1. Hadia nifaʼeleʼö Yehowa salua ba götöda iadaʼa?

IFAʼELEʼÖ Yehowa sanandrösa ba götöda iadaʼa, ”Dafulu niha, hadia lira fefu, li niha baero, zondraʼu ahe mbaru niha Yehuda si ha samösa, ba sangumaʼö: ’Faoga khömi, me no marongo, wa lö aefa-aefa khömi Lowalangi!’” (Zakh. 8:23, NW) ”Niha Yehuda” muʼamaedolagö niha si no ibayoini Yehowa faoma eheha niʼamoniʼö. Mufotöi göi ira ’iraono Gizaraʼeli khö Lowalangi’. (Gal. 6:16) ”Dafulu niha” muʼamaedolagö niha sangokhögö dötönafö faʼauri sagötö faʼara ba gulidanö. Aboto ba dödöra wa ifahowuʼö Yehowa niha nibayoini. Omuso göi dödöra me tola fao ira ba niha nibayoini ba wamosumange Yehowa.

2. Hadia nifalua zi ”dafulu niha” no mege, si ”fao” ba niha nibayoini?

² Lö taʼila haniha döi ero samösa niha Keriso si no mubayoini si so ba gulidanö iadaʼa. * Hewaʼae simanö, tola ”fao” khöra niha sangokhögö dötönafö faʼauri ba gulidanö. Hewisa lalania? Imane Sura Niʼamoniʼö wa ”dafulu niha” no mege ”zondraʼu ahe mbaru niha Yehuda si ha samösa, ba sangumaʼö: ’Faoga khömi, me no marongo, wa lö aefa-aefa khömi Lowalangi.’” Ba ayati daʼö, ha samösa niha Yehuda. Hizaʼi mufotöi khönia, ”khömi”. Daʼa zangoromaʼö wa niha Yehuda andrö tenga ha amaedola zi samösa niha, hizaʼi fefu niha Keriso nibayoini si so ba gulidanö. Niha si lö mubayoini, tola falulu fohalöwö ira ba niha Keriso si no mubayoini. Hewaʼae simanö, lö lawaʼö tödöra wa niha nibayoini zi tobali sondröniaʼö yaʼira. Aboto ba dödöra wa ha samösa Zondröniaʼö yaʼira yaʼia daʼö Yesu.​—Mat. 23:10.

3. Hadia manö wanofu-nofu nitutunö ba artikel daʼa?

³ Iadaʼa, so nasa niha nibayoini ba zi fasuida. Andrö, so ösa niha sanofu-nofu: (1) Hewisa zinangeania niha Keriso si no tebayoini ba wamaigi faʼaurira samösa? (2) Hewisa zinangeania  mbua-buada ba niha si manga roti hegöi samadu agu ba ngaluo Wanörö Tödö? (3) Hadia moguna so khöda waʼaombö dödö na itugu monönö niha samalua daʼö? Mututunö wanema linia ba artikel daʼa.

4. Ba 1 Korindro 11:27-29 hadia wamangelama sinangea laʼangeragö ira niha Keriso si no tebayoini, ba hadia mbörö?

⁴ Niha Keriso si no tebayoini moguna lahaogö laʼangeragö wamasugi ba dödö si so ba 1 Korindro 11:27-29. (Baso.) Moloʼö ayati daʼa, na lö iʼoʼö goroisa Lowalangi niha Keriso si no tebayoini ”tenga sinangea” ia ba wemanga roti hegöi ba wamadu agu ba ngaluo Wanörö Tödö. (Heb. 6:4-6; 10:26-29) Aboto ba dödö niha Keriso si no tebayoini wa moguna lö faröi ira enaʼö lasöndra ’mbuala moroi khö Lowalangi, yaʼia daʼö fogaoni ba zorugo khö Keriso Yesu’.​—Fil. 3:13-16.

5. Hewisa zinangeania niha Keriso si no tebayoini ba wamaigi faʼaurira samösa?

⁵ Eheha niʼamoniʼö moroi khö Yehowa zanolo ono mbanuania enaʼö laʼokhögö wangide-ngideʼö, tenga fayawasa. (Ef. 4: 1-3; Kol. 3:10, 12) Andrö, böi so ba dödö niha Keriso si no tebayoini, wa abölö tohude ira moroi ba zamosumange Yehowa tanö böʼö. Aboto ba dödöra wa lö abölö tohude wameʼe Yehowa khöra eheha niʼamoniʼö, ha börö me no tebayoini ira. Lö hadöi ba wangera-ngerara wangumaʼö, wa abölö aboto ba dödöra Daromali Lowalangi moroi ba niha böʼö. Ba lö göi lafatunö ba niha böʼö wa no ibayoini ira Lowalangi, ba moguna laʼa roti ba labadu agu na mufalua Wanörö Tödö. Hizaʼi, si fao fangide-ngideʼö lafaduhuʼö wa ha Yehowa zinangea mogaoni zi samösa niha weʼamöi ba zorugo.

6. Moloʼö 1 Korindro 4:7, 8, hewisa zinangeania gamuata niha Keriso si no tebayoini?

⁶ Ba wamaigi niha Keriso si no tebayoini, fogaoni nibeʼe khöra weʼamöi ba zorugo no töi si sökhi. Hewaʼae simanö, lö latötöna enaʼö lafosumange ira niha böʼö. (Fil. 2:2, 3) Aboto göi ba dödöra, me ibayoini ira Yehowa, samösa lö niha sangila daʼö. Andrö, lö tokea dödö niha Keriso si no tebayoini, na lö iʼanemaiʼö faduhu dödö niha böʼö wa no tebayoini ia. Laʼila wa no ibeʼe khöda wamangelama Sura Niʼamoniʼö enaʼö lö iʼanemaiʼö tafaduhusi tödö na so niha sangumaʼö wa no itema halöwö si tohude moroi khö Lowalangi. (Fam. 2:2) Börö me lö omasi ira nisuno-suno, niha Keriso si no tebayoini, lö ifatunö ba niha sawena falukha khönia wa no tebayoini ia, ba lö ibaliʼö fayawasania daʼö ba niha böʼö.​—Baso 1 Korindro 4:7, 8.

7. Hadia zi tebai lafalua ira niha Keriso nibayoini, ba hadia mbörö?

⁷ Niha Keriso si no tebayoini, lö lahorigö ginötöra fariawö ba niha nibayoini tanö böʼö. Na lafalua daʼö, hulö no tefarahu ira ba zi sambua angowuloa si tohude. Lö laʼalui niha nibayoini tanö böʼö ba wanutunö dötönaföra. Ba lö göi lafazökhi sambua gangowuloa si fao ba niha nibayoini tanö böʼö ba wamahaʼö yaʼira ba Zura Niʼamoniʼö. (Gal. 1:15-17) Na lafalua daʼö, lö fahasara dödö ba mbanua niha Keriso. Tola manö latimbagö geheha niʼamoniʼö, irege lö faʼahono dödö hegöi fahasara dödö ba nono mbanua Yehowa.​—Rom. 16:17, 18.

8. Hana wa moguna taʼangenanöi laguda khö ndra talifusöda si manga roti ba samadu agu ba Wanörö Tödö Faʼamate Yesu? (Faigi nisura ba gahe zura.)

⁸ Hewisa zinangeania laguda khö ndra talifusöda si no mubayoini? Böi tasuno-suno sibai zi samösa niha, hewaʼae na yaʼia  andrö talifusöda niha Keriso si no mubayoini. (Mat. 23:8-12) Me idunö-dunö khöda Sura Niʼamoniʼö sanandrösa khö ndra satua sokubaloi, ifarou dödöda ba ’woloʼö famatira’. Hizaʼi, lö nifarounia yaʼita enaʼö tabaliʼö niha gulidanö tobali sondröniaʼö yaʼita. (Heb. 13:7) Sindruhu sa, wa no iwaʼö khöda Sura Niʼamoniʼö wa so ösa niha sinangea ’tafosumange dua winaeta’. Hizaʼi, moguna tafalua daʼö börö me ’sökhi wondröniaʼöra’, ba ’erege göi dödöra ba wangombakha hegöi ba wamahaʼö Taromali Lowalangi’, tenga börö me niha nibayoini ira. (1 Tim. 5:17) Na talafo tasuno-suno mazui taʼameʼegö tödö sibai niha Keriso si no tebayoini, hulö no taʼailasi ira. * Tola manö nasa tumbu ba dödöra waʼasiliyawa. (Rom. 12:3) Tatu manö, lö omasi ita na teʼala ndra talifusöda niha Keriso nibayoini!​—Luk. 17:2.

9. Hewisa wangoromaʼöda wa taʼosinangegö niha Keriso nibayoini?

⁹ Hewisa wangoromaʼöda wa taʼosinangegö niha nibayoini Yehowa? Lö tasofu-sofu khöra hewisa me tebayoini ira. Ha yaʼira zangila daʼö, tenga sinangea taʼila. (1 Tes. 4:11; 2 Tes. 3:11) Lö göi tawaʼö wa no tebayoini woʼomora, satuara, mazui ösi nomora tanö böʼö. Tenga moroi ba nösi nomonia isöndra dötönafö faʼauri ba zorugo. Hizaʼi isöndra dötönafö daʼö moroi khö Lowalangi. (1 Tes. 2:12) Aefa daʼö, moguna göi tatimbagö ba wameʼe fanofu si tola mangafökhöiʼö dödö niha böʼö. Duma-dumania, lö tasofu khö woʼomo dalifusöda si no tebayoini, hewisa dödönia na ikhalaigö waʼauri ba gulidanö sagötö faʼara, hewaʼae lö fao ia khö woʼomonia. Faduhu dödöda wa ba gulidanö si bohou dania, hasambalö ’iʼabusoiʼö fefu zauri somasi niha’ Yehowa.​—Zin. 145:16.

10. Hana wa no tarorogö waʼaurida samösa na lö talafo tafosumange niha nibayoini?

¹⁰ Na lö talafo tafosumange niha Keriso nibayoini, no tarorogö waʼaurida samösa. Hadia mbörö? Iʼombakhaʼö khöda Sura Niʼamoniʼö wa so ösa niha Keriso nibayoini si faröi. (Mat. 25:10-12; 2 Fet. 2:20, 21) Hewaʼae na yaʼira andrö niha nibayoini, niha si tehöngö, mazui niha si no ara ba wamosumange Yehowa, lö ’talafo tasuno’ ira mazui tatara lahera. (Yud. 16) Na faröi ira mazui laröi gangowuloa, lö taya wamatida khö Yehowa ba lö tebulö tafosumange ia.

11. Hadia zalua barö-barö daʼa ba niha si manga roti hegöi samadu agu ba Wanörö Tödö?

¹¹ Itugu alö waʼato niha nibayoini si manga roti ba samadu agu ba Wanörö Tödö faʼamate Yesu ba zi hauga fakhe. Hizaʼi, barö-barö daʼa, itugu monönö zui waʼatora ero röfi. Hadia moguna aombö dödöda? Löʼö. Datafaigi hadia manö mbörönia.

12. Hana wa lö moguna aombö dödöda na itugu ato niha si manga roti hegöi samadu agu ba Wanörö Tödö?

¹² ”Iʼila Yehowa haniha dana khönia.” (2 Tim. 2:19) Tenga simane Yehowa, lö sangila haniha zindruhunia niha nibayoini andrö, hewaʼae na so dalifusöda sangerai hawaʼato niha si manga roti ba samadu agu ba Wanörö Tödö. Ba gotaluara andrö, so zangumaʼö wa no tebayoini ira, sindruhunia sa löʼö. Duma-dumania, so ösa niha zi toʼölö wemanga roti hegöi samadu agu, ba gafuriatania laböhöli. Tanö böʼönia, so zofökhö fangera-ngera ba lawalingagö fao ira khö Keriso mamatörö ba zorugo. Andrö,  lö taʼila sibai hawaʼato niha nibayoini si so nasa ba gulidanö.

13. Hadia no ifatunö Sura Niʼamoniʼö hawaʼato niha Keriso nibayoini si toröi ba gulidanö na tebörögö wamakao sabölö-bölö?

¹³ Hasambalö so niha nibayoini ba zi sagörö ulidanö na tohare Yesu wolohe yaʼira ba zorugo. (Mat. 24:31) Itutunö Sura Niʼamoniʼö wa sagötö ngaluo safuria, so sambua ngawawa side-ide niha nibayoini si toröi ba gulidanö. (Fam. 12:17) Hizaʼi, lö iʼombakhaʼö Sura Niʼamoniʼö hawaʼato niha Keriso nibayoini si toröi ba gulidanö na tebörögö wamakao sabölö-bölö.

14. Ba Roma 9:11, 16, hadia wamahaʼö si tola tahalö sanandrösa ba wamili niha Keriso nibayoini?

¹⁴ Yehowa zangai angetula hawaʼara ifili niha nibayoini. (Rom. 8:28-30) Ibörötaigö ifili Yehowa niha nibayoini me no aefa tesusugi Yesu. Ba abad siföföna, hulö no tebayoini fefu niha Keriso faoma eheha niʼamoniʼö. Ngaotu fakhe aefa daʼö, ato niha zangumaʼö wa yaʼira andrö niha Keriso, hizaʼi sindruhunia lö laʼoʼö Keriso. Hewaʼae simanö, so ösa niha Keriso sindruhu nibayoini Yehowa. Hulö simane niwaʼö Yesu, yaʼira andrö hulö gandru ba gotalua goʼo. (Mat. 13:24-30) Ba ngaluo safuria, lö iböhöli Yehowa ba wamili niha si 144,000. * Tobali, na so ösa ba gotaluara nifili Lowalangi lö ara fatua lö tohare wamakao sabölö-bölö, tatu manö lö saʼae manofu-nofu dödöda ba gangetulania andrö. (Baso Roma 9:11, 16.) * Moguna mangelama ita enaʼö lö tafalua simane nifalua  ndra sohalöwö nitutunö Yesu ba gamaedolania. Lö fao dödöra ba nifalua zokhö yaʼira ba niha safuria mohalöwö.​—Mat. 20:8-15.

15. Hadia tefarahu fefu niha Keriso nibayoini ba ngawawa ”zawuyu si lö faröi ba satua-tua” simane nisura ba Mataiʼo 24:45-47? Tutunö.

¹⁵ Lö fefu niha nibayoini sangokhögö dötönafö faʼauri ba zorugo tobali ’sawuyu si lö faröi; ba satua-tua’. (Baso Mataiʼo 24:45-47.) Simane me abad siföföna, ha maʼifu niha Keriso nibayoini niʼogunaʼö Yehowa hegöi Yesu, ba wameʼe gö mazui ba wamahaʼö niha sato. Me abad siföföna, lö ato niha Keriso nibayoini niʼogunaʼö ba wanura Buku Niʼamoniʼö Yunani Niha Keriso. Ba götöda andre, lö ato göi niha Keriso nibayoini nibeʼe noro dödö ba wameʼe ’gö ba ginötö si tefaudu’ ba nono mbanua Lowalangi.

16. Hadia wamahaʼö si tola öhalö moroi ba artikel daʼa?

¹⁶ Hadia wamahaʼö si tola tahalö moroi ba artikel daʼa? No ihalö gangetula Yehowa ba wameʼe faʼauri si lö aetu ba gulidanö ba nono mbanuania. So göi ösa nono mbanuania si fao awö Yesu ba wamatörö ba zorugo, ibeʼe khöra dötönafö faʼauri ba zorugo. Ifahowuʼö fefu zamosumange yaʼia Yehowa, yaʼia daʼö ”niha Yehuda si ha samösa” hegöi zi ”dafulu niha” si so ba wamaʼeleʼö Zakharia. Omasi göi Yehowa enaʼö lö faröi ira khönia, ba iʼandrö khöra enaʼö laʼoʼö goi-goi si fagölö. Moguna so khöra wangide-ngideʼö. Moguna fao ira ba wamosumange Yehowa si fao fahasara dödö. Baero daʼö, moguna göi laforege ba wangehaogö fahasara dödö ba mbanua niha Keriso, börö me no itugu ahatö wamakao sabölö-bölö. Andrö, yalötaböhöli wamosumange Yehowa ba taʼoʼö Keriso tobali ”sambawa nikubaloi”.​—Yoh. 10:16.