1. Jehofa o ile a bolela’ng e sa le pele ka mehla ya rena?

JEHOFA o ile a bolela e sa le pele ka mehla ya rena gore: “Batho ba lesome bao ba tšwago bathong ba maleme ka moka ba tla itshwarelela morumong wa seaparo sa Mojuda, ba re: ‘Re tla sepela le lena ka gobane re kwele gore Modimo o na le lena.’” (Sak. 8:23) Temaneng ye, “Mojuda” o swantšhetša batho bao Modimo a ba tloditšego ka moya o mokgethwa. E bile ba bitšwa “Isiraele ya Modimo.” (Bagal. 6:16) “Batho ba lesome” ba swantšhetša batho bao ba nago le kholofelo ya go tlo phela ka mo go sa felego mo lefaseng. Batho ba bao ba tlago go phela mo lefaseng ba a tseba gore Modimo o kgethile batlotšwa, gomme ba bona e le tokelo go hlankela Modimo gotee le bona.

2. “Batho ba lesome” ba “sepela” bjang le batlotšwa?

² Le ge lehono * go sa kgonege gore re tsebe batlotšwa ka moka ka maina, bao ba nago le kholofelo ya go tlo phela mo lefaseng ba ka kgona go “sepela le” bona. Ba ka kgona bjang? Beibele e re “batho ba lesome” ba be ba tla “itshwarelela morumong wa seaparo sa Mojuda, ba re: ‘Re tla sepela le lena ka gobane re kwele gore Modimo o na le lena.’” Karolo ya mathomo ya temana ye e bolela ka Mojuda o tee. Eupša karolo ya bobedi e diriša lentšu “lena.” Se se bontšha gore Mojuda yo ga se  motho o tee, eupša o swantšhetša batlotšwa ka moka. Bakriste bao e sego batlotšwa ba hlankela Modimo gotee le batlotšwa. Eupša Bakriste ba, ga ba tšee batlotšwa e le baetapele ba bona ka gobane ba a tseba gore Jesu ke Moetapele wa bona.—Mat. 23:10.

3. Re tlo kwa dikarabo tša dipotšišo dife sehlogong se?

³ Ka ge lehono go sa na le batlotšwa mo lefaseng, ba bangwe ba rena re ka ipotšiša gore: Batlotšwa ba swanetše go itebelela bjang? Re swanetše go lebelela bjang bao ba jago Segopotšong? Na re swanetše go tshwenyega ge palo ya bona e tšwela pele e gola? Re tlo kwa dikarabo tša dipotšišo tše sehlogong se.

4. Ke temošo efe yeo e lego go Bakorinthe ba Pele 11:27-29 yeo batlotšwa ba swanetšego go naganišiša ka yona, gona ka baka la’ng?

⁴ Batlotšwa ba swanetše go naganišiša ka temošo yeo e lego go Bakorinthe ba Pele 11:27-29. (Bala.) Motlotšwa a ka ja bjang “a sa swanela” Segopotšong? A ka dira seo ge e ba a ka ja senkgwa le go nwa beine mola a sa phele ka melao ya Modimo. (Baheb. 6:4-6; 10:26-29) Batlotšwa ba a tseba gore ba swanetše go dula ba botega ge e ba ba nyaka go “hwetša moputso wa pitšo ya godimo ya Modimo ka Kriste Jesu.”—Bafil. 3:13-16.

5. Batlotšwa ba itebelela bjang?

 ⁵ Moya wa Jehofa o thuša bahlanka ba gagwe gore ba be le boikokobetšo, ba se ke ba ikgantšha. (Baef. 4:1-3; Bakol. 3:10, 12) Ka gona batlotšwa ga ba ipone ba le kaone go feta batho ba bangwe. Ba a tseba gore Jehofa ga a ba nee moya o mokgethwa go feta woo a o neago Bakriste ba bangwe. E bile ga ba nagane gore ba kwešiša Beibele go feta batho ba bangwe. Le gona ba ka se tsoge ba boditše motho yo mongwe gore le yena ke motlotšwa, ka gona a ka thoma go ja Segopotšong. Go e na le moo, ba a tseba gore Jehofa ke yena a kgethago batho bao ba yago go buša legodimong.

6. Go ya ka Bakorinthe ba Pele 4:7, 8, batlotšwa ba swanetše go itshwara bjang?

⁶ Le ge batlotšwa ba tseba gore ke tokelo e kgolo gore ba kgethilwe go yo buša legodimong, ga ba nyake gore batho ba bangwe ba ba tšee e le ba bohlokwa kudu. (Bafil. 2:2, 3) Le gona ba a tseba gore ge Jehofa a be a ba tlotša ka moya o mokgethwa, ga se a ka a botša batho ba bangwe. Ka gona motlotšwa a ka se makale ge ba bangwe ba sa dumele le semetseng gore o tloditšwe. O a tseba gore Beibele e re botša gore re se ke ra kitimela go dumela motho yo a ipolelago gore Modimo o mo šegofaditše ka tsela e kgethegilego. (Kut. 2:2) Le gona motlotšwa a ka se ipiletše mahlo a batho ka go tšama a botša batho gore ke yena motlotšwa. E bile a ka se tšame a kgantšhetša batho ba bangwe gore yena o tloditšwe.—Bala 1 Bakorinthe 4:7, 8.

7. Ke dilo dife tšeo batlotšwa ba sa di dirego, gona ka baka la’ng?

⁷ Batlotšwa ga ba bone go le bohlokwa gore ba itirele sehlophana sa bona feela, go le bjalo ka ge eka ga ba swane le Bakriste ba bangwe. Ga ba tšame ba nyakana le batlotšwa ba bangwe gore ba tle ba bolele ka go tlotšwa ga bona goba gore ba tle ba ithute Beibele ba le mmogo. (Bagal. 1:15-17) Phuthego e be e ka se be le botee ge e ba batlotšwa ba be ba ka dira dilo tša mohuta woo. Ba be ba tla dira gore moya o mokgethwa o se ke wa ba gona ka phuthegong, gomme seo sa dira gore batho ba Modimo ba se be le khutšo le botee.—Baroma 16:17, 18.

8. Ke ka baka la’ng re swanetše go hlokomela tsela yeo re swarago bao ba jago Segopotšong? (Bona le mongwalo wa ka tlase.)

⁸ Re swanetše go swara bjang bana babo rena le dikgaetšedi bao e lego batlotšwa? Ke phošo go godiša motho yo mongwe kudu, gaešita le ge motho yoo e le motlotšwa. (Mat.  23:8-12) Beibele e re botša gore re ‘ekiše tumelo ya bagolo,’ e sego gore re ba dire baetapele ba rena. (Baheb. 13:7) Ke nnete gore Beibele e re bagolo ba “swanelwa ke kgodišo yeo e lego gabedi.” Bagolo ba ga ba newe kgodišo ka gobane e le batlotšwa, eupša ba newa kgodišo ka gobane ba ‘šoma ka thata go boleleng le go ruteng.’ (1 Tim. 5:17) Ge e ba re reta batlotšwa ka tsela e feteletšego, re ka ba dira gore ba lewe ke dihlong. * Sa go nyamiša le go feta, re ka ba ra ba dira gore ba ikgantšhe. (Baroma 12:3) Ga go le o tee wa rena yoo a nyakago gore bana babo Kriste ba dire phošo ya mohuta woo.—Luka 17:2.

9. Re ka bontšha bjang gore re hlompha batlotšwa?

⁹ Re ka bontšha bjang gore re hlompha batho bao Jehofa a ba tloditšego ka moya wa gagwe o mokgethwa? Re bontšha se ka go se ba botšiše gore ba tloditšwe bjang. Ye ke taba ya bona feela, yeo rena re sa swanelago go e tseba. (1 Bathes. 4:11; 2 Bathes. 3:11) Le gona ga se ra swanela go nagana gore ge e ba motho e le motlotšwa go ra gore monna wa gagwe goba mosadi wa gagwe, batswadi ba gagwe goba yo mongwe ka mo lapeng le yena ke motlotšwa. Motho ga e be motlotšwa ka gobane yo mongwe wa gabo e le motlotšwa, eupša o kgethwa ke Modimo. (1 Bathes. 2:12) Le gona ga se ra swanela go botšiša batho ba bangwe dipotšišo tšeo di ka ba kwešago bohloko. Ka mohlala, ga se ra swanela go botšiša mosadi wa ngwanabo rena yo e lego motlotšwa gore o ikwa bjang ka go tlo phela ka mo go sa felego mo lefaseng monna wa gagwe a se gona. Seo rena re swanetšego go kgodišega ka sona ke gore Jehofa o tlo “kgotsofatša kganyogo ya sephedi se sengwe le se sengwe.”—Ps. 145:16.

10. Go se godiše batho ba bangwe ka tsela e feteletšego go re thuša bjang?

¹⁰ Ge e ba re swara batlotšwa go swana le Bakriste ba bangwe, seo le rena se a re thuša. Seo se re thuša bjang? Beibele e re botša gore ba bangwe ba batlotšwa ba ka no se botege. (Mat. 25:10-12; 2 Pet. 2:20, 21) Ka gona, ge e ba re sa godiše batho ba bangwe ka tsela e feteletšego, e ka ba e le batlotšwa goba e le batho bao e lego kgale ba hlankela Jehofa, re ka se ba dire baetapele ba rena gomme ra ba latela. (Juda 16) Seo se tla re thuša ka gobane le ge batho bao ba ka tlogela go botegela Jehofa goba ba tlogela phuthego, rena re ka se ba latele.

11. Go direga’ng ka palo ya batho bao ba jago Segopotšong?

¹¹ Ka mengwaga e mentši, palo ya batho bao ba jago Segopotšong e be e fokotšega. Eupša mengwaga e sa tšwago go feta, palo ya batho bao ba jago Segopotšong e oketšega ngwaga o mongwe le o mongwe. Na taba ye e swanetše go re tshwenya? Aowa. A re kweng gore ke ka baka la eng re sa swanela go tshwenyega.

12. Ke ka baka la’ng re sa swanela go tshwenyega ka palo ya batho bao ba jago Segopotšong?

¹² “Jehofa o tseba ba gagwe.” (2 Tim. 2:19) Bana babo rena bao ba balago batho bao ba jago Segopotšong ga ba tsebe bao e lego batlotšwa ba kgonthe, eupša Jehofa yena o a ba tseba. Ka gona palo ya batho bao ba jago Segopotšong e akaretša le bao ba naganago gore ke batlotšwa, eupša e se bona. Ka mohlala, ba bangwe bao ba bego ba eja Segopotšong, ka morago ba ile ba tlogela. Le gona ba bangwe ba ka ba ba na le malwetši a monagano ao a dirago gore ba nagane gore ba yo buša le Kriste legodimong. Ka gona go molaleng  gore ga re tsebe gore go šetše batlotšwa ba ba bakae mo lefaseng.

13. Na Beibele e re botša palo ya batlotšwa bao ba tla bego ba sa le mo lefaseng ge masetlapelo a magolo a thoma?

¹³ Go tla be go sa na le batlotšwa dikarolong tše dintši lefaseng ge Jesu a tlo tšea batlotšwa gore ba ye legodimong. (Mat. 24:31) Beibele e re mehleng ya bofelo go tla be go šetše batlotšwa ba sego kae mo lefaseng. (Kut. 12:17) Eupša ga e re botše gore go tla be go šetše ba bakae ge masetlapelo a magolo a thoma.

14. Go ya ka Baroma 9:11, 16, re swanetše go kwešiša eng ka go kgethwa ga batlotšwa?

¹⁴ Jehofa ke yena a kgethago gore o tlotša neng batho ka moya o mokgethwa. (Baroma 8:28-30) O ile a thoma go kgetha batlotšwa ka morago ga gore Jesu a tsošwe bahung. Go bonagala batho ka moka bao e bilego Bakriste ka moragonyana ga gore Jesu a tsošwe bahung e be e le batlotšwa. Eupša mengwageng ya ka morago ga moo, batho ba bantši bao ba bego ba ipolela gore ke Bakriste, e be e se Bakriste ba nnete. Lega go le bjalo, mengwageng yeo, Jehofa o ile a tlotša batho ba sego kae bao e bego e le Bakriste ba nnete. Ba be ba swana le korong yeo Jesu a ilego a re e be e tla gola gare ga mefoka. (Mat. 13:24-30) Le mehleng ye ya bofelo, Jehofa o sa tšwela pele a kgetha bao e tla bago karolo ya ba 144 000. * Ka gona ge e ba Modimo a ka kgetha ba bangwe ba bona pele bofelo bo ka tla, ga se ra swanela go belaela selo. (Bala Baroma 9:11, 16.) * Re  swanetše go itlhokomela gore re se ke ra swana le bašomi ba bangwe bao Jesu a ilego a bolela ka bona go e nngwe ya dipapišo tša gagwe. Bašomi bao ba ile ba belaela ka tsela yeo mong wa bona a ilego a swara bao ba ilego ba thoma go šoma ka iri ya mafelelo.—Mat. 20:8-15.

15. Na batlotšwa ka moka ke karolo ya “mohlanka yo a botegago le wa temogo” yoo go bolelwago ka yena go Mateo 24:45-47? Hlalosa.

¹⁵ Ga se batlotšwa ka moka bao e lego karolo ya “mohlanka yo a botegago le wa temogo.” (Bala Mateo 24:45-47.) Go no swana le mehleng ya Bakriste ba pele, lehono Jehofa le Jesu ba diriša bana babo rena ba sego kae go fepa goba go ruta batho ba bantši. Mehleng yeo, e be e le Bakriste ba sego kae feela bao ba ilego ba newa mošomo wa go ngwala Mangwalo a Bakriste a Segerika. Ka gona, le lehono ke Bakriste ba sego kae feela ba tloditšwego bao ba neilwego boikarabelo bja go nea batho ba Modimo ‘dijo ka nako e swanetšego.’

16. O ithutile’ng sehlogong se?

¹⁶ Re ithutile’ng sehlogong se? Re ithutile gore Jehofa o tlo nea bahlanka ba gagwe ba bantši bophelo bjo sa felego mo lefaseng, gomme o kgethile ba sego kae gore ba yo buša le Jesu legodimong. Jehofa o šegofatša batho ba gagwe gomme o nyaka gore ka moka ba kwe melao ya gagwe le go dula ba botega. Batho bao ba akaretša “Mojuda” le “batho ba lesome.” Ka moka ba swanetše go dula ba ikokobeditše. E bile ba swanetše go hlankela Jehofa mmogo gomme ba be le botee. Le gona ka moka ga bona ba swanetše go šoma ka thata gore go be le khutšo ka phuthegong. Ge bofelo bo dutše bo batamela, anke ka moka ga rena re tšweleng pele re hlankela Jehofa le go latela Kriste re le “mohlape o tee.”—Joh. 10:16.