STATIJA PROUČIBASKE 5
„Ka dža tumencar“
Ka dža tumencar, soske šungjem kaj o Devel tano tumencar (ZAH. 8:23)
GILI 15 Falinen e Care!
BAŠO SO KA KERA LAFI *
E „javere bakhrenge“ („deš manuša“) tani bari čest so šaj te služinen e Jehovaske zaedno e pomazanikoncar („jekh Evrei“) (Dikh o pasusija 1-2)
1. So prorokujngja o Jehova bašo amaro vreme?
BAŠO amaro vreme o Jehova prorokujngja: „Deš manuša taro sa o čhibja so kerena lafi o narodija ka astaren taro šej jekhe Evree, ka astaren le hem ka vakeren: ’Ka dža tumencar, soske šungjem kaj o Devel tano tumencar‘“ (Zah. 8:23). O „Evrei“ pretstavinela okolen so o Devel pomazingja len sveti duhoja. Baši lende isto agjaar vakerela pe kaj tane „e Devleskoro Izrael“ (Gal. 6:16). „O deš manuša“ pretstavinena okolen so isi len nadež bašo večno životo ki Phuv. Ola džanena kaj o Jehova dela bereketi e pomazanikonge, hem adaleske lenge tani čest so služinena zaedno lencar.
2. Ko savo način o deš manuša „džana“ e pomazanikoncar?
2 Avdive, okola so isi len nadež te živinen večno ki Phuv na džanena ko anav sa e pomazime hristijanen. * Sepak, šaj te „džan“ lencar. Ko savo način? Povrzimo e deše simbolično manušencar, i Biblija vakerela: „[Ola] ka astaren taro šej jekhe Evree, ka astaren le hem ka vakeren: ’Ka dža tumencar, soske šungjem kaj o Devel tano tumencar‘“. Iako ko akava stiho tano spomnimo samo jekh Evrei, i zamenka „tumencar“ ko solduj slučaija sikavela kaj kerela pe lafi bašo poviše taro jekh manuš. Akava značinela kaj o Evrei nane samo jekh manuš, nego celo grupa pomazanikija. O hristijanja so nane pomazime služinena e Jehovaske zaedno e pomazanikoncar. Ama, ola na dikhena ko pomazime hristijanja sar ple vodačija, adaleske so jasno lenge kaj o Vodači tano o Isus (Mat. 23:10).
3. Kola pučiba ka oven odgovorime ki akaja statija?
3 Adaleske so avdive ki Phuv panda isi pomazime hristijanja, nesave šaj pučena pe: 1) Sar valjani te dikhen ki peste o pomazanikija? 2) Sar valjani te ponašina amen okolencar so lena taro simbolija ki Spomen-svečenost? 3) Dali valjani te sekirina amen ako ponadari da bajrola lengoro broj? Ki akaja statija ka dikha o odgovor taro akala pučiba.
SAR VALJANI TE DIKHEN KI PESTE O POMAZANIKIJA?
4. Sprema 1. Korinkjanite 11:27-29, bašo kova predupreduvanje valjani te razmislinen o pomazanikija, hem soske?
4 O pomazime hristijanja valjani šukar te razmislinen bašo predupreduvanje soj pišimo ko 1. Korinkjanite 11:27-29. (Čitin.) Sar šaj jekh pomazimo hristijani te na ovel dostojno te lel taro simbolija? Ov nane te ovel dostojno te hal taro maro hem te piel tari mol ako na živinela sprema e Jehovaskere pravedna merilija (Evr. 6:4-6; 10:26-29). O pomazanikija džanena kaj mora te ačhoven verna e Jehovaske ako mangena te dobinen „i nagrada taro Devel, koja soj životo ko nebo preku o Hristos Isus“ (Fil. 3:13-16).
5. Sar valjani o pomazime hristijanja te dikhen ki peste?
5 E Jehovaskoro sveti duh pomožinela leskere slugenge te oven ponizna, a na gorda (Ef. 4:1-3; Kol. 3:10, 12). Adaleske, o pomazime hristijanja na mislinena kaj tane pošukar taro javera. Ola džanena kaj adava soj tane pomazime na značinela kaj avtomatski o Jehova lenge dela poviše sveti duh nego e javere ple slugenge. O pomazanikija na mislinena kaj pohor haljovena o biblisko čačipe taro sa o javera. Osven adava, ko nisavo slučaj nane te vakeren nekaske kaj ov da tano pomazimo hem kaj valjani ov da te počminel te lel taro simbolija. Namesto adava, ola ponizno priznajnena kaj samo o Jehova tano adava so vikinela nekas te živinel ko nebo.
6. Sprema 1. Korinkjanite 4:7, 8, sar valjani te ponašinen pe o pomazime hristijanja?
6 Iako džanena kaj tani bari čest te oven vikime te živinen ko nebo, o pomazime hristijanja na adžikerena taro javera te ponašinen pe lencar ko nesavo posebno način (Fil. 2:2, 3). Isto agjaar, ola džanena kaj, keda o Jehova pomazingja len, na širingja adava sarinenge. Adaleske nane iznenadime ako nekoj na verujnela lenge odma kaj sine pomazime sveti duhoja. Ustvari, ola korkori tane svesna kaj i Biblija predupredinela amen te na verujna but sigate ako nekoj vakerela kaj o Devel biringja le baši nesavi posebno služba (Otk. 2:2). Adaleske so na mangena te privlečinen vnimanie ki peste, ola na vakerena sekaske so ka zapoznajnen le kaj tane pomazime. Hem ko nisavo slučaj na falinena pe e javerenge bašo adava! (Čitin 1. Korinkjanite 4:7, 8.)
7. So na kerena o pomazime hristijanja, hem soske?
7 O pomazime hristijanja na mislinena kaj valjani te družinen pe samo javere pomazanikoncar, sar te phene tane delo taro nesavo elitno klubi. Ola na probinena te oven ko kontakt e javere pomazanikoncar te šaj te keren lencar lafi bašo adava soj pomazime ili te keren peske privatna grupe bašo proučibe i Biblija (Gal. 1:15-17). Asavko ponašibe šaj te kerel podelbe ko sobranie. Isto agjaar, ko asavko način ka protivinen pe ko vlijanie so avela taro sveti duh, kova so kerela te ovel mir hem jekhipe maškar e Devleskoro narodo (Rim. 16:17, 18).
SAR VALJANI TE PONAŠINA AMEN E POMAZANIKONCAR?
Na valjani te ponašina amen e pomazanikoncar ili e javere phralencar so predvodinena sar te phene tane slavna manuša (Dikh o pasus 8) *
8. Soske valjani te pazina sar ponašinaja amen okolencar so lena taro simbolija ki Spomen-svečenost? (Dikh hem i fusnota.)
8 Sar valjani te ponašina amen e pomazime phralencar hem phenjencar? Ka ovel pogrešno te vazda nekas, čak te ovel e Hristoseskoro pomazimo phral (Mat. 23:8-12). Keda kerela lafi bašo starešine, i Biblija pottikninela amen te ovel amen sar „lengiri vera“, ama nigde ki late na pišinela kaj valjani te dža palo nesavo manuš sar amaro vodači (Evr. 13:7). Točno, oj vakerela kaj nesave tane „dostojna baši duplo čest“. Ama, ola nane dostojna baši asavki čest adaleske soj tane pomazime, nego adaleske so „predvodinena ko šukar način“ hem but trudinena pe šukar te sikaven e javeren bašo e Devleskoro Lafi (1. Tim. 5:17). Okolen so isi len nebesno povik ka ovel lenge but neprijatno ako sikavela pe lenge preterano čest ili vnimanie. * Soj panda pološno, ako o javera ponašinena pe lencar ko posebno način, o pomazanikija šaj te počminen te oven gorda (Rim. 12:3). Sigurno nikoj amendar na mangela te anel dži ko adava nekoj taro e Hristoseskere phralja te kerel asavki seriozno greška! (Luka 17:2).
9. Sar šaj te sikava poštovanje sprema o pomazanikija?
9 Sar šaj te sikava poštovanje sprema okola so pomazingja len o Jehova sveti duhoja? Na valjani te puča len sar ule pomazanikija. Adaja tani lično buti koja so na valjani te interesinel amen (1. Sol. 4:11; 2. Sol. 3:11). Osven adava, na valjani te pretpostavina kaj o bračno partneri, o roditelija ili javera džene tari familija e pomazanikoskiri isto agjaar tane pomazime. I nebesno nadež na dobinela pe tari familija. Adaja nadež dela la o Devel (1. Sol. 2:12). Na valjani te puča nešto so šaj te povredinel e javeren. Na primer, na valjani te puča jekhe pomazanikoskere romnja sar osetinela pe keda mislinela kaj ka živinel večno ki Phuv bizo plo rom. Ustvari, šaj sarine te ova celosno uverime kaj, ko nevo sveto o Jehova ka del sa e manušenge adava so mangena (Ps. 145:16).
10. Sar šaj te pazina amen tari zamka te da previše vnimanie nesave manušenge?
10 Ako na ponašinaja amen e pomazanikoncar sar považna e javerendar, ka zaštitina amende da. Sar? I Biblija vakerela kaj nesave pomazime hristijanja nane te ačhoven verna e Devleske (Mat. 25:10-12; 2. Pet. 2:20, 21). Ako pazinaja amen tari zamka te da preterano vnimanie hem važnost nesave manušenge, tegani nane te ova sledbenikija e manušengere, pa čak te oven pomazanikija, pendžarde ili te služinen e Jehovaske but berša. Ako nekoj lendar na ačhovela verno ili mukhela o sobranie, adava nane te kerel amari vera poslabo ili te čhinavel amen te služina e Jehovaske.
VALJANI LI TE SEKIRINA AMEN AKO BAJROLA O BROJ OKOLENGORO SO LENA TARO SIMBOLIJA?
11. Savi promena isi ko broj okolengoro so lena taro simbolija ki Spomen-svečenost?
11 Beršencar, o broj okolengoro so lena sine taro simbolija ki Spomen-svečenost hari po hari tiknjola sine. Ama, ko posledno vreme akava broj počmingja taro berš ko berš te bajrol. Dali akava valjani te sekirinel amen? Na. Te dikha soske.
12. Soske na valjani te sekirinel amen o broj okolengoro so lena taro simbolija ki Spomen-svečenost?
12 „O Jehova pendžarela okolen soj leskere“ (2. Tim. 2:19). Različno taro Jehova, o phralja so gejnena okolen so lena taro simbolija ki Spomen-svečenost našti te proceninen koj tano čače pomazimo. Adaleske, ko akava broj tane vklučime okola da so mislinena kaj tane pomazime, a nane. Na primer, nesave so jekh vreme lena sine taro simbolija, pokasno čhinavgje te keren adava. Javera šaj isi len psihička ili emocionalna problemija, hem adaleske mislinena kaj ka vladinen zaedno e Hristosea taro nebo. Tari adaja pričina, na džanaja točno panda kobor pomazanikija isi ki Phuv.
13. Dali i Biblija vakerela kobor pomazanikija ka oven ki Phuv keda ka počminel i bari nevolja?
13 Ka oven pomazanikija ko razna delija tari Phuv keda o Isus ka avel te lel len ko nebo (Mat. 24:31). Iako i Biblija vakerela kaj ko posledna dive ka ovel tikno broj pomazanikija ki Phuv, oj na vakerela kobor džene ka oven akate keda ka počminel i bari nevolja (Otk. 12:17).
Sar valjani te reagirina ako nekoj lela taro simbolija ki Spomen-svečenost? (Dikh o pasus 14)
14. Sar so dikhjola taro Rimjanite 9:11, 16, so valjani te haljova bašo biribe e pomazanikongoro?
14 O Jehova odlučinela keda te birinel pomazanikija (Rim. 8:28-30). Ov počmingja te birinel pomazanikija otkeda voskresningja o Isus. Najverojatno, sa o čačutne hristijanja ko prvo veko sine pomazime. Ko naredna vekija, najbaro delo taro okola so vakerena sine kaj tane hristijanja, ustvari, na sine sledbenikija e Hristoseskere. Sepak, džikote trajnena sine adala berša, o Jehova prodolžingja te pomazinel e hari manušen so sine čačutne hristijanja. Ola sine sar „giv“ bašo kova so vakergja o Isus kaj bajrola maškar „i divo čar“ (Mat. 13:24-30). Ko posledna dive o Jehova prodolžingja te birinel okolen so ka oven delo taro 144.000. * Adaleske, ako ov odlučingja te birinel nekas kratko angleder o krajo, koj siem amen te sumnina ki leskiri mudrost? (Čitina Rimjanite 9:11b, 16.) * Mora te pazina te na reagirina sar o rabotnikija so na sine zadovolna, kolen so o Isus spomningja ki jekh sporedba. Ola žalingje pe bašo adava sar postapingja lengoro gospodari okolencar so ale te keren buti ko posledno saati (Mat. 20:8-15).
15. Dali sa o pomazime hristijanja tane delo taro „verno hem razborito robo“ koleske so pišinela ko Matej 24:45-47? Objasnin.
15 Sarine so isi len nebesno nadež nane delo taro „verno hem razborito robo“. (Čitin Matej 24:45-47.) Isto sar ko prvo veko, o Jehova hem o Isus avdive da koristinena samo nekobore dženen te šaj te den „hrana“, javere lafencar te sikaven bute dženen. Ko prvo veko, o Devel koristingja samo nekobor pomazime hristijanen te pišinen o Hristijanska grčka spisija. Avdive samo nekobore pomazanikon isi len odgovornost te den „hrana ko pravo vreme“ e Devleskere narodoske.
16. So sikliljan tari akaja statija?
16 So siklilem tari akaja statija? O Jehova odlučingja te del večno životo ki Phuv bašo pobaro delo taro ple sluge, hem te del životo ko nebo bašo tikno broj ple sluge so ka e vladinen e Isusea. O Jehova nagradinela sa ple slugen — sar e „Evree“, agjaar hem e simbolična deše manušen. Ov adžikerela taro solduj grupe te oven poslušna e ista zakonenge hem te ačhoven leske verna. Sarine mora te ačhoven ponizna. Sarine mora te služinen zaedno hem te oven ko jekhipe. Hem sarine valjani te den pestar sa te šaj te ikeren o mir ko sobranie. Džikote avela o krajo sa popaše, ponadari da te služina e Devleske hem te dža palo e Hristoseskoro primer sar „jekh stado“ (Jovan 10:16).
^ pas. 5 Akava berš, i Spomen-svečenost — o dive keda setinaja amen ko e Isuseskoro meribe, ka ikerel pe vtornik, 7 april. Sar valjani te dikha ko okola so lena taro simbolija? Dali valjani te sekirina amen ako bajrola lengoro broj? O odgovorija ka dobina len ki akaja statija. Oj temelinela pe ki jekh javer statija so iklili ki Stražarsko kula taro januari 2016 berš.
^ pas. 2 O Psalm 87:5, 6 sikavela kaj ki idnina o Devel šaj ka otkrinel amenge o anava sarinengere so sine voskresnime te vladinen zaedno e Isusea taro nebo (Rim. 8:19)
^ pas. 8 Dikh i ramka „Ljubovta ’ne se odnesuva nepristojno‘“ ki Stražarsko kula taro januari 2016.
^ pas. 14 Iako o stiho taro Dela 2:33 sikavela kaj o sveti duh sine dendo preku o Isus, o Jehova tano adava so vikinela e manušen ko nebo.
^ pas. 14 Nešto poviše šaj te čitine ko „Pučiba taro čitatelija“, ki Stražarsko kula taro 1 maj 2007. Akava broj nane ki romani čhib.
GILI 19 E Gospodareskiri večera
^ pas. 56 OBJASNIMI SLIKA: Zamislin sar ka osetinen pe nesavo pretstavniko taro glavno sedište hem leskiri romni ako ko kongres khedena pe okolu lende but manuša te slikinen len. Adava ka sikavel kaj čače nane amen nisavo poštovanje sprema lende!
