1. Йеговӕ мах рӕстӕги туххӕй ци загъта?

ЙЕГОВӔ мах рӕстӕги туххӕй загъта: «Еци рӕстӕг алли ӕвзӕгтӕбӕл дзорӕг адӕнтӕй дӕс адӕймаги ниххуӕцдзӕнцӕ еу дзиуиттаг лӕгӕн ӕ дарӕси кӕронбӕл ӕма зӕгъдзӕнцӕ: „Мах дӕр уӕ хӕццӕ цӕуӕн, уомӕн ӕма фегъустан, Хуцау уӕ хӕццӕ ке ӕй“» (Зах. 8:23). Аци стихи «дзиуиттаг лӕг» амонуй, Хуцау ӕ сугъдӕг хъаурӕй ке байсарста, уонӕмӕ. Библи ма сӕ хонуй «Хуцауи Израил» (Гал. 6:16). «Дӕс адӕймаги» ба амонунцӕ, зӕнхӕбӕл ӕносмӕ цӕруни нифс кӕмӕн ес, уонӕмӕ. Етӕ ’й зонунцӕ исӕрстити Йеговӕ ке равзурста, ӕма сӕ хӕццӕ еумӕ ке лӕггадӕ кӕнунцӕ, уой сӕхецӕн устур кадӕбӕл нимайунцӕ.

2. «Дӕс адӕймаги» исӕрст киристӕнтти хӕццӕ куд «цӕунцӕ»?

² Кӕд абони исӕрст киристӕнтти еугурей сӕ нӕмттӕй нӕ зонӕн *, уӕддӕр нӕ бон ӕй сӕ хӕццӕ «цӕун». Кутемӕй? Библи зӕгъуй: «Дӕс адӕймаги ниххуӕцдзӕнцӕ еу дзиуиттаг лӕгӕн ӕ дарӕси кӕронбӕл ӕма зӕгъдзӕнцӕ: „Мах дӕр уӕ хӕццӕ цӕуӕн, уомӕн ӕма фегъустан, Хуцау уӕ хӕццӕ ке ӕй“». Кӕд ами еу дзиуиттаг лӕги кой цӕуй, уӕддӕр дзурдбаст «уӕ хӕццӕ» ӕвдесуй, еунӕг адӕймагмӕ ке нӕ амонуй, фал исӕрст киристӕнтти къуармӕ. Исӕрст ка нӕй, етӕ ба сӕ хӕццӕ усхъӕй-усхъӕмӕ Йеговӕн лӕггадӕ кӕнунцӕ. Фал сӕмӕ разамонгути цӕстӕй нӕ кӕсунцӕ, уомӕн ӕма ’й лӕдӕрунцӕ разамонӕг Йесо Киристе ке ӕй (Матф. 23:10).

3. Аци статьяй цӕхуӕн фарстатӕбӕл базондзиан дзуапп?

³ Фал абони исӕрст киристӕнттӕ зӕнхӕбӕл ке ’нцӕ, уомӕ гӕсгӕ ӕвзуруй уӕхӕн фарстатӕ: 1) исӕрст киристӕнттӕ сӕхемӕ  цӕхуӕн цӕстӕй гъӕуама кӕсонцӕ? 2) Имисӕн изӕри нисӕнттӕй ка исахуадуй, уонӕмӕ цӕхуӕн цӕстӕй гъӕуама кӕсӕн? 3) сӕ нимӕдзӕ фулдӕр ке кӕнуй, уобӕл нӕ тухсун гъӕуй? Аци фарстатӕбӕл дзуапп базондзиан аци статьяй.

4. 1 Коринфӕгтӕмӕ 11:27–29 куд финст ӕй, уомӕ гӕсгӕ исӕрст киристӕнттӕ сӕ зӕрдӕбӕл ци гъӕуама даронцӕ ӕма цӕмӕн?

⁴ Исӕрст киристӕнттӕ гъӕуама сӕ зӕрдӕбӕл даронцӕ 1 Коринфӕгтӕмӕ 11:27–29 финст фӕдзӕхст. (Ба ’й кӕсӕ.) Уотӕ куд рауайдзӕй, ӕма киристон «аккаг нӕй, уотемӕй» нисӕнттӕй ахуадуй? Йегови раст уагӕвӕрдтӕмӕ гӕсгӕ ку нӕ цӕра, уӕд (Дзиуит. 6:4–6; 10:26–29). Исӕрст киристӕнттӕ ’й лӕдӕрунцӕ, Йеговӕбӕл еузӕрдонӕй ке гъӕуама байзайонцӕ, цӕмӕй фӕууинонцӕ «Йесо Киристей фӕрци сӕ кӕмӕ ӕрхудта, еци уӕларвон цард» (Фил. 3:13–16).

5. Исӕрст киристӕнттӕ сӕхемӕ цӕхуӕн цӕстӕй гъӕуама кӕсонцӕ?

⁵ Йегови сугъдӕг хъаурӕ киристӕнттӕн ӕнхус кӕнуй, цӕмӕй сӕрниллӕг уонцӕ, сӕрбӕрзонд нӕ, фал (Еф. 4:1–3; Кол. 3:10, 12). Уомӕ гӕсгӕ исӕрст киристӕнттӕ сӕхемӕ иннетӕй хуӕздӕр нӕ кӕсунцӕ. Зонунцӕ ’й, Йеговӕ сӕ ке равзурста, е уобӕл дзорӕг ке нӕй  ӕма син иннетӕй фулдӕр сугъдӕг хъаурӕ дӕттуй. Уотӕ дӕр сӕмӕ нӕ кӕсуй, ӕма Библи иннетӕй хуӕздӕр лӕдӕрунцӕ. Удта уотӕ дӕр некӕмӕн фӕдздзорунцӕ, ду дӕр исӕрст дӕ ӕма гъӕуама Имисӕн изӕри нисӕнттӕй ахуадун райдайай, зӕгъгӕ. Етӕ сӕрниллӕгӕй арази кӕнунцӕ, уӕлӕрвтӕмӕ ка цӕудзӕй, уой ӕрмӕстдӕр Йеговӕ ке ӕвзаруй.

6. 1 Коринфӕгтӕмӕ 4:7, 8 куд финст ӕй, уомӕ гӕсгӕ исӕрст киристӕнттӕ сӕхе куд гъӕуама даронцӕ?

⁶ Исӕрст киристӕнттӕ сӕхецӕн устур кадӕбӕл нимайунцӕ, уӕлӕрвтӕмӕ ӕвзурст ке ӕрцудӕнцӕ, уой, фал уомӕ нӕ фенгъӕлмӕ кӕсунцӕ, ӕма син иннетӕ уӕлдай кадӕ кӕндзӕнцӕ (Фил. 2:2, 3). Удта ’й лӕдӕрунцӕ, Йеговӕ еске ӕ сугъдӕг хъаурӕй ку байсӕрдуй, уӕд ӕй иннетӕн ке нӕ фегъосун кӕнуй. Уомӕ гӕсгӕ сӕмӕ дессаг нӕ фӕккӕсуй, кадӕртӕ сӕбӕл гурусхӕ ке фӕккӕнунцӕ, е. Уой дӕр нӕ иронх кӕнунцӕ, ӕма нин Библи уотӕ ке зӕгъуй, цӕмӕй уайтагъд ма раууӕндӕн, уотӕ ка фӕззӕгъуй, Хуцау мӕ цидӕр ӕхсидзгӕ гъуддагӕн равзурста, зӕгъгӕ, уонӕбӕл (Рарг. 2:2). Исӕрст киристӕнтти нӕ фӕффӕндуй адӕни ӕргом сӕхемӕ ’здахун ӕма уомӕ гӕсгӕ алкӕмӕн нӕ фӕдздзорунцӕ уӕларвон нифс син ке ес, уой. Мадта сӕхе ке нӕ фестаунцӕ, уобӕл ба дзубанди дӕр нӕййес. (Бакӕсӕ 1 Коринфӕгтӕмӕ 4:7, 8.)

7. Исӕрст киристӕнттӕ цӕхуӕн гъуддӕгтӕ нӕ кӕнунцӕ ӕма цӕмӕн?

⁷ Исӕрст киристӕнттӕ уотӕ нӕ сагъӕс кӕнунцӕ, ӕма сӕ рӕстӕг ӕрмӕстдӕр кӕрӕдзей хӕццӕ гъӕуама ӕрветонцӕ. Удта ӕндӕр исӕрст киристӕнтти дӕр нӕ фӕййагорунцӕ, цӕмӕй сӕ хӕццӕ сӕ уӕларвон нифсбӕл радзоронцӕ кенӕ, цӕмӕй Библи еумӕ ӕртасонцӕ (Гал. 1:15–17). Лӕдӕрунцӕ ’й, уотемӕй ӕмбурди еудзийнадӕ ке ихалдзӕнцӕ ӕма сӕ нӕ фӕндуй, Хуцауи адӕни астӕу фарнӕ ӕма еудзийнадӕ ке фӕрци ес, еци сугъдӕг хъаури нихмӕ цӕун (Ром. 16:17, 18).

8. Имисӕн изӕри нисӕнттӕй ка исахуадуй, уонӕмӕ цӕхуӕн цӕстӕй кӕсӕн, уомӕ лӕмбунӕг ун цӕмӕн гъӕуй? (Кӕсӕ ма феппайуйнаг дӕр.)

⁸ Исӕрст ка ӕрцудӕй, еци хуӕртӕ ӕма ӕнсувӕртӕмӕ цӕхуӕн цӕстӕй гъӕуама кӕсӕн? Кӕд Киристей исӕрст ӕнсувӕртӕ ’нцӕ, уӕддӕр сӕ иннетӕй уӕлдӕр ӕвӕрун раст нӕ уодзӕй (Матф. 23:8–12). Библи нӕ разӕнгард кӕнуй, цӕмӕй хестӕр нӕлгоймӕгтӕн «се ’ууӕндундзийнадӕ фӕнзӕн», фал е уобӕл дзорӕг нӕй, ӕма сӕ гъӕуама нӕ разамонгутӕбӕл нимайӕн (Дзиуит. 13:7). Библи куд зӕгъуй, уомӕ гӕсгӕ «уӕлдай кади аккаг» дӕр ӕнцӕ, фал е, «хуарз разамунд» ке дӕттунцӕ, удта «Хуцауи дзурд дзоруни ӕма  амонуни гъуддаги» ке хъиамӕт кӕнунцӕ, уомӕ гӕсгӕ загъд ӕй (1 Тим. 5:17). Уомӕй уӕлдай ма исӕрст киристӕнттӕн уӕлдай кадӕ ку кӕнӕн, уӕд сӕ, гӕнӕн ес, ӕма фефсӕрми кӕнӕн *. Никки фуддӕр ба уодзӕй, мах туххӕй сӕмӕ сӕрбӕрзонддзийнадӕ ку фӕззинна (Ром. 12:3). Неке ни фӕндуй, цӕмӕй, нӕхе куд дарӕн, уой туххӕй Киристей ӕнсувӕртӕй еске фӕррӕдуйун кӕнӕн (Лук. 17:2).

9. Нӕ бон куд ӕй ӕвдесун, Йеговӕ уӕларвон цардмӕ ке равзурста, уони ке нимайӕн, уой?

⁹ Мадта нӕ бон куд ӕй ӕвдесун, Йеговӕ уӕларвон цардмӕ ке равзурста, уони ке нимайӕн, уой? Зӕгъӕн, гъӕуама сӕ ма фӕрсӕн, исӕрст киристӕнттӕ кутемӕй иссӕнцӕ, уобӕл. Е мах гъуддаг нӕй, удта ӕной дӕр уӕхӕн цӕбӕлдӕрти фӕрсун нӕ федауй (1 Фес. 4:11; 2 Фес. 3:11). Уотӕ сагъӕс кӕнун дӕр нӕ гъӕуй, ӕма исӕрст киристонӕн ӕ цардӕмбал, ӕ ниййергутӕ кенӕ ӕ бийнонтӕй ӕндӕр еске дӕр уӕларвон цардмӕ ӕвзурст ӕй. Адӕймагӕн уӕларвон царди нифс бунӕн нӕ байзайуй, фал ин ӕй Хуцау балӕвар кӕнуй (1 Фес. 2:12). Уомӕй уӕлдай ма гъӕуама исӕрст ӕнсувӕри бийнойнаги ма фӕрсӕн зӕнхӕбӕл ӕносмӕ ӕнӕ уомӕй куд цӕрдзӕй, уобӕл, уомӕн ӕма ин уӕхӕн фарстатӕй гӕнӕн ес, ӕма ӕ зӕрдӕ фӕрресун кӕнӕн. Мах ӕй зонӕн, нӕуӕг дуйней Йеговӕ алкӕмӕндӕр, «ӕ зӕрдӕ ци зӕгъуй, уой» ке ратдзӕй (Пс. 145:16).

10. Нӕхецӕн адӕнӕй «изӕдтӕ» ку нӕ кӕнӕн, уӕд нӕхе цӕмӕй багъӕуай кӕндзиан?

¹⁰ Исӕрст киристӕнттӕмӕ раст цӕстӕй ка кӕсуй, е ма ӕхе еу гъуддагӕй дӕр гъӕуай кӕнуй. Цӕхуӕн? Библи куд зӕгъуй, уомӕ гӕсгӕ исӕрст киристӕнттӕй дӕр кадӕртӕ рӕстдзийнади надӕй райеуварс унцӕ (Матф. 25:10–12; 2 Пет. 2:20, 21). Мадта адӕнӕй нӕхецӕн «изӕдтӕ» ку нӕ кӕнӕн, уӕд неке фӕдбӕл рандӕ уодзиан, нӕдӕр исӕрст киристони, нӕдӕр зундгонд ӕнсувӕри, нӕдӕр Йеговӕн берӕ ӕнзти дӕргъи ка лӕггадӕ кодта, уӕхӕн адӕймаги фӕдбӕл (Иуди 16). Ӕма уӕхӕн киристӕнттӕй еске Йеговӕбӕл еузӕрдон ку нӕбал уа кенӕ ӕмбурдӕй ку рандӕ уа, уӕд не ’ууӕндундзийнадӕ нӕ фӕккеудзӕй ӕма нӕ лӕггадӕ нӕ ниууадздзиан.

11. Имисӕн изӕри нисӕнттӕй ка исахуадидӕ, уони нимӕдзӕ куд ӕййивта?

¹¹ Берӕ ӕнзти дӕргъи Имисӕн изӕри нисӕнттӕй ка исахуадидӕ, уони нимӕдзӕ минкъийдӕр кӕнгӕ цудӕй. Фал фӕстаг ӕнзти ба фулдӕрӕй-фулдӕр кӕнунцӕ. Цума нӕ уобӕл тухсун гъӕуй? Нӕ гъӕуй. Ӕркӕсӕн цӕмӕннӕ, уомӕ.

12. Имисӕн изӕри нисӕнттӕй ка исахуадуй, уони нимӕдзӕ фулдӕрӕй-фулдӕр ке кӕнуй, уобӕл тухсун цӕмӕннӕ гъӕуй?

¹² «Йеговӕ зонуй ӕхеуӕнтти» (2 Тим. 2:19). Имисӕн изӕри нисӕнттӕй ка исахуадуй, уони ка фӕннимайуй, еци ӕнсуӕвӕртӕ ’й нӕ фӕззонунцӕ, ӕцӕгӕйдӕр си исӕрст ка ӕй, уой. Фал ӕй Йеговӕ ба зонуй. Уомӕ гӕсгӕ нисӕнттӕй ка исахуадуй, уони нимӕдзӕмӕ хаунцӕ, ӕхемӕ исӕрст киристон ка кӕсуй, ӕцӕгӕй ба ка нӕй, етӕ дӕр. Зӕгъӕн, уӕхӕнттӕй беретӕ фӕстӕдӕр нисӕнттӕй нӕбал исахуадунцӕ. Фӕууй уотӕ дӕр ӕма нисӕнттӕй исахуадуй, еу минкъий ка фӕккуддӕр ӕй, уӕхӕн адӕймаг. Куд ӕй уинӕн, уотемӕй бӕлвурдӕй зӕгъӕн нӕййес, зӕнхӕбӕл ма исӕрст киристӕнттӕ цӕйбӕрцӕ ’нцӕ, уой.

13. Устур бӕллӕх ку райдайа, уӕд ма зӕнхӕбӕл ка уа, еци исӕрст киристӕнтти нимӕдзӕ цӕйбӕрцӕ уодзӕй, уой туххӕй Библи ци зӕгъуй?

¹³ Киристе исӕрст киристӕнтти уӕлӕрвтӕмӕ райсунмӕ ку ’рцӕуа, уӕд зӕнхӕбӕл  алли рауӕнти уодзӕнцӕ (Матф. 24:31). Библи куд зӕгъуй, уомӕ гӕсгӕ фӕстаг бӕнтти зӕнхӕбӕл исӕрст киристӕнтти минкъий къуар байзайдзӕй (Рарг. 12:17). Фал устур бӕллӕх ку райдайа, уӕд цӕйбӕрцӕ уодзӕнцӕ ӕма кӕмити цӕрдзӕнцӕ, е ба си финст нӕй.

14. Ромӕгтӕмӕ 9:11, 16 финст дзурдтӕмӕ гӕсгӕ исӕрст киристӕнттӕ куд ӕвзурст цӕунцӕ, уой туххӕй ци гъӕуама лӕдӕрӕн?

¹⁴ Йеговӕ лух кӕнуй киристон исӕрст кӕд ӕрцӕудзӕй, уой (Ром. 8:28–30). Йеговӕ исӕрст киристӕнти ӕвзарун райдӕдта Киристей ку райгас кодта, уой фӕсте. Мадта уӕд фиццаг ӕноси ӕцӕг киристӕнттӕ еугурӕйдӕр исӕрститӕ адтайуонцӕ. Уой фӕсте ӕности дӕргъи, ӕхе Киристей фӕдбӕлдзӕуӕг ка худта, уонӕй ба сӕ фулдӕр ӕцӕг киристӕнттӕ н’ адтӕнцӕ. Фал еци рӕстӕги дӕр Йеговӕ ӕ сугъдӕг хъаурӕй байсӕрдидӕ, еузӕрдон ка адтӕй, еци киристӕнтти. Етӕ адтӕнцӕ, Йесой фӕсномуг хабари хъамилти астӕу ка ирӕзтӕй, уӕхӕн мӕнӕуи хузӕн (Матф. 13:24–30). Аци фӕстаг бӕнтти дӕр Йеговӕ ӕмбурд кӕнуй 144 000 ка бахаудзӕй, еци адӕни *. Мадта кӕд Хуцау кедӕр фӕстаг бӕнтти кӕрони равзарун исфӕндӕ кодта, уӕд мах ба ка ан, цӕмӕй ин ӕ унаффитӕбӕл гурусхӕ кӕнӕн? (Бакӕсӕ Ромӕгтӕмӕ 9:11, 16.) * Мадта гъӕуама лӕмбунӕг уӕн, цӕмӕй Киристе ци хъурхъургӕнагӕ косгути кой кодта, уони хузӕн ма исуӕн. Етӕ сӕнӕфсердони хецаубӕл хъур-хъур кодтонцӕ, еунӕг сахат ка бакуста, уонӕн цӕйбӕрцӕ бафиста, уобӕл (Матф. 20:8–15).

15. Матфеййи 24:45–47 ке кой цӕуй, еци «ӕууӕнкгун ӕма зундгин цагъар» еугур исӕрст киристӕнттӕ дӕр ӕнцӕ? Ба ’й лӕдӕрун кӕнӕ.

 ¹⁵ Уӕларвон царди нифс кӕмӕн ес, етӕ еугурӕй «ӕууӕнкгун ӕма зундгин цагъар» нӕ ’нцӕ. (Бакӕсӕ Матфеййи 24:45–47.) Фиццаг ӕноси куд адтӕй, уотӕ абони дӕр Йеговӕ ӕма Йесо ӕрмӕстдӕр цалдӕр ӕнсувӕремӕй пайда кӕнунцӕ, цӕмӕй беретӕн хуӕруйнаг дӕттонцӕ, гъома сӕ ахур кӕнонцӕ. Зӕгъӕн, фиццаг ӕноси ӕрмӕстдӕр цалдӕр исӕрст киристони ӕвзурст ӕрцудӕнцӕ, цӕмӕй Киристон Грекъаг Финститӕ ниффинстайуонцӕ. Абони дӕр ӕрмӕстдӕр цалдӕр исӕрст киристонемӕн лӕвӕрд ӕй уӕхӕн ихӕс, цӕмӕй Хуцауи адӕнӕн «хуӕруйнаг афойнабӕл дӕттонцӕ».

16. Аци статьяй ци базудтан?

¹⁶ Мадта аци статьяй ци базудтан? Йеговӕ ӕ лӕггадгӕнгутӕй сӕ фулдӕрӕн ратдзӕй ӕносон цард зӕнхӕбӕл, уӕларвон цард кӕмӕн ратдзӕй ӕма Киристей хӕццӕ паддзахтӕ ка уодзӕй, етӕ ба берӕ нӕ ’нцӕ. Йеговӕ е ’гас лӕггадгӕнгутӕн дӕр хуӕрзеуӕг ратдзӕй, «дзиуиттагӕн» дӕр ӕма «дӕс адӕймагемӕн» дӕр. Удта еуетӕмӕ дӕр ӕма иннетӕмӕ дӕр ӕнгъӕлмӕ кӕсуй ӕ закъӕнттӕ ин ке ӕнхӕст кӕндзӕнцӕ ӕма ибӕл еузӕрдон ке уодзӕнцӕ. Алкедӕр ни гъӕуама сӕрниллӕг уа, удта гъӕуама нӕ хуӕртӕ ӕма ӕнсувӕрти хӕццӕ еумӕ лӕггадӕ кӕнӕн ӕма нӕ еудзийнадӕ гъӕуай кӕнӕн. Кӕрон хӕстӕгдӕр ке кӕнуй, уомӕ гӕсгӕ гъӕуама Йеговӕн еумӕйагӕй лӕггадӕ кӕнӕн ӕма Киристемӕ игъосӕн (Иоан. 10:16).