XIINXALLOTE BIRXICHO 5
Ledoˈne Haˈneemmo
‘Maganu kiˈne ledo noota macciishshinoommona, ledoˈne haˈneemmo.’—ZAK. 8:23.
FAARSO 26 Anera Assitinoonni
GUULCHO *
Wolu geˈreewi (“tonnu manni”) buuramino Kiristaani (‘Yihudichu’) ledo Yihowara soqqamansanni tashshi yaannonsa (Gufo 1-2 lai)
1. Yihowa yannankera mayi ikkannota masaalino?
YIHOWA yannanke daafira togo yee masaalino: ‘Hakka waro, tonnu manni mittu Yihudichiwa mare, uddanosi handaara amade, “Maganu kiˈne ledo noota macciishshinoommona, ninkeno ledoˈne haˈneemmo” yaanno.’ (Zak. 8:23) Lawishshu yaattonni ‘Yihudicha’ yinihu, Maganu qullaawu ayyaaninni buurino mannaati. Insa “Maganu Israeeleno” yinoonni. (Gal. 6:16, NW) “Tonnu manni” yiniri, uullate aana hegerera heeˈrate hexxo noonsareeti. Insa Yihowa buurantinore maassiˈranni noota affino daafira, ledonsa Magano magansiˈra lowo ayirrinyi gede assite laˈanno.
2. “Tonnu manni” buurantinori ‘ledo haˈrannohu’ hiittoonniiti?
2 Yannankera noo buuramaasine baalante suˈma afa dandiinannikkiha ikkirono, * uullate aana heeˈrate hexxo noonsari ‘ledonsa haˈra’ dandiitanno. Hiittoonni? Qullaawu Maxaafi, ‘tonnu manni mittu Yihudichi uddano handaara amade “Maganu kiˈne ledo noota macciishshinoommona, ninkeno ledoˈne haˈneemmo” yaannota’ kulanno. Kowiicho kulloonnihu mitto Yihudicha calla ikkirono, “kiˈne ledo” yitanno yaatto, qummeeshshu mittu manchire calla kulanni nookkita leellishshanno. Hakko daafira, Yihudichu mitto mancho calla ikkikkinni, buuramino Kiristaana baala riqiwanno. Buurantinokkiri buuramino Kiristaani ledo mitteenni Yihowara soqqantanno. Ikkollana, Massagaanchinsa Yesuusa ikkino daafira, buuramino Kiristaana massagaanonsa gede assite dilaˈanno.—Mat. 23:10.
3. Konni birxichira hiikkuri xaˈmuwara dawaro afiˈneemmo?
3 Xaa yannarano Maganu manni mereero buuramino Kiristaani noo daafira, mitootu togo yite heddara dandiitanno: (1) Buuramino Kiristaani insaneeto ma garinni laˈˈa hasiissannonsa? (2) Qaagooshshu Ayyaani yannara timanna woyine qamasanno manna ma garinni laˈˈa hasiissannonke? (3) Timanna woyine qamasanno manni kiiro lexxituro mitiiˈma hasiissannonkeni? Konni birxichira kuri xaˈmuwara dawaro afiˈneemmo.
BUURAMINO KIRISTAANI INSANEETO MA GARINNI LAˈˈA HASIISSANNONSA?
4. Buurantinori 1 Qorontoosi 11:27-29 nooha hiikkonne qorowishsha seekkite heda hasiissannonsa? Mayira?
4 Buurantinori 1 Qorontoosi 11:27-29 noo qorowishsha seekkite heda hasiissannonsa. (Qummeeshsha nabbawi.) Mittu buuramino Kiristaanchi “hasiisinosikkiha” qamasara dandaannohu hiittoonniiti? Kuni Kiristaanchi, Yihowaha keeraancho seera harunsikkinni Qaagooshshu Ayyaanira shiqino timanna woyine qamasannoha ikkiro, ‘hasiisinosikkiha’ qamasanni no. (Ibi. 6:4-6; 10:26-29) Buuramino Kiristaani, “Maganu Kiristoosi widoonni” aannonsaha iimi baˈraaˈra adhate ammaname heeˈra hasiissannonsata afino.—Fil. 3:13-16.
5. Buurantinori insaneeto ma garinni laˈˈa hasiissannonsa?
5 Yihowa ayyaani, soqqamaanosi naaxxaleeyye ikkitukkinni umonsa heeshshi assitannore ikkitanno gede kaaˈlannonsa. (Efe. 4:1-3; Qol. 3:10, 12) Hakko daafira, buurantinori woloota roortinohu gede assite diheddanno. Insa buurantinore ikkitino daafira calla Yihowa wole soqqamaasinera aanno ayyaaninni roorinoha aannonsakkita affino. Qoleno insa Qullaawu Maxaafi halaale wolu manninni roore seekkine huwantoommo yite diheddanno. Hattono wole mancho, ‘Atino buuramoottohana timanna woyine qamasa hasiissannohe’ diyitanno. Hatteentenni umonsa heeshshi assite manna iimi heeshshora koyisannohu Yihowa ikkinota ammantanno.
6. Umi Qorontoosi 4:7, 8 kultanno garinni, buuramino Kiristaani maa qoropha hasiissannonsa?
6 Buurantinori iimi heeshshora woshshama kaajja qoosso ikkitinota affinoha ikkirono, wolu manni baxxino garinni ayirrisansara dihasidhanno. (Fil. 2:2, 3) Qoleno Yihowa buurinsa woyite wolu manni afanno gede assinokkita huwattanno. Hakko daafira, mittu Kiristaanchi qullaawu ayyaaninni buuraminota mitootu bayichonko ammana hoogguro dhagge diassiˈranno. Hatteentenni isi Qullaawu Maxaafi, Maganu baxxitino qoosso uyinoe yaanno manna bayichonko ammana gara ikkitinokkita kulannota huwatanno. (Aju. 2:2) Qoleno buurantinori mannu baxxino garinni illachishansara hasidhannokki daafira, wolootu ledo egennantanno woyite buurantinore ikkansa dikultanno. Hattono buuramansa kulte dinaaxxitanno.—1 Qorontoosi 4:7, 8 nabbawi.
7. Buurantinori maa assitannokki gede qoropha hasiissannonsa? Mayira?
7 Buuramino Kiristaani baxxitino gaamo wido ikkitinohu gede assite hedde, buurantinori ledo calla hosa dihasiissannonsa. Insa woshshattonsa daafira hasaawate woy uminsata Qullaawu Maxaafi xiinxallo gaamo kalaqiˈrate yite wole buuramino Kiristaana hasidhanni dihadhanno. (Gal. 1:15-17) Buurantinori togoo coye assitannoha ikkiro, songote mittimma baˈara dandiitanno. Hattoo assooti, Maganu manni mereero salaamenna mittimma heedhanno gede assannohu qullaawu ayyaani ledo sumuu diyaanno.—Rom. 16:17, 18.
BUURANTINORE MA GARINNI LAˈˈA HASIISSANNONKE?
Buuramino Kiristaanano ikko wole albisa ikkite soqqantanno roduuwa maccare ikkino manni gede assine laˈˈa dihasiissannonke (Gufo 8 lai) *
8. Qaagooshshu Ayyaanira shiqanno timanna woyine qamassannore lainohunni maa qoropha hasiissannonke? (Lekkaalliidi qaagiishshano lai.)
8 Ikkina, buuramino roduuwa ma garinni laˈˈa hasiissannonke? Mittu manchi buuraminoha Kiristoosi rodoo ikkiro nafa, iso quwa sae jaja gara diˈˈikkitino. (Mat. 23:8-12) Qullaawu Maxaafi songote cimeeyye daafira kulanni, ammanatenni insa lambeemmo gede jawaachishannonkeha ikkirono, aye manchono massagaanchinke gede assine laˈneemmo gede dikulannonke. (Ibi. 13:7) Qullaawu Maxaafi mitootaho“erote ayirrinyi” hasiisannonsata kulanno. Ikkollana togoo ayirrinyi hasiisannonsahu, buurantinohura ikkikkinni “garunni gashshitanno” daafiranna “qaale kultanninna rosiissanni daafurtanno” daafiraati. (1 Xim. 5:17) Buurantinore hasiisannokki garinni guwinsiro woy baxxino garinni illachinshinsaro saalfattara dandiitanno. * Roore busha kayinni, baxxino ayirrinye uyineemmonsaha ikkiro, naaxxitanno gede assinammonsara dandiineemmo. (Rom. 12:3) Kiristoosi roduuwi giddo mittuno togoota shota ikkitinokki soˈro loosanno gede assine guficho ikka hasiˈneemmokkiti egennantinote!—Luq. 17:2.
9. Buuramino Kiristaana ayirrinseemmota leellisha dandiineemmohu hiittoonniiti?
9 Yihowa buurinore ayirrinseemmota leellisha dandiineemmohu hiittoonniiti? Insa buurantinohu hiittoonniitiro dixaˈmineemmonsa. Tini ninke laˈanno hajo diˈˈikkitino; qoleno tenne hajo afate qoosso dinonke. (1 Tes. 4:11; 2 Tes. 3:11) Buuramino Kiristaanchi annanna ama, galtesi woy wole fiixasino buuraminohu gede assine heda dihasiissannonke. Iimi woshshatto maatetewiinni ragiˈnannire diˈˈikkitino. Kuni Yihowa koyishshaati. (1 Tes. 2:12) Qoleno woloota koffi assara dandaannore dixaˈmineemmo. Lawishshaho, buuramino Kiristaanchi galte uullate aana gannatete isiweelo heedhannota heddanno woyite mayi macciishshamannosero xaˈma dihasiissannonke. Yihowa haaro alamera ‘woˈmunku halcho wonshannota’ addaxxa dandiineemmo.—Far. 145:16.
10. ‘Woloota bokkeessa’ qorophanke agarooshshe ikkitannonkehu hiittoonniiti?
10 Buuramino Kiristaana wolu manninni roorsine laˈˈa hooganke ninkeneetira agarooshshe ikkitannonke. Hiittoonni? Qullaawu Maxaafi mitu buuramino Kiristaani ammanama hoogara dandaannota kulanno. (Mat. 25:10-12; 2 Phe. 2:20, 21) ‘Wole manna bokkeessa’ woy jaja qorophineemmoha ikkiro, buuramaasineno ikko wole Yihowara lowo diro soqqantinore woy egennantino roduuwa diharunsineemmo. (Yih. 16) Tini, insa ammanama hoogguro woy halaalu mininni fulturo, ammananke baˈannokki gedenna Yihowara soqqama agurreemmokki gede kaaˈlitannonke.
TIMANNA WOYINE QAMASANNO MANNI KIIRO LEXXITURO MITIIˈMA HASIISSANNONKENI?
11. Qaagooshshu Ayyaani yannara timanna woyine qamasanno manni kiiro ma ikkitanni no?
11 Konni albaanni lowo diro Qaagooshshu Ayyaani yannara timanna woyine qamasanno manni kiiro ajjanni daggino. Muli diri kawa kayinni, tini kiiro diru dirunku lexxitanni no. Ikkina tennera mitiiˈma hasiissannonkeni? Dihasiissannonke. Hanni qaaga hasiissannonketa mite hedo laˈno.
12. Qaagooshshu Ayyaaniwa timanna woyine qamasanno manni kiiro daafira mitiiˈma hasiissannonkekkihu mayiraati?
12 Yihowa “isire ikkitinore afino.” (2 Xim. 2:19) Qaagooshshu Ayyaani yannara timanna woyine qamassannore kiirtanno roduuwi, addanka buuraminohu hiikkonneetiro afa didandiitanno; Yihowa kayinni afanno. Qamassinore kiirranni woyite buurantinoha laweennansa beebba qamassannoreno kiirranni. Lawishshaho, alba qamasanno manni giddo mitootu gedensoonni agurtino. Mitu kayinni Kiristoosi ledo iima moonkeemmo yite heddanno gede assinonsahu surrete qarra ikkara dandaanno. Konni daafira, uullate aana gattino buuramaasine kiiro mageeshshitero woˈmunni woˈma dianfoommo.
13. Qullaawu Maxaafi bayiru qarri hanafanno woyite uullate aana gattanno buuramaasine mageeshsha ikkitannoro kulanno?
13 Yesuusi buurantinore iimira haaˈre haˈrara daanno woyite insa uullate aana duuchawa heedhanno. (Mat. 24:31) Qullaawu Maxaafi goofimarchu barruwara uullate aana gattanno buuramaasine shiima ikkitannota kulanno. (Aju. 12:17) Ikkollana, bayiru qarri hanafanno woyite uullate aana heedhanno buuramaasine mageeshsha ikkitannoro dikulanno.
Mittu manchi Qaagooshshu Ayyaaniwa timanna woyine qamasiro iso ma garinni laˈˈa hasiissannonke? (Gufo 14 lai)
14. Roomu Sokka 9:11, 16 noo hedo Yihowa buurantinore dooranno gari daafira maa rosiissannonke?
14 Buurantinore dooranno yanna murannohu Yihowaati. (Rom. 8:28-30) Yihowa buuramaasine doora hanafinohu Yesuusi reyotenni kaihu gedensaanniiti. Umi xibbi diro Kiristaanu songo giddo noori baalunku buurantinoreeti yaa dandiinanni. Hakkuyi gedensaanni noo dirrara kayinni, ninke Kiristaanaho yaannohu rooru manni kaphu Kiristaanaati. Ikkirono, Yihowa tenne dirra giddo boode addu Kiristaana buurino. Yesuusi insa boddoonu giddo mudhino qamade gede ikkitinota coyiˈrino. (Mat. 13:24-30) Yihowa goofimarchu barruwarano, 144,000 * wido ikkitannore doora diagurino. Maganu mito manna goofimarchu barri jeefora doora hasiˈrannoha ikkiro, assinori gara ikkasi horo dihuluullammeemmo. (Roomu Sokka 9:11, 16 nabbawi.) * Yesuusi coyiˈrino lawishshira kulloonni loosaasine gede ikkineemmokki gede qoropha hasiissannonke. Insa, mootichinsa hawarro dagge loossinorirano insa ledo taalo baatinonsa daafira gunguntino.—Mat. 20:8-15.
15. Buuramino Kiristaani baalu Maatewoosi 24:45-47 kulloonnihu “ammanaminohunna wodanaamu borojjichi” wido ikkinoni? Xawisi.
15 Iimira haˈrate hexxo noonsari baalu “ammanaminohunna wodanaamu borojjichi” wido diˈˈikkitino. (Maatewoosi 24:45-47 nabbawi.) Umi xibbi dirinte gede, Yihowanna Yesuusi yannankerano boode roduuwa horoonsidhe batinye manna itissanni no. Umi xibbi diro, Yihowa Giriikete Afiita Qullaawa Borro borreessiisate boode buuramino Kiristaana calla horoonsiˈrino. Yannankerano, hasiissanno yannara Maganu mannira ayyaanaamittete sagale shiqishanno gede dooraminohu boode buuramino Kiristaana callaho.
16. Konni birxichira maa rosootto?
16 Konni birxichira maa ronsoommo? Yihowa rooriidite mannu oosora uullate aana hegerera heeˈrate hexxo uyinonsa; boodu Kiristaanira kayinni iima Yesuusi ledo gashshate hexxo uyinonsa. Yihowa baalante soqqamaanosira yaano ‘Yihudichunni’ lawinsoonnirirano ikko lawishshunni kulloonnihu ‘tonnu mannira’ baˈraarsha aannonsa; qoleno lamenti gaamo mittu gari seera harunsitaranna ammanante heedhara hasiˈranno. Baalunku umonsa heeshshi assa hasiissannonsa. Hattono mittimmatenni Yihowara soqqama hasiissannonsa. Qoleno songote giddo salaame heedhanno gede assate sharrama hasiissannonsa. Goofimarchu gambisanni daanno woyite, ninke baalunku “mitte hoshsha” ikkine Kiristoosi harunsatenna Yihowara soqqamate murciˈno.—Yoh. 10:16.
^ GUFO 5 Tayixe Yesuusi Reyo Qaagooshshe ayirrinsannihu Maakisanyo, Dotteessa lamalunniiti. Qaagooshshu Ayyaani yannara timanna woyine qamassannore ma garinni laˈˈa hasiissannonke? Timanna woyine qamasanno manni kiiro lexxituro mitiiˈma hasiissannonkeni? Konni birxichira, kuri xaˈmuwara dawaro afiˈneemmo; birxichi xintaminohu, Arfaasa 2016nnite Agarooshshu Shaera fulino birxichi aanaati.
^ GUFO 2 Faarso 87:5, 6 yitanno garinni, Maganu Yesuusi ledo moohara iimira haˈrino manni baalunku suˈma albillitte kulannoha ikkara dandaanno.—Rom. 8:19.
^ GUFO 8 Arfaasa 2016nnite Agarooshshu Shaera noota “Baxillu ‘Gariweelo Coye Diassanno’” yitanno saaxine lai.
^ GUFO 14 Soqqamaasinete Looso 2:33 mittu manchi buuramanno woyite qullaawu ayyaani dirrannosihu Yesuusi widoonni ikkinota kultannoha ikkirono, mitto mittonka mancho iimira koyisannohu Yihowaati.
^ GUFO 14 Ledde afate, Onkoleessa 1, 2007nnite (Amaaru Afoo) Agarooshshu Shaera nooha “Nabbawaano Xaˈmitanno Xaˈmo” yaanno birxicho lai.
FAARSO 34 Minshe Nookkiha Ikke Heeˈra
^ GUFO 56 MISILETE XAWISHSHA: Qoqqowu gambooshshiwa roduuwu qara biiro riqiwaanchinna minaamasi ledo foto kaˈˈate insa doyisse no. Kuni ayirrinye xeino assooteeti!
