STUDY ARTICLE 5
Mifala Bae Go Witim Iufala
“Letem mifala fo go wetem yufala . . . , bikos mifala herem dat God hemi stap wetem yufala.”—SEKARAEA 8:23.
SONG 26 Iu Duim for Mi
WANEM IUMI BAE STORYIM *
Olketa nara sheep (“tenfala strensa”) garem privilege for worshipim Jehovah witim olketa anointed (“wanfala Jew”) (Paragraf 1-2 storyim diswan)
1. Wanem nao Jehovah sei bae happen lo taem blo iumi?
JEHOVAH profesi abaotem taem blo iumi, hem sei: ‘Tenfala strensa wea langguis blong olketa hemi deferen, bae i holem kaleko blong wanfala Jiu, an tok olsem long hem, plis yu letem mifala fo go wetem yufala, bikos mifala herem dat God hemi stap wetem yufala.’ (Sekaraea 8:23) Datfala “Jew” hem piksarem olketa wea God anointim witim holy spirit. Olketa hia tu garem nem “Israel bilong God.” (Gal. 6:16) “Tenfala strensa” hia piksarem olketa wea garem hope for stap olowe lo disfala earth. Olketa savve Jehovah blessim disfala grup blo olketa anointed wan, and olketa ting hem wanfala privilege for worshipim Jehovah tugeta witim olketa.
2. Lo wanem wei nao “tenfala strensa” ‘go witim’ olketa anointed wan?
2 Hem hard for savve lo nem blo each wan lo olketa anointed wea stap lo earth distaem, * nomata olsem, olketa wea garem hope for stap lo earth savve ‘go witim’ olketa anointed wan. Lo wanem wei? Bible sei “tenfala strensa” bae ‘holem kaleko blong wanfala Jiu, an tok olsem long hem, plis yu letem mifala fo go wetem yufala bikos mifala herem dat God hemi stap wetem yufala.’ Datfala verse story abaotem wanfala Jew. Bat datfala toktok “yufala” hem minim staka pipol. Diswan minim datfala Jew hem no wanfala man nomoa bat hem minim full grup blo olketa anointed wan. Olketa wea no anointed worshipim Jehovah tugeta witim olketa wea anointed. Nomata olsem, olketa no ting lo olketa anointed wan olsem leader, bikos olketa luksavve Jesus nao leader blo olketa.—Matt. 23:10.
3. Olketa wanem kwestin nao bae iumi ansarem lo disfala study?
3 From samfala anointed Christian still stap yet witim pipol blo God distaem, maet samfala lo iumi ting olsem: (1) Hao nao olketa anointed wan shud ting lo olketa seleva? (2) Hao nao iumi shud treatim olketa wea anointed? (3) Waswe, iumi shud wari sapos namba blo olketa wea kaikaim bred and drinkim wine hem gogo ap? Disfala study bae ansarem olketa kwestin hia.
HAO NAO OLKETA ANOINTED SHUD TING LO OLKETA SELEVA?
4. Wanem warning nao stap lo 1 Corinth 11:27-29 wea olketa anointed shud tinghevi lo hem, and why nao olsem?
4 Olketa wea anointed shud tinghevi lo disfala warning wea stap lo 1 Corinth 11:27-29. (Readim.) Hao nao maet wanfala anointed kaikaim bred and drinkim wine lo Memorial lo wei wea “no showimaot respect”? Hem duim olsem taem hem kaikaim bred and drinkim wine bat hem no followim olketa standard blo Jehovah. (Heb. 6:4-6; 10:26-29) Olketa wea anointed luksavve olketa mas gohed faithful sapos olketa laek for kasem “datfala prize for laef long heven wea God givim” thru lo Christ Jesus.—Phil. 3:13-16.
5. Hao nao olketa anointed wan shud ting lo olketa seleva?
5 Holy spirit blo Jehovah helpem pipol blo hem for hambol and for no praod. (Eph. 4:1-3; Col. 3:10, 12) So olketa wea anointed no tingse olketa nao gud winim olketa narawan. Olketa savve hem no evritaem minim dat olketa anointed wan savve kasem moa holy spirit from Jehovah winim olketa nara servant blo hem. Olketa no tingse olketa nao savve lo olketa deep truth insaed Bible winim olketa narawan. And olketa bae no talem narawan, hao hem tu kasem anointing and shud kaikaim bred and drinkim wine lo Memorial. Bat, olketa hambol for luksavve only Jehovah nomoa savve invaetem pipol for go lo heven.
6. For fitim wanem 1 Corinth 4:7, 8 storyim, olketa wanem kaen wei nao olketa wea anointed shud garem?
6 Nomata olketa wea anointed feel hem privilege for olketa kasem invitation for go lo heven, olketa no expectim narawan for treatim olketa lo spesol wei. (Phil. 2:2, 3) And tu, olketa savve hao taem Jehovah anointim olketa, hem no duim datwan lo wei wea evriwan bae savve. So wanfala anointed wan hem no sapraes sapos samfala no kwiktaem bilivim dat hem anointed. Hem luksavve hao Bible talem iumi for no kwiktaem bilivim samwan wea sei God givim hem wanfala spesol responsibility. (Rev. 2:2) From wanfala wea anointed no laekem pipol for mekhae lo hem, lo firstaem wea hem meetim samwan, bae hem no talem olketa dat hem anointed. And hem bae no tok praod abaotem datwan lo olketa narawan.—Readim 1 Corinth 4:7, 8.
7. Wanem nao olketa wea anointed bae no duim, and why nao olsem?
7 Olketa anointed Christian no ting dat olketa shud spendem taem nomoa witim olketa nara anointed, olsem olketa member blo wanfala separate grup. Olketa bae no trae for faendem olketa nara anointed wan for olketa storyim hao olketa kasem anointing, or for olketa seleva kam tugeta olsem wanfala grup for duim Bible study. (Gal. 1:15-17) Kongregeson bae no wan mind sapos olketa anointed wan duim olketa samting olsem. Sapos olketa duim datwan olketa againstim holy spirit wea helpem pipol blo God for garem peace and wan mind.—Rome 16:17, 18.
HAO NAO IUMI SHUD TREATIM OLKETA ANOINTED?
Iumi shud no treatim olketa anointed wan or eni narawan wea lukaftarem waka olsem olketa famous pipol (Paragraf 8 storyim diswan) *
8. Why nao iu need for careful lo hao iu treatim olketa wea kaikaim bred and drinkim wine lo taem blo Memorial? (Lukim tu footnote.)
8 Hao nao iumi shud treatim olketa brata and sista wea anointed? Hem no stret for tinghae tumas lo wanfala man, nomata sapos hem wanfala anointed brata blo Christ. (Matt. 23:8-12) Taem Bible story abaotem olketa elder, hem encouragem iumi for “garem sem faith olsem olketa,” bat hem no talem iumi for mekem eni man for kamap leader. (Heb. 13:7) Hem tru, Bible sei samfala fit for kasem “bigfala respect.” Bat diswan hem bikos olketa “lead long gudfala wei” and ‘waka hard for story and teach,’ no bikos olketa anointed. (1 Tim. 5:17) Sapos iumi praisem tumas olketa anointed wan and ova tumas lo hao iumi treatim olketa, iumi maet mekem olketa for shame. * Or worse go moa, iumi maet mekem olketa for kamap praod. (Rome 12:3) Iumi no laek for duim eni samting wea maet mekem wanfala lo olketa anointed brata blo Christ for duim kaen serious mistek olsem!—Luke 17:2.
9. Hao nao iumi savve showimaot iumi respectim olketa anointed Christian?
9 Hao nao iumi savve showimaot iumi respectim olketa wea Jehovah anointim? Iumi bae no askem olketa abaotem hao olketa kamap anointed. Datwan hem for hemseleva nomoa, hem samting wea iumi no garem raet for savve abaotem. (1 Thess. 4:11; 2 Thess. 3:11) And iumi shud no tingse hasband or waef, parents, or olketa nara famili member tu anointed. Man no savve kasem hope for go lo heven from famili blo hem. Hem kasem datwan from God. (1 Thess. 2:12) Iumi shud no askem olketa kwestin wea maet mekem olketa feel nogud. Olsem example, iumi bae no askem waef blo wanfala anointed brata hao nao feeling blo hem abaotem wei wea hem bae laef olowe lo earth bat hasband blo hem bae go lo heven. Iumi barava sure hao lo niu world, Jehovah bae mek sure dat evri samting wea laef bae hapi and satisfae.—Sams 145:16.
10. Sapos iumi stap klia lo wei for tinghae tumas lo samwan, hao nao datwan savve protectim iumiseleva?
10 And tu, iumi bae protectim iumiseleva sapos iumi no treatim olketa anointed wan olsem olketa important winim narawan. Lo wanem wei? Bible talem iumi hao samfala wea anointed maet no gohed faithful. (Matt. 25:10-12; 2 Pet. 2:20, 21) Bat sapos iumi stap klia lo wei for tinghae tumas lo samwan, datwan bae mekem iumi no followim olketa, nomata sapos olketa anointed, or samwan wea evriwan savve lo hem, or wea servem Jehovah for longtaem finis. (Jude 16) Then, sapos olketa no faithful or lusim kongregeson, iumi bae no lusim faith blo iumi lo Jehovah or stop for servem hem.
WASWE, IUMI NEED FOR WARI ABAOTEM NAMBA BLO PIPOL WEA KAIKAIM BRED AND DRINKIM WINE?
11. Wanem nao happen lo namba blo olketa wea kaikaim bred and drinkim wine lo taem blo Memorial?
11 For staka year, namba blo olketa wea kaikaim bred and drinkim wine hem gogo daon. Bat lo olketa year wea just go pas, datfala namba hem go ap evri year. Waswe, iumi need for wari abaotem diswan? Nomoa. Bae iumi storyim samfala important samting wea iumi mas tingim.
12. Why nao iumi shud no wari abaotem namba blo olketa wea kaikaim bred and drinkim wine lo Memorial?
12 “Jehovah hem savve gud long olketa bilong hem.” (2 Tim. 2:19) Jehovah savve lo hu nao hem really anointed, bat olketa brata wea kaontem namba blo olketa wea kaikai bred and drinkim wine lo Memorial olketa no savve. So insaed datfala namba, hem samfala wea tingse olketa anointed bat olketa no really anointed. Olsem example, samfala wea bin kaikaim bred and drinkim wine gogo olketa stop for duim datwan. Olketa narawan maet garem problem saed lo tingting and feeling blo olketa wea mekem olketa for tingse olketa bae rul witim Christ lo heven. So hem klia, iumi no savve lo real namba blo olketa anointed wan wea stap yet lo earth.
13. Waswe, Bible talem namba blo olketa anointed wan wea bae stap yet lo earth taem big trabol hem start?
13 Olketa anointed wan bae stap lo staka difren ples lo earth taem Jesus kam for tekem olketa go lo heven. (Matt. 24:31) Bible sei lo olketa last day, namba blo olketa anointed wea stap lo earth bae no staka. (Rev. 12:17) Bat Bible no talem namba blo olketa anointed wan wea bae stap yet lo earth taem big trabol hem start.
Wanem nao iumi shud duim sapos samwan kaikaim bred and drinkim wine lo Memorial? (Paragraf 14 storyim diswan)
14. Olsem samting wea Rome 9:11, 16 storyim, wanem nao iumi need for minim abaotem wei wea Jehovah chusim olketa anointed wan?
14 Jehovah nao disaedem taem wea hem bae chusim olketa anointed. (Rome 8:28-30) Jehovah start for chusim olketa anointed wan bihaen Jesus resurrect. Luk olsem lo first century, evri tru Christian nao anointed. Lo olketa year bihaen, staka lo olketa wea sei olketa Christian no really followim Christ. Nomata olsem, lo olketa year hia, Jehovah anointim tu-thri wea olketa tru Christian. Olketa olsem wheat wea Jesus sei bae grow midolwan lo olketa rabis grass. (Matt. 13:24-30) Lo olketa last day, Jehovah gohed for chusim pipol wea bae kamap part lo datfala 144,000. * So sapos God disaed for chusim samfala lo olketa hia just bifor end hem kam, iumi no kwestinim wisdom blo hem. (Readim Rome 9:11, 16.) * Iumi mas careful for no duim samting olsem olketa wakaman wea Jesus storyim lo wanfala lo olketa tokpiksa blo hem. Olketa komplen abaotem wei wea datfala boss treatim olketa wea just kam lo last hour.—Matt. 20:8-15.
15. Waswe, evri anointed nao part lo “datfala wakaman wea faithful and wise” wea Matthew 24:45-47 storyim? Explainim kam.
15 No evriwan wea garem hope for stap lo heven olketa part lo “datfala wakaman wea faithful and wise.” (Readim Matthew 24:45-47.) Olsem lo first century, distaem tu, Jehovah and Jesus iusim tu-thri brata for feedim, or teachim staka pipol. Only tu-thri anointed Christian lo first century nomoa Jehovah iusim for raetem olketa Christian Greek Scripture. Distaem, only tu-thri anointed Christian nomoa garem responsibility for givim “kaikai long barava taem” lo pipol blo God.
16. Wanem nao iu lanem from disfala study?
16 Wanem nao iumi lanem lo disfala study? Jehovah disaed for givim laef olowe lo earth lo staka pipol blo hem and laef lo heven lo samfala wea bae rul witim Jesus. Jehovah givim reward for evriwan wea worshipim hem, nomata hem datfala “Jew” or “tenfala strensa,” and hem laekem olketa for obeyim olketa sem law and for gohed faithful. Olketa mas gohed hambol. Olketa mas worshipim hem tugeta and mas wan mind. And evriwan mas waka tugeta for keepim peace insaed kongregeson. Taem iumi gogo for kasem end, iumi evriwan laek for gohed servem Jehovah and followim Christ olsem “wanfala sekson nomoa.”—John 10:16.
^ par. 5 Disfala year, Memorial for tingim dae blo Christ bae kamap lo Tuesday, April 7. Hao nao iumi shud ting lo olketa wea kaikaim bred and drinkim wine lo datfala evening? Waswe, iumi shud wari sapos namba blo olketa wea kaikaim bred and drinkim wine hem gogo ap? Iumi bae kasem ansa for olketa kwestin hia lo disfala study. Disfala study hem kam from wanfala article wea stap lo January 2016 Wastaoa.
^ par. 2 Olsem Sams 87:5, 6 storyim, maet lo future God bae talemaot nem blo olketa wea bae rul witim Jesus lo heven.—Rome 8:19
^ par. 8 Lukim box “Man wea Garem Love No Showimaot Nogud Wei” lo Wastaoa blo January 2016.
^ par. 14 Nomata Acts 2:33 hem sei Jesus nao givim kam holy spirit, really Jehovah nao invaetem each wan.
^ par. 14 For samfala information moa, lukim “Questions From Readers” lo The Watchtower, May 1, 2007.
SONG 34 Gohed for Faithful
^ par. 56 PIKSA: Tingim sapos wanfala hedquarter representative and waef blo hem attendim wanfala convention, and evriwan hipap raonem tufala for tek piksa. Datwan barava no showimaot respect!
