LARTIK LETID 5
Nou Pou Al Avek Zot
“Nou anvi al avek zot parski nou finn tann dir ki Bondie avek zot.”—ZAKA. 8:23.
KANTIK 26 To’nn Fer Sa pou Mwa
REZIME *
Bann lezot mouton (“dis zom”) konsider sa kouma enn loner pou ador Zeova ansam avek bann Kretien ki ena lesperans pou al dan lesiel (“enn Zwif”) (Get paragraf 1-2)
1. Ki Zeova ti predir pou arive dan nou lepok?
KONSERNAN nou lepok, Zeova ti predir: “Dis zom dan tou lang bann nasion pou trap, wi, zot pou trap bien for linz enn Zwif, ek zot pou dir: ‘Nou anvi al avek zot parski nou finn tann dir ki Bondie avek zot.’” (Zaka. 8:23) Dan sa verse-la, sa ‘Zwif-la’ reprezant bann Kretien ki Bondie inn swazir par so lespri sin pou al viv dan lesiel. Zot apel osi “Izrael Bondie.” (Gal. 6:16, NW) Sa ‘dis zom-la’ reprezant bann dimounn ki ena lesperans pou viv pou touletan lor later. Zot kone ki Zeova inn beni sa group Kretien ki ena lesperans pou al dan lesiel la ek se enn gran loner pou zot pou ador Bondie ansam avek bannla.
2. Kouma eski sa ‘dis zom-la’ “al avek” bann Kretien ki ena lesperans pou al dan lesiel?
2 Li inposib pou konn nom tou bann Kretien ki ena lesperans pou al dan lesiel ek ki ankor lor later azordi. * Me kanmem sa, bann Kretien ki ena lesperans pou viv lor later kapav “al avek zot.” Dan ki sans? Labib dir ki sa ‘dis zom-la’ pou “trap bien for linz enn Zwif, ek zot pou dir: ‘Nou anvi al avek zot parski nou finn tann dir ki Bondie avek zot.’” Premie parti sa verse-la koz lor enn Zwif, me apre verse-la servi mo “zot” pou fer referans ar sa Zwif-la. Sa montre ki sa Zwif-la li pa zis enn sel dimounn, me plizir dimounn. Li reprezant tou bann Kretien ki ena lesperans pou al dan lesiel. Bann ki ena lesperans pou viv lor later servi Zeova ansam avek bann ki ena lesperans pou al dan lesiel. Selman, zot pa konsider sa bann Kretien-la kouma bann sef. Zot kone ki se Zezi zot Sef.—Mat. 23:10, NW.
3. Ki kestion nou pou reponn dan sa lartik-la?
3 Parmi pep Bondie azordi, ankor ena bann Kretien ki ena lesperans pou al dan lesiel. Alor, kitfwa ena sertin ki demann zotmem: (1) Ki lopinion bann Kretien ki ena lesperans pou al dan lesiel bizin ena lor zotmem? (2) Kouma eski nou bizin tret bann Kretien ki pran lanblem zour Memoryal? (3) Eski nou bizin trakase si kantite bann dimounn ki pran lanblem pe kontign ogmante? Sa lartik-la pou reponn sa bann kestion-la.
KI LOPINION BANN KRETIEN KI ENA LESPERANS POU AL DAN LESIEL BIZIN ENA LOR ZOTMEM?
4. Dapre 1 Korintien 11:27-29, bann Kretien ki ena lesperans pou al dan lesiel bizin bien reflesi lor ki lavertisman, ek kifer?
4 Bann Kretien ki ena lesperans pou al dan lesiel bizin reflesi bien lor lavertisman ki ena dan 1 Korintien 11:27-29. (Lir.) Zour Memoryal, kouma enn Kretien ki ena lesperans pou al dan lesiel kapav pran bann lanblem “dan enn manier ki pa dign”? Li pou fer sa si li pran bann lanblem me li pa obeir bann lalwa Zeova. (Ebre 6:4-6, NW; 10:26-29, NW) Bann Kretien ki ena lesperans pou al dan lesiel kone ki zot bizin res fidel si zot anvi gagn “pri ki Bondie ofer [zot] dan lesiel par Zezi Kris.”—Fil. 3:13-16.
5. Ki lopinion bann Kretien ki ena lesperans pou al dan lesiel bizin ena lor zotmem?
5 Lespri sin ed bann serviter Zeova pou ena limilite ek pou pa vinn orgeye. (Efe. 4:1-3; Kol. 3:10, 12, NW) Alor, bann Kretien ki ena lesperans pou al dan lesiel pa panse ki zot pli siperyer ki lezot. Zot kone ki Zeova pa donn zot plis lespri sin ki so bann lezot serviter. Zot pa panse ki zot konpran Labib pli bien ki lezot. Ek zame zot pa pou dir enn lot dimounn ki li osi li’nn gagn lesperans pou al dan lesiel ek ki li bizin pran bann lanblem. Okontrer, avek limilite zot rekonet ki se zis Zeova ki invit bann dimounn pou al dan lesiel.
6. Dapre 1 Korintien 4:7, 8, kouma bann Kretien ki ena lesperans pou al dan lesiel bizin azir?
6 Mem si sa bann Kretien-la konsider sa kouma enn gran loner pou al viv dan lesiel, zot pa atann ki lezot tret zot dan enn fason spesial. (Fil. 2:2, 3) Zot kone osi ki Zeova pa finn fer personn kone kan Li’nn donn zot sa lesperans-la. Alor, zot pa etone si sertin o-koumansman pa krwar ki zot finn gagn sa lesperans-la. Zot kone ki Labib dir ki enn dimounn bizin pa krwar deswit kan enn kikenn dir ki Bondie inn donn li enn responsabilite spesial. (Rev. 2:2) Enn Kretien ki ena lesperans pou al dan lesiel pa anvi atir latansion lor limem. Alor, li pa pou koz lor so lesperans avek bann dimounn ki li zwenn pou premie fwa. Biensir, li pa pou flat limem akoz so lesperans.—Lir 1 Korintien 4:7, 8, NW. *
7. Ki kitsoz bann Kretien ki ena lesperans pou al dan lesiel bizin pa fer, ek kifer?
7 Bann Kretien ki ena lesperans pou al dan lesiel pa panse ki zot bizin pas letan zis ant zot, koumadir zot bann manb enn klib. Zot pa rod bann lezot Kretien ki ena mem lesperans ki zot pou ki zot koz lor zot lesperans ouswa pou form enn group pou etidie Labib. (Gal. 1:15-17, NW) Si sa bann Kretien-la fer bann kitsoz koumsa, pa pou ena linite dan lasanble Kretien. Zot pou azir kont lespri sin ki pe ede pou ki ena lape ek linite parmi pep Bondie.—Rom. 16:17, 18.
KOUMA NOU BIZIN TRET BANN KRETIEN KI ENA LESPERANS POU AL DAN LESIEL?
Fode pa ki nou konsider bann Kretien ki ena lesperans pou al dan lesiel ouswa ninport kisannla ki ena bann responsabilite koumadir zot bann selebrite (Get paragraf 8) *
8. Kifer nou bizin fer bien atansion ar fason ki nou tret bann Kretien ki ena lesperans pou al dan lesiel? (Get not.)
8 Kouma nou bizin tret bann frer ek ser ki ena lesperans pou al dan lesiel? Li pa bon ki nou admir enn kikenn tro boukou, mem si li enn Kretien ki ena lesperans pou al dan lesiel. (Mat. 23:8-12) Kan Labib koz lor bann ansien, li ankouraz nou pou “imit zot lafwa,” me li pa dir nou ki nou kapav fer enn imin vinn nou sef. (Ebre 13:7) Li vre ki Labib dir ki sertin frer “merite gagn enn doub loner.” Zot pa merit sa loner-la parski zot ena lesperans pou al dan lesiel. Zot merit sa parski zot “diriz dan enn bon fason” ek zot “travay dir pou prese ek ansegne.” (1 Tim. 5:17, NW) Si nou donn bann Kretien ki ena lesperans pou al dan lesiel tro boukou loner ek latansion, nou riske met zot malalez. * Ouswa pli pir ankor, nou riske fer zot vinn orgeye. (Rom. 12:3) Personn parmi nou pa anvi fer enn kitsoz ki kapav fer enn Kretien ki ena lesperans pou al dan lesiel fer enn erer grav!—Lik 17:2.
9. Kouma nou kapav montre ki nou ena respe pou bann Kretien ki ena lesperans pou al dan lesiel?
9 Kouma nou montre ki nou ena respe pou bann Kretien ki ena lesperans pou al dan lesiel? Fode pa nou demann zot kouma zot inn kone ki zot inn gagn sa lesperans-la. Se enn kitsoz personel ek nou pena drwa konn sa. (1 Tes. 4:11; 2 Tes. 3:11) Fode pa osi ki nou panse ki zot mari, zot madam, zot paran, ouswa enn lot manb zot fami ena sa lesperans-la li osi. Sa lesperans-la pa enn leritaz ki enn kikenn gagne ar so fami. Se Zeova ki donn sa lesperans-la. (1 Tes. 2:12) Nou bizin osi pa poz bann kestion ki kapav bles lezot. Par exanp, nou pa pou demann enn ser ki so misie ena lesperans pou al dan lesiel kouma li panse so lavi pou ete dan Paradi san so misie. Apre tou, nou kapav sir ki dan lemond nouvo Zeova pou “satisfer dezir tou seki vivan.”—Ps. 145:16, NW.
10. Kouma nou protez noumem kan nou pa ‘admir bann dimounn’?
10 Nou osi protez noumem kan nou pa konsider sa bann Kretien-la kouma pli siperyer. Kifer nou dir sa? Parski Labib dir ki sertin parmi sa bann Kretien-la kitfwa pa pou res fidel. (Mat. 25:10-12; 2 Pier 2:20, 21) Anplis, si nou pa ‘admir bann dimounn,’ zame nou pa pou swiv zot, mem si zot popiler, zot pe servi Zeova depi lontan, ouswa si zot ena lesperans pou al dan lesiel. (Zid 16, NW) Koumsa, si arive zot vinn infidel ouswa zot kit laverite, nou pa pou perdi nou lafwa an Zeova ouswa aret servi Li.
ESKI NOU BIZIN TRAKASE SI KANTITE BANN DIMOUNN KI PRAN LANBLEM PE KONTIGN OGMANTE?
11. Ki nou kapav dir lor kantite bann Kretien ki pran lanblem?
11 Pandan plizir lane, kantite bann Kretien ki ti pe pran lanblem zour Memoryal ti pe diminie. Me sa bann dernie lane-la, kantite bann Kretien ki pran lanblem pe kontign ogmante. Eski nou bizin trakase? Non. Anou gete kifer.
12. Kifer fode pa nou trakase si kantite bann Kretien ki pran lanblem pe kontign ogmante?
12 Zeova “konn so dimounn.” (2 Tim. 2:19) Bann frer ki kont kantite dimounn ki pran lanblem zour Memoryal, zot pa kouma Zeova ek zot pa kone kisannla inn vremem gagn sa lesperans-la. Alor, parmi bann dimounn ki pran lanblem, ena ki panse zot ena sa lesperans-la alor ki zot pa’nn gagn li. Par exanp, sertin ki ti pe pran lanblem avan, plitar finn arete. Ena lezot ki ena bann problem mantal ouswa emosionel ek zot panse ki zot pou al regn ansam avek Zezi dan lesiel. Li kler ki nou pa kone exakteman komie Kretien ki ena lesperans pou al dan lesiel ki ankor lor later.
13. Eski Labib dir komie Kretien ki ena lesperans pou al dan lesiel pou lor later kan gran detres pou koumanse?
13 Pou ena bann Kretien ki ena lesperans pou al dan lesiel partou lor later kan Zezi pou vinn pran zot pou al dan lesiel. (Mat. 24:31) Labib dir ki, pandan bann dernie zour, pa pou ena boukou Kretien ki ena lesperans pou al dan lesiel ki pou ankor lor later. (Rev. 12:17) Me Labib pa dir komie zot pou ete kan gran detres pou koumanse.
Kouma to pou reazir si enn kikenn pran lanblem zour Memoryal? (Get paragraf 14)
14. Dan Romin 9:11, 16, kouma eski Zeova swazir bann Kretien ki ena lesperans pou al dan lesiel?
14 Se Zeova ki deside kan Li pou swazir bann Kretien ki ena lesperans pou al dan lesiel. (Rom. 8:28-30) Apre rezireksion Zezi, Zeova ti koumans swazir bann Kretien ki ena lesperans pou al dan lesiel. Li paret ki tou bann vre Kretien dan premie siek ti ena sa lesperans-la. Dan bann siek ki’nn vini apre, laplipar bann dimounn ki ti pretann zot Kretien pa ti vremem swiv Zezi. Me kanmem sa, dan sa peryod-la, Zeova ti donn enn tigit dimounn ki ti bann vre Kretien lesperans pou al dan lesiel. Zot ti kouma sa dible ki Zezi ti dir ti pou grandi parmi bann move lerb la. (Mat. 13:24-30) Pandan bann dernie zour, Zeova pe kontign swazir bann dimounn ki pou form parti bann 144,000. * Alor, si Bondie desid pou swazir sertin parmi zot zis avan ki lafin vini, fode pa ki nou dout sazes Bondie. (Lir Romin 9:11, 16, NW. *) * Fode pa ki nou reazir kouma bann travayer ki Zezi ti mansione dan enn so bann lexanp. Zot ti plengne akoz fason ki zot met ti tret bann travayer ki ti vinn travay dan dernie ler.—Mat. 20:8-15.
15. Eski tou bann Kretien ki ena lesperans pou al dan lesiel form parti “lesklav fidel ek saz” ki mansione dan Matie 24:45-47? Explike.
15 Pa tou bann Kretien ki ena lesperans pou al dan lesiel ki form parti “lesklav fidel ek saz.” (Lir Matie 24:45-47, NW. *) Parey kouma dan premie siek, azordi osi Zeova ek Zezi pe servi enn tigit frer pou nouri, ouswa ansegn, boukou dimounn. Dan premie siek, se zis de-trwa Kretien ki ena lesperans pou al dan lesiel ki ti ekrir bann Lekritir Grek Kretien. Azordi, se zis enn tigit Kretien ki ena lesperans pou al dan lesiel ki ena responsabilite pou donn bann serviter Bondie “zot nouritir dan ler ki bizin.”
16. Ki nou finn aprann dan sa lartik-la?
16 Ki nou finn aprann dan sa lartik-la? Zeova inn desid pou donn laplipar so bann serviter lavi pou touletan lor later. Parkont, Li’nn swazir enn ti group pou al viv dan lesiel ek pou regn ansam avek Zezi. Zeova rekonpans tou so bann serviter, ki zot form parti ‘sa Zwif-la’ ouswa ‘sa dis zom-la’. Li atann ki zot tou obeir mem lalwa ek ki zot res fidel. Zot tou bizin kontign ena limilite. Zot tou bizin servi Li ansam dan linite. Ek zot tou bizin fer zefor pou ki ena lape dan lasanble Kretien. Amezir ki lafin pe koste, anou kontign servi Zeova ek kontign swiv Zezi Kris kouma “enn sel troupo.”—Zan 10:16.
^ par. 5 Sa lane-la, nou pou fer Memoryal lamor Zezi Kris Mardi le 7 Avril. Ki nou bizin panse lor bann dimounn ki pran bann lanblem sa zour-la? Eski nou bizin trakase si kantite bann dimounn ki pran lanblem pe kontign ogmante? Sa lartik-la pou reponn sa bann kestion-la ek li baze lor enn lartik ki ti paret dan Latour Degard Zanvie 2016.
^ par. 2 Dapre Psom 87:5, 6 (NW), kitfwa dan lavenir Bondie pou revel nom tou bann ki pe regne ansam avek Zezi dan lesiel.—Rom. 8:19.
^ par. 6 1 Korintien 4:7, 8: “7 Parski kisannla ki rann twa diferan ar enn lot? Wi, ki to ena ki to pa’nn gagne? Si asterla, vremem to’nn gagn sa, kifer to fer vantar koumadir to pa finn gagn sa? 8 Alor zot inn fini gagn ase? Zot inn fini vinn ris? Zot inn fini koumans regne san nou? Vremem mo swete ki zot ti’nn fini koumans regne, koumsa nou osi nou ti kapav regne avek zot.”
^ par. 8 Get lankadre “Lamour ‘Pena enn Kondwit Indesan’” dan Latour Degard Zanvie 2016, p. 26.
^ par. 14 Mem si Zistwar Bann Apot 2:33 montre ki se gras-a Zezi ki gagn lespri sin, se Zeova ki swazir sak dimounn.
^ par. 14 Romin 9:11, 16: “11 Alor ki zot pa ti ankor ne ek zot pa ti pratik nanye ki bon ouswa move, pou ki proze Bondie konsernan swa ki ti bizin fer, pa depann lor bann aksion me lor sa Kikenn ki apele la. 16 Alor, sa pa depann ni lor sa kikenn ki oule la, ni lor so zefor, me lor Bondie ki ena pitie.”
^ par. 14 Pou gagn plis ransegnman, get “Kestion Bann Lekter” dan Latour Degard 1e Me 2007, an Franse.
^ par. 15 Matie 24:45-47: “45 Kisannla ki vremem lesklav fidel ek saz, ki so met finn etabli lor so bann domestik, pou donn zot, zot nouritir dan ler ki bizin? 46 Ere sa esklav-la si, kan so met arive, li trouv li pe fer sa. 47 Vremem mo dir zot, li pou etabli li lor tou so bann dibien.”
KANTIK 34 Mars ar Lintegrite
^ par. 59 DESKRIPSION ZIMAZ: Si pandan enn lasanble, enn lafoul antour enn reprezantan biro mondial ek so madam pou tir zot foto, se vremem enn mank respe!
