CHIHANDE CHAKULINANGULA 5
Natuya naYove
“Natuya nayove mwomwo tunevu ngwavo Kalunga ali nayove.”—ZEKA. 8:23.
MWASO 26 Mwangukafwile Ami
VYUMA NATUSHIMUTWILA *
Mikoko veka (“malunga likumi”) vatwama nakutokwa chakuzachila Yehova hamwe navaze vawavisa (“kaYuleya”) (Talenu palangalafu 1-2)
1. Chuma muka ahanjikile Yehova ngwenyi nachikasoloka mumakumbi ano?
YEHOVA ahanjikile kutalisa kulwola luno tuli nakuyoyelamo ngwenyi: “Malunga likumi vakumalimi akumafuchi osena navakakwata kuchikuto chakaYuleya nakwamba ngwavo: ‘Natuya nayove mwomwo tunevu ngwavo Kalunga ali nayove.’” (Zeka. 8:23) Ou “kaYuleya” emanyinako vatu vaze Kalunga awavisa nashipilitu yenyi yajila. Vatu kana vavavuluka nawa ngwavo, “Isalele yaKalunga.” (Ngale. 6:16) Kaha “malunga likumi” vemanyinako vatu vaze vakwechi lutalililo lwakukayoyela hano hamavu haya myaka yosena. Vatachikiza ngwavo, Yehova akisula eli lizavu lyavawavisa, kaha vamona ngwavo chapwa hikutokwa chachinene kumulemesela hamwe navakiko.
2. Uno “malunga likumi” veji ‘kuyanga’ ngachilihi hamwe navawavisa?
2 Numba tuhu chapwa chachikalu kutachikiza majina avosena vaze vawavisa vali hano hamavu makumbi ano, * oloze vatu vaze vatwama nalutalililo lwakukayoyela hano hamavu vanahase ‘kuya’ navo. Mujila muka? Mbimbiliya yamba ngwayo, “malunga likumi” “navakakwata kuchikuto chakaYuleya nakwamba ngwavo: ‘Natuya nayove mwomwo tunevu ngwavo Kalunga ali nayove.’” Numba tuhu Mbimbiliya muvesi kaneyi yavuluka kaYuleya umwe hakwamba ngwayo “yove,” oloze lizu kana lyatalisa kuvatu vavavulu. Echi chalumbununa nge ou kaYuleya kapwa mutu umweko, oloze emanyinako lizavu lyosena lyavawavisa. Mikoko veka veji kuzachilanga Yehova hamwe nalizavu kaneli. Chipwe ngocho, kavamona vawavisa kupwa vatwamina javoko mwomwo vatachikiza ngwavo Yesu ikiye Twamina yavo.—Mateu 23:10.
3. Vihula muka navakumbulula muchihande chino?
3 Hakuwana nge hamukana wavatu jaYehova makumbi ano hali navawavisa, ngocho vamwe vanahase kulihulisa ngwavo: (1) Uno vawavisa vatela kulimona ngachilihi? (2) Uno twatela kuvamona ngachilihi vaze veji kulyanga mbolo nakunwa vinyo haKwanuka Kufwa chaMwata? (3) Kutala twatela kulizakamina kachi nge vaze vali nakulya mbolo nakunwa vinyo vali nakuvulilako tahi? Chino chihande nachikumbulula vihula kanevi.
UNO VAWAVISA VATELA KULIMONA NGACHILIHI?
4. Mazu muka akuhuhumuna atwama hali Wavaka-Kolinde 1, 11:27-29 aze vatela kushinganyekaho chikuma vawavisa, kaha mwomwo ika?
4 Vawavisa vatela kushinganyeka chikuma hamazu akuhuhumuna atwama hali Wavaka-Kolinde 1, 11:27-29. (Tangenu.) Uno muka-Kulishitu vawavisa nahase ngachilihi kulya mbolo nakunwa vinyo “mujila yakuzeneka kutela” haKwanuka Kufwa chaMwata? Nahase kulinga ngocho nge mwalya nakunwa kuvifwanyisa oku ali nakuhokola jishimbi jaYehova jakwoloka. (Hepe. 6:4-6; 10:26-29) Shikaho vawavisa vatachikiza ngwavo vatela kupwa lika vakushishika numba vakatambule “fweto yakusanyika chaKalunga chamwilu kuhichila muli Kulishitu Yesu.”—Fwili. 3:13-16.
5. Uno vawavisa vatela kulimona ngachilihi?
5 Shipilitu yajila yaYehova yeji kukafwanga vangamba jenyi vapwenga vakulinyisa. (Efwe. 4:1-3; Kolo. 3:10, 12) Ngocho vawavisa kavalimona kupwa vavalemu kuhambakana vakwavoko. Vatachikiza ngwavo Yehova kavahana shipilitu yajila yayivulu kuhambakana mikoko vekako. Kaha nawa kavashinganyeka ngwavo vakiko kaha vatachikiza chikuma muchano wamuMbimbiliya kuhambakana mikoko vekako. Kaveshi kulweza mutu ngwavo naikiye vanamuwavisa, ngocho atela kuputuka kulya mbolo nakunwa vinyo haKwanuka Kufwa chaMwatako. Oloze vatachikiza ngwavo Yehova kaha ikiye eji kusanyikanga vaze veji kuyanga mwilu.
6. Kweseka nachisoneka chaWavaka-Kolinde 1, 4:7, 8, chuma muka chize kavatela kulinga vaka-Kulishitu vawavisako?
6 Numba tuhu vawavisa vatachikiza ngwavo chapwa hikutokwa chachinene kuvasakula kuya mwilu, oloze kavasaka vatu vavamonenga kupwa hivatu vakulipwilako. (Fwili. 2:2, 3) Kaha nawa vatachikiza ngwavo omu Yehova avawavishile, kalwezele vatu veka chuma kanechiko. Ngocho mutu uze vawavisa keshi kulikomokelako nge vatu vamwe navahona kwitavila hahaze vene ngwavo vanamuwavisa. Kaha nawa eji kutachikizanga ngwenyi Mbimbiliya yatuhuhumuna tuhonenga kwitavila washi mutu nge mwatulweza ngwenyi Kalunga namuhane milimo yakulipwila. (Kuso. 2:2) Hakuwana nge mutu uze vawavisa kasaka vatu vamumone kupwa himutu wakulipwilako, ngocho keshi kulweza vatu mwawana ngwenyi vanamuwavisako. Kaha nawa keshi kulitukwojola kuli vakwavoko.—Tangenu Wavaka-Kolinde 1, 4:7, 8.
7. Chuma muka kavatela kulinga vaze vawavisa, kaha mwomwo ika?
7 Vaka-Kulishitu vawavisa kavatela kulikatanga kaha navakwavo vawavisako, mwomwo kulinga ngocho nachisolola nge vanatungu kalizavu kavo kakulipwila. Kaveshi kutondatonda vakwavo vawavisa mangana vashimutwilenga vihande vyakupandama kukuwavisa chipwe vatunge tumazavu twakulinangulanga Mbimbiliyako. (Ngale. 1:15-17) Kachi nge navalinga ngocho, kaha chikungulwilo kacheshi kulinungako. Chuma kana nachipwa kwimanyina nakole shipilitu yajila, yize yeji kulingisanga vatu jaKalunga vatwame mukuunda nakulinunga.—Loma 16:17, 18.
UNO TWATELA KUMONA NGACHILIHI VAWAVISA?
Katwatela kumona vawavisa chipwe kala vandumbwetu veji kutetekelanga kwijiva nge hivatu vavalemu chikuma vaze vaya fumako (Talenu palangalafu 8) *
8. Mwomwo ika chapwila chakuhenga kumona vaze veji kulyanga nakunwa kuvifwanyisa haKwanuka Kufwa chaMwata kupwa vavalemu chikuma? (Talenu nawa kwinyikila chamwishi.)
8 Uno twatela kumona ngachilihi vandumbwetu vawavisa? Nachipwa chakuhenga kumona mutu kupwa wamulemu chikuma, numba apwa ndumbwaKulishitu. (Mateu 23:8-12) Numba tuhu Mbimbiliya yatulweza ‘tulondezeze lufwelelo’ lwavakulwane muchikungulwilo, oloze yatuhuhumuna tuhone kumona mutu kupwa twamina yetu. (Hepe. 13:7) Mbimbiliya yamba ngwayo, vamwe “vatela kuvahana kavumbi kakanene,” mwomwo “veji kutwaminyinanga mujila yamwenemwene,” kaha nawa “veji kuzatanga chikuma milimo yakuhanjika nakunangula.” Oloze kayatulweza tuvumbikenga mutu mwomwo yakumuwavisako. (Chimo. 1, 5:17) Nge natwalisa chikuma vaze vawavisa nakuvamona kupwa vavalemu chikuma, kaha vanahase kwivwa sonyi. * Chinahase nawa kuvalingisa valivwimbe. (Loma 12:3) Naumwe wauchi mwasaka kulinga kala chuma chize nachilingisa vandumbu jaKulishitu vahukane.—Luka 17:2.
9. Uno natusolola ngachilihi ngwetu twavumbika vaka-Kulishitu vawavisa?
9 Uno natusolola ngachilihi ngwetu twavumbika vatu vaze awavisa Yehova? Katweshi kuvahulisa vatulweze omwo vavawavishileko. Etu katweshi nalisesa lyakutachikiza chuma kanako, mwomwo hichuma chakutachikiza kaha mutu ivene. (Teso. 1, 4:11; Teso. 2, 3:11) Kaha nawa katwatela kushinganyeka ngwetu malunga javo, chipwe mapwevo javo, chipwe visemi javo, chipwe vausoko wavo veka navakiko vapwa vakuwavisako. Mutu keshi kuswana lutalililo kufuma kuli vaka-tanga yenyiko, oloze Kalunga ikiye eji kuhananga mutu lutalililo kana. (Teso. 1, 2:12) Katwatela nawa kuhulisanga vakwetu vihula vize navivafutwisako. Chakutalilaho, katwatela kuhulisa pwevo lyandumbwetu vawavisa omu eji kwivwanga hakushinganyeka kukayoyela hano hamavu haya myaka yosena chakuzeneka muka-mahyenyiko. Tuvosena twatachikiza chikupu ngwetu mukaye kakahya, Yehova mwakekuchisa “vyuma vyakuyoya vyosena.”—Samu 145:16.
10. Uno kuhona kukavangiza mutu nachitukinga ngachilihi?
10 Nge katweshi kumona vawavisa kupwa vavalemu chikuma kuhambakana vatu vekako, kaha natulikinga etu vavene. Mujila muka? Mbimbiliya yatulweza ngwayo, vawavisa vamwe vanahase kuhona kutwalaho lika kupwa vakushishika. (Mateu 25:10-12; Petu. 2, 2:20, 21) Chapwa chakuhenga kukavangiza kala mutu, chipwe vene uze vawavisa, chipwe uze vatachikiza chikuma vatu, chipwe uze nazachila Yehova hamyaka yayivulu. (Yuta 16) Nge navahona kutwalaho lika kupwa vakushishika chipwe nge navaseza chikungulwilo, etu katweshi kulitwamina kufwelela Yehova nakulitwamina kumuzachilako.
KUTALA TWATELA KULIZAKAMINA KACHI NGE VAZE VALI NAKULYA MBOLO NAKUNWA VINYO VALI NAKUVULILAKO TAHI?
11. Vyuma muka vinasolokanga kutalisa kukuvula chavaze veji kulyanga nakunwa kuvifwanyisa?
11 Hamyaka yayivulu, kuvula chavatu vaze vanalinga mbolo nakunwa vinyo haKwanuka Kufwa chaMwata chinapunga nakukehelako. Oloze mumyaka yakalinwaha, vatu kana vanavulilangako lika. Uno twatela kulizakamina hachuma kana tahi? Nduma. Tuchitalenu ovyo katwatela kulizakaminako.
12. Mwomwo ika katwatela kulizakaminako omu vaze vali nakulya mbolo nakunwa vinyo vali nakuvulilako?
12 “Yehova atachikiza vaze vanapu venyi.” (Chimo. 2, 2:19) Vandumbwetu vaze veji kulavanga vatu vaze vanali mbolo nakunwa vinyo haKwanuka Kufwa chaMwata kavatachikiza chikupu mutu uze vanawavisa kuli Yehovako. Ngocho veji kulavanga navatu vaze veji kushinganyekanga ngwavo vavawavisa, kumana chiku. Chakutalilaho, vatu vamwe vaze valilenga mbolo nakunwa vinyo vanalitwamina jino. Veka vanalinga mbolo nakunwa vinyo mwomwo yakuviza muwongo chipwe mwomwo yakuvayangila, kaha vashinganyeka ngwavo navakayula hamwe naKulishitu mwilu. Chikupu vene, katwatachikiza kanawa kuvula chavaze vawavisa vachili hano hamavuko.
13. Uno Mbimbiliya yasolola kuvula chavawavisa vaze navakapwako halwola nalukaputuka luyando lwalunene tahi?
13 Kuvihela vyavivulu hano hamavu nakukapwa vawavisa halwola mwakeza Yesu nakuvambata akaye navo mwilu. (Mateu 24:31) Mbimbiliya nawa yasolola nge hamakumbi akukuminyina, hamavu nahakasala vawavisa vavandende kaha. (Kuso. 12:17) Oloze kayasolola kuvula chavaze vawavisa vatela kukapwako halwola nalukaputuka luyando lwaluneneko.
Uno twatela kumona ngachilihi mutu uze mwalya mbolo nakunwa vinyo haKwanuka Kufwa chaMwata? (Talenu palangalafu 14)
14. Kweseka namukanda Wavaka-Loma 9:11, 16, vyuma muka twatela kutachikiza kupandama kukusakula vaze navakaya mwilu?
14 Yehova ikiye atachikiza lwola eji kusakulanga vawavisa. (Loma 8:28-30) Yehova aputukile kusakula vaze navakaya mwilu kufuma hakusangula Yesu. Chasoloka nge mulikulukaji lyamyaka lyakulivanga, vaka-Kulishitu vamuchano vosena vapwile vakuwavisa. Hamyaka yayivulu yakavangijileho, vatu vavavulu vaze valivulukilenga kupwa vaka-Kulishitu kavakavangijilenga Kulishituko. Chipwe ngocho, kwapwile vaka-Kulishitu vavandende vamuchano vaze awavishile Yehova. Vapwilenga nge tiliku yize Yesu ambile ngwenyi nayikakolela hamwe namwila. (Mateu 13:24-30) Mumakumbi ano akukuminyina, Yehova achili nakusakula vatu vapwenga hamukana wavaze 144,000. * Nge Kalunga ali nakusaka kuwavisa vatu vakwavo shimbu kanda kukuma chizenga, kaha twatela kufwelela ngwetu ali nakulinga chuma chakwoloka. (Tangenu Wavaka-Loma 9:11, 16.) * Twatela kuzangama, mokomoko natulinga nge muze valingile vaka-kuzata vaze avulukile Yesu muchishimo. Vatu kana vayayavalile kuli mwata wavo mwomwo yakuvahana fweto yakuteseka hamwe navaze engishile milimo haola yakukuminyina.—Mateu 20:8-15.
15. Uno vawavisa vosena vatwama mulizavu “[lya]ndungo wakushishika wakuzangama” uze vavuluka hali Mateu 24:45-47 tahi? Lumbununenu.
15 Keshi nge vosena vaze vatwama nalutalililo lwakukayoyela mwilu vatwama halizavu ‘lyandungo wakushishika wakuzangamako.’ (Tangenu Mateu 24:45-47.) Ngana muze chapwile mulikulukaji lyamyaka lyakulivanga, Yehova naYesu vali nakuzachisa lizavu lyalindende mangana valise, chipwe ngwetu kunangula vatu vavavulu. Mulikulukaji lyamyaka lyakulivanga, Kalunga azachishile vaka-Kulishitu vawavisa vavandende kaha mangana vasoneke Visoneka VyachiHelase vyaVaka-Kulishitu. Makumbi ano nawa, vaka-Kulishitu vawavisa vavandende kaha vakiko vakwechi mulimo wakuhana vatu jaKalunga ‘kulya halwola lwakutamo.’
16. Vyuma muka munalinangula muchihande chino?
16 Vyuma muka tunalinangula muchihande chino? Yehova mwakahana vatu jenyi vavavulu kuyoya chahaya myaka yosena hano hamavu, kaha veka mwakavahana kuyoya mwilu muze navakayula hamwe naYesu. Yehova mwakahana fweto vangamba jenyi vosena, ‘nakaYuleya’ navaze “malunga likumi,” kaha nawa asaka vononoke jishimbi jojimwe nakupwa lika vakushishika. Vosena vatela kupwa vakulinyisa, nakuzachila Kalunga hamwe nakupwa vakulinunga. Kaha nawa vosena vatela kukilikita mangana muchikungulwilo mupwenga lika kuunda. Omu tuli nakupandama kwakamwihi nakukuma chakano kaye, twatela kutwalaho lika kuzachila Yehova nakukavangiza Kulishitu hakupwa “utanga umwe.”—Yowa. 10:16.
^ par. 5 Uno mwaka, chilika chaKwanuka Kufwa chaMwata nachipwako LyaChivali haApril 7. Uno twatela kumona ngachilihi vaze veji kulyanga kuvifwanyisa hachilika kana? Kutala twatela kulizakamina kachi nge vali nakuvulilako tahi? Vihula kana navavikumbulula muchihande chino. Kaha nawa chino chihande chinalifwane nachize chapwile muKaposhi Kakutalila waJanuary 2016.
^ par. 2 Kweseka namukanda waSamu 87:5, 6, kulutwe Kalunga nahase kukatulweza majina avosena vaze navakayula naYesu mwilu.—Loma 8:19.
^ par. 8 Talenu lipwata lyakwamba ngwavo, “Zangi ‘Kayeshi Kulinga Mwakuhingamako,’” muKaposhi Kakutalila waJanuary 2016.
^ par. 14 Numba tuhu mukanda waVilinga 2:33 wasolola nge Yesu naikiye akwechi chazano hakuwavisa mutu, oloze Yehova ikiye eji kusanyikanga mutu kana.
^ par. 14 Nge muli nakusaka mijimbu yayivulu, kaha talenu “Vihula Vyakufuma Kuli Vaka-Kutanga” muKaposhi Kakutalila kaMay 1, 2007.
MWASO 34 Kutambuka muKulonga
^ par. 56 MAZU AKULUMBUNUNA MUVWIMBIMBI: Chapwa chakuhenga kuumbukila muka-kwimanyinako chikota napuwenyi mangana muvakope jifwato.
