1. ¿Tiʼ kyaj tqʼamaʼn Jehová tuʼn tbʼaj toj ambʼil jaʼlo?

KYAJ tqʼamaʼn Jehová jun yol tuʼn tjapun twiʼ toj ambʼil jaʼlo. Tqʼama jlu: «Tuj tqʼijlalil tzul, laj stranjer xjal kye mastl nasyon ktzajel kytzyuʼn ttxaʼn t-xbʼalun jun xjal judiy ex kxel kymaʼn te kyjaʼ: Qaje qoʼxe kyukʼile, porke ma qbʼiye atzun taʼ Dios kyukʼile» (Zac. 8:23). In nok «xjal judiy» te kyechel qeju skʼoʼn maj tuʼn xewbʼaj xjan, ax ikx in nok qʼoʼn kybʼi te «axix tok aj Israel qe ex etzan qe tuʼn Dios» (Gál. 6:16). Atzun qeju «laj stranjer xjal», in nok te kyechel qeju in che ayon tuʼn kyanqʼin te jumajx tzalu twitz Txʼotxʼ. Bʼiʼn kyuʼn «laj stranjer xjal» qa o tzaj qʼoʼn kyoklen skʼoʼn maj tuʼn Jehová ex in che tzalaj tuʼn kyajbʼen junx te.

2. ¿Toj alkye tten in chex lepeʼ qeju lajaj xjal kyiʼj skʼoʼn maj?

² Maske mintiʼ ojtzqiʼn kybʼi qeju skʼoʼn maj ateʼx tzalu twitz Txʼotxʼ * kyuʼn txqantl ẍneʼl, jaku che ok lepeʼ kyiʼj. ¿Alkye tten? In tzaj tqʼamaʼn Tyol Dios qa «laj stranjer xjal» kʼokeltoq kytzyuʼn «ttxaʼn t-xbʼalun jun xjal judiy» ex kxeltoq kyqʼamaʼn te: «Qaje qoʼxe kyukʼile, porke ma qbʼiye atzun taʼ Dios kyukʼile». In yolin taqikʼ Tyol Dios lu tiʼj «jun xjal judiy». Noqtzun tuʼnj, in chex yolin lajaj xjal te tukʼil yol «kyukʼile». Tuʼn jlu in nel qnikʼ tiʼj qa mintiʼ in yolin versículo lu oʼkx tiʼj «jun xjal judiy», sino in nok te kyechel  kykyaqil okslal skʼoʼn maj. Aʼyeju okslal nya skʼoʼn maj qe, in che ajbʼen te Jehová junx kyukʼil. Pero mintiʼ in che ok kyqʼoʼn ik tzeʼn kynejenel, tuʼnju ojtzqiʼn kyuʼn qa oʼkx Jesús Nejenel kywitz (Mat. 23:10).

3. ¿Alkyeqe xjel che xel qtzaqʼweʼn toj xnaqʼtzbʼil lu?

³ Ateʼx junjun okslal skʼoʼn maj kyxol tmajen Jehová toj ambʼil jaʼlo. Tuʼntzunju atlo junjun qe jaku kubʼ t-xjelin jlu: ¿Alkye kyximbʼetz okslal skʼoʼn maj ktel kyiʼjx? ¿Tiʼ qmod kbʼel qyekʼin kyukʼil qeju in che waʼn tiʼj pan ex in che kʼan tiʼj vin toj Nabʼitz Tkyimlen Jesucristo? Ex, ¿ilpe tiʼj tuʼn ttzaj bʼaj qkʼuʼj qa kukx in chʼiy kybʼet? Toj xnaqʼtzbʼil lu, kxel qqʼoʼn tzaqʼwebʼil kyiʼj xjel lu.

4. Ik tzeʼn in tzaj tqʼamaʼn 1 Corintios 11:27 a 29, ¿alkyeqe kawbʼil bʼaʼn tuʼn kyximen okslal skʼoʼn maj tiʼj ex tiquʼn?

⁴ In tzaj qʼamaʼn junjun kawbʼil nim kyoklen kye skʼoʼn maj toj 1 Corintios 11:27 a 29 (uʼjinktza). ¿Alkye tten jaku txi tzyet tuʼn twaʼn jun skʼoʼn maj tiʼj pan ex tuʼn tkʼan tiʼj vin toj Nabʼil Tkyimlen  Jesucristo ex mintiʼ toklen tiʼj? Jaku bʼaj jlu qa mintiʼ in che japun tkawbʼil Jehová tuʼn (Heb. 6:4-6; 10:26-29). Ojtzqiʼn kyuʼn skʼoʼn maj qa nim toklen tuʼn kukx kyten tzʼaqli qa kyaj tuʼn ttzaj qʼoʼn «oyaj» kye tzmax toj kyaʼj tuʼn Jehová noq tuʼn Jesús (Filip. 3:13-16).

5. ¿Alkye kyximbʼetz skʼoʼn maj ktel kyiʼjx?

⁵ In nonin xewbʼaj xjan kyiʼj xjal tuʼn kyok te mans, ex nya tuʼn tjaw kynimsan kyibʼ (Efes. 4:1-3; Col. 3:10, 12). Tuʼntzunju, mintiʼ in kubʼ kyximen skʼoʼn maj qa mas nim kyoklen kywitz txqantl. Ojtzqiʼn kyuʼn qa nya tuʼnju skʼoʼn maj qe, mas in tzaj kykʼamoʼn xewbʼaj xjan. Ax ikx, mintiʼ in kubʼ kyximen qa mas in nel kynikʼ tiʼj Tyol Dios kywitz junjuntl. Ex mlayx txi kyqʼamaʼn jlu te juntl okslal: «Skʼoʼn maj teya ex bʼaʼn tuʼn twaʼna tiʼj pan ex tuʼn tkʼana tiʼj vin toj Nabʼitz Tkyimlen Jesucristo». Sino in kubʼ kyin kyibʼ ex in nel kynikʼ tiʼj qa oʼkx Jehová jaku txi qʼonte txokbʼil tiʼj jun okslal tuʼn t-xiʼ toj kyaʼj.

6. Ik tzeʼn in tzaj tqʼamaʼn 1 Corintios 4:7 ex 8, ¿alkye kymod skʼoʼn maj kbʼel kyyekʼin?

⁶ Ojtzqiʼn kyuʼn skʼoʼn maj qa o tzaj kykʼamoʼn jun tbʼanel kyoklen tuʼn kyxiʼ toj kyaʼj, pero mintiʼ in che ayon tuʼn tok qʼoʼn mas kyoklen kyuʼn txqantl (Filip. 2:2, 3). Ex bʼiʼn kyuʼn qa tej kyjaw skʼoʼn tuʼn xewbʼaj xjan, mintiʼ xi tqʼamaʼn Jehová kye kykyaqil. Tuʼntzunju, qa mintiʼ ma chex nimen tuʼn juntl erman qa o che jaw skʼoʼn tuʼn Jehová, mintiʼ in che jaw labʼin tiʼj jlu. Ex in tzaj tqʼamaʼn Xjan Uʼj tuʼn miʼn t-xi qnimen naj jun okslal aj ttzaj tqʼamaʼn qe qa o txi qʼoʼn jun tbʼanel toklen tuʼn Dios (Apoc. 2:2). Ax ikx, nya kyaj skʼoʼn maj tuʼn tok bʼaj kywitz txqantl kyiʼj, tuʼntzunju aj tok kyojtzqiʼn junjuntl erman, mintiʼ in xi kyqʼamaʼn kye qa skʼoʼn maj qe. Axpe ikx, mintiʼ in jaw kynimsan kyibʼ (kjawil uʼjit 1 Corintios 4:7, 8).

7. ¿Tiʼ mintiʼ in bʼant kyuʼn okslal skʼoʼn maj ex tiquʼn?

⁷ Mintiʼ in kubʼ kyximen okslal skʼoʼn maj tuʼn tok kychmon kyibʼ oʼkx kyukʼil junjuntl skʼoʼn maj, ik tzeʼn jun kʼloj xjal qe. Ax ikx, mintiʼ in che yolin kyukʼil junjuntl skʼoʼn maj tiʼj alkye tten e jaw skʼoʼn tuʼn xewbʼaj xjan ex mintiʼ in nok kychmon kyibʼ tuʼn kyxnaqʼtzan tiʼj Tyol Dios kyjunalx (Gál. 1:15-17). Qa ma bʼant jlu kyuʼn, mintiʼ in che onin tuʼn tten mujbʼabʼil toj kʼloj okslal. Nya oʼkxju, ax ikx mintiʼ in xi kybʼiʼn aju in tzaj tqʼamaʼn xewbʼaj xjan ik tzeʼn tuʼn kyonin tuʼn tten mujbʼabʼil ex tzalajbʼil qxol (Rom. 16:17, 18).

8. ¿Tiquʼn nim toklen tuʼn tok qxqʼuqin qibʼ tiʼj tzeʼn qmod ktel kyukʼil skʼoʼn maj? (Qʼonka twitza tiʼj tqanil).

⁸ ¿Tiʼ qmod kbʼel qyekʼin kyukʼil qeju o che jaw skʼoʼn tuʼn xewbʼaj xjan? Mintiʼ tuʼn qjaw labʼin tiʼj jun okslal, maske jun skʼoʼn maj ex terman Cristo (Mat. 23:8-12). Aj tyolin Tyol Dios kyiʼj ansyan, in tzaj tqʼamaʼn jlu: «Tenx kyokslabʼle ik tzaʼn kye». Pero mintiʼ in tzaj tqʼamaʼn qe tuʼn qok lepeʼ tiʼj jun xjal (Heb. 13:7). Ax ikx in tzaj tqʼamaʼn Tyol Dios qa il tiʼj tuʼn tok qʼet kyoklen junjun okslal. Pero nya tuʼnju skʼoʼn maj qe, sino tuʼnju in nok tilil kyuʼn tuʼn kyxqʼuqin kyiʼj erman, tuʼn kypakbʼan ex tuʼn kyqʼon xnaqʼtzbʼil (1 Tim. 5:17). Qa ma tzʼok qqʼoʼn nimxix kyoklen skʼoʼn maj ex qa oʼkx in nok bʼaj qwitz kyiʼj, jaku che tzaj chʼixwi tuʼn jlu. * Ex aju mas nya bʼaʼn, jaku qo onin kyiʼj tuʼn tjaw kynimsan kyibʼ (Rom. 12:3). Tuʼntzunju, nya qaj tuʼn qonin tiʼj jun skʼoʼn maj tuʼn tkubʼ tzʼaq toj jun il (Luc. 17:2).

9. ¿Tzeʼn kbʼel qyekʼin qa in nok qqʼoʼn kyoklen skʼoʼn maj?

⁹ ¿Tzeʼn jaku kubʼ qyekʼin qa in nok qqʼoʼn kyoklen skʼoʼn maj? Jun tumel, mintiʼ in xi qqanin kye tzeʼn tzaj kykʼamoʼn txokbʼil tuʼn kyxiʼ toj kyaʼj. Mintiʼ qoklen tuʼn tok qbʼiʼn jlu (1 Tes. 4:11; 2 Tes. 3:11). Ex mlay kubʼ qximen qa ax ikx skʼoʼn maj t-xuʼjil moqa tchmil, qe ttat moqa alkyexku juntl toj tja noq tuʼnju skʼoʼn maj te. ¿Tiquʼn? Tuʼnju oʼkx Jehová at toklen tuʼn t-xi tqʼoʼn txokbʼil tiʼj jun okslal tuʼn t-xiʼ toj kyaʼj (1 Tes. 2:12). Ax ikx, mlay txi qqanin junjun xjel kye txqantl aju jaku kubʼ kynaʼn nya bʼaʼn tuʼn. Jun techel, mlayx txi qqanin te t-xuʼjil jun skʼoʼn maj tiʼ in kubʼ tnaʼn aj t-ximen tiʼj qa kʼanqʼil tjunalx tzalu twitz Txʼotxʼ. Bʼaʼn tuʼn ttzaj qnaʼn qa ktzajel tqʼoʼn Jehová aju at tajbʼen te teyele junjun tmajen toj akʼaj twitz Txʼotxʼ tuʼntzun ttzalaj (Sal. 145:16).

10. ¿Tiquʼn mintiʼ tuʼn qjaw labʼin tiʼj kymod txqantl?

¹⁰ In nok qxqʼuqin qibʼ qa mintiʼ ma kubʼ qximen qa mas nim kyoklen skʼoʼn maj kywitz txqantl. ¿Alkye tten? In tzaj tyekʼin Tyol Dios qa jaku che el txalpaj junjun skʼoʼn maj (Mat. 25:10-12; 2 Ped. 2:20, 21). Pero qa mintiʼ in qo jaw labʼin tiʼj kymod txqantl, mlayx qo ok lepeʼ tiʼj jun okslal maske skʼoʼn maj, nix tiʼj jun okslal ojtzqiʼnxix twitz kyuʼn txqantl moqa qʼiʼn nim ambʼil tuʼn toj tajbʼebʼil te Jehová (Jud. 16). Qa ma bʼant jlu quʼn, mlayx qo chewix toj qokslabʼil ex mlayx kyaj qtzaqpiʼn Jehová qa at jun okslal skʼoʼn maj ma kyaj tkolin axix tok.

11. Kyoj qeju abʼqʼi tzma in che ikʼ, ¿tiʼ o bʼaj tukʼil kyajlal skʼoʼn maj?

¹¹ Kyoj abʼqʼi o che kyaj, kukxtoq in kuʼtz kyajlal qeju in che waʼn tiʼj pan ex in che kʼan tiʼj vin toj Nabʼitz Tkyimlen Jesucristo. Pero kyoj qeju abʼqʼi tzma in che ikʼ, kukx o jax kyajlal. ¿Ilpe tiʼj tuʼn ttzaj bʼaj qkʼuʼj tuʼn jlu? Miʼn. Qo xnaqʼtzan kyiʼj junjun tiʼchaq jaku che onin qiʼj tuʼn miʼn ttzaj bʼaj qkʼuʼj.

12. ¿Tiquʼn mintiʼ tuʼn ttzaj bʼaj qkʼuʼj tiʼj kyajlal qeju in che waʼn tiʼj pan ex in che kʼan tiʼj vin?

¹² «Tojtzqiʼn Dyos alkyeqeʼjuʼ te» (2 Tim. 2:19, XT). Mintiʼ ojtzqiʼn kyuʼn erman alkyeqe axix tok skʼoʼn maj aj tkubʼ kyajlaʼn  kybʼet qeju in che waʼn tiʼj pan ex in che kʼan tiʼj vin toj Nabʼitz Tkyimlen Jesucristo, atzunte Jehová ojtzqiʼn tuʼn jteʼxix kybʼet. Tuʼntzunju, aj ttzaj qʼamaʼn jteʼ kyajlal, ax ikx in che kubʼ ajlet qeju nya skʼoʼn maj qe. Ex ateʼ junjun o kyaj kytzaqpiʼn tuʼn kywaʼn tiʼj pan ex tuʼn kykʼan tiʼj vin. Atzun junjuntl in kubʼ kyximen qa che kawil tukʼil Jesús toj kyaʼj tuʼnju o naj kywiʼ. Tuʼntzunju, mintiʼxix ojtzqiʼn quʼn jteʼ kybʼet skʼoʼn maj atx tzalu twitz Txʼotxʼ.

13. ¿In tzajpe tqʼamaʼn Tyol Dios jteʼ kybʼet skʼoʼn maj ktel twitz tkyaqil Txʼotxʼ aj t-xi tzyet nimxix yajbʼil?

¹³ Che tel skʼoʼn maj toj nimku lugar twitz Txʼotxʼ aj tul Jesús qʼil kye tuʼn kyxiʼ toj kyaʼj (Mat. 24:31). In tzaj tqʼamaʼn Tyol Dios qa kukx che tel junjun skʼoʼn maj twitz Txʼotxʼ kyoj mankbʼil tqʼijlalil (Apoc. 12:17). Pero mintiʼ in tzaj tqʼamaʼn jteʼxix kybʼet ktel aj t-xi tzyet nimxix yajbʼil.

14. ¿Tiʼ in tzaj t-xnaqʼtzaʼn 2 Timoteo 1:9 qe tiʼjju aj tjaw tskʼoʼn Jehová jun okslal?

¹⁴ A Jehová in kubʼ ximente toj alkye ambʼil kjawil tskʼoʼn jun okslal (Rom. 8:28-30). Xi tzyet tuʼn tjaw tskʼoʼn Jehová qeju skʼoʼn maj tej tikʼ chʼin ambʼil tjawlen anqʼin Jesús. Tuʼn jlu jaku txi qqʼamaʼn qa kykyaqil okslal axix tok e jaw skʼoʼn tuʼn kyxiʼ toj kyaʼj toj tnejel syent abʼqʼi. Pero tej tbʼet ambʼil, kykyaqil qeju ok kyqʼon kyibʼ te okslal, mintiʼ e ok lepeʼ tiʼj Jesús. Tuʼntzunju, oʼkx e jaw tskʼoʼn Jehová qeju axix tok okslal toj ambʼil aju. E ok okslal lu ik tzeʼn triw tqʼama Jesús aju tzaj chʼiy t-xol nya bʼaʼn kʼul (Mat. 13:24-30). Kyoj mankbʼil tqʼijlalil, kukx in che jaw  tskʼoʼn Jehová junjun okslal tuʼn kyten kyxol qeju 144,000. * Kyjuʼtzun, qa ma kubʼ t-ximen Jehová tuʼn tjaw tskʼoʼn junjun okslal aj chʼixtoq t-xi tzyet nimxix yajbʼil, mintiʼ qoklen tuʼn qyolin tiʼjju in kubʼ t-ximen (kjawil uʼjit 2 Timoteo 1:9). * Nya qaj tuʼn qok ik tzeʼn qe aqʼunal yolin Jesús tiʼj toj jun techel, aʼyeju xi kyqanin te tajaw aqʼuntl tiquʼn ax twi kykʼuʼj kykyaqil aqʼunal xi tqʼoʼn ex ateʼtoq junjun yaj xi tzyet kyaqʼun (Mat. 20:8-15).

15. ¿Tiquʼn bʼiʼn quʼn qa nya kykyaqil skʼoʼn maj in che ok te «majen in bʼant taqʼun [...] ex at tnabʼl»?

¹⁵ Nya kykyaqil qeju che xeʼl anqʼil toj kyaʼj in che ok te «majen in bʼant taqʼun [...] ex at tnabʼl» (kjawil uʼjit Mateo 24:45-47). Ik tzeʼn bʼant tuʼn Jehová ex tuʼn Jesús toj tnejel syent abʼqʼi, oʼkx in che ajbʼen junjun okslal kyuʼn tuʼn t-xi kyqʼoʼn kywa nimku xjal, toj juntl yol, tuʼn t-xi kyqʼoʼn xnaqʼtzbʼil kye. Toj tnejel syent abʼqʼi, oʼkx e ajbʼen junjun okslal skʼoʼn maj tuʼn tkubʼ kytzʼibʼin plaj Tyol Dios toj yol griego. Toj ambʼil jaʼlo, oʼkx in che ajbʼen junjun okslal skʼoʼn maj tuʼn t-xi kyqʼoʼn xnaqʼtzbʼil kye tmajen Jehová toj ambʼil at-xix tajbʼen.

16. ¿Tiʼ ma tzʼel tnikʼa tiʼj toj xnaqʼtzbʼil lu?

¹⁶ Tzul qnaʼn tiʼ ma tzʼel qnikʼ tiʼj toj xnaqʼtzbʼil lu. O kubʼ t-ximen Jehová tuʼn kyanqʼin chʼixme kykyaqil tmajen te jumajx tzalu twitz Txʼotxʼ ex o kubʼ t-ximen tuʼn kyanqʼin junjun toj kyaʼj tuʼn kykawin tukʼil Jesús. In che tzaj tkʼiwlaʼn Jehová kykyaqil qe tmajen ik tzeʼn aju «xjal judiy» ex qeju «laj stranjer xjal», ex in xi tqanin kye tuʼn tjapun tkawbʼil kyuʼn ex tuʼn kukx kyajbʼen te. Qkyaqilx il tiʼj tuʼn tkubʼ qin qibʼ ex tuʼn qajbʼen te Jehová toj mujbʼabʼil. Ex bʼaʼn tuʼn tok tilil quʼn tuʼn tten tzalajbʼil toj kʼloj okslal. Ya chʼix tul xitbʼil tiʼj tkyaqil nya bʼaʼn, tuʼntzunju kukx qo ajbʼen te Jehová ex qo lepeʼk tiʼj Jesús ik tzeʼn junx kʼloj ẍneʼl (Juan 10:16).