MWAHA WOOSOMIYA 5
Nimpheela urwaa ni nyuuvaca
“Nimpheela urwaa nkhayi ni nyuuvaca, kontha niheewa wiira Nluku ri ni nyuuva.”—ZAKAR. 8:23.
NCIPO 26 ‘Fizeste-o por Mim’
NINHALA WIITTHUCANI? *
Ikhontwaa cikiina (“alopwana khuumi”) anoona ukhala iparakha yuulupale cinene unswalela Yehova nkhayi ni makristau oothanliya (“nyuuta”) (Uwehe iparaagarafu 1-2)
1. Isiyani Yehova yaahimyalyaawe wiira yaanaahala wiirannya mahuku olelo?
YEHOVA ahopanka ila inatiriila, yaahala ukhumelela mahuku olelo: “Alopwana khuumi oluuka cotheene co khula ilapo anaahala uvarelela niikuru cinene, iyee, anaahala uvarelela niikuru cinene nlempe nohancu ya nlopwana nyuuta, yiiraka: ‘Nimpheela urwaa nkhayi ni nyuuvaca, kontha niheewa wiira Nluku ri ni nyuuva.’” (Zacar. 8:23) “Nyuuta” noromoliya nhina ila iveeruswiila anaaciya makristau oothanliya ni nnepa wowaarya. Ayo ciicammo anawiihaniya “Isarayeli ya Nluku.” (Akalas. 6:16) “Alopwana khuumi” anaaciya atthu otheene anweherera ukhalana ukumi woohimala watuninyani. Ayo anaacuwela wiira Yehova naacaaliha ikhurupu yo makristau oothanliya ni anoona ukhala iparakha yuulupale cinene unswalela Nluku wamoca naayo.
2. Manannani “alopwana khuumi” ‘cinrwaaya nkhayi’ ni makristau oothanliya?
2 Ibiiblya ineera wiira “alopwana khuumi” “[yaanaahala] uvarelela nlempe nohancu ya nlopwana nyuuta, yiiraka: ‘Nimpheela urwaa nkhayi ni nyuuvaca, kontha niheewa wiira Nluku ri ni nyuuva.’” Hataa ukhalaka wiira iyo iveeruswiiyo inonromola nyuuta mmoca, moolumo “nyuuvaca” ni “nyuuva” anthoonyera wiira akhanle atthu enci. Iyo maanaaya wiira yeeriyaka nlopwana nyuuta khanaaciya ntthu mmoca paahi, masi inaaciya ikhurupu yotheene yo makristau oothanliya. Ilelo, khunooryannya ucuwela ncina na khula nkristau oothanliya. * Unookhalaru commo, ale anweherera ukhalana ukumi woohimala watuninyani pooti “urwaa nkhayi” ni makristau oothanliya. Manannani? Yanswalelaka Yehova nkhayi naayo. Masi ale anweherera ukhalana ukumi woohimala watuninyani khanaawehera makristau oothanliya khampa ahooleli, kontha anaacuwela wiira Nhoolelyaaya khanle Yesu.—Mat. 23:10.
3. Makohoni anhala waakhuliya nhina ula mwahoola?
3 Ukhala wiira nanlelo ahaavo makristau oothanliya nkhayi naapoovu a Nluku, ahaavo atthunaka aneekoha: (1) Manannani makristau oothanliya cinlamuliyaaya wiiwehera? (2) Ntthu nkhuura iphaawu ni nwurya iviinyu nihuku no Nuupuwelelo nlamuliya uweheriya cani? (3) Niireke nihaana nikhalaka ni masukhuli noonaka wiira ale ankhuura iphaawu ni anwurya iviinyu anawuncerya? Ula mwahoola unaahala waakhula ala makohwaala.
MANANNANI CINLAMULIYAAYA WIIWEHERA MAKRISTAU OOTHANLIYA?
4. Isiyani ihimiye nhina 1 Akorintu 11:27-29 makristau oothanliya inlamuliyaaya wuupuwela cinene, ni nlattuni?
4 Makristau oothanliya ahaana yuupuwelaka cinene itthu inhimyeriyaaya nhina 1 Akorintu 11:27-29. (Usome.) * Inannani nkristau oothanliya caahalaawe ukhuura iphaawu ni uwurya iviinyu “uhimphwanelaka”? Uyo aahala upanka iyo akhuuraka iphaawu ni awuryaka iviinyu, acuwelakoono wiira khaneettela malamulo a Yehova. (Mabere. 6:4-6; 10:26-29) Makristau oothanliya anaacuwela wiira, yapheelaka waakhela ‘itthuvo yiihaneliyaaya uculu ni Nluku, iriyari wa Kristu Yesu,’ ahaana yahihiyaka ukhala ookhuluvelya.—Afili. 3:13-16.
5. Makristau oothanliya aneewehera cani?
5 Nnepa wowaarya wa Yehova unawaakavihera atthu wiiyeviha ni uhikhala owiicoona. (Efesu 4:1-3; Akol. 3:10, 12) Phimaana, makristau oothanliya khanoopuwela wiira ayo akhanle oolupale waapwaha akhwaaya. Ayo khanoopuwela wiira Yehova nawaavaha nnepa wowaarya cinene uvikana mananna cinaavahaawe atthu akiina anonswalela. Ayo ciicammo khanoopuwela wiira anaakhitiri wiiweeha ratta ikhweeli co mbiiblyani waavikana atthu akhwaawe. Ni ayo khayaahala umwiirela ntthu wiira hothanliya ni pooti wancera ukhuura iphaawu ni uwurya iviinyu wanuupuweleloni. Uhiya commo, makristau oothanliya anawiiyeviha ni anaacuwela wiira Yehova paahi phinonlattula ntthu wiira arwee akhale wiirimu.
6. Toko cinthoonyeraaya 1 Akorintu 4:7, 8, manannani makristau oothanliya cinlamuliyaaya weetta?
6 Makristau oothanliya anoona ukhala iparakha yuulupale cinene ulattuliya wiira arwee yakhale wiirimu. Masi ayo khanweherera wiira yooniye ukhala atthu oolupale. (Afili. 2:2, 3) Ayo ciicammo anaacuwela wiira ukati uthanliyaaya, Yehova khanhimyacenre ntthu wiira haathanla. Phimaana, makristau oothanliya khankhala ni masukhuli wakhalaka wiira haavo ntthu hinaakupali wiira ahothanliya. Ayo anaacuwela wiira Ibiiblya inaanisovenriha uhaakuva unkupali ntthu neehimya wiira hovahiya nrintti muulupale ni Nluku. (Apoka. 2:2) Makristau oothanliya khanweherera wiira attottopeliye. Phimaana ikwaha impacerihaaya uncuwela ntthu, ayo khaneehimya wiira akhanle makristau oothanliya. Ciicammo khaneettitthihaca nlattu wookhala makristau oothanliya.—Usome 1 Akorintu 4:7, 8. *
7. Isiyani makristau oothanliya ihimpankaaya, ni nlattuni?
7 Makristau oothanliya khanoopuwela wiira anlamuliya waapatthanana paahi makristau oothanliya akhwaaya, toko wiira atthu oopanka mphantte ikhiipa imoca. Ayo khammananiha waatotha makristau oothanliya akhwaaya wiira awoopane myaha nhina mananna cithanliyaaya awula wiira atthenkace ikhurupu caya coohala usoma Ibiiblya yaayoru. (Akalas. 1:15-17) Unari wiira makristau oothanliya anaapanka iyo, nloko naanaahala ukhala nookawanihiya. Upanka commo waahala ukhala uvirikaniha nnepa wowaarya, unaakavihera apoovu a Nluku ukhala ni nnema ni owiiwanana.—Aroo. 16:17, 18.
ANLAMULIYA UWEHERIYA CANI MAKRISTAU OOTHANLIYA?
Khaninlamuliya uwoona makristau oothanliya awula mayamunna akiina arina mirintti wanlokoni ukhala oolupale cinene waapwaha akhwaaya (Uwehe iparaagarafu 8) *
8. Kontha isiyani nihaana ninweheraka ratta ntthu nkhuura iphaawu ni nwurya iviinyu wanuupuweleloni? (Uwehe ciicammo niwehero no vathi ipaagina.)
8 Ninlamuliya waawehera cani mayamunna ni asirokorihu akhanle makristau oothanliya? Yaahala ukhala itthu yootakhala utepa unttitthimiha awula unttottopela cinene ntthu, hataa akhalaka munnaawe Kristu. (Mat. 23:8-12) Uwuupuwele mahumu o wanlokoni. Ibiiblya inaanisovenriha ‘utakiha waamini waya,’ masi ciicammo ineera wiira khaninlamuliya umpanka nhooleliihu nanka pinaatamu. (Mabere. 13:7) Ninaacuwela wiira Ibiiblya ineera wiira ahaavo mayamunna unaaphwanela “uttitthimihiya cinene.” Masi anlamuliya uttitthimihiya commo nlattu ‘wo wiikurumica uvara nteko wo wuuluma ni wiitthuciha,’ kahi nlattu wookhala makristau oothanliya. (1 Tim. 5:17) Natepaka unttitthimiha ni unttottopela cinene nkristau oothanliya, uyo pooti umuula nru. * Awula hiiva pooti umpankiha uyo ukhala ntthu owiicoona. (Aroo. 12:3) Khweeliini, hiiva khanaahala upheela upanka itthu yaahala untthekiha munnaawe Kristu oothanliya, ninvarihaka iyo itampi yuulupaleeyo!—Luka 17:2.
9. Ninlamuliya uthoonyera cani wiira ninawaahisimu makristau oothanliya?
9 Ninlamuliya uthoonyera cani wiira ninawaahisimu makristau oothanliya? Inanna imoca ukhanle uhaakoha mananna ayo cithanliyaaya. Uyo ukhanle mwaha wo veekhaaya, ni khanirina isariya yoocuwela. (1 Atesal. 4:11; 2 Atesal. 3:11) Ni khaninlamuliya wuupuwela wiira awannyaya, amwaaraya, asithumwanaya awula amucaaya akiina ciicammo akhanle makristau oothanliya. Ntthu khanhiyeriya nimmucyaawe niweherero noorwaa ukhala wiirimu. Nluku phinonvaha ntthu nno niwehereronno. (1 Atesal. 2:12) Inanna ikhwaawe yoothoonyera wiira ninawaahisimu makristau oothanliya ukhanle uhikoha citthu coohala waawereeha nrima. Toko waakoha amwaarawe munna oothanliya co: “Nneecoona cani moopuwelaka wiira nnaahala ukhala upeephoni mpaka, woohiwoona-tho awannyu?” Khaninlamuliya upanka commo kontha ninaakupali wiira upeephoni Yehova naahala ‘utteeliha nrima citthu cikumi cotheene.’—Isaa. 145:16.
10. Kontha isiyani ukhotta “utepa waatikhinaca atthu” unaanikhikicera?
10 Nanyemaka waawehera makristau oothanliya khampa atthu oolupale waapwaha atthu akhwaawe, ninaahala wiikhikicera. Manannani? Ibiiblya ineera wiira atthunaka ahaavo makristau oothanliya anhala uhiya ukhala ookhuluvelya. (Mat. 25:10-12; 2 Pet. 2:20, 21) Neewelelaka ikano ineera wiira nihaana nikhottaka “utepa waatikhinaca atthu”, khaninhala untthara ntthu, hataa ukhalaka wiira uyo ancenre unswalela Yehova khalayi, hataa akhalaka oocuwelaciya cinene awula nkristau oothanliya. (Yuda 16, niwehero.) Commo khaninhala uhiya waamini wihu ni unswalela Yehova wakhalaka wiira uyo ntthuuyo hohiya ukhala ookhuluvelya ni hohiya unswalela Yehova.
NIIREKE NIHAANA NIKHALAKA NI MASUKHULI NAWOONAKA YUNCERYAAKA ALE ANKHUURA IPHAAWU NI ANWURYA IVIINYU?
11. Isiyani inkhumelela naatthu ankhuura iphaawu ni anwurya iviinyu wanuupuweleloni?
11 Myaakha cinci khalayi, atthu yaakhuura iphaawu ni yaawurya iviinyu wanuupuweleloni yaaneera uwukuwa. Masi myaakha civinrennya va, ayo atthwaayo anvira yunceryaaka. Niireke nihaana nikhalaka ni masukhuli nlattu wo iyo? Mena. Nttwee noone nlattuni.
12. Kontha isiyani khaninlamuliya ukhala ni masukhuli nlattu wo nummeru naatthu ankhuura iphaawu ni anwurya iviinyu wanuupuweleloni?
12 “Yehova nawaacuwela atthwaawe.” (2 Tim. 2:19) Yehova nancuwela tipani khweeliini nthanlalyaawe. Masi mayamunna anwaalikela ale ankhuura iphaawu ni anwurya iviinyu, khancuwela. Phimaana, ayo pooti uwaalikela atthu anwoonaaya ukhala oothanliya, masi khweeliini ahithanliye. Wootakihera, ahaavo atthu khalayi yaakhuura iphaawu ni yaawurya iviinyu, masi wahoolo yahohiya. Akhwaawe atthunaka khari ratta mmuru waya ni ankupali wiira ahothanliya urwaa ulamulela ni Kristu wiirimu. Phimaana, khunkhitirya ucuwela sana-saana nummeru no makristau oothanliya anhaleela watuninyani.
13. Niireke Ibiiblya inaahimya nummeru no makristau oothanliya anhala uhala watuninyani ukati unhalaaya wancera masakha moolupale?
13 Mapuro menci ntuninyani, anaahala ukhala makristau oothanliya ukati Yesu unhalaawe uwa wiira aacise wiirimu. (Mat. 24:31) Ibiiblya ineera wiira ukati wo mahuku ookhicera anaahala ukhala makristau oothanliya vakaani watuninyani. (Apoka. 12:17) Masi iyo khinhimya nummeru no makristau oothanliya anhala uhala watuninyani ukati unhalaaya wancera masakha moolupale.
Ninlamuliya unwehera cani ntthu nkhuura iphaawu ni nwurya iviinyu nihuku no Nuupuwelelo? (Uwehe iparaagarafu 14)
14. Toko cinthooyeraaya Arooma 9:11, 16, isiyani ninlamuliyeehu ucuwela nhina mananna Yehova cinaathanlaawe makristau?
14 Yehova phinlakela ukatini unhalaawe unthanla ntthu. (Aroo. 8:28-30) Yehova ancere waathanla makristau oothanliya uviraya waya ukati Yesu wonwelelihiyaawe. Unkhala toko ukati wo makristau oopacera, makristau eekhweeli ootheene yaari oothanliya. Uvira waya myaakha cinci, atthu enci yeeciirela makristau khayantthara Kristu weekhweeli. Waanookhalaru commo, uyo ukatyuuyo Yehova ahaathanla atthu vakaani yaari makristau eekhweeli. Ayo yaari khampa itiriku Yesu yeeralyaawe wiira yaahala wuunuwa nkhayi ni ijoiyo. (Mat. 13:24-30) Ukati wo mahuku ookhicera, Yehova nanlelo nawaathanla ale anhala upanka mphantte nhina ikhurupu yo atthu 144.000. * Phimaana, Nluku alakelaka waathanla makristau akiina unaattamenle ukati woomala ila ituninyeela, khaninlamuliya uvaanyiha ucuwelaca wawe. (Usome Arooma 9:11, 16.) * * Nihaana niiweheehaka wiira nihikhale toko ananteko Yesu yaawuulumalyaawe munlattaniheroni nawe. Ayo yahonttekutta mwaneene imatta nlattu wo mananna caawacenryaawe atthu oomalela yaawaale uvara nteko.—Mat. 20:8-15.
15. Niireke makristau oothanliya ootheene anaapanka mphantte nhina “ipottha yookhuluvelya ni yankhili” inoolumiya nlivuruni ya Matewus 24:45-47? Utaphulele.
15 Makristau otheene anweherera urwaa ukhala wiirimu khunakhala wiira anaapanka mphantte nhina “ipottha yookhuluvelya ni yankhili.” (Usome Matewus 24:45-47.) * Toko Yehova ni Yesu caapankilyaaya ukati woseekulu yoopacera, ilelo ayo anaavarela nteko mayamunna vakaani wiira yaalihe, awula awiitthucihe atthu enci. Ule ukatyuule, makristau oothanliya vakaani paahi phaavahaceriye wantikha Cowantikhiya Ceekristau ni Iluuka Ikereeku. Ni ilelo, makristau oothanliya vakaani paahi phivahaceriye nrintti wo waavaha apoovu a Nluku “iyoolya ukati umpheelaaya.”
16. Wiitthucale isiyani nhina ula mwahoola?
16 Ula mwahoola uniitthucihale isiyani? Uniitthucihale wiira Yehova holakela waavaha ukumi woohimala atthu enci anonswalela, ni ukumi wiirimu atthu vakaani anonswalela wiira yalamulele nkhayi ni Yesu. Yehova nawaatthuvela atthu otheene anonswalela—ale akhanle “nyuuta” ni ciicammo “alopwana khuumu”—ni nweherera wiira ayo yiiwelele malamulo mamocaaru ni ahihiye ukhala ookhuluvelya. Otheene caya anlamuliya uhihiya wiiyeviha. Otheene anlamuliya unswalela Yehova ni ukhala owiiwanana. Ni otheene anlamuliya wiikurumica wiira wanlokoni nihihiye ukhala nnema. Phimaana, ukati uneeraaya waattamelaka umala wo ila ituninyeela, nilakele uhihiya unswalela Yehova ni untthara Kristu khampa “nikhotto nimoca”!—Joau 10:16.
^ par. 5 Ula mwaakhoola, Nuupuwelelo na nookhwa a Kristu ninhala ukhala nihuku 7 mweeri wo Abril. Manannani ninlamuliyeehu waawehera ale ankhuura iphaawu ni anwurya iviinyu ukati wo uyo nkutthaanooyo? Niireke nihaana nikhalaka ni masukhuli noonaka wiira ari mowuncerya ale ankhuura iphaawu ni anwurya iviinyu? Ula mwahoola unaahala waakhula ala makohwaala. Ula ukhanle mwaha unlipiheriya ni mwaha nkiina waakumiheriye nrevistani Ukhalenla yo Janeiro 2016.
^ par. 2 Toko cinthoonyeraaya Isaalimu 87:5, 6, wahoolo Nluku atthunaka naahala uhimya maciinaaya ale anhala urwaa ulamulela ni Yesu.—Aroo. 8:19.
^ par. 4 1 Akorintu 11:27 Phimaana, ule nohala ukhuura iphaawu awula nohala uwuryerya ikoopu ya Apwiiya uhimphwanelaka, naahala uttheka nlattu worutthu ni nlattu wophome ya Apwiiya. 28 Woopacera, ntthu haana apacaka toko wiiweheeha ni wiikupali; vano phinlamuliyaawe ukhuura iphaawu ni uwuryerya ikoopu. 29 Kontha ule nokhuura ni nowurya woohipaca toko ucuwelela irutthu, nokhuura ni nowurya uhukhumwiya wawe.
^ par. 6 1 Akorintu 4:7 Tipani nookhaliha oovirikana naakhwaa? Khweeliini, isiyani irinaa ihaakhenlyaa? Wakhala wiira unowaakhela citthu cotheene cirinaa, nlattuni uneettitthihacaa wiikhalihaka khampa khuwaakhenle? 8 Vano nhotteeliya? Nhothaciri? Nhancera ulamulela woohikhala hiiva? Miiva khweeliini waakicivenle nnancenre ulamulela, wiira hiiva ciicammo nilamulele nkhayi ni nyuuva.
^ par. 8 Uwehe ikwaaturu “O amor ‘não se comporta indecentemente’”, nrevistani Ukhalenla yo Janeiro 2016 (yeekunya).
^ par. 14 Miteko 2:33 inthoonyera wiira ntthu athanliyaka, Yesu naakavihera, masi Yehova phinonthanla ntthuuyo.
^ par. 14 Wapheela ucuwela-tho, uwehe mwaha “Perguntas dos Leitores”, nhina irevista Ukhalenla 1 yo Maio 2007.
^ par. 14 Arooma 9:11 Kontha, ukati asaana waaryaaya ahinayariya ni ahinaaya upanka nanka itthu yomaana awula yoohinamaana—wiira impheelaawe Nluku nhina uthanliya ihiirannye nanlelo nlattu wo miteko caatthu, masi nlattu wa Ule neehana. 16 Phimaana, iyo khinkhumelela nlattu ntthuuyo woopheela awula wo wiikurumica, masi inkhumelela nlattu wa Nluku, rina ikiriri.
^ par. 15 Matewus 24:45 “Tipani khanle khweeliini ipottha yookhuluvelya ni yankhili, ivahaceriye naapwiiyaaya waawacera o wapuwani waya, wiira yaavahe iyoolya ukati umpheelaaya? 46 Yootteeliya phiiyo iphottheeyo, Apwiiyaaya yawaaka, iphwanyiyaka ipankaka commo! 47 Kinoohimyerani ikhweeli: Ayo anaahala uvahacera iyo ipottheeyo mihakhu caya cotheene.”
NCIPO 34 Vou Andar em Integridade
^ par. 60 ILATARATO: Wuupuwele wiira wakonkreesuni, munna nkhuma u Peteli ni amwaarawe anoorukureeriya naatthu enci wiira alathakaciye ifooto. Iyo khweeliini ikhanle itthu yoohihisima!
