1. Andi Jehovah bi taki taa bi o pasa a di ten fuu aki?

JEHOVAH bi taki soni u di ten fuu aki. A bi taki taa: „Teni womi o kumutu a tookatooka nasion, di ta fan peipei töngö, nöö de o kisi wan Dju panjan gba hoi a di koosu fëën, nöö de o taki taa: ’U kë go ku unu, biga u jei taa Gadu dë ku unu’” (Sak. 8:23). Di „Dju” di di tëkisi aki ta taki fëën, da dee sëmbë dee Gadu salufu ku di santa jeje fëën. De ta kai dee sëmbë aki „dee Isaëli sëmbë u Gadu” tu (Gal. 6:16). Dee „teni womi” da dee sëmbë dee o libi u teego a goonliba aki. Dee sëmbë aki sabi taa Jehovah dë ku dee salufuwan, nöö de ta si ën kuma wan gaandi u dini Jehovah makandi ku de.

2. Na un futu dee „teni womi” ’nango ku’ dee salufuwan?

² Hii fa wa sa sabi di në u hiniwan u dee salufuwan dee dë a goonliba a di ten aki, * tökuseei dee sëmbë dee o libi a goonliba aki sa „go ku” dee salufuwan. Na un futu? Wë di Bëibel ta taki taa dee „teni womi” bi o „kisi wan Dju panjan gba hoi a di koosu fëën, nöö de [bi] o taki taa: ’U kë go ku unu, biga u jei taa Gadu dë ku unu.’” Di Bëibel tëkisi ta taki soni u wan Dju. Hii fa a dë sö, tökuseei di Dju di di tëkisi ta taki fëën na wan kodo sëmbë, ma di Dju dë da hii dee salufuwan tuu. Dee sëmbë dee an dë salufuwan ta dini Jehovah makandi ku dee salufuwan. Ma tökuseei de an ta  si dee salufuwan kuma fesima u de, biga de sabi taa Jesosi hën da di Fesima u de.​—Mat. 23:10.

3. Andi di woto aki o heepi u fuu ko sabi?

³ U di salufuwan dë a dee sëmbë u Gadu mindi a goonliba aki jeti, mbei so sëmbë sa ta hakisi deseei taa: (1) Unfa dee salufuwan musu ta si deseei? (2) Unfa u musu ta libi ku dee sëmbë dee ta njan di bëëë, ta bebe di win, te u ta mëni di dëdë u Jesosi? (3) U musu ta booko u hedi ee möönmöön dee sëmbë aki ta ko hia u? Di woto aki o heepi u fuu ko sabi dee soni aki.

4. Andi sikifi a 1 Kolenti 11:27-29 di dee salufuwan musu buta hii de pakisei nëën, nöö faandi mbei?

⁴ Dee salufuwan musu buta hii de pakisei a di soni di sikifi a 1 Kolenti 11:27-29. (Lesi ën.) Unfa a sa pasa taa wan salufuwan njan di bëëë, söseei taa a bebe di win „a wan fasi di an fiti”? Wë di soni aki sa pasa ee a bi o njan di bëëë, söseei ee a bi o bebe di win, hii fa an bi ta libi kumafa dee wëti u Jehovah ta taki (Heb. 6:4-6; 10:26-29). Dee salufuwan sabi taa de musu hoi deseei a Jehovah ee de kë „wini di paima a Masa Gadu Köndë ala”.​—Fil. 3:13-16.

5. Unfa dee salufuwan musu ta si deseei?

 ⁵ Di santa jeje u Jehovah ta heepi dee dinima u Jehovah u de abi sakafasi, ma an ta mbei de ko abi gaanfasi (Ef. 4:1-3; Kol. 3:10, 12). Fëën mbei dee salufuwan an ta si kuma de bumbuu möön wotowan. De sabi taa na u di de dë salufuwan, mbei Jehovah musu u ta da de möön santa jeje, möön fa a ta da dee woto dinima fëën. De an ta si kuma de ta fusutan di Bëibel bunu möön wotowan. Boiti di dë, de an o go piki wan woto sëmbë taa hënseei da salufuwan, söseei taa a musu bigi ta njan di bëëë, ta bebe di win te u ta mëni di dë u Jesosi. Ma de ta biibi taa Jehovah wanwan tö ta kai sëmbë u de go a liba ala.

6. Unfa dee salufuwan musu ta tja deseei, te u luku 1 Kolenti 4:7, 8?

⁶ Hii fa dee salufuwan ta si di tei di Gadu tei de u de go a liba ala kuma wan gaandi, tökuseei de an ta hoi taa sëmbë musu ta buta hii de pakisei a de (Fil. 2:2, 3). De sabi tu taa di Jehovah salufu de, nöö an bi mbei hii sëmbë ko sabi di soni aki. Fëën mbei an ta bigi da wan sëmbë di ko dë salufuwan ee so sëmbë an ta biibi wantewante taa Gadu salufu ën. Sö wan sëmbë sabi taa di Bëibel ta piki u taa wa musu biibi wan sëmbë hesi poi ee a taki taa Gadu dëën wan apaiti gaandi (Ako. 2:2). Wan salufuwan an o kë u sëmbë ta buta pakisei nëën möön dee woto sëmbë. Fëën mbei te hën ku sëmbë miti, nöö an o ta biinga piki de taa a dë salufuwan. Boiti di dë, an o ta tei di soni dë ta njan buka.​—Lesi 1 Kolenti 4:7, 8.

7. Andi dee salufuwan o ta köni u de an du, nöö faandi mbei?

⁷ Dee Keesitu sëmbë dee dë salufuwan an ta si kuma ku woto salufuwan nöö de musu ta dë makandi, u di de ta si kuma de dë a wan apaiti kulupu. De an ta suku u miti woto salufuwan u de sa taki soni u di salufu di Gadu salufu de, nasö u lei soni u Bëibel makandi (Gal. 1:15-17). Dee sëmbë u di kemeente an o ta libi kuma wan famii ee dee salufuwan ta du dee soni aki. Ma a o dë taa de ta fia ku di santa jeje, u di hën ta heepi dee sëmbë u Gadu u de ta libi fiifii kuma wan famii.​—Lom. 16:17, 18.

8. Faandi mbei i musu ta köni ku di fasi fa i ta libi ku dee sëmbë dee ta njan di bëëë, ta bebe di win, te u ta mëni di dë u Jesosi? (Luku di pisi a basu tu.)

⁸ Unfa u musu ta libi ku dee baaa ku dee sisa dee dë salufuwan? An bi o bunu fuu kai wan sëmbë gaan soni poi, aluwasi ee di sëmbë dë wan u dee salufu baaa u Keesitu (Mat. 23:8-12). Di Bëibel ta piki u wan soni u dee gaanwomi u kemeente. A ta piki u taa u musu ta „djeesi de a di fa de ta biibi”. Ma an ta piki u taa u musu tei wan libisëmbë ko dë fesima fuu  (Heb. 13:7). A dë sö tuu taa di Bëibel ta taki taa u „musu ta möön lesipeki” so sëmbë. A ta taki sö u di dee sëmbë aki ta „tei fesi a wan bunu fasi”, söseei u di de ta „wooko taanga u taki soni u di wöutu u Gadu, ta lei sëmbë soni u di wöutu dë”. Ma an ta taki sö u di de dë salufuwan (1 Tim. 5:17, NW). Ee u ta gafa dee salufuwan poi, söseei ee u ta buta pakisei a de poi, nöö u sa mbei de fii wan fasi. * Ma di möön hogi soni, hën da a sa pasa taa u mbei de ko abi gaanfasi (Lom. 12:3). Wë na wan fuu bi o kë du wan soni, di bi o sa mbei wan u dee salufu baaa u Keesitu ko mbei sö wan gaan föutu!​—Luk. 17:2.

9. Unfa u sa lei taa u ta lesipeki dee salufuwan?

⁹ Unfa u sa lei taa u ta lesipeki dee sëmbë dee Jehovah salufu? Wë wa o hakisi de ee unfa de du ko dë salufuwan. Di soni aki da wan soni u de, di wa abi leti fuu ko sabi (1 Tes. 4:11; 2 Tes. 3:11). Boiti di dë, wa musu hoi taa wan woto sëmbë u de famii dë salufuwan tu. Wa musu hoi taa de manu nasö de mujëë, de mama ku de tata, nasö wan woto sëmbë u di famii dë salufuwan tu. Na u di wan famii u wan sëmbë dë salufuwan, mbei hënseei o ko dë salufuwan. Gadu hën ta tei sëmbë ko dë salufuwan (1 Tes. 2:12). U musu ta köni tu fu wa hakisi sëmbë soni di sa toobi de. Wa o hakisi di mujëë u wan baaa di dë salufuwan ee unfa a ta feni ën taa a o libi u teego a goonliba aki, söndö hën manu. Wan soni di u sabi, hën da u sa dë seiki taa a di njunjun goonliba, Jehovah o „da hiniwan soni di dë ku libi di soni di a kë”.​—Ps. 145:16.

10. Unfa u ta tjubi useei te u ta köni fu wa ta kai sëmbë gaan soni poi?

¹⁰ Te wa ta libi ku dee salufuwan kuma de hei möön wotowan, nöö a o heepi u a peipei fasi. Unfa sö? Wë di Bëibel ta piki u taa a sa pasa taa so salufuwan an hoi deseei a Jehovah (Mat. 25:10-12; 2 Pet. 2:20, 21). Fëën mbei ee u ta köni fu wa ta kai sëmbë gaan soni poi, nöö wa o ko ta waka a libisëmbë baka. Aluwasi ee de dë salufuwan, ee hia sëmbë sabi de, nasö ee de ta dini Jehovah sömëni jaa kaa (Jud. 16). Nöö ee dee sëmbë aki an ko ta hoi deseei a Jehovah möön, nasö ee de puu deseei a di kemeente, nöö di soni dë an o mbei wa ko ta biibi Jehovah möön, söseei an o mbei u disa u dini Jehovah.

11. Andi ko ta pasa ku di un mëni sëmbë di ta njan di bëëë, ta bebe di win, te u ta mëni di dëdë u Jesosi?

¹¹ Fosufosu, te u bi ta mëni di dëdë u Jesosi, nöö u bi ta si taa dee sëmbë dee bi ta njan di bëëë, ta bebe di win, bi ta ko möön biti. Ma nöunöu, u ko si taa hiniwan jaa dee sëmbë aki ta ko möön hia. U musu ta booko u hedi ku di soni aki ö? Wë nönö. Boo luku faandi mbei.

12. Faandi mbei an dë fuu ta booko u hedi ku di un mëni sëmbë di ta njan di bëëë, ta bebe di wini, te u ta mëni di dëdë u Jesosi?

¹² „Gadu sabi ambë da dee sëmbë fëën” (2 Tim. 2:19). Ma dee baaa dee ta konda dee sëmbë dee ta njan di bëëë, ta bebe di win, te u ta mëni di dëdë u Jesosi, an sabi ambë dë salufuwan tuutuu. Fëën mbei u sa taki taa so u dee sëmbë aki da sëmbë di ta si kuma de dë salufuwan, hii fa an dë sö. A pasa kaa taa so sëmbë di bi ta njan di bëëë, ta bebe di win, an bi ko ta du di soni dë möön. Boiti di dë, a kan taa so sëmbë sa abi wan pei siki di ta mbei de ta si kuma de o go tii ku Jesosi a liba ala. Fuu taki ën, nöö wa sabi un mëni salufuwan dë a goonliba aki jeti.

13. Di Bëibel ta piki u un mëni salufuwan bi o dë a goonliba aki jeti te di gaan fuka bigi ö?

 ¹³ Salufuwan o dë a hii së u goonliba te Jesosi o ko tei de tja go a liba ala (Mat. 24:31). Di Bëibel ta taki taa a dee lasiti daka u di goonliba, dee salufuwan dee bi o dë a goonliba aki jeti an bi o hia (Ako. 12:17). Ma an ta piki u un mëni salufuwan bi o dë a goonliba aki jeti, te di gaan fuka bigi.

14. Te u luku Loomë 9:11, 16, nöö andi u musu ko fusutan u di tei di Gadu ta tei sëmbë ko dë salufuwan?

¹⁴ Jehovah hën ta taki na un ten a o tei sëmbë ko dë salufuwan (Lom. 8:28-30). Jehovah bigi tei sëmbë ko dë salufuwan, baka di Jesosi weki ko a libi baka. A kan taa a di ten u dee fesiten Keesitu sëmbë, hii dee tuutuu Keesitu sëmbë bi ta ko dë salufuwan. Ma bakaten, gaansë u dee sëmbë dee bi ta taki taa de da Keesitu sëmbë, an bi ta waka a Keesitu baka tuutuu. Hii fa soni bi dë sö, tökuseei Jehovah bi tei dee kondakonda sëmbë dee bi dë tuutuu Keesitu sëmbë a dee ten dë, u de ko dë salufuwan. Dee sëmbë aki bi dë kuma di alisi di Jesosi bi taki taa bi o göö a di taku uwii dendu (Mat. 13:24-30). A dee lasiti daka aki seei, Jehovah ta tei sëmbë u de ko dë a dee 144.000 sëmbë dendu. * Fëën mbei ee Gadu buta taa a o tei wanlö limbohati sëmbë u de ko dë salufuwan a di ten di fika ufö di kaba dou, nöö wa musu si kuma na wan köni soni Gadu ta du. (Lesi Loomë 9:11, 16.) * U musu köni fu wa du soni kuma dee wookoma dee Jesosi bi taki soni u de, a wan u dee woto di a bi konda. Dee wookoma aki bi guunjan di Masa u  de, u di fasi fa a bi libi ku dee sëmbë dee bi bigi wooko kuma lasiti.​—Mat. 20:8-15.

15. Mateosi 24:45-47 ta taki soni u wan „köni saafu di dë u futoou”. Hii dee salufuwan di Bëibel ta kai sö u?

¹⁵ Na hii dee sëmbë dee o go libi a liba ala, di Bëibel ta kai „di köni saafu di dë u futoou”. (Lesi Mateosi 24:45-47, NW.) A di ten u dee fesiten Keesitu sëmbë, Jehovah ku Jesosi bi tei wantu womi u de ta da sömëni sëmbë njanjan, nasö u de ta lei wotowan soni. Sö nöö de ta du ën a di ten fuu aki tu. Wantu salufu Keesitu sëmbë nöö Jehovah bi tei u de sikifi dee Giiki buku u Bëibel. A di ten aki, wantu salufu Keesitu sëmbë nöö abi di faantiwöutu u da dee sëmbë u Gadu „njanjan a di soifi ten”.

16. Andi i lei a di woto aki?

¹⁶ Andi u lei a di woto aki? Jehovah buta taa a o da gaansë u dee sëmbë fëën libi u teego a goonliba aki, nöö a o mbei wantu sëmbë nöö tii ku Jesosi a liba ala u teego. Jehovah ta paka hii dee dinima fëën. Dee dinima fëën dee dë kuma di „Dju” ku dee dë kuma dee „teni womi” tuu. Boiti di dë, a ta hakisi hii de tuu u de hoi dee seei wëti, söseei u de ta hoi deseei nëën. Hii de tuu musu abi sakafasi. Hii de tuu musu ta dini ën makandi kuma wan famii. Ma na di dë nöö, hii de tuu musu ta mbei taanga möiti u de ta libi fiifii ku deseei a di kemeente. Be hii u tuu dini Jehovah go dou, söseei boo ta waka a Keesitu baka nöömö kuma „wan kodo hipi sikapu”, a dee lasiti daka u di goonliba aki.​—Joh. 10:16.