1. San Yehovah ben taki fu a ten fu wi?

YEHOVAH ben taki na fesi fu a ten fu wi: „Tin man o komoto na mindri ala den pipel di e taki difrenti tongo èn den o grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu’” (Sak. 8:23). A „Dyu” na ini a tekst disi e prenki den wan di Gado salfu nanga santa yeye. Bijbel e kari den „na Israel fu Gado” tu (Gal. 6:16). Den „tin man” e prenki den wan di abi a howpu fu libi fu têgo na grontapu. Den sma disi sabi taki Yehovah blesi den salfuwan èn den e si en leki wan grani fu anbegi Yehovah makandra nanga den.

2. Fa den „tin man” e „go nanga” den salfuwan?

² Aladi wi no man sabi a nen fu ibri salfuwan di de na grontapu ete *, toku den wan di abi a howpu fu libi na grontapu man „go nanga” den salfuwan. Fa den kan du dati? Bijbel e taki dati den „tin man” o „grabu wan Dyu hori na en krosi, dan den o taki: ’Wi wani go nanga unu, bika wi yere taki Gado de nanga unu.’” Bijbel e taki fu „wan Dyu”. Ma a wortu „unu” e sori go na moro leki wán sma. Disi wani taki dati a Dyu na ini a tekst disi e prenki a heri grupu fu salfuwan. Den sma di no de salfuwan e  dini Yehovah makandra nanga den salfuwan. Ma den no e si den salfuwan leki den fesiman. Den e frustan taki na Yesus na den fesiman.​—Mat. 23:10.

3. Sortu aksi o kisi piki na ini na artikel disi?

³ Fu di salfu Kresten de ete na mindri a pipel fu Gado na ini a ten disi, meki son sma e aksi densrefi: (1) Fa den salfuwan musu si densrefi? (2) Fa wi musu si den wan di e nyan a brede èn di e dringi a win na a Memrefesa? (3) Wi musu broko wi ede te wi e si taki moro sma e bigin nyan a brede èn dringi a win? Na artikel disi o piki den aksi disi.

4. Soleki fa 1 Korentesma 11:27-29 e sori, dan sortu warskow den salfuwan musu hori na prakseri èn fu san ede?

⁴ Den salfuwan musu poti prakseri na a warskow na ini 1 Korentesma 11:27-29. (Leisi en.) Sortu sani kan meki taki wan salfuwan e nyan a brede noso e dringi a win „aladi a no warti fu du dati”? Te a no e hori ensrefi moro na den wet fu Yehovah (Hebr. 6:4-6; 10:26-29). Den salfuwan e frustan taki den musu tan gi yesi na Yehovah efu den wani kisi ’a pai fu Gado. Dati na a libi na ini hemel.  Gado meki Yesus Krestes kari den fu gi den a libi disi.’​—Fil. 3:13-16.

5. Fa den salfu Kresten e si densrefi?

⁵ A santa yeye fu Yehovah e yepi den anbegiman fu en fu sori sakafasi èn fu no abi heimemre (Ef. 4:1-3; Kol. 3:10, 12). Dati meki den salfuwan no e firi leki den bun moro trawan. Den sabi taki a no abi fu de so taki Yehovah e gi den salfuwan moro santa yeye leki den tra anbegiman fu en. Den no feni taki den man frustan Bijbel moro bun leki trawan. Èn noiti den o taigi wan sma taki Gado salfu en tu èn taki a musu bigin nyan fu a brede èn dringi fu a win. Den abi sakafasi èn den e frustan taki na Yehovah wawan e gi sma wan kari fu go na hemel.

6. Fa 1 Korentesma 4:7, 8 e sori fa salfu Kresten musu tyari densrefi?

⁶ Aladi den salfuwan e si en leki wan grani taki den kisi a kari fu go na hemel, toku den no e fruwakti taki trawan o gi den spesrutu grani (Fil. 2:2, 3). Den e hori na prakseri taki di Yehovah salfu den a no meki tra sma kon sabi dati. Dati meki a no e fruwondru den efu tra sma no e bribi wantewante taki Gado salfu den nanga santa yeye. Den sabi tu taki Bijbel e taki dati wi no musu de gaw fu bribi wan sma di e taki dati Gado gi en wan spesrutu frantwortu (Openb. 2:2). Wan salfuwan no wani du sani fu meki sma poti prakseri na en. Dati meki a no e taigi sma di a e miti fu a fosi leisi taki en na wan salfuwan. Èn noiti a wani dyaf gi tra sma taki a e go na hemel.​—Leisi 1 Korentesma 4:7, 8.

7. San den salfuwan no o du èn fu san ede?

⁷ Den salfu Kresten no e feni taki den musu bumui soso nanga tra salfuwan èn den no e si densrefi leki sma di de fu wan spesrutu grupu di hei moro trawan. Den no e pruberi fu suku tra salfu Kresten fu go taki nanga makandra fa a e firi fu de wan salfuwan. Boiti dati, den no o seti grupu fu studeri Bijbel makandra (Gal. 1:15-17). Wánfasi no ben o de na ini a gemeente efu den salfuwan ben o du den sani disi. Den ben o gens a santa yeye di e yepi Gado pipel fu abi freide nanga wánfasi.​—Rom. 16:17, 18.

8. Fu san ede wi musu luku bun fa wi e denki fu den salfuwan? (Luku sosrefi a futuwortu.)

⁸ Fa wi musu si den salfuwan? A no ben o bun fu prèise wan sma tumusi, srefi  efu en na wan fu den salfu brada fu Krestes (Mat. 23:8-12). Te Bijbel e taki fu den owruman a e gi wi deki-ati fu „teki wan eksempre na a bribi fu den”, ma Bijbel no e taki dati wi musu teki wan libisma leki wi fesiman (Hebr. 13:7). A tru taki Bijbel e taki dati son sma musu kisi „moro lespeki”. Ma wi musu sori moro lespeki gi den fu di den e „teki fesi na wan bun fasi” èn fu di den e „wroko tranga fu taki fu a wortu fu Gado èn fu leri sma a wortu dati” (1 Tim. 5:17). Wi no e du dati fu di den na salfuwan. Efu wi e prèise den salfuwan tumusi furu èn wi e poti tumusi furu prakseri na den, dan wi o meki den firi wan fasi. * Ma san moro ogri na taki wi kan meki den kisi heimemre (Rom. 12:3). Nowan fu wi wani du wan sani di o meki wan fu den brada fu Krestes fadon.​—Luk. 17:2.

9. Fa wi kan sori lespeki gi den salfuwan?

⁹ Fa wi kan sori lespeki gi den wan di Yehovah salfu? Wi no o aksi den fa den tron salfu Kresten, fu di wi no wani bumui nanga den tori èn wi no abi a reti fu kon sabi dati (1 Tes. 4:11; 2 Tes. 3:11). Wi no musu denki taki fu di wan sma na wan salfuwan, dan en trowpatna, en papa, en mama, noso tra famiriman fu en na salfuwan tu. Wan sma no e tron wan salfuwan fu di furu sma na ini en famiri na salfuwan. Na Yehovah e bosroiti suma e tron salfuwan (1 Tes. 2:12). Wi no musu aksi sani tu di o hati den firi. Fu eksempre, wi no o aksi a frow fu wan salfu brada fa a e feni en taki a o abi fu libi fu têgo na grontapu sondro en masra. Fu taki en leti, wi kan de seiker taki na ini a nyun grontapu Yehovah o „gi ala libisani san den e angri fu kisi”.​—Ps. 145:16.

10. Fa wi e kibri wisrefi te wi no e „prèise sma” tumusi?

¹⁰ Te wi no e si salfu Kresten leki sma di prenspari moro trawan, dan wi e kibri wisrefi tu. Fu san ede wi kan taki dati? Bijbel e taki dati kande son salfuwan o drai baka gi Yehovah (Mat. 25:10-12; 2 Petr. 2:20, 21). Ma efu wi no abi a gwenti fu „prèise sma” tumusi, dan wi no o waka na den baka awinsi den na salfuwan, awinsi furu sma sabi den, noso awinsi den e dini Gado wan langa pisi ten kaba (Yud. 16). Efu den sma disi ben o drai baka gi Gado, dan wi no o lasi bribi èn wi no o tapu fu dini Yehovah.

11. San e pasa nanga a nomru fu salfuwan?

¹¹ Furu yari langa a ben de so taki a nomru fu sma di ben nyan èn di ben dringi na a Memrefesa ben saka. Ma now wi e si taki ibri yari a nomru dati e kon moro bigi. Wi musu broko wi ede nanga a sani disi? Nôno. Meki wi go luku wan tu sani di wi musu hori na prakseri.

12. Fu san ede wi no musu broko wi ede nanga a nomru fu sma di e nyan èn di e dringi na a Memrefesa?

¹² „Yehovah sabi den sma di de fu en” (2 Tim. 2:19). Den brada di e teri omeni sma nyan a brede èn dringi a win na a Memrefesa, no man sabi suma abi a howpu fu go na hemel trutru. Na Yehovah wawan sabi dati. Sobun, a kan taki sonwan fu den sma di e nyan èn di e dringi e denki taki den na salfuwan aladi dati no de so. Fu eksempre, son sma  di ben nyan èn di ben dringi tapu fu du dati bakaten. Trawan ede no e wroko so bun èn dati meki den e denki taki den o tiri makandra nanga Krestes na ini hemel. Sobun, wi no man taki soifri omeni salfuwan de na grontapu ete.

13. Bijbel e taki omeni salfuwan o de na grontapu ete te a bigi banawtu bigin?

¹³ Salfuwan o de na ala sei fu grontapu te Yesus o kon fu tyari den go na hemel (Mat. 24:31). Bijbel e sori taki na ini den lasti dei wan pikin grupu salfuwan o de na grontapu ete (Openb. 12:17). Ma a no e taki omeni fu den o de na grontapu te a bigi banawtu bigin.

14. Soleki fa Romesma 9:11, 16 e sori, dan sortu sani wi musu hori na prakseri fu den salfuwan?

¹⁴ Na Yehovah e bosroiti o ten a wani gi wan sma a kari fu tron wan salfuwan (Rom. 8:28-30). Baka di Yesus kisi wan opobaka, Yehovah bigin gi sma wan kari fu tron salfuwan. Soleki fa a sori, dan ala den sma fu a fosi Kresten gemeente ben de salfuwan. Na ini den yari baka dati furu fu den sma di ben taki dati den na Kresten no ben libi soleki fa wan Kresten musu libi. Ma toku Yehovah ben salfu wan tu sma di ben de tru Kresten na ini den yari dati. Soleki fa Yesus ben taki, dan den sma disi ben de leki na aleisi di ben o gro na mindri a takru wiwiri (Mat. 13:24-30). Na ini den lasti dei, Yehovah tan salfu den wan di ben o de na ini a grupu fu den 144.000 sma. * Efu Yehovah bosroiti fu salfu wan tu sma syatu  fosi a kaba kon, wi no abi fu tweifri efu a du a yoisti sani. (Leisi Romesma 9:11, 16.) * Wi musu luku bun taki wi no de leki den wrokoman na ini wan fu den agersitori fu Yesus. Den ben krutu fu di a masra fu den ben pai den a srefi moni di a pai den wrokoman di ben wroko wán yuru nomo.​—Mat. 20:8-15.

15. Na ala den salfuwan na „a koni srafu di de fu frutrow” di kari na ini Mateyus 24:45-47? Fruklari dati.

¹⁵ A no ala den sma di abi a howpu fu go na hemel na „a koni srafu di de fu frutrow”. (Leisi Mateyus 24:45-47.) Neleki fa a ben de na a ten fu den apostel, na so Yehovah nanga Yesus e gebroiki wan tu brada nomo na ini a ten disi fu gi furu sma leri. Na ini a ten fu den apostel na wan tu salfu Kresten nomo, Gado ben gebroiki fu skrifi den Kresten Griki Buku fu Bijbel. Na ini a ten disi na wan tu salfu Kresten nomo kisi a frantwortu fu gi Gado pipel „nyanyan na a reti ten”.

16. San wi leri na ini na artikel disi?

¹⁶ San wi leri na ini na artikel disi? Yehovah bosroiti fu gi a moro bigi pisi fu en pipel a howpu fu libi fu têgo na grontapu èn fu gi wan pikin grupu di o tiri makandra nanga Yesus a howpu fu libi na hemel. Yehovah e blesi ala den anbegiman fu en, dati na a grupu di e prenki a „Dyu” èn a grupu di e prenki den „tin man”. Den alamala abi den srefi wet èn den alamala musu tan du san Yehovah wani. Den alamala musu tan sori sakafasi. Den musu anbegi Yehovah makandra èn den musu abi wánfasi. Den alamala musu sorgu taki freide de na ini a gemeente. Now di a kaba e kon moro krosibei, wi musu meki muiti fu tan dini Gado leki „wán ipi”èn fu tan waka baka Krestes.​—Yoh. 10:16.