1. Xana Yehovha a te a ku ta yentxeka yini a nkameni wezru?

YEHOVHA a profete leswi mayelanu ni nkama wezru: ‘Vavanuna va khume va tindzrimi hinkwatu ta matiko, va ta khoma vugamu bya xiyambalo xa mu-Yuda, va ku: Hi ta famba na n’wine, hikuva hi yingeli leswaku Yehovha a na n’wine.’ (Zk 8:23) ‘Mu-Yuda’ lani a yimela lava Xikwembu Nkulukumba a va totiki hi moya wa ku xwenga. Lava va tlhela va vitaniwa leswaku i ‘Israyele wa Xikwembu Nkulukumba’. (Ga 6:16) ‘Vavanuna va khume’ va yimela lava va nga ni dumbo dzra ku hanya hi la ku nga helikiki la misaveni. Va swi tiva leswaku Yehovha a tovokise ntlawa lowu wa vatotiwa nakone va swi vona na swi li ndjombo ku gandzrela Yehovha kun’we na vone.

2. Xana ‘vavanuna va khume’ ‘va fambisa’ kuyini ni vatotiwa?

² Nambi leswi swi nga kotekikiki ku tiva vito dzra xizro xin’wana ni xin’wana xa vatotiwa la misaveni namunhla, * lava va laviselaka ku hanya la misaveni va nga ‘famba ni’ vatotiwa. Hi ndlela yini? Bibele dzri li ‘vavanuna va khume’ a va ta ‘khoma vugamu bya xiyambalo xa mu-Yuda, va ku: Hi ta famba na n’wine, hikuva hi yingeli leswaku Yehovha a na n’wine’. Ndzrimana ya Bibele yi khanela hi mu-Yuda mun’we. Kambe ‘n’wine’ a hlaya vhanu va ku tlula mun’we. Leswi swi tlhamuxela leswaku mu-Yuda lweyi a hi mhunu mun’we ntsena kambe a yimela ntlawa hinkwawu wa vatotiwa. Lava va nga totiwangakiki va tizrela Yehovha xikan’we ni vatotiwa. Nambitanu, a va voni vatotiwa swanga vazrangeli vavu, hikusa va swi twisisa leswaku Yesu hi yene a nga Muzrangeli, kumbe N’winyi.​—Mt 23:10.

3. Hi swini swivutiso leswi taka hlamuliwa ka nhloko-mhaka leyi?

³ Leswi ke heke ni vakriste lava totiwiki makazri ka vhanu va  Xikwembu Nkulukumba namunhla, van’we va nga tivutisa leswi: 1) Xana vatotiwa va fanela ku tivonisa kuyini? 2) Xana lava daka kati va tlhela va nwa vhinyu ka Xidzrimuxo va fanela ku khomiwa hi ndlela yini? 3) Xana hi fanela ku kazrateka loko nhlayu ya lava daka ni ku nwa swifanekiselo yi ya yi kula? Nhloko-mhaka leyi yi ta hlamula swivutiso leswi.

4. Hi xini ximamulelo lexi kumekaka ka 1 Ba-le-Korinte 11:27-29 lexi vatotiwa va fanelaka ku pimisa ha xone ha hombe, nakone ha yini?

⁴ Vatotiwa va fanela ku pimisa ha hombe hi ximamulelo lexi kumekaka ka 1 Ba-le-Korinte 11:27-29. (Dondzra.) Xana swi nga yentxekisa kuyini kuva lwa totiwiki a da kumbe a nwa ‘hi laha ku nga fanelikiki’ ka Xidzrimuxo? Swi nga va tanu loko a da a va a nwa swifanekiselo kambe a nga hanyi hi ku twanana ni milawu leyi lulamiki ya Yehovha. (Hb 6:4-6; 10:26-29) Vatotiwa va swi twisisa leswaku va fanela ku tsrhama na va dumbekile loko va djula ku kuma ‘hakelo ledzri [va] nga vitaniwa ku dzrone a henhla, hi Xikwembu Nkulukumba ku Kriste Yesu’.​—Flp 3:13-16.

5. Xana vakriste lava totiwiki va fanela ku titwisa kuyini?

⁵ Moya wa ku xwenga wa Yehovha wu pfuna malandzra yakwe ku titsrongahata, ku nge ku tikulisa. (Ef 4:1-3; Kl 3:10, 12) Xileswo, vatotiwa a va titwi na va li lava yampswaka ku tlula  van’wana. Va swi tiva leswaku Yehovha a nga nyiki vatotiwa mpimu wa moya wa ku xwenga wa ku tlula lowu a wu nyikaka malandzra yakwe laman’wana. A va tivoni na va twisisa hi ku yentelela tindondzro ta xihlayelamfuzri xa Bible ku tlula vhanu van’wana. Nangweso a va nge txhuki ni siku ni dzrin’we va byela mhunu mun’wana leswaku na yene a totiwile nakone a fanela ku sungula ku da ni ku nwa swifanekiselo ka Xidzrimuxo. Ku hambana ni swoswo, hi ku titsrongahata va pfumela leswaku hi Yehovha ntsena lwa zrambaka vhanu ku ya hanya le tilweni.

6. Hi ku ya hi 1 Ba-le-Korinte 4:7, 8, xana vakriste lava totiwiki va fanela ku va ni hanyela dzrini?

⁶ Nambi leswi vatotiwa va titwaka na va ni ndjombo ya ku zrambiwa ku ya hanya a tilweni, a va yimeli leswaku vambeni va va khoma hi ndlela ya ku hlawuleka. (Flp 2:2, 3) Nakone va swi tiva leswaku loko Yehovha a va totile, a nga tivisanga vhanu hinkwavu. Xileswo, mhunu lwa totiwiki a nga hlamali loko va kukazri va nga tekeli ku kholwa leswaku a totiwile. Awa swi twisisa leswaku Bibele dzri hi leleta kuva hi nga tsrutsrumeli ku kholwa mhunu wa kukazri lwa liki Xikwembu Nkulukumba a mu nyike ntsrhwalu wa kukazri wa ku kheteka. (Mpf 2:2) Leswi a nga djulikiki ku dzrumisiwa, mukriste lwa totiwiki a nga hlayi ka lava a tlhanganaka navu hi khambi dzra ku sungula leswaku i mutotiwa. Nakone kunene a nge vombiseli van’wana hi mhaka leyo.​—Dondzra 1 Ba-le-Korinte 4:7, 8.

7. I yini leswi lava va totiwiki va nga swi yentxikiki, nakone ha yini?

⁷ Vakriste lava totiwiki a va pimisi swone leswaku va fanela ku va ni wunghanu ntsena ni vatotiwa van’wana, swanga hi loko vo va swizro swa ntlawa wa kukazri wa ku kheteka. A va djuleteli vatotiwa van’wana, na va lavisela ku bula hi ku totiwa kwavu na vone kumbe ku pfula mintlawa ya dondzro ya Bibele ya le tlhelweni. (Ga 1:15-17) Bandla a dzri nge vi ni wumun’we loko vatotiwa vo yentxa leswo. A va ta kumeka na va lwa ni moya wa ku xwenga, lowu pfunaka vhanu va Xikwembu Nkulukumba ku va ni ku zrula ni wumun’we.​—Ro 16:17, 18.

8. Ha yini u fanela ku tivonela ka ndlela leyi u va khomaka ha yone lava daka ni ku nwa swifanekiselo ka Xidzrimuxo? (Vona ni ntlhamuxelo wa le hansi.)

⁸ Xana hi fanela ku va khomisa kuyini vamakwezru va xinuna ni va xisati lava totiwiki? A ku ta va xihoxo ku hlamala mhunu ku tlula mpimu, nambi loko a li makwavu wa Kriste lwa totiwiki. (Mt 23:8-12) Loko Bibele dzri khanela hi vakulu, dzri hi kutxa ku ‘ku yetisa ku pfumela kwavu’, kambe a dzri hi byeli swone  leswaku hi nga yentxa mhunu wa kukazri muzrangeli wezru. (Hb 13:7) Hi swone leswaku Bibele dzri li van’we va ‘fanekela hi ku yentxeliwa hi swihluwa leswi tlulaka ha kubidzri’. Kambe leswi swi tanu hi leswi va ‘byisaka ha hombe’ ni leswi va ‘tizraka hi ntamu a zritwini, ni le ku dondzriseni’, ku nge hi leswi va totiwiki. (1Tm 5:17) Loko lava totiwiki hi va khuza hi ntamu kumbe hi va tlakuxa, hi nga ha va yentxa va nga titwi ha hombe. * Kumbe, lexi nga tlulisaka hi ku biha, hi nga ha va yentxa va tikukumuxa. (Ro 12:3) A nga kone ni mun’we kwezru lwa nga djulaka ku yentxa ntxhumu lowu nga vangelaka mun’we wa vamakwavu va Kriste lava totiwiki ku yentxa xihoxo xa ku kulisa xileswo!​—Lk 17:2.

9. Xana hi nga kombisisa kuyini leswaku ha va hlonipha vakriste lava totiwiki?

⁹ Xana hi nga kombisisa kuyini leswaku ha va hlonipha lava va totiwiki hi Yehovha? A hi nge va vutisi leswaku va totisiwe kuyini. Leyo i mhaka ya mhunu, leyi nga hi lumbikiki. (1Te 4:11; 2Te 3:11) Nakone a hi fanelanga ku pimisa leswaku vanuna kumbe vasati vavu, vapswele, kumbe swizro swa ndangu wavu na swone swi totiwile. A mhunu a nga tekeleli dumbo dzra ku ya hanya a tilweni ka va ndangu wakwe. A nyikiwa hi Xikwembu Nkulukumba. (1Te 2:12) Nakone a hi fanelanga ku hamba swivutiso leswi nga vavisaka van’wana. Hi xikombiso, a hi nge vutisi nsati wa makwezru lwa totiwiki leswaku a titwisa kuyini leswi a laviselaka ku hanya hi la ku nga helikiki la misaveni na a nge na nuna wakwe. Phela, hi nga tiyiseka hi ku helela leswaku a misaveni leyimpswha, Yehovha a ta ‘xuzrisa ku navela ka mintxhumu lemi hanyaka hinkwayu’.​—Ps 145:16.

10. Xana hi tisizrelelisa kuyini loko hi tsrhika ‘ku hlamala vuso bya vhanu’?

¹⁰ Loko hi nga khomi vatotiwa swanga hi loko vo va ni lisima dzra ku tlula vambeni, na hine ha tisizrelela. Hi ndlela yini? Bibele dzri li van’we va vatotiwa swi nga yentxeka va nga tsrhami na va dumbekile. (Mt 25:10-12; 2Pe 2:20, 21) Kambe loko hi tsrhika ku ‘hlamala vuso bya vhanu’, a hi nge ti txhuka ni siku ni dzrin’we hi landzra vambeni, nambi o va lava va totiwiki kumbe lava tiviwaka swinene kumbe lava nga ni malembe ya ku tala na va tizrela Yehovha. (Yd 16) Kutani, loko va tsrhika ku dumbeka kumbe va suka va siya bandla, a hi nge ti lahlekeliwa hi lipfumelo dzrezru ka Yehovha kumbe hi tsrhika ku mu tizrela.

11. Ku yentxeke yini ka nhlayu ya lava daka ni ku nwa swifanekiselo ka Xidzrimuxo?

¹¹ Ku ve ni malembe ya ku tala na nhlayu ya lava daka ni ku nwa swifanekiselo ka Xidzrimuxo yi ya yi pumbeka. Kambe ka malembe lama ha ka ku khaluta, nhlayu leyo yi ye yi kula lembe ni lembe. Xana hi fanela ku vindlavindleka ha swone leswo? Im-him. A hi vonisaneni swin’we swa swivangelo swa lisima leswi fanelaka ku dzrimukiwa minkama hinkwayu.

12. Ha yini hi nga fanelanga ku vindlavindleka hi nhlayu ya lava daka ni ku nwa swifanekiselo ka Xidzrimuxo?

¹² ‘Hosi yi tiva lava nga va yone.’ (2Tm 2:19) Ku hambana na Yehovha, vamakwezru lava nkontaka nhlayu ya lava daka ni ku nwa swifanekiselo ka Xidzrimuxo a va mu tivi lweyi hi ntiyiso a nga mutotiwa. Xileswo, nhlayu yi patsra lava va pimisaka leswaku i vatotiwa na kasi a hi vone. Hi xikombiso, van’we va lava a va hamba va da ni ku nwa swifanekiselo va game va yima. Van’wana va nga ha va ni swikazratu swa miyanakanyu kumbe swa  mbilu leswi va yentxaka va kholwa leswaku va ta fuma na Kriste a tilweni. Nakunene, a hi swi tivi hi ku kongoma leswaku i vatotiwa vangani va saliki la misaveni.

13. Xana Bibele dzra hlaya leswaku i vatotiwa vangani va taka va kone la misaveni loko ku sungula nhlomulo lowukulu?

¹³ Ku ta va ni vatotiwa a mimbangwini yinyingi ya misava loko Yesu a buyela ku ta va teka va ya tilweni. (Mt 24:31) Ina, Bibele dzra hlaya leswaku a masikwini ya wugamu, ku ta va ni nhlayu yitsrongo ya vatotiwa lava saliki la misaveni. (Mpf 12:17) Kambe a dzri hlayi leswaku i vangani va taka va va salile loko ku sungula nhlomulo lowukulu.

14. Hi laha swi kombisiwiki ha kone ka Ba-le-Roma 9:11, 16, xana hi fanela ku twisisa yini mayelanu ni ku hlawuliwa ka vatotiwa?

¹⁴ Yehovha hi yene a tsrimbaka nkama lowu a taka hlawula ha wone vatotiwa. (Ro 8:28-30) Yehovha a sungule ku hlawula vatotiwa a ntsrhaku ka ku pfuxiwa ka Yesu ku feni. Swi voneka ingiki a dzaneni dzra ku sungula hinkwavu vakriste va xihlayelamfuzri a va li vatotiwa. Ka madzana lama landzreliki, ku tala ka lava a va tihlaya vakriste a va nga landzri Kriste hakunene. Nambitanu, ndzreni ka malembe lawo, Yehovha a tote vakriste volavatsrongo va xihlayelamfuzri. A va fana ni mavele lawa Yesu a tiki a ma ta kula makazri ka lihungu. (Mt 13:24-30) A masikwini lawa ya wugamu, Yehovha a ye mahlweni a hlawula vhanu lava taka va xiyenge xa lava 144.000. * Xileswo, loko Xikwembu Nkulukumba a boha ku hlawula van’we va lava na ke sala nkama wutsrongo akuva wugamu byi tlhasa, kunene a hi fanelanga ku xandzra wutlhazri  byakwe. (Dondzra Ba-le-Roma 9:11, 16.) * Hi fanela ku tivonela leswaku hi nga yentxi ku fana ni vatizri lava Yesu a khaneliki ha vone ka xin’we xa swifaniso swakwe, lava nga khala hi leswi hosi yavu yi nga yentxela lava sunguliki ku tizra na nsimbi yi djula ku txhaya.​—Mt 20:8-15.

15. Xana hinkwavu vatotiwa va yentxa xiyenge xa ‘nandzra lwe wa ku dumbeka ni ku tlhazriha’, lweyi a hlayiwaka ka Mattheo 24:45-47? Tlhamuxela.

¹⁵ A hi hinkwavu lava nga ni dumbo dzra ku hanya a tilweni va nga xiyenge xa ‘nandzra lwe wa ku dumbeka ni ku tlhazriha’. (Dondzra Mattheo 24:45-47.) Swanga heswi a swi li xiswone a dzaneni dzra ku sungula, Yehovha na Yesu namunhla va tizrisa vamakwezru va nge vangani akuva va disa, kumbe va dondzrisa, lava ku tala. Ntsena vakriste va nge vangani lava totiwiki a dzaneni dzra ku sungula hi vone va tizrisiwiki ku tsrala Matsralwa Ya Xigriki Ya Wukriste. Namunhla, ntsena vakriste va nge vangani lava totiwiki hi vone va nga ni ntsrhwalu wa mfanelo wa ku nyika vhanu va Xikwembu Nkulukumba ‘swakuda hi la ku fanekelaka’.

16. Xana u dondzre yini ka nhloko-mhaka leyi?

¹⁶ Xana hi dondzre yini ka nhloko-mhaka leyi? Yehovha a bohe ku nyika ntalu wa vhanu vakwe wutomi lebyi nga helikiki la misaveni ni ku nyika lavatsrongo va taka fuma na Yesu wutomi lebyi nga helikiki le tilweni. Yehovha a hakela hinkwawu malandzra yakwe—‘mu-Yuda’ kun’we ni ‘vavanuna va khume’​—nakone a lavisela leswaku va yingiseta milawu yoleyi ya yin’we va va va tsrhama na va dumbekile. Hinkwezru hi fanela ku tsrhama na hi titsrongahata. Hinkwezru hi fanela ku mu tizrela xikan’we hi ntwananu. Nakone hinkwezru hi fanela ku tikazratela ku bekisa ku zrula a bandleni. Loko hi ya hi tsrhindzrekela a wugan’wini, hinkwezru a hi yeneni mahlweni hi tizrela Yehovha hi va hi landzra Kriste swanga ‘ntlhambi mun’we’.​—Yh 10:16.