1. ¿Ndáaña ni̱ka̱ʼa̱n Jehová koo tiempo ña̱ ndóoyó vitin?

JEHOVÁ ni̱ka̱ʼa̱nra ña̱yóʼo xa̱ʼa̱ tiempo ña̱ ndóoyó vitin: “Tiempo kán u̱xu̱ na̱ ta̱a na̱ káʼa̱n ku̱a̱ʼání tu̱ʼun, tiinna ti̱ko̱to̱ iin ta̱ judío ta ka̱ʼa̱nna xíʼinra: ‘Kúni̱ndi̱ ku̱ʼu̱nndi̱ xíʼinndó chi xi̱niso̱ʼondi̱ ña̱ íyo Ndióxi̱ xíʼinndóʼ” (Zac. 8:23). Ta̱ “judío” yóʼo kúú ta̱ ndákiʼin nu̱ú na̱ nda̱kaxin Ndióxi̱ ku̱ʼu̱n chí ndiví xíʼin espíritu santora, ta nanítuna na̱ Israel Ndióxi̱ (Gál. 6:16). Ta na̱ “u̱xu̱ ta̱a” kúú, na̱ ndákiʼin nu̱ú na̱ ndátu kutaku ndiʼi tiempo nu̱ú ñuʼú yóʼo. Ta na̱yóʼo kúnda̱a̱-inina ña̱ mií Jehová kúú ta̱ nda̱kaxin na̱ ku̱ʼu̱n chí ndiví, ta iin ña̱ va̱ʼaní kúúña nu̱úna ña̱ inkáchi káchíñuna nu̱ú Ndióxi̱.

2. ¿Ndáa ki̱ʼva ku̱a̱ʼa̱n na̱ u̱xu̱ ta̱a xíʼin na̱ nda̱kaxin Ndióxi̱ ku̱ʼu̱n chí ndiví?

² Ña̱ nda̱a̱ kúú ña̱ tiempo vitin va̱ása xíni̱yó ki̱vi̱ ndiʼi na̱ nda̱kaxin Ndióxi̱ ku̱ʼu̱n chí ndiví na̱ kíndo̱o nu̱ú ñuʼú yóʼo, * soo na̱ ndátu koo nu̱ú ñuʼú yóʼo kivi “ku̱ʼu̱nna” xíʼinna. ¿Ndáa ki̱ʼva kéʼéna ña̱yóʼo? Ña̱ Biblia káchiña ña̱ na̱ “u̱xu̱ ta̱a” tiin kútu̱na “ti̱ko̱to̱ iin ta̱ judío” ta kachina: “Kúni̱ndi̱ ku̱ʼu̱nndi̱ xíʼinndó chi xi̱niso̱ʼondi̱ ña̱ íyo Ndióxi̱ xíʼinndó”. Ña̱ versículo yóʼo káʼa̱nña xa̱ʼa̱ iin kuití ta̱ judío. Soo tá káʼa̱n na̱ u̱xu̱ ta̱a yóʼo ña̱ tu̱ʼun “xíʼinndó”, táki̱ʼva íyo na̱ káʼa̱n xíʼin ku̱a̱ʼá na̱ yiví saá íyona. Ña̱yóʼo náʼa̱ña ña̱ ta̱ “judío” su̱ví iin kuití na̱ yiví kúúra, chi ndákiʼinra nu̱ú ndiʼi na̱ nda̱kaxin Ndióxi̱ ku̱ʼu̱n chí ndiví. Na̱ va̱ása níndaka̱xin Ndióxi̱ ña̱ ku̱ʼu̱nna chí ndiví, inkáchi káchíñuna  nu̱úra xíʼin na̱ ku̱ʼu̱n chí ndiví. Soo va̱ása xítona na̱ ku̱ʼu̱n chí ndiví nda̱a̱ táki̱ʼva íyo na̱ níʼi yichi̱ nu̱úna, chi kúnda̱a̱-inina ña̱ iinlá ta̱ Jesús kúú ta̱ níʼi yichi̱ nu̱úna (Mat. 23:10).

3. ¿Ndáa pregunta ndakuiinyó nu̱ú ña̱ artículo yóʼo?

³ Tiempo vitin kíndo̱oka sava na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo. Xa̱ʼa̱ ña̱yóʼo savana kivi nda̱ka̱tu̱ʼun xíʼin miína: ¿ndáa ki̱ʼva xíniñúʼu koto na̱ nda̱kaxin Ndióxi̱ miína?, ¿nda̱saa xíniñúʼu keʼéyó xíʼin na̱ xíxi si̱táva̱ʼa ta xíʼina tá vino tá xíyo Conmemoración? ta, ¿á xíniñúʼu ndi̱ʼi̱-iniyó tá ku̱a̱ʼáka ku̱a̱ʼa̱n ndúu na̱ xíxi si̱táva̱ʼa ta xíʼina tá vino? Ña̱ artículo yóʼo ndakuiin ña̱ pregunta yóʼo.

4. ¿Ndáaña káʼa̱n 1 Corintios 11:27-29 xíniñúʼu kiʼin na̱ nda̱kaxin Ndióxi̱ kuenta xíʼin, ta nda̱chun?

⁴ Íyo iin ña̱ ndáyáʼviní káʼa̱n 1 Corintios 11:27-29 * xíʼin na̱ nda̱kaxin Ndióxi̱ ku̱ʼu̱n chí ndiví (kaʼviña). ¿Ndáa ki̱ʼva kivi xa̱a̱ iin na̱ nda̱kaxin Ndióxi̱ kuxuna si̱táva̱ʼa ta koʼona tá vino tá xíyo Conmemoración, soo va̱ása xíniñúʼu  keʼénaña? Tá xíxina si̱táva̱ʼa ta xíʼina tá vino, soo ña̱ kéʼéna va̱ása íyoña táki̱ʼva íyo ña̱ kúni Jehová (Heb. 6:4-6; 10:26-29). Na̱ nda̱kaxin Ndióxi̱ kúnda̱a̱-inina ña̱ xíniñúʼu nda̱kú koo inina tá kúnina ndakiʼinna ña̱ ka̱na Ndióxi̱ miína ña̱ ku̱ʼu̱nna chí ndiví, xa̱ʼa̱ ta̱ Cristo Jesús (Filip. 3:13-16).

5. ¿Ndáa ki̱ʼva xíniñúʼu koto na̱ nda̱kaxin Ndióxi̱ miína?

⁵ Ña̱ espíritu santo Jehová kúú ña̱ chíndeétáʼan xíʼin na̱ yiví ña̱ vitá koo inina, ta su̱ví ña̱ ni̱nuní kunina (Efes. 4:1-3; Col. 3:10, 12). Xa̱ʼa̱ ña̱yóʼo na̱ nda̱kaxin Ndióxi̱ ku̱ʼu̱n chí ndiví va̱ása túvina ña̱ ndáyáʼviníka miína nu̱ú inkana. Kúnda̱a̱-inina chi Jehová va̱ása táxira ku̱a̱ʼáka espíritu santo ndaʼa̱na, nu̱ú inkaka na̱ ndásakáʼnu-ña̱ʼa. Ta ni va̱ása ndákanixi̱nína ña̱ xíni̱níkana xa̱ʼa̱ ña̱ nda̱a̱ ña̱ sanáʼa̱ tu̱ʼun Ndióxi̱, nu̱ú inkaka na̱ yiví. Ta nda̱a̱ ni iin yichi̱ va̱ása ka̱ʼa̱nna ña̱yóʼo xíʼin inkana: “Ndióxi̱ nda̱kaxinra yóʼó ña̱ ku̱ʼu̱n chí ndiví ña̱kán xíniñúʼu kuxún si̱táva̱ʼa ta koʼún tá vino tá xíyo Conmemoración”. Chi na̱yóʼo vitá íyo inina ta kúnda̱a̱-inina ña̱ iinlá Jehová kúú ta̱ kivi kana iinna ña̱ ku̱ʼu̱nna chí ndiví.

6. Nda̱a̱ táki̱ʼva káchi 1 Corintios 4:7, 8, ¿ndáa ki̱ʼva xíniñúʼu keʼé na̱ nda̱kaxin Ndióxi̱ ku̱ʼu̱n chí ndiví?

⁶ Ni kúnda̱a̱-ini na̱ nda̱kaxin Ndióxi̱ ña̱ iin ña̱ ndáyáʼviní kúú ña̱ ka̱narana ña̱ ku̱ʼu̱nna chí ndiví, va̱ása ndátuna ña̱ viíní ná keʼé inkana xíʼinna (Filip. 2:2, 3). Ta saátu kúnda̱a̱-inina ña̱ tá nda̱kaxin Ndióxi̱ miína, va̱ása níkunda̱a̱-ini ndiʼi na̱ yiví xa̱ʼa̱ ña̱yóʼo. Ña̱kán va̱ása ndákanda̱-inina tá íxayo̱ʼvi̱ña xíʼin inkana ña̱ kandíxana ña̱ nda̱kaxin Ndióxi̱ miína ña̱ ku̱ʼu̱nna chí ndiví. Ña̱ Biblia sánáʼa̱ña miíyó ña̱ va̱ása ndi̱ku̱n kandíxayó iin na̱ káʼa̱n ña̱ ta̱xi Ndióxi̱ iin chiñu ña̱ ndáyáʼviní ndaʼa̱na (Apoc. 2:2). Na̱ nda̱kaxin Ndióxi̱ ku̱ʼu̱n chí ndiví va̱ása kúni̱na ka̱ʼa̱n va̱ʼaní inkana xa̱ʼa̱na, ña̱kán tá ña̱ yichi̱ nu̱ú kúú ña̱ xínina iin na̱ yiví va̱ása káʼa̱nna xíʼinna ña̱ kúúna na̱ nda̱kaxin Ndióxi̱. Ta ni va̱ása ni̱nuní kúnina xa̱ʼa̱ ña̱ nda̱kaxin Ndióxi̱ miína (kaʼvi 1 Corintios 4:7, 8). *

7. ¿Ndáaña kǒo kéʼé na̱ nda̱kaxin Ndióxi̱ ku̱ʼu̱n chí ndiví, ta nda̱chun?

⁷ Na̱ nda̱kaxin Ndióxi̱ ku̱ʼu̱n chí ndiví ndiʼina kítáʼanna xíʼin, ta su̱ví nda̱saa kuití xíʼin na̱ nda̱kaxinra. Ta ni va̱ása nándukúna inka na̱ nda̱kaxin Ndióxi̱ ña̱ ndakutáʼanna ka̱ʼa̱nna xa̱ʼa̱ ña̱ ka̱na Ndióxi̱ miína ña̱ ku̱ʼu̱nna chí ndiví, á ña̱ ndakutáʼanna ña̱ kaʼvina Biblia (Gál. 1:15-17). Tá saá ná keʼéna, va̱ása chindeétáʼanna xíʼin na̱ congregación ña̱ kutáʼan viína. Chi  íyona contra xíʼin ña̱ espíritu santo, saáchi ña̱yóʼo kúú ña̱ chíndeétáʼan xíʼin na̱ ñuu Ndióxi̱ ña̱ vií kutáʼanna (Rom. 16:17, 18).

8. ¿Nda̱chun xíniñúʼu kiʼinyó kuenta, xíʼin ki̱ʼva ña̱ kéʼéyó xíʼin na̱ nda̱kaxin Ndióxi̱ ku̱ʼu̱n chí ndiví? (Koto nota).

⁸ ¿Nda̱saa xíniñúʼu keʼéyó xíʼin ndiʼi na̱ hermano na̱ nda̱kaxin Ndióxi̱ ku̱ʼu̱n chí ndiví? Va̱ása va̱ʼa kundayáʼviní iinna nu̱úyó ni kúúna ñani ta̱ Cristo na̱ nda̱kaxin Ndióxi̱ (Mat. 23:8-12). Tá káʼa̱n ña̱ Biblia xa̱ʼa̱ na̱ anciano káʼa̱nña xíʼinyó ña̱ ná keʼéyó táki̱ʼva kéʼéna ña̱ kándíxanína Ndióxi̱, soo va̱ása káʼa̱nña xíʼinyó ña̱ ná kundiku̱nyó na̱ yiví (Heb. 13:7). Ña̱ nda̱a̱ kúúña, ña̱ Biblia káʼa̱nña ña̱ sava na̱ cristiano xíniñúʼu ndeéníka ixato̱ʼóyóna. Soo su̱ví xa̱ʼa̱ ña̱ kúúna na̱ nda̱kaxin Ndióxi̱ ku̱ʼu̱n chí ndiví, chi xa̱ʼa̱ ña̱ va̱ʼaní níʼina yichi̱ nu̱ú na̱ congregación kúúña, ta ndeéní káchíñuna ta sánáʼa̱na (1 Tim. 5:17). Tá ná ndasakáʼnuníyó na̱ nda̱kaxin Ndióxi̱ ku̱ʼu̱n chí ndiví, sana va̱ása va̱ʼa kunina, * ta nda̱a̱ kivi xa̱a̱na ni̱nuní kunina (Rom. 12:3). Ta va̱ása kúni̱yó keʼéyó iin ña̱ʼa, ña̱ kivi sandákava iin na̱ nda̱kaxin Ndióxi̱ ku̱ʼu̱n chí ndiví, ña̱ xa̱a̱na keʼéna iin ña̱ va̱ása va̱ʼa (Luc. 17:2).

9. ¿Nda̱saa kivi na̱ʼa̱yó ña̱ íxato̱ʼóyó na̱ nda̱kaxin Ndióxi̱ ku̱ʼu̱n chí ndiví?

⁹ ¿Nda̱saa kivi na̱ʼa̱yó ña̱ íxato̱ʼóyó na̱ nda̱kaxin Ndióxi̱ ku̱ʼu̱n chí ndiví? Va̱ása nda̱ka̱tu̱ʼunyóna ndáa ki̱ʼva nda̱kaxin Ndióxi̱ miína. Chi iinlá miívana kúú na̱ kúnda̱a̱-ini xa̱ʼa̱ ña̱yóʼo, ta va̱ása xíniñúʼu kunda̱a̱-iniyó xa̱ʼa̱ña (1 Tes. 4:11; 2 Tes. 3:11). Ta ni va̱ása ndakanixi̱níyó ña̱ nda̱kaxin Ndióxi̱ na̱ ti̱ndaʼa̱ xíʼinna, yivána á inkaka na̱ veʼena ña̱ ku̱ʼu̱nna chí ndiví. Chi ña̱ ka̱na Ndióxi̱ miína ña̱ ku̱ʼu̱nna chí ndiví su̱ví iin herencia kúúña, chi Ndióxi̱ kúú ta̱ ndáka̱xinna ña̱ ku̱ʼu̱nna (1 Tes. 2:12). Ta ni va̱ása nda̱ka̱tu̱ʼunyóna xa̱ʼa̱ iin ña̱ʼa ña̱ sana va̱ása va̱ʼa kuni inkana xíʼin. Tá kúú, nda̱a̱ ni iin yichi̱ va̱ása nda̱ka̱tu̱ʼunyó ñá síʼí iin ta̱ hermano ta̱ nda̱kaxin Ndióxi̱ ku̱ʼu̱n chí ndiví, ndáaña ndákanixi̱níñá xa̱ʼa̱ ña̱ iinlá miíñá koo nu̱ú ñuʼú yóʼo ndiʼi tiempo, ta va̱ása kooka yiíñá xíʼinñá. Chi kúnda̱a̱-iniyó ña̱ nu̱ú ñuyǐví xa̱á Jehová taxira ndiʼi ña̱ sákusi̱í-ini na̱ yiví (Sal. 145:16).

10. ¿Nda̱chun va̱ása xíniñúʼu kundayáʼviní iin na̱ yiví nu̱úyó?

¹⁰ Saátu, tá va̱ása xítoyó na̱ nda̱kaxin Ndióxi̱ ku̱ʼu̱n chí ndiví táki̱ʼva íyo na̱ ndáyáʼviní nu̱ú inkana, saá kúú ña̱ ndáayó miíyó. ¿Ndáa ki̱ʼva? Ña̱ Biblia káchiña ña̱ sava na̱ nda̱kaxin Ndióxi̱ ku̱ʼu̱n chí ndiví kivi xa̱a̱na sandákoona ña̱ nda̱kú íyo inina xíʼinra (Mat. 25:10-12; 2 Ped. 2:20, 21). Soo tá va̱ása ndáyáʼviní ña̱ kéʼé iin na̱ yiví nu̱úyó, va̱ása xa̱a̱yó kundiku̱nyó sa̱tá na̱ yiví, ni kúúna na̱ nda̱kaxin Ndióxi̱ ku̱ʼu̱n chí ndiví, á na̱ xíni̱ ku̱a̱ʼání na̱ yiví á na̱ xa̱a̱ ku̱a̱ʼání ku̱i̱ya̱ ndásakáʼnu Jehová (Jud. 16, nota). Ña̱kán tá ná kixaa̱ iin ki̱vi̱ ña̱ sandákoona ña̱ nda̱kú íyo inina xíʼin Ndióxi̱, á tá ná sandákoona congregación, miíyó va̱ása sandákooyó ña̱ kachíñuyó nu̱ú Jehová ni ña̱ kandíxayóra.

11. ¿Ndáaña kúu xíʼin na̱ xíxi si̱táva̱ʼa ta xíʼina tá vino tá xíyo Conmemoración?

¹¹ Sava ku̱i̱ya̱ chí sa̱tá na̱ xi̱xixi si̱táva̱ʼa ta xi̱xiʼina tá vino tá xíyo Conmemoración loʼoníva xi̱kuuna. Soo tiempo vitin, ku̱a̱ʼáka kúú na̱ kéʼé ña̱yóʼo. ¿Á xíniñúʼu ndi̱ʼi̱-iniyó xa̱ʼa̱ ña̱yóʼo? Va̱ása, yóʼo ka̱ʼa̱nyó xa̱ʼa̱ ña̱ chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo.

12. ¿Nda̱chun va̱ása xíniñúʼu ndi̱ʼi̱-iniyó tá ku̱a̱ʼáka ku̱a̱ʼa̱n ndúu na̱ xíxi si̱táva̱ʼa ta xíʼina tá vino?

¹² “Jehová xíni̱ra na̱ kúú kuentara” (2 Tim. 2:19). Jehová xíni̱ va̱ʼara ndáana kúú na̱ ndixa  nda̱kaxinra ku̱ʼu̱n chí ndiví, soo na̱ hermano na̱ ndákaʼvi na̱ xíxi si̱táva̱ʼa ta xíʼina tá vino va̱ása kúnda̱a̱-inina xa̱ʼa̱ ña̱yóʼo. Ña̱kán tañu na̱yóʼo ñúʼu na̱ túvi ña̱ nda̱kaxin Ndióxi̱ miína ña̱ ku̱ʼu̱nna chí ndiví, soo su̱ví ña̱ nda̱a̱ kúúña. Sava na̱ xi̱xixi si̱táva̱ʼa ta xi̱xiʼina tá vino tá ya̱chi̱ va̱ása kéʼékana ña̱yóʼo. Ta inkatuna túvina ña̱ ku̱ʼu̱nna kaʼndachíñuna xíʼin ta̱ Cristo chí ndiví xa̱ʼa̱ ña̱ kúúmiína iin kue̱ʼe̱ ña̱ sásana xi̱nína. Xa̱ʼa̱ ña̱yóʼo, va̱ása kúnda̱a̱ káxi iniyó nda̱saa kúú na̱ nda̱kaxin Ndióxi̱ ku̱ʼu̱n chí ndiví kíndo̱o nu̱ú ñuʼú yóʼo.

13. ¿Á káʼa̱n Biblia nda̱saa na̱ nda̱kaxin Ndióxi̱ ku̱ʼu̱n chí ndiví, kundoo nu̱ú ñuʼú yóʼo tá ná kixáʼa ña̱ gran tribulación?

¹³ Na̱ nda̱kaxin Ndióxi̱ koona iníísaá nu̱ú ñuʼú, tá ná kixi ta̱ Jesús ndakiʼinrana ña̱ ku̱ʼu̱nna xíʼinra chí ndiví (Mat. 24:31). Ña̱ ndixa kúú ña̱ káʼa̱n Biblia, ña̱ ki̱vi̱ so̱ndíʼi koo iin tiʼvi na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo (Apoc. 12:17). Soo va̱ása káʼa̱nña nda̱saa kúú na̱ kundoo nu̱ú ñuʼú yóʼo tá ná kixáʼa ña̱ gran tribulación.

14. ¿Ndáaña sánáʼa̱ Romanos 9:11, 16 miíyó xa̱ʼa̱ ña̱ ndáka̱xin Ndióxi̱ na̱ ku̱ʼu̱n chí ndiví?

¹⁴ Jehová kúú ta̱ xíni̱ ama kúú ña̱ kanara na̱ nda̱kaxinra ku̱ʼu̱n chí ndiví (Rom. 8:28-30). Jehová ki̱xáʼara ndáka̱xinra na̱ ku̱ʼu̱n chí ndiví tándi̱ʼi nda̱taku ta̱ Jesús. Tá siglo nu̱ú, ndiʼi na̱ cristiano na̱ nda̱a̱ xi̱kuuna na̱ nda̱kaxin Ndióxi̱ ku̱ʼu̱n chí ndiví. Soo tá ni̱ya̱ʼaka tiempo, ndiʼi na̱ xi̱ka̱ʼa̱n ña̱ xi̱kuuna cristiano su̱ví ña̱ nda̱a̱ níxikuuña. Soo ni loʼo xi̱kuu na̱ cristiano na̱ nda̱a̱ tiempo saá, Jehová nda̱kaxinrana ña̱ ku̱ʼu̱nna chí ndiví. Na̱kán ni̱xi̱yona táki̱ʼva íyo trigo ña̱ ni̱ka̱ʼa̱n ta̱ Jesús kuaʼnu ma̱ʼñú ku̱ʼu̱ ña̱ va̱ása va̱ʼa (Mat. 13:24-30). Ña̱ tiempo so̱ndíʼi vitin, Jehová ndákaxinkara ndáa na̱ koo táʼan  na̱ 144,000. * Ña̱kán tá Ndióxi̱ kánara savakana ña̱ ku̱ʼu̱nna chí ndiví tá si̱lóʼo kúma̱ní kixaa̱ ña̱ ndiʼi-xa̱ʼa̱ ñuyǐví, ¿ndáana kúúyó ña̱ ka̱ʼa̱nyó xa̱ʼa̱ ña̱ kéʼéra? (Kaʼvi Romanos 9:11, * 16). * * Va̱ása kúni̱yó keʼéyó táki̱ʼva ke̱ʼé na̱ káchíñu ndáʼvi, na̱ ni̱ka̱ʼa̱n ta̱ Jesús xa̱ʼa̱ nu̱ú iin ilustración, na̱yóʼo ni̱ka̱ʼa̱n kúáchina xíʼin ta̱ kúúmií tú uva xa̱ʼa̱ ña̱ ke̱ʼéra xíʼin na̱ va̱ása níkixáʼa kachíñu ya̱chi̱ (Mat. 20:8-15).

15. ¿Nda̱chun kúnda̱a̱-iniyó ña̱ su̱ví ndiʼi na̱ nda̱kaxin Ndióxi̱ ku̱ʼu̱n chí ndiví, kúú táʼan “ta̱ esclavo ta̱ ndíchiní ta̱ nda̱kúní káchíñu” ta̱ káʼa̱n Mateo 24:45-47 xa̱ʼa̱?

¹⁵ Su̱ví ndiʼi na̱ ndátu ku̱ʼu̱n chí ndiví kúú táʼan “ta̱ esclavo ta̱ ndíchiní ta̱ nda̱kúní káchíñu” (kaʼvi Mateo 24:45-47). * Nda̱a̱ táki̱ʼva ni̱xi̱yo tá siglo nu̱ú, tiempo vitin Jehová xíʼin ta̱ Jesús xíniñúʼuna loʼo na̱ yiví ña̱ taxina kuxu ku̱a̱ʼánína ta ña̱yóʼo kúú ña̱ sanáʼa̱nana. Tá siglo nu̱ú, xi̱niñúʼuna sava na̱ nda̱kaxin Ndióxi̱ ku̱ʼu̱n chí ndiví ña̱ ka̱ʼyína ña̱ Escrituras Griegas Cristianas. Tiempo vitin, loʼo kuití na̱ nda̱kaxin Ndióxi̱ kúúmií chiñu ña̱ taxina kuxu na̱ ñuu Ndióxi̱ mií tiempo ña̱ xíniñúʼunaña.

16. ¿Ndáaña sa̱kuaʼún nu̱ú ña̱ artículo yóʼo?

¹⁶ Ná ka̱ʼa̱n tukuyó xa̱ʼa̱ ña̱ sa̱kuaʼayó nu̱ú ña̱ artículo yóʼo. Jehová káʼa̱nra taxira ndaʼa̱ na̱ káchíñu nu̱úra, ña̱ kutakuna ndiʼi tiempo nu̱ú ñuʼú yóʼo, ta saátu taxira ña̱ kutaku na̱ kaʼndachíñu xíʼin ta̱ Jesús, chí ndiví. Ndióxi̱ taxira ña̱ va̱ʼa ndaʼa̱ ndiʼi na̱ káchíñu nu̱úra, na̱ kúú ta̱ “judío” ta saátu na̱ “u̱xu̱ ta̱a”, ta káʼa̱nra xíʼin ndiʼina ña̱ ná kuniso̱ʼona leyra ta nda̱kú ná koo inina xíʼinra. Ndiʼina xíniñúʼu vitá koo inina ta inkáchi kachíñuna nu̱úra. Ta ndiʼina xíniñúʼu chika̱a̱ ndee̱ ña̱ vií ná kutáʼan na̱ congregación. Xa̱a̱ kúyatinníka ña̱ ndiʼi-xa̱ʼa̱ ña̱ ñuyǐví yóʼo, ña̱kán ná chika̱a̱yó ndee̱ ña̱ kachíñuyó nu̱ú Jehová ta kundiku̱nyó ta̱ Cristo (Juan 10:16).