CHIBAABA CHAKUDIZA 5
Tukuya Nanenu
“Tuyi nenu, muloña tunatiyi nawu Nzambi mwekala nindi.”—ZEK. 8:23.
KAMINA 26 Mwankoñeleli
NSAÑU YIDI MUCHIBAABA *
Anyikoku amakwawu (‘amayala ikumi’) akweti kukoleka kwakudifukula kudi Yehova hamu nawawayishewa (‘kaYudeya’) (Talenu maparagilafu 1-2)
1. Yumanyi yahosheliyi Yehova nindi yakamwekana munanu mafuku?
YEHOVA wahosheleñahu dehi kutalisha munanu mafuku nindi, “ikumi dawamayala akunyuza yamadimi ejima, akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” (Zek. 8:23) ‘KaYudeya’ nakwimenaku antu awayishayi Nzambi naspiritu yajila. Ayitenaña cheñi nawu, “Isarela waNzambi.” (Ñal. 6:16) ‘Amayala ikumi’ emenañaku antu akweti kuchiñeja kwakushakama hamaseki haya nyaaka. Eluka nawu Yehova wakiswila idi izanvu dawawayishewa nawa nawu hikukooleka kudifukula kudi Yehova hamu nawu.
2. Indi ‘amayala ikumi’ ‘ayaña’ ñahi nawawayishewa?
2 Hela chakwila chakala kwiluka majina awantu ejima awayishewa makonu, * ana adi nakuchiñeja kwakushakama hamaseki anateli ‘kuya’ hamu nawawayishewa. Munjilanyi? Bayibolu yahosha nawu ‘amayala ikumi’ “akakwata kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” Iyi vasi yatena kaYudeya wumu. Ilaña nhoshelu yakwila nawu “tuyi nenu” niyakwila nawu “mwekala nindi” yinatalishi kudi antu amavulu. Ichi hichinayi mukwila nawu iwu kaYudeya himuntu wumu hohuku, ilaña nakwimenaku izanvu dejima dawawayishewa. Ilaña ana abula kuwayishawu amukalakelaña Yehova hamu nawawayishewa. Hela chochu, hiyamonaña awayishewa neyi anlomboli jawuku, ilaña eluka nawu Yesu diyi nlomboli yawu.—Mat. 23:10.
3. Tukwakula malwihwinyi muchinu chibaaba?
3 Chineli hakachi kawantu jaNzambi makonu hadi awayishewa, antu amakwawu anateli kudiwula nawu: (1) Awayishewa atela kudimona ñahi? (2) Twatela kwila ñahi nawantu adaña kuyifwikija haChanukishu? (3) Komana twatela kwakamena neyi antu anakuda kuyifwikija anakuvulilaku? Achinu chibaaba chikwakula awa malwihu.
AWAYISHEWA ATELA KUDIMONA ÑAHI?
4. Kusoñamishanyi kwekala ha 1 Akorinda 11:27-29 kwatela kutoñojokawu chikupu awayishewa, nawa muloñadi?
4 Awayishewa atela kutoñojoka chikupu hakusoñamisha kwekala ha 1 Akorinda 11:27-29. (Tañenu.) Muntu wawayishewa nateli kuda ñahi haChanukishu “henohu nateleli wanyi”? Nateli kwila mwenimu neyi wadiili nikunwa yifwikija henohu wadiña nakufumpa nshimbi jaYehova. (Heb. 6:4-6; 10:26-29) Awayishewa eluka nawu atela kwikala ashinshika hakwila akatambwili “wufwetu wamutambi wamwiwulu waNzambi kuhitila mudi Kristu Yesu.”—Fwi. 3:13-16.
5. AkwaKristu awayishewa atela kudimona ñahi?
5 Spiritu yajila yaYehova yakwashaña ambuña indi kwikala adizoza bayi adivwimbaku. (Efwe. 4:1-3; Kol. 3:10, 12) Dichi awayishewa hiyatoñojokaña nawu alema kubadika akwawuku. Eluka nawu Yehova wenkaña ambuñindi ejima spiritu yajila. Hiyatoñojokaña nawu elukisha Bayibolu kubadika amakwawuku. Nawa hiyalejaña muntu wudi wejima nawu nawayishewi nawa watela kutachika kuda haChanukishuku. Ilaña, ekala adizoza nawa eluka nawu Yehova hohu diyi wunateli kutambika antu kuya mwiwulu.
6. Kwesekeja na 1 Akorinda 4:7, 8, akwaKristu awayishewa atela kwila ñahi?
6 Hela chakwila awayishewa eluka nawu hikukooleka kuya mwiwulu, akeñaña wanyi kuyilemesha kudi antu. (Fwi. 2:2, 3) Eluka cheñi nawu Yehova chayiwayishiliyi halejeluhu muntu wudi wejimaku. Dichi muntu wawayishewa wahayamaña wanyi neyi antu amakwawu ajinoka nawu anamuwayishi. Weluka nindi Bayibolu yashimuna nawu hitwatela kushikena dakukuhwelela muntu wudi wejima wahoshaña nindi Nzambi namwinki mudimu walemaku. (Chim. 2:2) MukwaKristu wawayishewa wakeñaña wanyi antu kusweja kumulemesha. Dichi, halejaña antu nindi wawayishewaku. Nawa waditiyaña wanyi kudi antu nindi wawayishewa.—Tañenu 1 Akorinda 4:7, 8.
7. Chumanyi chabulaña kwilawu awayishewa, nawa muloñadi?
7 AkwaKristu awayishewa atoñojokaña wanyi nawu atela kuhanjeka hohu nawakwawu awayishewa, neyi kwiji adi mukadizanvu. Hiyakeñakeñaña akwawu awayishewa kulonda ahanjekeña hakuwayishewa kwawu hela kubulakana mumazanvu kulonda atañileña hamu Bayiboluku. (Ñal. 1:15-17) Chipompelu chinateli kunuñañana wanyi neyi awayishewa elileña mwenimu. Nawa chadi kumwekesha nawu anakwila chambukaku nachakeñaña spiritu yajila, yakwashaña antu kwikala mukuwunda nawa anuñañana.—Rom. 16:17, 18.
MWATELA KWILA ÑAHI NAWAWAYISHEWA?
Hitwatela kulemesha awayishewa hela antu alombolaña neyi antu aya mpuhuku (Talenu paragilafu 8) *
8. Muloñadi chitwatela kwikalila asoñama kulonda tubuli kusweja kulemesha antu adaña kuyifwikija yahaChanukishu? (Talenu cheñi tumazu twaheshina.)
8 Twatela kwila ñahi nawamanakwetu niahela awayishewa? Chatama kukumbwa muntu nankashi, hela chakwila wekala manakwaKristu wawayishewa. (Mat. 23:8-12) Bayibolu neyi yinakuhosha hadi akulumpi, yatukoleshaña ‘kwimbujola chikuhwelelu chawu,’ ilaña hiyatulejaña kwilisha muntu wudi wejima kwikala nlomboli yetuku. (Heb. 13:7) Bayibolu yahosha nawu antu amakwawu atela “kuyilemesha chikupu.” Muloña wakwila “alombolaña munjila yayiwahi” nawa “adikitaña nankashi mukuhosha nimukutañisha,” bayi hamuloña wakuwayishewaku. (1 Tim. 5:17) Neyi tusweja kuhameka awayishewa, tukuyitiyisha nsonyi. * Chuma chasweja kutama tuyiletesha awa antu kutachika kudimona neyi alema nankashi. (Rom. 12:3) Kwosi muntu niwumu wunakukeña kwila chuma chikuletesha amanakwaKristu awayishewa kwila chuma chamuchidiwuku.—Luka 17:2.
9. Tunateli kumwekesha ñahi netu twalemesha akwaKristu awayishewa?
9 Tunateli kumwekesha ñahi netu twalemesha antu awayishawu kudi Yehova? Hitwatela kuyihula chayiwayishiliwuku. Iyi hinsañu yawu, dichi, hitukweti wuswa wakuyihulaku. (1 Tes. 4:11; 2 Tes. 3:11) Nawa hitwatela kutoñojoka cheñi netu hadaha anfumwawu, añodawu, anvwali jawu hela antaña jawu niwena awayishewaku. Muntu hatela kwikala nakuchiñeja kwamwiwulu muloña wachisaka chindiku. Kwafumaña kudi Nzambi. (1 Tes. 2:12) Twatela cheñi kutondolwela kwihula malwihu akuneñesha antu amakwawuku. Chakutalilahu, hitwatela kwihula ñoda manakwetu wawayishewa chakatiyañayi kushakama hamaseki haya nyaaka chakadi nfumwindiku. Tweluka netu mwituña dadiha “yuma yejima yikweti wumi [akayikutishaña] nayuma yakeñawu” kudi Yehova.—Mas. 145:16.
10. Tukudikiña ñahi neyi tutondolwela ‘kulemesha antu kumesu’?
10 Tukudikiña etu aweni neyi tukumonaña netu awayishewa asweja kulema wanyi kubadika antu amakwawu. Munjilanyi? Bayibolu yatuleja nawu awayishewa amakwawu hiyanateli kutwalekahu kwikala ashinshikaku. (Mat. 25:10-12; 2 Pet. 2:20, 21) Ilaña neyi tutondolwelaña ‘kulemesha antu kumesu,’ tukulondelaña wanyi antu hela chakwila awayishewa, ayampuhu hela anamukalakeli Yehova hadi yaaka yayivulu. (Yuda 16) Dichi, neyi abula kwikala ashinshika hela afuma muchipompelu, tukuleka wanyi kwikala ashinshika kudi Yehova hela kuleka kumukalakela.
KOMANA TWATELA KWAKAMENA NAKUVULA KWAWANTU ANAKUDA KUYIFWIKIJA?
11. Chumanyi chinakumwekana kutalisha hakuvula kwawantu adaña haChanukishu?
11 Yaaka yayivulu yinahitihu, antu adileña haChanukishu adiña nakukehelaku. Ilaña makonu, antu anakuda kuyifwikija anakuvulilaku hachaaka-hachaaka. Komana twatela kwakamena? Inehi. Tushinshikenu chikuletesha tubuli kwakamena.
12. Muloñadi wutwatela kubula kwakamena hakuvula kwawantu adaña kuyifwikija yahaChanukishu?
12 “Yehova weluka antu jindi.” (2 Tim. 2:19) Kwambukaku naYehova, amanakwetu achindaña antu adaña kuyifwikija haChanukishu elukaña wanyi muntu wawayishewa. Dichi kuvula kwawantu adaña munabombeli ninana atoñojokaña nawu awayishewa henohu awayishewa wanyi. Chakutalilahu, antu amakwawu adiileña enjili nakuleka. Amakwawu akata munyitu nawa akuhwelelaña nawu akayuula hamu naKristu mwiwulu. Kuhosha hohu chalala, hituneluki kuvula kwawantu awayishewa achidi hamasekiku.
13. Komana Bayibolu yashimuna kuvula kwawawayishewa akekala hamaseki hampinji yakatachika lukadi lwasweja?
13 Yesu wakawana awayishewa kumaluña ashiyashana hakenzayi nakuyitwala mwiwulu. (Mat. 24:31) Bayibolu yamwekeshaña cheñi nawu kumafuku akukuminina, awayishewa akawanawu hamaseki akekala antesha. (Chim. 12:17) Ilaña yashimuna wanyi kuvula kwawawayishewa akashalahu hampinji yakatachika lukadi lwasweja.
Tunateli kwila ñahi neyi muntu yada kuyifwikija yahaChanukishu? (Talenu paragilafu 14)
14. Neyi chinamwekeshiwu haAroma 9:11, 16, chumanyi chitwatela kwiluka kutalisha hakutonda awayishewa?
14 Yehova weluka mpinji yatondañayi awayishewa. (Rom. 8:28-30) Yehova watachikili kutonda awayishewa hanyima yakumusañula Yesu. Chinamwekani neyi mumafuku awapostolu, akwaKristu alala ejima ayiwayishili. Chimwahitili yaaka yayivulu, antu amavulu adiña nakuditena nawu akwaKristu amulondeleli Kristu wanyi. Hela chochu, hayina mpinji, Yehova wawayishili antu antesha adiña akwaKristu alala. Adiña neyi tidiku yahosheliyi Yesu nindi yakakulila hamu namatahu. (Mat. 13:24-30) Munanu mafuku akukuminina, Yehova natwalekuhu kutonda antu kwikala hamukanka wawa 144,000. * Dichi Nzambi neyi nafuukuluhu kutonda antu amakwawu henohu kukuma kanda, twatela kujinoka wanyi munafuukuliyi. (Tañenu Aroma 9:11, 16.) * Twatela kubabala kuchiina twakenda kela neyi chelili akwakukalakala ashimwiniyi Yesu muchishimu chindi. Atobeli nachayililiyi mwanta wawu ana enjili nakuzata kumakumishilu.—Mat. 20:8-15.
15. Komana awayishewa ejima ashimunawu haMatewu 24:45-47, ekala hakachi “[kanduñu] wamaana nikashinshi”? Lumbululenu.
15 Bayi neyi antu ejima akweti kuchiñeja kwakushakama mwiwulu ekala ‘nduñu wamaana nikashinshiku.’ (Tañenu Matewu 24:45-47.) Neyi chochadiña mumafuku awapostolu, makonu Yehova niYesu anakuzatisha antu antesha kulonda adiishi hela kudizisha antu amavulu. Mumafuku awapostolu akwaKristu awayishewa antesha hohu diwu azatishiliwu kusoneka Nyikanda yachiGiriki yawakwaKristu. Makonu, akwaKristu awayishewa antesha hohu diwu akweti mudimu wakwinka antu jaNzambi ‘yakuda hampinji yatelela.’
16. Yumanyi yimunadizi muchinu chibaaba?
16 Yumanyi yitunadizi muchinu chibaaba? Yehova wafuukulahu kwinka antu jindi amavulu hanu hamaseki wumi wahaya nyaaka niantu antesha akayuulaña naYesu mwiwulu. Yehova wayinkaña ambuña indi wuloku, ‘kaYudeya’ ‘niamayala ikumi,’ nawa wakeñaña nindi wejima wawu ovwahileña lushimbi lwolumu nikwikala ashinshika. Wejima wawu atela kwikala adizoza. Ejima wawu atela kumukalakela Nzambi hamu nikwikala anuñañana. Nawa ejima atela kutwalekahu kuleta kuwunda muchipompelu. Chitunakuswila kwakwihi nakukuma kwakaayi, tutwalekihu kumukalakela Yehova nikulondela Kristu neyi “mukanka wumu.”—Yow. 10:16.
^ para. 5 Chanukishu chakwanakana kufwa kwaKristu muchinu chaaka, chakekalaku Hachiyedi, April 7. Tunateli kuyimona ñahi antu akada kuyifwikija hanidi ifuku? Komana twatela kwakamena neyi chakwila antu anakuda kuyifwikija anakuvulilaku? Ñakwilu yanawa malwihu tukuyiwana muchinu chibaaba chinashindameni hachibaaba chidi mu Kaposhi Kakutalila ka January 2016.
^ para. 2 Kwesekeja na Masamu 87:5, 6, kumbidi, Nzambi wakashimuna majina awantu akayuula naYesu mwiwulu.—Rom. 8:19.
^ para. 8 Talenu chikasha chinakwila nawu Kukeña “Hikwelaña Chuma Chabula Kutelaku” muKaposhi Kakutalila ka January 2016.
^ para. 14 Hela chakwila Yilwilu 2:33 yamwekeshaña nawu spiritu yajila ayihuñunwini kuhitila mudi Yesu, ilaña Yehova diyi watambikaña.
^ para. 14 Neyi munakukeña nsañu jajivulu, talenu “Malwihu Kufuma Kudi Antañi” muKaposhi Kakutalila kaEnglish ka May 1, 2007.
KAMINA 34 Kwenda muKuloña
^ para. 56 KULUMBULULA NYEVULU: Fwikijenu ñimenu wakasanji keneni niñodindi anayinyeñumuki kudi antu nakuyikwata nyevulu hakupompa kweluña. Chatama nankashi
