ZIR TUR THUZIAK 5
In Zîngah Kan Tel Ve Dâwn
“In zîngah kan tel ve dâwn, LALPA chu in hnênah a awm tih kan hria a ni.”—ZAK. 8:23, C.L. Re-edited.
HLA 26 Ka Tâna Ti In Ni
THLIR LAWKNA *
Berâm dangte (“mi sâwm”) chuan hriak thihte (“Juda pakhat”) ruala Jehova biak theihna chanvo hlu an nei (Paragraphs 1-2-na en rawh)
1. Jehova’n kan hun laia thilthleng tûr chungchâng eng nge a sawi?
JEHOVA chuan kan hun lai chungchângah: “Hnam tin leh ṭawng tin zînga mi sâwm an lo kal ang a, Juda pakhat kawrfual vuan chungin ‘in zîngah kan tel ve dâwn, LALPA chu in hnênah a awm tih kan hria a ni,’ an ti ang,” tiin a sawi lâwk a. (Zak. 8:23, C.L. Re-edited) “Juda pakhat” chuan Pathianin thlarau thianghlima hriak thihte chu a entîr a. Anni chu “Pathian Israelte,” tia koh an ni bawk. (Gal. 6:16) “Mi sâwm” chuan leia chatuan nun beiseina neite a entîr a. Anni chuan Jehova’n hriak thihte chu mal a sâwm tih an hriat avângin, an ruala Pathian biak chu chawimawinaah an ngai a ni.
2. Engtin nge “mi sâwm” chu hriak thihte zînga an “tel ve”?
2 Tûn laiah hriak thih memberte hming chu hriat vek theih ni lo mah se, * leia chatuana nun beiseitute chu hriak thihte zîngah an “tel ve” thei a ni. Engtin nge? “Mi sâwm” chuan Juda pakhat kawrfual vuan chungin ‘in zîngah kan tel ve dâwn, LALPA chu in hnênah a awm tih kan hria a ni, an ti ang,’ tih Bible chuan a sawi a. He Bible châng hian Juda pakhat chungchâng a sawi a. Mahse, “in zîngah” tih leh “in hnênah” tih ṭawngkamte hian mi pakhat aia tam a kâwk a ni. Chuvângin, Juda mi chuan pakhat chauh ni lovin, hriak thih pâwlho a entîr a. Hriak thih ni lote chuan hriak thihte rualin Jehova rawng an bâwl a ni. Mahse, anni chuan Isua’n hruaitu nihna a chelh tih an hriat avângin, hriak thihte chu an hruaitute angin an thlîr lo.—Mt. 23:10.
3. He thuziakah hian eng zawhnate nge chhân a nih ang?
3 Tûn laiah, Pathian mite zînga hriak thih Kristiante an la awm avângin, ṭhenkhat chuan: (1) Engtin nge hriak thihte chuan mahni an inthlîr ang? (2) Hriatrengna chhang leh uain kîltute chu engtin nge kan cheibâwl ang? (3) Chhang leh uain kîltute an pung chho zêl a nih chuan kan lo buai a ngai em? tiin an ngaituah mai thei. He thuziakah hian chûng zawhnate chu chhân a ni ang.
ENGTIN NGE HRIAK THIHTE CHUAN MAHNI AN INTHLIR ANG?
4. Korinth thawn khat 11:27-29-ah hriak thih Kristiante ngaih pawimawh tûr eng vaukhânna nge kan hmuh a, engvânga ngai pawimawh tûr nge an nih?
4 Hriak thihte chuan 1 Korinth 11:27-29-a kan hmuh vaukhânna chu an ngai pawimawh hle tûr a ni. (Chhiar rawh.) Engtin nge hriak thih chuan Hriatrengna chhang leh uain chu ‘tlâk lo’ chunga a kîl mai theih? Jehova tehna fel mila nung si lova a kîl a nih chuan, tlâk lo chunga kîl a ni ang. (Heb. 6:4-6; 10:26-29) Hriak thihte chuan “Krista Isuaa Pathian chung lam koh chhan lâwmman” hmuh an duh chuan, an rinawm reng a ngai tih an hria a ni.—Phil. 3:13-16.
5. Hriak thih Kristiante chuan engtin nge mahni an inthlîr ang?
5 Jehova thlarau thianghlim chuan a chhiahhlawhte chu chapo lo va, inngaitlâwm tûrin a ṭanpui a. (Eph. 4:1-3; Kol. 3:10, 12) Chuvângin, hriak thihte chuan mi dangte aia ṭha zâwkah an inngai lo. Anni chuan Jehova’n a chhiahhlawh dangte aiin thlarau thianghlim a pe tam bîk lo tih an hria a. Bible thutak chu mi dangte aia hre thiam zâwk tûrah an inngai hek lo. Mi dang tuemaw chu hriak thih a ni tih an hrilh lo vang a, Hriatrengna chhang leh uain kîl ṭan tûrin an sâwm ngai hek lo vang. Chu aiin, Jehova chauhvin vâna kal tûr chu a sâwm tih inngaitlâwm takin an pawm a ni.
6. Korinth thawn khat 4:7, 8-a sawi angin, hriak thih Kristiante chu eng angin nge an awm ang?
6 Hriak thihte chuan vâna kal tûra sâwm an ni chu chawimawina angin ngai mah se, mi dangte’n danglam bîk taka an cheibâwl chu an beisei lo. (Phil. 2:2, 3) Jehova’n hriak a thih hian, chu chu mi dangte a hriattîr lo tih an hre bawk. Chuvângin, hriak thihte chuan mi ṭhenkhatin hriak thih a ni tih an ring nghâl lo a nih pawhin mak an ti lo. Pathianin mawhphurhna danglam tak a pe nia insawitu chu ring nghâl mai lo tûrin Bible-in min hrilh tih an hre bawk. (Thup. 2:2) Hriak thihte chuan a lutuka mi dangte ngaihven nih an duh loh avângin, mite nêna an vawikhat inhmuhnaah hriak thih an nih thu an sawi lo vang. Hriak thih an nihna chu mi dangte hnênah an uanpui hek lo vang.—1 Korinth 4:7, 8 chhiar rawh.
7. Hriak thihte chuan eng tih nge an pumpelh ang a, engvângin nge?
7 Hriak thih Kristiante chuan pâwl khata inphuarkhâwm ang maiin, hriak thih dangte chauh an kâwm lo vang. Anni chuan hriak thih an nihna chungchâng sawipui nân leh a huhova Bible zirna an neih theih nân, hriak thih dangte chu zawn chhuah an tum lo. (Gal. 1:15-17) Chutianga an tih chuan, kohhranah inpumkhatna a awm lo vang a. Chu bâkah, Pathian mite hnêna thlamuanna leh inpumkhatna neihtîrtu thlarau thianghlim kalh zâwnga thil ti an ni bawk ang.—Rom 16:17, 18.
ENGTIN NGE HRIAK THIHTE CHU KAN CHEIBAWL ANG?
Hriak thihte, a nih loh leh min hruaitu mi dangte chu mi lâr tak angin kan cheibâwl tûr a ni lo (Paragraph 8-na en rawh) *
8. Hriatrengna chhang leh uain kîltute kan cheibâwl dânah engvângin nge kan fîmkhur a ngaih? (Footnote en bawk rawh.)
8 Engtin nge hriak thih unaute chu kan cheibâwl ang? Hriak thih Krista unau pawh ni se, a lutuka ngaihsân chu thil dik a ni lo vang. (Mt. 23:8-12) Bible-in upate chungchâng a sawi hian, “an rin dân zîr” tûrin min fuih a; mahse, mihring hi hruaituah kan ruat thei tih erawh a sawi lo. (Heb. 13:7) Ṭhenkhat chuan ‘a leh hniha chawimawi an phu’ tih Bible-in a sawi ngei mai. Mahse, anni chu hriak thih an nih vâng ni lovin, “rorêl ṭhate” leh “thu hril leh zirtîrnaa thawk rimte” an nih vâng zâwk a ni. (1 Tim. 5:17) Hriak thihte chu kan fak lutuk emaw, kan ngaihsak lutuk emaw a nih chuan, awm nuam lovin kan siam thei a. * Chu aia pawi zâwk chu chapona kan neihtîr thei hi a ni. (Rom 12:3) Kan zînga tu mah hian, hriak thih Krista unaute zînga tuemaw chu chutianga thil sual lian tak tihtîr kan duh lo ngei ang!—Lk. 17:2.
9. Hriak thih Kristiante chungah engtin nge zahna kan lantîr theih?
9 Jehova hriak thihte chungah engtin nge zahna kan lantîr theih? Hriak thih an nih dân kan zâwt lo vang. Chu chu an mi mal thil a ni a, hre tûrin dikna kan nei lo. (1 Thes. 4:11; 2 Thes. 3:11) An pasal te, an nupui te, an nu leh pa te, leh an pianpui unaute chu hriak thih ni vek tûrah kan ngai lo bawk ang. Mi chuan a vân lam beiseina chu a chhûngkua aṭanga a rochun a ni si lo va. Chu chu Pathian hnên aṭanga a dawn a ni. (1 Thes. 2:12) Mi dangte rilru tina thei zawhnate zawh chu kan pumpelh tûr a ni bawk. Entîr nân, hriak thih unaupa nupui chu a pasal tel lova leia chatuana nun a hman dân tûr chungchângah a ngaih dân kan zâwt lo vang. Engpawh chu ni se, khawvêl tharah Jehova chuan ‘thil nung zawng zawng châkna chu a tirehsak,’ a nih loh leh a phuhrûksak ang tih kan chiang thei a ni.—Sâm 145:16.
10. “Mi tlawn” kan pumpelh hian engtin nge mahni kan invênhim?
10 Hriak thihte chu mi dangte aia pawimawh zâwk anga kan cheibâwl loh hian mahni kan invêng tihna a ni bawk. Engtin nge? Bible chuan hriak thih ṭhenkhat chu an rinawm reng lo thei tih min hrilh a. (Mt. 25:10-12; 2 Pet. 2:20, 21) “Mi tlawn” kan pumpelh chuan, hriak thihte an ni emaw, mi hmingthang takte an ni emaw, a nih loh leh hun rei tak chhûng Jehova rawng lo bâwl tawh an ni emaw pawh ni se, mihring hnung kan zui ngai lo vang. (Juda 16, C.L. Re-edited) Tichuan, an lo rinawm lo emaw, kohhran an chhuahsan emaw a nih pawhin, Jehova kan rinna chu kan hloh lo vang a, a rawngbâwlna chu kan bânsan hek lo vang.
KILTU ZAT CHUNGCHANGAH KAN LO BUAI A NGAI EM?
11. Hriatrengna chhang leh uain kîltu zât chungchângah eng thil nge thleng?
11 Kum tam tak chhûng chu, Hriatrengna chhang leh uain kîltu an tlêm tulh tulh a. Mahse, tûn hnai kum aṭang khân, kum tinin an pung chho zêl a ni. Chumi chungchânga kan lo buai a ngai em? Ngai lo. A ngaih loh chhan ṭhenkhat i lo en ang u.
12. Hriatrengna chhang leh uain kîltu zât chungchângah engvângin nge kan buai loh vang?
12 “Lalpa chuan ama tate chu a hria.” (2 Tim. 2:19) Hriatrengna chhang leh uain kîltu zât chhiartu unaute chuan Jehova angin hriak thih dik takte chu an hre thei lo va. Chuvângin, chûng zîngah chuan hriak thih nia inhria; mahse, ni si lote an tel a ni. Entîr nân, chhang leh uain kîltu ṭhenkhat chuan a hnuah an kîl leh tawh lo va. Mi dangte chuan rilru lam leh ngaihtuahna lama buaina an neih avângin, Krista nêna vâna rorêl tûr niin an inhria a. Chuvângin, leia hriak thih la awm zât dik tak chu kan hre lo a ni.
13. Bible-in hrehawm nasa tak a inṭan huna leia hriak thih awm zât tûr chungchâng a sawi em?
13 Hriak thihte vâna hruai tûra Isua a lo kal hunah, anni chu khawvêl hmun hrang hrangah an la awm ang. (Mt. 24:31) Bible chuan ni hnuhnûng chhûngin, leia hriak thih la bângte chu tlêm tê chauh an ni ang tih a sawi ngei mai. (Thup. 12:17) Mahse, hrehawm nasa tak a inṭan huna la bâng zât tûr erawh a sawi lo.
Tuemawin Hriatrengna chhang leh uain kîl ta se, engtin nge kan chhân lêt ang? (Paragraph 14-na en rawh)
14. Rom 9:11, 16-a târ lan angin, hriak thihte thlan chungchângah eng nge kan hriatthiam ngai?
14 Jehova chuan hriak thihte a thlan hun tûr chungchângah thu tlûkna a siam. (Rom 8:28-30) Jehova chuan Isua thawhleh hnuah hriak thihte chu a thlang ṭan a. Kum zabi khatnaa Kristian dik zawng zawngte chu hriak thih an vek niin an lang. Chumi hnu kum za tam tak chhûng chuan, Kristian nia inchhâl a tam zâwk chu Krista hnungzuitu dik tak an ni lo. Chuti chung pawhin, chûng hun chhûng chuan, Jehova’n Kristian dik tlêm tê chu hriak a thih a. Anni chu Isua sawi buh lem zînga buh tak ang an ni. (Mt. 13:24-30) Ni hnuhnûng chhûng hian, Jehova chuan mi 1,44,000 zînga tel tûrte chu a la thlang zawm zêl a. * Chuvângin, Pathian chuan tâwpna a thlen hma lawka an zînga tel tûr mi thenkhat a thlang a nih pawhin, thil dik a ti reng tih kan ringhlel tûr a ni lo. (Rom 9:11, 16 chhiar rawh.) * A tehkhin thu sawi pakhata Isua târ lan hna thawktute ang ni lo tûrin kan fîmkhur tûr a ni. Anni chuan tlai lam aṭanga hna thawk ṭantute a cheibâwl dân chungchângah an pu chu an sawisêl a ni.—Mt. 20:8-15.
15. Matthaia 24:45-47-a târ lan “bawi rinawm, fing tak,” zîngah hriak thih zawng zawng an tel vek em? Hrilhfiah rawh.
15 Vân lam nun beiseina nei zawng zawngte chu “bawi rinawm, fing tak,” zînga mi an ni vek lo. (Matthaia 24:45-47 chhiar rawh.) Kum zabi khatnaa an tih ang bawkin, Jehova leh Isua chuan tûn laiah unau tam takte châwm tûr leh zirtîr tûrin unau tlêm tê an hmang a. Kristian Grik Pathian Lehkha Thu ziak tûrin kum zabi khatnaa hriak thih Kristian tlêm tê chauh hman an ni a. Tûn laiah pawh, Pathian mite hnêna “a hun apianga an chaw” pe tûrin hriak thih Kristian tlêm tê chauhvin mawhphurhna an nei a ni.
16. He thuziak aṭang hian eng nge kan zir?
16 He thuziak hian eng nge min zirtîr? Jehova chuan a chhiahhlawhte zînga a tam zâwk chu leia chatuana nung tûr leh Isua rorêlpui tûr mi tlêm tê chu vân nunna chang tûrin thu tlûkna a siam a. Ani chuan a chhiahhlawh zawng zawng—“Juda pakhat” leh “mi sâwm”—chu lâwmman a pe a, dân thuhmun zâwm tûr leh rinawm reng tûrin a beisei tlat a ni. Anni chu an inngaitlâwm reng tûr a ni a. Rawng an bâwl tlângin, an inpumkhat tûr a ni. Chu bâkah, kohhranah remna a awm reng theih nân theih tâwp an chhuah ṭheuh tûr a ni. Tâwpna kan hnaih zêl rual hian, kan zain Jehova rawngbâwl zêlin, “pâwl khatin” Krista hnung chu i zui zêl ang u.—Joh. 10:16.
^ par. 5 Kumin Krista thih Hriatrengna chu Thawhlehni, April 7-ah neih a ni ang a. Chumi zâna chhang leh uain kîltute chu engtin nge kan thlîr ang? Ei leh intute an pung zêl a nih chuan, kan lo buai a ngai em? January, 2016 Vênnainsâng chhuak thuziak ṭanchhana ziah he thuziakah hian chûng zawhnate chhânna chu kan hria ang.
^ par. 2 Sâm 87:5, 6-a sawi angin, nakinah Pathianin vâna Isua nêna rorêltu zawng zawng hming chu a târ lan a rinawm.—Rom 8:19.
^ par. 8 Vênnainsâng, January 2016 chhuak “Hmangaihna Chu ‘A Che Mawi Lo Lo Va’” tih bâwm chu en rawh.
^ par. 14 Tirhkohte 2:33-na chuan Isua chu hriak thihtu angin târ lang mah se, a sâwmtu tak chu Pathian Jehova a ni.
^ par. 14 Hriat belh nân, Vênnainsâng (English) May 1, 2007 chhuak “Chhiartute Zawhna,” tih chu en rawh.
HLA 34 Rinawmna Kawng Zawhin
^ par. 56 MILEM HRILHFIAHNA: Headquarter aiawhtu leh a nupui chu inkhâwmpuiah mite bâwr huai huai khawpa thlalâkpui angah han mitthla teh. Inzah lohna a va ni dâwn êm!
