1. Me yi Jehova ọ tare taghene ọnọ phia uvuẹn ọke ọwan na?

JEHOVA ọ tare kpahen ọke ọwan na: “Ehworhare ikpe ri nẹ edjadjẹ sansan rhe uvuẹn egbamwa na ina dabu mọrọn, ee, aye ina ghini dabu mọrẹn ewun ọhworhare ro rhiẹ onyẹ i Jew, aye ni na ta: ‘Ame i guọlọ lele are, fọkime ame i rhonrin taghene Osolobrugwẹ rhẹ are i gba havwiẹ.’” (Zech. 8:23) Onyẹ “Jew” ra tẹmro kpahen na o mevirhọ ihworho rẹ Osolobrugwẹ ọ ha ẹhẹn ọfuanfon na djẹha ne. Aye yẹ “Israel ọrẹ Osolobrugwẹ.” (Gal. 6:16) Ehworhare ikpe na i mevirhọ ihworho ri ne nyerẹn akpọ na bẹmẹdẹ. Aye i rheri taghene Jehova ọ djẹ ihworho enana ha ne, omarana emru ọghọ aye ina homaba aye ga i Jehova.

2. Marhẹ “ehworhare ikpe” na e ru “lele” era djẹha na?

² Dedevwo ọ phẹrẹ re ne rhe ọsoso edẹ ihworho ra djẹha na-a, * ihworho ri ne rhirhiẹ otọrakpọ na ina sabu “lele” era djẹha na. Izede ọgo? Baibol na ọ tare taghene “ehworhare ikpe” ina “mọrẹn ewun ọhworhare ro rhiẹ onyẹ i Jew, aye ni na ta: ‘Ame i guọlọ lele are, fọkime ame i rhonrin taghene Osolobrugwẹ rhẹ are i gba havwiẹ.’” Ekete i Baibol ọnana ọ hunute onyẹ i Jew owu ọvo. Ọrẹn, “are” ra hunute o mevirhọ ihworho buebun. Ọnana o mevirhọ  taghene onyẹ i Jew ra tẹmro kpahen na rhẹ owuọwa-an, ọrẹn o mevirhọ ọsoso ẹko era djẹha na. Ihworho ri ne rhirhiẹ otọrakpọ na, e lele era djẹha na ga i Jehova kugbe. Ọrẹn, aye i vwe nie taghene era djẹha na inini aye-e, fọkime aye i rheri taghene Jesu ọvo yẹ Onini ọwan.​—Matt. 23:10.

3. Enọ ego ya na kpahenrhọ uvuẹn urhomu-ẹmro ọnana?

³ Ra mẹriẹn taghene o ji vwo Ilele Kristi ra djẹha uvwre ọwan inyenana, ihworho ezẹko ina sabu roro: (1) Ukẹro ọgo yo fori nẹ ẹra djẹha na i ha ni oma aye? (2) Ukẹro ọgo yo fori na ha ni era djẹha na? (3) O fori ne brudu orhianẹ ihworho ra riẹ ibrẹdi na jeghwai da enyo na ne buẹnrhọ buẹnrhọ? Urhomu-ẹmro ọnana ọnọ kpahenrhọ enọ erana.

4. Orhetio ọgo rọ ha uvuẹn 1 Corinthians 11:27-29 yẹ era djẹha ine roro kpahen, mesoriẹ?

⁴ O fori nẹ era djẹha na i roro kodo kpahen orhetio rọ ha uvuẹn 1 Corinthians 11:27-29. (Seyi.) Marhẹ ohworho ra djẹha ono ru “kpare” ibrẹdi na  re jeghwai kpare enyo na da uvuẹn ẹdẹ Ẹkarorhọ Uhwu i Jesu? Ono ruie orhianẹ ọ riẹ ibrẹdi na jeghwai da enyo na, ọrẹn o vwo ruẹ lele irhi egbagba Osolobrugwẹ-ẹ. (Heb. 6:​4-6; 10:26-29) Ihworho ra djẹha na, ine vi rhe taghene nẹ aye i ki sabu mẹrẹn “osa ọrẹ odjuwu na rẹ Osolobrugwẹ o tiobọnu nyoma i Kristi Jesu,” aye ina sẹrorẹ atamwu aye ye toba.​—Phil. 3:13-16.

5. Ukẹro ọgo yo fori nẹ era djẹha na i ha ni oma aye?

⁵ Ẹhẹn ọfuanfon i Jehova yọ ha userhumu rẹn idibo yi vwo omeriotọre, ukperẹ aye ina kparoma. (Eph. 4:1-3; Col. 3:10, 12) Omarana, era djẹha i vwe roro taghene aye i rhomu ghwẹ awọrọ-ọ. Aye i rheri taghene Jehova ọ vwọ yẹ aye ẹhẹn ọfuanfon ro bun vrẹn erẹ idibo yi erọrọ-ọ. Aye i vwe ni oma aye taghene aye i vwẹruọ iyono i Baibol na ghwẹ awọrọ-ọ. Aye i vwa ji ta rẹn awọrọ taghene aye a riẹ ibrẹdi na yanghene da enyo na fọkime a djẹrẹ aye ha ne-e. Ukpomaran, aye i mẹrẹnvwrurhe taghene Jehova ọvo yọ djẹ ihworho ha riẹ odjuwu.

6. Lele oborẹ ọ ha uvuẹn 1 Corinthians 4:7, 8, marhẹ era djẹha ine ru lele?

⁶ Dedevwo era djẹha na i mẹrenriẹn rhẹ emru ọghọ ra djẹ aye ha, ọrẹn aye i vwe fiẹrorhọ taghene awọrọ ina họghọ rẹn aye izede oghẹnrensa-an. (Phil. 2:2, 3) Aye i ji rhe taghene ọke i Jehova ọ djẹ aye ha, o lẹrhẹ ihworho erọrọ rhe kpahiẹ-ẹn. Omarana arha djẹ ohworho ha, o vwo gbe yi unu taghene awọrọ i vwe vwo imwẹro kpahiẹn ogege-e. Ọ mẹrẹnvwrurhe taghene Baibol na ọ tare taghene e vwe kiki kwerhọ ye-e, orhianẹ ohworho ọ tare taghene Osolobrugwẹ ọ yẹriẹ owian oghẹnrensan. (Rev. 2:2) Fọkime Olele Kristi ra djẹha ọ guọlọ na ha ujiri riẹ-ẹn, ọ vwọ rhọ ta rẹn ihworho rọ vware obọ taghene a djẹriẹ ha ne-e. Habaye, ọ vwọ ji haye vwonma rẹn awọrọ-ọ.​—Se 1 Corinthians 4:7, 8.

7. Me yẹ era djẹha na ina kẹnoma riẹn, mesoriẹ?

⁷ O fo nẹ Ilele Kristi ra djẹha i roro taghene o fori nẹ aye i kwomakugbe awọrọ ra djẹha ọvo-o, rọ nọ lẹrhiẹ họhọ taghene aye i ha uvuẹn ukoko oghẹnrensan owu. Aye i vwa guọlọ awọrọ ra djẹha rhẹ ẹhẹn taghene aye ine lele aye tẹmro kpahen oborẹ a djẹrẹ aye ha lele-e, aye i vwa ji ha ẹko uyono i Baibol mwuẹ rhẹ awọrọ ra djẹha-a. (Gal. 1:15-17) Ukoko na o vwo okugbe orhianẹ era djẹha e ruẹ  ekwakwa enana-a. Fọkime aye na kparahasuẹ ẹhẹn ọfuanfon Osolobrugwẹ, rọ ha userhumu rẹn ihworho yi vwo ufuoma ọrhẹ okugbe.​—Rom. 16:17, 18.

8. Mesoriẹ o fo na dabu jomarhotọre kpahen oborẹ e ruẹ era djẹha na? (Ji se ekete ra djokarhọ.)

⁸ Ukẹro ọgo yo fori na ha ni imizu ra djẹha? Ọ sọre ne jiri ohworho phan, ọrhọ tobọ rhianẹ ọravwọ Olele Kristi ra djẹha. (Matt. 23:8-12) Ọke i Baibol na ọ ta kpahen ekpako ukoko, nọ ha urhebro rẹn ọwan na “hẹrokele esegburhomẹmro aye,” ọrẹn ọ ta rẹn ọwan na ha onyakpọ owuorowu ruẹ osun ọwa-an. (Heb. 13:7) Baibol na ọ tare taghene o fori na “họghọ okokodo” rẹn ekpako ukoko ezẹko. Ọrẹn, ọ ta omaran fọkime aye a “dabu rhe wian” jeghwai “wian gbanhan ọrẹ ẹmro ọrhẹ uyono,” orhiẹ fọkime a djẹrẹ aye ha-a. (1 Tim. 5:17) Erhe jiri era djẹha phan jeghwai kpomavi rẹn aye phan, ana sabu lẹrhẹ ofa ruẹ aye. * Ọrọ mai biomu, ana sabu lẹrhẹ aye rha kparoma. (Rom. 12:3) O fori na kẹnoma rẹn uruemru ra na lẹrhẹ imizu i Kristi ra djẹha ruẹ aruẹ orusọ ọrana!​—Luke 17:2.

9. Marhẹ ene ru djephia taghene a họghọ rẹn Ilele Kristi ra djẹha?

⁹ Marhẹ ene ru djephia taghene a họghọ rẹn ihworho ri Jehova ọ djẹha? Ọwan i nọ aye oborẹ e ru djẹ aye ha-a. Ọnana ẹmro omobọ, ro vwo fo ne rhe kpahen. (1 Thess. 4:11; 2 Thess. 3:11) Ọ ji sọ ne roro taghene esa yanghene ane aye, eri vwiẹre aye, yanghene awọrọ uvuẹn ekrun aye jẹ ihworho ra djẹha. Ohworho ọ vwọ ha use ọnana riuku-u. Osolobrugwẹ yọ yẹriẹ. (1 Thess. 2:12) O ji fo na kẹnoma rẹn enọ ri na lẹrhẹ aye biomevwan. Jerẹ udje, o fo na nọ ane omizu ra djẹha oborẹ ọye o roro kpahen akpenyerẹn bẹmẹdẹ uvuẹn otọrakpọ na vabọ esa ye-e. Fọkime, o mwurun ọwan ẹro taghene uvuẹn akpọ ọkpokpọ na, Jehova ọnọ “hẹrote edamẹ kemru kemru re nyerẹn.”​—Ps. 145:16.

10. Marhẹ ene ru sẹrorẹ oma ọwan orhianẹ a kẹnoma rẹn uruemru re jiri ihworho phan?

¹⁰ Erhe ni era djẹha na jerẹ oborẹ e ni awọrọ, ọwan na sẹrorẹ oma ọwan. Izede ọgo? Baibol na ọ ta rẹn ọwan taghene ihworho ezẹko ra djẹha i fuevwan toba-a. (Matt. 25:10-12; 2 Pet. 2:20, 21) Omarana, o fori na kẹnoma rẹn uruemru re titi ihworho, tobọ te imizu ra djẹha na yanghene imizu ra dabu rhe, ri ga i Jehova ẹgbukpe buebun ne. (Jude 16) Ọke ọrana, aye i rhe ru sọ jeghwai nẹ ukoko na, atamwu ọwan kpahen Jehova nọ nọ ji gbanhon, na na ji rha ga ye rhọ.

11. Me yọ phia rẹn uchunu ihworho ra riẹ ibrẹdi na ji da enyo na?

¹¹ Ẹgbukpe buebun ne, uchunu ihworho ra riẹ ibrẹdi na ji da enyo na no riotọre. Ọrẹn ẹgbukpe ezẹko rhe na, uchunu ihworho na ne buẹnrhọ buẹnrhọ. O fori ne brudu kpahen ọnana? Ẹjo. Jene yono oborẹ ọsoriẹ.

12. Mesoriẹ o vwo fo ne brudu kpahen uchunu ihworho ra riẹ ibrẹdi na ji da enyo na?

¹² “Jehova o rhe ihworho enẹyen.” (2 Tim. 2:19) Jehova o rhe ọsoso ihworho rọ djẹha, ọrẹn imizu re kele uchunu  ihworho na, e rhe-e. Omarana, ihworho re roro taghene a djẹrẹ aye ha, ọrẹn a djẹ aye-e, i ha usuẹn uchunu ihworho na. Jerẹ udje, ezẹko a riẹ ibrẹdi na jeghwai da enyo na bi, ọrẹn aye i dobọji ne. Ọkezẹko, ezẹko ina sabu vwo emiamo iroro rọ lẹrherẹ aye roro taghene aye ine lele i Jesu sun obẹ odjuwu. Ọrẹn, o fiotọre taghene ọwan e rhe uchunu ihworho ra djẹha ri hẹrhẹre uvuẹn otọrakpọ na-a.

13. Baibol na ọ hunute uchunu ihworho ra djẹha ri na hẹrhẹ ọke ukpokpogho rode na ọnọ tonrhọ?

¹³ Ono vwo ihworho ra djẹha uvuẹn ekete sansan uvuẹn otọrakpọ na ọke i Jesu ọnọ rhe mọ ha aye riẹ odjuwu. (Matt. 24:31) Baibol na ọ tare taghene uvwre ọke oba na, ono vwo ihworho ezẹko ra djẹha uvuẹn otọrakpọ na. (Rev. 12:17) Ọrẹn, ọ ta rẹn ọwan uchunu ihworho ra djẹha ri na hẹrhẹ ọke ukpokpogho rode na ọnọ tonrhọ-ọ.

14. Jerẹ oborẹ ọ ha uvuẹn Romans 9:11, 16, me yo fori ne vwẹruọ ye kpahen oborẹ a sanọ era djẹha na lele?

¹⁴ Jehova yo brorhiẹn ọke rọ nọ djẹ ihworho ha. (Rom. 8:28-30) Ọke ra rhọmọ i Jesu nuhwu hin, yi Jehova ọ tuẹn ihworho ẹdjẹ rhọ. Ọ họhọre taghene ọsoso Ilele Kristi erukaro na ihworho ra djẹha. Uvuẹn ẹgbukpe ri lelirie, ihworho buebun ra gemai ruẹ taghene aye Ilele Kristi, e ghini nyaleli Jesu-u. Udabọ ọrana, uvwre ẹgbukpe erana, Jehova nọ djẹ Ilele Kristi urhomẹmro na ha. Aye i họhọ irosu ri Jesu ọ tare taghene ọnọ họ rhẹ uvwre odin na. (Matt. 13:24-30) Uvuẹn ọke oba na, Jehova ọ ji djẹ ihworho ri ne  rhirhiẹ usuẹn awan 144,000 na. * Omarana, Osolobrugwẹ orho brorhiẹn taghene ọnọ djẹ awọrọ uvuẹn ọke oba na, o fo ne vwo ẹhẹn eveva-a. (Se Romans 9:11, 16.) * O fori na jomarhotọre na ja rha họhọ egba owian ri Jesu ọ tẹmro kpahen uvuẹn udje yi owu. Aye ne brenu kpahen osa rẹ onini aye ọ kwa rẹn ihworho ri rhe ma wian owuọwọn.​—Matt. 20:8-15.

15. Ọsoso ihworho ra djẹha yi ha usuẹn “ọvrẹn ra hẹrosua ro ji vwo ẹghwanren” ri Matthew 24:45-47 ọ ta kpahen? Dje yi fiotọre.

¹⁵ Rhẹ ihworho ephian ri vwo ifiẹrorhọ aye ine riẹ odjuwu yi ha usuẹn “ọvrẹn ra hẹrosua ro ji vwo ẹghwanren” na-a. (Se Matthew 24:45-47.) Jerẹ oborẹ ọ havwọ ọke ahwanren, inyenana Jehova ọrhẹ Jesu, e ji yono ihworho buebun nyoma ẹko imizu ezẹko. Uvuẹn ọke inyikọ na, ibiẹ ihworho ọvo usuẹn era djẹha na, ya ha ya obọrẹ a ha edjadjẹ i Greek ya uvuẹn i Baibol na. Inyenana, Ilele Kristi ezẹko ra djẹha ọvo yi vwo owian aye ina yẹ ihworho Osolobrugwẹ “emaren aye ọke ro fori.”

16. Me wu yono nẹ urhomu-ẹmro uyono ọnana?

¹⁶ Me yẹ urhomu-ẹmro ọnana o yonirin ọwan? Jehova o brorhiẹn rọ nọ ha arhọ i bẹmẹdẹ uvuẹn otọrakpọ na rẹn idibo yi buebun ne, ọrhẹ enyerakpọ obẹ odjuwu harẹn ibiẹ ihworho ri ne leli Jesu sun. Jehova ọ kwosa rẹn idibo yi ephian, nọyẹ onyẹ i “Jew” na, ọrhẹ “ehworhare ikpe” na, ọ ji guọlọ nẹ aye i huvwele yi ji fuevwan ga ye. Ọwan ephian ine vi vwo omeriotọre. Ọwan ephian ina vi ga i Jehova kugbe ọrẹ okugbe. Ana vi wian gbanhon ne toroba ufuoma ukoko na. Rẹ oba na o tiẹkẹrẹ ne na, jenẹ arha ga i Jehova jeghwai nyaleli Kristi jerẹ “ẹko igegede owu.”​—John 10:16.