LONGO DIA 5
Mbatuya N’enu
‘Tuatshigina guya n’enu, handaga tuavuile egi Nzambi udi n’enu.’—ZAK. 8:23.
LUNGIMBO 26 Muayitshitshile Mukunda nu Ame
NDAGA JIDI MU LONGO EDI *
Imeme iko (“athu kumi”) yakhala nu lutumbu lua gukombelela Yehowa hamoshi nu Aklisto ambiwe maji mu nyuma (“muenya Yuda”) (Tala paragrafe 1-2)
1. Yehowa wazuelele egi ndaga tshi mbayibua mu masugu etu?
YEHOWA wadiangele guzuela mukunda nu masugu etu egi: “Athu kumi a mazuelelo agasue a ha mavu mbaakuata, ayi mbaakuata mulele wa muenya Yuda mumoshi, nu mbaazuela egi: ‘Tuatshigina guya n’enu, handaga tuavuile egi Nzambi udi n’enu.’” (Zak. 8:23) “Muenya Yuda” owu udi mumonesa Aklisto anyi Nzambi gambile maji mu nyuma. Ana tamegewa nji egi ‘Isalele ya Nzambi.’ (Gal. 6:16) “Athu kumi” adi mumonesa Aklisto anyi adi nu felela dia gujinga ha mavu mayilago. Ana jiya egi Yehowa wana shimbiga Aklisto anyi ambiwe maji mu nyuma nu ana mona egi idi ndaga ya lutumbu ha gukombelela Yehowa hamoshi nawo.
2. Luholo lutshi “mala kumi” adi “muya nu” Aklisto ambiwe gale maji mu nyuma?
2 Ngatshima tuajiyilego gujiya majina a Aklisto agasue ambiwe gale maji mu nyuma adi hashi mangino, * athu anyi mbaajinga ha mavu ajiya “guya nu” Aklisto anyi ambiwe maji mu nyuma. Luholo lutshi? Biblia idi muzuela egi “mala kumi . . . mbaakuata mulele wa muenya Yuda mumoshi, nu mbaazuela egi: ‘Tuatshigina guya n’enu, handaga tuavuile egi Nzambi udi n’enu.’” Verse ya Bibli idi muzuelela muenya Yuda mumoshi. Uvi athu ene kumi adi muzuela egi: Tuatshigina guya “n’enu”, ndaga eyi idi mumonesa egi ashigo muzulela muenya Yuda mumoshi uvi avula. Idi mukotelesa egi muenya Yuda owu gashigo muthu mumoshi uvi udi mumonesa thundu ya Aklisto ambiwe maji mu nyuma. Aklisto ako ana kombelela hamoshi nu anyi ambiwe maji mu nyuma. Uvi, ana mona ndo Aklisto ambiwe maji mu nyuma gifua adi atuameji. Ana jiya egi mutuameji wetu udi Yesu.—Mat. 23:10.
3. Longo edi diza muhana mvutu jia mihu tshi?
3 Luholo tudi mujinga nu Aklisto ambiwe gale maji mu nyuma mangino, athu ako ajiya gudihula egi: (1) Luholo lutshi aklisto ambiwe gale maji mu nyuma ana guditadila? (2) Luholo lutshi tuajiya gukalegela aklisto ambiwe gale maji mu nyuma ndaga? (3) Tudi naye gudisagesa mukunda nu mutango wa athu adi mudia mapha ba? Tumuza muheta mvutu jia mihu eyi mu longo edi.
LUHOLO LUTSHI AKLISTO AMBIWE GALE MAJI MU NYUMA ANA GUDITADILA?
4. Ndaga tshi idi mu 1 Kolinto 11:27-29 Aklisto ambiwe gale maji mu nyuma adi naye gutangiza, nu mukunda natshi?
4 Aklisto ambiwe gale maji mu nyuma ajiya gutangiza ndaga idi mu 1 Kolinto 11:27-29. (Tanga.) Luholo lutshi Muklisto wambiwe gale maji mu nyuma wajiya gudia mapha mu luholo lushigo ‘luatagana’? yajiya gukhala ngenyi gula udi mudia uvi muene gashigo luko mutumagela mikhuala ya Yehowa. (Heb. 6:4-6; 10:26-29) Aklisto ambiwe gale maji mu nyuma adi naye gusala ya gujinginyina gula adi nu funu ya guheta ‘gishimbigo gia gutamega gua Nzambi mu njila ya Klisto Yesu.’—Fili. 3:13-16.
5. Luholo lutshi Aklisto ambiwe gale maji mu nyuna ana guditadila?
5 Nyuma ya Yehowa yana gukuatesa akombeledi enji ha gukhala athu a gudibulumuisa uvi ndo enya lulendo. (Ef. 4:1-3; Kol. 3:10, 12) Aklisto ambiwe gale maji mu nyuma ajiyilego gudimona gifua adi nu ndando yavula gubalega athu ako. Ana gujiya egi Yehowa gana guahana ndo nyuma yavula gubalega akombeledi enji ako. Ajiyilego gutangiza egi ana kotelesa giamatshidia gia Biblia muabonga gubalega athu ako. Ajiyilego nji guwambela muthu muko egi ambiwa gale maji mu nyuma, nu adi naye gusendesa gudia mapha. Uvi ana gujiya nu gudibulumuisa guagasue egi Yehowa wana tamega athu ha guya mu dilu.
6. Ha gutadila 1 Kolinto 4:7, 8, khadilo tshi Aklisto ambiwe gale maji mu nyuma adi naye gukhala nadio?
6 Ngatshima Aklisto ambiwe gale maji mu nyuma ana mona egi, idi ndaga ya lutumbu luholo Yehowa gaatamegele ha guya mu dilu, ene ana nenga ndo egi Aklisto ako a akalegele ndaga nu lutumbu. (Fili. 2:2, 3) Ana jiya nji egi, tangua Yehowa gaatombele, nga muthu mungoshi gajiyilego. Hene, Muklisto wambiwe gale maji mu nyuma gajiyilego gudihula gula athu ako ashigo mutshigina egi watombewa. Wana jiya egi Biblia yana gutuwambela egi gutshigina ndo muphushi ndaga jidi muzuela muthu egi Nzambi wamuhanyi ginemo giakoma. (Yat. 2:2) Ukambigo egi athu ako agujiye. Muklisto wambiwe gale maji mu nyuma gajiyilego guwambela athu ako gadi mutagana nawo mbala ya thomo egi, wambiwa gale maji mu nyuma. Gashigo naye nji guwambela athu ako egi wambiwe maji mu nyuma.—Tanga 1 Kolinto 4:7, 8.
7. Ndaga tshi Aklisto anyi ambiwe gale maji mu nyuna ashigo naye gutshita, nu mukunda natshi?
7 Aklisto ambiwe gale maji mu nyuma ashigo naye gutangiza egi adi naye gubalegesa tangua phamba nu Aklisto ako ambiwe maji mu nyuma. Ashigo naye gukamba Aklisto ako ambiwe maji mu nyuma, hagula azuelele ndaga yatadila gutombewa guawo, nga gudibungisa mu gisuegi ha gulonguga Biblia. (Gal. 1:15-17) Gula atshita ngenyi, mbaakhaphumuna hungu. Gutshita ngenyi guana gudivua ndo nu nyuma yabonga, inyi yana kuatesa akombeledi a Nzambi ha gujinga hamoshi.—Lomo 16:17, 18.
LUHOLO LUTSHI TUAJIYA GUKALEGELA AKLISTO AMBIWE GALE MAJI MU NYUMA NDAGA?
Tushigo naye gunemesa muavula gubalega Aklisto ambiwe maji mu nyuma, nga aphangi ako adi mutuameza gifua enya lutumbu a ha mavu awa (Tala paragrafe 8) *
8. Mukunda natshi tudi naye gukhala nu gutema mu luholo tudi mukalegela Aklisto ambiwe maji mu nyuma ndaga? (Tala nji note goshi’a diyiji.)
8 Luholo lutshi tuajiya gukalegela Aklisto ambiwe maji mu nyuma ndaga? Idi ndaga yabola gushimana muthu muavula gubalega, ngatshima udi Muklisto wambiwe maji mu nyuma. (Mat. 23:8-12) Tangua Biblia yana zuelela akulu, yana gututuma ha ‘gulandula gutshigina guawo,’ uvi ishigo gutuwambela egi tubuise nga muthu mungoshi mutuameji wetu. (Heb. 13:7) Idi yadiago egi, Biblia idi muzuela egi athu ako adi naye ‘gunemesewa luyadi.’ Idi ngenyi handaga, ana ‘tuameza mu luholo luabonga’ nu ana ‘tshita mudimo wakola mu guzuela nu gulongesa,’ uvi ishigo mukunda ambiwe maji mu nyuma. (1 Tim. 5:17) Gula tuasendesa gunemesa Aklisto ambiwe gale maji mu nyuma muavula gubalega, tuajiya guahana musonyi. * Nga ndo, tuajiya guatuma ha gubua enya lulendo. (Lomo 12:3) Tuajiyilego gutshita nga gima gimoshi giajiya gutuma aphangi a Klisto ha gutshita gubola guakoma ngegi!—Luka 17:2.
9. Luholo lutshi tuajiya gumonegesa egi tuana gunemesa Aklisto ambiwe gale maji mu nyuma?
9 Luholo lutshi tuajiya gumonesa egi tuana nemesa Aklisto atombewe gudi Yehowa? Tushigo naye guahula egi luholo tshi abuile Aklisto ambiwe maji mu nyuma. Ndaga eyi idi guatadila ene hakhawo, esue tuajiyilego guyijiya. (1 Tes. 4:11; 2 Tes. 3:11) Tuajiyilego nji gutangiza egi mulumi’enji, nga mukaji’enji, nga mvuaji jienji, nga enya fami yenji ako adi nji Aklisto ambiwe maji mu nyuma. Gukhala Muklisto wambiwe maji mu nyuma ishigo ndaga ya mahatshi nga ya fami. Uvi Yehowa wana tomba. (1 Tes. 2:12) Tushigo naye nji guhula mihu idi musagesa athu ako. Tuajiyilego guhula mukaji’a phangi wambiwe maji mu nyuma egi: luholo tshi wana gudivua tangua wana tangiza egi mbawushigo mujinga nu mulumi’aye mu mavu ahe-ahe? Tuana guhaga diago mutshima egi, mu mavu ahe-ahe, Yehowa ‘mbawutagenesa nzala jia ima yagasue ya monyo.’—Ngi. 145:16.
10. Luholo lutshi tuajiya gudibamba gula tushigo mushimana athu muavula gubalega?
10 Gula tushigo muzula Aklisto ambiwe maji mu nyuma gifua adi nu ndando yavula gubalega athu ako, mbatudibamba nji esue hakhetu. Luholo lutshi? Biblia idi muzuela egi Aklisto ako ambiwe maji mu nyuma mbaashigo musala ya gujinginyina. (Mat. 25:10-12; 2 Phet. 2:20, 21) Uvi gula tushigo mushimana athu muavula gubalega, mbatushigo mubua alandudi a athu nga hazonda, ikhale adi Aklisto ambiwe maji mu nyuma, nga anyi ana jiyiwa muabonga, nga anyi ana kalegela Yehowa sendese mualeha (Yuda 16) Ngenyi, gula ashigo luko a gujinginyina gudi Yehowa nga azolewa mu hungu, gutshigina guetu mukunda nu Yehowa, mbagushigo muleba nu mbatushigo mubemba gukombelela Yehowa.
TUDI NAYE GUDISAGESA MUKUNDA NU MUTANGO WA ATHU ADI MUDIA MAPHA BA?
11. Ndaga tshi tuajiya guzuela mukunda nu mutango wa athu ana gudia mapha?
11 Mu ivo yabalega, mutango wa athu ana gudia mapha mu gudibungisa gua guwunguluga gufua gua Yesu, wakhalele mubulumuga. Uvi mangino, mutango wene udi mukanduga muavula diago givo nu givo. Ndaga eyi yajiya gutusagesa ba? Ndo. Henyaha, tuzuelelenu ndaga jia ndando tudi naye gujiya.
12. Mukunda natshi tushigo naye gudisagesa mukunda nu mutango wa athu ana gudia mapha mu gudibungisa gua guwunguluga gufua gua Yesu?
12 ‘Yehowa wana jiya athu enji.’ (2 Tim. 2:19) Aphangi anyi ana tanga athu ana gudia mapha mu gudibungisa gua guwunguluga gufua gua Yesu, ana jiya ndo gula nanyi diago wambiwa maji mu nyuma, phamba Yehowa wana jiya. Aklisto ako ana gudia mapha, handaga ana gutangiza egi ambiwa maji mu nyuma, uvi ndo. Hene, athu ako akhalele mudia mapha abembele gudia. Yajiya gukhala egi, athu ako ana khala nu ukhashi mu muto, hene ana tangiza egi atombewa ha guya muhinyina nu Yesu mu dilu. Tushigo mujiya diago guvula gua Aklisto ambiwe gale maji mu nyuma anyi asala hashi.
13. Biblia yana monesa guvula gua Aklisto ambiwe maji mu nyuma mbaasala hashi tangua lamba diakola mbadisendesa ba?
13 Aklisto Ambiwe Maji mu Nyuma Mbaakhala mu Mafundo Avula a ha Mavu Tangua Mbadiza Yesu ha Guazula Muya Nawo mu Dilu. (Mat. 24:31) Biblia yana zuela egi, mu masugu a gisugishilo, ha mavu mbahakhala nu ndambo ya Aklisto ambiwe maji mu nyuma. (Yat. 12:17) Uvi yana monesa ndo gula mbaakhala guvula gutshi ha mavu tangua lamba diakola mbadisendesa.
Itshi tuajiya gutshita gula phangi mumoshi wadia mapha mu gudibungisa gua guwunguluga gua gufua gua Yesu? (Tala paragrafe 14)
14. Luholo Lomo 9:11, 16 idi guyimonesa, itshi tudi naye gujiya gu ndaga yatadila Aklisto ana mbiwa maji mu nyuma?
14 Yehowa wana tomba tangua gadi naye gumba Muklisto maji mu nyuma. (Lomo 8:28-30) Yehowa wasendesele gutomba Aklisto ambiwe maji mu nyuma gungima dia gufuzumuga gua Yesu. Idi mumonega egi, mu siekle ya thomo, Aklisto agasue a giamatshidia ambiwe maji mu nyuma. Gungima dia ivo, athu avula akhalele guditamega egi Aklisto, akhalelego mulandula Klisto. Uvi mu ivo yene, Yehowa wambile maji gudi ndambo ya Aklisto a giamatshidia akhalele hashi. Akhalele gifua ble yazuelele Yesu mu gifezegeselo gienji yakhalele mukula hamoshi nu muayiji abola. (Mat. 13:24-30) Mu masugu awa a gisugishilo, Yehowa yowu mulandula gutomba athu mbaakhala mukatshi dia athu 144 000. * Hene, gula Nzambi wazula desizio dia gutomba athu ako gutuama egi gisugishilo gize, tuajiyilego guhaga ba dute gu ndunge jia Yehowa. (Tanga Lomo 9:11, 16.) * Tudi naye gutema hagula tutshitshigo ndaga gifua atshitshi a mudimo azuelele Yesu mu gifezegeselo gienji. Asuangulugilego luholo fumu yawo gatshitshile ndaga mukunda nu athu asendesele mudimo mu ngueze.—Mat. 20:8-15.
15. Aklisto agasue ambiwe maji mu nyuma adi mukatshi dia Aklisto adi mutamegewa egi ‘muhiga wafubidila nu watema,’ adi muzuelela mu Matayo 24:45-47? Kotelesa.
15 Aklisto agasue adi nu felela dia gujinga mu dilu ashigo mukatshi dia Aklisto adi mutamegewa egi ‘muhiga wafubidila nu watema.’ (Tanga Matayo 24:45-47.) Mangino, Yehowa nu Yesu adi mukalegela athu azonda ha gudisa, nga ha gulongesa athu avula mu nyuma, gifua mu siekle ya thomo. Mu tangua diene, Yehowa wakalegele phamba Aklisto azonda ambiwe maji mu nyuma, ha gusonega gitshinyi gia Biblia giana tamegewa egi Écritures grecques chrétiennes. Mangino, phamba Aklisto azonda ambiwe maji mu nyuma adi nu ginemo gia ‘gudisa’ akombeledi a Nzambi ‘mu tangua diabonga.’
16. Itshi tualonguga mu longo edi?
16 Itshi tualonguga mu longo edi? Tuamonyi egi, Yehowa mbawuhana lujingu lua mayilago gudi akombeledi enji avula ha mavu. Uvi mbawuhana lujingu lua mayilago mu dilu gudi athu azonda anyi mbaahinyina nu Yesu. Yehowa wana shimbiga akombeledi enji agasue: “Muenya Yuda” nu “athu kumi”. Wana guatoga ha gutumagela mikhuala ya luholo lumoshi nu ha gusala ya gujinginyina. Athu agasue adi naye gukhala ya gudibulumuisa. Athu agasue adi naye gudibungisa ha gumukombelela hamoshi. Athu agasue adi naye gutshita ngolo ha gubamba guhuima mu hungu. Luholo gisugishilo gia mavu awa giasuena hehi, mukut’etu agasue tulandulenu gukombelela Yehowa nu gulandula Klisto gifua “thundu imoshi” ya imeme.—Yone 10:16.
^ par. 5 Guwunguluga gufua gua Yesu gua givo egi mbagukhala mu lusugu lua Mbadi 7 Avril. Luholo lutshi tudi naye gutadila athu ana gudia mapha nu ana gunua vinyo? Tudi naye gudisagesa gula mutango wa athu adi mudia mapha udi muya nu guvula? Longo edi diazudiwa mu longo dinyi diazogele mu Inzo Yaleha ya Mutaledi ya Français ya Janvier 2016. Diza muhana mvutu gu mihu eyi.
^ par. 2 Ha gutadila Ngimbo 87:5, 6, yajiya gukhala egi, Nzambi mbawumonesa majina a Aklisto agasue adi naye guhinyina nu Yesu mu dilu.—Lomo 8:19.
^ par. 8 Tala galuanda “L’amour ‘n’agit pas de façon inconvenante’” mu Inzo Yaleha ya Mutaledi, ya français ya Janvier 2016.
^ par. 14 Ngatshima Makalegelo 2:33 adi mumonesa egi nyuma yabonga yamuangegene mu njila ya Yesu, uvi Yehowa wana tomba athu.
^ par. 14 Ha gujiya ndaga jiavula, tala “Mihu yana Guhula Athu ana Gutanga Mikanda Yetu” mu Inzo Yaleha ya Mutaledi, ya français ya 1 Mai 2007.
LUNGIMBO 34 Tuwende nu Gujinginyina
^ par. 56 UKOTELESHI WA IFUANESA: Mumoneshi mumoshi wa hunji dia akulu atuameji nu mukaji’enji wajietewa gudi aphangi avula gu asamble a masugu thathu nu adi guakuata jifoto. Ishigo ndaga yabonga nga hazonda!
