CIPANDE CA KUSAMBILILAMO 5
Tulapita Nawe
“Tukulonda tuye nawe, pano swemo tuvwa ukuti Leza waya kunomuli.”—ZAKA. 8:23.
LWIMBO NA. 26 Vyonsi Vii Mwacitiile Nene
VINO TUMASAMBILILAPO *
Amu mfwele na zyuze (“ainamasi ikumi”) yakwata isyuko lya kupepa Yeova pamwi na apakwe (“Muyuda”) (Lolini mapalaglafu 1-2)
1. I vyani vino Yeova walanzile ukuti ivilaacitika ndakai?
YEOVA walanzile apa manda itu ukuti: “Apa inamasi yonsi akaalanda indimi zipusanepusane, ainamasi ikumi yalaiza ku Muyuda wenga, nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’” (Zaka. 8:23) “Umuyuda” akaimililako apakwe nu mupasi wakwe Leza uwa muzilo. Nupya yakaamwa nu kuti “antu yakwe Leza acumi [nanti Izlaeli wakwe Leza].” (Gala. 6:16) “Ainamasi ikumi” yakaimililako yonsi akwata upaalilo wakwikala pano nsi amanda pe. Yamanya ukuti Yeova wapolelela iumba lii ilya yapakwe nupya yakalola ukuti i syuko ukupepa Leza capamwi nayo.
2. Uzye “ainamasi ikumi” yakapita uli pamwi na apakwe?
2 Nanti icakuti tutanga tumanye mazina yakwe yonsi apakwe acili pano nsi ndakai, * yayo aakwata upalilo wa kwikala pano nsi, yangapita pamwi na apakwe. U mu nzila ci? Baibo ikalanda ukuti “ainamasi ikumi” yalalema kwi sempe lya cakuzwala ca Muyuda nu kumunena yati, ‘Tukulonda tuye nawe, pano swemo tuvwa ukuti Leza waya kunomuli.’ Cikomo cii calumbula sile Muyuda wenga. Nomba izwi lyakuti “nawe” ni lyakuti “kuno muli” yakalozya ku antu aingi. Cii cikupiliula ukuti Muyuda wii asi muntu wenga lelo akaimililako iumba lyonsi ilya yapakwe. Yano yatapakwa yakaombela Yeova pamwi na apakwe. Nomba yasilola apakwe ukuti ali ntunguluzi zyao, pano yamanya ukuti Yesu sile ali Ntunguluzi yao.—Mate. 23:10.
3. A mauzyo ci amaasukwa umu cipande cii?
3 Pa mulandu wakuti mu yantu yakwe Yeova mucili apakwe yamwi ndakai, yamwi yangayuzya ukuti: (1) Uzye apakwe yalinzile ukuilola uli? (2) Uzye tulinzile ukulola uli aakalyako umukate nu kumwa waini pa Ciusyo? (3) Uzye tulinzile ukusakamala ndi cakuti twalola impendwa yakwe yaayo aakalyako mukate nu kumwako waini pa Ciusyo ikuya ikukulilako? Icipande cii cimaasuka amauzyo yaa.
UZYE APAKWE YALINZILE KULAILOLA ULI?
4. U kucelula ci ukwaya pali 1 Kolinto 11:27-29 kuno apakwe yalinzile ukwelenganyapo sana, nupya u mulandu ci?
4 Apakwe yalinzile ukwelenganya sana apa kucelula ukwaya pali 1 Kolinto 11:27-29. (Welengini.) Uzye umupakwe angalyako uli ivikonkalya pa Ciusyo umu “musango utalinzile”? Angacita vivyo ndi cakuti walyako umukate nu kumwa waini nomba ala asikulondela masunde yakwe Yeova. (Ayeb. 6:4-6; 10:26-29) Apakwe yamanya ukuti yalinzile ukutwalilila ukuya acisinka pakuti yakapokelele “cilambu kwi yulu, icili ulwamo lwakwe Leza muli Klistu Yesu.”—Filipi 3:13-16.
5. Uzye apakwe yalinzile kuilola uli?
5 Umupasi wakwe Yeova ukaazwa antu yakwe ukuya aicefye asi kuya acilumba foo. (Efes. 4:1-3; Kolo. 3:10, 12) Fwandi apakwe yatalinzile ukuilola ukuti yacindama ukucila yauze. Yamanya ukuti Yeova asipeela apakwe umupasi wa muzilo uwingi ukuluta uno akapeela aomvi yakwe yauze asyala. Yasiyuvwa ukuti yene yakauvwikisya icumi ica muli Baibo ukuluta yauze. Nupya yatange yanene umuntu muze ukuti watapakwa nupya alinzile ukutandika ukulyako ivinkolanya. Lelo yakaya aicefye nu kwiusya ukuti Yeova aliwe akaama antu ukuya ukwi yulu.
6. Ukulingana ni lembelo lyakwe 1 Kolinto 4:7, 8, uzye apakwe yalinzile ukucita uli ndi cakuti yali na antu yauze?
6 Nanti icakuti apakwe yakayuvwa ukuti i syuko ukwamwa ukuya ukwi yulu, yasienekela yauze ukulayapeela mucinzi mu nzila ipusaneko. (Filipi 2:2, 3) Yamanya nu kuti lino Yeova wayapasile, ataalesile antu yonsi ukumanya ukuti iyapakwa. Fwandi umupakwe atalinzile ukuzunguka nga yamwi yakutwisika ukuti wapakwa. Akamanya ukuti Baibo ikatunena ukuti tutalinzile ukuzumila zuwa ndi cakuti umuntu walanda ukuti Leza wamupeela umulimo uiyele. (Umbw. 2:2) Umwina Klistu umupakwe asilonda antu ukwika sana mano kuli aliwe, fwandi asinena yano wazana pa muku wa kutandikilako ukuti wapakwa. Nupya atalinzile ukuilangazya kuli yauze ukuti wapakwa.—Welengini 1 Kolinto 4:7, 8.
7. I vyani vino apakwe yatalinzile ukucita, nupya u mulandu ci?
7 Apakwe yasiyuvwa ukuti yalinzile sile ukulaya na apakwe yauze, kwati limwi yapanga akaungwe kamwi. Yasifuma yakulonda apakwe yauze pakuti yatandike ukulanda pa kuya apakwe nu kwikala ukulalanzyanya pali Baibo. (Gala. 1:15-17) Ndi cakuti apakwe yakucita ivintu vii umu cilongano mutange muye ukulemana. Yangacita ivintu ivipusaneko na vino umupasi wa muzilo ukaazwa antu kuya nu mutende nu kulemana usizumilizya.—Loma 16:17, 18.
UZYE TULINZILE KULALOLA ULI APAKWE?
Tutalinzile ukulola apakwe nanti antu yauze akatungulula ukuti yacindama sana ukuluta yauze (Lolini palaglafu 8) *
8. U mulandu ci uno tulinzile ukucenjelela muli vino tukalola yayo akalyako umukate nu kumwako waini pa Ciusyo? (Lolini futunoti.)
8 Uzye tulinzile ukulola uli aina na ya nkazi apakwe? Caipa ukukumbwa sana umuntu muze, ukwikako sile na apakwe aina yakwe Klistu. (Mate. 23:8-12) Ndi cakuti Baibo yalanda pali ya Eluda, ikatukomelezya ‘ukukolana na aliyo mu utailo,’ nomba isitunena ukuti tulinzile ukuleka umuntu aliwensi ukuya intunguluzi itu. (Ayeb. 13:7) Icacumi ukuti Baibo ikalanda ukuti yamwi “yalinzile [ukucindikwa].” Nomba a pa mulandu wakuti ‘yakaomba mulimo usuma uwa kutungulula’ nupya ‘yakaombesya mu kukosola nu mukusambilizya’ asi pa mulandu wakuti yapakwa. (1 Tim. 5:17) Ndi cakuti tukulumbanya sana apakwe nu kuikako sana mano, tungalenga yauvwa insonyi. * Ni cingipisya icakuti tungalenga yaye ni cilumba. (Loma 12:3) Swensi kwene tusilonda ukucita icili consi icingalenga aina yakwe Klistu apakwe ukuluvyanya!—Luka 17:2.
9. Uzye tungalanga uli ukuti twacindika apakwe?
9 Uzye tungalanga uli ukuti twacindika yano Yeova wapaka? Tutalinzile ukuyuzya vino yapasilwe. Ii inkama yao ino tutakwata insambu zya kumanya. (1 Tesa. 4:11; 2 Tesa. 3:11) Nupya tutalinzile ukulaelenganya ukuti iya wa muntu wiyo nanti umuci, avyazi yakwe nanti yauze umu lupwa nayo kwene yapakwa. Umuntu asipyana upalilo wa kuya ukwi yulu kufuma kuli ya lupwa lwakwe. Upalilo uu ukafuma kuli Leza. (1 Tesa. 2:12) Tutalinzile nu kulauzya mauzyo angasosya yauze. Ivili wakwe kuuzya umuci wa mupakwe pali vino alauvwa ukwikala mu nsi ipya ukwaula iya. Swensi twamanya ukuti umu nsi ipya, Yeova alikusya “consi ica umi [vino] cikulonda.”—Masa. 145:16.
10. Uzye tungaicingilila uli ndi cakuti tusikucindikisya yauze?
10 Ndi cakuti tusikucindikisya apakwe, ale tukuicingilila sweineco. Umu nzila ci? Baibo ikatunena ukuti apakwe yamwi yangafilwa ukutwalilila ukuya acisinka. (Mate. 25:10-12; 2 Pet. 2:20, 21) Lelo ndi cakuti tusikucindikisya antu, tutalalondela yauze ukwikako sile na apakwe, amanyikwa sana nanti sile yayo aombela Yeova pa myaka iingi. (Yuda 16) Lyene ndi cakuti umuntu wiyo wiza wata ukuya uwa cisinka nanti ukuta ukupepa Leza, tulata ukutaila Yeova nu kuta ukumuombela.
UZYE MULINZILE UKUSAKAMALA NDI CAKUTI AKULYA IVINKOLANYA YAKUYA YAKUVULILAKO?
11. I cani cikucitika uku mpendwa yakwe yano yakalya ivinkolanya?
11 Pa myaka iingi mpiti, impendwa ya antu alyanga umukate nu kumwa waini pa Ciusyo yaile ikucepelako. Nomba ndakai, impendwa ikuya ikukulilako sile cila mwaka. Uzye tulinzile ukusakamala pali ci? Awe. Lekini tusambilile pa milandu imwi ino tutalinzile ukucitila vivyo.
12. U mulandu ci uno tutalinzile ukusakamalila pa mpendwa yakwe yano yakalyako ivinkolanya pa Ciusyo?
12 Yeova “wamanya antu yakwe.” (2 Tim. 2:19) Ukupusanako na Yeova, aina aakapenda impendwa yakwe yano yakulyako pa Ciusyo yasimanya wino wapakwa umu cumicumi. Fwandi pa mpendwa yakwe yano yakulyako pakaya na yano yakaelenganya ukuti yapakwa nomba ala yatapakwa. Yamwi alyangako umukate nu kumwa waini mpiti yata. Yamwi yangalola ukuti yalateeka pamwi na Klistu ukwi yulu pa mulandu wakuti yalwala ulwale wa melenganyo. Fwandi tutamanya ningo ningo apakwe asyala pano nsi.
13. Uzye Baibo ikalanda impendwa ya apakwe alasyala pano nsi lino ucuzi ukulu cuze ulatandika?
13 Kulaya apakwe mu ncende izingi pano nsi lino Yesu aliza mukuyasenda ukwi yulu. (Mate. 24:31) Baibo ikalanda ukuti umu manda ya kusyalikizya, mulaya impendwa inono iya apakwe alasyala pano nsi. (Umbw. 12:17) Nomba isilanda impendwa ya apakwe alasyala pano nsi lino ucuzi ukulu cuze ulatandika.
Uzye tulinzile ukucita uli ndi cakuti umwi watandika ukulyako ivinkolanya pa Ciusyo? (Lolini palaglafu 14)
14. Wakwe vino ilembelo lyakwe Loma 9:11, 16 ililanda, i vyani vino tulinzile ukumanya pa kusoololwa kwa yapakwe?
14 Yeova akamanya insita ya kusoolwelapo apakwe. (Loma 8:28-30) Yeova watandike ukusoolola apakwe pa cisila lino Yesu watuutululwa. Cikaloleka kwati umu manda ya Ina Klistu akutandikilako, Aina Klistu yonsi yali apakwe. Umu myaka yonsi iyalondelilepo, aingi pali yano yaitunganga ukuti Aina Klistu yatalondelanga vino Klistu wayanenyile. Nanti ciye vivyo, umu myaka iyo Yeova wapasileko Aina Klistu yamwi anono. Yali kwati ingano zino Yesu walanzile ukuti zilamela muli kalolo. (Mate. 13:24-30) Umu manda akusyalikizya, Yeova watwalilila ukusoolola antu aalaya pali ya 144,000. * Fwandi ndi cakuti Leza wasoolola yamwi lino kwasyala panono kuti impela ifike, tutalinzile ukutwisika vino wapingulapo. (Welengini Loma 9:11, 16.) * Tulinzile ukucenjela pakuti tutaya wa yaomvi yano Yesu walanzile umu cilangililo cimwi cino walanzilepo. Yailizyanyizye pali vino umusambazi wao wacisile kuli yaya atandike ukuomba ala insita ya kwinuka yafika.—Mate. 20:8-15.
15. Uzye yonsi apakwe yaya umwi umba lya muomvi mutailwe nupya uwa mano ilyalandwapo pali Mateo 24:45-47? Londololini.
15 Asi yonsi akwata upalilo wa kuya ukwi yulu aaya umwi umba lya muomvi mutailwe nupya uwa mano. (Welengini Mateo 24:45-47.) Wakwe vivi kwene vino cali mu nsita ya Ina Klistu akutandikilako, na ndakai kwene Yeova na Yesu yakaomvya aina anono sile kuliisya nanti kusambilizya antu aingi. Aina Klistu apakwe anono sile umu nsita ya Ina Klistu akutandikilako aomviwe ukulemba Malembelo ya Ina Klistu Acigiliki. Ndakai, anono sile apakwe akwata umulimo wakupeela antu yakwe Leza “ivya kulya vyao pa nsita ilinge.”
16. I vyani vino mwasambilila umu cipande cii?
16 I vyani vino icipande cii catusambilizya? Yeova wasoolola ukupeela umi wa pe uku yantu yakwe aingi cuze pano nsi nupya wapeela umi wa kwi yulu ku antu sile anono alateeka pamwi Yesu. Yeova akalambula aomvi yakwe yonsi kuli kuti “Muyuda” na “ainamasi ikumi” nupya akalonda ukuti yauvwila masunde yakwe ali yamwi nu kutwalilila ukuya acisinka. Yonsi yafwile ukuya aicefye. Yonsi yalinzile ukulamuombela pamwi nu kuya alemane. Yonsi yalinzile ukwezya na maka ukupanga umutende na ina na ya nkazi. Lino impela ikuya ikupalamala, lekini swensi tutwalilile ukuombela Yeova nu kulondela Klistu wa “ufyo onga.”—Yoa. 10:16.
^ pala. 5 Umwaka uu, Iciusyo ca mfwa yakwe Klistu cilayako pali Ciili pa 7 Epuleo. Uzye tulinzile kulola uli aalalyako mukate nu kumwako waini apa wanda uwa? Uzye tulinzile kusakamala ndi cakuti impendwa yakwe yayo aakalya vinkolanya ikuya ikukulilako sile? Tumazana masuko ku mauzyo yaa umu cipande cii, icikolineko ni cali mu Lupungu Lwa Mulinzi lwakwe Januwale 2016.
^ pala. 2 Kulingana na Masamu 87:5, 6, limwi Leza ku nkoleelo alasokolola amazina yako yayo yano yalateeka na Yesu kwi yulu.—Loma 8:19.
^ pala. 8 Lolini kambokosi akakuti “Kutemwa Kutakwata Kasa” akaya umu Lupungu Lwa Mulinzi lwakwe Januwale 2016.
^ pala. 14 Nanti icakuti pa Milimo 2:33 pakalangilila ukuti umupasi wa muzilo wapongolwilwe pali Yesu, Yeova aliwe akasoolola antu yonsi.
^ pala. 14 Nga mukulonda ivyeo na vyuze, lolini cipande cakuti Mauzyo Yano Aakawelenga Yakauzya icali mu Lupungu Lwa Mulinzi lwakwe Mei 1, 2007.
LWIMBO NA. 34 Katwaya Akaele Lyonsi
^ pala. 56 ULONDOLOZI WA CIKOPE: Elenganyini ndi cakuti umwimilizi wa cisinte na mamakwe yazingulukwa na antu aingi ala yakuyakopa pa ukongano. Ala cingaya umusalula ukulu!
