1. Avyani vino e Yehova walandizile lyankani ukuti avino viliwacitika mwe ya-a amanda?

E YEHOVA walandizile lyankani pa mpindi yino tukwikalamo ukuti: ‘Awantu 10 awa mu mitundu yonsinye iya myiko, walilema ku cizwalo ca muYuda wenga, awati: ‘Tukupita swensi amuno twivwile ukuti e Leza ali na mwemwe.’ (Seka. 8:23) “UmuYuda” akakwimililako Awina Klistu awapakwe wano wakakwitwa nu kuti “Israeli wa kwe Leza.” (Gal. 6:16) “Awantu 10” wakakwimililako wano wawa ni suwilo lya kwikala umuyayaya mu nsi. Wamanya ukuti e Yehova wapaala awapakwe, swinya wakalola ukuti alongo ulukulu ukupepa e Yehova ponga na wapakwe.

2. Uzye ‘awantu 10 wakapita’ wuli na wapakwe?

² Nanti aca kuti tutamanya amazina ya wapakwe wano wacili mu nsi, * wano wawa ni suwilo lya kwikala mu nsi ‘wakapita’ na wapakwe. Mu nzila ci? E Baibolo ilanzile ukuti ‘awantu 10 walilema ku cizwalo ca muYuda wenga,’ nu kuti: ‘Tukupita swensi, amuno twivwile ukuti e Leza ali na mwemwe.’ Nanti aca kuti e Baibolo yalumbula umuYuda wenga, cisisula ukuti amuntu wenga. UmuYuda akakwimililako awapakwe wonsinye. Awina Klistu wano watapakwa nu muzimu wutele wakawombela Yehova ponga na Wina Klistu awapakwe. Lelo wasilola Awina Klistu awapakwe ukuti azili intunguluzi zyawo amuno wamanya ukuti e Yesu ayili Intunguluzi.​—Mat. 23:10.

3. Amawuzyo ci yano twandi twasuke?

³ Pa mulandu wa kuti mu nsi tucili tukwikala na Awina Klistu awapakwe, wamwi wangatalika ukuyiwuzya ukuti: (1) Uzye awapakwe wazipizile wayilola wuli? (2) Uzye tuzipizile twalola wuli wano wakalyako umukate nu kumwa e waini pa Cizusyo?  (3) Uzye tuzipizile ukusakamala nga ca kuti impendwa ye wano wakalya umukate nu kumwa e waini pa Cizusyo yikukulilako? Twandi twasuke ya-a amawuzyo mwe co-o icipande.

4. Uzye akusoka ci kuno kwawa pe 1 Wakorinte 11:27-29 kuno awapakwe wazipizile ukwelenganyapo sana, swinya amulandu ci?

⁴ Awina Klistu awapakwe wazipizile ukwelenganya sana pa kusoka kuno kwawa pe 1 Wakorinte 11:27-29. (Wazyani.) Uzye umupakwe angalya wuli umukate nu kumwa e waini pa Cizusyo ‘mu musango wuno wutayine?’ Angalya nu kumwa mu musango wuno wutayine nga ca kuti asa kwivwila amasundo ya kwe Yehova yano yakalanda pa miwele mizima. (Hebe. 6:4-6; 10:26-29) Ukwelenganya pe ko-o ukusoka kufwile ukwavwa awapakwe ukutwalilila ukuwa ni cisinka kwe Leza pa kuti wize wapocelele ‘icilambu ca kwitwa kwi yulu kuno kwafuma kwe Leza ukupitila mwe Klistu Yesu.’​—Flpi. 3:13-16.

5. Uzye Awina Klistu awapakwe wazipizile wayilola wuli?

⁵ Umuzimu wa kwe Yehova wukawavwa ukuyicefya. (Efes. 4:1-3; Kolo. 3:10, 12) Wasiyilola ukuti wacindama ukulusya wanji. Wamanya ukuti e Yehova asiwapa umuzimu uwuvule ukucila awawomvi wakwe wanji.  Wasiyilola nu kuti awano wivwicisya sana e Baibolo ukucila Awina Klistu wano wasyala. Swinya wasitalika ukunena wanji ukuti na wonye wapakwa nu kuti wazipizile ukutalika ukulya umukate nu kumwa e waini pa Cizusyo. Lelo wayicefya amuno wamanya ukuti e Yehova awino akasola awantu ukuya kwi yulu.

6. Ukulingana ni waliko lye 1 Wakorinte 4:7, 8, uzye Awina Klistu awapakwe wazipizile wayilola wuli?

⁶ Cingatenga awapakwe wamanya ukuti alisyuko nkaninye ukusolwa ukuya kwi yulu, wasilonda wanji wawacindika. (Flpi. 2:2, 3) Wamanya nu kuti pano Yehova wawasolanga atanenileko wanji. Acino cikalenga ukuti Umwina Klistu umupakwe atazunguka nga ca kuti umuntu wavilwa ukuzumila papo na papo ukuti wapakwa. Amuno wamanya ukuti e Baibolo ikatunena ukuti tutazipizile ukuzumila zuwa ndi wumwi wati Leza amupile umulimo uwuyiwele. (Ukuwu. 2:2) Pa mulandu wa kuti wino wapakwa asilonda ukuti awantu wamucindika sana, asitalika ukusimicila awantu wano watamumanya ukuti wawa ni suwilo lya kuya kwi yulu. Swinya asiyivwa pa milimo yino aliwawomba kwi yulu.​—Wazyani 1 Wakorinte 4:7, 8.

7. Avyani vino awapakwe watazipile ukucita, swinya amulandu ci?

⁷ Awapakwe watazipizile wazanwa vye na wapakwe wawuye ngati wapanga akaliwumba kawapakwe. Swinya watazipizile wavwamba awapakwe wawuye pa kuti walanzyanya pe vino Yehova akawasola ukuwomvya umuzimu wutele nanti pa kuti wasunkana nu kusambilila ponga Baibolo. (Gal. 1:15-17) Amuno mwi wungwe mungawa amalekano nga ca kuti watalika ukucita wo-o. Swinya lyo wasakuwombela ponga nu muzimu wutele wuno wukakwavwa awantu wa kwe Leza ukulemenkana nu kuwombela ponga mu mutende.​—Roma. 16:17, 18.

8. Amulandu ci wuno tuzipizile ukucenjela sana mwe vino tukalola wano wakalyako umukate nu kumwa e waini pa Cizusyo? (Lolani e futunoti.)

⁸ Uzye tuzipizile twalola wuli awanawitu na wankazi wano wapakwa? Citanga cizipe ukutalika ukulola awantu wamwi ukuti wacindama ukulusye wanji, nanti aca kuti wangawa awanyina wa kwe Klistu. (Mat. 23:8-12) E Baibolo nga ikulanda pa eluda ikatuwomelezya ukuti, “muwakolanya isuwilo lyawo,” yisitunena ukuti tufwile tuwalola umuntu uwili wensinye ukuti antunguluzi yitu. (Hebe. 13:7) Kweni acisinka ukuti e Baibolo ikatunena ukuti awantu wamwi “tuzipizile ukuwacindika nkaninye.” Lelo cino ikalandila wo-o amuno “wakatungulula icete” swinya “wakawombesya mu kulanda na mu kusambilizya,”  asa pa mulandu wa kuti wapakwa. (1 Tim. 5:17) Nga tukulumbilizya sana awapakwe nu kuwacindika ukucila mu cipimo wangatalika ukwivwa insoni. * Ni ciwipisye nkani aca kuti tungalenga wawe ni cilumba. (Roma. 12:3) Tusilonda nanti katicinye ukucita cino cingalenga umupakwe awembuke!​—Luka 17:2.

9. Uzye tungalanjizya wuli ukuti twacindika awapakwe?

⁹ Uzye tungalanjizya wuli ukuti tukacindika wano Yehova wapaka nu muzimu wutele? Tutazipizile ukuwakolowozya pa kuti watunene vino calinji pa kuti wapakwe. Amuno tutawa ni nsambu zya kwinjila mwe vino vitatukumile. (1 Tes. 4:11; 2 Tes. 3:11) Swinya tutazipizile ukutalika ukwelenganya ukuti pa mulandu wa kuti wapakwa nu mulume nye nanti umuci, awakwasi wakwe, na walupwa lwakwe na wonye wapakwa. Ukupakwa nu muzimu wutele asa ca pa lupwa. E Leza awino akasola. (1 Tes. 2:12) Tutazipizile tuwawuzya amawuzyo yano yangalenga awantu wafulwe. Ku ca kulolelako, tutazipizile tuwawuzya e nkazi vino akakwivwa ukutwalwa ku monsi wino wawa ni suwilo lya kuya kwi yulu. Amuno twamanya ukuti mu nsi mpya, e Yehova ‘alipa ica wumi consinye vino cikalonda.’​—Amalu. 145:16.

10. Tungayicinjilila wuli nga ca kuti tusakulola awantu wamwi ukuti ‘wacindama’ ukucila wanji?

¹⁰ Tungayicinjilila nga ca kuti tusakulola awapakwe ukuti wacindama sana ukucila wantu wanji. Amulandu ci wuno twalandila wo-o? Amuno e Baibolo ikalanda ukuti awapakwe wamwi wangavilwa ukutwalilila ukuwa ni cisinka kwe Yehova. (Mat. 25:10-12; 2 Pet. 2:20, 21) Acino nga tusakulola awantu wamwi ukuti wacindama ukucila wanji, tutaliwakoncelela vino wakacita pa mulandu vye wa kuti wapakwa nanti wamanyikwa sana nanti pa mulandu wa kuti wawombela Yehova pa myaka imivule. (Yuda 16) Amuno nga waleka ukuwa ni cisinka nanti nga wafuma mwi wungwe tutalifupuka, tulitwalilila vye ukuwombela Yehova.

11. Acani cino cacitika ku mpendwa ye wano wakalyako umukate nu kumwa waini pa Cizyusyo?

¹¹ Imyaka ya ku nsizi, impendwa ye wano walyangako umukate nu kumwa e waini pa Cizusyo yayanga vye ikucepa. Lelo ya-a amanda, impendwa yikakulilako vye cila mwaka. Uzye co-o cifwile ukutusakamika? Awe. Lekani tulande pa milandu yimwi yino yingatwavwa pa kuti tutasakamikwa.

12. Amulandu ci wuno tutazipizile ukusakamikwa pa mpendwa ye wano wakalyako umukate nu kumwa e waini pa Cizusyo?

¹² ‘E Yehova wamanya awakwe.’ (2 Tim. 2:19) Awanawitu wano wakapenda impendwa ye wano wakalyako umukate nu kumwa waini pa Cizusyo awantu vye. Wapusana ne Yehova amuno weni wamanya wano wasola ukuteka ne Klistu kwi yulu. Fwandi pe wano wakalyako umukate nu kumwa waini pa Cizusyo pawa na wano watapakwa, lelo wano wakayilola ukuti wapakwa. Ku ca kulolelako wamwi wano walyanga umukate nu kumwa e wayini pa Cizusyo ku nsizi, pe yo-o impindi waleka. Wamwi nawo pa mulandu wakulwala mu melenganyo, wakatalika ukulya nu kumwa amuno wakayilola ngati waliya mu kuteka ne Klistu kwi yulu. Fwandi icisinka aca kuti, tutamanya icete impendwa ya wapakwe wano wacili mu nsi.

13. Uzye e Baibolo yatunena impendwa ya wapakwe wano waliwa mu nsi pano uwucuzi wukulu wulitalika?

¹³ Mu nsi muliwa awapakwe pano Yesu  aliyiza mukuwasenda nu kuya nawo kwi yulu. (Mat. 24:31) E Baibolo ikalanda ukuti mu manda ya kulecelezya kuliwa awapakwe wamwi wano waliwa mu nsi. (Ukuwu. 12:17) Lelo itatunena impendwa ya wapakwe wano waliwa nu wumi pano uwucuzi wukulu wuliwatalika.

14. Ukulingana ni waliko lya Waroma 9:11, 16, avyani vino tuzipizile ukumanya pa wapakwe wano Yehova akasola?

¹⁴ E Yehova awino akamanya impindi ya kusola awapakwe. (Roma. 8:28-30) E Yehova watalisile ukusola awapakwe pa nsizi ya kuzyulupuka kwa kwe Yesu. Cikaloleka ngati Awina Klistu wa cisinka wonsinye wano walinjiko mu mpindi ya watumwa walinji awapakwe. Pano papisile imyaka imivule ukufuma pano Yehova watalicizile ukusola awapakwe, kwizile akuwa awantu awavule wano wayilolanga ngati Awina Klistu wano watakonkanga e Klistu. Lelo na pe yilyanye impindi e Yehova wasolanga wamwi awa cisinka. Wa-a walinji ngati angano zino Yesu walanzile ukuti zyalinji nu kukulila ponga ni sote. (Mat. 13:24-30) Na mwe yanye amanda aya kulecelezya, e Yehova ataleka ukusola awa kuwa mwi wumba lya 144,000. * Fwandi nga ca kuti e Yehova wapingulapo ukusola wamwi pano insilo yitani yifike, tutazipizile ukutalika ukuvwilika cino wawasolela. (Wazyani Waroma 9:11, 16.) * Tuzipizile ukucenjela sana pa kuti tutati tuwayilizyanya ngati avino awawomvi wano e Yesu walanzilepo mu cilanjililo wacisile pano waweni ukuti wino wawinjizizye incito wawalipila  icili conganye na wano wawomvileko vye iawala lyonga.​—Mat. 20:8-15.

15. Uzye awapakwe wonsinye wawa mwi wumba lya muzya wa cisinka” lino lyalondololwa pe Mateyu 24:45-47? Londololani.

¹⁵ Asa wapakwe wonsi wano wawa mwi wumba lya “muzya wa cisinka swinya uwa mano.” (Wazyani Mateyu 24:45-47.) Wulyanye vino e Yehova ne Yesu wawomvyanga awantu watici mu mpindi zya watumwa ku kusambilizya awavule, avino cawa na mwe ya-a amanda. Na pa kulemba Amawaliko ya Wina Klistu aya ciGriki na ponye e Yehova atawomvizye awapakwe wonsinye, lelo wawomvizye vye watici. Na mwe yanye amanda akuwomvya vye Awina Klistu awapakwe watici pa kupekanizizya awantu wakwe “ivya kulya pa mpindi injanane.”

16. Avyani vino twasambilila mwe co-o icipande?

¹⁶ Avyani vino twasambilila mwe co-o icipande? Twasambilila ukuti, e Yehova alipa awawomvi wakwe awavule uwumi wa muyayaya monye mu nsi. Tusambilizile nu kuti wasolako wamwi watici ukuya mu kuteka ne Yesu kwi yulu. Swinya tusambilizile nu kuti, e Yehova alilambula awawomvi wakwe wonsinye, akuli ukuti wano wakakwimililwako nu “muYuda” nga na wano wakakwimililwako na “wantu 10” swinya akalonda wonsinye wakwivwila amasundo ayali yonganye nu kutwalilila ukuyicefya nu kuwa ni cisinka. Fwandi asa mulandu ni suwilo lino twawa nalyo, tuzipizile twawombela e Yehova mu kulemenkana nu kutwalilila ukucita vino vingalenga twakwivwana na wanawitu na wankazi mwi wungwe. Acino pano tukuya tukupalamila ku nsilo ya nsi, lekani swensinye tutwalilile ukuwombela Yehova nu kukonka e Klistu intunguluzi yitu mwi ‘wumba lyonga’ ilya ng’onzi.​—Yoha. 10:16.