1. Mbualu kayi buvua Yehowa muambe buvua ne bua kuenzeka matuku etu aa?

YEHOWA ukavua muambe bua matuku etu aa ne: “Bantu dikumi ba miakulu yonso ya bisamba nebakuate, eyowa, nebakuate bikole ku muzabi wa muena Yuda, bamba ne: ‘Tudi basue kuya nenu, bualu tudi bumvue ne: Nzambi udi nenu.’” (Zek. 8:23) Mu mvese eu, “muena Yuda” udi tshimfuanyi tshia bantu badi Nzambi muele manyi a nyuma muimpe. Badi bababikila kabidi ne: “Isalele wa Nzambi.” (Gal. 6:16) “Bantu dikumi” badi tshimfuanyi tshia bantu badi ne ditekemena dia kupeta muoyo wa tshiendelele pa buloba. Bu mudibu bamanye ne: Yehowa mmusungule kasumbu ka bela manyi aka, badi bamona ne: kutendelela Nzambi pamue nabu ndiakalenga dinene.

2. Mmushindu kayi udi “bantu dikumi” ‘baya’ ne bela manyi?

² Nansha mutudi katuyi mua kumanya dîna dia muela manyi yonso udi pa buloba lelu, * bantu badi ne ditekemena dia kusomba pa buloba badi mua “kuya” ne bela manyi. Mushindu kayi? Bible udi wamba ne: “bantu dikumi” bavua ne bua “[kukuata] bikole ku muzabi wa muena Yuda, bamba ne: ‘Tudi basue kuya nenu, bualu tudi bumvue ne: Nzambi udi nenu.’” Bible udi wakula bua muena Yuda umue. Kadi muaku “nenu” udi uleja bantu ba bungi. Bidi biumvuija ne: muena Yuda eu kena anu muntu umue to, kadi udi uleja kasumbu kajima ka bela manyi.  Bantu badi kabayi bela manyi badi benzela Yehowa mudimu pamue ne bela manyi. Kadi kabena bamona bela manyi bu balombodi babu to, bualu mbamanye ne: Yezu ke Mulombodi wabu.​—Mat. 23:10.

3. Nnkonko kayi ituandamuna mu tshiena-bualu etshi?

³ Bu mutshidi bena Kristo bela manyi munkatshi muetu lelu, bamue badi mua kudiebeja ne: 1) Mmunyi mudi bela manyi ne bua kudimona? 2) Mmunyi mutudi ne bua kuangata bantu badi badia diampa mu Tshivulukilu? 3) Bikala bungi bua bantu badi badia diampa buenda buvula, bidi ne bua kututonda anyi? Tshiena-bualu etshi netshiandamune nkonko eyi.

4. Ndidimuija kayi didi mu 1 Kolinto 11:27-29 didi bela manyi ne bua kuelela meji bikole menemene? Bua tshinyi?

⁴ Bela manyi badi ne bua kuela meji bikole menemene bua didimuija didi mu 1 Kolinto 11:27-29. (Bala.) Mmunyi mudi muela manyi mua kudia diampa ne kunua mvinyo mu Tshivulukilu “mu mushindu udi kawuyi muakanyine”? Udi mua kuenza nanku bikalaye mudie diampa ne munue mvinyo kadi kayi utumikila mikenji miakane ya Yehowa to. (Eb. 6:4-6; 10:26-29) Bela manyi mbamanye ne: bobu basue kupeta “difutu dia dibikila dia muulu dia  Nzambi ku butuangaji bua Kristo Yezu,” badi ne bua kushala ne lulamatu.​—Filip. 3:13-16.

5. Mmunyi mudi bena Kristo bela manyi ne bua kudimona?

⁵ Nyuma wa Yehowa udi wambuluisha batendeledi bende bua kuikala ne budipuekeshi, kabayi badibandisha to. (Ef. 4:1-3; Kolos. 3:10, 12) Nunku bela manyi kabatu badimona bapite bakuabu to. Mbamanye ne: Yehowa ki mmuenzejibue bua kupesha bela manyi nyuma wa bungi kupita utuye upesha batendeledi bende bakuabu to. Kabena bamona ne: bobu batu bumvua Bible bikole kupita bakuabu to. Kabena nansha mua kuambila muntu mukuabu ne: mbamusungule pende ne bidi bikengela abange kudia diampa mu Tshivulukilu to. Kadi mbamanye ne budipuekeshi buonso ne: anu Yehowa ke udi ubikila bantu bua kuya mu diulu.

6. Bilondeshile 1 Kolinto 4:7, 8, mmunyi mudi bena Kristo bela manyi ne bua kudituala?

⁶ Nansha mudi bela manyi bamona ne: dibikidibua bua kuya mu diulu ndiakalenga, kabena bindila bua bakuabu babenzele malu mu mushindu kampanda wa pa buawu to. (Filip. 2:2, 3) Mbamanye kabidi ne: padi Yehowa mubele manyi, ki mmuambile muntu to. Ke bualu kayi kabiena bikemesha muela manyi padi bakuabu kabayi bitaba musangu umue ne: mbamuele manyi to. Mmumanye ne: Bible udi utuambila ne: padi muntu wamba mudi Nzambi mumupeshe mudimu kampanda wa pa buawu, ki mbimpe kumuitaba musangu umue to. (Buak. 2:2) Bu mudi muena Kristo muela manyi kayi musue kudileja ku bantu, kakuambila bantu badiye utuilangana nabu bua musangu wa kumpala ne: mbamuele manyi to. Kena nansha mua kubabandishila makaya bua bualu abu to.​—Bala 1 Kolinto 4:7, 8.

7. Mmalu kayi adi bela manyi ne bua kuepuka? Bua tshinyi?

⁷ Bena Kristo bela manyi kabena bamona ne: bidi bikengela bikale basomba anu ne bela manyi nabu, benze bu bantu ba mu kasumbu kampanda to. Kabena benda bakebangana ne bela manyi bakuabu bua kuyukila nabu diedibua diabu dia manyi anyi bua kuenza nabu tusumbu bua kuikala kulonga Bible to. (Gal. 1:15-17) Bobu benza malu a nunku, badi bapangisha tshisumbu bua kuikala mu buobumue ne benza malu adi abengangana ne nyuma muimpe utu wambuluisha bantu ba Nzambi bua kuikala mu ditalala ne mu buobumue.​—Lomo 16:17, 18.

8. Bua tshinyi mbimpe udimuke bua mushidu uudi wangata bantu badi badia diampa mu Tshivulukilu? (Tangila kabidi dimanyisha.)

⁸ Mmunyi mutudi mua kuangata bana betu  badibu bele manyi? Kuanyisha muntu kunekesha, nansha yeye muanabu ne Kristo muela manyi ki nkuimpe to. (Mat. 23:8-12) Padi Bible wakula bua bakulu, udi utukankamija bua ‘kuidikija ditabuja diabu,’ kadi kena utuambila bua kuvuija muntu nansha umue mulombodi wetu to. (Eb. 13:7) Tudi bamanye ne: Bible udi wamba ne: kudi badi ‘bangatshibua bakumbane bua kupeshibua bunême misangu ibidi.’ Badi bangatshibua nanku bualu badi “balombola mu mushindu muimpe” ne “benza mudimu bikole mu kuakula ne mu kulongesha,” kadi ki mbualu mbela manyi to. (1 Tim. 5:17) Tuetu tutumbisha bela manyi ne tubatabalela kupita ne pa mukenji, bidi mua kubatonda. * Bualu bukuabu bubi menemene mbua ne: tudi mua kubafikisha ku didibandisha. (Lomo 12:3) Muntu nansha umue wa kutudi kakuitaba bua kuenza bualu kampanda budi mua kufikisha muela manyi muanabu ne Yezu bua kuenza bualu bubi bua mushindu eu to!​—Luka 17:2.

9. Mmunyi mutudi mua kuleja ne: tudi tunemeka bena Kristo bela manyi?

⁹ Mmunyi mutudi mua kuleja ne: tudi tunemeka bantu badi Yehowa muela manyi? Katuakubebeja bua kumanya mudibu balue bela manyi to. Ebu mbualu bua muntu nkayende butudi katuyi ne bukenji bua kumanya to. (1 Tes. 4:11; 2 Tes. 3:11) Katuena nansha mua kuela meji ne: babayabu anyi bakaji babu, baledi babu, peshi ba mu mêku abu bakuabu mbedibue pabu manyi to. Muntu kena upiana ditekemena dia kuya mu diulu bua mudiye muledibue mu dîku dia bakadi nadi to. Nzambi ke udi umupeshadi. (1 Tes. 2:12) Tudi kabidi ne bua kuepuka diela muntu nkonko idi mua kumutonda. Tshilejilu, katuakuebeja mukaji wa muela manyi mudiye umvua bua ditekemena dia kupeta muoyo wa kashidi pa buloba kayi ne bayende to. Tudi batuishibue bimpe ne: mu bulongolodi bupiabupia, Yehowa ‘neakumbaje dijinga dia tshintu tshionso tshidi ne muoyo.’​—Mis. 145:16.

10. Tuetu tuepuka tshilele tshia ‘kuanyisha bantu bakuabu,’ tudi tudikuba mushindu kayi?

¹⁰ Tuetu katuyi tuangata bela manyi ne mushinga wa bungi kupita bakuabu, tudi tudikuba petu. Mushindu kayi? Bible udi utuambila ne: bamue bela manyi badi mua kupanga mua kushala ne lulamatu. (Mat. 25:10-12; 2 Pet. 2:20, 21) Kadi tuetu tuepuka tshilele tshia ‘kuanyisha bantu bakuabu,’ katuakulonda bantu nansha kakese, nansha bobu bikale bele manyi anyi bamanyike bikole peshi benzele Yehowa mudimu kukadi bidimu bia bungi. (Yuda 16, dim.) Nanku bobu balue kupanga lulamatu anyi bapatuke mu bulongolodi, katuakujimija ditabuja dietu kudi Yehowa anyi kulekela kumuenzela mudimu to.

11. Ntshinyi tshidi tshienzeka bua bungi bua bantu badi badia diampa mu Tshivulukilu?

¹¹ Kukadi bidimu bia bungi bivua bungi bua bantu badi badia diampa mu Tshivulukilu buenda bukepa. Kadi bidimu bishale ebi, bungi abu mbubange kuvula ku tshidimu ne ku tshidimu. Bidi ne bua kututonda anyi? Tòo. Tuanji tumonayi malu kampanda manene atudi ne bua kumanya.

12. Bua tshinyi bungi bua bantu badi badia diampa mu Tshivulukilu kabuena ne bua kututonda?

¹² “Yehowa mmumanye badi bende.” (2 Tim. 2:19) Bana betu batu babala bungi bua bantu badi badia diampa mu Tshivulukilu kabatu bamanye muntu udibu bele manyi bulelela to; kadi Yehowa yeye mmumanye. Nunku mu bungi bua bantu abu mudi too ne badi  bela meji ne: mbabele manyi, kadi pabu kabayi babelawu to. Tshilejilu, bamue bavua badia diampa bakalua kulekela. Bakuabu badi mua kuikala basama mutu, bela meji ne: nebaye kukokesha ne Kristo mu diulu. Bidi bimueneka patoke ne: katuena bamanye menemene bungi bua bela manyi badi bashale pa buloba to.

13. Bible udi uleja bungi buashala bela manyi pa buloba patuadija dikenga dinene anyi?

¹³ Nekuikale bela manyi miaba ya bungi pa buloba padi Yezu ulua kubangata bua kuya nabu mu diulu. (Mat. 24:31) Bible udi wamba ne: mu matuku a ku nshikidilu, nekuikale bela manyi bakese pa buloba. (Buak. 12:17) Kadi kena wamba bungi buashalabu padi dikenga dinene dituadija to.

14. Anu mudi Lomo 9:11, 16 uleja, ntshinyi tshitudi ne bua kumanya bua disungula dia bela manyi?

¹⁴ Yehowa ke udi mumanye dîba didiye usungula bela manyi. (Lomo 8:28-30) Yehowa wakatuadija kusungula bela manyi panyima pa dibishibua dia Yezu ku lufu. Bidi bimueneka ne: bena Kristo bonso ba mu bidimu lukama bia kumpala bavua bela manyi. Kadi mu nkama ya bidimu yakalonda, ba bungi bavua badiamba muvuabu bena Kristo kabakalonda Kristo memenene to. Nansha nanku, mu bidimu abi, Yehowa wakela bantu bakese bavua bena Kristo balela manyi. Bavua benze bu blé ivua Yezu muambe ne: ivua ne bua kukolela mu lupela. (Mat. 13:24-30) Mu matuku a ku nshikidilu, Yehowa mmutungunuke ne kusungula bantu bikale mu bantu 144 000. * Nanku, bu mudi Yehowa Nzambi wa meji, yeye mumone ne: bidi bikengela kusungula bamue ba ku  bantu aba anu pakadi nshikidilu ukeba kufika, mu bulelela, katuena ne bua kumuela mpata to. (Bala Lomo 9:11, 16.) * Tudi ne bua kudimuka bua katuenji malu bu bena mudimu bavua Yezu muakuile mu tshilejilu kampanda tshivuaye mufile. Bakakula bibi bua tshivua mfumuabu muenzele bena mudimu bavua babange mudimu ba ndekelu.​—Mat. 20:8-15.

15. Bela manyi bonso badi benza “mupika wa lulamatu udi mudimuke” udibu bambe mu Matayi 24:45-47 anyi? Umvuija.

¹⁵ Ki mbantu bonso badi ne ditekemena dia kuya mu diulu badi benza “mupika wa lulamatu udi mudimuke” to. (Bala Matayi 24:45-47.) Anu bu mu bidimu lukama bia kumpala, lelu Yehowa ne Yezu badi benza mudimu ne bana betu bakese bua kudisha anyi kulongesha bantu ba bungi. Mu bidimu lukama bia kumpala, anu bena Kristo bela manyi bakese ke bavuabu bakuate nabu mudimu bua kufunda Mifundu ya mu tshiena Greke ya buena Kristo. Lelu kabidi, anu bena Kristo bela manyi bakese ke badi ne mudimu wa kupesha bantu ba Nzambi ‘biakudia mu tshikondo tshiakanyine.’

16. Ntshinyi tshiudi mulonge mu tshiena-bualu etshi?

¹⁶ Ntshinyi tshitudi balonge mu tshiena-bualu etshi? Yehowa ke udi mupeshe batendeledi bende ba bungi menemene ditekemena dia kupeta muoyo wa tshiendelele pa buloba, kadi mmupeshe bantu bakese ditekemena dia kuya kukokesha ne Yezu mu diulu. Yehowa neafute batendeledi bende bonso, tuambe ne: “muena Yuda” ne “bantu dikumi.” Udi kabidi ubalomba bua kutumikila mikenji ya muomumue ne kushala ne lulamatu. Bobu bonso badi ne bua kuikala ne budipuekeshi. Bobu bonso badi ne bua kumuenzela mudimu pamue ne kuikala mu buobumue. Badi kabidi ne bua kudienzeja bua kulama ditalala mu tshisumbu. Bu mukadi nshikidilu mulembelele, tutungunukayi ne kuenzela Yehowa mudimu ne kulonda Kristo bikale “tshisumbu tshimue.”​—Yone 10:16.