1. Iehova na e gwa hari eda negai dahaka bae vara?

IEHOVA ese eda nega na ini e perovetalaia toma, eto: “Tatau gwauta, gado idau-idau iboudiai besedia amo, ese Iuda tauna ta ena dabua bae dogoa tao, baeto, Mani oi ida aitala, badina be ai na vada a kamonai, Dirava na dekedekemu ai.” (Sek. 8:23) Una “Iuda tauna” na Dirava ese ena lauma helaḡa amo e horodia taudia e laulaulaidiamu. Bona idia na e gwauraidiamu “Dirava ena Isaraela.” (Gal. 6:16) “Tatau gwauta” ese tanobada ai bae mauri hanaihanai taudia e laulaulaidiamu. Idia na mai dibadia horoa taudia na Iehova ese e abidia hidi bona idia ida Iehova e toma henia diho heboumu na hahenamo badana.

2. “Tatau gwauta” na e horodia taudia ida ‘baela’ anina be dahaka?

² Ena be tanobada ai e nohomu horoa taudia ta ta ladadia na asi dibada, * to tanobada ai bae noho helarona e abia taudia na horoa taudia ida ‘baela’ diba. Edena dalai? Baibul na e gwa: “Tatau gwauta” ese “Iuda tauna ta ena dabua bae dogoa tao, baeto, Mani oi ida aitala, badina be ai na vada a kamonai, Dirava na dekedekemu ai.” Baibul ese Iuda tauna tamona e herevalaia. To “oi” bona “dekedekemu ai” anina na una Iuda tauna na dia taunimanima tamona e herevalaiamu to horoa taudia iboudiai e herevalaidiamu. Bona se horodia taudia na idia ida Iehova e hesiai henia heboumu. To, asie laloamu e horoa taudia na idia bae hakaudia taudia ai baela badina mai dibadia Iesu sibona na idia baine Hakaudia Tauna.​—⁠Mat. 23:10.

3. Ina atikol ese ededia henanadai be haerelaimu?

³ Hari ina negai, e horodia Kristen taudia haida na doini tanobadai e nohomu dainai, haida na be henanadaimu: (1) Horoa taudia be ede bae lalo toma? (2) Memorial negana ai haida na wain bae inu eiava parao bae ani, idia  be ede baita kara henidia toma? (3) Horoa taudia edia namba na e bada e laomu dainai una baita lalohekwarahilaia, eiava? Ina atikol ese unu henanadai be haerelaimu.

4. Korinto Ginigunana 11:27-29 ai edena hereva na horoa taudia ese bae laloa bada, bona dahaka dainai?

⁴ Horoa taudia ese Korinto Ginigunana 11:27-29 ena hereva bae laloa bada na ḡau badana. (Ba duahi.) Memorial ai, edena dalai horoa tauna ta ese parao baine ania bona wain baine inua kava na kerere? Bema ia na Iehova ena kara maoromaoro taravatudia na se badinamu, unu baine kara toma. (Heb. 6:4-6; 10:26-29) Horoa taudia na mai dibadia bema idia na e uramu “Keriso Iesu lalonai Dirava ese e boirida dae” dava namona bae abia, namona na Iehova bae badinaia ela bona mase.​—⁠Flp. 3:13-16.

5. Horoa taudia be ede bae lalo toma?

⁵ Iehova ena lauma helaḡa ese ena hesiai taudia e durudiamu bae manau, to dia bae hekokoroku. (Efe. 4:1-3; Kol. 3:10, 12) Una dainai e horodia taudia na asie laloamu idia ese ma haida na e hereadiamu. Idia na se lalomu Iehova ese lauma helaḡa ena heduru na idia  mo e henidia badabadamu. Asie laloamu Baibul ena hereva momokanidia na idia sibodia ese e lalopararalai namonamomu. Bona idia na ta basie hamaoroa ia na e horoa bona Memorial ai parao baine ani bona wain baine inu. To, mai manaudia ida bae abia dae Iehova sibona ese ta baine abia hidi.

6. Korinto Ginigunana 4:7, 8 heḡereḡerena, e horodia Kristen taudia be ede bae kara toma?

⁶ Ena be e horodia taudia na mai dibadia guba baela na hahenamo badana, to idia na asie uramu haida ese lada bada taudia heḡereḡeredia bae kara henidia. (Flp. 2:2, 3) Bona idia na mai dibadia, Iehova ese idia e horodia neganai, una na ta se hadibaia. Una dainai e horoa tauna na basine daradaramu bema ia e horoa karana na haida ese basie hamomokaniamu. Ia na mai dibana Baibul ese ita na e hamaorodamu ta ena hereva na basita abia dae haraḡa bema ia na Dirava ese maduna idau hereana ta e henia. (Apok. 2:2) E horoa Kristen tauna ta na nega ginigunana ta baine hedavari henia neganai, basine hahedinaraia ia na e horoa tauna ta. Bona ma haida ediai una na basine heaḡilaia.​—⁠1 Korinto 4:7, 8 ba duahi.

7. E horodia taudia be dahaka basie kara, bona dahaka dainai?

⁷ E horodia taudia na basie lalo idia na orea idauna ta lalonai dainai sibodia bae hebou. Horoa taudia haida na horoa taudia ma haida se tahudiamu Iehova ese e horodia karana bae herevaherevalaia hebou totona o gabu ta ai sibodia bae hegogo bena Baibul bae stadilaia. (Gal. 1:15-17) Bema horoa taudia na unu be kara tomamu, kongrigeisin na be pararamu. Bona Dirava ena hesiai taudia ediai maino bona lalotamona e havaraiamu siahuna, lauma helaḡa ena ḡaukara dalana be hadikaiamu.​—⁠Roma 16:17, 18.

8. Memorial ai, parao e animu bona wain e inumu tauna ta kara heniamu neganai, dahaka dainai nahuada baita toho? (Futnout danu ba itaia.)

⁸ Horoa tadikaka bona taihu be ede baita kara henidia toma? Ena be ia na Keriso ida baine lohia hebou tauna ta, to baita heaḡilaia o ia ladana baita abia isi na kerere. (Mat. 23:8-12) Baibul ese elda taudia e herevalaidiamu neganai, ita na e hagoadadamu “edia abidadama ba hagoia” o baita tohotohoa, to se hamaorodamu taunimanima na ihakauda taudia ai baita halaodia. (Heb. 13:7)  Momokani, Baibul na e gwaumu elda taudia na baita “matauraidia.” Unu baita kara toma badina idia ese ‘e hakauda namonamomu’ bona “haroro bona hahediba e goadalaimu” dia e horodia dainai. (1 Tim. 5:17) Bema horoa taudia na baita hanamodiamu o baita heaḡilaidiamu, una ese idia na be hahemaraidiamu. * Eiava bae hekokoroku diba. (Roma 12:3) Ita iboudai na asita uramu Keriso tadikakana baita hahekwakwanaidia bena idia ese kerere badana ta bae karaia.​—⁠Luka 17:2.

9. Edena dalai baita hahedinaraia Kristen horoa taudia na ta matauraidiamu?

⁹ Edena dalai baita hahedinaraia Iehova ese e horodia taudia na ta matauraidiamu? Basita nanadaidia idia be ede e horodia toma. Ita na asi eda maoro una baita henanadailaia. (1 Tes. 4:11; 2 Tes. 3:11) Bona basitato idia adavadia, tamadia sinadia, eiava edia bese taudia haida danu horoa taudia. Tau ta ese guba helarona na ena bese taudia amo basine abia hanai diba. Dirava sibona ese ia e abia hidimu. (1 Tes. 2:12) Haida edia hemami bae hadika henanadaidia na basita gwaurai. Heḡereḡere, horoa tadikakana ta adavana basita nanadaia bema ia sibona na tanobada ai be mauri hanaihanaimu, iena hemami be ede bamona. Namona na baita diba momokani, tanobada matamatana lalonai, Iehova ese “mauri ḡaudia iboudiai” edia ura ḡaudia na be henidiamu.​—⁠Sal. 145:16.

10. Edena dalai siboda baita hegima diba?

¹⁰ Bema e horodia taudia na dia lada bada taudia heḡereḡeredia baita kara henidiamu, ita na siboda ta hegimamu. Edena dalai? Baibul ese e hadibadamu horoa taudia haida ese Iehova na bae rakatania diba. (Mat. 25:10-12; 2 Pet. 2:20, 21) Herevana idia na horoa taudia, mai ladadia taudia, eiava laḡani daudau lalonai Iehova e hesiai henia, idia iheaḡilaidia karana na baita dadaraia. (Iuda 16) Bena ena be idia ese Iehova eiava kongrigeisin bae rakatania, eda abidadama baine goada bona dounu Iehova baita hesiai henia.

11. Memorial ai parao e animu bona wain e inumu taudia edia namba be ede bamona?

¹¹ Laḡani momo lalodiai, Memorial ai parao e aniva bona wain e inuva taudia edia namba na e maraḡi e laova. Tame hanaidia laḡani lalodiai, una namba na e bada e laomu. Una dainai baita lalohekwarahi eiava? Lasi. Mani badi haida aita herevalai.

12. Dahaka dainai parao e animu bona wain e inumu taudia edia namba dainai basita lalohekwarahi?

¹² “Lohiabada [Iehova] na ena taunimanima iboudiai vada dibana.” (2 Tim. 2:19) Memorial ai, parao e animu bona wain e inumu taudia edia namba e duahimu tadikakadia na asi dibadia daidia be e horodia taudia korikoridia, to Iehova be mai dibana. Idia ese horoa taudia korikoridia bona sibodia e lalomu horoa taudia na e hagaudia heboumu. Heḡereḡere, guna parao e aniva eiava wain e inuva taudia haida na gabeai unu kara na e hadokoa. Haida be reana asie lalo namonamomu bona sibodia ese e abia daemu idia na Keriso ida gubai bae lohia. Una dainai, tanobada ai horoa  taudia oredia edia namba korikorina na asi dibada.

13. Hisihisi bada hereana baine matama neganai, tanobada ai hida bae noho nambana be Baibul ese e gwauraia, a?

¹³ Iesu baine lou mai neganai, tanobada heḡeḡemadai ai horoa taudia baine gogodia bona guba baine laohaidia. (Mat. 24:31) Baibul na e gwaumu dina gabediai, tanobada ai bae noho horoa taudia edia namba na baine maraḡi. (Apok. 12:17) To hisihisi bada hereana baine matama neganai, hida bae noho na se gwauraia.

14. Roma 9:11, 16 ena hereva heḡereḡerena, dahaka baita lalopararalaia na namo?

¹⁴ Iehova na mai dibana ta be edena negai baine horoa. (Roma 8:28-30) Iesu e toreisi lou murinai, Iehova ese horoa taudia e abidia hidi matama. Una ese e hahedinaraiamu, Kristen ginigunadia edia negai, Kristen taudia iboudiai na e horodia. Laḡani handred momo muridiai, sibodia e hegwauraiva Kristen taudia ese Keriso na asie badinaia momokaniva. To unu laḡani lalodiai, Iehova na Kristen taudia momokanidia haida e horodia. Idia na Iesu ese e gwauraia uit heḡereḡeredia, ava dikadia padadia ai e tubu. (Mat. 13:24-30) Dina gabediai, Iehova na dounu taunimanima e abidia hidimu, 144,000 taudia ai baela totona. * Una dainai, dokona do se kau ai bema Dirava baine ura haida baine abidia hidi, ita na asi eda maoro una baita henanadailaia. (Roma 9:11, 16 ba duahi.) * Nahuada  baita toho, Iesu ese ena parabole ai e gwauraidia ḡaukara taudia edia kara baita tohotoho na garina. Idia na biagudia ese adorahi ai e ḡaukara taudia e kara henidia dalana dainai e maumau.​—⁠Mat. 20:8-15.

15. E horodia taudia iboudiai be Mataio 24:45 ai e gwauraidia “hesiai tauna mai ena kamonai bona mai ena kara maoromaoro” oreana lalonai, a? Ba herevalaia.

¹⁵ Dia gubai bae noho helarona e abia taudia iboudiai na “hesiai tauna mai ena kamonai bona mai ena kara maoromaoro” oreana. (Mat. 24:45-47 ba duahi.) Kristen ginigunadia edia nega heḡereḡerena, hari ina negai Iehova bona Iesu ese tadikaka haida e ḡaukaralaidiamu tadikaka taihu bae hadibadia totona. Kristen ginigunadia edia negai, horoa Kristen taudia haida mo e ḡaukaralaidia Kristen Grik Revarevadia bae tore. Una heḡereḡerena, hari ina negai danu e horodia Kristen taudia haida mo na nega korikori ai Dirava ena taunimanima edia “malamala” e henimu.

16. Ina atikol amo dahaka ome diba?

¹⁶ Ina atikol amo dahaka tame diba? Iehova ese tanobada ai mauri hanaihanai helarona na taunimanima hutuma e henidia, to guba maurina na Iesu ida bae lohia taudia e henidia bona idia na dia momo. Iehova ese ena hesiai taudia iboudiai na e hanamodiamu​—⁠“Iuda tauna” bona “tatau gwauta”​—Iehova na e uramu idia na iena taravatu bae badina bona Ia bae badinaia hanaihanai. Iboudiai bae manau na ḡau badana. Ia bae hesiai henia hebou bona bae lalotamona. Bona iboudai baita ḡaukara goada tadikaka taihu ida maino ai baita noho. Dokona ta lao heniamu lalonai, iboudai ese Iehova baita hesiai henia hebou bona Keriso baita badinaia, mamoe serina tamona na heto.​—Ioa. 10:16.