EDWƐKƐ 5
Yɛ Nee Bɛ Bahɔ
“Yɛkpondɛ kɛ yɛ nee bɛ kɔ, ɔluakɛ yɛde kɛ Nyamenle nee bɛ lua.”—ZƐK. 8:23.
EDWƐNE 26 Bɛyɛle Bɛmaanle Me
MƆƆ YƐBAZUKOA *
Ɔle enililɛ kɛ mboane gyɛne ne (“mrenyia bulu”) nee menli mɔɔ bɛkpokpa bɛ (“Dwuunli”) la babɔ nu azonle Gyihova (Nea ɛdendɛkpunli 1-2)
1. Duzu a Gyihova hanle dole ɛkɛ ne kɛ ɔbazi wɔ yɛ mekɛ ye anu a?
GYIHOVA hanle yɛ mekɛ ye anwo edwɛkɛ kɛ: “Mrenyia bulu mɔɔ bɛvi aneɛ mɔɔ maanle maanle ne mɔ ka la amuala anu la barazɔ, ɛhɛe, bɛbarazɔ Dwuunli tɛladeɛ nu ɛsesebɛ na bɛaha kɛ: ‘Yɛkpondɛ kɛ yɛ nee bɛ kɔ, ɔluakɛ yɛde kɛ Nyamenle nee bɛ lua.’” (Zɛk. 8:23) “Dwuunli” ne gyi ɛkɛ ne maa menli mɔɔ Nyamenle ɛva ye sunsum ne ɛkpokpa bɛ la. Eza bɛfɛlɛ bɛ “Nyamenle Yizilayɛ ne.” (Gal. 6:16) “Mrenyia bulu” ne gyi ɛkɛ maa menli mɔɔ bɛlɛ anyelazo kɛ bɛbadɛnla aze dahuu wɔ azɛlɛ ye azo la. Bɛze kɛ Gyihova ɛyila ekpunli ɛhye na bɛbu ye kɛ ɔle nwolɛ adenle kɛ bɛ nee bɛ babɔ nu azonle.
2. Adenle boni azo a “mrenyia bulu” ne nee menli mɔɔ bɛkpokpa bɛ la ‘kɔ’ a?
2 Ɔwɔ nu kɛ yɛnrɛhola yɛnrɛnwu menli mɔɔ bɛkpokpa bɛ mɔɔ bɛha azɛlɛ ye azo la amuala aluma, * noko menli mɔɔ lɛ azɛlɛ ye azo anyelazo la bahola ‘nee bɛ ahɔ.’ Adenle boni azo? Baebolo ne ka kɛ, “mrenyia bulu” ‘bazɔ Dwuunli tɛladeɛ nu ɛsesebɛ na bɛaha kɛ: ‘Yɛkpondɛ kɛ yɛ nee bɛ kɔ.’’ Ngyɛnu ne ka Dwuunli ko anwo edwɛkɛ. Noko edwɛkɛkpɔkɛ “bɛ” kile menli dɔɔnwo. Ɛhye kile kɛ, Dwuunli ne ɛngyi ɛkɛ ne ɛmmaa sonla ko emomu ɔgyi ɛkɛ ne ɔmaa ekpunli ne mɔɔ bɛkpokpa nuhua menli ne la amuala. Menli mɔɔ bɛtɛkpokpale bɛ nee menli mɔɔ bɛkpokpa bɛ la bɔ nu sonle Gyihova. Noko bɛmbu menli mɔɔ bɛkpokpa bɛ la kɛ bɛ adekilevolɛma, ɔluakɛ bɛze kɛ Gyisɛse ala a le Adekilevolɛ ne a.—Mat. 23:10.
3. Kpuya boni mɔ a yɛbabua wɔ edwɛkɛ ɛhye anu a?
3 Kɛ mɔɔ Kilisienema mɔɔ bɛkpokpa bɛ la bie mɔ tɛbɔ azɛlɛ ye azo ɛnɛ la ati, bie a bie mɔ babiza kɛ: (1) Kɛzi ɔwɔ kɛ menli mɔɔ bɛkpokpa bɛ la bu bɛ nwo ɛ? (2) Kɛzi ɔwɔ kɛ yɛ nee menli mɔɔ di Ngakyelɛlilɛ aleɛ ne bie la di ɛ? (3) Saa menli mɔɔ di aleɛ ne bie la dodo kɔ ɔ nyunlu a, ɔwɔ kɛ yɛmaa ɔgyegye yɛ ɔ? Yɛbabua kpuya ɛhye mɔ wɔ edwɛkɛ ɛhye anu.
KƐZI ƆWƆ KƐ MENLI MƆƆ BƐKPOKPA BƐ LA BU BƐ NWO Ɛ?
4. Kɔkɔbɔlɛ boni a wɔ 1 Kɔlentema 11:27-29 mɔɔ ɔwɔ kɛ menli mɔɔ bɛkpokpa bɛ la dwenle nwolɛ kpalɛ a, na duzu ati ɔ?
4 Ɔwɔ kɛ menli mɔɔ bɛkpokpa bɛ la maa kɔkɔbɔlɛ mɔɔ wɔ 1 Kɔlentema 11:27-29 la tɛnla bɛ adwenle nu kpalɛ. (Kenga.) Kɛzi awie mɔɔ bɛkpokpa ye la bahola ali paano ne na yeanlo nwanye ne wɔ “adenle mɔɔ ɛnfɛta” la azo ɛ? Ɔbahola yeayɛ zɔ, saa ɔdi Ngakyelɛlilɛ aleɛ ne bie na ɔnva Gyihova tenlene ngyinlazo ne mɔ ɔnyɛ gyima a. (Hib. 6:4-6; 10:26-29) Menli mɔɔ bɛkpokpa bɛ la ze kɛ saa bɛ sa baha “ahyɛlɛdeɛ ne, mɔɔ le anwuma ɛvɛlɛlɛ ne mɔɔ vi Nyamenle ɛkɛ na ɔlua Kelaese Gyisɛse anwo zo la” a, ɔwɔ kɛ bɛkɔ zo bɛdi nɔhalɛ.—Fel. 3:13-16.
5. Kɛzi ɔwɔ kɛ Kilisienema mɔɔ bɛkpokpa bɛ la bu bɛ nwo ɛ?
5 Gyihova sunsum ne boa ye azonvolɛ maa bɛbɛlɛ bɛ nwo aze, ɔmmaa bɛmmemaa bɛ nwo zo. (Ɛfɛ. 4:1-3; Kɔl. 3:10, 12) Yemɔti menli mɔɔ bɛkpokpa bɛ la ɛnde nganeɛ kɛ bɛle kpalɛ bɛtɛla awie mɔ. Bɛze kɛ Gyihova ɛnva sunsum ne dɔɔnwo ɛmmaa menli mɔɔ bɛkpokpa bɛ la ɛndɛla ye azonvolɛ mɔɔ ɛha la. Bɛnde nganeɛ kɛ bɛlɛ Baebolo ne anu nɔhalɛ ndelebɛbo dɔɔnwo bɛtɛla awie mɔ gyɛne. Yɛɛ bɛnga bɛngile awie mɔ kɛ bɛkpokpa bɛ na bɛbɔ ɔ bo bɛli Ngakyelɛlilɛ aleɛ ne bie. Emomu bɛfi mɛlɛbɛnwoaze nu bɛdie bɛto nu kɛ Gyihova ala a to ɛsalɛ fɛlɛ awie kɛ ɔbahɔ anwuma a.
6. Kɛ mɔɔ 1 Kɔlentema 4:7, 8 ka la, kɛzi ɔwɔ kɛ Kilisienema mɔɔ bɛkpokpa bɛ la yɛ bɛ nyɛleɛ ɛ?
6 Ɔwɔ nu kɛ menli mɔɔ bɛkpokpa bɛ la ze kɛ ɔle nwolɛ adenle kɛ bɛbahɔ anwuma, noko bɛ nye ɛnla kɛ menli nee bɛ bɛali wɔ adenle titili zo. (Fel. 2:2, 3) Eza bɛze kɛ, mɔɔ Gyihova kpokpale bɛ la, yeambɔ awie biala amaneɛ. Yemɔti saa bɛkpokpa awie, na awie mɔ anlie ye ando nu ɛkɛ ne ala bɔbɔ a, ɔnyɛ ye azibɛnwo. Ɔze kɛ Baebolo ne ka kile yɛ kɛ saa awie ka kɛ Nyamenle ɛmaa ye nwolɛ adenle titili bie a, ɔnle kɛ yɛdie ye yɛdi ɛkɛ ne ala. (Yek. 2:2) Kɛmɔ Kilisienema mɔɔ bɛkpokpa bɛ ɛngulo kɛ bɛtwe adwenle bɛba bɛ nwo zo la ati, saa bɛyia awie wɔ mekɛ mɔɔ limoa la a, bɛnga bɛngile ye kɛ bɛkpokpa bɛ. Yɛɛ bɛnva nwolɛ adenle zɔhane bɛndu bɛ nloa anu bɛngile awie mɔ.—Kenga 1 Kɔlentema 4:7, 8.
7. Duzu a ɔnle kɛ menli mɔɔ bɛkpokpa bɛ la yɛ a, na duzu ati ɔ?
7 Kilisienema mɔɔ bɛkpokpa bɛ la ɛnde nganeɛ kɛ bɛdabɛ mɔɔ bɛkpokpa bɛ la ala a ɔwɔ kɛ bɛ nee bɛ tu a, kɛ asɛɛ bɛwɔ eku bie anu la. Eza bɛmbɔ mɔdenle kɛ bɛkpondɛ menli gyɛne mɔɔ bɛkpokpa bɛ la amaa bɛahola bɛaha bɛ ɛkpokpalɛ ne anwo edwɛkɛ anzɛɛ bɛayia kɛ ekpunli bɛazukoa Baebolo ne. (Gal. 1:15-17) Saa menli mɔɔ bɛkpokpa bɛ la yɛ ɛhye a, koyɛlɛ ɛnrɛra asafo ne anu. Ɔbamaa bɛaho bɛatia sunsum nwuanzanwuanza ne mɔɔ maa anzodwolɛ nee koyɛlɛ ba Nyamenle menli avinli la.—Wlo. 16:17, 18.
KƐZI ƆWƆ KƐ YƐ NEE MENLI MƆƆ BƐKPOKPA BƐ LA DI Ɛ?
Ɔnle kɛ yɛ nee menli mɔɔ bɛkpokpa bɛ anzɛɛ bɛli yɛ nyunlu la di ye kɛ bɛle ewiade ne anu menli mɔɔ bɛlie duma la (Nea ɛdendɛkpunli 8) *
8. Duzu ati a ɔwɔ kɛ ɛnea kɛzi ɛ nee menli mɔɔ bɛdi Ngakyelɛlilɛ aleɛ ne bie di la boɛ ɛ? (Eza nea ɔ bo ɛkɛ edwɛkɛ ne.)
8 Kɛzi ɔwɔ kɛ yɛ nee mediema mɔɔ bɛkpokpa bɛ la di ɛ? Ɔnle kpalɛ kɛ yɛbahanvo awie somasoma, saa bɔbɔ ɔboka Kelaese amediema ne mɔ anwo a. (Mat. 23:8-12) Mɔɔ Baebolo ne ka mgbanyima ne mɔ anwo edwɛkɛ la, ɔhanle kɛ ‘yɛzukoa bɛ diedi,’ noko ɔnga kɛ yɛbahola yɛamaa sonla dasanli ayɛ yɛ adekilevolɛ. (Hib. 13:7) Baebolo ne ka kɛ ɔwɔ kɛ yɛbu mgbanyima bie mɔ “kpole kpalɛ.” Ɛhye le zɔ ɔluakɛ ‘bɛdi yɛ nyunlu wɔ adenle kpalɛ zo’ yɛɛ “bɛbɔ mɔdenle wɔ ɛdendɛlɛ nee ngilehilelɛ nu” la ati, na tɛ kɛ bɛkpokpa bɛ la ati ɔ. (1 Tim. 5:17) Saa yɛtwe adwenle yɛkɔ menli mɔɔ bɛkpokpa bɛ la anwo zo na yɛkanvo bɛ somasoma a, yɛbamaa bɛ ti azi aze. * Mɔɔ ɛnle kpalɛ fee la, bie a yɛbamaa bɛayɛ anwomemaazo. (Wlo. 12:3) Yɛ nuhua biala ɛmkpondɛ kɛ ɔbayɛ debie mɔɔ ɔbamaa Kelaese amediema mɔɔ bɛkpokpa bɛ la bie ayɛ nvonleɛ kpole zɛhae a!—Luku 17:2.
9. Kɛzi yɛbahile kɛ yɛbu Kilisienema mɔɔ bɛkpokpa bɛ la ɛ?
9 Kɛzi yɛbahile kɛ yɛbu menli mɔɔ Gyihova ɛkpokpa bɛ la ɛ? Ɔnle kɛ yɛbiza bɛ kɛzi bɛkpokpale bɛ la. Ɛhye le bɛ fealera nu edwɛkɛ mɔɔ yɛnlɛ nwolɛ adenle kɛ yɛbade a. (1 Tɛs. 4:11; 2 Tɛs. 3:11) Eza ɔnle kɛ yɛnyia adwenle kɛ bɛkpokpa bɛ hu anzɛɛ bɛ ye, bɛ awovolɛ anzɛɛ bɛ mbusuafoɔ gyɛne noko. Awie ɛnnyia ye anwuma anyelazo ne ɛnvi ye abusua nu. Nyamenle a fa maa a. (1 Tɛs. 2:12) Eza ɔnle kɛ yɛbiza kpuya mɔɔ ɔbagyegye awie mɔ la. Kɛ neazo la, ɔnle kɛ yɛbiza awie mɔɔ bɛkpokpa ɔ hu la kɛ, kɛkala mɔɔ tɛ ɛ nee ɛ hu a badɛnla paladaese la, kɛzi ɛte nganeɛ ɛ? Yɛbahola yɛanyia anwodozo kɛ wɔ ewiade fofolɛ ne anu, Gyihova ‘bamaa tease abɔdeɛ biala anyia mɔɔ ɔkulo la.’—Edw. 145:16.
10. Saa ‘yɛanganvo menli’ somasoma a, kɛzi ɔbabɔ yɛ nwo bane ɛ?
10 Saa yɛambu bɛdabɛ mɔɔ bɛkpokpa bɛ la kɛ bɛ nwo hyia tɛla awie mɔ a, ɔbɔ yɛ nwo bane. Kɛzi? Baebolo ne ka kɛ tɛ bɛdabɛ mɔɔ bɛkpokpa bɛ la amuala a bali nɔhalɛ a. (Mat. 25:10-12; 2 Pita 2:20, 21) Noko saa yɛkpo kɛ ‘yɛbahanvo menli’ somasoma a, yɛnrɛdoa menli, bɔbɔ menli mɔɔ bɛkpokpa bɛ anzɛɛ bɛze bɛ kpalɛ anzɛɛ menli mɔɔ ɛva ɛvolɛ dɔɔnwo ɛzonle Gyihova la. (Dwu. 16, ɔbdw.) Yemɔti saa menli ɛhye mɔ anli nɔhalɛ anzɛɛ bɛfi asafo ne anu a, ɔnrɛmaa yɛ diedi ɛnrɛkpo aze anzɛɛ yɛnrɛgyakyi Gyihova ɛzonlenlɛ.
ASOO ƆWƆ KƐ YƐMAA MENLI DODO MƆƆ BƐDI NGAKYELƐLILƐ ALEƐ NE BIE LA GYEGYE YƐ?
11. Duzu a yɛnwu ye wɔ menli dodo mɔɔ di Ngakyelɛlilɛ aleɛ ne bie la anwo a?
11 Ɛvolɛ dɔɔnwo mɔɔ ɛze la, menli dodo mɔɔ ɛnee bɛdi Ngakyelɛlilɛ aleɛ ne bie la dodo hanle aze. Noko kenle nsa ye, ɛvolɛ biala bɛ dodo ne kɔ ɔ nyunlu. Asoo ɔwɔ kɛ yɛmaa ɛhye gyegye yɛ ɔ? Kyɛkyɛ. Bɛmaa yɛnlea deɛmɔti ɔnle kɛ yɛmaa ɔgyegye yɛ la.
12. Duzu ati a ɔnle kɛ yɛmaa menli mɔɔ di Ngakyelɛlilɛ aleɛ ne bie la dodo gyegye yɛ a?
12 “Gyihova ze bɛdabɛ mɔɔ bɛle ye ɛdeɛ la.” (2 Tim. 2:19) Mediema mɔɔ bɛtia menli dodo mɔɔ bɛdi Ngakyelɛlilɛ aleɛ ne bie la ɛnze bɛ nuhua ne mɔɔ amgba bɛkpokpa ye la, kyesɛ Gyihova ala. Yemɔti menli mɔɔ bɛsuzu kɛ bɛkpokpa bɛ noko bɛtɛkpokpale bɛ la boka nwo. Kɛ neazo la, nzinlii menli mɔɔ ɛnee di Ngakyelɛlilɛ aleɛ ne bie la gyakyile. Bie mɔ noko lɛ adwenle nu ngyegyelɛ na ɔmaa bɛdie bɛdi kɛ bɛ nee Kelaese bali tumi wɔ anwuma. Nɔhalɛ nu, yɛnze menli mɔɔ amgba bɛkpokpa bɛ mɔɔ bɛtɛbɔ azɛlɛ ye azo la dodo.
13. Baebolo ne kile menli mɔɔ bɛkpokpa bɛ la dodo mɔɔ baha azɛlɛ ye azo wɔ mekɛ mɔɔ anwongyelelɛ kpole ne babɔ ɔ bo la ɔ?
13 Mɔɔ Gyisɛse bara kɛ ɔba yearava menli mɔɔ bɛkpokpa bɛ yeahɔ anwuma la, ɛnee bɛ bie mɔ wɔ ewiade ɛleka dɔɔnwo. (Mat. 24:31) Baebolo ne ka kɛ, ɔkadwu awieleɛ mekɛ ne la, ɛnee menli mɔɔ bɛkpokpa bɛ la anu ekyi tɛbɔ azɛlɛ ye azo. (Yek. 12:17) Noko ɔnga bɛ dodo mɔɔ baha azɛlɛ ye azo wɔ mekɛ mɔɔ anwongyelelɛ kpole ne babɔ ɔ bo la anwo edwɛkɛ.
Saa awie di Ngakyelɛlilɛ aleɛ ne bie a, kɛzi ɔwɔ kɛ yɛyɛ yɛ nyɛleɛ ɛ? (Nea ɛdendɛkpunli 14)
14. Kɛ mɔɔ Wulomuma 9:11, 16 ka la, duzu a ɔwɔ kɛ yɛnwu ye wɔ menli mɔɔ bɛkpokpa bɛ la ɛkpalɛ nwo a?
14 Gyihova a si mekɛ mɔɔ ɔbakpokpa awie la anwo kpɔkɛ a. (Wlo. 8:28-30) Gyihova bɔle ɔ bo kɛ ɔkpa menli mɔɔ bɛkpokpa bɛ la wɔ Gyisɛse ewudwazo ne anzi. Ɔzɔho kɛ wɔ ɛvoya mɔɔ limoa la anu, ɛnee bɛkpokpa nɔhalɛ Kilisienema kɔsɔɔti. Wɔ ɛvoya dɔɔnwo anzi, menli mɔɔ bɛhanle kɛ bɛle Kilisienema la anu dɔɔnwo anli nɔhalɛ. Noko wɔ zɔhane ɛvolɛ ne mɔ anu, Gyihova kpokpale nɔhalɛ Kilisienema ekyii mɔɔ ɛnee wɔ ɛkɛ la. Ɛnee bɛle kɛ hwiiti ne mɔɔ Gyisɛse hanle kɛ ndile bafifi nu la. (Mat. 13:24-30) Wɔ awieleɛ mekɛ ye anu, Gyihova ɛlɛkɔ zo akpa menli aboka menli 144,000 ne anwo. * Yemɔti saa Nyamenle si kpɔkɛ kɛ ɔkpa menli ɛhye mɔ bie kolaa na awieleɛ ne ara a, ɔnle kɛ yɛ adwenle nu yɛ yɛ kesee. (Kenga Wulomuma 9:11, 16.) * Ɔwɔ kɛ yɛnea boɛ na yɛanyɛ yɛ ninyɛne kɛ gyimayɛvoma ne mɔɔ Gyisɛse hanle bɛ nwo edwɛkɛ wɔ ye ndonwo ne mɔ ko anu la. Bɛdendɛle bɛ nzo abo wɔ kɛzi bɛ menle ne nee gyimayɛvoma mɔɔ rale amozii lile la anwo.—Mat. 20:8-15.
15. Menli mɔɔ bɛkpokpa bɛ la amuala boka “akɛlɛ nɔhavo nee badwema” ne mɔɔ bɛha ɔ nwo edwɛkɛ wɔ Mateyu 24:45-47 la anwo ɔ? Kilehile nu.
15 Tɛ menli mɔɔ bahɔ anwuma la amuala a boka “akɛlɛ nɔhavo nee badwema” ne anwo a. (Kenga Mateyu 24:45-47.) Gyihova nee Gyisɛse ɛlɛdua menli ekyii anwo zo ahilehile anzɛɛ amaa menli dɔɔnwo aleɛ, kɛ mɔɔ ɔyɛle ye wɔ ɛvoya mɔɔ limoa anu la. Kilisienema mɔɔ bɛkpokpa bɛ la anu ekyii bie ala a ɔmaanle bɛhɛlɛle Kilisienema Giliki Ngɛlɛlera ne a. Ɛnɛ, Kilisienema mɔɔ bɛkpokpa bɛ la anu ekyi bie a ɔle bɛ gyima kɛ bɛbamaa Nyamenle menli “aleɛ wɔ mekɛ kpalɛ nu” a.
16. Duzu a wɔzukoa ye wɔ edwɛkɛ ɛhye anu a?
16 Duzu a yɛzukoa ye wɔ edwɛkɛ ɛhye anu a? Gyihova ɛzi kpɔkɛ kɛ ɔbamaa ye menli dɔɔnwo anyia dahuu ngoane wɔ azɛlɛ ye azo, na bɛ nuhua ekyii nee Gyisɛse ali tumi wɔ anwuma. Gyihova yila ye azonvolɛ kɔsɔɔti, “Dwuunli” ne yɛɛ “mrenyia bulu” ne, na ɔkpondɛ kɛ bɛ muala bɛdi mɛla ko ne ala azo na eza bɛdi nɔhalɛ. Ɔwɔ kɛ bɛ muala bɛbɛlɛ bɛ nwo aze. Ɔwɔ kɛ bɛ muala bɛbɔ nu bɛsonle ye wɔ koyɛlɛ nu. Yɛɛ ɔwɔ kɛ bɛ muala bɛbɔ mɔdenle kɛ bɛbamaa anzodwolɛ adɛnla asafo ne anu. Mekɛ mɔɔ yɛlɛbikye awieleɛ ne kpalɛ la, bɛmaa yɛ muala yɛhɔ zo yɛzonle Gyihova na yɛdoa Kelaese kɛ “mboane ekpunli ko.”—Dwɔn 10:16.
^ ɛden. 5 Ɛvolɛ ɛhye, Kelaese ewule Ngakyelɛlilɛ ne bazi wɔ Dwɛkɛ, April 7. Kɛzi ɔwɔ kɛ yɛbu menli mɔɔ bɛbali Ngakyelɛlilɛ aleɛ ne bie wɔ nɔsolɛ zɔhane la ɛ? Saa menli mɔɔ di bie la dodo kɔ ɔ nyunlu a, ɔwɔ kɛ yɛmaa ɔgyegye yɛ ɔ? Yɛbanyia kpuya ɛhye mɔ anwo mualɛ wɔ edwɛkɛ mɔɔ gyi January 2016 Ɛzinzalɛ Arane ne azo la anu.
^ ɛden. 2 Edwɛne 87:5, 6 maa yɛnwu kɛ bie a Nyamenle bamaa yɛanwu menli mɔɔ nee Gyisɛse bali tumi wɔ anwuma la amuala aluma kenle bie.—Wlo. 8:19.
^ ɛden. 8 Nea ɛlɛka “Ɛhulolɛ Ɛnyɛ Ninyɛne Mgbane Mgbane” mɔɔ wɔ January 2016 Ɛzinzalɛ Arane ne anu la.
^ ɛden. 14 Ɔwɔ nu kɛ Gyima ne 2:33 ka kɛ bɛluale Gyisɛse anwo zo a bɛvale sunsum nwuanzanwuanza ne bɛmaanle a, noko Gyihova mumua ne a to ɛsalɛ fɛlɛ bɛ nuhua ko biala a.
^ ɛden. 14 Saa ɛkpondɛ nwolɛ edwɛkɛ dɔɔnwo a, nea “Questions From Readers” mɔɔ wɔ May 1, 2007 The Watchtower ne anu la.
EDWƐNE 34 Fa Nɔhalɛlilɛ Dua
^ ɛden. 56 NVONINLI NWO EDWƐKƐ: Pɛ ye nvoninli kɛ mediema dɔɔnwo ɛbɔ Bɛtɛle kpɔlɔkpɔlavolɛ nwo mgbɔlɔka ɛyia kɛ bɛkye ɔ nee ɔ ye nvoninli wɔ nyianu bo. Ɛhye ɛngile ɛbulɛ fee!
