1. Oityi Siovaa apopile tyikahi nokumoneka hono?

SIOVAA wapopile konthele yetyi matyimoneka mononthiki mbetu okuti: “Ovalume ekwi vatunda momalaka aeho ovilongo, mavakakuata motyikutu tyomulume umwe omu Sundeu, avati: ‘Onthue matuende no onwe, mokonda tueiva okuti Huku ukahi no onwe.’” (Zac. 8:23) Mo velesikulu ei, omulume omu ‘Sundeu’ ulekesa ovalembulwa. Tupu ovalembulwa vaihanwa okuti “o Isilayeli ya Huku.” (Gal. 6:16) Iya “ovalume ekwi,” valekesa vana vena ekevelelo liokukakala apeho pano pohi. Vetyii okuti Siovaa ukahi nokukuatesako ovalembulwa iya vahanda okutualako okuumbila Siovaa kumwe navo, mokonda elao limwe enene.

2. Oñgeni “ovalume ekwi” venda novalembulwa?

² Katyitavela okunoñgonoka omanyina ovalembulwa aveho veli pano pohi. * Mahi no ngotyo vana vena ekevelelo liokukakala pano pohi vapondola okuenda navo. Ñgeni vapondola okutyilinga? Ombimbiliya ikumbulula epulo olio. Yapopia okuti “ovalume ekwi” ankho “mavakakuata motyikutu tyomulume umwe omu Sundeu, avati: ‘Onthue matuende no onwe, mokonda tueiva okuti Huku ukahi no onwe.’” Onondaka “omu Sundeu” kambupopi vala omunthu wike. Mbupopia ovalembulwa aveho. Vana vehevalembulwa vaumbila Siovaa kumwe novalembulwa. Mahi otyo katyilekesa okuti vatala ovalembulwa ngatyina ononkhalamutwe mbavo. Muene vetyii nawa okuti o Sesusi vala watokala okuvehongolela. — Mat. 23:10.

3. Omapulo patyi maakumbululwa monthele ei?

 ³ Mokonda nkhele tuna ovalembulwa ovanyingi pano pohi, vamwe vapondola okulipula okuti: (1) Oñgeni ovalembulwa vena okulitala? (2) Oñgeni tuna okutala vana valia kombolo nokunwa kovinyu? (3) Okuti tuesukisa okusukalala inkha ombalulo ya vana valia kombolo nokunwa kovinyu, ikahi nokuliyawisa? Onthele ei, maikumbulula omapulo oo.

4. Elondolo patyi livasiwa mu 1 Ova Kolindu 11:27-29 ovalembulwa vesukisa okusoka nawa? Iya omokonda yatyi?

⁴ Ovalembulwa vesukisa okusoka nawa kelondolo tuvasa mu 1 Ova Kolindu 11:27-29. (Tanga.) Oñgeni omulembulwa apondola okulia kombolo nokunwa kovinyu, mahi “ngwe kapondola”? Oputyina alia kombolo nokunwa kovinyu Pehinangelo, mahi otyo ahaendela movitumino vya Siovaa. (Heb. 6:4-6; 10:26-29) Ovalembulwa vetyii okuti opo vakapewe ‘ondyambi Huku makaavela vana aihana menyina lya Kilisitu Sesusi,’ vesukisa okutualako noukuatyili ku Siovaa. — Fili. 3:13-16.

5. Oñgeni ovalembulwa vena okulitala?

⁵ Ononkhono mba Huku mbukuatesako ovaumbili vae okuliola omutima, avahakala  nomalityindailo. (Efe. 4:1-3; Kolo. 3:10, 12) Ngotyo, ovalembulwa kavasoko okuti vakolela vali ku vakuavo. Vetyii okuti kavapelwe vali unene ononkhono mba Huku tyipona vakuavo. Kavasoko okuti vanoñgonoka vali nawa Ombimbiliya tyipona vakuavo. Iya nalumwe maveya komukuatate umwe avemupopila okuti: ‘No ove tyafuile umulembulwa. Ñgeno otyo uhimbika okulia kombolo nokunwa kovinyu Pehinangelo.’ Mahi mokonda vena omutima weliola, vahinangela okuti o Siovaa vala una otyilinga tyokuholovona vana mavaende keulu.

6. Ngetyi tyipopia 1 Ova Kolindu 4:7, 8, oityi ovalembulwa vesukisa okulityilika?

⁶ Ovalembulwa vetyii okuti elao limwe enene okuholovonwa na Huku opo vende keulu. Mahi no ngotyo kavakevela ovakuatate vevetekule monkhalelo yelikalela. (Fili. 2:2, 3) Tupu vahinangela okuti etyi Siovaa eveholovona opo vende keulu, ketyipopilile vali omunthu nawike. Otyo tyivekuatesako okuhanumana tyina omunthu umwe ehetavela ponthyimbi okuti omulembulwa. Vetyii okuti Ombimbiliya ipopia okuti katupondola okutavela vala liwa tyina omunthu ametupopila okuti wapewa otyilinga tyakolela na Huku. (Ehol. 2:2) Tyina vamelinoñgonoka nomunthu umwe, kavemupopila okuti ovalembulwa. Omokonda yatyi? Omokonda ovakuatate ovo no nomphange, veliola omutima iya kavahande okulinga natyike tyilekesa okuti vekahi nokulimphanda. — Tanga 1 Ova Kolindu 4:7, 8.

7. Oityi ovalembulwa velityilika okulinga, iya omokonda yatyi?

⁷ Ovalembulwa kavasoko okuti vena vala okukala novalembulwa vakuavo. Kavaovola ovalembulwa vakuavo opo vatomphole poyavo konthele yo ñgeni otyiwa okuholovonwa na Huku opo ukakale keulu. Tupu kavalingi ovikundyi opo velilongese Ombimbiliya poyavo. (Gal. 1:15-17) Inkha ovalembulwa valinga ovipuka ovio, mavayapula ewaneno. Ononkhono mba Huku mbukuatesako ovanthu vae okukala nombembwa, newaneko. Pahe tyina omulembulwa alinga tyimwe povipuka ovio, ngotyo kekahi nokuundapela kumwe nononkhono mba Huku. — Loma 16:17, 18.

8. Omokonda yatyi tuesukisila okulunguka konthele yonkhalelo tutala ovalembulwa? (Tupu tala okatoi.)

⁸ Oñgeni tuna okutekula ovakuatate no nomphange ovalembulwa? Tyapenga okuhuva unene nomunthu umwe, atee umwe tyina omulembulwa. (Mat. 23:8-12) Ombimbiliya  itupopila okuti tuesukisa ‘okuhetekela ekolelo’ liovakulu vewaneno. Mahi kaitupopila okuti tuna okulandula omunthu umwe ngatyina ohongoi yetu. (Heb. 13:7) Tutyii okuti Ombimbiliya ipopia okuti vamwe vena “okulekeswa onthilo onene.” Mahi omokonda vala “vahongolela monkhalelo ikahi nawa” iya “vaundapa unene mokupopia no mokulongesa,” ha mokonda ovalembulwa. (1 Tim. 5:17) Inkha tukalela vala okuhilivika ovakuatate ovalembulwa, mavelitehelela omapita. * Iya tupu matuvepake motyiponga, mokonda vapondola okukala nomalityindailo. (Loma 12:3) Katuhande okulinga natyike tyipondola okulingisisa ovalembulwa okulinga onkhali ngoyo! — Luka 17:2.

9. Oñgeni tupondola okulekesa okuti tuna onthilo novalembulwa?

⁹ Oñgeni tupondola okulekesa okuti tuna onthilo novalembulwa? Otyipuka tyimwe tuhapondola okulinga, okuvepula oñgeni vakala ovalembulwa. Otyo muene otyavo! Nawike vali wesukisa okutyinoñgonoka. (1 Tes. 4:11; 2 Tes. 3:11) Tupu katupondola okusoka okuti una omulembulwa elinepa nae, novo tate yae, no vakuavo vo mombunga yae navo ovalembulwa. Ekevelelo liokukakala keulu kalipiñganwa. Muene o Siovaa uholovona omunthu. (1 Tes. 2:12) Tyihe-otyo vala, katupondola okulinga omapulo apondola okunumanesa vakuetu. Mongeleka, katupondola okupula omukai womulembulwa okuti: ‘Oñgeni ulitehelela tyina usoka okukala apeho pano pohi tyihena omulume wove?’ Onthue katusuku unene novipuka ovio, mokonda tuna onthumbi yokuti mouye omupe, Siovaa ‘makahambukiswa ovipuka aviho viokuna omuenyo.’ — Sal. 145:16.

10. Oñgeni okulityilika okuhuva unene novanthu tyituyakulila?

¹⁰ Tupu, okuhasoko okuti ovalembulwa vakolela vali ku vakuavo, tyituyakulila. Ñgeni ngotyo? Ombimbiliya ipopia okuti vamwe povalembulwa vapondola okuyekapo okukala ovakuatyili ku Siovaa. (Mat. 25:10-12; 2 Pet. 2:20, 21) Mahi inkha tulityilika okuhuva unene novanthu, nalumwe matuvelandula, tyilinge ovalembulwa, na vana veiwe unene meongano, na vana veli motyili omanima omanyingi. (Sunda 16) Ovanthu ovo, navo vapondola okulinga ovipengi, nokuyekapo okuumbila Siovaa. Inkha otyo nthiki imwe tyimoneka-po, ekolelo lietu mu Siovaa kamalitende iya kamatuyeke-po okumuumbila.

11. Oityi tyikahi nokumoneka-po nombalulo ya vana valia kombolo nokunwa kovinyu?

¹¹ Mokueenda kuomanima omanyingi, ombalulo yovakuatate no nomphange valia kombolo nokunwa kovinyu, ankho itepuluka vala. Mahi momanima ano, ovipuka viapiluluka unene. Pahe kese nima, ombalulo iliyawisa. Okuti tuesukisa okusukalala no otyo? Au. Tutalei omahunga amwe.

12. Omokonda yatyi katuesukisile okusukalala nombalulo ya vana valia kombolo nokunwa kovinyu Pehinangelo?

¹² “Siovaa wii ovanthu vae.” (2 Tim. 2:19) Ovakuatate vokuvalula vana valia kombolo nokunwa kovinyu Pehinangelo, kavetyii olie tyili-tyili waholovonwa opo akakale keulu. Mahi Siovaa utyii! Ngotyo, ombalulo ya vana valia kombolo nokunwa kovinyu, yakutikinya vana vasoka okuti ovalembulwa, mahi ngwe havoko. Mongeleka, vamwe ankho valia kombolo nokunwa kovinyu, pahe vayeka-ko. Ovakuavo hamwe vavela komutwe. Mokonda yotyo, vasoka okuti vaholovonwa opo vakatumine na Sesusi keulu. Onthue katutyii  nawa-nawa ovalembulwa veñgapi nkhele veli pano pohi.

13. Okuti Ombimbiliya ipopia veñgapi povalembulwa mavamono tyina ononkhumbi ononene mbuhimbika? Hangununa.

¹³ Tyina Sesusi ameya okukongolola ovalembulwa opo evetuale keulu, mevevasi kononthele mbelikalaila mbohi. (Mat. 24:31) Ombimbiliya ipopia okuti kononthiki mbuno mbonthyulilo, pano pohi mapekesala vala ovalembulwa vehehi. (Ehol. 12:17) Mahi kaipopi veñgapi mavakala pano pohi tyina ononkhumbi ononene mbamehimbika.

14. Ngetyi tyipopia Ova Loma 9:11, 16, oityi tuesukisa okuhinangela konthele yonkhalelo ovanthu valembulwa?

¹⁴ Siovaa, oe utokola onalupi maholovona omulembulwa. (Loma 8:28-30) Siovaa wahimbika okuholovona ovalembulwa konyima yetyi atutilisa Sesusi. Ngotyo, tyafuile potyita tyo tete, Ovakilisitau aveho ankho ovalembulwa. Etyi palamba omanima amwe, vamwe ankho veliti Ovakilisitau, ankho kavalingi etyi Sesusi ahanda. Mahi no ngotyo, momanima atyo oo, Siovaa alembula vamwe atala okuti Ovakilisitau votyotyili. Ovanthu ovo, ankho vekahi ngo tiliku Sesusi apopile okuti maikulila pokati kevu. (Mat. 13:24-30) Tunde potyita tyo tete atee pononthiki mbuno mbonthyulilo, Siovaa utualako okuholovona ovanthu opo valinge onthele yovo 144.000. * Ngotyo, Siovaa upondola okutokola okuholovona vamwe tyina kuakambela  vala katutu opo ouye uno uhanyueko. Inkha otyo tyimoneka-po, okuti matukoyesa etokolo lya Siovaa? (Tanga Loma 9:11, 16.) * Tuesukisa okulunguka opo tuhalinge ngovauundapi Sesusi apopile monthengele-popia yae. Ovaundapi ovo, veliyavele mokonda yonkhalelo omuhona wavo alinga vana vokuahimbika okuundapa konyima. — Mat. 20:8-15.

15. Okuti aveho ovalembulwa valinga onthele ‘yomupika omukuatyili nokualunguka’ wapopiwa mu Mateusi 24:45-47? Hangununa.

¹⁵ Ha aveho vena ekevelelo liokukakala keulu valinga onthele ‘yomupika omukuatyili nokualunguka.’ (Tanga Mateusi 24:45-47.) Siovaa na Sesusi vekahi nokulongesa ovanthu ovanyingi pokati kovanthu vehehi, ngetyi alingile-ale potyita tyo tete. Mongeleka, ovalembulwa vamwe vala vakalele nelao liokuhoneka omikanda vimwe Povihonekwa vyo Vakilisitau mo Geleku. Tupu no hono, o vamwe vala povalembulwa vena otyilinga tyokuavela ovanthu va Huku “okulia . . . momuvo wanakua.”

16. Oityi welilongesa monthele ei?

¹⁶ Oityi tuelilongesa monthele ei? Tuelilongesa okuti ovanyingi povaumbili va Siovaa, mavakapewa omuenyo uhapu pano pohi iya vamwe mavakakala keulu opo vatumine na Sesusi. Tuamona okuti Siovaa uyamba ovaumbili vae aveho, tyilinge omu “Sundeu,” tyilinge “ovalume ekwi.” Mahi pena ovipuka vimwe akevelela kovikundyi ovio vivali: Aveho vena okuendela movitumino viae, nokutualako okukala ovakuatyili kwe. Aveho vena okuliola omutima. Aveho vena okuumbila Siovaa newaneko. Aveho vena okulinga ononkhono mbokukala nombembwa novakuatate vavo no nomphange. Putyina onthyulilo itualako okufuena popepi, atuho tutualeiko okuumbila Siovaa, nokulandula Sesusi Kilisitu, mokonda ‘tutyunda tyike vala.’ — Suau 10:16