi nenu,” wisambilanga pa bantu bavule. Kino kishintulula’mba Muyuda ke muntupo umo, ino welekeja kibumbo kyonso kya bashingwe māni. Boba kebashingilwepo māni bengidilanga Yehova pamo na bashingwe māni. Inoko, kebamonengapo bashingwe māni bu batangidiji babo,  mwanda bayukile amba Mutangidiji wabo i Yesu.​—Mat. 23:10.

3. Le i bipangujo’ka byotusa kulondolola mu kino kishinte?

³ Dyalelo byokukidi bene Kidishitu bashingwe māni mu bantu ba Leza, bantu bamo babwanya kwiipangula’mba: (1) Le bashingwe māni bafwaninwe kwimona namani? (2) Le tufwaninwe kumona namani boba badya ne kutoma ku byelekejo bya pa Kivulukilo? (3) Le tufwaninwe kulangalanga pa kibalwa kyenda kivudila’ko kya boba badya ne kutoma ku byelekejo? Kino kishinte kisa kulondolola bino bipangujo.

4. Le i kidyumu’ka kidi mu 1 Bene Kodinda 11:27-29 kifwaninwe kulangulukila’po bininge bashingwe māni, ne mwanda waka?

⁴ Bashingwe māni bafwaninwe kulangulukila bininge pa kidyumu kidi mu 1 Bene Kodinda 11:27-29. (Tanga.) Le mushingwe māni ukokeja kudya mukate ne kutoma vinyu ya pa Kivulukilo “pampikwa kufwaninwa” namani? Ubwanya kulonga namino shi adye ne kutoma ku byelekejo, aye papo mujilule misoñanya myoloke ya Yehova. (Bah. 6:4-6; 10:26-29) Bashingwe māni bayukile amba bafwaninwe  kwikala nyeke na kikōkeji shi basaka kutambula “mpalo ya lwito lwa mūlu [lwibetyile] Leza kupityila kudi Kidishitu Yesu.”​—Fid. 3:13-16.

5. Le bene Kidishitu bashingwe māni bafwaninwe kwimona namani?

⁵ Mushipiditu ujila wa Yehova ukwashanga bengidi bandi baleke kwikala na mitatulo, ino bekale betyepeje. (Ef. 4:1-3; Kol. 3:10, 12) Nanshi bashingwe māni kebemonangapo bu bayampe kupita bakwabo. Bayukile amba Yehova kanenwepo kupa bashingwe māni mushipiditu ujila kutabuka bengidi bandi bakwabo. Kebemonangapo bu abo bo bevwanije bininge bubine bwa mu Bible kutabuka bakwabo. Kadi kebanenangapo muntu amba nobe wi mushingwe māni ne amba ufwaninwe kudya ne kutoma ku byelekejo bya pa Kivulukilo. Ino betabije na kwityepeja’mba Yehova kete ye witanga bantu ba kwenda mūlu.

6. Mungya 1 Bene Kodinda 4:7, 8, le bene Kidishitu bashingwe māni bafwaninwe kwikala namani?

⁶ Nansha bashingwe māni byobamwene kwenda mūlu bu dyese dikatampe, kebakimbangapo bakwabo bebamone mu muswelo wa pa bula. (Fid. 2:2, 3) Kadi bayukile amba shi Yehova webashinga māni, kalombolangapo muntu mukwabo. O mwanda mushingwe māni katulumukangapo shi bantu bamo kebetabijepo ponka na ponka’mba i mushingwe māni. Aye uyukile amba Bible i mwitusoñanye tuleke kukulupila bukidibukidi muntu yense witela’mba i mupebwe na Leza kiselwa kya pa bula. (Kus. 2:2) Mushingwe māni byakasakengapo bantu bamute mutyima bininge, o mwanda kasapwilangapo muntu yense waetana nandi amba ne mushingwe māni. Kadi kakeaninyapo bakwabo pa mwanda wa kushingwa māni.​—Tanga 1 Bene Kodinda 4:7, 8.

7. Lelo bene Kidishitu bashingwe māni kebafwaninwepo kulonga bika, ne mwanda waka?

⁷ Bene Kidishitu bashingwe māni kebamonengapo amba bafwaninwe enka kupityija kitatyi pa abo bene, bwa abo badi mu kisumpi kya makayo. Kebakimbengapo bashingwe māni bakwabo mwanda wa kwisambila pa mobashingīlwe māni nansha kwitana pamo mwanda wa kwifunda Bible. (Ngt. 1:15-17) Shi bashingwe māni badi balonga namino, longa kipwilo kekidipo mu bumo. Badi ba kulwa na mushipiditu ujila, mwine ukwasha bantu ba Leza bekale mu ndoe ne mu bumo.​—Loma 16:17, 18.

8. Mwanda waka tufwaninwe kudyumuka pa muswelo otumona boba badya ne kutoma ku byelekejo bya pa Kivulukilo? (Tala ne kunshi kwa dyani.)

⁸ Lelo tufwaninwe kumona namani batutu  ne bakaka bashingwe māni? I bibi kutendela muntu bininge, nansha shi i mwanabo na Kidishitu mushingwe māni. (Mat. 23:8-12) Kitatyi kīsambila Bible pa bakulumpe, witukankamikanga ‘twiule lwitabijo lwabo,’ inoko ketulombolangapo amba tufwaninwe kutūla muntu bu mwendeji wetu. (Bah. 13:7) I bine, Bible unena’mba bantu bamo bafwaninwe “kupebwa bulēme misunsa ibidi.” Ke mwandapo amba i bashingwe māni, ino i mwanda ‘bendejanga senene’ kadi “bengila bininge mu kwisamba ne kufundija.” (1 Tm. 5:17) Shi tutendela bashingwe māni bipitepite ne kwibata mutyima bininge, nabya tubwanya kwibafwija bumvu. * Kadi kibi kutabukidila, tukokeja kwibalengeja bekale na mitatulo. (Loma 12:3) Bine, i kutupu muntu mu bukata mwetu ukasaka kulonga kintu kibwanya kulengeja banababo na Kidishitu bashingwe māni baponene mu kino kilubo kikatampe!​—Luka 17:2.

9. Lelo i muswelo’ka otukalombola’mba tulēmekele bene Kidishitu bashingwe māni?

⁹ Lelo i muswelo’ka otukalombola’mba tulēmekele boba bashingilwe māni na Yehova? I na kuleka kwibepangula muswelo obashingilwe māni. Uno i mwanda utala muntu mwine, oketudipo na lupusa lwa kuyuka. (1 Ts. 4:11; 2 Ts. 3:11) Kadi ketufwaninwepo kulanga’mba wandi mulume nansha mukaji, bandi bambutwile, nansha bantu bakwabo ba mu kisaka nabo i bashingwe māni. I kutupu muntu upyananga mu kisaka lukulupilo lwandi lwa kwenda mūlu. Bamupanga’lo kudi Leza. (1 Ts. 2:12) Kadi ketufwaninwepo kwipangula bipangujo bisanshija bakwetu. Kimfwa, ketufwaninwepo kwipangula mukaja mushingwe māni mwawiivwanina pa kukekala na būmi bwa nyeke pano pa ntanda pampikwa wandi mulume. Bine, tukulupile na bubine amba mu ntanda mipya, Yehova ukavuija “bisaka mutyima wa bintu byonso byūmi.”​—Ñim. 145:16.

10. Lelo i muswelo’ka otukekinga shi tuleke ‘kutendela bantu’?

¹⁰ Shi ketumonepo bashingwe māni bu bantu ba mvubu kutabuka bakwabo, tukekinga batwe bene. Namani? Bible witulombola’mba bashingwe māni bamo babwanya kubulwa kikōkeji. (Mat. 25:10-12; 2 Pe. 2:20, 21) Shi tuleke ‘kutendela bantu,’ nabya ketukebalondapo, bekale i bashingwe māni nansha batutu bayukane senene, nansha boba ke bengidile Yehova kitatyi kilampe. (Yude 16, kunshi kwa dyani) Ne kadi shi ababulwe kikōkeji nansha kutamba mu kipwilo, ketukajimijapo lwitabijo lwetu mudi Yehova nansha kuleka’byo kumwingidila.

11. Le kibalwa kya boba badya mukate ne kutoma vinyu pa Kivulukilo kidi namani?

¹¹ Pano ke padi myaka mivule, kibalwa kya boba badya mukate ne kutoma vinyu pa Kivulukilo kyadi kyenda kityepa. Inoko mu ino myaka, kino kibalwa kyendanga kivudila’ko mwaka ne mwaka. Le tufwaninwe kulangalanga pa kino? Aa. Tulangulukilei bidi pa bintu bimobimo byoketufwaninwepo kwilwa.

12. Mwanda waka ketufwaninwepo kulangalanga pa kibalwa kya boba badya ne kutoma ku byelekejo bya pa Kivulukilo?

¹² “Yehova uyukile bandi.” (2 Tm. 2:19) Batutu babalanga boba badya mukate ne kutoma vinyu pa Kivulukilo i beshile na Yehova, mwanda abo kebayukangapo  ushingilwe māni bya bine i wepi. O mwanda mu kino kibalwa mudi ne boba balanga’mba i bashingwe māni abo papo kushingwa’o mpika. Kimfwa, bantu bamo badi badya mukate ne kutoma vinyu balekele’byo. Bakwabo badi na ñeni mijine nansha na misongo ya dityima ke balanga’mba bakabikala na Kidishitu momwa mūlu. Na bubine, ketuyukilepo biyampe buvule bwa bashingwe māni bashele’ko pano pa ntanda.

13. Le Bible unena bika pa bungi bwa bashingwe māni bakatanwa’ko pano pa ntanda kitatyi kikashilula kyamalwa kikatampe?

¹³ Pakāya Yesu kuselela bashingwe māni mūlu, bavule bakatanwa mu bifuko palapala bya pano pa ntanda. (Mat. 24:31) Bible unena’mba mu mafuku a mfulo, kukekalanga kibalwa kityetye kya bashingwe māni bashele’ko pano pa ntanda. (Kus. 12:17) Inoko katelelepo bungi bwa boba bakatanwa’ko pakashilula kyamalwa kikatampe.

14. Mungya Bene Loma 9:11, 16, le i bika byotufwaninwe kwivwanija pa muswelo utoñwanga bashingwe māni?

¹⁴ Yehova ye uyukile kitatyi kya kutonga bashingwe māni. (Loma 8:28-30) Yehova wāshilwile kutonga bashingwe māni pa kupwa kwa Yesu kusanguka. Bimweka’mba mu myaka katwa kabajinji, bene Kidishitu bonso ba bine bādi bashingwe māni. Myaka tutwa pa kupita’po, bantu bavule bādi betela bu bene Kidishitu kebādipo na bubine balonda Kidishitu. Nansha nankyo, mu mine myaka’ya, Yehova wāshingile māni bene Kidishitu ba bine batyetye kete. Bādi pamo bwa ñano yēsambīle’po Yesu amba ikatamina pamo na biyombo bityani. (Mat. 13:24-30) Mu  mafuku a mfulo, Yehova utoñanga nyeke bantu bakwabo ba kubadilwa mu ba 144 000. * Nanshi shi Leza watonge bantu bamo kumeso kwa mfulo kufika, na bubine ketukokejapo kutatana kyaebatongela. (Tanga Bene Loma 9:11, 16.) * Tufwaninwe kutadija kutyina twakekala pamo bwa bengidi bēsambīle’po Yesu mu kyelekejo kyandi kimo. Bātompwedile mfumwabo pa muswelo waāmwene bengidi bāshilwile kwingila mu nsá ya mfulo.​—Mat. 20:8-15.

15. Lelo bashingwe māni bonso i babunde “umpika mukōkele ne mudyumuke” utelelwe mu Mateo 24:45-47? Shintulula.

¹⁵ Ke bonsopo badi na lukulupilo lwa kwenda mūlu babundile “umpika mukōkele ne mudyumuke.” (Tanga Mateo 24:45-47.) Pamo bwa mu myaka katwa kabajinji, ba Yehova ne Yesu dyalelo bengidijanga bantu batyetye mwanda wa kudisha ne kufundija bantu bavule. Mu myaka katwa kabajinji, i enka bene Kidishitu bashingwe māni batyetye kete bāingidijibwe mwanda wa kulemba Bisonekwa bya Kingidiki bya Bwine Kidishitu. Dyalelo nadyo, i enka bene Kidishitu bashingwe māni batyetye kete badi na kiselwa kya kupa bantu ba Leza byakudya “pa kitatyi kifwaninwe.”

16. Lelo i bika byowefunda mu kino kishinte?

¹⁶ Lelo i bika byotwefunda mu kino kishinte? Yehova ye ukwatanga butyibi bwa kupa bantu bandi bavule būmi bwa nyeke pano pa ntanda ne kupa batyetye nabo, būmi bwa kukabikala na Yesu momwa mūlu. Yehova upalanga mpalo bengidi bandi bonso, “Muyuda” ne “bantu dikumi,” kadi wibasakilanga bakōkele bijila bimo byonka ne kushala nyeke bakōkele. Bonso bafwaninwe kwityepeja. Bonso bafwaninwe kwingidila pamo kadi umbumo. Kadi bonso bafwaninwe kulonga bukomo bwa kulama ndoe mu kipwilo. Pano potwafwena ku mfulo, twendelelei kwingidila Yehova ne kulonda Kidishitu bu “luombe lumo.”​—Yoa. 10:16.