Nkhani Yakupfunza 5
Ifepano Tin’dzayenda Namwe
‘Tikufuna kuyenda namwe thangwe tabva kuti Mulungu anamwe.’—ZAKARIYA 8:23.
NYIMBO 26 Mudacitira Inepano
BZOMWE TIN’PFUNZA *
Mabira yanango (‘amuna khumi’) yambawona kuti ni mwayi ukulu kwene-kwene kutumikira Yahova pabodzi na akristau wakudzozedwa (‘Mdjuda’) (Onani ndime 1-2)
1. Kodi n’ciyani comwe Yahova akhadalewa kuti cingadadzacitika nthawe yathu ino?
PAKULEWA bza nthawe yomwe tikukhalayi, Yahova adaleweratu kuti: ‘Mu ntsiku zimwezire, amuna khumi wa bzirewedwe bzentse bza wanthu wa mitundu, an’dzaphatirira mkanjo wa mwamuna m’bodzi Mdjuda, aciti: “Tikufuna kuyenda namwe thangwe tabva kuti Mulungu anamwe.”’ (Zakariya 8:23) ‘Mdjuda’ omwe akufotokozedwa mu vesiri akuimira anyakudzozedwa na mzimu wakucena, ndipo iwo ambacemeredwambo kuti ‘Jirayeri wa Mulungu.’ (Wagalata 6:16) Ndipo ‘amuna khumi’ akuimira wale omwe ana cidikhiro cakudzakhala na moyo wakusaya kumala pantsi pano. Iwo ambadziwa kuti Yahova akusimba anyakudzozedwawo ndipo ambawona kuti ni mwayi ukulu kwene-kwene kutumikira nawo Mulungu pabodzi.
2. Kodi ‘amuna khumi’ ‘angayende’ tani pabodzi na anyakudzozedwa?
2 Napo kuti mpsakukwanisika lini kudziwa dzina la m’bodzi na m’bodzi la anyakudzozedwa omwe alipo ntsiku zino pa dzikoli, * koma omwe ana cidikhiro cakudzakhala pa dziko la pantsi ‘angayende’ nawo pabodzi. Kodi bzingacitike tani? Onani kuti Bibliya limbalewa kuti ‘amuna khumi’ ‘an’dzaphatirira mkanjo wa mwamuna m’bodzi Mdjuda, aciti: “Tikufuna kuyenda namwe thangwe tabva kuti Mulungu anamwe.”’ Napo kuti vesiri likulewa bza Mdjuda m’bodzi, koma mafala mawiri yakuti ‘namwe’ yakuimira wanthu azinji sikuti m’bodzi. Bzimwebzi bzikuthandauza kuti mwamuna Mdjuda akuimira lini munthu m’bodzi, koma akuimira gulu lentse la anyakudzozedwa. Tenepo, wale omwe mbakudzozedwa lini akutumikira Yahova pabodzi na anyakudzozedwa. Koma omwe ana cidikhiro cakudzakhala na moyo pano pa dziko la pantsi ambawona lini anyakudzozedwa ninga atsogoleri, thangwe ambadziwa kuti mtsogoleri wawo ni m’bodzi yekha, omwe ni Jezu.—Mateu 23:10.
3. Kodi nkhani ino in’tawira mibvunzo iponi?
3 Pakuti anyakudzozedwa akalipo pano pa dziko la pantsi, winango wa ifepano angabzibvunze kuti: (1) Kodi anyakudzozedwa an’funika kumbabziwona tani? (2) Kodi tin’funika kumbawawona tani wale omwe ambadya mkate na kumwa vinyu pa Cikumbuso? (3) Kodi tin’funika kucita thupo na kuthimizirika kwa mbogo ya omwe ambadya na kumwa bzizindikirobzi? Nkhani ino in’tawira mibvunzoyi.
KODI ANYAKUDZOZEDWA AN’FUNIKA KUMBABZIWONA TANI?
4. Kodi ni cenjezo liponi lomwe liri pa 1 Wakolinto 11:27-29, lomwe anyakudzozedwa an’funika kulikumbukira mwakusamala kwene-kwene, ndipo thangwe ranyi?
4 Anyakudzozedwa an’funika kusamala kwene-kwene na cenjezo lomwe limbagumanika pa 1 Wakolinto 11:27-29. (Werengani. *) Kodi mkristau angadye tani na kumwa bzizindikiro ‘mwakusaya kuthemera?’ Iye angacite bzimwebzo akasaya kuteweza malamulo yakulungama ya Mulungu. (Wahebereu 6:4-6; 10:26-29) Tenepo, anyakudzozedwa ambadziwa kuti an’funika kupitiriza kukhala wakukhulupirika kwa Mulungu, kuti adzatambire mabai-bai yawo ya kuyenda kudzulu.—Wafiripo 3:13-16.
5. Kodi anyakudzozedwa an’funika kumbabziwona tani?
5 Mzimu wakucena wa Yahova umbathandiza atumiki wace kukhala wabzicepesa, sikuti wakubzikuza. (Wayefezo 4:1-3; Wakoloso 3:10, 12) Tenepo, anyakudzozedwa ambabziwona lini kukhala wakufunika kwene-kwene kuposa winango. Iwo ambadziwa kuti Yahova ambapasa mzimu wakucena atumiki wace wentse mwakundendemerana na iwo. Ndipo iwo ambabziwona lini kuti ambabvesesa kwene-kwene cadidi ca m’Bibliya kuposa winango. Ndipo iwo ambauza lini munthu kuti wadzozedwa nakuti an’funika kuyamba kudya mkate na kumwa vinyu pa Cikumbuso. M’mbuto mwace, iwo mbakubzicepesa ndipo ambadziwa kuti ni Yahova yekha omwe ambacemera munthu kuti akakhale kudzulu.
6. Mwakubverana na 1 Wakolinto 4:7, 8, kodi akristau wakudzozedwa an’funika kumbawona tani wanthu winango?
6 Napo kuti anyakudzozedwa ambawona kuti ni mwayi ukulu kwene-kwene kucemeredwa kuti akakhale kudzulu, iwo ambafuna lini kuti winango ambawalemekeze mwakunyanyirira. (Wafiripo 2:2, 3) Iwo ambadziwambo kuti pomwe adadzozedwa, Yahova alibe kuuza ne munthu na m’bodziyo. Ndipopa anyakudzozedwa ambadabwa lini, pakuyamba munthu akapenukira kuti iwo mbakudzozedwa. Iwo ambadziwa kuti Bibliya limbatipfunzisa kuti tin’funika lini kumbathamangira kukhulupira munthu akatiuza kuti wapasidwa na Mulungu udindo bwakupambulika. (Cibvumbulutso 2:2) Mkristau wakudzozedwa ambafuna lini kuti wanthu amutumbize, ndipo iye akagumana na wanthuwo ambawauza lini kuti ngwakudzozedwa. Ndipo ambasamwira lini winango thangwe ra kudzozedwako.—Werengani 1 Wakolinto 4:7, 8. *
7. Kodi Akristau wakudzozedwa ambacita lini bzinthu bziponi, ndipo thangwe ranyi?
7 Akristau wakudzozedwa ambawona lini kuti an’funika kumbandoceza okha-okha, ninga thimu lakupambulika. Iwo ambayeza lini kunyang’ana anyakudzozedwa anzawo kuti aceze na cakulinga cakufuna kudziwa kuti adadzozedwa tani, ayai kuti acite pfunziro la Bibliya la pawokha. (Wagalata 1:15-17) Bzingadakhala kuti iwo ambacita bzimwebzi, gwere lingadakhala lini lakuphatana. Ndipo angadakhala akucita bzinthu mwakusiyana na mzimu wakucena, omwe umbathandiza wanthu wa Mulungu kukhala pa mtendere na wakuphatana.—Waroma 16:17, 18.
KODI TIN’FUNIKA KUMBAWAWONA TANI ANYAKUDZOZEDWA?
Tin’funika lini kumbacita bzinthu na anyakudzozedwa ne na abale winango omwe ana maudindo m’gulu la Yahova, ninga wakupambulika kwene-kwene (Onani ndime 8) *
8. Thangwe ranyi mun’funika kusamala kwene-kwene na momwe mumbacitira bzinthu na omwe ambadya mkate na kumwa vinyu pa Cikumbuso? (Onani mafala ya m’nyansi.)
8 Kodi tin’funika kumbawawona tani akristau wakudzozedwa? Mpsakuphonyeka kutumbiza ayai kulemekeza munthu mwakupitirira malire, napo akhale mkristau wakudzozedwa. (Mateu 23:8-12) Kumbukirani ciratizo ca akulu wa gwere. Bibliya limbatiuza kuti timbatewezere ‘cikhulupiro cawo,’ tsono limbatiuzambo kuti tin’funika lini kumbawona munthu ali-wentse ninga mtsogoleri wathu. (Wahebereu 13:7) N’cadidi kuti Bibliya limbalewa kuti abale winango ambathemera kupasiwa ‘ulemu bukulu.’ Bzimwebzi bzimbacitika thangwe rakuti iwo ‘ambatsogolera bwino’ ndipo ‘ambaphata basa la kulewalewa na kupfunzisa na nyongo,’ sikuti thangwe ra kukhala wakudzozedwa. (1 Timotio 5:17) Tenepo, tikatumbiza na kulemekeza mwakupirira malire mkristau wakudzozedwa, tin’dzamucitisa kuleka kukhala wakutsudzuka. * Ayai tin’dzawacitisa kukhala wakubzikuza. (Waroma 12:3) Tenepo, tin’funika lini kucitisa ne m’bodzi wa abale wa Kristuwa kukhala na khalidwe limweri!—Luka 17:2.
9. Kodi tingalatize tani kuti timbalemekeza akristau wakudzozedwa?
9 Kodi tingalatize tani kuti timbalemekeza wale omwe adadzozedwa na Yahova? Njira ibodzi ni kutcenkha kumbawabvunza kuti adadzozedwa tani. Thangwe cimweci ni cintsintsi ca nyakudzozedwa ali-wentse, ndipo ifepano tiribe ugo bwa kudziwa bzimwebzo. (1 Watesalonika 4:11; 2 Watesalonika 3:11) Ndipo tin’funika lini kumbakumbuka kuti mwamuna, mkazi ayai abereki na adzinza wa mkristau wakudzozedwayo mbakudzozedwambo. Thangwe ranyi? Thangwe ndakuti cidikhiro cakudzayenda kukakhala kudzulu n’cakupasirana lini napo wanthuwo akhale wa dzinza libodzi. Koma nyakudzozedwa ambapasidwa cidikhiroci na Mulungu. (1 Watesalonika 2:12) Njira inango yakulatiza ulemu kwa anyakudzozedwa ni kutcenkha mibvunzo yomwe ingasunamise wanthu wa m’banja mwawo. Mwa ciratizo, tin’funika lini kubvunza mkazi wa nyakudzozedwa mbvunzo ninga uyu: “Kodi mumbabzibva tani mukakumbukira bza kudzakhala na moyo wakusaya kumala pano pa dziko la pantsi, pa nthawe yomwe mwamuna wanu an’dzakhala ali kudzulu?” Kulewa mwakusaya kupenukira, ifepano timbatsimikiza na mtima wentse kuti m’dziko lipsa Yahova an’dzapereka ‘cakukhumba ca bza moyo bzentse.’—Psalymo 145:16.
10. Kodi kubvera malango ya kutcenkha ‘kutumbiza munthu’ kungatikhotcerere tani?
10 Tikambacita bzinthu mwakuthemera na akristau wakudzozedwa, sikuti kumbawawona kukhala wakufunika kwene-kwene kuposa winango, ifepano timbakhala wakukhotcerereka. Mwa njira iponi? Bibliya limbatiuza kuti akristau winango wakudzozedwa pinango angapitirize lini kukhala wakukhulupirika. (Mateu 25:10-12; 2 Pedru 2:20, 21) Tenepo, tikambabvera malango ya kutcenkha ‘kutumbiza munthu,’ tin’dzatewera lini munthuyo, napo akhale wakudzozedwa, wakubvekera kwene-kwene ayai omwe akutumikira Yahova kwa magole mazinji. (Juda 16) Patsogolo pace, iye akadzasiya kukhala wakukhulupirika ayai akadzacosedwa m’gwere, ifepano tin’dzaluza lini cikhulupiro cathu kwa Yahova ne kusiya kumutumikira.
KODI TIN’FUNIKA KUMBACITA THUPO THANGWE RA KUTHIMIZIRIKA KWA MBOGO YA ANYAKUDZOZEDWA?
11. Kodi n’ciyani comwe cikucitika na mbogo ya wanthu omwe ambadya mkate na kumwa vinyu?
11 Kwa magole mazinji m’mbuyomu, mbogo ya wanthu omwe ambadya mkate na kumwa vinyu ikhacepa. Koma magole yano, mbogoyo ikuthimizirika. Kodi tin’funika kucita thupo na bzimwebzi? Ne. Mbatiwoneni mathangwe yace.
12. Thangwe ranyi tin’funika lini kucita thupo na kuthimizirika kwa mbogo ya omwe ambadya mkate na kumwa vinyu pa Cikumbuso?
12 ‘Yahova ambadziwa wanthu wace.’ (2 Timotio 2:19) Ndipo iye ambadziwa kuti ni mbani omwe ngwakudzozedwa. Koma abale omwe ambalewenga mbogo ya wanthu omwe ambadya mkate na kumwa vinyu ambawadziwa lini. Tenepo, mbogo yomwe wanthuwo ambalewenga imbaphatanidza omwe adadzozedwa na omwe alibe. Mwa ciratizo, winango akhadya na kumwa mbuyomu, koma tsapano adasiya. Winango angakhale na bvuto la makumbukidwe, ndipo bvutolo lingawacitise kukumbuka kuti iwo mbakudzozedwa nakuti an’katonga pabodzi na Kristu kudzulu. Ndipopa tingakwanise lini kudziwa kuti ni akristau angasi wakudzozedwa omwe akalipo pa dziko pano.
13. Kodi Bibliya limbalewa kuti ni anyakudzozedwa angasi omwe an’dzakhala alipo pa dziko pomwe citsautso cikulu cin’dzayamba?
13 M’mbuto zizinji za pa dziko la pantsi zin’dzakhala na anyakudzozedwa pomwe Jezu an’dzabwera kudzawatenga kuti ayende nawo kudzulu. (Mateu 24:31) Bibliya limbalewa kuti mu ntsiku zakumalizira, pa dziko la pantsi pan’dzakhala na mbogo yakucepa ya anyakudzozedwa. (Cibvumbulutso 12:17) Tsono iro limbalewa lini kuti mbangasi omwe an’dzakhala alipo pano pa dziko la pantsi citsautso cikulu cikadzayamba.
14. Mwakubverana na Waroma 9:11, 16, kodi tin’funika kubvesesa ciyani na momwe Yahova ambasankhulira wanthu kuti akhale anyakudzozedwa?
14 Yahova ambadziwa kuti ni nthawe iponi yomwe angasankhule munthu kuti akhale wakudzozedwa. (Waroma 8:28-30) Yahova adayamba kusankhula wanthu kuti akhale wakudzozedwa pomwe Jezu adandolamusidwa. Bzikuwoneka kuti m’magole dzana yakutoma, akristau wentse wacadidi akhali wakudzozedwa. Koma na kupita kwa nthawe, azinji omwe akhabziti mbakristau akhatewera lini Kristu. Tsono Yahova adadzoza akristau wacadidi omwe akhalipo pa nthaweyo, napo kuti iwo akhali ang’ono-ng’ono. Iwo akhali ninga tirigu yomwe Jezu adalewa kuti ingadakulira pakati pa nyakasongole. (Mateu 13:24-30) Ndipo mu ntsiku zakumalizira zino, Yahova akupitiriza kusankhula wanthu omwe an’dzacita mbali ya wa 144.000. * Tenepo, penu Mulungu an’sankhula akristau winango kuti akhale wakudzozedwa pomwe tiri kuphampha kwa dzikoli, tin’funika lini kupenukira nzeru zace. (Werengani Waroma 9:11, 16. *) * Ndipo tin’funika kusamala kwene-kwene kuti tireke kukhala ninga anyabasa omwe adafotokozedwa mu there la Jezu. Iwo adadandaula thangwe ra bzomwe adacita mweneciro munda kuna anyabasa omwe adayamba kuphata basa pomwe nthawe ikhadamala kale.—Mateu 20:8-15.
Kodi tin’funika kucita ciyani m’bale ayai mpfumakazi akadya mkate na kumwa vinyu pa Cikumbuso? (Onani ndime 14)
15. Kodi akristau wentse wakudzozedwa ambacita mbali ya ‘kapolo wakukhulupirika na wanzeru’ omwe ambafotokozedwa pa Mateu 24:45-47? Fotokozani.
15 Ni wentse lini omwe ana cidikhiro cakudzayenda kudzulu ambacita mbali ya ‘kapolo wakukhulupirika na wanzeru.’ (Werengani Mateu 24:45-47. *) Ninga momwe bzikhaliri m’magole dzana yakutoma, Yahova na Jezu ntsiku zino akuphatisa basa abale ang’ono-ng’ono kuti adyese ayai apfunzise wanthu azinji. Pa nthawe imweyire, ni akristau ang’ono-ng’ono wakudzozedwa omwe adaphatisidwa basa kuti anembe Bzinembo Bzacigirego Bzacikristau. Ndipo ntsiku zinombo, ni akristau ang’ono-ng’ono basi wakudzozedwa omwe ana udindo bwakupasa wanthu wa Mulungu ‘cakudya pa nthawe yakuthemera.’
16. Kodi imwepo mwapfunza ciyani mu nkhani ino?
16 Kodi nkhaniyi yatipfunzisa ciyani? Yatipfunzisa kuti Yahova an’funa kudzapasa moyo wakusaya kumala pano pa dziko la pantsi wanthu azinji omwe ambamutumikira, ndipo ang’ono-ng’ono an’dzakatonga pabodzi na Jezu kudzulu. Yahova ambasimba atumiki wace wentse, kuyambira ‘Mdjuda’ kuphatanidzambo ‘amuna khumi’ ndipo ambafuna kuti iwo ambabvere malamulo yace acipitiriza kukhala wakukhulupirika kwa iye. Tenepo, wentse an’funika kupitiriza kukhala wakubzicepesa. Ndipo wentse an’funika kutumikira Yahova na kukhala wakuphatana. An’funikambo kucita nyongo kuti gwere lipitirize kukhala pa mtendere. Tenepo, pakuti tiri kuphampha kwa ntsiku zakumalizira, mbatipitirizeni kutumikira Yahova na kutewera Kristu ninga ‘thimu libodzi.’—Juwau 10:16.
^ ndi. 5 Gole lino, Cikumbuso ca infa ya Kristu cin’citika pa Cipiri, 7 Abril. Kodi tin’funika kumbawawona tani wale omwe ambadya mkate na kumwa vinyu pa Cikumbuso? Kodi tin’funika kucita thupo na kuthimizirika kwa mbogo ya wanthu omwe ambadya na kumwa bzizindikirobzi? Nkhani ino yacokera mu nkhani yakupfunza ya Nsanza ya Mulindiri ya Janeiro 2016, ndipo in’tawira mibvunzoyi.
^ ndi. 2 Mwakubverana na Psalymo 87:5, 6, pinango Yahova kutsogoloku an’dzazimbula madzina ya wentse omwe an’dzatonga kudzulu pabodzi na Jezu.—Waroma 8:19.
^ ndi. 4 1 Wakolinto 11:27 Na tenepo, omwe anidya mkate na kumwa vinyu wa Mbuya mwakusaya kuthemera, an’dzakhala na mulandu wa thupi na mulopa wa Mbuya. 28 Cakuyamba, munthu abzifufudze kuti awone penu ngwakuthemera, patsogolo pace, adye mkate na kumwa vinyu. 29 Pakuti omwe anidya na kumwa mwakusaya kuzindikira thupi, akumwa na kudya mwa kubziyeruza yekha.
^ ndi. 6 1 Wakolinto 4:7 Mbani akukucitisa kukhala wakusiyana na winango? Inde, una ciyani comwe ulibe kucita kutambira? Penu udacita kutambira bzinthu bzimwebzo, thangwe ranyi ukubzikuza ninga kuti ulibe kucita kutambira? 8 Kodi wanthumwe mwakhuta kale na? Mwadala kale, n’tenepo lini? Kodi mukuyamba kale kutonga ninga wamambo napo ife palibe? Ndikhafunadi kuti muyambe kutonga ninga wamambo, kuti ifepanombo titonge namwe pabodzi ninga wamambo.
^ ndi. 8 Onani kwadru yakuti “Lufoyi ‘Limbacita Lini Bzinthu Bzapezi’” mu Nsanza ya Mulindiri, Janeiro 2016.
^ ndi. 14 Cinembo ca Mabasa 2:33, cimbalatiza kuti munthu akadzoze-
dwa, Jezu ambacita mbali, koma Yahova ndiye omwe ambasa-
nkhula munthuyo.
^ ndi. 14 Waroma 9:11 Pomwe wanawo akanati kubadwa ndipo akanati kucita ciri-centse cabwino ayai cakuipa, kuti cakulinga ca Mulungu cikwanisike mwakubverana na pakuwasankhula cipitirize kukhala ca kukhulupira omwe ambaticemera, sikuti cakukhulupira basa. 16 Tenepo, bzimbathemba lini munthu omwe akufunayo ayai nyongo yace, koma Mulungu, omwe ana ntsisi.
^ ndi. 14 Kuti mudziwe bzizinji, onani “Mibvunzo Yakucokera kwa Anyakuwerenga” mu Nsanza ya Mulindiri ya 1 Maio, 2007 Chichewa.
^ ndi. 15 Mateu 24:45 Mbani maka-maka kapolo wakukhulupirika na wanzeru omwe mbuya wace adamuikha kuti ambanyang’anire wa pamui pace, na kumbawapasa cakudya pa nthawe yakuthemera? 46 Ngwakukondwa kapolo umweyo penu mbuya wace akabwera an’dzamugumana akucita bzimwebzo! 47 Cadidi, ndikukuuzani kuti an’dzamuikha kuti anyang’anire bzinthu bzace bzentse.
NYIMBO 34 Kufamba Mwakukhulupirika
^ ndi. 62 BZOMWE BZINKUCITIKA PA CITHUNZI-THUNZI: Kumbukirani kuti muimikiri wa Beteli pabodzi na mkazace ali pa mtsonkhano wacigawo ndipo ali pakati pa thimu la abale omwe an’funa kuwacosa foto. Bzimwebzi bzikulatiziratu kuti n’kusaya ulemu!
