1. Jeová fó-hatene nanis saida kona-ba ita-nia tempu?

JEOVÁ fó-hatene nanis kona-ba ita-nia tempu hodi hatete: “Mane naʼin-sanulu husi língua hotu husi nasaun oioin sei kaer metin mane Judeu ida nia roupa, hodi dehan: ‘Ami hakarak bá hamutuk ho imi, tanba ami rona ona katak Maromak hamutuk ho imi.’” (Zac 8:23) Iha eskritura neʼe, “mane Judeu ida” reprezenta ema neʼebé Maromak hili liuhusi espíritu santu. Bíblia mós bolu sira nuʼudar “Izraél Maromak nian”. (Gal 6:16) “Mane naʼin-sanulu” reprezenta ema neʼebé iha esperansa atu moris ba nafatin iha rai. Sira hatene katak Jeová haraik ona bensaun ba Izraél Maromak nian no sente neʼe mak priviléjiu atu adora Maromak hamutuk ho ema sira-neʼe.

2. Oinsá mak “mane naʼin-sanulu” “bá hamutuk” ho ema sira neʼebé Maromak hili atu bá lalehan?

² Ohin loron maski ita la koñese ema ida-idak neʼebé Maromak hili atu bá lalehan, * maibé sira neʼebé iha esperansa atu moris ba nafatin iha rai bele “bá hamutuk” ho ema sira neʼebé Maromak hili ona. Oinsá? Bíblia hatete katak “mane naʼin-sanulu” sei “kaer metin mane Judeu ida nia roupa, hodi dehan: ‘Ami hakarak bá hamutuk ho imi, tanba ami rona ona katak Maromak hamutuk ho imi.’” Eskritura neʼe temi mane Judeu ida. Maibé liafuan “imi” refere ba ema barak. Neʼe signifika mane Judeu neʼe laʼós ema ida deʼit, maibé reprezenta grupu tomak neʼebé  Maromak hili atu bá lalehan. No ema neʼebé iha esperansa atu moris iha rai serbí Jeová hamutuk ho sira neʼebé atu bá lalehan. Maibé, sira la hanoin katak ema neʼebé atu bá lalehan mak sira-nia ulun-naʼin, tanba sira hatene katak Jesus mak sira-nia Ulun-Naʼin.—Mt 23:10.

3. Iha lisaun neʼe, ita sei hetan resposta ba pergunta saida deʼit?

³ Tanba ohin loron Kristu nia alin balu sei iha ita-nia leet, karik ema balu hanoin: (1) Ema sira neʼebé atu bá lalehan presiza hanoin oinsá kona-ba sira-nia an? (2) Ita presiza hanoin oinsá kona-ba ema sira neʼebé han paun no hemu tua-uvas iha Memoriál? (3) Ita presiza hanoin barak se ema sira neʼebé han paun no hemu tua-uvas aumenta beibeik ka lae? Iha lisaun neʼe, ita sei hetan resposta ba pergunta sira-neʼe.

4. Ema sira neʼebé atu bá lalehan presiza hanoin didiʼak avizu saida iha 1 Korinto 11:27-29, no tanbasá?

⁴ Ema sira neʼebé atu bá lalehan presiza hanoin didiʼak avizu iha 1 Korinto 11:27-29. (Lee.) Oinsá mak ema ida han paun no hemu tua-uvas “la ho respeitu” iha  Memoriál? Nia sei la hatudu respeitu se nia han paun no hemu tua-uvas maibé la moris tuir Jeová nia ukun-fuan sira. (Ebr 6:4-6; 10:26-29) Ema sira neʼebé Maromak hili rekoñese katak sira tenke laran-metin nafatin se sira hakarak atu simu ‘kolen neʼebé Maromak bolu sira atu simu, katak moris iha lalehan liuhusi Kristu Jesus’.—Flp 3:13-16.

5. Oinsá mak ema sira neʼebé atu bá lalehan hanoin kona-ba sira-nia an?

⁵ Jeová nia espíritu santu ajuda ninia atan sira atu haraik an, no la foti an. (Éf 4:1-3; Kol 3:10, 12) Tan neʼe, sira neʼebé atu bá lalehan la sente katak sira diʼak liu fali ema seluk. Sira hatene katak dala ruma Jeová la fó espíritu santu barak liu ba sira duké ba ninia atan seluk. Sira la sente katak sira komprende liu lia-loos iha Bíblia duké ema seluk. No sira nunka fó-hatene ema seluk katak Maromak mós hili ona ema neʼe atu bá lalehan no anima nia atu han paun no hemu tua-uvas iha Memoriál. Sira ho haraik an rekoñese katak Jeová deʼit mak bele hili ema atu bá lalehan.

6. Tuir 1 Korinto 4:7, 8, hahalok saida deʼit mak ema neʼebé atu bá lalehan tenke hatudu?

⁶ Maski ema neʼebé atu bá lalehan sente katak nia iha priviléjiu boot, maibé nia la hein atu ema seluk trata nia iha dalan espesiál. (Flp 2:2, 3) Nia mós hatene katak bainhira Jeová hili nia, Jeová la fó-hatene ema seluk kona-ba neʼe. Tan neʼe, ema neʼebé atu bá lalehan la hakfodak se ema balu foufoun la fiar kedas katak Maromak hili ona nia. Nia komprende katak Bíblia haruka ita atu labele tau fiar kedas ba ema neʼebé dehan katak Maromak fó ona responsabilidade espesiál ba nia. (Apok 2:2) Tanba lakohi dada atensaun ba ninia an rasik, ema neʼebé atu bá lalehan la konta ba ema neʼebé nia foin hasoru katak Maromak hili ona nia. No nia mós lakohi duni atu gaba an ba ema seluk.​—Lee 1 Korinto 4:7, 8.

7. Ema sira neʼebé atu bá lalehan tenke hasees an husi hahalok saida, no tanbasá?

⁷ Ema Kristaun neʼebé atu bá lalehan la sente katak sira presiza ransu deʼit ho ema seluk neʼebé mós atu bá lalehan, hanesan sira mak membru ba grupu espesiál ida. Sira la buka malu atu bele koʼalia kona-ba oinsá Maromak hili sira no forma grupu atu estuda Bíblia. (Gal 1:15-17) Se halo nuneʼe, kongregasaun sei la iha unidade. No sira sei kontra espíritu santu neʼebé ajuda Maromak nia povu atu iha dame no unidade.​—Rom 16:17, 18.

8. Tanbasá Ita presiza kuidadu atu la trata Kristu nia alin sira iha dalan espesiál? (Haree mós nota-rodapé.)

⁸ Ita presiza hanoin oinsá kona-ba irmaun-irmán sira neʼebé atu bá lalehan? La diʼak atu admira demais ema, maski ema neʼe mak Kristu nia alin. (Mt 23:8-12) Bainhira Bíblia koʼalia kona-ba katuas sira, Bíblia anima ita atu “halo tuir sira-nia fiar”, maibé la dehan katak ita bele foti ema ida sai ita-nia ulun-naʼin. (Ebr 13:7) Bíblia hatete katak ema balu merese atu simu “respeitu neʼebé kleʼan liu”. Maibé ida-neʼe tanba sira “tau matan didiʼak ba kongregasaun” no “serbisu makaʼas atu koʼalia no hanorin”, laʼós tanba Maromak hili ona sira atu bá lalehan. (1 Tim 5:17) Se ita gaba no tau atensaun demais ba ema neʼebé atu bá lalehan, karik ita sei hamoe sira. * Ka aat liután mak ita bele halo sira sai foti an. (Rom 12:3) Ita hotu lakohi halo buat ida neʼebé bele halo Kristu nia alin ida monu ba sala boot hanesan neʼe.​—Lc 17:2.

9. Oinsá mak ita bele hatudu respeitu ba ema Kristaun neʼebé atu bá lalehan?

⁹ Oinsá mak ita bele hatudu respeitu ba ema sira neʼebé Jeová hili atu bá lalehan? Ita sei la husu kona-ba oinsá Jeová hili sira. Neʼe buat pesoál, no ita la iha direitu atu hatene kona-ba neʼe. (1 Tes 4:11; 2 Tes 3:11) Ita nunka hanoin katak sira-nia laʼen ka feen, inan-aman, ka família seluk mós iha esperansa atu bá lalehan. Ema labele simu esperansa neʼe husi sira-nia família nuʼudar liman-rohan. Sira simu neʼe husi Maromak. (1 Tes 2:12) Ita mós labele husu pergunta neʼebé bele halo ema laran-kanek. Porezemplu, se irmán ida nia laʼen iha esperansa atu bá lalehan, ita lakohi husu kona-ba oinsá nia sente tanba sei moris ba nafatin iha rai la hamutuk ho ninia laʼen. Tuir loloos, ita bele fiar metin katak iha mundu foun, Jeová sei halo kontente ema hotu hodi fó buat neʼebé sira hakarak.​—Sal 145:16.

10. Oinsá mak ita bele proteje ita-nia an se ita la admira ema?

¹⁰ Ita mós bele proteje ita-nia an rasik se ita la haree ema neʼebé atu bá lalehan importante liu fali ema seluk. Oinsá? Bíblia hatete katak ema balu neʼebé atu bá lalehan karik sei la hatudu laran-metin. (Mt 25:10-12; 2 Ped 2:20, 21) Se ita la admira ema, neʼe sei proteje ita atu la tuir deʼit ema, maski sira koñesidu, atu bá lalehan, ka serbí Jeová tempu kleur ona. (Jud 16, nota) Se ita halo nuneʼe, ita sei la lakon ita-nia fiar ba Jeová ka para atu serbí Jeová se sira la laran-metin ka husik kongregasaun.

11. Mudansa saida mak akontese kona-ba ema neʼebé han paun no hemu tua-uvas iha Memoriál?

¹¹ Ba tinan barak, ema neʼebé han paun no hemu tua-uvas sai menus. Maibé agora, sira aumenta tinan-tinan. Ita presiza hanoin barak kona-ba neʼe ka lae? Lae. Mai ita aprende tanbasá.

12. Tanbasá ita la presiza hanoin barak kona-ba ema naʼin-hira mak han paun no hemu tua-uvas iha Memoriál?

¹² “Jeová hatene sira neʼebé ninian.” (2 Tim 2:19) La hanesan Jeová, irmaun sira neʼebé sura ema neʼebé han paun ka  hemu tua-uvas iha Memoriál la hatene ho loloos sé mak Maromak hili ona atu bá lalehan. Tan neʼe, ema neʼebé sira sura inklui mós sira neʼebé hanoin katak Maromak hili ona sira maibé loloos lae. Porezemplu, ema balu neʼebé han paun no hemu tua-uvas ikusmai para. Ema seluk karik iha problema ho sira-nia mentál no neʼe halo sira fiar katak sira sei ukun hamutuk ho Kristu iha lalehan. Klaru katak, ita la hatene ho loloos ema neʼebé atu bá lalehan hela naʼin-hira iha rai.

13. Bíblia fó sai kona-ba Kristu nia alin naʼin-hira mak sei iha rai bainhira terus boot komesa ka lae?

¹³ Kristu nia alin balu sei iha rai oioin bainhira Jesus mai atu lori sira ba lalehan. (Mt 24:31) Bíblia hatete katak durante loron ikus sira, sei iha Kristu nia alin balu iha rai. (Apok 12:17) Maibé Bíblia la fó sai kona-ba sira naʼin-hira mak sei iha rai bainhira terus boot komesa.

14. Roma 9:11, 16 hanorin saida mai ita kona-ba bainhira mak Jeová hili ema atu bá lalehan?

¹⁴ Jeová deside bainhira mak nia sei hili ema atu bá lalehan. (Rom 8:28-30) Jeová komesa hili ema atu bá lalehan depois Jesus moris-hiʼas. Karik ema Kristaun loos hotu iha apóstolu sira-nia tempu mak iha esperansa atu bá lalehan. Durante tinan barak depois neʼe, ema barak neʼebé dehan katak sira ema Kristaun, la halo tuir Kristu. Maski nuneʼe, durante tinan sira-neʼe iha ema Kristaun loos balu no Jeová hili sira atu bá lalehan. Sira mak hanesan trigu neʼebé Jesus dehan katak sei moris iha duʼut aat nia leet. (Mt 13:24-30) Durante loron ikus sira, Jeová kontinua hili ema  neʼebé sai parte ba ema naʼin-144.000. * Tan neʼe, se Maromak deside atu hili ema sira-neʼe balu foin antes mundu nia rohan toʼo mai, ita lakohi sente duvida ho ninia desizaun neʼe. (Lee Roma 9:11, 16.) * Ita tenke kuidadu atu la hatudu hahalok hanesan serbisu-naʼin sira neʼebé Jesus konta iha ninia ai-knanoik ida. Sira muramura kona-ba kolen neʼebé toʼos-naʼin ida fó ba serbisu-naʼin sira neʼebé mai ikusliu.—Mt 20:8-15.

15. Kristu nia alin hotu sai parte ba “atan laran-metin no matenek” neʼebé temi iha Mateus 24:45-47 ka lae? Esplika toʼok.

¹⁵ Laʼós ema hotu neʼebé iha esperansa atu bá lalehan mak sai parte ba “atan laran-metin no matenek”. (Lee Mateus 24:45-47.) Hanesan iha apóstolu sira-nia tempu, ohin loron Jeová no Jesus uza irmaun balu atu fó ai-han ka hanorin ema barak. Iha apóstolu sira-nia tempu, Maromak uza Kristu nia alin balu deʼit atu hakerek Eskritura Lian Gregu. Ohin loron, Kristu nia alin balu deʼit mak simu responsabilidade atu ‘fó ai-han iha tempu loloos’ ba Maromak nia povu.

16. Ita aprende saida husi lisaun neʼe?

¹⁶ Ita aprende saida husi lisaun neʼe? Jeová deside ona atu fó moris rohan-laek iha rai ba ninia atan barak no moris iha lalehan ba ema uitoan neʼebé sei ukun hamutuk ho Jesus. Jeová fó kolen ba ninia atan hotu, “mane Judeu ida” no mós “mane naʼin-sanulu”, no nia hakarak ita atu halo tuir ukun-fuan neʼebé hanesan no nafatin laran-metin. Ita hotu tenke haraik an. Ita hotu tenke serbí hamutuk ho unidade. Ita hotu tenke hakaʼas an atu hametin dame iha kongregasaun. Nuʼudar mundu nia rohan besik ba daudaun, mai ita hotu kontinua serbí Jeová no halo tuir Kristu nuʼudar “bibi-lubun ida deʼit”.—João 10:16.