1. Ngera ulochel a Jehovah el kirel tia el taem er kid?

A JEHOVAH a ulemlaoch el kirel tia el taem er kid el kmo: “Seikid e a re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” (Sek. 8:23) Me a “chad er a Judea” el ngar tiang a omtechei er tirke el Dios a mla melilt er tir lokiu a chedaol reng er ngii. Tirkang a dirrek el okedongall el “Israel ra Dios.” (Gal. 6:16, BT) E tirke el “truich el chad” a omtechei er tirke el oba omelatk el mo kiei er tia el chutem el mo cherechar. Te medengei el kmo a Jehovah a mla ngiltii tia el delebechel er a rengellitel e dirrek el kongei el kmo ngileakl el techall el mo sebechir el teloi er tir el mengull er a Dios.

2. Ngoeak a ngera el rolel e tirke el “truich el chad” a ‘obengterir’ a rengellitel?

² Alta e ngdiak lsebeched el mo medengei a ngklir a derta er tirka el ngellitel el ngar a chutem er chelecha el taem, * engdi tirke el oba omelatk el mo kiei er tia el chutem a dirk sebechir el ‘obengterir.’ Lokiu a ngera el rolel? A Biblia sel losaod el kmo tirke el “truich el chad” a “mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” A Biblia a di mesaod el kirel a ta el chad er a Judea. Engdi a tekoi el “tal chad” me a “obengkem” a mesaod el kirir a rebetok el chad. Me tiang a belkul a kmo ngike el chad er a Judea a dimlak di lengii el tang, e tiang a bai omtechei er a rokir el cheldellir a rengellitel. Me tirke el rokui el diak lengellitel a obengterir a rengellitel el mesiou er a Jehovah. Me nguaisei, engdi ngdiak lomes er tirka el ngellitel el ua mengeteklir, e le te medengei el kmo a mengeteklir a Jesus.​—Mt. 23:10.

3. Ngera el ker a mo monger er tia el suobel?

³ Chelecha el taem e te dirk ngar ngii a rebebil el ngellitel el  Kristiano el teloi er a rechedal a Dios, me a rebebil a locha mo melatk el kmo: (1) Ngkirel mo uangera osengir a rengellitel el kirir? (2) Ngmo uangera blekerdeled el bedul tirke el mo melai a klekedall er a temel a Chedaol Belsoil? (3) Ngkired el bekikl a lsekum a ildisir a remelai aike el klekedall a di meleketek? Tia el suobel a mo onger aika el ker.

4. Ngera el omengelechel el ngar a 1 Korinth 11:27-29 a kirir a rengellitel el mo kerekikl el melatk er ngii? E ngera uchul?

⁴ A rengellitel a kirir el kerekikl el melatk er a omengelechel el medung er a 1 Korinth 11:27-29. (Monguiu.) Ngoeak a ngera el rolel e a ngellitel a mo “diak le kldmokl el kirel” a Chedaol Belsoil? Ngokiu sel lolai aike el klekedall er a Chedaol Belsoil el lak lolengesenges a melemalt el llechul a Jehovah. (Heb. 6:4-6; 10:26-29) A rengellitel a ungil medengei el kmo ngkmal kirir el melemolem el blak a rengrir a lsekum ngsorir el mo ‘nguu a nguked, el ingii a okedongel a Dios el okiu a Kristus Jesus.’​—Fil. 3:13-16.

5. Ngkirel mo uangera uldesuir a rengellitel el kirir?

⁵ A chedaol reng er a Jehovah a ngosuterir a remesiungel el mo ngariou a rengrir, el diak el mekedidai a rengrir. (Efe. 4:1-3; Kol. 3:10, 12) Me a rengellitel a diak el kirir el omdasu el kmo te kuk ungil er a rebebil. Te ungil medengei el kmo a Jehovah a diak lomesterir a ileakl el  klisichel chedaol reng el kuk ngarbab er sel lomesterir a rebebil el mesiungel. Ngdirrek el diak lomdasu el kmo te ungil medengelii a Biblia el kuk ngaruchei er a ngii di el chad. E kmal diak lsebechir melekoi er a ta er a chad el kmo ngii a dirrek el ngellitel me ngkirel el omuchel el melai aike el klekedall er a temel a Chedaol Belsoil. Ngbai okiu a klengariourreng er tir e te ungil medengei el kmo ngdi ta el Jehovah a omekedong er a rechad el mora eanged.

6. A doltirakl er a 1 Korinth 4:7, 8, e ngkirel mo uangera blekerdelir a rengellitel el Kristiano?

⁶ Alta e a rengellitel a melechesuar el kmo ngileakl el techall el bo lemokedong el mora eanged, engdi ngdiak el kirir el mengerechir er a rebebil el mo meruul a ileakl el tekoi el kirir. (Fil. 2:2, 3) Te dirrek el medengei el kmo sel taem el Jehovah a millilt er tir, e ngdimlak losubed er a rokui el chad el kirel. Me a ngellitel a diak bo lemechas a rengul a lsekum a rebebil a diak lemereched el mo oumerang el kmo ngii a ngellitel. Ngungil medengei el kmo a Biblia a omeklatk er kid el kmo ngdiak di demereched el mo oumerang er a chad el melekoi el kmo a Dios a mla msa ileakl el ngerechelel. (Och. 2:2) A ngellitel a dirrek el diak lsoal lolechau a osengir a rechad el bedulngii, a uchul me ngdiak louchais er a rechad el kmo ngmla mengilt el mo ngellitel. E kmal diak lousimang el di ouchais el kirel el mora rechad.​—Monguiu er a 1 Korinth 4:7, 8.

7. Ngera el tekoi a kirir a rengellitel el mengeroid er tir er ngii? E ngera uchul?

⁷ A rengellitel el Kristiano a diak el kirir lomdasu el kmo ngkirir el di mengoit a temir el teloi er a rebebil el ngellitel, el ua lechedal a ileakl el cheldellir a rechad. Ngdiak lolasem el di osiik er a rengellitel el omdasu el kmo me bo lsebechir el mesaod el kirel tia el ileakl el techellir, me a lechub e bo ledak el meruul a miting er tir el kirel a omesubel a Biblia. (Gal. 1:15-17) A ongdibel a mo diak a kltarreng er a chelsel a lsekum a rengellitel a meruul chouaika el tekoi. Ngoeak tiang e te mo meruul a tekoi lomtok er a chedaol reng, el ngii a olengeseu er a rechedal a Dios el mo ngar a budech me a kltarreng.​—Rom 16:17, 18.

8. Ngera uchul me ngkired el kerekikl a omerelled el bedul tirke el melai a klekedall er a Chedaol Belsoil? (Dirrek el momes er a footnote.)

⁸ Ngkirel mo uangera blekerdeled el mora rengellitel? Ngdiak el tabesul a lsekum kede kmal mo imis el chemat er a chad, el mo lmuut me a lsekum e ngta er a ngellitel el odam er a Kristus. (Mt. 23:8-12) Me a Biblia sel losaod el kirir a remechuodel, e ngmelisiich er kid el “moltirakl er sel kloumera er tir,” engdi ngdiak lebelkul a  kmo ngsebeched el meruul er a ngii di el chad el mo mengetekled. (Heb. 13:7, BT) Ngmera el tekoi sel ledu Biblia el kmo te ngar ngii a rebebil el rredemelel a “erul chachisois.” Engdi tiang a belkul a kmo te “ungil er a ngerchelir” e dirrek el blak a rengrir el “omerk e olisechakl,” el diak el belkul a kmo tir el ngellitel a uchul. (1 Ti. 5:17) A lsekum kede kmal mo imis el chemat er tir e ngsebeched el rulleterir el mo merur. * E sel lmuut el kmal mekngit a sebeched el rulleterir el mo mekedidai a rengrir. (Rom 12:3) Me ngkmal diak lsoad el meruul a ngii di el tekoi el mo uchul e a ta er a odam er a Kristus el ngellitel a mo rullii a oberaod el klengit!​—Lk. 17:2.

9. Kede mekera e ochotii el kmo kede oba omengull el kirir tirke el ngellitel el Kristiano?

⁹ Kede mekera e ochotii el kmo kede oba omengull el kirir tirke el ngellitel er a Jehovah? Ngdiak lsoad loker er sel rolel e te mlo ngellitel. Ngdiak a llemelted el mo medengelii tia el tekoi. (1 Th. 4:11; 2 Th. 3:11) Ngdirrek el diak el kired lomdasu el kmo a rebecherir me a rechad er a blirir me a lechub a rechedal a telungalek er tir a dirrek el ngellitel. A chad a diak lemediukes er tia el omelatk el mora eanged el okiu a rechad er a blil. Ngbai nguu er a Dios. (1 Th. 2:12) Ngdirrek el kired el kerekikl me lak doker a ker el mo uchul e kede tomall a rengrir a rebebil. El ua tiang, ngdiak doker er a bechil a ngellitel el odam er a uldesuel el kirel a omelatk el mo kiei er a chutem el diak a bechil. Kede rokui el ulterekokl a rengud el kmo ngar a chelsel a beches el beluulechad, e a Jehovah a mo “omotech a rengrir a rokui el di ngar.”​—Psalm 145:16, NW.

10. Ngmekera domekerreu er kid a lsekum kede kerekikl me ngdiak ‘dolad er a rechad’?

¹⁰ A lsekum e ngdiak di dechat er a rengellitel el ua lsal meklou a ultutelir el chad, e tiang a dirrek el sebechel lomekerreu er kid. Lokiu a ngera el rolel? A Biblia a mesaod el kirir a rebebil ngellitel el kmo nglocha diak lolemolem el blak a rengrir. (Mt. 25:10-12; 2 Pe. 2:20, 21) Engdi a lsekum kede kerekikl me ngdiak ‘dolad er a rechad,’ e ngmo diak di doltirakl er a rebebil, el mo lmuut er a rengellitel me a lechub e ngtirke el merael chisir me a lechub e ngtirke el mla mesiou er a Jehovah el kemanget el taem. (Jud 16) Me a lsekum te mo diak leblak a rengrir me a lechub e te mo cheroid er a ongdibel, e ngdiak bo lemechitechut a klaumerang er kid er a Jehovah me a lechub e ngmo diak dosiou er ngii.

11. Ngera meketmeklang el kirel a ildisir tirke el melai a klekedall er a Chedaol Belsoil?

¹¹ Ngmla mo betok el rak, el tirke el melai a klekedall er a Chedaol Belsoil a di merael el mo kesai. Engdi ngar a chelsel aika el mereko el rak, e a ildisir a di meleketek er a bek el rak. Me ngkired el mo bekikl el kirel tiang? Ngdiak. Me bo dosaod a bebil luchul me ngdiak domdasu el uaisei.

12. Ngera uchul me ngdiak el kired el bekikl el kirel a ildisir tirke el melai a klekedall er a Chedaol Belsoil?

¹² “A [Jehovah] a medengelterir a re chedal.” (2 Ti. 2:19) A rudam el melai a ocherengir tirke el melai a klekedall er a Chedaol Belsoil, a diak leua Jehovah el ungil medengei el kmo te rua techang a mera el ngellitel. Me tia el ochur a uldimukl er tirke el omdasu el kmo te ngellitel, engdi mera er ngii ngdiak. El ua tiang, a rebebil el millai aika el klekedall er a uchei a mlo diak lolai er a uriul. E a rebebil a locha smecher a uldesuir me a lechub e ngchuarm a rengrir el rulleterir el mo omdasu el kmo te mo mengedereder lobengkel a Kristus el ngar a eanged. Me  ngbleketakl el kmo ngdiak dodengei el kmo ngkmal tela ildisir a rengellitel el dirk ngar tia el chutem.

13. A Biblia, ngouchais el kmo ngtela ildisir a rengellitel el mo ngar tia el chutem er a uchei er a lomuchel a kloul ringel?

¹³ Te dirk mo er ngii a rengellitel el ngar a betok el beluu er a beluulechad er sel taem el lemei a Jesus el me melai er tir el mora eanged. (Mt. 24:31) A Biblia a mesaod el kmo ngar sel taem er a uriul sils, e ngdirk mo er ngii a kekerei el ildois er a rengellitel el ngar tia el chutem. (Och. 12:17) Engdi ngdiak losaod el kmo ngtela ildisir tirke el mo kiei er sel taem el lomuchel a kloul ringel.

14. Ngera kired el mo ungil medengei el kirel a rolel a lemengilt a rengellitel, el ua losaod a Rom 9:11, 16?

¹⁴ A Jehovah a tibir el kmo ngoingerang e ngmelilt er a rengellitel. (Rom 8:28-30) A Jehovah a ulemuchel melilt er a rengellitel er a uriul er a lebekiis er a kodall a Jesus. Me ngsebeched el kongei el kmo ngar a kot el dart el rak, e tirke el rokui el mera el Kristiano a mle ngellitel. Ngar aike el uleakuriul el rak, e a oumesingd er tirke el millekoi el kmo te Kristiano a dimlak lemera el oltirakl er a Kristus. Ngdirrek el ngar a chelsel aike el osisiu el rak, e a Jehovah a millilt er a rekesai el tir a mle mera el Kristiano. Tirkang a mle ua ungil dellomel el Jesus a milsaod el kirir el kmo te mo mukeroul el teloi er a mekngit el dellomel. (Mt. 13:24-30) Ngar a chelsel aika el uriul sils, e a Jehovah a dirk melemolem el melilt er a remo chedal a 144,000. * Me a lsekum a Dios a tibir el mo melilt er a rebebil er tir er a telkib el taem er a uchei er a ulebongel, e ngkmal diak el kirel mo rrau a rengud e doumededenger er a llemesel a rengul. (Monguiu er a  Rom 9:11, 16.) * Ngkmal kired el kerekikl me lak bo deua tirke el chad er a ureor el Jesus a milsaod el kirir el ngar a ta er aike el okesiu er ngii. Te milengeremrum el kirel sel omerellel a mastang el mo er tirke el ulemuchel el oureor er a ulebongel el sikang er sel sils.​—Mt. 20:8-15.

15. Tirke el rokui el ngellitel, te chedal a “blak a rengul e mellomes a rengul mesiou,’ el losaod er ngii a Mateus 24:45-47? Mosaod.

¹⁵ Ngdiak el rokui el oba omelatk el mo kiei er a eanged a chedal “ngikel blak a rengul e mellomes a rengul mesiou.” (Monguiu er a Mateus 24:45-47.) Me chelecha el taem, e ngdi ua sera kot el dart el rak, a Jehovah me a Jesus a ousbech er a redi kesai el rudam el omekang, e olisechakl er a rebetok. Te di mle kesai el ngellitel el Kristiano er a kot el dart el rak a luluusbech er tir el meluches aike el Bades el tekoi er a Grik. Me chelecha el taem, e te di kesai el ngellitel el Kristiano a mla mukngerachel el mo omesterir a rechedal a Dios a “kelir er sel belsechel.”

16. Ngera ke mla suubii er tia el suobel?

¹⁶ Tia el suobel, ngmla osisecheklid el kirel a ngera el tekoi? A Jehovah a mla tibir el mo msang a klou el ildois er a rechedal a klengar er tia el chutem el mo cherechar me a klengar er a eanged el mora rekesai el tir a mo mengedereder lobengkel a Jesus. A Jehovah a omekngeltengat er a rokui el mesiungel el “chad ra Judea” me tirke el “truich el chad,” e dirrek el mengerechir er tir el mo olengesenges a osisiu el llach e mo melemolem el blak a rengrir. Te rokui el kirir el mo ngariou a rengrir. Te rokui el kirir el dmak el mesiou er ngii e mo ngar a kltarreng. E dirrek tir el rokui a kmal kirir el mo blak a rengrir el melisiich er a budech er a delongelir el rudam me a rudos. E chelecha el di lolekedang a ulebongel, e bo dedak el rokui e dolemolem el mesiou er a Jehovah, e doltirakl er a Kristus el ua “tal delebechel.”​—Jn. 10:16.