1. Ndiéjunʼ rí niʼthí Jeobá marigá rí mbiʼi xúgi̱ rá.

JEOBÁ niʼthí rí mbiʼi xúgi̱: “Mbiʼi rúʼko̱, mbá gu̱wi̱i̱nʼ xa̱bekha bi̱ nuthi xúgíʼ ajngáa náa xuajin mba̱ʼu̱ murajtuun, xúʼko̱, murajtuun xa̱ʼ rawuunʼ jnáwu̱u̱n mbáa judío ga̱jma̱a̱ muthi: “‹Nanduxu muʼguá ga̱jma̱á nindxa̱laʼ, numuu rí nidxáwinxu rí Dios xtáa ga̱jma̱á nindxa̱laʼ›” (Zac. 8:23). “Judío” bigi̱ nandoo gáʼthúu̱n bi̱ Dios niraʼwíin ga̱jma̱a̱ xi̱ʼ kaʼwu ndrígóo. Ma̱ngaa najmániúun xóo “Israel ndrígóo Dios” (Gál. 6:16). Bi̱ “mbá gu̱wi̱nʼ xa̱bekha” nandoo gáʼthúu̱n bi̱ guáʼthi̱i̱n makuwi̱i̱n kámuu náa tsu̱du̱u̱ Ku̱ba̱ʼ. Ikhiin nduyáá rí Jeobá nindxu̱u̱ bi̱ niraʼwíin ga̱jma̱a̱ nduyáá rí gíʼdoo numuu muni ñajuunʼ Dios.

2. Xú káʼnii egún gajmiún bi̱ mbá gu̱wi̱i̱nʼ xa̱bekha bi̱ kaxtaʼwíin rá.

² Maski ajndu má rí mbiʼi xúgi̱ tséʼyáá xú káʼnii mbiʼñún xúgínʼ bi̱ kaxtaʼwíin bi̱ xóó naguanún náa tsu̱du̱u̱ Ku̱ba̱ʼ, * bi̱ guáʼthi̱i̱n makuwíin náa tsu̱du̱u̱ Ku̱ba̱ʼ ma̱ndoo “magu̱u̱n” gajmiún ikhiin. Mú, xú káʼnii rá. Náa Biblia naʼthí rí bi̱ “mbá gu̱wi̱i̱nʼ xa̱bekha” murajtun xáʼ “rawuunʼ jnáwu̱u̱n mbáa judío” ga̱jma̱a̱ muthi: “Nanduxu muʼguá ga̱jma̱á nindxa̱laʼ, numuu rí nidxáwinxu rí Dios xtáa ga̱jma̱á nindxa̱laʼ”. Náa versículo rígi̱ naʼthí ga̱jma̱a̱ numuu mbáwíi judío. Mú bi̱ gu̱wi̱i̱nʼ xa̱bekha nagúun náa ikhaa nasngájma rí ni̱ndxu̱ún mbaʼin, nutháán muʼguá “ga̱jma̱á nindxa̱laʼ”. Rígi̱ nandoo gáʼthi rí “judío” na̱nguá nindxu̱u̱ mbáwíi xa̱bu̱, nandoo gáʼthúu̱n mbá  nguéjmi̱i̱n bi̱ kaxtaʼwíin. Bi̱ na̱nguá kaxtaʼwíin nuni ñajuunʼ Jeobá gajmiún bi̱ kaxtaʼwíin. Mú na̱nguá eñún xóo bi̱ kuya̱ edxu̱u̱ numuu rí nduyáá rí mbáwíi Jesús nindxu̱u̱ bi̱ Kayá edxu̱u̱ (Mat. 23:10).

3. Xú káʼnii graxe̱ gáxti̱ʼña̱a̱ náa artículo rígi̱ rá.

³ Xóó kúwi̱i̱n bi̱ kaxtaʼwíin náa majñúnʼ xa̱bi̱i̱ Dios rí mbiʼi xúgi̱. Mbáa ikha jngó rí tikhun nurajximíjna̱: Xú káʼnii eyamijná bi̱ kaxtaʼwíin rá. Xú káʼnii gíʼmaa muʼniu̱u̱n bi̱ naʼphu̱ pan ga̱jma̱a̱ bi̱ naʼwa̱a̱n vino náa conmemoración rá. Ga̱jma̱a̱ lá gíʼmaa maxmiéjunlú á mu bi̱ naʼphu̱ pan ga̱jma̱a̱ bi̱ naʼwa̱a̱n vino naʼni itháan mbaʼin rá. Náa artículo rígi̱ maxtiʼña̱a̱ graxe̱ rígi̱.

4. Xú káʼnii ajngáa dí na̱ʼkha̱ raʼthí náa 1 Corintios 11:27-29 rí gíʼmaa munimbánii bi̱ kaxtaʼwíin ga̱jma̱a̱ náá numuu rá.

⁴ Náa 1 Corintios 11:27-29 * na̱ʼkha̱ raʼthí rí gíʼmaa munimbánii bi̱ kaxtaʼwíin (atraxnuu). Xú káʼnii gándoo mbáa bi̱ kixtiʼyaaʼ gíkhu̱ pan ga̱jma̱a̱ gága̱a̱n vino náa conmemoración á mu “na̱nguá kaʼyoo” xá.  Á mu na̱ʼkhu̱ pan ga̱jma̱a̱ naʼga̱a̱n vino na̱nguá xtáa raʼnimbo̱o̱ xtángoo ndrígóo Jeobá (Heb. 6:4-6; 10:26-29). Bi̱ kaxtaʼwíin nduyáá májánʼ rí ndayóoʼ muguajún jmbu á mu nandún ‹muxkamaa rí maxnún Dios rí magu̱u̱n mekhuíí ga̱jma̱a̱ numuu Cristo Jesús› (Filip. 3:13-16).

5. Xú káʼnii gíʼmaa mbuyamijná cristiano bi̱ kaxtaʼwíin rá.

⁵ Xi̱ʼ kaʼwu ndrígóo Jeobá naʼni mani̱ndxu̱ún xa̱bu̱ guabiinʼ, ga̱jma̱a̱ rí xúni mba̱ʼu̱míjna̱ (Efes. 4:1-3; Col.3:10, 12). Ikha jngó rí bi̱ kaxtaʼwíin tséku̱mu̱ún rí itháan guáʼdáá numún ki xóo eʼwíinʼ. Ga̱jma̱a̱ nduyáá gajkhun rí Jeobá raʼkháa i̱ndó ikhiin naxnún itháan xi̱ʼ kaʼwu ki xó eʼwíinʼ. Ma̱ngaa, na̱nguá e̱ndxa̱ʼwa̱míjna̱ rí ikhiin nduyáá itháan rí naʼthí náa Biblia ki xóo eʼwíínʼ. Ga̱jma̱a̱ xútháán nimbáa: “Mangáán nindxa̱a̱ʼ bi̱ kixtiʼyaaʼ, gíʼmaa miʼtsu pan ma̱ngaa migi̱i̱n vino náa conmemoración”. Ni̱ndxu̱ún xa̱bu̱ guabiinʼ ga̱jma̱a̱ nduyáá rí i̱ndó Jeobá ma̱ndoo maʼthúu̱n mbáa mu maʼga̱a̱ mekhuíí.

6. Xó má naʼthí náa 1 Corintios 4:7, 8, xú káʼnii gíʼmaa muni bi̱ kaxtaʼwíin rá.

⁶ Maski ajndu bi̱ kaxtaʼwíin nduyáá rí nindxu̱u̱ mbá ñajunʼ kiejunʼ rí magu̱u̱n mekhuíí, tséguáʼthi̱i̱n rí makhánun gamajkhu (Filip. 2:2, 3). Ma̱ngaa nduyáá, rí índo̱ Jeobá niraʼwíin, na̱nguá niʼni rí mudxawíín xúgínʼ xa̱bu̱. Ikha jngó mbáa cristiano bi̱ kixtiʼyaaʼ tséʼniuu tsiánguá índo̱ eʼwíinʼ xa̱bu̱ naʼniún gakhii munimbu̱u̱n rí Dios ndiya̱a̱ʼ. Ma̱ngaa náa Biblia naʼthí dí ragíʼmaa muʼnimbulúʼ mbá nacha̱ índo̱ mbáa naʼthí rí Dios nixnúu mbá ñajunʼ kiejunʼ (Apoc. 2:2). Ma̱ngaa, numuu rí tsíñún rí muxnún gamajkhu, ga̱jma̱a̱ índo̱ nuninuwiinʼ mbáa tsétháan rí ni̱ndxu̱ún bi̱ kaxtaʼwíin. Ga̱jma̱a̱ tséni mbaʼumíjna̱ (atraxnuu 1 Corintios 4:7, 8). *

7. Ndiéjunʼ eni bi̱ kaxtaʼwíin ga̱jma̱a̱ náá numuu rá.

⁷ Bi̱ kaxtaʼwíin tsémbajxu̱u̱n i̱ndó gajmiún eʼwíinʼ bi̱ kaxtaʼwíin, mu mani̱ndxu̱ún xóo mbá grupo kiejunʼ. Asndu má Tséñiinʼ eʼwíinʼ bi̱ kaxtaʼwíin mu mutamijná gajmiún rí magu̱u̱n mekhuíí o mu munigajmaa Biblia i̱ndó ikhiin (Gál. 1:15-17). Á mu nuni xúʼko̱, xúni̱ rí makuwíin mbá kambájxu̱u̱n a̱ngiu̱lú náa congregación. Ga̱jma̱a̱ xúni̱ xó má nandoo xi̱ʼ kaʼwu, numuu dí rígi̱ naʼni rí makuwíin mbá kambájxu̱u̱n náa xuajñuu Dios (Rom. 16:17, 18).

8. Náá numuu dí gíʼmaa mbuʼyáá tsumáá xóo gúʼniu̱u̱n bi̱ kaxtaʼwíin rá. (Atayáá ma̱ngaa nota.)

⁸ Xú káʼnii gíʼmaa muʼniu̱u̱n a̱ngiu̱lú xa̱bekha ga̱jma̱a̱ gu̱ʼu̱ bi̱ kaxtaʼwíin rá. Raʼkhí nindxu̱u̱ dí matani mba̱a̱ wéñuʼ mbáa, maski má nindxu̱u̱ mbáa bi̱ kixtiʼyaaʼ, mbáa ndxájuu Cristo (Mat. 23:8-12). Guʼtá ga̱jma̱a̱ numún bi̱ kuya̱ edxu̱u̱, náa Biblia naʼthí: “Guyaridáá fe ndrígu̱ún”, mú na̱nguá eʼthí rí mu̱ʼgua̱ kidxúúnʼ xa̱bu̱ numbaaʼ (Heb. 13:7). Gajkhun má rí naʼthí ma̱ngaa rí tikhun cristianos ni̱ndxu̱ún “kaʼñún itháan gamajkhu”. Mú raʼkháa ga̱jma̱a̱ numuu rí ni̱ndxu̱ún mbáa bi̱ kixtiʼyaaʼ, numuu rí “nuxna májánʼ ikha náa congregación” ga̱jma̱a̱ “nuñajunʼ gakhi̱i̱ náa muthi ga̱jma̱a̱ musngáa” (1 Tim. 5:17). Á mu nduʼyamajkhún wéñuʼ, ma̱ndoo mu̱ʼni̱ rí matiñu̱u̱nʼ * o mu̱ʼni̱ rí munimbaʼumíjna̱ (Rom. 12:3). Nimbáa rí ikháanʼ tsíyoo maʼni rí mbáa bi̱ kixtiʼyaaʼ makudaminaʼ mbá aʼkhá mba̱a̱ wéñuʼ (Luc. 17:2).

9. Xú káʼnii gándoo gusngajmá gamajkhu náa bi̱ kaxtaʼwíin rá.

⁹ Xú káʼnii gándoo gusngajmá gamajkhu náa bi̱ niraʼwíin Jeobá rá. Xurajxu̱u̱n ga̱jma̱a̱ numuu xóo káʼnii niguánu nindrigú rí magu̱u̱n mekhuíí. I̱ndó ikhiin kaʼñún mbuyáá, rakáʼyulú mbuʼyáá ikháanʼ (1 Tes. 4:11; 2 Tes. 3:11). Ma̱ngaa, tséndxaʼwamíjna̱lú rí a̱jmbiúún, guʼñún, anu̱ún ga̱jma̱a̱ eʼwíinʼ a̱ngiu̱ún gíʼmaa magu̱u̱n mekhuíí. Rígi̱ na̱nguá xóo muxnún eʼwíinʼ, numuu rí Dios nindxu̱u̱ bi̱ naxnún (1 Tes. 2:12). Ma̱ngaa xúʼni̱ graxe̱ rí eʼwíinʼ maʼni gawúnʼ. Mbá xkri̱da, nditháan xurajxi̱i̱ a̱ʼgiu̱u̱ mbáa bi̱ kixtiʼyaaʼ rí xú káʼnii endxa̱ʼwáminaʼ rí xáxtáa ga̱jma̱a̱ ajmbio̱o̱ náa tsu̱du̱u̱ Ku̱ba̱ʼ nda̱wa̱á. Numuu rí nduʼyáá kaʼwu rí Jeobá má gáxnún rí nda̱ñúnʼ bi̱ gákuwá ikhú (Sal. 145:16).

10. Náá numuu rí xáʼyóoʼ muyejxi̱i̱ xóo ni̱ndxu̱ún xá.

¹⁰ Á mu tséʼñún bi̱ kaxtaʼwíin xóo bi̱ guaʼdáá itháan numún, muñewumijnalú má ikháanʼ. Xú kaʼnii rá. Xó ma naʼthí náa Biblia rí bi̱ kaxtaʼwíin ma̱ndoo maʼni rí xáguajun jmbu (Mat. 25:10-12; 2 Ped. 2:20, 21). Á mu “tséyejxi̱i̱ xóo ni̱ndxu̱ún”, nditháan xúʼgua̱ kidxúunʼ xa̱búu, maski má ni̱ndxu̱ún bi̱ kaxtaʼwíin, bi̱ najmaʼniiʼ wéñuʼ o mba̱yu̱u̱ʼ tsiguʼ má eni ñajuunʼ Jeobá (Jud. 16, nota). Numuu rí á mu ikhiin nuniña̱a̱ʼ raguájun jmbu ga̱jma̱a̱ nuniñanʼ congregación, ikháanʼlu xúʼnimbati̱ga̱a̱ fe ndrígúlú ni má xúniʼñáanʼ Jeobá.

11. Ndiéjunʼ erígá ga̱jma̱a̱ numún bi̱ naʼwa̱a̱n vino ga̱jma̱a̱ bi̱ naʼphu̱ pan náa Conmemoración rá.

¹¹ Naʼni tsiguʼ, bi̱ naʼwa̱a̱n vino ga̱jma̱a̱ bi̱ naʼphu̱ pan náa Conmemoración na̱jkha̱ raʼni nguéjmi̱i̱n, mú náa iwáá tsiguʼ na̱jkha̱ raʼni itháan mbaʼin. Lá gíʼmaa maxmiéjunlú ga̱jma̱a̱ numuu rígi̱ ráʼ. Na̱nguá, guʼyáá tikhu rí mambáyulúʼ makru̱ʼu̱lú náá numuu.

12. Náá numuu rí tséyóoʼ maxmiéjunlú mbuʼyáá nguáthi̱i̱n bi̱ naʼphu̱ pan ga̱jma̱a̱ naʼwa̱a̱n vino rá.

¹² “Jeobá naninúnʼ bi̱ kaʼñún náa ikhaa” (2 Tim. 2:19). Jeobá ndaʼyoo tsíín ni̱ndxu̱ún bi̱ kaxtaʼwíin. Mú índo̱ narígá Conmemoración a̱ngiu̱lú bi̱ naʼphu̱ pan ga̱jma̱a̱ bi̱ naʼwa̱a̱n vino tséyáá. Ikha jngó nagixniin asndu bi̱ nakumu̱ún rí ni̱ndxu̱ún bi̱ kaxtaʼwíin mú na̱nguá ni̱ndxu̱ún. Tikhun ni̱ʼphu̱ pan ga̱jma̱a̱ niʼwa̱a̱n vino mú nda̱wa̱á niniña̱a̱ʼ runi. Ga̱jma̱a̱ eʼwíinʼ nakumu̱ún rí mutañajunʼ gajmiún Cristo náa mekhuíí numuu rí tséñajunʼ májánʼ edxu̱ún. Ikha jngó, na̱nguá eʼyáá májánʼ nguáthi̱i̱n bi̱ kaxtaʼwíin naguanún xóó náa tsu̱du̱u̱ Ku̱ba̱ʼ.

13. Lá naʼthí náa Biblia nguáthi̱i̱n bi̱ kaxtaʼwíin gáguanún náa tsu̱du̱u̱ Ku̱ba̱ʼ índo̱ gági̱ʼdu̱u̱ marigá majphú mba̱a̱ gaʼkhu rá’.

 ¹³ Makuwá bi̱ kaxtaʼwíin náa mbaʼa xuajen dí rígá náa Ku̱ba̱ʼ índo̱ Jesús gáʼkha̱a̱ mú maʼga̱a̱ kagui̱i̱n náa mekhuíí (Mat. 24:31). Gajkhun má rí naʼthí náa Biblia rí índo̱ gáʼni iwáá mbiʼi maguanún mbá nguéjmi̱i̱n bi̱ kaxtaʼwíin náa tsu̱du̱u̱ Ku̱ba̱ʼ (Apoc. 12:17). Mú na̱nguá eʼthí nguáthi̱i̱n gáguanún índo̱ gági̱ʼdu̱u̱ marigá majphú mba̱a̱ gaʼkhu.

14. Ndiéjunʼ eʼsngúlú náa Romanos 9:11, 16 ga̱jma̱a̱ numuu rí xóo naxtaʼwíin bi̱ magu̱u̱n mekhuíí rá.

¹⁴ Jeobá ndaʼyoo nguáná gáraʼwíin bi̱ magu̱u̱n mekhuíí (Rom. 8:28-30). Jeobá nigíʼdu̱u̱ niraʼwíin nda̱wa̱á rí Jesús nigabi̱i̱. Nakujmaa rí nákha siglo timbá, xúgínʼ bi̱ ni̱ndxu̱ún cristianos gajkhun ninindxu̱ún bi̱ kaxtaʼwíin. Mba̱yu̱u̱ʼ tsiguʼ nda̱wa̱á, mbaʼin bi̱ nithi rí ni̱ndxu̱ún cristianos mú na̱nguá ni̱ndxu̱ún. Maski asndu xúʼko̱, nákha ikhú Jeobá niraʼwíin ga̱jma̱a̱ xi̱ʼ kaʼwu ndrígóo mbá nguéjmi̱i̱n bi̱ ni̱ndxu̱ún cristianos gajkhun bi̱ nikúwá ikhú. Ikhiin ni̱ndxu̱ún xóo trigo bi̱ Jesús niʼthí rí mbaja̱a̱ náa majñu̱u̱ʼ iná dí ra̱májánʼ (Mat. 13:24-30). Náa iwáá mbiʼi, Jeobá naraʼwíin xóó xa̱bu̱ mu mani̱ndxu̱ún bi̱ mbá 144,000. * Á mu Jeobá naʼthí maraʼwíin tikhun bi̱ magu̱u̱n mekhuíí índo̱ inuu ma̱ʼkha̱ fin, Tsáa ñajunlú ikháanʼ mu muʼthá dí raʼkhí rí xtáa raʼni xá. (Atraxnuu Romanos 9:11, 16.) * Tsíyulú manindxu̱lúʼ  xóo yumbáá bi̱ Jesús niʼthí náa mbá xkri̱da, ikhiin nitanumáá bi̱ naʼtáñajúnʼ rí xú káʼnii niʼniún bi̱ nitu̱ʼu̱u̱n niñajuunʼ nda̱wa̱á kayuuʼ * (Mat. 20:8-15).

15. Náá numuu nduʼyáá dí raʼkháa xúgínʼ bi̱ kaxtaʼwíin nindxúu̱n “ñumba tsi jmbi, tsi majan indxaʼhuaminaʼ” rí naʼthí náa Mateo 24:45-47 rá.

¹⁵ Raʼkháa xúgínʼ bi̱ kaxtaʼwíin ni̱ndxu̱ún “ñumba tsi jmbi, tsi majan indxaʼhuaminaʼ” (atraxnuu Mat. 24:45-47). * Xó má nákha siglo timbá, rí mbiʼi xúgi̱ Jeobá ga̱jma̱a̱ Jesús najmiún mbá nguéjmi̱i̱n xa̱bu̱ mu muxniʼtsúún ga̱jma̱a̱ musngúún mbaʼin xa̱bu̱. Nákha siglo timbá, káaʼ mbá nguéjmi̱i̱n bi̱ kaxtaʼwíin niniraʼmáʼ Escrituras Griegas Cristianas. Ga̱jma̱a̱ rí mbiʼi xúgi̱, káaʼ mbá nguáthi̱i̱n bi̱ kaxtaʼwíin guáʼdáá ñajunʼ rí muxna ganitsu mbiʼi rí gáʼyooʼ náa xuajñuu Dios.

16. Ndiéjunʼ rí nijmaña̱a̱ʼ náa artículo rígi̱ rá.

¹⁶ Gutangáánʼ mbuʼyáá rí nijmañulúʼ náa artículo rígi̱. Jeobá niraʼwíí rí maxnún rí makuwíin kámuu mbiʼi náa tsu̱du̱u̱ Ku̱ba̱ʼ mbaʼin xa̱bi̱i̱ ga̱jma̱a̱ rí makuwíin mekhuíí mbá nguéjmi̱i̱n bi̱ mutañajunʼ gajmiún Jesús. Dios naʼni tsajkurámiinʼ xúgínʼ xa̱bi̱i̱ —xó má bi̱ “judío” ga̱jma̱a̱ bi̱ mbá “gu̱wi̱i̱nʼ xa̱bekha”— ga̱jma̱a̱ nandu̱ʼu̱u̱n xúgínʼ rí munimbu̱u̱n ikháá má xtángoo ma̱ngaa rí maguajún jmbu. Xúgínʼ gíʼmaa mani̱ndxu̱ún xa̱bu̱ gua̱bi̱i̱nʼ ga̱jma̱a̱ muni mbóó jnduʼ ñajunʼ ma̱ngaa rí makuwá mbá kambáxu̱u̱n. Ma̱ngaa gíʼmaa munimíjna̱ rí marigá tsímáá náa congregación. Kuwáanʼlu itháan mijngii rí ma̱ʼkhá fin, ikha jngó gu̱ʼni̱ má xúʼko̱ ñajuunʼ Jeobá ga̱jma̱a̱ gu̱ʼgua̱ kidxuuʼ Cristo xóo bi̱ kúwá mbá jnduʼ ‹náa mbá gúláa› (Juan 10:16).