OMWATSI W’ERIGHA 5
Tukendighenda Nenyu
“Uleke tughende haghuma nenyu, kusangwa twabiryowa ngoko oMungu ali haghuma nenyu.”—ZEK. 8:23, NWT.
OLWIMBO 26 Ningye mwakolera
EBIKENDIKANIBWAKO *
Esindi mbuli (“abandu ikumi”) bawite olusunzo lw’eriramya Yehova haghuma n’abahirirwe kw’amaghuta (“Omuyuda”) (Lebaya enungu 1-2)
1. Yehova mwabugha ati oko mughulu wetu hangabereki?
YEHOVA mwabugha kera oko mughulu wetu ati: “Abandu ikumi abakalua oko bihanda by’obuli mubughe, basyahamba oko musike w’olukimba lw’omuyuda bati, ‘Uleke tughende haghuma nenyu, kusangwa twabiryowa ngoko oMungu ali haghuma nenyu.’” (Zek. 8:23, NWT) Hano, “Omuyuda” akasosekanaya abandu abo Yehova abirihira kw’amaghuta erilabira ekirimu kiwe kibuyirire. Kandi bakahulawa mo ‘Israeli y’oMungu.’ (Gal. 6:16) “Abandu ikumi” bakasosekanaya abandu abawite amaha w’erisyikala oko kihugho ko kera na kera. Basi ngoko Yehova abiritsumula ekikuto ky’abahirirwe kw’amaghuta abo neryo bakalangira ngoko ni lukengerwa okwibo eriramya oMungu haghuma nabo.
2. “Abandu ikumi” ‘bakaghenda haghuma’ n’abahirirwe kw’amaghuta bati?
2 N’omo sikitokekene eriminya erina ly’obuli mughuma w’oko abahirirwe kw’amaghuta abali oko kihugho munabwire, * abandu abawite amaha w’erisyikala oko kihugho “banganaghenda haghuma” n’abahirirwe kw’amaghuta. Bati? EBiblia yikabugha yiti “abandu ikumi” ‘bangahambire oko musike w’olukimba lw’Omuyuda bati, ‘‘Uleke tughende haguma nenyu, kusangwa twabiryowa ngoko oMungu ali haghuma nenyu.” Erisako ly’eBiblia likanirye oko Muyuda mughuma. Aliwe ekinywa “nenyu” kandi “nenyu” bikanirye oko bandu bangyi kulenga omughuma. Ekyo kikanganaya ngoko Omuyuda oyu simundu mughuma musa aliwe akasosekanaya ekikuto kyosi ky’abahirirwe kw’amaghuta. Abatahirirwe kw’amaghuta bakakolera Yehova haghuma n’abahirirwe kw’amaghuta. Aliwe, sibalilangira abahirirwe kw’amaghuta mo basondoli babo, basi ngoko Yesu yo musondoli wabo.—Mat. 23:10.
3. Omwatsi ono akendisubirya oko mabulyo wahi?
3 Okw’ihika munabwire hakine abahirirwe kw’amaghuta omo katikati k’abaghombe b’oMungu, neryo abandu banganayibulya bati: (1) Abahirirwe kw’amaghuta batolere ibayilangira bati? (2) Litolere itwakolera tuti abakalya oko mukati n’erinywa oko divai omughulu w’eryibuka oluholo lwa Kristo? (3) Linatolere iwahangya-hangya kundi emighanzo y’abakalya oko mukati n’erinywa oko divai omughulu w’eryibuka oluholo lwa Kristo inemulola embere omwikanya? Omwatsi ono akendisubirya oko mabulyo ayo.
ABAHIRIRWE KW’AMAGHUTA BATOLERE IBAYILANGIRA BATI?
4. Ni rihano lyahi eliri omo 1 Abanya Korinto 11:27-29 eryo abahirirwe kw’amaghuta batolere ibalengekaniako, kandi busanaki?
4 Abahirwe kw’amaghuta batolere ibalengekania kutsibu oko rihano eliri omo 1 Abanya Korinto 11:27-29. (Soma.) Omundu oyuhirirwe kw’amaghuta anganalya oko mukati n’erinywa oko divai ‘isyatolere.’ Ati? Anganakola ekyo amabya imwalya oko mukati n’erinywa oko divai kandi ini mundu oyutasikirye esyokanuni sya Yehova. (Ebr. 6:4-6; 10:26-29) Abahirirwe kw’amaghuta banasi ngoko batolere ibasighala bataleghula bamanza bati basyabana ‘oluhembo lw’eribirikirwa ly’endata, ery’oMungu omo Kristo Yesu.’—Fil. 3:13-16.
5. ABakristo abahirirwe kw’amaghuta batolere ibayilangira bati?
5 Ekirimu kibuyirire kya Yehova kikawatikaya abaghombe biwe eribya bandu abakayibombeka, butsira abakayiheka. (Efe. 4:1-3; Kol. 3: 10, 12) Okw’ekyo abahirirwe kw’amaghuta sibaliyilangira nga buwene kulenga abandi. Banasi ngoko sibughambu Yehova akaha abahirirwe kw’amaghuta b’ekirimu kibuyirire kinene kulaba ekyo akaha abandi baghombe biwe. Sibaliyilangira bati basi eBiblia yo ndeke kulenga abandi. Kandi sibalibwira oghundi mundu wosi-wosi bati naye abirihirwa kw’amaghuta neryo litolere inyatsuka erirya oko mukati n’erinywa oko divai ekiro ky’eryibuka oluholo lwa Kristo. Aliwe, balighire ngoko ni Yehova musa yukabirikira abandu eriya elubula.
6. Erikwamana na 1 Abanya Korinto 4:7, 8, aBakristo abahirwe kw’amaghuta batolere ibayiwata bati?
6 N’omo abahirirwe kw’amaghuta basi ngoko ni lukengerwa eribikirwa eriya elubula, sibalilengekanaya bati litolere abandi ibakolerebo ng’abakulu. (Flp. 2:2, 3) Kandi bakaminya ngoko omughulu Yehova abahira kw’amaghuta, mwataleka oghundi mundu wosi-wosi aminye oko omwatsi oyo. Neryo omundu oyuhirirwe kw’amaghuta syalisweka abandi bamatendikirirya kwenene ngoko abirihirwa kw’amaghuta. Akaminya ngoko eBiblia yikatubwira yiti isitwikiriraya luba-luba omundu oyukabugha ati oMungu abirimuha akasi k’olukengerwa. (Erib. 2:2) Butsira erisonda erilangirika n’abandu, omundu oyuhirirwe kw’amaghuta syangabwira abo akahindana nabo engendo y’erimbere ngoko ahirirwe kw’amaghuta. Kandi syangayihalamba ahali abandi busana n’ekyo.—Soma 1 Abanya Korinto 4:7, 8.
7. Abahirirwe kw’amaghuta batolere ibayihighula okwikolaki, kandi busanaki?
7 ABakristo abahirirwe kw’amaghuta sibalilengekanaya bati batolere erilabya endambi n’abandi abahirirwe kw’amaghuta basa, neryo ibabya nga bawite akatunga kabo-kabo. Sibalirondaya abandi abahirirwe kw’amaghuta batoke erikania okw’ihirwa kw’amaghuta lyabo kutse erikola akatunga kabo-kabo k’erigha eBiblia. (Gal. 1:15-17) Abahirirwe kw’amaghuta bamakola emyatsi ng’eyo, endeko siyangabya omo bughuma. Ibamakola omwatsi ow’asighene n’erianza ry’ekirimu kibuyirire, ekikawatikaya abandu b’oMungu eribya n’obuholo n’eribya omo bughuma.—Rom. 16:17, 18.
LITOLERE ABAHIRIRWE KW’AMAGHUTA IBAKOLERWA BATI?
Isitwakolera abahirirwe kw’amaghuta kutse omundu wosi-wosi oyuwite omubírí w’eritusondola nga ni bandu b’olukengerwa (Lebaya enungu 8) *
8. Busanaki litolere uwayiteghererya ngoko ukakolera abakalya oko mukati n’erinywa oko divai omughulu w’eryibuka oluholo lwa Kristo? (Lebaya n’ebinywa ebiri ahikwa.)
8 Litolere itwakolera tuti abaghala n’abali betu abahirirwe kw’amaghuta? Si kyuwene eritsemera omundu yo kalengyo n’omo angabya mulikyabo Kristo oyuhirirwe kw’amaghuta. (Mat. 23:8-12) Omughulu eBiblia yikakanaya oko basyakulu, yikatubwira yiti “itw’igha obwikirya bwabo” aliwe siyiritubwira yiti tuyire omundu wosi-wosi mo musondoli wetu. (Ebr. 13:7) Kwenene eBiblia yikabugha yiti abandu balebe “batolere erihembwa kabiri.” Ekyo ni busana “bakasondola ndeke” kandi “bakakola kutsibu omubiri w’eritulira,” aliwe si busana bahirirwe kw’amaghuta. (1 Tim. 5:17) Twamaha abahirirwe kw’amaghuta b’olukengerwa olulengire kateho, itwanganaleka ibayowa muhanda. * Eky’obulighe kutsibu, twanganaleka ibayiheka. (Rom. 12:3) Sihali n’omundu n’omughuma omo kati-kati ketu oyo wanganza erikola ekindu kyosi-kyosi ekyangaleka omulikyabo Kristo oyuhirirwe kw’amaghuta inyakola erilolo erikalire ng’eryo!—Luka 17:2.
9. Twangakangania tuti ngoko tusikirye aBakristo abahirirwe kw’amaghuta?
9 Twangakangania tuti ngoko tusikirye abandu abo Yehova abirihira kw’amaghuta? Sitwangabulya nga bahirawa kw’amaghuta bati. Oyo ni mwatsi w’omundu iyuwene, situwite ehamuli y’erisonda eriminya kugho. (1 Tes. 4:11; 2 Tes. 3:11) Kandi situlilengekanaye tuti alinga abiba kutse abakali babo, ababuti babo kutse abandi bandu b’omo kihanda kyabo nabo bahirirwe kw’amahuta. Amaha w’erisyaya elubula si mwandu. Omundu akabana amaha ayo erilua oko Mungu. (1 Tes. 2:12) Litolere itwayikakirya eribulya amabulyo awangahutalya abandi. Eky’erileberyako, sitwangabulya omukali w’omughala wetu oyuhirirwe kw’amaghuta ng’akalangira ati amaha w’erisyikala kera na kera oko kihugho butsira iba wiwe. Twanganikirirya butsir’itika-tika ngoko omo kihugho kihya-kihya Yehova “akendisyaghutya obwagha bw’abosi.”—Esyo. 145:16.
10. Tukayiteghaya tuti itwibene-bene omughulu tukayikakiraya “okwitsemera abandu kalengyo”?
10 Twamatendikolera abahirirwe kw’amaghuta nga ni b’olukengerwa kulenga abandi, tukabya itukayiteghaya itwibene-bene. Tuti? EBiblia yikatubwira yiti, abahirirwe kw’amaghuta balebe banganataluka erisighala bataleghula. (Mat. 25:10-12; 2 Pet. 2:20, 21) Aliwe twamayihighula “okwitsemera abandu kalengyo,” isitwendikwama n’ahake abandi bandu, n’omo bangabya abahirirwe kw’amaghuta kutse abasibwe kutsibu kutse ababirikolera Yehova omo mughulu muli. (Yuda 16) Neryo, bamabileghula kutse bamalua omo ndeko, obwikirirya bwetu oko Yehova sibwangakeha kutse sitwangaleka erimukolera.
EMIGHANZO Y’ABAKALYA OKO MUKATI N’ERINYWA OKO DIVAI YANGANATUHANGYA-HANGYA?
11. Emighanzo y’abakalya oko mukati n’erinywa oko divai omughulu w’eryibuka oluholo lwa Kristo yabiribya yiti?
11 Omo myaka mingyi, emighanzo y’abakalya oko mukati n’erinywa oko divai omughulu w’eryibuka oluholo lwa Kristo yabya yikakeha. Aliwe, omo myaka ya lino-lino, emighanzo eyo yabiritsuka erikanya obuli mwaka. Ekyo kyanganatuhangya-hangya? Iyehe. Tukanaye oko myatsi milebe eyo tutolere itwibuka.
12. Busanaki emighanzo y’abakalya oko mukati n’erinywa oko divai omughulu w’eryibuka oluholo lwa Kristo siyangatuhangya-hangya?
12 ‘Yehova anasi abandu buwe.’ (2 Tim. 2:19) Abaghala betu abakaghanza abakalya oko mukati n’erinywa oko divai omughulu w’eryibuka oluholo lwa Kristo sibaliminya oko kwenene nga nindi yuhirirwe kw’amaghuta, aliwe Yehova anasi. Neryo, emighanzo eyo inemo n’abakalengekanaya bati babirihirwa kw’amaghuta, kyesi iyehe. Eky’erileberyako, abandu balebe ababya bakalya oko mukati n’erinywa oko divai kera, babirileka. Abandi, busana n’erilwala omo bwenge kutse eriaghalibwa omo mutima, banganalengekania bati bakendisyatabala haghuma na Kristo elubula. Oko kwenene, lino sitwasi abahirirwe kw’amaghuta nga ni bangahi oko kihugho.
13. EBiblia yikanabugha nga hakendisyabya abahirirwe kw’amaghuta bangahi oko kihugho omughulu obulighe bunene bukendisyatsuka?
13 Hakendisyabya abahirirwe kw’amaghuta omo biharo bingyi by’ekihugho omughulu Yesu akasyasyahekabo eriya elubula. (Mat. 24:31) EBiblia yikabugha yiti omo biro by’enduli, hakendisyabya abahirirwe kw’amaghuta balebe abakasyabya ibakine oko kihugho. (Erib. 12:17) Aliwe siyiribugha nga hakasyabya ihakine abahirirwe kw’amaghuta bangahi oko kihugho omughulu obulighe bunene bukendisyatsuka.
Twangayira tuti omundu mulebe amalya oko mukati n’erinywa oko divai omughulu w’eryibuka oluholo lwa Kristo? (Lebaya enungu 14)
14. Ngoko kisakire omo Abanya Roma 9:11, 16, litolere itwaminyaki oko mwatsi w’erisombolwa ly’abahirirwe kw’amaghuta?
14 Yehova yukaminya omughulu w’erisombola ab’erihira kw’amaghuta. (Rom. 8:28-30) Yehova mwatsuka erisombola abahirirwe kw’amaghuta enyuma sy’erilubuka lya Yesu. Alinga aBakristo bosi b’ekwenene b’oko kighonye ky’erimbere mubahirwa kw’amaghuta. Omo myaka eyakwama, abandu bangyi oko ababya bakayihalamba bati ni Bakristo, sibabya bakakwama Kristo oko kwenene. N’omo byanabya bitya, omo myaka eyo, Yehova mwahira amaghuta w’oko bandu bake ababya Bakristo b’ekwenene. Babya ng’engano eyo Yesu abugha ati yangalasire haghuma n’ebiti. (Mat. 13:24-30) Omo biro by’enduli, Yehova anemulola embere erisombola abandu abakasyabya baghuma b’oko 144 000. * Neryo oMungu amabiyisogha erisombola abandu balebe bakubo hakuhi kutsibu n’enduli, isitwabya n’eritika-tika oko menge wiwe. (Soma Abanya Roma 9:11, 16.) * Litolere itwayiteya isitwakola nga bahingyi abo Yesu akanayako omo musyo mughuma. Mubayilungumula busana n’ekyo omwenye ririma akolera abatsuka erikola omo syosaha sy’erigholo-gholo.—Mat. 20:8-15.
15. Abahirirwe kw’amaghuta bosi nina baghuma b’oko “omughombe mutaleghula n’ow’amenge,” oyukanibweko omo Matayo 24:45-47? Kanaya.
15 Si ba bosi abawite amaha w’erisyikala elubula bo baghuma b’oko “mughombe mutaleghula n’ow’amenge.” (Soma Matayo 24:45-47.) Ngoko byanabya oko kighonye ky’erimbere, munabwire Yehova na Yesu banemukolesya abaghala betu bake kutsibu erilisya, n’erikangirirya abangyi. ABakristo abahirirwe kw’amaghuta bake basa bo bakolesibawa erihandika Amasako w’eKigiriki w’eKikristo. Munabwire, aBakristo abahirirwe kw’amaghuta bake bo bawite akasi k’eriha abandu b’oMungu “b’akalyo oko ndambi eyitolere.”
16. Wamighaki omo mwatsi ono?
16 Twamabighaki omo mwatsi ono? Yehova mwayisogha eriha abandu bangyi b’oko bandu biwe engebe y’erikota oko kihugho, n’engebe omo lubula oko bake abakasyatabala haghuma na Yesu. Yehova akahemba abaghombe biwe bosi—“Omuyuda” nibya “n’abandu ikumi”—kandi akasaba abosi erikwama ebyalayiro bighumerera n’erisighala bataleghula. Abosi batolere eribya bandu abakayikehaya. Abosi batolere erimukolera haghuma n’omo bughuma. Kandi abosi batolere ibayikasa eriwatikya endeko yibyemo obuholo. Kundi tuli hakuhi n’enduli, tuyikase itwe bosi erikolera Yehova n’erikwama Kristo ‘ng’obutsunga bughuma’.—Yoa. 10:16.
^ par. 5 Omo mwaka ono tukendyibuka oluholo lwa Kristo omo kiro 7 oMwisi 4 omo kiro kye pili eky’eyenga. Litolere itwalangira tuti abakalya oko mukati n’erinywa oko divai? Kyanganatukenderya kundi emighanzo y’abakalya oko mukati n’erinywa oko divai yinemulola embere erikanya? Tukendisubirya oko mabulyo ayo omo mwatsi ono, owaseghemere oko ghundi mwatsi owasa omo Munara wa Mulinzi w’oMwisi 1, 2016.
^ par. 2 Erikwamana n’Esyonyimbo 87:5, 6, alinga omo biro ebikasa, oMungu akasyabisula amena w’abakasyabya ibanemutabala na Yesu omo lubula.—Abanya Roma 8:19.
^ par. 8 Lebaya akasanduku “Upendo ‘Haujiendeshi Bila Adabu.’” omo Munara wa Mulinzi, w’oMwisi 1, 2016.
^ par. 14 N’omo erisako ry’Emibiri 2:33 likakanganaya ngoko ekirimu kibuyirire kikutawa erilabira Yesu, Yehova yukabirikira obuli mundu.
^ par. 14 Wamasonda eriminya emyatsi mingyi, lebaya “Maswali kutoka kwa wasomaji” omo Mnara wa Mlinzi w’ekiro 1 oMwisi 5, 2007.
OLWIMBO 34 Erilendera omo butaleghula
^ par. 56 ERIKANIA OKO PITSA: Terilengekania omutumwa w’ebiro ngulu n’omukali wiwe ibabiritimbwako n’abandu abakabahamba esyofoto oko muhindano munene w’ekiharo. Ekyo ka kikaleta esisoni!
