1. ¿Imatataq Jehoväqa musyatsikurqan kë tiempupaq?

KË TIEMPUPAQ parlarninmi Jehoväqa kënö nirqan: “Noqa llapanta mandaq TEYTA DIOS karmi nï: Tsë witsanmi jinantin nacionpita karpis y ima idiömata parlaq karpis chunka nunakunam Judá nación juk nunata ratashninpita tsarïkur rowayanqa: ‘Qamwan ëwëtam munayä. Wiyayarqü Teyta Dios qamkunawan këkashqantam’ nir” (Zac. 8:23). ‘Judá nación juk nuna’ nirqa ciëlupaq akrashqakunapaqmi parlëkan y pëkunapaqmi Bibliachö nin ‘Diospa Israelnin’ (Gäl. 6:16). Y ‘chunka nunakunapaq’ parlarqa mana wanushpa kë Patsachö kawaqkunapaqmi parlëkan. Pëkunaqa allim musyayan ciëlupaq akrashqakunata kikin Jehovä akranqanta, tsëmi pëkunawan juntu Diosta kushishqa sirwiyan.

2. ¿Imatataq rurëkäyan ciëlupaq akrashqakunawan Patsachö täraqkuna?

² Kanan witsankunaqa manam ciëlupaq akrashqakunapa jutinkunataqa musyantsiktsu *. Ciëlupaq akrashqakunaqa Patsachö kawaqpaq kaqkunawan juntum Jehoväta sirwikäyan. Bibliachöqa nin, “chunka nunakunam Judá nación juk nunata ratashninpita” tsaripakurnin kënö niyanqantam: “Qamwan ëwëtam munayä. Wiyayarqü Teyta Dios qamkunawan këkashqantam”. Këqa rikätsikun ‘Judá nación juk nuna’ nirqa juk nunallapaq  mana parlëkanqantam, sinöqa llapan ciëluta ëwaqkunapaqmi. Tsënö kaptimpis, Jesuslla mandakoqninkuna kaptinmi ciëlupaq akrashqakunataqa mandakoqninkunatanötsu rikäyan (Mat. 23:10).

3. ¿Ima tapukuykunapitataq yachakushun?

³ Ciëlupaq akrashqakunaqa kanan witsampis kë Patsachöqa kayanran. Tsëmi wakinkunaqa kënö tapukuyan: “¿Ciëlupaq akrashqakunaqa mas alli cristiänu kayanqantaku pensayanman? ¿Jesus wanunqan yarpëchö juk cristiänu tantata mikuptin y vïnuta upuptin imanötaq rikashwan? ¿Yarpachakushwantsuraq ciëlupaq akrashqakuna cada wata miraptin?”. Kë yachatsikuychömi kë tapukuykunapita yachakushun.

4. 1 Corintius 11:27-29 Bibliachö ninqannö, ¿ciëlupaq akrashqakuna imapita cuidakuyänampaqtaq cläru willakurqan? Y ¿imanirtaq tsëta cuentaman churayänan?

⁴ 1 Corintius 11:27-29 (leyiri) Biblia ninqanchöqa, clärum willakun imapita cuidakuyänampaq kaqta. ¿Imanötaq  ciëlupaq akrashqakunaqa Jehoväta ‘mana respetakoq’ tikrariyanman? Tantata mikur y vïnuta upurpis, Jehoväta mana cäsukurmi (Heb. 6:4-6; 10:26-29). Ciëlupaq akrashqakunaqa llapanchömi Jehoväta cäsukuyänan, tsënöpa Cristu Jesuswan gobernayänampaq (Filip. 3:13-16).

5. ¿Imanötaq ciëlupaq akrashqakunaqa kayan?

⁵ Jehoväqa humildi kanapaqmi yanapamantsik (Efes. 4:1-3; Col. 3:10, 12). Tsëmi ciëlupaq akrashqakunaqa wakinkunapita mas alli kayanqantatsu creiyan. Musyayanmi pëkunatanölla wakin sirweqninkunata Jehovä yanapanqanta. Y manam pensayantsu, Diospa Palabranta mas yachayanqantaqa. Jina manam kënö niyantsu: “Qampis ciëlupaq akrashqam kanki, tsëmi vïnuta upunkïman y tantata mikunkiman”. Humildi karninmi pëkunaqa musyayan kikin Jehovälla pitapis ciëlupaq akranqanta.

6. 1 Corintius 4:7, 8 Bibliachö ninqannö, ¿ciëlupaq akrashqakunaqa imakunapitataq cuidakuyänan?

⁶ Ciëluta ëwayänampaq Jehovä akrashqa kaptimpis, manam wakinkuna mas alli tratayänanta shuyaräyantsu (Filip. 2:2, 3). Jina ciëlupaq akrarninqa Jehoväqa manam pitapis musyatsintsu. Tsëmi ciëlupaq akrashqa cristiänuqa espantakuntsu wakinkuna mana creiyaptin. Tsëpaq parlarmi Bibliaqa yachatsimantsik imatapis raslla mana creirinapaq. Tsëmi ciëlupaq akrashqa kayanqanta niyaptinqa rasllaqa creirinantsiktsu (Rev. 2:2). Jina ciëlupaq akrashqa kayanqantaqa manam gälakurtsu pï mëtapis willakur puriyan (leyi 1 Corintius 4:7, 8).

7. Ciëlupaq akrashqakunaqa, ¿imatataq rurayanmantsu? Y ¿imanirtaq tsëta rurayanmantsu?

⁷ Ciëlupaq akrashqa cristiänukunaqa manam kikinkuna purallatsu imatapis rurayan. Jina manam ciëlupaq akrashqa kayanqampita parlayänampaq y Bibliapita yachakuyänampaq juntakäyantsu (Gäl. 1:15-17). Tsëta rurarqa manam Jehovä munanqannötsu kawëkäyanman. Y cristiänu mayinkunawan kushishqa kayänampaqpis manam yanapakunqatsu (Rom. 16:17, 18).

8. ¿Imanirtaq ciëlupaq akrashqakunataqa alabapashwantsu? (Willakuytawan rikäri).

⁸ ¿Imanötaq ciëlupaq akrashqa wawqi panikunata rikashwan? Manam ciëlupaq  akrashqa kayanqampitaqa alabapashwantsu (Mat. 23:8-12). Bibliachöqa creikoqkunata pushaqkunapaq “pëkunanö markäkïyoq këta tïrayë” ninmi, peru manam mandakoqtanö rikänapaqtsu nimantsik (Heb. 13:7). Jina wakin cristiänukuna “respetashqa kayätsun” ninmi. Manam ciëlupaq akrashqa kayanqampitatsu, sinöqa wawqi panikunata ‘alli pushakoq’ karnin yanapayanqampita y ‘yachatsikurnin sinchi trabajayanqampitam’ (1 Tim. 5:17). Ciëlupaq akrashqakunata alabapashqaqa, itsa penqakuyanman o allish tukuyanman (Rom. 12:3). Tsënö tikrakuriyänantaqa manam munantsiktsu (Lüc. 17:2). *

9. Ciëlupaq akrashqakunataqa, ¿imanötaq respetashwan?

⁹ Ciëlupaq Jehovä akranqankunataqa, ¿imanötaq respetashwan? Tsëtaqa rikätsikuntsik, ciëlupaq imanö akrashqa kanqanta mana tapuparmi. Tsë asuntumanqa manam mëtikunantsiktsu (1 Tes. 4:11; 2 Tes. 3:11). Jina manam pensanantsiktsu qowan o warmin, teytankuna y wakin familiankunapis akrashqa kayanqanta. Tsëqa manam herenciatsu, kikin Jehovä Diosmi akran (1 Tes. 2:12). Jina imata tapurinapaqpis alliran yarpachakunantsik. Ciëlupaq akrashqa wawqipa warmintaqa manachi nishwantsu: “¿Imanötaq mushoq Patsachö japallëki kawakunki?”. Musyanqantsiknöpis mushoq Patsachöqa Jehovä Diosqa manam imantsikpis pishitsimunqatsu, kushishqanam kawakushun (Sal. 145:16).

10. ¿Imanirtaq wakinkunata alabapashwantsu?

¹⁰ Jina ciëlupaq akrashqakunata wakinkunapita mas alli tratashqaqa, noqantsikpaqqa manam allitsu kanqa. ¿Imanirtaq tsëta nintsik? Bibliachöqa wakin ciëlupaq akrashqakuna rakikäkuriyänampaq kaqtam willakun (Mat. 25:10-12; 2 Pëd. 2:20, 21). Tsëmi ciëlupaq akrashqa o mëtsika tiempupana Jehovä Diosta sirwiyaptimpis, mandakoqnintsiktanöqa rikänantsiktsu (Jüd. 16). Tsëqa yanapamäshun Jehovä Diosta sirwinapaqmi, wakinkuna dejariyaptimpis.

11. ¿Imataq pasakushqa tantata mikoqkunawan y vïnuta upoqkunawanqa?

¹¹ Unëqa Jesuspa wanïnin yarpëchö tantata mikoq y vïnuta upoqqa wallkayarqanmi. Peru qepa watakunataqa mirëkanmi. Tsërëkurtsuraq ¿yarpachakushwan? Manam. Tsëta yachakurishun.

12. ¿Imanirtaq yarpachakushwantsu tantata mikoq y vïnuta upoqkuna mirayaptin?

¹² “Kikimpa kaqkunataqa Jehovä reqinmi” (2 Tim. 2:19). Ciëlupaq pikuna akrashqa kayanqantaqa Jehovällam musyan, peru Jesuspa wanïnin yarpëchö tanta mikoqta y vïnu upoqkunata yupaq wawqikunaqa manam musyayantsu. Tsëmi ciëlupaq akrashqakunaqa cada wata mirayan, ciëluta ëwayänampaq pensaqkunatawan yupayaptin. Y wakinnam peqankuna mana alli kaptin tsënö pensayan. Tsëmi musyantsiktsu ciëluman ëwaqkuna ëkaq kayanqanta.

13. ¿Ushakë junaq manaraq qallaptin ëkaq kayänampaq kaqta Bibliachö willakunku?

¹³ Jesus mandakur qallëkunampaqqa ciëlupaq akrashqakunataran  më tsëpita juntanqa (Mat. 24:31). Ushakë junaqpaq Biblia willakurqa kë Patsachö juk grüpu ciëlupaq akrashqakuna kayanqantaran nin (Rev. 12:17). Peru manam nintsu ushakë junaq manaraq qallaptin ëkaq kayänampaq kaqta.

14. Romänus 9:11, 16 Bibliachö ninqampitaqa, ¿imatataq yachakuntsik ciëlupaq Jehovä akranqampita?

¹⁴ Jehoväqa musyanmi akrashqankunata imë qayanampaq kaqta (Rom. 8:28-30). Jesus kawariramuptinllam Jehoväqa ciëluta ëwaqkunata akrar qallarirqan. Tsë witsan cristiänukunaqa llapanmi ciëluta ëwayänampaq akrashqa kayarqan. Tiempu pasariptinqa, cristiänu tukoqkunapis akrashqa kayanqantam niyarqan. Peru watakuna pasariptinqa Jehoväqa wallkaq cristiänukunallatam akrarqan. Pëkunapaqmi Jesus nirqan mana alli qorachö trïgu cuenta kayanqanta (Mat. 13:24-30). Kë ushanan junaqkunachöqa 144.000 ciëlupaq ëwaqkunatam Jehoväqa akrar sïguikan. * Tsëmi cläru rikätsimantsik ushakë junaq manaraq qallaptin, ciëluta ëwayänampaq kikin Jehovä akranqanta (Leyi Romänus 9:11, 16). * Manam Jesus yachatsikunqan nunakunanö këtaqa munantsiktsu, pëkunaqa patronnin ruranqantam mana allitanö rikäyarqan (Mat. 20:8-15).

15. Mateu 24:45-47 Bibliachö ninqannö, ¿llapan ciëluta ëwaqkunatsuraq “alli juiciuyoq y markäkïpaq sirwipakoq” kayan?

 ¹⁵ Manam llapan ciëlupaq akrashqakunatsu ‘alli juiciuyoq y markäkïpaq sirwipakoqqa’ kayan (leyi Mateu 24:45-47). Jehoväwan Jesusqa apostolkuna kawayanqan witsannöllam, kanan tiempupis wallkaq sirweqninkunallawan markanta yachëkätsin. Jina tsë witsanllam juk ishkë ciëlupaq akrashqakunawan Jehoväqa qellqatsirqan Mateupita Revelacion librukunata. Kanan tiempupis juk ishkaq ciëlupaq akrashqakunallawanmi Jehoväqa markanta yachëkätsin.

16. ¿Imatataq yachakurquntsik?

¹⁶ Këkunapitam yachakurirquntsik: Jehoväqa wallkaqllatam ciëluchö Jesuswan gobernayänampaq akrashqa, peru cäsi llapan sirweqninkunataqa kë Patsachö kawayänampaqmi änishqa. Jehoväqa llapan sirweqninkunatam bendicin, peru mandanqankunata cäsukuyänanta y pëllata sirwiyänantam shuyaran. Tsëmi sirweqninkunaqa llapampis humildi y juknölla kayänan. Ushakëpaq ichikllana pishiptinmi llapan cristiänu mayintsikkunawan Jehoväta y Jesusta juknölla sirwir sïguinantsik (Juan 10:16).