1. Jehovaba tae-e ge mî hîna sada tsēdi ǃnâ nî ī-e?

JEHOVAB ge sada tsēdi xa ge mî: “ǁNā tsēdi ai i ge nîra ī, disi khoegu mâ gowa-i ǃhaodi di-i hoa-i digu nî saraǀam-i Jodeǁî khoeb di-e ǃkhō tsî mî ǃkhaisa: ‘Sige ge sadu ǀkha nî ǃgû, Elob sadu ǀkha hâ, ti ge go ǁnâu xui-ao.’” (Sax. 8:23) “Jodeǁî khoeb” ge nēpa Jehovab di ǂkhauhesana ra ǂnûǁkhaeba. ǁÎn ge “Elob di Israeli” dis tsîna ra ǂgaihe. (Gal. 6:16) “Disi khoegu” ge ǁnān hîna ǃhūbaib ai hâs di ǃâubasensa ūhâna ra ǂnûǁkhaeba. ǁÎn ge a ǂan nē ǃgâsan Jehovab xa ǂkhauhe hâ ǃkhaisa tsî ǁîn ǀkha sîsenǀhaosa ǀō-aisase ra mû.

2. ‘Disi khoega’ mati ǂkhauhesan ǀkha ra sîsenǀhao?

² ǂKhauhesa ǃgâsan di ǀondi hoaden a ǀū xawen ge ǁnān hîna ǃhūbaib ai ûis di ǃâubasensa ūhâna ǁîn ‘ǀkha ra ǃgû.’ * Matin nēsa ra dī? Elobmîs ge ra mî “disi khoegu” ge “saraǀam-i Jodeǁî khoeb di-e ǃkhō” tsî nî mî: ‘Sige ge sadu ǀkha nî ǃgû, Elob sadu ǀkha hâ, ti ge go ǁnâu xui-ao.’ Nē xoaǀgoras ge ǀgui Jodeǁî khoeb xa ǀgui ra ǃhoa. Xawe “sadu” tsî “sadu ǀkha” di hâ mîra ge ǂgui khoena ǃoa ra ǁnaeǁgau. Nēs ge ra ǂâibasen nē Jodeǁî khoeb ǀgui khoe-i ǀgui-e ǂnûǁkhaeba tama xawe hoa ǂnubis di ǂkhauhesa ǃgâsana ra ǂnûǁkhaeba ǃkhaisa. ǁNān hîna ǂkhauhesa taman ge ǂkhauhesan ǀkha Jehovaba  ǀguiba ra ǃoaba. Xawen ge ǂkhauhesana ǂgaeǂgui-aon ase mû tama hâ, Jesub a ǁîn di ǂgaeǂgui-ao ǃkhaisan da mûǂan amaga.​—Mat. 23:10.

3. Mâ dîde da nē ǁkhāǁkhāǃâs ǃnâ nî ǃeream?

³ ǂKhauhesa Xristeǁîn nētsē Elob khoen ǁaegu noxoba hâ amaga da ge ra dîsen: (1) ǂKhauhesa khoena mati nî mûsen? (2) Mati da ǁnān hîna ǂauxûib tsî pere-i Jesub ǁōb ǂÂiǂâisens di-e ra ǂûna nî mû? (3) ǁNān hîna nē xūna xu ra ǂûn di ǃgôab ga ǂguiǂguisen o, o da nî ǂâiǂhansen? Nē ǁkhāǁkhāǃâs ge nē dîde nî ǃeream.

4. Mâ ǃkhâikhoms hîna 1 Korinteǁîn 11:27-29 ǃnâ hâs xan ǂkhauhesa ǃgâsana nî ǂâiǃgâ tsî tae-i ǃaroma?

⁴ ǂKhauhesan ge ǃkhâikhoms hîna 1 Korinteǁîn 11:27-29 ǃnâ hâs xa nî ǂâi. (Khomai re.) Mati i ǂkhauhesa Xristeǁî-e “anu tamase” Jesub ǁōb ǂÂiǂâis tawa a ǃâ ǁkhā? ǁÎ-i ge ǂauxûiba xu i ga ā tsî pere-e xu ǂû o, Jehovaba i ǁnâuǀnam tama hâ hîna o nēsa a dī ǁkhā. (Heb. 6:4-6; 10:26-29) ǂKhauhesa ǃgâsan ge nî mûǂan ǂgomǂgomsasen ga hâ o ǀguin ‘Elob Xristub Jesub ǃnâ ǀgapiseba ǃoa nî ǂgai-e ǃkhaisa.’​—Fil. 3:13-16.

5. ǂKhauhesa Xristeǁîna mati ǁîn xa nî tsâ?

 ⁵ Jehovab di ǃanu gagab ge ǁîb di ǃoaba-aona ra hui în ǃgamǃgamsenxa tsî tā ǀgapiǂâixa. (Efe. 4:1-3; Kol. 3:10, 12) Nēs ǃaroman ge ǂkhauhesana nau ǃgâsan xan ǀgapi di ǂâi tama hâ. ǁÎn ge a ǂan Jehovab ǂkhauhesa ǃgâsana ǃnāsa ǃanu gagaba nau ǃoaba-aon ǁîb din xa mā tama hâsa. ǁÎn ge ǂâi tama hâ nau ǃgâsan xan Elobmîsa ǃnāsase ra ǁnâuǃā di. Tsîn ge nau ǃgâsana ǁîn tsîn ǂkhauhesa tsî Jesub ǁōb ǂÂiǂâisens ǃnâ a ǃâ ǁkhā di mîba mâ tide. Xawen ge ǃgamǃgamsenxasib ǀkha ra ǂanǃgâ Jehovab ǀguib khoena ǀhommi ǃâubasensa a mā ǁkhā ǃkhaisa.

6. 1 Korinteǁîn 4:7, 8 ǃoagun ǂkhauhesa Xristeǁîna mati nî tanisen?

⁶ ǂKhauhesa ǃgâsan ǀhommi ǀkha īs di aiǂhanuba ra ǃgôaǃgâ xawen ge nau ǃgâsan xan ǀō-aisa ǀgaub ǃnâ nî hâ-ūhe ǃkhaisa ǃâubasen tama hâ. (Fil. 2:2, 3) ǁÎn ge ra ǂanǃgâ Jehovab ga ǁîna ǁhûi, ob nau khoena ǂanǂan tama hâ ǃkhais tsîna. Nēs ǃaroman ge ǂkhauhesa ǃgâsana buru tama hâ nau ǃgâsan ga ǂkhauhen hâ ǃkhaisa ǂgom tama io. ǁÎn ge ra ǁnâuǃā Elobmîs da mîsa, tā khoe-i hîna Elob xa i ǀō-aisa aiǂhanuba i mā-e hâ di ra mî-e ǃhaese ǂgom di. (J.ǂHa. 2:2) ǂKhauhesa Xristeǁîn ge nau ǃgâsan xan ǀgapise nî mûhe ǃkhaisa ǂgao tama hâ. ǁNās ǃaroman ge ǀhao-ūn ra ǃgâsana ǁnā ǁaeb ai ǂkhauhen hâ ǃkhaisa mîba tama hâ. Nēs ǃaroma i ge nau ǃgâsana nēsa mîba mâ tide.​—Khomai re 1 Korinteǁîn 4:7, 8.

7. ǂKhauhesa ǃgâsana tae-e xu nî ǂgōsen tsî tae-i ǃaroma?

⁷ ǂKhauhesa ǃgâsan ge nau ǂkhauhesa ǃgâsan ǀkha ǀgui hâǀhao tide ǁîn ǀgui ǃnans di ǃâ di ra ǂâise. ǁÎn ge ǂkhauhesa ǃgâsana ôaǂui tama hâ în ǁîn di ǂkhauhes xa ǃhoa tamas ka ion Elobmîsa ǀguiba nî ǁkhāǁkhāsen ga. (Gal. 1:15-17) ǀHaohâgu ge ǀguiǃnâxa tide ǂkhauhesa ǃgâsan ga nē ǃnôa xūna dī o. ǁÎn ge ǃanu gagab ǃoa-ai nî sîsen hîna Elob khoena ǂkhîb tsî ǀguiǃnâxasib tsîna ra māba.​—Rom. 16:17, 18.

8. Tae-i ǃaroma da ǁnān hîna Jesub ǁōb ǂÂiǂâisens ǃnâ ra ǃâna da ra hâ-ū ǀgauba nî ǂanbasen? (ǀGamirosa mû re.)

⁸ Mati da ǂkhauhesa ǃgâsana nî hâ-ū? Kaise i ge a tsū ǂkhauhesa Xristeǁî  ǃgâsan xa ǃnāsase ǂâisa. (Mat. 23:8-12) Elobmîs ga ǀhaohâb ǃûi-aogu xa ǃhoa o, o i ge nēsa ra ǂkhâǃnâ da i da “ǁîgu ǂgomsa ǁgaeǁgae” xawes ge nēsa ǂâibasen tama hâ i da khoena sida ǂgaeǂgui-aon ase mû. (Heb. 13:7) Ama i ge a Elobmîs ga mî o, ǀnîn ge ‘ǃhonarisa ǃgôasiba’ nî hō di. Xawe nēs ge ǁîgu ‘ǀō-aisa’ tsî ‘ǁkhāǁkhās tsîra ǃnâ ra ǃoaba’ amagasa tsî ǂkhauhesa gu a amagas ose. (1Tim. 5:17) ǂKhauhesa ǃgâsana da ga kaise koa tsî ǂgui ǁaeba mā o, o da ge ǁîna ǃgâi tamase a tsâ kai ǁkhā. * ǀNî hâ xū-i tsîn ge a ī ǁkhā, ǁîna da ge a ǀgapiǂâixa kai ǁkhā. (Rom. 12:3) Sada ge nēti ī xūna dī ǂgao tama hâ hîna Xristub di ǂkhauhesa ǃgâsana nî ǃnôa kai-e.​—Luk. 17:2.

9. Mati da a ǁgau ǁkhā ǂkhauhesa Xristeǁîna da ǃgôasiba ra ǁgausa?

⁹ Mati da a ǁgau ǁkhā ǁnān hîna Jehovab xa ǂkhauhe hâna da ǃgôasiba ra ǁgausa? ǁÎna matin ge ǂkhauhesa kaisa dî tama īs ǃnâ da ge nēsa a dī ǁkhā. ǁNā i ge ǁîn ǀguin nî ǂanse i xū-e tsî sada ǃaroma hâ tama-e. (1Tes. 4:11; 2Tes. 3:11) Tsî da ge tā nî ǂâi ǁîn aogu tamas ka io taradi, ǁgûn tsî omaris ǁanin tsîn ǂkhauhesa ǃkhaisa. Khoe-i ge ǁî-i di ǀhommi ǃâubasensa ǁî-i omaris ǁani-e xu ǀumi tama hâ. ǁÎ-i ge nēsa Eloba xu ra ǃkhōǃoa. (1Tes. 2:12) Tsî da ge ǁîna nî ǁaixa kai dîna dîsa xu nî ǂgōsen. Aiǁgause da ge ǂkhauhesa ǃgâsab kaikhoesa dî tide matis ra tsâsa ǃhūbaib ai ǀamose ûisa ǁîs kaikhoeb ose. ǂGomǃgâ ǁkhā da ge a Jehovab ǀasa ǃhūbaib ǃnâ ‘ûitsaman hoan di turaga nî ǁâǁâ’ ǃkhaisa.​—Psa. 145:16.

10. Nau ǃgâsan “ǀgauga ǂhâbasa” xu da ga ǂgōsen o, o da mati a ǃûisen ǁkhā?

¹⁰ ǂKhauhesa ǃgâsana da ga nau ǃgâsan xa ǀō-aisase mû tama ī o, o da ge nēsa xu a ǁkhaubasen ǁkhā. Mati da nēsa a dī ǁkhā? Elobmîs ge ra ǁgau ǀnî ǂkhauhesa ǃgâsan ǂgomǂgomsase hâ tide ǃkhaisa. (Mat. 25:10-12; 2Pet. 2:20, 21) Xawe da ga ‘khoen ǀgauga ǁgae’ tama i o da ge ǁîna sao tide, ǂkhauhesan, ǃgâise ǂansa khoen tamas io ǁnān hîna Jehovaba gaxuse ǃoaba hân gas xawes tsîna. (Jud. 16) Nēs ǃaroma da ge ǁîn ga ǂgomoǃnâ tsî ǀhaohâba xu bē o, Jehovab ǃoa-ai ǂgomoǃnâ tsî ǁîba ǃoaba ǀû tide.

11. ǁNān hîna Jesub ǁōb ǂÂiǂâisens ǃnâ ra ǃân di ǃgôab ǀkha i tae-e ge ī?

¹¹ ǂGui kuriga i ge ǁnān hîna Jesub ǁōb ǂÂiǂâisens tawa ra ǃân di ǃgôaba ge ǂguiǂguisen. Xawe ǃkharu go kurigu ǃnâb ge nē ǃgôaba mâ kurib hoaba ra ǂguiǂguisen. Nēs xa da nî ǂâiǂhansen? Hî-î. Hā re î da kō tae-i amsi da ǂâiǂhansen tide ǃkhaisa.

12. Tae-i ǃaroma da ǁnān hîna Jesub ǁōb ǂÂiǂâisens tawa ra ǃân di ǃgôab ǂguiǂguisens xa ǂâiǂhansen tide?

¹² ‘Jehovab ge ǁîb dina a ǂan.’ (2Tim. 2:19) Jehovab khami gu ge ǃgâsagu hîna Jesub ǁōb ǂÂiǂâisens tawa ra ǃâ ǃgâsan di ǃgôaba ra ū ga a ǀū ham-an hoan a ǂkhauhesa ǃkhaisa. Nēs ǃaromab ge nē ǃgôaba ǁnān hîna ǂkhauhen hâ di ra ǂâin tsîna ǃkhōǂgā hâ. Aiǁgausen ge ǀnîn hîna nēs ǃnâ gere ǃâna ǁaeb ge ī khami ge a ǀû. ǀNîn ge ǀnîsi danas ǃnâ ǃgâiro tama hâ tsî Xristub ǀkhan ǀhommi ǃnâ sī nî ǂgaeǂgui di gere ǂâi.  Nēs ǃaroma da ge ǂgomǃgâsib ǀkha a mî ǁoa matikō ǂkhauhesa ǃgâsan noxoba ǃhūbaib ai ǃau hâ ǃkhaisa.

13. Elobmîsa ra ǁgau matikō ǂkhauhesan kai ǁgâiǀāb ga ra tsoatsoa o noxoba ǃhūbaib ai nî hâ ǃkhaisa?

¹³ ǃKhōǂuibasenhe hân ge nîra ǀhaoǀhaohe, haka ǂoade xu, ǀhommi di nē ǀamsa xu naus kōse. (Mat. 24:31) Elobmîs ge ra mî ǀuni tsēdi ǃnân ǀoro ǃgôab ǂkhauhesana ǃhūbaib ai nî hâ di. (J.ǂHa. 12:17) Xawe i ge mî tama hâ matikō ǂkhauhesan kai ǁgâiǀāb ǁaeb ǃnâ nî ǃausa.

14. Romeǁîn 9:11, 16 ǃnâ i ra ǁgau-e khami da tae-e ǂkhauhesan di ǁhûihes xa nî ǁnâuǃā?

¹⁴ Jehovab ge ra mîǁgui mâ ǁaeb ǂkhauhesana nî ǁhûi ǃkhaisa. (Rom. 8:28-30) Jehovab ge ǂkhauhesana Jesub ge ǁōba xu khâis khaoǃgâ ge ǁhûi tsoatsoa. ǃKharu ge ǁaeb ǃnân ge hoa Xristeǁîna ge ǂkhauhesa i. ǃKharu ge kurigu ǃnân ge ǁnān hîna ama Xristeǁîn a di gere mîna Xristuba ge sao ǀû. Xaweb ge Jehovaba ǁnā ǁaeb ǃnâs tsîna ama Xristeǁîn ǀnîna gere ǁhûi. ǁÎn ge Jesub ge mî ǃhorob hîna ǀomatsâb ǁaegu tsoro-e hâb khami ge ī-i. (Mat. 13:24-30) Nē ǀuni tsēdi ǃnâb ge Jehovaba noxoba ra aiǃgû 144 000 khoen di ǃâ nî se ī ǂkhauhesana ǁhûis ǀkha. * Nēs ǃaroma da ge Elob ga ǀams aisi noxoba ǂkhauhesana ǁhûi o, o tā ǁîb gā-aisiba nî dîǃnâ.  (Khomai re Romeǁîn 9:11, 16.) * ǂAnbasen da ge nî i da tā Jesub ge ǁîb di ǂkhōs ǀguis ǃnâ ǁguiǃā sîsen-aon khami tanisen. ǁÎn ge ǁîn ǀhonkhoeb ge tsēs ǁaegub ǃnâ ge sîsen tsoatsoa hā sîsen-aon ǀkha a hâ ǀgaub xa ge ǃgâibahe tama hâ i.—Mat. 20:8-15.

15. ǂKhauhesa ǃgâsan hoana ‘ǂgomǂgomsa tsî gā-ai ǃgāb’ di ǃâ Mateub 24:45-47 ǃnâ i ra ǁgau-e khami? ǁGuiǃā re.

¹⁵ Hoa Xristeǁîn hîna ǀhommi ǃâubasensa ūhân ge “ǂgomǂgomsa tsî gā-ai ǃgāb” di ǃâ tama hâ. (Khomai re Mateub 24:45-47.) ǃKharu ge ǁaeb ǃnâ ge ī-i khami kha ge Jehovab tsî Jesub tsîkha ǀoro ǃgôab ǃgâsagu ǀguiga nētsē ra sîsen-ū gagasi ǂû-e mā tsî ǁkhāǁkhā das ǃnâ. ǀOro ǃgôab ǂkhauhesa Xristeǁîn ǀguin ge ǃkharu ge ǁaeb ǃnâ gere sîsen-ū-e Grikegowab di Xoade xoas ǃnâ. Nētsēs tsînan ge ǀoro ǃgôab ǂkhauhesa Xristeǁîna Elob xa ǁhûi-e hâ ‘ǂhanu ǁaeb ai’ ǁîb khoena gagasi ǂû-e mās ǃaroma.

16. Tae-e da nē ǁkhāǁkhāǃâsa xu go ǁkhāǁkhāsen?

¹⁶ Nē ǁkhāǁkhāǃâsa tae-e go ǁkhāǁkhā du? Jehovab ge ǃnāsa ǃâb ǁîb khoen diba ǃhūbaib ai ǀamose ûis aiǂhanuba ge mā tsî ǀoro ǃgôab khoen hîna Jesub ǀkha nî ǂgaeǂguise īna ǀhommi ǃnâ ûis aiǂhanuba. Jehovab ge ǁîb di ǃoaba-aon hoana ra ǀkhae “Jodeǁîn” tsî “disi khoegu” tsîn hoana tsî ǂhâba hâ în ǁîn hoana ǁîb ǂhanuga ǁnâuǀnam tsî ǂgomǂgomsase hâ. Hoa da ge nî ǃgamǃgamsenxa. Tsî hoan ge ǁîba ǀguiǃnâxasib ǃnâ nî ǃoaba. Tsî hoan ge ǃgarise nî sîsen ǂkhîba ǀhaohâb ǃnâ ūhâs ǃaroma. Nē ǃhūbaib ǀamsa da ra ǀgū khami da ge Jehovaba ǀguiba nî ǃoaba tsî Xristuba ‘ǀgui gūn’ ase nî sao.—Jhn. 10:16.