OSHITOPOLWA SHOKUKONAKONWA 5
Otatu yi nane
“Otwa hala okukala pamwe nane, oshoka tse otu uvu kutya Omuwa oku li nane.” — SAK. 8:23.
EIMBILO 26 Ongame mwe shi ningila
ELALAKANO LYOSHITOPOLWA *
Oonzi dhilwe (“aalumentu omulongo”) oye shi tala ko shi li uuthembahenda, sho haya longele Jehova pamwe naagwayekwa (“Omujuda”) (Tala okatendo 1-2)
1. Oshike shoka Jehova a ti kutya otashi ka ningwa pethimbo lyetu?
JEHOVA okwa hunganeka kombinga yethimbo lyetu, a ti: “Aalumentu omulongo yomomalaka agehe gaapagani otaa kwata kekunka lyonguwo yomulumentu Omujuda, notaa ti: ‘Otse otwa hala okweendela pamwe nane; oshoka otse tu uvu, Kalunga e li pamwe nane.’” (Sak. 8:23, OB-1954) “Omujuda” ota thaneke mboka ya gwayekwa kuKalunga nombepo ondjapuki. Ohaya ithanwa wo ‘aantu yaKalunga.’ (Gal. 6:16) “Aalumentu omulongo” otaya thaneke mboka ye na etegameno lyoku ka kala nomwenyo sigo aluhe kombanda yevi. Oye shi kutya Jehova okwa yambeka aagwayekwa, noye shi tala ko shi li uuthembahenda okulongela Kalunga pamwe nayo.
2. Omomukalo guni “aalumentu omulongo” haya ‘endele pamwe’ naagwayekwa?
2 Kunena nonando itashi vulika tu kale tu shi edhina lyomugwayekwa kehe kombanda yevi, * mboka ye na etegameno lyoku ka kala kombanda yevi, otaya vulu “okweendela pamwe” naagwayekwa. Ngiini mbela? Ombiimbeli oya ti kutya “aalumentu omulongo” “otaa kwata kekunka lyonguwo yomulumentu Omujuda, notaa ti: ‘Otse otwa hala okweendela pamwe nane; oshoka otse tu uvu, Kalunga e li pamwe nane.’” Movelise moka omwa popiwa Omujuda gumwe. Ihe oshitya “nane,” otashi ulike aantu ye vulithe pugumwe. Shika otashi ulike kutya Omujuda ngoka ke shi owala omuntu gumwe, ihe ota thaneke ongundu ayihe yaagwayekwa. Mboka kaaye shi aagwayekwa, ohaya longele Jehova pamwe naagwayekwa. Nonando ongawo, inaya tala ko aagwayekwa ye li aawiliki yawo, molwaashoka oye shi kutya Jesus oye owala Omuwiliki. — Mat. 23:10.
3. Omapulo geni taga ka yamukulwa moshitopolwa shika?
3 Kunena mokati kaapiya yaJehova omu na natango Aakriste aagwayekwa. Onkee ano, yamwe otashi vulika yi ipule omapulo taga landula: (1) Aagwayekwa oye na okwiitala ko ngiini? (2) Otu na okuungaunga ngiini naamboka haya li oshikwiila nokunwa omaviinu pEdhimbuluko? (3) Ngele omwaalu gwaamboka taya li oshikwiila nokunwa omaviinu pEdhimbuluko, ogwa ende tagu indjipala, mbela otu na okukala tatu ipula nasho? Oshitopolwa shika otashi ka yamukula omapulo ngoka.
AAGWAYEKWA OYE NA OKWIITALA KO NGIINI?
4. Elondodho lini tali adhika mAakorinto yotango 11:27-29, aagwayekwa ye na okwiipula muule kombinga yalyo, nomolwashike?
4 Aagwayekwa oye na okwiipula muule kombinga yelondodho ndyoka tali adhika mAakorinto yotango 11:27-29. (Lesha.) Omomukalo guni omugwayekwa ta vulu okulya oshikwiila nokunwa omaviinu pEdhimbuluko “pamukalo omwiinayi”? Ongele e shi ningi, ye ihaa kala metsokumwe nomithikampango dhaJehova dhopauyuuki. (Heb. 6:4-6; 10:26-29) Aagwayekwa oye shi kutya oye na okukala aadhiginini, ngele oya hala okupewa ‘ondjambi yesindano ndjoka Kalunga e ya ithanena megulu, molwaJesus Kristus.’ — Fil. 3:13-16.
5. Aakriste aagwayekwa oye na okwiitala ko ngiini?
5 Ombepo ondjapuki yaJehova, ohayi kwathele aapiya ye ya kale aaifupipiki, ihe haainenepeki. (Ef. 4:1-3; Kol. 3:10, 12) Onkee ano, aagwayekwa ihaya kala yi iwete ye vule yalwe. Oye shi kutya Jehova ihe ya pe ombepo ondjapuki oyindji, yi vulithe pwaandjoka ha pe aapiya ye yalwe. Ihaya dhiladhila kutya oye uvite ko oshili yOmbiimbeli ye vule yalwe. Ihaya lombwele nando omuntu kutya naye okwa gwayekwa, nokwa pumbwa okutameka okulya oshikwiila nokunwa omaviinu pEdhimbuluko. Pehala lyaashono, ohaya zimine neifupipiko kutya Jehova oye owala ha hiya aantu ya ye megulu.
6. Shi ikolelela kAakorinto yotango 4:7, 8, Aakriste aagwayekwa oye na okwiihumbata ngiini?
6 Nonando aagwayekwa ohaya kala ye uvite shi li uuthembahenda, sho ye na eithano lyomegulu, ihaya kala ya tegelela yalwe ya ungaunge nayo momukalo gwi ikalekelwa. (Fil. 2:2, 3) Oye shi wo kutya sho Jehova e ya gwayeke, ine shi tseyithila aantu yalwe. Onkee ano, omuntu ngoka a gwayekwa iha kala a kumwa, uuna yamwe itaaye shi itaale kutya ye omugwayekwa. Oha kala e shi kutya Ombiimbeli otayi tu lombwele kaatu kale hatu itaale mbala omuntu ngoka ta ti kutya Kalunga okwe mu pa oshinakugwanithwa shi ikalekelwa. (Eh. 2:2) Omukriste omugwayekwa, iha lombwele kehe ngoka ta tsakaneke kutya ye omugwayekwa, oshoka ina hala aantu ya gandje eitulomo kuye. Ihe shi itangele wo puyalwe. — Lesha 1 Aakorinto 4:7, 8.
7. Aagwayekwa oye na okuyanda shike, nomolwashike?
7 Aakriste aagwayekwa ihaya kala ye uvite kutya oye na owala okweendathana naagwayekwa ooyakwawo, onga ye li iilyo yongundu yontumba yi ikalekelwa. Ihaya kongo aagwayekwa ooyakwawo, opo ando ya kundathane kombinga yokugwayekwa kwawo, nenge ya kale haya tsakanene muungundu ya konakone Ombiimbeli pamwe. (Gal. 1:15-17) Ngele aagwayekwa oya kala haya ningi ngawo, nena egongalo itali ka kala lya hangana. Kungawo, otaya kala ye li ompinge nombepo ondjapuki, ndjoka hayi kwathele aapiya yaKalunga ya kale ye na ombili nuukumwe. — Rom. 16:17, 18.
AAGWAYEKWA OYE NA OKUUNGAUNGIWA NAYO NGIINI?
Katu na okuungaunga naagwayekwa nenge naamboka haya kwatele komeho, onga aanamadhina (Tala okatendo 8) *
8. Omolwashike twa pumbwa okukala twa kotoka kombinga yankene hatu ungaunga naamboka haya li oshikwiila nokunwa omaviinu pEdhimbuluko? (Tala wo enyolo lyopevi.)
8 Otu na okuungaunga ngiini naamwatate naamwameme aagwayekwa? Otashi ka kala sha puka, ngele otwa kala tatu gandja esimano lya pitilila komuntu gwontumba, nonando oku li omumwahe gwaKristus omugwayekwa. (Mat. 23:8-12) Ombiimbeli otayi tu ladhipike tu “holele eitaalo” lyaakuluntugongalo, ihe itayi tu lombwele tu ninge omuntu gwontumba omuwiliki gwetu. (Heb. 13:7) Odhoshili kutya Ombiimbeli oya ti kutya yamwe “oyi ilongela okusimanekwa.” Shika otashi wapa, molwaashoka “aadhiginini miilonga yawo” nohayi “ihepeke mokuuvitha nomokulonga aantu,” ihe hamolwaashoka ye li aagwayekwa. (1 Tim. 5:17) Ngele otwa kala tatu gandja unene eitulomo kaagwayekwa noku ya pa esimano lya pitilila, otashi vulika tu ya sithe ohoni. * Shoka nokuli oshiwinayi unene, otashi vulika tu ya ningithe ya kale ye na uuntsa. (Rom. 12:3) Kapu na nando ogumwe gwomutse ta ka hala okuninga sha, shoka tashi vulu okuningitha gumwe gwomaamwahe yaKristus aagwayekwa, a ninge epuko ndyoka lya kwata miiti! — Luk. 17:2.
9. Ongiini tatu vulu okuulika kutya otwa simaneka Aakriste aagwayekwa?
9 Ongiini tatu vulu okuulika kutya otwa simaneka mboka Jehova a gwayeka? Katu na oku ya pula kutya osha ende ngiini, opo ya gwayekwe. Shika oshinima shopaumwene, shoka kaatu na uuthemba woku shi tseya. (1 Tes. 4:11; 2 Tes. 3:11) Katu na okudhiladhila kutya aasamane yawo, aakulukadhi yawo, aavali yawo nenge yaandjawo nayo aagwayekwa. Omuntu iha thigulula etegameno lye lyoku ka kala megulu kuyaandjawo. Ohe li pewa kuKalunga. (1 Tes. 2:12) Otu na wo okuyanda okupula omapulo ngoka taga vulu okuuvitha nayi yalwe. Pashiholelwa, itatu ka pula omukulukadhi gwomumwatate omugwayekwa nkene e uvitile etegameno lye lyoku ka kala nomwenyo sigo aluhe kombanda yevi, kee li nomusamane gwe. Shimwe ishewe, otatu vulu okukala nuushili kutya muuyuni uupe, Jehova ota ka “kutitha iinamwenyo ayihe” nenge tu tye kehe shimwe shi na omwenyo. — Eps. 145:16.
10. Ongiini tatu vulu okwiigamena, ngele otwa yanda ‘okufundjaleka aantu’?
10 Ngele otwa kala hatu ungaunga naagwayekwa momukalo ngoka itaagu ulike kutya oya simana ye vule yalwe, kungawo otatu ki igamena wo tse yene. Ngiini mbela? Ombiimbeli otayi tu lombwele kutya aagwayekwa yamwe, otashi vulika kaaya tsikile okukala aadhiginini. (Mat. 25:10-12; 2 Pet. 2:20, 21) Ngele otwa yanda ‘okufundjaleka aantu,’ katu na esiku tu landule yalwe, nokuli naamboka aagwayekwa nenge mboka ye shiwike nawa nenge mboka ya longela Jehova uule womimvo odhindji. (Jud. 16) Kungawo, itatu ka etha po eitaalo lyetu muJehova nenge tu ethe po oku mu longela, ngele oya kala kaaye shi we aadhiginini nenge ya thigi po oshili.
MBELA OTU NA OKUKALA TATU IPULA NOMWAALU GWAAMBOKA HAYA LI OSHIKWIILA NOHAYA NU OMAVIINU?
11. Oshike sha kala tashi ningwa po, shi na ko nasha nomwaalu gwaamboka haya li oshikwiila nokunwa omaviinu pEdhimbuluko?
11 Uule womimvo, omwaalu gwaamboka ya kala taya li oshikwiila notaya nu omaviinu pEdhimbuluko, ogwa li gwa ende tagu shonopala. Ihe omimvo opo dha zi ko, omumvo kehe omwaalu ngoka ogwa ende tagu indjipala. Mbela otwa pumbwa okukala tatu ipula nasho? Aawe. Natu ka kundathaneni iinima yimwe ya simanenena, mbyoka tu na okukaleka momadhiladhilo.
12. Omolwashike kaatu na okwiipula kombinga yomwaalu gwaamboka haya li oshikwiila nohaya nu omaviinu pEdhimbuluko?
12 “Omuwa oku ya shi mboka ye.” (2 Tim. 2:19) Aamwatate mboka haya yalula omwaalu gwaamboka haya li oshikwiila nohaya nu omaviinu pEdhimbuluko, kaye shi kutya oolye shili ya gwayekwa, ihe Jehova oku ya shi. Onkee ano, omwaalu ngoka ohagu kala gwa kwatela mo mboka haya ti kutya yo aagwayekwa, nonando hasho. Pashiholelwa, yamwe mboka ya li haya li oshikwiila nokunwa omaviinu pEdhimbuluko, ihaye shi ningi we. Yalwe otashi vulika ye na uupyakadhi wopamadhiladhilo nowopamaiyuvo, mboka hawu ya ningitha ya dhiladhile kutya otaya ka pangela pamwe naKristus megulu. Odhoshili kutya katu shi naanaa kutya aagwayekwa yangapi ya thigala ko kombanda yevi.
13. Mbela Ombiimbeli oya popya kutya aagwayekwa yangapi taya ka adhika ko kevi, uuna uudhigu uunene wa tameke?
13 Miitopolwa oyindji kombanda yevi, otamu ka adhika aagwayekwa, sho Jesus te ke ya ila ya ye megulu. (Mat. 24:31) Ombiimbeli oya popya kutya momasiku gahugunina, kombanda yevi otaku ka hupa omwaalu omushona gwaagwayekwa. (Eh. 12:17) Ihe inayi popya kutya yangapi yomuyo taya ka adhika ko, uuna uudhigu uunene wa tameke.
Otu na okwiinyenga ngiini, uuna gumwe ta li oshikwiila nota nu omaviinu pEdhimbuluko? (Tala okatendo 14)
14. Ngaashi sha popiwa mAaroma 9:11, 16, oshike twa pumbwa okuuva ko kombinga yokuhogololwa kwaagwayekwa?
14 Jehova oye ha tokola kutya uunake ta hogolola aagwayekwa. (Rom. 8:28-30) Jehova okwa tameke okuhogolola aagwayekwa, konima yokuyumudhwa kwaJesus. Osha fa shi li ngeyi kutya Aakriste ayehe yashili mboka ya li ko omimvo 2 000 nasha dha ka pita, oya li ya gwayekwa. Momimvo adhihe ndhoka dha ka landula ko, oyendji yomwaamboka ya li tayi iti Aakriste, kaya li shili aalanduli yaKristus. Nonando ongawo, momimvo ndhoka, Jehova okwa li a gwayeke aantu aashona, mboka ya li Aakriste yashili. Oya li ya fa iilya mbyoka Jesus a ti kutya otayi ka kokela mumwe nomawu. (Mat. 13:24-30) Momasiku ngaka gahugunina, Jehova ota tsikile okuhogolola aantu mboka taya ka kala oshitopolwa shokangundu 144 000. * Onkee ano, ngele Kalunga okwa tokola okuhogolola yamwe yomuyo manga ehulilo inaali thika, katu na okukala twa limbililwa uunongo we. (Lesha Aaroma 9:11, 16.) * Otu na okukala twa kotoka, kaatu inyenge ngaashi aaniilonga mboka Jesus a popya mulimwe lyomomayele ge. Oya li ya tamanana kombinga yomukalo moka mwene gwawo a ungaunga naamboka ya li ya longo owili yahugunina. — Mat. 20:8-15.
15. Mbela aagwayekwa ayehe oye li oshitopolwa ‘shomupiya omudhiginini nomunandunge,’ ngoka a tumbulwa muMateus 24:45-47? Shi yelitha.
15 Haayehe mboka ye na etegameno lyoku ka kala megulu, ye li oshitopolwa ‘shomupiya omudhiginini nomunandunge.’ (Lesha Mateus 24:45-47.) Ngaashi owala sha li omimvo 2 000 nasha dha ka pita, Jehova naJesus otaya longitha aamwatate yomwaalu omushona, ya paluthe nenge ya longe oyendji. Omimvo 2 000 nasha dha ka pita, aashona owala yomAakriste aagwayekwa ya li ya longithwa ya nyole Omanyolo gopaKriste gOshigreka. Kunena, aashona owala yomAakriste aagwayekwa ye na oshinakugwanithwa shokupa oshigwana shaKalunga “iikulya pethimbo” lyo opala.
16. Oshike wi ilonga moshitopolwa shika?
16 Oshitopolwa shika oshe tu longa shike? Jehova okwa tokola okupa aantu oyendji yomoshigwana she omwenyo gwaaluhe kombanda yevi, nokupa wo okangundu kaamboka taya ka pangela pamwe naJesus, omwenyo gwomegulu. Jehova oha pe aapiya ye ayehe ondjambi kutya nduno “Omujuda” nenge “aalumentu omulongo,” nokwa tegelela ya vulike koompango dha faathana nokutsikila okukala aadhiginini. Ayehe oye na okukala aaifupipiki. Oye na oku mu longela nokukala ya hangana. Oye na wo okulonga nuudhiginini, opo ya kaleke ombili megongalo. Sho tatu ende tatu hedha popepi nehulilo, atuheni natu kale tatu longele Jehova nokulandula Kristus, tu li “oshigunda shimwe.” — Joh. 10:16.
^ okat. 5 Nuumvo, Edhimbuluko lyeso lyaKristus otali ka ningwa mEtiyali, 7 Apilili. Otu na okutala ko ngiini mboka haya li oshikwiila nokunwa omaviinu pEdhimbuluko? Mbela otu na okukala tatu ipula nomwaalu gwaamboka haya li oshikwiila nohaya nu omaviinu? Omapulo ngoka otaga ka yamukulwa moshitopolwa shika, sha kankamena kwaashoka shi li mOshungolangelo yaJanuali 2016.
^ okat. 2 Ngaashi sha popiwa mEpisalomi 87:5, 6, Kalunga otashi vulika monakuyiwa a holole omadhina gaayehe mboka taya pangele pamwe naJesus megulu. — Rom. 8:19.
^ okat. 8 Tala oshimpungu “Ohole ihayi holoka nayi,” mOshungolangelo yaJanuali 2016.”
^ okat. 14 Nonando Iilonga 2:33 otayi popi kutya ombepo ondjapuki oya li ya tililwa aantu okupitila muJesus, Jehova oye he ya hogolola.
^ okat. 14 Opo wu mone uuyelele wa gwedhwa po, tala “Omapulo ga za kaaleshi,” mOshungolangelo yOshiingilisa ye 1 Mei 2007.
EIMBILO 34 Enda muudhiginini
^ okat. 56 ETHANO: Natu tye ando omukalelipo gwokoombelewa dhetu oonene nomukadhi, oya gongalelwa kaantu taye ya thaneke poshigongi. Shika itashi ulike tuu okwaahe na esimaneko!
