1. Nyen la Jéhovah atene ayeke si na ngoi ti e?

JÉHOVAH atene lani na ndö ti ngoi ti e, atene: “Azo bale-oko so ayeke ti ayanga ti kodro nde nde kue ayeke gbu yongoro bongo ti mbeni Juif nzoni, na ala tene: ‘E ye ti tene e na mo e gue, ndali ti so e mä a tene Nzapa ayeke na ala.’” (Zach. 8:23). “Juif” ni ge aye ti sara tënë ti azo so Nzapa asoro ala na lege ti yingo vulu. A iri nga ala “Israël ti Nzapa.” (aGal. 6:16). “Azo bale-oko” ni aye ti sara tënë ti azo so ayeke na beku ti duti na fini na ndö ti sese teti lakue lakue. Ala hinga so Jéhovah asara tufa na ndö ti groupe ti aChrétien so lo soro ala ti gue na yayu nga ala bâ so a yeke mbeni pasa ti voro lo legeoko na ala.

2. Na lege wa la “azo bale-oko” ayeke ‘gue na’ aChrétien so a soro ala ti gue na yayu?

² Atâa so e lingbi pëpe ti hinga iri ti zo oko oko kue so a soro lo ti gue na yayu so ayeke na ndö ti sese laso, * azo so ayeke na beku ti duti na fini na ndö ti sese alingbi ti ‘gue na’ ala. Na lege wa? Bible atene so “azo bale-oko” ayeke “gbu yongoro bongo ti mbeni Juif nzoni, na ala tene: ‘E ye ti tene e na mo e gue, ndali ti so e mä a tene Nzapa ayeke na ala.’” Kozo mbage ti versê so asara tënë ti Juif oko. Me ndangba mbage ni asara kua na tënë “ala” so aye pëpe ti sara tënë ti zo oko. So ti tene so Juif ni ayeke pëpe gï zo oko me aye ti sara tënë ti groupe ti aChrétien kue so a soro ala ti gue na yayu. A-Chrétien so  a soro ala ti gue na yayu ape ayeke voro Jéhovah legeoko na ala so a soro ala ti gue na yayu. Ye oko, ala bâ pëpe aChrétien so a soro ala ti gue na yayu tongana amokonzi ti ala, ndali ti so ala hinga so Jésus la ayeke Mokonzi ti ala.—Mat. 23:10.

3. Article so ayeke kiri tënë na ahunda wa?

³ So ambeni Chrétien so a soro ala ti gue na yayu angbâ na popo ti awakua ti Nzapa laso, ambeni zo alingbi ti hunda terê ti ala: (1) A lingbi azo so a soro ala ti gue na yayu abâ terê ti ala tongana nyen? (2) A lingbi e sara ye na mbage ti azo so ayeke te mapa na ayeke nyon vin na ngoi ti Dango bê na kuâ ti Christ tongana nyen? (3) Tongana wungo ti ala ayeke gue na li ni, a lingbi e gi bê ti e ndali ni? Article so ayeke kiri tënë na ahunda so.

4. Wango wa la ayeke na 1 aCorinthien 11:27-29 so a lingbi azo so a soro ala ti gue na yayu agbu li nzoni na ndö ni? Ngbanga ti nyen?

⁴ A lingbi azo so a soro ala ti gue na yayu agbu li nzoni na ndö ti wango so ayeke na 1 aCorinthien 11:27-29. (Diko ni.) Tongana nyen la mbeni zo so a soro lo ti gue na yayu alingbi ti te mapa na ti nyon vin ti Dango bê na kuâ ti Christ “na lege ni pëpe”? Tongana lo  te ni nga lo nyon ni me lo sara ye alingbi na andia ti Jéhovah ape (aHéb. 6:4-6; 10:26-29). Azo so ahinga so ala doit ti ngbâ be-ta-zo tongana ala ye ti wara “futa ti iringo ndo ti gue na yayu, iringo ndo so Nzapa airi na lege ti Christ Jésus.”—aPhil. 3:13-16.

5. A lingbi ala so a soro ala ti gue na yayu abâ terê ti ala tongana nyen?

⁵ Yingo vulu ti Jéhovah ayeke mû maboko na awakua ti lo ti duti azo so asara terê ti ala kete, me azo ti baba ape (aÉph. 4:1-3; aCol. 3:10, 12). Tongaso azo so a soro ala ti gue na yayu abâ pëpe so ala yeke nzoni mingi ahon amba ti ala aChrétien. Ala hinga so a yeke lakue ape la Jéhovah ayeke mû yingo vulu ti lo na ala mingi ahon tanga ti awakua ti lo. Ala pensé ape so ala mä yâ ti atâ tënë ti Bible mingi ahon azo kue. Nga, ala yeke tene lâ oko ape na mbeni zo atene a soro lo nga kue ti gue na yayu na lo doit ti komanse ti te mapa nga ti nyon vin ti Dango bê na kuâ ti Christ. Me ala sara terê ti ala kete ala hinga so gï Jéhovah la ayeke soro azo ti gue na yayu.

6. Ti gue oko na 1 aCorinthien 4:7, 8, a lingbi aChrétien so a soro ala ti gue na yayu asara ye tongana nyen?

⁶ Atâa so ala so a soro ala ti gue na yayu abâ iringo so a iri ala ti gue na yayu tongana mbeni pasa, ala ye pëpe ti tene aita asara ye na mbage ti ala na mbeni fason so ayeke nde (aPhil. 2:2, 3). Ala hinga nga so na ngoi so Jéhovah asoro ala, lo fa ni na mbeni zo nde ape. Tongaso, li ti mbeni zo so a soro lo ti gue na yayu ayeke kpe ape tongana ambeni zo ayeda na ni na lê ni lê ni ape. Lo hinga so Bible atene na e ti yeda hio ape na tënë ti mbeni zo so atene Nzapa amû na ni mbeni kua so ayeke nde (Apoc. 2:2). So mbeni Chrétien so a soro lo aye pëpe ti gboto lê ti azo na ndö ti lo, lo yeke tene pëpe na azo so lo tingbi na ala so a soro lo ti gue na yayu. Kite ayeke dä ape so lo yeke pika kate na ndö ni ape na azo.—Diko 1 aCorinthien 4:7, 8.

7. Aye wa la ala so a soro ala ayeke sara ni ape? Ngbanga ti nyen?

⁷ A-Chrétien so a soro ala ti gue na yayu apensé ape so ala doit ti mû ngoi ti duti gï na terê ti amba ti ala so a soro ala, mo bâ mo tene ala yeke amembre ti mbeni groupe so ayeke nde. Ala yeke gi pëpe peko ti amba ti ala so a soro ala ti sara lisoro na ndö ti sorongo ala nga ti zia na sese agroupe ti mandango Bible so gï ala la ayeke na yâ ni (aGal. 1:15-17). Congrégation ayeke duti beoko ape tongana ala so a soro ala asara aye so. Tongana ala sara tongaso, ala sara ye ague nde na yingo vulu so ayeke mû maboko na awakua ti Nzapa ti duti na siriri nga beoko.—aRom. 16:17, 18.

8. Ngbanga ti nyen la a lingbi mo sara hange na fason so mo yeke sara na ye na mbage ti azo so a soro ala? (Bâ nga kete tënë na gbe ni.)

⁸ A lingbi e sara ye na mbage ti azo so a soro ala tongana nyen? A yeke na lege ni ape ti gonda mbeni zo ahon ndö ni, atâa zo ni ayeke ita ti Christ so a soro lo (Mat. 23:8-12). Na ngoi so Bible asara tënë ti a-ancien, a wa e ti “sara ye na mabe tongana ti ala”, me a tene na e ape so e lingbi ti sara si mbeni zo aga mokonzi ti e (aHéb. 13:7). A yeke tâ tënë so Bible atene ambeni zo “alingbi ti wara gonda fani use”. A yeke ndali ti so ala ‘yeke fa lege nzoni nga ala yeke sara kua ngangu na lege ti tënë ti yanga ti ala nga na lege ti fango ye ti ala’, me pëpe ndali ti so a soro ala ti gue na yayu (1 Tim. 5:17). Tongana e gonda ala so a soro ala ti gue na yayu ahon ndö ni nga e gboto lê mingi na ndö ti ala, e lingbi ti sara si ala duti nzoni ape. * Ye so ayeke même sioni mingi ayeke so e lingbi ti sara si ala ga azo ti baba (aRom. 12:3). Zo oko na popo ti e ayeke ye pëpe ti sara mbeni ye so alingbi ti sara si mbeni ita ti Christ so a soro lo asara kota faute so.​—Luc 17:2.

9. Tongana nyen la e lingbi ti fa so e ne aChrétien so a soro ala ti gue na yayu?

⁹ Tongana nyen la e lingbi ti fa so e ne ala so Jéhovah asoro ala ti gue na yayu? E yeke hunda ala ape ti hinga tongana nyen la a soro ala. A yeke ye so abâ gï zo wani so e yeke na droit ti hinga ni ape (1 aThes. 4:11; 2 aThes. 3:11). Nga e lingbi ape ti tene so a soro nga koli ti ala wala wali ti ala, babâ na mama ti ala, wala ambeni membre ti sewa ti ala. Zo ayeke wara beku ti gue na yayu na lege ti sewa ti lo ape. Nzapa la ayeke mû ni na lo (1 aThes. 2:12). A lingbi e hunda pëpe atënë so alingbi ti son bê ti amba ti e. Na tapande, e yeke hunda pëpe wali ti mbeni zo so a soro lo ti hinga lo pensé nyen na ndö ti beku ti duti na fini lakue lakue na ndö ti sese sân koli ti lo. E lingbi ti duti na confiance so na yâ ti fini dunia, Jéhovah ayeke “mû na aye kue so ayeke na fini ye so ala sara nzara ni.”—Ps. 145:16.

10. Tongana nyen la tongana e “gonda azo” ahon ndö ni ape e yeke bata terê ti e?

¹⁰ Tongana e sara ye pëpe na mbage ti ala so a soro ala ti gue na yayu tongana azo so ayeke kota ahon amba ti ala, e yeke bata nga terê ti e. Na lege wa? Bible atene na e so peut-être ambeni zo so a soro ala ayeke ngbâ be-ta-zo ape (Mat. 25:10-12; 2 Pi. 2:20, 21). Me tongana e “gonda azo” ahon ndö ni ape, e yeke mû lâ oko ape peko ti azo, même ti ala so a soro ala ti gue na yayu wala ala so a hinga ala mingi wala ala so asara na Jéhovah teti angu mingi (Jude 16). Tongana a si so ala yeke be-ta-zo encore ape wala ala zia lege ti guengo na abungbi, e yeke ngbâ ti duti na mabe na Jéhovah nga e yeke ngbâ ti sara na lo.

11. Nyen la asi na wungo ti azo so ayeke te mapa na ayeke nyon vin na Dango bê na kuâ ti Christ?

¹¹ Teti angu mingi, wungo ti azo so ayeke te mapa na ayeke nyon vin na Dango bê na kuâ ti Christ ayeke kiri lani kiringo na gbe ni. Me na yâ ti angu so ahon ade ti ninga ape, wungo ni so ayeke gue gï na li ni ngu oko oko. Eskê e bezoin ti gi bê ti e ndali ni? Ên-ën. Zia e bâ ambeni kpengba ye so a lingbi e girisa ni ape.

12. Ngbanga ti nyen la a lingbi e gi bê ti e pëpe ndali ti wungo ti ala so ayeke te mapa na ayeke nyon vin ti Dango bê na kuâ ti Christ?

¹² “Jéhovah ahinga ala so ayeke ti lo”. (2 Tim. 2:19). Nde na Jéhovah, aita-koli so ayeke diko wungo ti azo so ayeke te mapa na ayeke nyon vin na ngoi ti Dango bê na kuâ ti  Christ ahinga ape azo wa la a soro ala biani ti gue na yayu. Tongaso, na yâ ti wungo so ala diko mo yeke wara ala so apensé so a soro ala me a soro ala ape. Na tapande, ambeni zo so ayeke te lani mapa na ayeke nyon lani vin ni azia lege ni. Peut-être ambeni ayeke na kobela ti li ni la ala pensé so ala yeke komande legeoko na Christ na yayu. A yeke polele so e hinga mbilimbili pëpe wungo ti aChrétien so a soro ala so angbâ na sese.

13. Eskê Bible afa wungo ti azo so a soro ala oke la ayeke ngbâ na ndö ti sese na ngoi so kota ye ti vundu ayeke komanse?

¹³ A-Chrétien so a soro ala ti gue na yayu ayeke ngbâ na ando mingi na sese na ngoi so Jésus aga ti mû ala ti gue na ala na yayu (Mat. 24:31). Bible atene so na lâ ti nda ni, mbeni kete wungo ti azo so a soro ala ayeke ngbâ na ndö ti sese (Apoc. 12:17). Me a fa pëpe wungo ti ala oke la ayeke ngbâ na ndö ti sese na ngoi so kota ye ti vundu ayeke komanse.

14. A-Romain 9:11, 16 afa na e nyen na ndö ti sorongo aChrétien ti gue na yayu?

¹⁴ Jéhovah la ayeke soro ngoi so lo yeke soro aChrétien so ayeke gue na yayu (aRom. 8:28-30). Jéhovah akomanse lani ti soro azo ti gue na yayu na peko ti so Jésus azingo na kuâ. Na bango ni, a soro akozo Chrétien kue ti gue na yayu. Na yâ ti angu kue so aga na pekoni, mingi ti azo so atene ala yeke aChrétien amû lani biani peko ti Christ ape. Atâa so kue, na yâ ti angu so, Jéhovah asoro lani kete wungo ti azo so ayeke atâ Chrétien ti gue na yayu. Ala yeke lani tongana blé so Jésus atene ayeke kono na popo ti asioni pere (Mat. 13:24-30). Na lâ ti nda ni, Jéhovah angbâ ti soro azo so ayeke duti na  popo ti azo 144 000. * Tongaso, tongana Nzapa amû desizion ti soro ambeni zo ti duti na popo ti ala ngoi kete kozo ti tene nda ni aga, biani e doit ti dë kite na ndara ti lo ape. (Diko aRomain 9:11, 16.) * A lingbi e sara hange si e sara ye pëpe tongana azo ti kua so Jésus asara tënë ti ala na yâ ti mbeni toli ti lo. Ala dema lani terê ti ala ndali ti fason so wa ti ala asara na ye na mbage ti azo ti kua so akomanse ti sara kua na ndangba ngbonga ti kua.​—Mat. 20:8-15.

15. Eskê aChrétien kue so a soro ala ti gue na yayu la ayeke “ngbâa be-ta-zo so ayeke sara ye na ndara” so a sara tënë ti lo na Matthieu 24:45-47? Fa ndani so mo tene tongaso.

¹⁵ A yeke pëpe azo kue so ayeke na beku ti duti na fini na yayu la ayeke “ngbâa be-ta-zo so ayeke sara ye na ndara”. (Diko Matthieu 24:45-47.) Gï tongana ti ngoi ti akozo Chrétien, Jéhovah na Jésus ayeke sara kua laso na kete wungo ti aita-koli ti mû kobe ti yingo na azo mingi, wala ti fa ye na ala. Gï kete wungo ti aChrétien so a soro ala ti gue na yayu na ngoi ti akozo Chrétien la asû lani mbage ti Mbeti ti Nzapa na yanga ti Grec. Laso, gï kete wungo ti aChrétien la ayeke na kua ti mû na azo ti Nzapa ‘kobe na ngoi ni so alingbi’.

16. Aye wa la article so afa na mo?

¹⁶ Aye wa la article so afa na e? Jéhovah asoro ti mû fini ti lakue lakue na ndö ti sese na gbâ ti awakua ti lo nga lo mû na kete wungo ti awakua ti lo so ayeke komande ande legeoko na Jésus lege ti duti na fini na yayu. Jéhovah ayeke futa awakua ti lo kue: “Juif” ni nga na “azo bale-oko”, nga lo hunda na ala ti sara ye alingbi na a-oko ndia nga ti ngbâ be-ta-zo. Ala kue adoit ti sara terê ti ala kete. Ala kue adoit ti sara na lo legeoko nga beoko. Nga, ala kue adoit ti sara ngangu ti bata siriri ti congrégation. So nda ni ayeke pusu nduru nduru, zia si e kue e ngbâ ti sara na Jéhovah nga ti mû peko ti Christ tongana “kundu oko”.—Jean 10:16.