1. Kakɔna kakate Jehowa ɔnɛ tɔ kayosalema lo nshi yaso nyɛ?

JEHOWA akate lo dikambo dia nshi yaso nyɛ ate: “Anto 10 w’oma l’ɛtɛkɛta tshɛ wa wedja wayokimɛ, ɛɛ, vɔ wayokukutɛ okutu w’ose Juda, wata vate: ‘Sho nangaka ntshɔ kaamɛ la nyu, nɛ dia takoke dia Nzambi ekɔ kaamɛ la nyu.’” (Zɛk. 8:23) Lanɛ, “ose Juda” ekɔ didjidji dia wanɛ wele Nzambi akaakite nyuma k’ekila. Vɔ mbelamɛka nto ɔnɛ “Isariyɛlɛ wa Nzambi.” (Ngal. 6:16) “Anto 10” wekɔ didjidji dia wanɛ wele l’elongamelo ka nsɛna pondjo pondjo la nkɛtɛ. Vɔ mbeyaka dia Jehowa akatshɔkɔla olui w’akitami ɔsɔ ndo vɔ mbɔsaka dia ekɔ dui dia nɛmɔ efula mbɔɔtɛmɔla kaamɛ la wɔ.

2. Ngande ‘watshɔ anto 10’ asɔ kaamɛ l’akitami?

² Kaanga mbele bu dui dia wɔdu mbeya lokombo l’onto tshɛ lele l’olui w’akitami wele la nkɛtɛ ɛlɔ kɛnɛ, * wanɛ wele l’elongamelo ka nsɛna la nkɛtɛ koka “ntshɔ” l’akitami. Ngande? Bible mbutaka dia “anto 10” “wayokukutɛ okutu w’ose Juda, wata vate: ‘Sho nangaka ntshɔ kaamɛ la nyu, nɛ dia takoke dia Nzambi ekɔ kaamɛ la nyu.’” Divɛsa dia lo Bible nɛ tɛkɛtaka dikambo di’ose Juda ɔtɔi. Koko tshɛkɛta “nyu” tɛkɛtaka dikambo di’anto efula. Dui sɔ nembetshiyaka di’ose Juda ɔsɔ bu tsho onto ɔtɔi, koko mendanaka la olui w’otondo w’akitami. Wanɛ wele bu akitami kambɛka Jehowa kaamɛ l’akitami.  Koko, vɔ hawɔshi akitami oko ɛnɔmbɔdi awɔ, dikambo vɔ mbeyaka dia Yeso mbele Ɔnɔmbɔdi awɔ.​—Mat. 23:10.

3. Ambola akɔna wayokadimɔma lo sawo nɛ?

³ Lam’ele Akristo w’akitami wekekɔ l’atei w’ekambi wa Nzambi ɛlɔ kɛnɛ, anto amɔtshi koka ndjambola ɔnɛ: 1) Ngande wahomba akitami ndjaɔsa? 2) Ngande wahomba anto salɛ wanɛ walɛ mapa ndo wanɔ vinyɔ lo Eohwelo akambo? 3) Onde sho pombaka ndjakiyanya naka lofulo la wanɛ walɛ mapa ndo wanɔ vinyɔ lekɔ lo tadɛ? Sawo nɛ diayokadimola ambola asɔ.

4. Naa ɔhɛmwɛlɔ watanema lo 1 Kɔrɛtɔ 11:27-29 wahomba akitami nkana lawɔ yimba efula, ndo lande na?

⁴ Akitami pombaka nkana yimba efula la ɔhɛmwɛlɔ watanema lo 1 Kɔrɛtɔ 11:27-29. (Adia.) Ngande wakoka okitami ndɛ mapa kana nnɔ vinyɔ “lo yoho yahasungana” lo Eohwelo? Nde mbeyaka nsala ngasɔ naka nde ndɛ mapa kana nnɔ vinyɔ, koko hakitanyiya ɛlɛmbɛ wa Jehowa. (Hɛb. 6:4-6; 10:26-29) Akitami mbeyaka dia vɔ pombaka ntshikala la kɔlamelo naka vɔ nangaka nongola “difuto dia leeta la Nzambi l’otsha la diko lo tshimbo ya Kristo Yeso.”​—Flpɛ. 3:13-16.

5. Ngande wahomba Akristo w’akitami ndjaɔsa?

 ⁵ Nyuma k’ekila ka Jehowa kimanyiyaka ekambi ande dia monga l’okitshakitsha, koko aha monga l’otako. (Ɛf. 4:1-3; Kɔl. 3:10, 12) Ɔnkɔnɛ akitami hawɔfɔnya dia vɔ ndeka anto akina. Vɔ mbeyaka dia Jehowa hasha akitami nyuma k’ekila lo yɛdikɔ yoleki ekambi ande ekina. Vɔ hawɔfɔnya dia vɔ koka nshihodia akambo wa mɛtɛ wa lo Bible ndeka anto akina. Ndo vɔ hawohombe nto pondjo mbutɛ onto ɔmɔtshi ɔnɛ nde lawɔ ekɔ okitami ndo nde pombaka ntatɛ ndɛ mapa ndo nnɔ vinyɔ lo Eohwelo. Koko, l’okitshakitsha tshɛ vɔ mbeyaka dia paka Jehowa oto mbakoka nsɔna onto dia nde ntshɔ l’olongo.

6. Lo ndjela to 1 Kɔrɛtɔ 4:7, 8, lɔkɛwɔ lakɔna lahomba Akristo w’akitami monga lalɔ?

⁶ Kaanga mbele akitami mbɔsaka dia ekɔ tshondo ya diɛsɛ dia mbelamɛ dia ntshɔ l’olongo, vɔ hawolongamɛ di’anto akina mbasalɛ akambo lo yoho mɔtshi ya laande. (Flpɛ. 2:2, 3) Vɔ mbeyaka nto dia etena kakaasɔnɛ Jehowa oko akitami, nde kombewoya anto akina dui sɔ. Ɔnkɔnɛ, okitami hambe naka onto hetawɔ mbala kakɔ ɔtɔi dia nde ekɔ okitami. Okitami mbeyaka dia Bible totɛka diaha mbetawɔ mbala kakɔ ɔtɔi onto ɔmɔtshi lata dia Nzambi akawosha ɔkɛndɛ ɔmɔtshi wa laande. (Ɛny. 2:2) Lam’ele nde hahombe nkotola yambalo y’anto oya le nde, Okristo w’okitami hahombe mbutɛ anto wahomana la nde ɔnɛ nde ekɔ okitami. Nde hahombe mbutɛ kaanga onto ɔtɔi dui sɔ. Ndo nde hahombe funɛɛ anto akina ɔnɛ lekɔ okitami.​—Adia 1 Kɔrɛtɔ 4:7, 8.

7. Awui akɔna wahomba akitami mbewɔ dia nsala, ndo lande na?

⁷ Akristo w’akitami hawɔshi dia vɔ pombaka mbetshaka wenya paka l’asekawɔ akitami, oko anto wakenga olui ɔmɔtshi. Vɔ hawoyange akitami akina dia vɔ nkɛtshanya akambo wendana l’akitami kana dia nkenga elui dia mbekaka Bible. (Ngal. 1:15-17) Etshumanelo honga kaamɛ naka akitami nsala awui asɔ. Naka vɔ nsala ngasɔ, kete wayɔlɔshana la nyuma k’ekila kakimanyiya ekambi waki Nzambi dia vɔ monga la wɔladi ndo kaamɛ.​—Rɔmɔ 16:17, 18.

8. Lande na kahombayɛ monga la yewo lo yoho yasalɛyɛ wanɛ walɛ mapa ndo wanɔ vinyɔ lo Eohwelo akambo? (Enda ndo nɔtɛ ka l’ɛse ka dikatshi.)

⁸ Ngande wahombaso salɛ anangɛso la akadiyɛso w’akitami akambo? Ayonga kɔlɔ mbisha onto ɔmɔtshi nɛmɔ diamboleka, oyadi kaanga nde ekɔ ɔnango Kristo l’okitami.  (Mat. 23:8-12) Etena katɛkɛta Bible dikambo dia dikumanyi, tɔ tokeketshaka dia sho ‘mbokoya mbetawɔ kawɔ,’ koko tɔ hatotɛ dia sho kokaka mbetɛ onto ɔmɔtshi ɔnɔmbɔdi aso. (Hɛb. 13:7) Ekɔ mɛtɛ dia Bible mbutaka dia anto amɔtshi pombaka “mbɔsama la nɛmɔ diolodiami l’ahende.” Ekɔ ngasɔ nɛ dia vɔ ‘nɔmbɔlaka lo yoho ya dimɛna’ ndo ‘kambaka olimu wolo lo ntɛkɛta ndo lo mbetsha,’ koko aha l’ɔtɛ wewɔ akitami. (1 Tim. 5:17) Naka sho mbisha akitami lotombo ndo yambalo yamboleka, kete tayowadja l’okandokando. * Kɛnɛ koleki tshɛ kɔlɔ ele, sho kokaka ndjowakonya dia vɔ monga la otako. (Rɔmɔ 12:3) Ndooko onto l’atei aso lahomba nsala dui dimɔtshi diakoka ndjokonya ɔnango Kristo ɔmɔtshi l’okitami dia nsala munga ka woke ka ngasɔ.​—Luka 17:2.

9. Ngande wakokaso mɛnya dia sho nɛmiyaka Akristo w’akitami?

⁹ Ngande wakokaso mɛnya dia sho nɛmiyaka wanɛ wakasɔnama oko akitami oma le Jehowa? Hatohombe mambola woho wakawakome akitami. Ɔsɔ ekɔ dui diendana l’onto ndamɛ ndo sho bu la lotshungɔ la mbeya dui sɔ. (1 Tɛs. 4:11; 2 Tɛs. 3:11) Ndo hatohombe mfɔnya ɔnɛ waomɛwɔ, wadɛwɔ, ambutshi awɔ kana ase nkumbo akina wekɔ vɔ lawɔ akitami. Onto hakite elongamelo kande k’otsha l’olongo oma lo nkumbo kande. Nde kilongolaka oma le Nzambi. (1 Tɛs. 2:12) Sho pombaka nto mbewɔ ambola wakoka nyangiya anto akina. Ɛnyɛlɔ, hatohombe mimbola wadi aki ɔnangɛso ɔmɔtshi l’okitami woho wayaokande lo kɛnɛ kendana la ndjɔsɛna pondjo pondjo la nkɛtɛ aha la omɛnde monga lawɔ. Laadiko di’akambo asɔ tshɛ, sho koka monga l’eshikikelo ɔnɛ l’andja w’oyoyo, Jehowa ‘ayokotsha nsaki ka ɛngɔ tshɛ kasɛna.’​—Os. 145:16.

10. Ngande wakokaso ndjakokɛ naka sho mbewɔ dia mbɔsa anto akina oko “anto wa lokumu”?

¹⁰ Naka sho hatosalɛ akitami akambo lo yoho yɛnya dia vɔ ndeka anto akina ohomba, kete tekɔ lo ndjakokɛ. Lo ngande? Bible totɛka di’akitami amɔtshi kokaka nshisha kɔlamelo yawɔ. (Mat. 25:10-12; 2 Pe. 2:20, 21) Koko naka sho mbewɔ dia mbɔsa anto akina oko “anto wa lokumu,” kete hatotoyela pondjo anto akina, kaanga wanɛ wele akitami kana weyama efula kana wanɛ wambokambɛ Jehowa edja efula. (Judɛ 16, nɔtɛ) Nɛ dia naka vɔ wamboshisha kɔlamelo kana wambotomba oma l’etshumanelo, hatotoshisha kɔlamelo yaso le Jehowa kana ntshika mbokambɛ.

11. Kakɔna kasalema lo kɛnɛ kendana la lofulo la wanɛ walɛ mapa ndo wanɔ vinyɔ lo Eohwelo?

¹¹ L’edja k’ɛnɔnyi efula, lofulo la wanɛ wakalɛka mapa ndo wakanɔka vinyɔ lo Eohwelo lakatatetemalaka nkitakita. Koko shi nyɛ, lofulo lɔsɔ lotadɛka ɔnɔnyi tshɛ. Onde sho pombaka ndjakiyanya lo dikambo sɔ? Ndooko. Nyɛsɔ tɔsɛdingole awui amɔtshi w’ohomba wakokaso kimɛ.

12. Lande na kahatahombe ndjakiyanya lo dikambo dia lofulo l’anto walɛ mapa ndo wanɔ vinyɔ lo Eohwelo?

¹² “Jehowa mbeyaka anto ande.” (2 Tim. 2:19) Otshikitanyi la Jehowa, anangɛso wadia lofulo la wanɛ walɛ mapa ndo wanɔ vinyɔ lo Eohwelo haweye akɔna mɛtɛ ele okitami. Ɔnkɔnɛ lofulo lɔsɔ lekɔ ndo la wanɛ wafɔnya dia vɔ wekɔ akitami, ko tete le vɔ bu akitami. Ɛnyɛlɔ, anto amɔtshi wakalɛka mapa ndo wakanɔka vinyɔ wakayotshika. Mbeyaka  monga ko akina waki la hemɔ ya l’ɔtɛ diakɔ diakawafɔnyaka dia wayotolɛ kaamɛ la Kristo l’olongo. Mbokɛmaka hwe dia sho hateye shikaa lofulo l’akitami wambotshikala lanɛ la nkɛtɛ.

13. Onde Bible mbutaka lofulo l’akitami layonga la nkɛtɛ etena kayotatɛ mfɔnu ka woke?

¹³ Akitami wayonga lo ahole efula wa lanɛ la nkɛtɛ etena kayoya Yeso ndjowaɔsa otsha l’olongo. (Mat. 24:31) Bible mbutaka dia lo nshi y’ekomelo, lofulo la tshitshɛ l’akitami mbayotshikala lanɛ la nkɛtɛ. (Ɛny. 12:17) Koko tɔ hate angana l’atei awɔ wayonga etena kayotatɛ mfɔnu ka woke.

14. Oko wɛnya Rɔmɔ 9:11, 16, kakɔna kahombaso mbeya lo kɛnɛ kendana l’ɔsɔnamelo w’akitami?

¹⁴ Jehowa mbashikikɛ etena kakokande nsɔna akitami. (Rɔmɔ 8:28-30) Jehowa akamɛ nsɔna akitami l’ɔkɔngɔ wa eolwelo ka Yeso. Mɛnamaka dia lo ntambe ka ntondo, Akristo tshɛ wa mɛtɛ waki akitami. Lo ntambe yakayelana, efula ka wanɛ wakataka dia waki Akristo kondjotetemala ndjela Kristo. Kaanga mbakidiɔ ngasɔ, l’ɛnɔnyi ɛsɔ, Jehowa akasɔnɛ tɔtɔi ta wanɛ waki Akristo wa mɛtɛ dia monga akitami. Vɔ waki oko eponga wakate Yeso ɔnɛ wayola l’atei wa nkangaka. (Mat. 13:24-30) Lo nshi y’ekomelo nyɛ, Jehowa ekɔ lo ntetemala nsɔna anto wayonga l’atei w’anto 144 000. * Ɔnkɔnɛ, naka Nzambi ambɔsa yɛdikɔ ya nsɔna amɔtshi l’atei awɔ la ntondo k’ekomelo ndja, kete toyashikikɛ dia Jehowa ekɔ lo nsala akambo la lomba. (Adia Rɔmɔ 9:11, 16.) * Sho pombaka mbewɔ dia nsala  akambo oko ase olimu wele Yeso akatɛkɛta dikambo diawɔ lo wɛɛla ande ɔmɔtshi. Vɔ wakayakiyanya lo woho wakasalɛ owandji awɔ wanɛ wakayotatɛka nkamba olimu lo wonya w’ekomelo akambo.​—Mat. 20:8-15.

15. Onde akitami tshɛ mbakenga “ɔhɔmbɔ wa kɔlamelo ndo kɛsɔ,” watɛkɛtama lo Mateo 24:45-47? Lembetshiya.

¹⁵ Aha wanɛ tshɛ wele l’elongamelo ka tɔsɛna l’olongo mbakenga “ɔhɔmbɔ wa kɔlamelo ndo kɛsɔ.” (Adia Mateo 24:45-47.) Oko wakidiɔ lo ntambe ka ntondo, ɛlɔ kɛnɛ Jehowa nde la Yeso wekɔ lo nkamba la anangɛso yema tshitshɛ dia ndesha kana mbetsha anto efula. Paka Akristo w’akitami yema tshitshɛ wa lo ntambe ka ntondo mbele Nzambi akakambe la wɔ dia mfunda Afundelo w’Akristo wa lo Grɛkɛ. Ɛlɔ kɛnɛ, paka djui ya tshitshɛ y’Akristo w’akitami mbele l’ɔkɛndɛ wa mbisha ekambi waki Nzambi “mbo ya ndɛ l’etena kahombama.”

16. Kakɔna kamboyeka lo sawo nɛ?

¹⁶ Kakɔna kamboteka lo sawo nɛ? Jehowa mbashikikɛ dia mbisha ekambi ande efula lɔsɛnɔ la pondjo lanɛ la nkɛtɛ ndo anto yema tshitshɛ wayotolɛ kaamɛ la Yeso lɔsɛnɔ la l’olongo. Jehowa futaka ekambi ande tshɛ, mbuta ate “ose Juda” ndo “anto 10,” ndo nde mbalɔmbaka dia vɔ nkitanyiya ɛlɛmbɛ akɔ waamɛ ndo dia vɔ ntshikala la kɔlamelo. Vɔ tshɛ pombaka monga l’okitshakitsha. Vɔ tshɛ pombaka mbokambɛ dihɛka lo dihɛka ndo monga kaamɛ. Ndo vɔ tshɛ pombaka ntetemala nkokɛ ki ka l’etshumanelo. Oko wambotoleka nsukana la ekomelo, nyɛsɔ sho tshɛ totetemale kambɛ Jehowa ndo toyele Kristo oko “olui 1.”​—Jni. 10:16.