1. O le ā na valoia e Ieova o le a tupu i o tatou aso?

NA VALOIA e Ieova e faatatau i o tatou aso e faapea: “O le a fetagofi atu ai tagata e toʻasefulu mai i gagana uma a atunuu eseese, ioe, latou te fetagofi atu lava i le pito ofu o le tagata Iutaia, ma faapea atu: ʻE matou te ō ma outou, auā ua matou faalogo o loo iā te outou le Atua.’” (Saka. 8:23) O le “tagata Iutaia” i inei, o loo faasino atu iā i latou ua faauuina e le agaga paia o le Atua. E taʻua foʻi i latou o “le Isaraelu a le Atua.” (Kala. 6:16) O “tagata e toʻasefulu,” o loo faasino atu iā i latou ua iai le faamoemoe o le ola e faavavau i le lalolagi. E latou te iloa ua faamanuia e Ieova lenei vaega o le ʻaufaauuina, ma o se faaeaga le auauna faatasi ma i latou.

2. E faapefea ona “ō” faatasi “tagata e toʻasefulu” ma le ʻaufaauuina?

² E ui e lē mafai ona tatou iloa igoa taʻitasi uma o le ʻaufaauuina i le lalolagi i aso nei, * ae e mafai e i latou e faamoemoe e ola i le lalolagi ona “ō” faatasi ma le ʻaufaauuina. E faapefea? O loo taʻua i le Tusi Paia e faapea, o “tagata e toʻasefulu” e “latou te fetagofi atu lava i le pito ofu o le tagata Iutaia, ma faapea atu: ʻE matou te ō ma outou, auā ua matou faalogo o loo iā te outou le Atua.’” I lenei fuaiupu, o loo taʻua ai se tagata Iutaia e toʻatasi. Ae o “outou” ma “iā te outou,” e sili atu ma le toʻatasi le tagata o loo faasino i ai. O lona uiga, o lenei tagata Iutaia e lē o se tagata e toʻatasi, ae o loo faasino atu i  le vaega atoa o le ʻaufaauuina. O i latou e lē faauuina e auauna faatasi iā Ieova ma le ʻaufaauuina. Peitaʻi, e latou te lē vaai i le ʻaufaauuina o ni o latou taʻitaʻi, auā ua latou malamalama o le matafaioi lenā a Iesu, o le avea ma Taʻitaʻi.​—Mata. 23:10.

3. O ā fesili o le a taliina i lenei suʻesuʻega?

³ Talu ai o loo iai pea nisi o Kerisiano faauuina i tagata o le Atua i aso nei, e ono taumānatu la nisi: (1) O le ā le vaaiga a le ʻaufaauuina iā i latou lava? (2) E faapefea ona tatou feutagaʻi ma i latou e tagofia le areto ma le uaina i le Faamanatuga? (3) Pe e tatau ona tatou popole pe a faatupulaʻia le fuainumera o i latou e tagofia le areto ma le uaina? O le a taliina i lenei suʻesuʻega nei fesili.

4. O le ā le lapataʻiga o loo i le 1 Korinito 11:27-29 e tatau i le ʻaufaauuina ona utagia, ma aiseā?

⁴ E ao i le ʻaufaauuina ona utagia le lapataʻiga o loo i le 1 Korinito 11:27-29. (Faitau.) E faapefea i se tagata faauuina ona ʻai ma inu “faalētatau” i le Faamanatuga? Pe afai e ʻai ma inu, ae e lē o ola e tusa ai ma tapulaa amiotonu a Ieova. (Epe. 6:4-6; 10:26-29) E iloa e le ʻaufaauuina e tatau ona latou tutumau faamaoni, pe a mananaʻo e  maua ʻle taui o le valaau faalelagi mai i le Atua, e ala iā Keriso Iesu.’​—Fili. 3:13-16.

5. O ā lagona e tatau ona iai i Kerisiano faauuina e faatatau iā i latou lava?

⁵ E fesoasoani le agaga paia o Ieova i ana auauna, ia faaalia le lotomaulalo ae teena le faamaualuga. (Efe. 4:1-3; Kolo. 3:10, 12) O lea la, e lē manatu le ʻaufaauuina e sili atu i latou nai lo o isi. E iloa foʻi e le ʻaufaauuina e lē tele atu le agaga paia e foaʻi e Ieova iā i latou, nai lo o isi ana auauna. E latou te lē manatu e sili atu lo latou malamalama i upu moni o le Tusi Paia, nai lo o se isi lava. E lē tatau foʻi ona latou faapea atu i se tasi ua faauuina o ia, ma e tatau ona ʻai ma inu i le Faamanatuga. Nai lo o lea, e latou te lotomaulalo e faailoa atu e na o Ieova e valaauina tagata mo le lagi.

6. E tusa ai ma le 1 Korinito 4:7, 8, o le ā le auala e tatau ona amioaʻi ai Kerisiano faauuina?

⁶ E ui e manatu le ʻaufaauuina o se faaeaga le valaauina mo le lagi, ae e latou te lē faatalitalia isi e feutagaʻi ma i latou i se auala faapitoa. (Fili. 2:2, 3) E latou te iloa ina ua faauuina i latou e Ieova, e na te leʻi faailoaina atu i isi. E lē o se mea la e faateʻia ai, pe afai e lē vave talitonu nisi ua faauuina o ia. E na te iloa o loo taʻua i le Tusi Paia, le aua neʻi vave talitonu i se isi e faapea mai ua tuuina atu e le Atua se matafaioi faapitoa iā te ia. (Faaa. 2:2) Ona e lē manaʻo e faauaʻi atu tagata iā te ia, e lē faailoa atu la e se Kerisiano faauuina iā i latou e feiloaʻi muamua i ai, o ia ua faauuina. E lē mimitavale ai foʻi o ia i isi.​—Faitau le 1 Korinito 4:7, 8.

7. O ā gaoioiga e ao ona ʻalofia e le ʻaufaauuina, ma aiseā?

⁷ E lē manatu foʻi Kerisiano faauuina, e na o isi ʻaufaauuina e ao ona latou faatasitasi, e tai pei o se kalapu faapitoa. E latou te lē suʻeina isi ʻaufaauuina ina ia talanoa i ai e faatatau i le faauuina o i latou, pe e fai foʻi ni a latou lava vaega mo le suʻesuʻeina o le Tusi Paia. (Kala. 1:15-17) O le a leai se autasi o le faapotopotoga, pe afai e faia e le ʻaufaauuina nei gaoioiga. O le a lē ōgatasi a latou gaoioiga ma le agaga paia, lea e fesoasoani i tagata o le Atua e maua le filemu ma le autasi.​—Roma 16:17, 18.

8. Aiseā e manaʻomia ai ona e faaeteete i le auala e te feutagaʻi ai ma i latou e tagofia le areto ma le uaina o le Faamanatuga? (Tagaʻi foʻi i le faaopoopoga i le pito i lalo)

⁸ E faapefea ona tatou feutagaʻi ma uso ma tuafāfine faauuina? O se mea sesē le soona faatāua naʻuā o se tasi, e tusa lava po o ia o se uso faauuina o le Keriso. (Mata. 23:8-12)  Pe a talanoa le Tusi Paia e faatatau i toeaina, e faalaeiauina i tatou e “faaaʻoaʻo i lo latou faatuatua,” ae e lē o faapea mai ia fai se tagata ma o tatou taʻitaʻi. (Epe. 13:7) E moni o loo taʻua i le Tusi Paia o nisi “e tatau ona faaluaina i ai le āva.” O le māfuaaga, ona “o loo avea [i latou] ma taʻimua lelei” ma o loo “galulue mamafa i le upu ma le aʻoaʻo atu,” ae e lē ona ua faauuina i latou. (1 Timo. 5:17) Pe a tatou soona uaʻi atu ma soona viiviia le ʻaufaauuina, e latou te ono lagona le māsiasi. * Ae e sili atu ai la ona leaga, ona e ono avea lenā ma māfuaaga e latou te faamaualuluga ai. (Roma 12:3) E leai se isi o i tatou e manaʻo e fai se mea, e ono faia ai e se uso faauuina o Keriso se agasala matuiā!​—Luka 17:2.

9. E faapefea ona tatou faaalia le faaaloalo i Kerisiano faauuina?

⁹ E faapefea ona tatou faaalia le faaaloalo iā i latou ua faauuina e Ieova? E tatou te lē fesili atu pe na faapefea ona faauuina i latou. O lenā mataupu e fitoitonu iā i latou lava, ma e leai sa tatou aiā e iloa ai. (1 Tesa. 4:11; 2 Tesa. 3:11) E lē tatau foʻi ona tatou manatu ua faauuina lana paaga faaipoipo, o ona mātua, po o isi tagata o le aiga. O le faamoemoe o se tasi mo le lagi, e lē o se tofiga e tuufaasolo mai i lona aiga, ae e na te maua mai i le Atua. (1 Tesa. 2:12) E tatau ona tatou ʻalofia le faia o fesili e faatigā ai i isi. O se faaaʻoaʻoga, e tatou te lē mananaʻo e fesili i le avā a se uso faauuina i ni ona faalogona, e faatatau i lona faamoemoe o le ola e faavavau i le lalolagi e aunoa ma lana tane. O le mea moni, e mafai ona tatou mautinoa o le a “faamalie [e Ieova] le manaʻo o mea ola uma lava,” i le lalolagi fou.​—Sala. 145:16.

10. E faapefea ona puipuia i tatou pe a ʻalofia le “faaviivii atu i tagata”?

¹⁰ O le a puipuia i tatou, pe a tatou lē feutagaʻi ma le ʻaufaauuina i se auala ua sili atu ai lo latou tāua nai lo o isi. E faapefea? Ua taʻua i le Tusi Paia, e iai nisi o le ʻaufaauuina atonu e lē tumau ona faamaoni. (Mata. 25:10-12; 2 Pete. 2:20, 21) Ae pe a tatou ʻalofia le “faaviivii atu i tagata,” o le a tatou lē mulimuli ai i isi, e oo foʻi iā i latou e faauuina, o i latou ua silafia e le toʻatele, po o i latou ua umi se taimi talu ona auauna iā Ieova. (Iuta 16) Pe a lē faamaoni pe tuua e i latou le faapotopotoga, o le a lē taitai mou ese lo tatou faatuatua iā Ieova, pe e tatou te lē toe auauna foʻi iā te ia.

11. O le ā ua tupu i le fuainumera o i latou e ʻaai ma inu i le Faamanatuga?

¹¹ I le tele o tausaga, na faaitiitia le fuainumera o i latou e ʻaai ma inu i le Faamanatuga. Ae i tausaga talu ai nei, o lenā aofaʻiga ua faatupulaʻia i tausaga taʻitasi. Pe e manaʻomia ona tatou popole i lenā mea? E leai. Seʻi o tatou iloiloina ni mea tāua e tatau ona tatou manatua.

12. Aiseā e lē manaʻomia ai ona tatou popole i le fuainumera o i latou e ʻaai ma inu i le Faamanatuga?

¹² “Ua silafia e Ieova ona lava tagata.” (2 Timo. 2:19) I le lē pei o Ieova, o uso o loo faitauina le aofaʻi o i latou e ʻaai ma inu i le Faamanatuga, e latou te lē o iloa po o ai tonu ua faauuina. O lea, o le aofaʻi o i latou e ʻaai ma inu, e aofia ai i latou e manatu ua faauuina ae e leai. O se faaaʻoaʻoga, o nisi na ʻaai ma inu na mulimuli ane lē toe faia faapea. Atonu o nisi na iai ni aafiaga o le mafaufau ma faalogona ootia, ua māfua ai ona talitonu  o le a latou pule faatasi mai ma Keriso i le lagi. E manino mai la, e tatou te lē o iloa pe e toʻafia moni le aofaʻi o le ʻaufaauuina o totoe i le lalolagi.

13. Po o taʻua i le Tusi Paia le aofaʻi o le ʻaufaauuina o le a totoe i le lalolagi pe a amata le puapuaga tele?

¹³ O le a iai le ʻaufaauuina i le tele o vaega o le lalolagi, pe a afio mai Iesu mai i le lagi e ave i latou. (Mata. 24:31) O loo faapea mai le Tusi Paia, e toʻaitiiti le fuainumera o le ʻaufaauuina e totoe i le lalolagi i aso o le iʻuga. (Faaa. 12:17) Ae e lē o taʻuina mai le aofaʻi o i latou o le a totoe pe a amata le puapuaga tele.

14. E pei ona taʻua i le Roma 9:11, 16, o le ā e manaʻomia ona tatou malamalama i ai e faatatau i le filifilia o le ʻaufaauuina?

¹⁴ E pule Ieova i le taimi e filifili ai le ʻaufaauuina. (Roma 8:28-30) Na amata ona filifilia e Ieova le ʻaufaauuina ina ua māeʻa le toetū o Iesu. E foliga mai o Kerisiano moni uma i le uluaʻi senituri, na faauuina. I ni senituri na sosoo ane ai, o le toʻatele o i latou na faapea mai o Kerisiano e leʻi mulimuli moni iā Keriso. E ui i lea, e toʻaitiiti Kerisiano moni na faauuina e Ieova i na tausaga. Na pei i latou o saito na fetalai ai Iesu na ola faatasi ma vao leaga. (Mata. 13:24-30) I aso o le iʻuga, na faaauau ona filifilia e Ieova tagata e avea ma vaega o le 144,000. * O lea, pe afai e filifili e le Atua nisi a o tu lata i le iʻuga, e lē tatau la ona tatou fesiligia le atamai o Ieova. (Faitau le Roma 9:11, 16.) * E tatau ona tatou faaeteete ina ia aua neʻi o tatou pei o le ʻaufaigaluega  na faamatala e Iesu, i se tasi o ana talafaatusa. Na latou faitio i le auala na feutagaʻi ai lo latou matai, ma tagata na faatoʻā ō atu e faigaluega i le itula mulimuli.​—Mata. 20:8-15.

15. Pe e aofia le ʻaufaauuina uma i le “pologa faamaoni ma le faautauta,” lea o loo i le Mataio 24:45-47? Ia faamatala.

¹⁵ E lē o i latou uma ua iai le faamoemoe e ola i le lagi, e aofia i le “pologa faamaoni ma le faautauta.” (Faitau le Mataio 24:45-47.) E pei o le uluaʻi senituri, o loo faaaogā e Ieova ma Iesu i aso nei ni uso toʻaitiiti, e fafaga pe aʻoaʻoina le toʻatele. E na o ni nai Kerisiano faauuina na faaaogā e tusia Tusitusiga Paia Eleni. I aso foʻi nei, e na o ni nai Kerisiano faauuina ua iai le matafaioi o le saunia o “meaʻai i le taimi tatau” mo tagata o le Atua.

16. O le ā ua e aʻoaʻoina mai i lenei suʻesuʻega?

¹⁶ O le ā ua tatou aʻoaʻoina mai i lenei suʻesuʻega? Ua filifili Ieova e tuuina atu i le toʻatele o ona tagata le ola e faavavau i le lalolagi, ae tuuina atu le ola i le lagi mo ni nai tagata o le a pule faatasi mai ma Iesu. E faamanuia e Ieova ana auauna uma, le “tagata Iutaia” faapea “tagata e toʻasefulu,” ma o lona finagalo ia latou usitaʻia tulafono uma ma tutumau faamaoni. E tatau iā i latou uma ona faaauau ona lotomaulalo, autasi ma auauna iā Ieova, ma galulue faatasi e tausia le filemu i le faapotopotoga. A o tatou lalata atu i le iʻuga, seʻi faaauau ona tatou auauna iā Ieova ma mulimuli iā Keriso o se “lafu e tasi.”​—Ioa. 10:16.