1. Bika byendekele Yehova ngwendi bilingiwa muno mu simbu yetu?

 YEHOVA wapolofwetele byuma bilingiwa muno mu simbu yetu. Wapolofwetele ngwendi: “Banalume likumi ba ku bindaka bya ku mafuti oshe bakakwata ku cikobelo ca Kayunda na kwendeka ngwabo: ‘Tuya nobe mwafwa tunazibi ngwabo Njambi ali nobe.’” (Zaka 8:23, NWT) “Kayunda” ibanendeka aha emanena baje banabwabesa Njambi na sipilitu ya kujela. Babatumbula lalo ngwabo [“Isalele wa Njambi,” NWT]. (Ngala 6:16) Banalume likumi bemanenako banu baje bali na lilabelelo lya kuyoya myaka yoshe hano hasi. Bazibuka ngwabo Yehova nabezikisa bakubwabesa, ngeci banamono ngwabo kunapu kubezika kulemesa Njambi hamo lika nabo.

2. “Banalume likumi” basa ‘kuya’ bati hamo lika na bakubwabesa?

² Ha simbu ino, b kwakukalu kuzibuka mazina a banu boshe bakubwabesa. Oloni baje bali na lilabelelo lya kuyoya hano hasi basa ‘kuya’ hamo lika na bakubwabesa. Basa kuya nabo bati? Mbimbiliya ngwayo: ‘Banalume likumi bakakwata ku cikobelo ca Kayunda na kwendeka ngwabo: Tuya nobe mwafwa tunazibi ngwabo Njambi ali nobe.’ Mbimbiliya inendeka Kayunda umo lika. Nameme eyi vesi inatumbula Kayunda umo lika, oloni ili na kwendeka banu babangi. Oku  kulumbununa ngwabo ou Kayunda keti umo lika oloni emanenako cibunga coshe ca bakubwabesa. Banu ba kujeneka kubwabesa bali na kupangela Yehova hamo lika na bakubwabesa. Nameme ngoco, kubesi kumona bakubwabesa kupwa ngwe bantwama babo, bamona ngwabo Yesu ikeye Ntwama wabo.—Mateo 23:10.

3. Bihula muka bitukumbulula muno mu cilongesa?

³ Omwo tucili na baka-Kilistu ba kubwabesa ha simbu ino, twasa kulihula ngwetu: (1) Bakubwabesa banapande kulimona bati? (2) Tunapande kumona bati baje balya bifwisa ha Canukiso? (3) Kuma tunapande kuyayabala nga nambala ya baje balya ilonda ndi? Ebi bihula tubikumbulula muno mu cilongesa.

4. Cinangulo muka cili ku 1 Kolinte 11:27-29, cibanapande kusinganyekesesa manene bakubwabesa, co mwafwa bika?

⁴ Bakubwabesa banapande kusinganyekesesa manene ha cinangulo cili ku 1 Kolinte 11:27-29. (Tandeni.) Wakubwabesa asa kukala bati na “mulonga” ha simbu ya Canukiso? Asa kukala nawo nga alya na  kunwa bifwisa, okuni kesi na kwononoka mashiko a Yehova. (Heve 6:4-6; 10:26-29) Bakubwabesa bazibuka ngwabo banapande kupwa ba kulongwa asina bakatambula “cikandelela cije cinapu kusana kwa Njambi hali Kilistu Yesu ku mwonyo uli mwilu.”—Fili 3:13-16.

5. Bakubwabesa banapande kulimona bati?

⁵ Sipilitu ya kujela ya Yehova ikakwasa bangamba bendi balikehese keti kulijundula embwe. (Efeso 4:1-3; Kolo 3:10, 12) Ngeci, bakubwabesa kubesi kulimona ngwabo ba seho kutubakana bakwabo. Bazibuka ngwabo Yehova kesi kubana sipilitu ya kujela yaingi kutubakana mwakayanena bangamba bendi boshe. Kubesi kuliziba ngwabo bazibuka manene busunga bwa mu Mbimbiliya kutubakana banu boshe. Co kubasa kuleka munu ngwabo nendi banamubwabesa, co napande kushangumuka kulya bifwisa ha Canukiso. Oloni bazibuka ngwabo Yehova ikeye lika muka-kulanya banu baye mwilu.

6. Kwesekesa na 1 Kolinte 4:7, 8, bika kubapandele kulinga baka-Kilistu bakubwabesa?

⁶ Bakubwabesa bamona ngwabo kubalanya kuya mwilu kunapu kubezika, oloni kubesi kushaka banu babamone ngwabo banapu ba kulitila. (Fili 2:2, 3) Bazibuka ngwabo Yehova mwababwabesele, kalekeleko munu woshe woshe. Ngeci, wakubwabesa kakomoka nga bamo kubataba oho bene ngwabo napu wa kubwabesa. Azibuka ngwendi Mbimbiliya yatuleka ngwayo keti tuzambule kutaba munu uje endeka ngwendi Njambi namwana cipangi ca kulitila. (Kujo 2:2) Co kashaka ngwendi banu bamusingimike manene. Ngeci kaleke baje baliwana nabo lwa kulibanga ngwendi napu wakubwabesa. Co lalo kai na kulishasha ku banu ngwendi napu wakubwabesa.—Tandeni 1 Kolinte 4:7, 8.

7. Byuma muka kubapandele kulinga bakubwabesa, co mwafwa bika?

⁷ Baka-Kilistu ba kubwabesa kubesi kuliziba ngwabo banapande kusikama lika na bakwabo bakubwabesa, ngwe baje bali mu cibunga cimo ca baka-kweha. Kubesi kusetela bakwabo bakubwabesa mangana basimutwiye nabo biñanda bya kubwabesa, nambe kuliwana mu bibunga mangana balilongese Mbimbiliya. (Ngala 1:15-17) Mu cikungulukilo kumukala likwatasano nga bakubwabesa balinga ngoco. Co balipyakana na sipilitu ya kujela ije ili na kukwasa bangamba ba Njambi bakale mu kwoloka na kulikwatasana.—Loma 16:17, 18.

8. Bika bitunapande kunyanyamena mutulingilamo baje bakali bifwisa ha Canukiso? (Taleni majwi a kwinikila.)

⁸ Tunapande kumona bati bandolome na bandokazi ba kubwabesa? Kwapwa kwakubi kusingimika manene munu, nameme wapwa ndolome ya Kilistu wakubwabesa. (Mateo 23:8-12) Mbimbiliya inatushongangeya ngwayo, ‘tutembwinine likulahelo’ lya bakulunu, oloni kuyatulekele ngwayo tupwise munu ntwama yetu embwe. (Heve 13:7) Mbimbiliya inatuleke lalo ngwayo bamo tubane “kasingimiko kakama.” Oloni tulinga ngoco mwafwa “bali na kupanga mwamubwa” na “kuundangana mu kwambulula na kulongesa,” keti ngwabo mwafwa banapu bakubwabesa embwe. (1 Tima 5:17) Nga tushangazala manene bakubwabesa na kubasingimika manene, co banasa kuziba shwamwa. c Co lalo tunasa kubalingisa balyalese. (Loma 12:3) Tubaboshe kutushaka kulinga cuma cije cilingisa bandolome ba Kilistu ba kubwabesa batanuke.—Luka 17:2.

9. Twasa kumwesa bati ngwetu twasingimika bakubwabesa?

⁹ Twasa kumwesa bati ngwetu tunasingimika baje banabwabesa Yehova? Nga kutubehula ngwetu: ‘Bamibwabesele bati?’ Eyi yapwa ñanda ya munu endi lika, co kutwesi na lisesa lya kuizibuka. (1 Tesa 4:11; 2 Tesa 3:11) Co kutwapandele kusinganyeka ngwetu muka-limbo lyabo nambe bisemi babo nambe baka-naanga yabo, nabo banapu bakubwabesa. Munu kasa kuwana buswana bwa mwilu kutundilila ku naanga yendi embwe. Njambi ikeye lika asa kumwanabwo. (1 Tesa 2:12) Kutwapandele lalo kwihula bihula bije bilubalesa bakwetu. Cakumwenako, kutwapandele kwihula munakazi wa ndolome wa kubwabesa mwakalizibila omwo akayoya myaka yoshe hano hasi kwa kujeneka munalume wendi. Tubaboshe twakulahela ngwetu Yehova “[akakutisa mashungu a byuma byoshe bya kuyoya, NWT].”—Myaso 145:16.

10. Tulinyungilila bati nga kutulibeyela bifwa bya bakwetu?

¹⁰ Nga kutumono bakubwabesa kupwa ba seho manene kutubakana bakwabo, co netu babenya tulinyungilila. Mu ngila muka? Mbimbiliya ngwayo bakubwabesa bamo hamo kubatwalelelaho kupwa ba kulongwa. (Mateo 25:10-12; 2 Petu 2:20, 21) Nga kutulibeyela bifwa bya bakwetu, co kutubakabangeya, ipwe bakubwabesa, nambe ba kutsimana, nambe baje banapangela Yehova ha myaka yaingi. Co omwo bonowa kupwa ba kulongwa nambe kuseza cikungulukilo, yetu kutuzeye nambe kulikela kupangela Yehova.

11. Bika binalingiwa ku nambala ya baje bakali ha Canukiso?

¹¹ Ha myaka yaingi, nambala ya baka-kulya ha Canukiso inakala na kuya mwisi. Oloni mu myaka ino, eyi nambala ili na kulibwezelela ha mwaka na mwaka. Kuma tunapande kuyayabala ndi? Embwe. Tusimutwiyeni byuma bitulingisa keti tuyayabale.

12. Mwafwa bika kutwapandele kuyayabala ha nambala ya baje bakali bifwisa ha Canukiso?

¹² “[Yehova] azibuka baje banapu bendi.” (2 Tima 2:19) Bandolome bakatanda baje bakali ha Canukiso, kubazibuka mpundu munu wa kubwabesa, oloni Yehova azibuka. Co bakatandela kumo na baje balimona  ngwabo bakubwabesa kumani embwe. Cakumwenako, bamo baje bakele na kulya banalikele. Bakwaboco hamo babinja mu bwongo, co kubalingisa bakulahele ngwabo bakayula hamo lika na Kilistu mwilu. Ngeci kutuzibuka nambala ya banu ba kubwabesa banasalako.

13. Kuma Mbimbiliya inamwesa nambala ya baje bakasala hano hasi muikashangumuka ñababa yakama ndi?

¹³ Bakubwabesa bakakala mu mitambela yaingi ya muno mu kaye ha simbu yakabezila Yesu na kuya nabo mwilu. (Mateo 24:31) Mbimbiliya yamwesa ngwayo mu matangwa a kukotoka, hano hasi hakasala lika bakubwabesa babandondo. (Kujo 12:17) Oloni kuyamwesele nambala ya baje bakasalaho muikashangumuka ñababa yakama.

14. Ngwe mubanamwesa ku Loma 9:11, 16, bika bitulilongesa ha kwangula bakubwabesa?

¹⁴ Yehova azibuka simbu ya kwangula bakubwabesa. (Loma 8:28-30) Yehova washangumukile kwangula bakubwabesa, hanima ya kusanguka kwa Yesu. Kwasholoka ngwe mu cita ca myaka ca kulibanga, baka-Kilistu ba busunga boshe bapwile ba kubwabesa. Mu myaka yakabangeyeyeho, baje balishashele ngwabo bapwile baka-Kilistu kubakangeyeye mpundu Kilistu. Oloni, mu myaka oyo bene, Yehova wabwabesele babandondo baje bapwile baka-Kilistu ba busunga. Bapwile ngwe tiliku yendekele Yesu ngwendi ikolela hamo na shaku. (Mateo 13:24-30) Muno mu matangwa a kukotoka, Yehova natwalelelaho kwangula banu  ba kupwa 144,000. d Nga Njambi nayongola kwangulako bamo simbu kanda kano kaye kakotoke, co kutwapandele kuyayabala. (Tandeni Loma 9:11, 16.) e Tunapande kunyanyama mangana keti tulinge ngwe baka-kupanga ba mu cisimo ca Yesu. Bayayabalele hali mwene yabo mwafwa walingile mwamubwa baje bakotokelele kupanga.—Mateo 20:8-15.

15. Kuma bakubwabesa boshe bapwa “ndungo wa kulongwa na kunyanyama,” ibanendeka ku Mateo 24:45-47 ndi? Lumbununeni.

¹⁵ Keti boshe baje bali na lilabelelo lya kukayoya mwilu bapwa “ndungo wa kulongwa na kunyanyama.” (Tandeni Mateo 24:45-47, NWT.) Ngwe mukwapwile mu cita ca myaka ca kulibanga, Yehova na Yesu bali na kupangesa bandolome babandondo mu kulisa na kulongesa banu babangi. Njambi wapangesele bakubwabesa babandondo lika mu cita ca myaka ca kulibanga mu kusoneka Bisoneka bya Cingiliki bya baka-Kilistu. Matangwa ano, baka-Kilistu bakubwabesa babandondo lika bali na cipangi ca kwana banu ba Njambi “byakulya ha simbu inapande.”

16. Bika bimunalilongesa muno mu cilongesa?

¹⁶ Bika bitunalilongesa muno mu cilongesa? Yehova nayongola kwana mwonyo wa myaka yoshe ku banu babangi baje bakayoya hano hasi na ku banu babandondo baje bakayula na Yesu mwilu. Yehova ana cikandelela ku bangamba bendi boshe, ipwe “Kayunda” nambe “Banalume likumi.” Co ashaka ngwendi boshe bononoke mashiko endi na kutwalelelaho kupwa ba kulongwa. Boshe banapande kupwa ba kulikehesa. Boshe banapande kumupangela hamo lika mu kulikwatasana. Boshe lalo banapande kuyoya mu kwoloka mu cikungulukilo. Omwo tuli kuyehi na kukotoka kwa kano kaye, tubaboshe tutwaleleleniho kupangela Yehova na kukabangeya Kilistu ha kupwa “butanga bumo.”—Yowa 10:16.