1. A Zeova ra pĩnd n togsame tɩ bõe n na n maan rũndã-rũndã?

A ZEOVA ra pĩnd n togsa bũmb sẽn na n maan rũndã-rũndã, n yeele: “Neb sẽn gomd goam buud toor-toor pʋgẽ neb piig na n gãda Zʋɩf a yembr fãa fuug noor n yeele: ‘Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.’” (Zaka. 8:23) B sẽn yeel tɩ ‘Zʋɩfã,’ yaa kiris-neb nins sẽn paam vʋʋsem sõngã zaeebã yell la b gomda. B boond-b lame me tɩ “Wẽnnaam Israyɛllã.” (Gal. 6:16) ‘Neb piigã’ makda neb nins sẽn saagd tɩ b na n wa vɩɩmda wakat sẽn kõn sa tẽngã zugã. B bãngame t’a Zeova ninga sẽn paam-b vʋʋsem sõngã zaeebã barka, tɩ rẽ kɩt tɩ b getẽ tɩ b sã n paam n naag nin-kãensã n tũ a Zeova, yaa zu-zẽkr meng-menga.

2. B sẽn yeel tɩ “neb piigã” na n “tũu” sẽn paam-b vʋʋsem sõng zaeebã, rat n yeelame tɩ bõe?

² Yaa sɩd tɩ d pa tõe n bãng sẽn paam-b vʋʋsem sõngã zaeebo, n ket tẽng zugã ned kam fãa yʋʋr ye. * La baasgo, sẽn saagd-b tɩ b na n wa vɩɩmda tẽngã zugã tõe n ‘tũ-b’ lame. Wãn to? Biiblã yeelame tɩ ‘neb piigã’ na n gãda zʋɩf a yembr fuug noor la a yeel yaa: ‘Tõnd na n tũu yãmb n kẽnge. Bala, tõnd wʋmame tɩ Wẽnnaam bee ne yãmba.’ Vɛrse wã reng n goma zʋɩf a yembr yelle, la baasgẽ wã, b  sẽn yeel tɩ ‘yãmbã’ wilgdame tɩ yaa neb wʋsgo. Dẽnd b sẽn yeel tɩ zʋɩfã, pa nin-yɛng ye. Yaa neb sulli. Yaa kiris-neb nins fãa sẽn paam vʋʋsem sõngã zaeebã. Sẽn pa paam-b vʋʋsem sõngã zaeebã naaga sẽn paam-b zaeebã n tũud a Zeova, la b pa get-b wa b taoor dãmb ye. Bala b miime tɩ yaa a Zeezi la b fãa taoor soaba.—Mat. 23:10.

3. Sogs-bʋs la d na n leok sõs-kãnga pʋgẽ?

³ Sẽn mik tɩ neb sẽn paam vʋʋsem sõngã zaeeb keta tẽngã zugã, d tẽed-n-taas kẽer sokda b mens yaa: 1) Sẽn paam-b vʋʋsem sõngã zaeebã tagsg segd n yɩɩ wãn b mensã zugu? 2) Tõnd manesem segd n yɩɩ wãn ne sẽn wãbd-b burã, la b yũud divẽ wã Kiristã kũumã tẽegr sasa wã? 3) B sõorã sã n ket n tar paasgo, segd n sãama d sũur bɩ? D na n leoka sogs-kãensã sõs-kãnga pʋgẽ.

4. Sagl-bʋg n be 1 Korẽnt rãmb 11:27-29 wã, tɩ sẽn paam-b zaeebã segd n tags a zug neere, la bõe yĩnga?

⁴ Kiris-neb nins sẽn paam vʋʋsem sõngã zaeebã segd n tagsa saglg ning sẽn be 1 Korẽnt rãmb 11:27-29 wã zug neere. (Karm-y-yã.) Ned sẽn paam vʋʋsem  sõngã zaeeb tõe n wãba burã la a yũ divẽ wã Kiristã kũumã tẽegr sasa, tɩ yaool n “pa zems” bɩ? N-ye. A sã n maand woto, n yaool n miẽ t’a pa tũud a Zeova noyã ye. (Ebre. 6:4-6; 10:26-29) Sẽn paam-b zaeebã miime tɩ sẽn na yɩl n wa paam “Wẽnnaam saasẽ boollã keoorã Kirist Zeezi maasem yĩnga,” yaa tɩlɛ tɩ b kell n sak Wẽnnaam.—Fili. 3:13-16.

5. Sẽn paam-b zaeebã tagsg segd n yɩɩ wãn b mensã zugu?

⁵ A Zeova vʋʋsem sõngã sõngda a nebã tɩ b yɩ sik-m-mens rãmba, n pa pẽg-m-mens rãmb ye. (Efɛ. 4:1-3; Kol. 3:10, 12) Dẽnd sẽn paam-b zaeebã pa tagsd tɩ b sãoo b taabã ye. B miime tɩ b sẽn paam zaeebã pa kɩt t’a Zeova kõt bãmb a vʋʋsem sõngã wʋsg n yɩɩd kiris-neb a taabã ye. B pa tagsd me tɩ bãmb wʋmda Biiblã goamã sõma n yɩɩd neb a taabã ye. B pa na n tol n yeel ned tɩ yẽ me paama vʋʋsem sõngã zaeebo, la t’a segd n sɩnga burã wãbr la divẽ wã yũub ye. B pʋd n sak n deegame tɩ yaa a Zeova bal n yãkd sẽn na n kẽng-b saasẽ wã.

6. Sẽn zems ne 1 Korẽnt rãmb 4:7, 8, kiris-ned sẽn paam vʋʋsem sõngã zaeeb manesem segd n yɩɩ wãna?

⁶ Sẽn paam-b zaeebã getame tɩ b sẽn paam n na n kẽng saasẽ wã yaa zu-zẽkre, la b pa baood tɩ neb a taabã waoogd-b tɩ loogd noor ye. (Phil. 2:2, 3) Sẽn paase, b miime t’a Zeova sẽn wa n na n zae-b ne a vʋʋsem sõngã, a pa maan tɩ neb a taab bãng ye. Dẽnd ned sã n yeel t’a paama vʋʋsem sõngã zaeebo, tɩ neb a taabã pa tẽ-a zĩig pʋgẽ, pa tog n ling-a ye. A miime tɩ Biiblã wilgdame tɩ ned sã n yeel tɩ Wẽnnaam bobl-a-la tʋʋmd sẽn yaa toor zalle, bɩ d ra yɩ tao-tao n tẽ-a ye. (Vẽn. 2:2) Kiris-ned sẽn paam zaeeb sẽn pa rat nebã pẽgrã, a pa na n saad n togsdẽ tɩ yẽ paama vʋʋsem sõngã zaeeb ye. A leb n pa na n tik rẽ n pẽgd a meng neb a taabã taoor ye.—Karm-y 1 Korẽnt rãmb 4:7, 8.

7. Bõe la sẽn paam-b vʋʋsem sõngã zaeebã pa maanda, la bõe yĩnga?

⁷ Kiris-neb nins sẽn paam vʋʋsem sõngã zaeeb pa get tɩ yaa bãmb ne taab bal n segd n sõsd ye. B pa gẽesd neb sẽn paam vʋʋsem sõngã zaeeb wa bãmb n na n sõsd b sẽn paam zaeebã yelle, bɩ n naagd taab n zãmsd Biiblã ye. (Gal. 1:15-17) B sã n maan woto, na n waa ne welsg tigingã pʋgẽ. Wẽnnaam yaool n tũnugda ne a vʋʋsem sõngã n sõngd a nin-buiidã sẽn na yɩl tɩ laafɩ la zems-n-taar zĩnd b sʋka.—Rom. 16:17, 18.

8. D segd n gũusa ne d manesem sẽn yaa a soab ne sẽn wãbd-b burã, la b yũud divẽ wã Kiristã kũumã tẽegr sasa wã. Bõe yĩnga? (Ges-y vẽnegrã me.)

⁸ Tõnd manesem segd n yɩɩ wãn ne saam-biis la saam-bi-pogs nins sẽn paam zaeebã? Pa segd tɩ d pẽgd ned tɩ loog noore, baa a soabã sã n paama vʋʋsem sõngã zaeeb ye. (Mat. 23:8-12) Biiblã sagenda tõnd tɩ d tall kãsem-dãmbã “tẽebã buudu,” la woto pa rat n yeel tɩ d bas tɩ ninsaal yɩ d taoor soab ye. (Ebre. 13:7) Yaa sɩd tɩ Biiblã yetame tɩ neb kẽer “segda ne waoogr wʋsgo.” La pa b sẽn paam vʋʋsem sõngã zaeeb yĩng ye. Yaa b sẽn “lʋɩt tigingã taoor sõma,” la b “tʋmd wʋsg koɛɛgã mooneg pʋgẽ, la nebã zãmsg pʋgẽ wã.” (1 Tɩm. 5:17) D sã n pẽgd ned sẽn paam vʋʋsem sõngã zaeeb tɩ loog noore, tõe n kɩtame t’a wa pa mi a sẽn ningd a meng zĩig ning ye. * Sẽn yaa wẽng n yɩɩda, tõe n kɩtame t’a wa lebg zẽk-m-meng soaba. (Rom. 12:3) Yaa vẽeneg tɩ d pa rat tɩ tũ ne tõnd tɩ Kiristã ba-biig wa maan bũmb a woto sẽn pa zems baa bilfã ye.—Luk 17:2.

9. Wãn to la d tõe n wilg tɩ d waoogda kiris-neb nins sẽn paam vʋʋsem sõngã zaeebã?

⁹ Wãn to la d tõe n wilg tɩ d waoogda ned sẽn paam vʋʋsem sõngã zaeebo? D pa na n sok-a n ges a maana wãn n bãng t’a paama zaeeb ye. Yaa yẽ ne a Zeova bal n mi, tɩ d pa tar sor n na n bãng rẽ ye. (1 Tes. 4:11; 2 Tes. 3:11) D pa segd n tags t’a pagã bɩ a sɩdã, a ba wã ne a ma wã, wall a zakã neb a taabã me paama vʋʋsem sõngã zaeeb ye. Ka ned roagdb sẽn paam zaeeb yĩng la yẽ me paamd ye. Yaa Wẽnnaam n yãkde. (1 Tes. 2:12) D segd n gũusame, n da sokd sogsg sẽn tõe n sãam ned sũur ye. Wala makre, saam-biig sẽn paam zaeeb sã n tar paga, d pa na n sok a pagã n ges a tagsg sẽn yaa a soaba, a sẽn mi t’a na n vɩɩmda tẽngã zug wakat sẽn kõn sa t’a sɩdã pa be ne-a wã ye. Sẽn yaa a soab fãa, d tõe n basa d yam tɩ dũni-paalgã pʋgẽ, a Zeova na n gesame tɩ ‘sẽn vɩ-bã fãa paam b sẽn dat tɩ seke.’—Yɩɩn. 145:16.

10. D sã n pa pẽgd ned tɩ loog noore, kogenda tõnd mengã. Wãn to?

¹⁰ D sã n pa getẽ tɩ ned sẽn paam vʋʋsem sõngã zaeeb yɩɩda a taabã, yaa bũmb sẽn kogend tõnd mengã. Wãn to? Biiblã wilgdame tɩ ned sẽn paam vʋʋsem sõngã zaeeb tõe n wa basa a Zeova tũubu. (Mat. 25:10-12; 2 Pɩy. 2:20, 21) Tõnd sã n pa pẽgd ned tɩ loog noore, d pa na n wa maand ninsaal raabo, baa a soab sã n paama vʋʋsem sõngã zaeebo, wall yaa ned yʋʋr sẽn yi, pa rẽ bɩ ned sẽn tũud a Zeova hal sẽn kaoos ye. Woto, baa a soab sã n wa kɩɩs a Zeova, tõnd na n kell n saka a Zeova. A sã n bas a tũub me, tõnd na n kell n tũ-a lame.

11. Sẽn wãbd-b burã la b yũud divẽ wã sõorã wɛɛngẽ, bõe n maand yʋʋma noorã?

¹¹ Maana yʋʋm wʋsgo, tɩ sẽn wãbd-b burã la b yũud divẽ wã sõor da tar boogre. La yʋʋma noorã, b sõorã tara paasg yʋʋmd fãa. Woto segd n sãama d sũur bɩ? Ayo. Ad bũmb a wãn d sẽn pa segd n yĩmi.

12. Sẽn wãbd-b burã la b yũud divẽ wã sõorã pa segd n sãam d sũur ye. Bõe yĩnga?

¹² “A Zeova mii sẽn yaa-b bãmb dẽndã.” (2 Tɩm. 2:19) La saam-biis nins sẽn sõt sẽn wãbd-b burã la b yũud divẽ wã Kiristã kũumã tẽegr sasa wã pa tõe n bãng b sã n  sɩd paama vʋʋsem sõngã zaeeb ye. Dẽnd b sõta baa neb nins sẽn tagsd tɩ b paama vʋʋsem sõngã zaeeb tɩ yaool n pa sɩdã. Wala makre, kẽer sẽn da wãbd burã la b yũud divẽ wã wa n basame. Tõe tɩ sãnda me bẽeda deprɛsɩyõ bɩ bãag a to, tɩ kɩt tɩ b tagsdẽ tɩ b na n tɩ naaga Kiristã n dɩ naam saasẽ. Togs sɩdã, d pa mi sẽn paam-b zaeeb n ket tẽngã zugã sõor takɩ ye.

13. Biiblã togsda sẽn paam-b zaeebã sõor sẽn na n zem to-to, to-kãsengã sã n wa na n sɩng bɩ?

¹³ A Zeezi sã n wa na n tall sẽn paam-b zaeebã n kẽng saasẽ, a na n mikame tɩ b bee dũniyã ween-vɩɩs a naasã fãa. (Mat. 24:31) Biiblã wilgdame tɩ yaoolem wakatã, neb bilf bal sẽn paam vʋʋsem sõngã zaeeb n na n ket tẽngã zugu. (Vẽn. 12:17) La a pa togs b sõorã sẽn na n zem to-to, to-kãsengã sã n wa na n sɩng ye.

14. Wa 2 Tɩmote 1:9 wã sẽn wilgdã, sẽn paam-b vʋʋsem sõng zaeebã yãkr wɛɛngẽ, bõe la d segd n bãnge?

¹⁴ A Zeova n yãkd wakat ning a sẽn na n zae ned ne a vʋʋsem sõngã. (Rom. 8:28-30) Yaa a Zeezi vʋʋgrã poor la a Zeova sɩng neb zaeeb ne a vʋʋsem sõngã. Wõnda pipi kiris-neb hakɩɩkã fãa paama vʋʋsem sõngã zaeebo. La rẽ poor n tall n tãag yaoolem wakatã sɩngre, neb nins sẽn da yet tɩ b yaa kiris-nebã wʋsg ra pa tũud Kiristã ne pʋ-peelem ye. La baa wakat kãnga, a Zeova ra ket n zaeeda sẽn yaa-b kiris-neb hakɩɩkã ne a vʋʋsem sõngã. Nin-kãens ra yaa wa ki sẽn be nadens sʋka, wa a Zeezi sẽn yeel a yel-bũnd a ye pʋgẽ wã. (Mat. 13:24-30) Yaoolem wakatã, a Zeova ket n zaeeda neb ne a vʋʋsem sõngã, sẽn na yɩl tɩ neb 144 000  sõor pidi. * A sã n yãk yam n gũ tɩ ta rũndã-rũndã t’a yaool n zae neb kẽer ne a vʋʋsem sõngã, d pa segd n tags tɩ pa zems ye. (Karm-y 2 Tɩmote 1:9.) * Tẽeg-y-yã a Zeezi yel-bũnd ning sẽn gomd rao sẽn dɩk neb tɩ b tʋm a pʋʋgẽ wã. Raoã sẽn yao neb nins sẽn tʋm lɛɛr a ye wã sõma wã, sẽn tʋm-b wʋsgã yẽgmame. D pa segd n yɩ wa nin-kãens ye.—Mat. 20:8-15.

15. Bõe n wilgd tɩ pa sẽn paam-b zaeebã fãa n naag taab n yaa tʋm-tʋmd ning yell b sẽn gomd Matiye 24:45-47 pʋgẽ wã?

¹⁵ Pa sẽn saagd-b n na n kẽng saasẽ wã fãa n naag taab n yaa tʋm-tʋmd sẽn tũud sɩd la sẽn tar yamã ye. (Karm-y Matiye 24:45-47.) Pipi kiris-nebã wakatẽ, a Zeova ne a Zeezi ra tũnugda ne neb a wãn bal n sõngd neb wʋsg tɩ b tẽebã pãng paasdẽ. Wala makre, yaa kiris-neb sẽn paam vʋʋsem sõngã zaeebã bãmb b wãn bal la a Zeova kɩt tɩ b gʋls Biiblã babg ning sẽn da yaa ne gɛrkã. Rũndã-rũndã me, yaa sẽn paam-b zaeebã bãmb b wãn bal la b yãk tɩ b kõt Wẽnnaam nin-buiidã “rɩɩb wakat sẽn zemse.”

16. Bõe la d bãng sõs-kãnga pʋgẽ?

¹⁶ Bõe la d bãng sõs-kãnga pʋgẽ? A Zeova yãka yam n na n kɩt tɩ sẽn tũud-b yẽ wã fãa la bal wa paam n vɩɩmd wakat sẽn kõn sa dũniyã zugu, la a yãk neb a wãn bal tɩ b na n tɩ vɩɩmd saasẽ, n dɩ naam ne a Zeezi. A Zeova na n keoo sẽn tũudb yẽ wã fãa, rat n yeel tɩ sẽn makd-b ‘zʋɩfã,’ la sẽn makd-b ‘neb piigã.’ La yaa tɩlɛ tɩ b fãa tũ noy nins a sẽn gãnegã, la b kell n maan sɩd ne-a. B fãa segd n kell n yɩɩ sik-m-mens rãmba. B fãa segd n naaga taab n tũ-a yam a yembre. B fãa segdame me n modg tɩ laafɩ kell n zĩnd tigingã pʋgẽ. Sẽn mik tɩ dũniyã saab ta n saame wã, bɩ d fãa kell n tũ a Zeova ne Kiristã sẽn yaa d pe-kɩɩmã, ‘n yɩ yãgr a yembre.’—Zã 10:16.