1. Jméni xi kitso je Jeobá xi koa̱n nichxin xi tiyoaa ndʼaibi.

NGA kui kinchja̱ni tʼatsʼe nichxin xi tiyoaa ndʼaibi, je Jeobá i kitso: “Kʼianga kui nichxin te chjota xi ya jaʼaini ngayeje én xi nokjoa ngakjijnda naxinandá tsoa̱nʼio, tsoa̱nʼio je najñojnrole jngo chjota xi judío, kʼoa i kuitso: Menajin nga ya koanngínkaolaijin, nga̱ kinoʼyaníjin nga Niná tíjnakaono” (Zac. 8:23). Je “chjota xi judío” jé tsoyanile chjota xi kao nganʼiotsjele Niná kitjoejinni, xi kʼoati “chjota Israel xi tsʼe Niná” ʼmile (Gál. 6:16). Kʼoa je xi “te chjota” jé tsoyanile xi kui kjoachoya tjínle nga i̱ Sonʼnde koatio ngantsjai nichxin. Je chjota jebi bení nga je Jeobá kjoejin xi kui kjoachoya sʼele nga ya ngʼajmi koai kʼoa tsee kjoanda xi kao je nga ñatjen síxále Niná.

2. Jósʼin tsoyanile nga je xi te chjota ya fikao je xi ya ngʼajmi koai.

² Ningalani tsín ʼyale joʼmi ngatsʼi xi tjíosa i̱ Sonʼnde xi ya tjínle kjoachoya ngʼajmi, * koaan i̱ kuitsole je xi i̱ Sonʼnde koyale koatio: “Menajin nga ya koanngínkaolaijin”. Jósʼin tsoyanile nga ya koaikao. Je Biblia kʼoatso nga “te chjota” tsoa̱nʼio je najñojnrole jngo chjota xi judío, kʼoa i kuitso: “Menajin nga ya koanngínkaolaijin, nga̱ kinoʼyaníjin nga Niná tíjnakaono”. Je versículo jebi tojngoo “chjota xi judío” síkʼaxki̱. Tonga nga “koanngínkaolaijin” tso je chjota xi te mani nkjín chjota nchja̱ni. Kʼianga “jngo chjota xi judío” síkʼaxki̱ alikui tojngo chjota tínchja̱ni, tínchjani ngatsʼi xi ya ngʼajmi koai. Kʼoa ngatsʼi, ni je  xi i̱ Sonʼnde koatio kʼoa kao xi ya ngʼajmi koai tojngo tjíosíxále Jeobá. Tonga alikui kʼoasʼin síkjaʼaitsjen nga ngʼajko̱le mani, nga̱ be nga toje Jesús xi ngʼajko̱ná mani (Mat. 23:10).

3. Jmé xi chótʼayajiaan i̱ kjoaʼmiya jebi.

³ Nichxin xi tiyoaa ndʼaibi tjíosa kʼa i̱ Sonʼnde je chjotale Cristo xi ya ngʼajmi tjínle kjoachoya. Tsakui nichxin tjínkʼa xi i̱ kuitso: Jósʼin tjínnele skoe̱kon yaole je xi ya ngʼajmi koai. Jósʼin tjínnele jchatokoán tsa ʼyani xi koakjen je nioxtila kʼoa skʼuí vino nga kjoaʼaítsjenya Kjoabiyale Cristo. Kʼoa jósʼin si̱kjaʼaitsjeen tsa sa nkjín sa nkjín mani nga xki̱ nó xi kʼoakuitso nga ya ngʼajmi koai. I kjoaʼmiya jebi chótʼayajiaan xi tʼatsʼe jebi.

4. Tojo tso 1 Corintios 11:27-29, jméni xi nʼio kuenta sʼin je chjotale Cristo xi ya ngʼajmi tjínle kjoachoya, kʼoa ánni.

⁴ Je chjotale Cristo xi ya ngʼajmi tjínle kjoachoya tjínnele kuenta sʼin jmeni xi tso 1 Corintios 11:27-29 * (tʼexkiai). Jókoa̱nnile nga “jée sʼe̱le” jngo chjotale Cristo xi ya ngʼajmi tjínle kjoachoya. Kʼiaa tsa tsínni kʼoasʼin tísítjoson jotso je kjoatéxomale Niná kʼoa tsa  tojo koakjen je nioxtila kʼoa skʼuí je vino nga faʼaitsjenya Kjoabiyale Cristo (Heb. 6:4-6; 10:26-29). Je chjotale Cristo xi ya ngʼajmi tjínle kjoachoya be nga tjínnele kixi koaitʼale Niná tsa mele nga tjoéle je kjoanda xi tsjoále Niná xi totʼatsʼe Jesucristo (Filip. 3:13-16).

5. Jósʼin tjínnele skoe̱kon yaole je chjotale Cristo xi ya ngʼajmi koai.

⁵ Je nganʼiotsjele Jeobá binyakao je chjota nga nangitokon katama, ali tsakuijin nga ngʼakon koa̱n (Efes. 4:1-3; Col. 3:10, 12). Kuinga tsín kʼoasʼin síkjaʼaitsjenni je chjotale Cristo xi ya ngʼajmi tjínle kjoachoya nga ngisa ngʼa tjíole xi ngikʼa. Majinle nga tsínkjoan ngisa tse nganʼiotsje bʼaile je tikʼoajinni choʼndale Niná xi ngikʼa. Kʼoa alikui kʼoasʼin síkjaʼaitsjen nga ngisa nda be jmeni xi tso je Énle Niná tikʼoajinni xi kjaʼaí. Kʼoa alikuikʼia i̱ tsole xi kjaʼaí: “Kʼoati ya ngʼajmi tjínli kjoachoya kʼoa tjínnele kuichi je nioxtila kʼoa sʼui̱ je vino nga faʼaitsjenya Kjoabiyale Cristo”. Tosaa nangitokon ma kʼoa majinle nga toje Jeobá xi tsoni ʼyani xi kjoejin nga ya ngʼajmi koai.

6. Tojo tso 1 Corintios 4:7, 8, jósʼin tjínnele sʼin je xi ya tjínle kjoachoya ya ngʼajmi.

⁶ Ningalani majinle nga nʼio tse kjoanda tjínle je xi ya ngʼajmi tjínle kjoachoya, alikui kʼoasʼin síkjaʼaitsjen nga tjínnele síxkón ni̱kao (Filip. 2:2, 3). Kʼoati be nga tsínkui xi koanmele Jeobá nga kjaʼaí xi kisʼejinle kʼianga kiskoejin. Kuinga tsín tokʼoamanile jngo chjotale Cristo xi ya sʼele kjoachoya ya ngʼajmi tsa tsín tokjoan makjain kʼale nga je kjoejin Jeobá. Nga̱ je Biblia kʼoatso nga tsín tjínnele tokjoan koa̱nkjainná tsa ʼyani xi kʼoakuitso nga kui kjoanda kitsjoale Jeobá (Apoc. 2:2). Xi ijngosani, nga tsín mele nga toje síxkón ni̱kao, je chjotale Cristo xi ya ngʼajmi tjínle kjoachoya alikui tokjoan kui bʼéyanajmíle tsa ʼyani xi tosʼa bexkon títjon. Kʼoa alikui kui bʼasjengʼani yaole nga ya ngʼajmi koai (tʼexkiai 1 Corintios 4:7, 8). *

7. Jméni xi tsín kʼoasʼín je chjotale Cristo xi ya ngʼajmi tjínle kjoachoya, kʼoa ánni.

⁷ Je chjotale Cristo xi ya ngʼajmi koai alikui toje símiyo je xi kʼoati kui kjoachoya tjínle kʼoa alikui totsen batiojtín. Kʼoa tsín totsen fáoyani tʼatsʼe nga ya koai ngʼajmi, kʼoa alikui totsen batiojtín nga kotʼaya Biblia (Gál. 1:15-17). Tsa kʼoalani sʼin, xkoa̱yajin sʼin kuiyoaa ya jinjtín kʼoa kontrajin koatiole je nganʼiotsjele Niná, nga̱ kui nganʼiotsje binyakaoná nga nyʼán sʼin biyoaa kʼoa jtín sʼin biyoaa ya jinjtín (Rom. 16:17, 18).

8. Ánni nga chósonsínilee josʼin jchatokoán je xi ya ngʼajmi tjínle kjoachoya (kʼoati chótsenlai nota).

⁸ Jósʼin tjínnele jchatokoán je ndsʼee kao tichjaa xi ya ngʼajmi tjínle kjoachoya. Alikui ndatjín kʼianga ʼya xi chʼasjengʼaa, ninga je xi ya ngʼajmi tjínle kjoachoya (Mat. 23:8-12). Kʼianga kui nchja̱ni Biblia tʼatsʼe je xi chjotajchínga sʼin tjío, itso: “Chjénngilao josʼin makjainle”, tonga alikui kʼoatso nga chjota kjuintjenngilee (Heb. 13:7). Kʼoatso kjoaixi je Biblia nga tjínkʼa je chjotale Cristo xi “bakinle nga kanni kʼa kataʼyaxkón”, tonga ali tsakuijin nga ya ngʼajmi koai nga jchaxkónñá, kuiní nga nda bándiaale jtín kʼoa kuinga “tse xá tjínle nga nchja̱ya” kʼoa “nga bakóya” (1 Tim. 5:17). Tsa chʼa̱sjengʼaa kʼoa tsa síxkón si̱koaa je xi ya ngʼajmi tjínle kjoachoya, alikuijin nda sa̱tío kon, * kʼoa ñájin xosʼiaan nga ngʼakon koa̱n (Rom. 12:3). Alikui mená nga kui jée ska̱jin jngo chjotale Cristo xi ya ngʼajmi tjínle kjoachoya (Luc. 17:2).

9. Jósʼin koakolee kjoaxkóntokon je chjotale Cristo xi tíkjoejin Jeobá nga ya ngʼajmi sʼele kjoachoya.

⁹ Jósʼin koakolee kjoaxkóntokon je chjotale Cristo xi tíkjoejin Jeobá nga ya ngʼajmi sʼele kjoachoya. Xi títjon, alikui koa̱n kui chjónangilee jókoan nga kitjoejin, nga̱ tsín ñá bʼakaoná jchaa (1 Tes. 4:11; 2 Tes. 3:11). Kʼoa alikui koa̱n kʼoasʼin si̱kjaʼaitsjeen nga kʼoati ya ngʼajmi tjínle kjoachoya je chjoónle kʼoa tsa xʼinle, tsa xijchále kʼoa tsa xínkjín. Ali ñájin xi bixónñá, jé Niná kjoejin ʼyani xi ya ngʼajmi koai (1 Tes. 2:12). Xi ijngosani, alikui koa̱n nga kui chjónangiaa xi tsín nda kʼoee kon xi ngikʼa. Tobʼelañá, alikui koa̱n kui chjónangilee je chjoónle ndsʼee xi ya ngʼajmi tjínle kjoachoya jótjín kon nga tsín i̱ Sonʼnde ñatjen koatio kao xʼinle. Tjínjngoo tokoán nga koa̱nle tsjoáná Jeobá jmeni xi tsjoa koaya tokoán (Sal. 145:16).

10. Ánni nga tsín ʼya chjota chʼa̱sjengʼasíñá.

¹⁰ Xi ijngosani, kʼianga tsín ngisa síxkón nikoaa je ndsʼee xi ya ngʼajmi tjínle kjoachoya tikʼoani xi ngikʼa, basenkaoná. Nga̱ je Biblia kʼoatso nga tjínkʼa xi ya ngʼajmi tjínle kjoachoya xi tsínni kixi koaitʼale Niná (Mat. 25:10-12; 2 Ped. 2:20, 21). Tonga tsa tsín chjota chʼasjengʼaa, alikuikʼia nga chjota kjuintjenngilee, ninga ya ngʼajmi tjínle kjoachoya, ninga nda ʼyaxkoaan kʼoa ninga jenkjín nó tjíosíxále Jeobá (Jud. 16). Tsa kuenta sʼiaan jebi, tosi tonda sʼe̱ná kjoamakjain kʼoa alikui si̱kʼéjnaa je naxinandále Jeobá kʼiatsa jngo chjotale Cristo xi yátsʼi̱n koasenle Niná kʼoa sikʼéjna je naxinandále.

11. Jótjín kjimani je xi kjen nioxtila kʼoa ʼbi vino kʼianga faʼaitsjenya Kjoabiyale Cristo.

¹¹ Nichxin kjoan nkjín nóján, sa choa sa choaa koanni xi tsakjen je nioxtila kʼoa xi tsakʼi vino kʼianga jaʼaitsjenya Kjoabiyale Cristo. Tonga je nó xi chriansʼa tífaʼato, sa nkjín sa nkjín kjimani. Jósʼin ni̱kjaʼaitsjeen nga kʼoakjima. Kataʼyala kʼaa jme xi kuinyakaoná nga jchaa ánni nga kʼoakjimani.

12. Ánni nga tsínkui nʼio si̱kjaʼaitsjenjinsíñá jotjín mani xi kjen je nioxtila kʼoa ʼbi vino nga faʼaitsjenya Kjoabiyale Cristo.

¹² “Je Jeobá bení je xi tsʼe” (2 Tim. 2:19, TNM). Je Jeobá bení ʼyákjoánni xi ya ngʼajmi koai, tonga alikui be je ndsʼee xi bʼéxki̱ jotjín mani xi kjen je nioxtila kʼoa ʼbi je vino nga faʼaitsjenya Kjoabiyale Cristo. Kuinga kʼoati maxki̱ni je xi tsínni kui kjoachoya tjín kjoaixile. Tjínkʼa je xi tsakjen je nioxtila kʼoa tsakʼi vino tsakai, tonga xi tsín tikʼoasʼínni ndʼaibi.  Kʼoa tjínkʼa xi kui kʼoasʼínni nga tsín nda jko̱, nga̱ kʼoasʼin síkjaʼaitsjen nga ya koatexomakao je Jesús ya ngʼajmi. Kuinga tsín ʼya xi beni jokjoantjín mani xi tjíosa i̱ Sonʼnde je chjotale Cristo xi ya ngʼajmi tjínle kjoachoya.

13. A kʼoatso Biblia jotjín mani xi tjíosa i̱ Sonʼnde je chjotale Cristo xi ya ngʼajmi koai kʼianga koaitsʼia je kjoañʼai xi nʼio tse.

¹³ Je xi ya ngʼajmi koai tjío ngakjijnda Sonʼnde kʼianga kjoaʼaí je Jesús nga koaikao ya ngʼajmi (Mat. 24:31). Kʼoatso je Biblia nga tjíosa kʼa je chjotale Cristo i̱ Sonʼnde xi ya ngʼajmi tjínle kjoachoya kʼianga to jetífetʼa je nichxin (Apoc. 12:17). Tonga alikui kʼoatso jotjín mani xi tjíosa nga koaitsʼia je kjoañʼai xi nʼio tsʼe.

14. Jmé xi bakóyaná Romanos 9:11, 16 tʼatsʼe josʼin tjoejin je chjotale Cristo xi ya ngʼajmi sʼele kjoachoya.

¹⁴ Jé Jeobá xi tsoni kʼiani nchja̱le je xi ya ngʼajmi koai (Rom. 8:28-30). Je Jeobá kʼiaa kiskoejin je chjotale Cristo xi ya ngʼajmi koai kʼianga jejaʼáyanile je Jesús. Ngatsʼi je chjotale Cristo xi kʼia tsakatio nga siglo 1, yaa ngʼajmi kisʼele kjoachoya. Tonga nga jekoanskanni, tjínkʼa xi kʼoakitso nga chjotale Cristo ma, tonga alikuini ñaki kui. Ninga kʼoalani, je Jeobá tojo kiskoejin je xi ñaki chjotale Cristo ma kjoaixi. Yaa koanngóson je trigo xi kinchja̱ni je Jesús kʼianga kui jñá xi tsín nda koa̱nngʼajinle (Mat. 13:24-30). Kʼianga jetífetʼa nichxin, je Jeobá tojo tíkjoejin je xi ya maxki̱kao je xi 144,000 mani. * Alikuijin ʼya xi jokuitso kʼiatsa kʼia skoéjin kʼa Niná je xi ya ngʼajmi koai kʼianga to jetífetʼa nichxin *  (tʼexkiai Romanos 9:11, 16). * Alikui mená nga kʼoasʼin si̱kjaʼaitsjeen joni je chjota xi kinchja̱ni je Jesús kʼianga jngo choa̱ kisikʼéjna, nga tjínkʼa xi je naile tsojmintje tsakjayojéetʼale nga tongóson kji koa̱nchjíle je xi títjon kisixá kao xi tojngo horasa kisixá (Mat. 20:8-15).

15. Ánni kʼoabixónsíñá nga tsín tongatsʼi xi ya ngʼajmi tjínle kjoachoya xi ya tjíojinle “je choʼnda xi nʼiotʼakon, xi nda be xá” xi nchja̱ni ya Mateo 24:45-47.

¹⁵ Alikui tongatsʼi xi ya ngʼajmi tjínle kjoachoya xi ya tjíojinle “je choʼnda xi nʼiotʼakon, xi nda be xá” (tʼexkiai Mateo 24:45-47). * Tojo koan nga siglo 1, nichxin xi tiyoaa ndʼaibi, je Jeobá kao Jesús to choaa mani choʼndale xi tsjoále xá nga tsoyale je xi nʼio nkjín mani. Nga siglo 1, to choaa koanni je chjotale Cristo xi ya ngʼajmi kisʼele kjoachoya xi kiski je Escrituras Griegas Cristianas. Nichxin xi tiyoaa ndʼaibi, to choaa mani je chjotale Cristo xi ya ngʼajmi koai xi kjinele kuitsoyale je naxinandále Niná “nga fichó choa̱le”.

16. Jmé xi kamajinli i̱ kjoaʼmiya jebi.

¹⁶ Chótʼayajinla ijngokʼá jmeni xi kaʼyaa i̱ kjoaʼmiya jebi. Je Jeobá kui xi mele nga nʼio nkjín koa̱nni je chjota xi koatio ngantsjai nichxin i̱ Sonʼnde, kʼoa nga tochoa koa̱nni je xi ya ngʼajmi koatexomakao Jesús. Je Niná tsjoále kjoatjao ngatsʼi je choʼndale, je “chjota xi judío” sʼin tsoyanile kao je xi “te chjota”, kʼoa kʼoatsole ngatsʼi nga katasítjoson je kjoatéxomale kʼoa nga kixi katafitʼale. Ngatsʼi tjínnele nga nangitokon koa̱n kʼoa nga jtín sʼin sixále Niná. Kʼoa ngatsʼi tjínnele nga kʼoenele yaole nga sʼe̱ kjoanyʼán ya jinjtín. Sa chrian sa chrian tiyolee je kjoafetʼa, kuinga machjénsíni nga tosi tonda si̱xálee je Jeobá kʼoa kjuintjenngilee Cristo, nga̱ tojngojtín mañá ngatsʼiaa (Juan 10:16).