1. Kumbi Yehova wangukamba kuti ndi vinthu wuli vo vazamuchitika mu nyengu yidu?

PAKUKAMBA za nyengu yo tilimu, Yehova wangukambiya limu kuti: “Anthulumi 10 akutuliya muvineneru vosi va mitundu ya ŵanthu, azamukolesa mkhanju wa Myuda, ndipu azamukamba kuti: ‘Tikhumba kuluta namwi mwaŵanthu yimwi, pakuti tavwa kuti Chiuta we namwi.’” (Zeka. 8:23) Pa lemba ili, “Myuda” wamiya ŵanthu wo Chiuta watiŵasankha ndi mzimu wakupaturika. Yiwu adanika so kuti “Isirayeli waku Chiuta.” (Aga. 6:16) “Anthulumi 10” amiya ŵanthu wo azamuja pacharu chapasi kwamuyaya. Yiwu aziŵa kuti Yehova watumbika Akhristu akusankhika ndipu awona kuti ndi mwaŵi kuteŵete nawu limoza.

2. Kumbi “anthulumi 10” ‘aluta’ wuli ndi akusankhika?

² Chinanga kuti tingaziŵa cha mazina nga Akhristu wosi akusankhika wo ŵeche panu pasi, * kweni isi tilindizga kuzija pacharu chapasi ‘tingaluta’ ndi Akhristu ŵenaŵa. Kumbi tingaluta nawu wuli? Bayibolu likamba kuti “anthulumi 10 . . .  azamukolesa mkhanju wa Myuda, ndipu azamukamba kuti: ‘Tikhumba kuluta namwi mwaŵanthu yimwi, pakuti tavwa kuti Chiuta we namwi.’” Chinanga kuti lemba ili lizumbuwa Myuda yumoza, kweni mazu ngakuti “namwi” ndi ngakuti “mwaŵanthu yimwi,” ngamiya ŵanthu anandi. Venivi ving’anamuwa kuti Myuda wamiya munthu yumoza cha, kweni wamiya Akhristu wosi akusankhika. Akhristu wo azamuja panu pasi, ateŵete Yehova limoza ndi Akhristu akusankhika. Kweni yiwu atiŵawona kuti mbalongozgi  ŵawu cha, chifukwa aziŵa kuti Yesu ndiyu Mulongozgi.—Mate. 23:10.

3. Kumbi tikambiskanengi mafumbu nanga mu nkhani iyi?

³ Chifukwa chakuti Akhristu anyaki akusankhika ŵeche pacharu chapasi, anyaki angajifumba kuti: (1) Kumbi Akhristu akusankhika atenere kujiwona wuli? (2) Kumbi titenere kuchita wuli ndi wo aturya chiŵandi ndi kumwa vinyu pa Chikumbusu? (3) Kumbi titenere kufipa mtima asani chiŵerengeru cha ŵanthu wo aturya chiŵandi ndi kumwa vinyu chikwera? Nkhani iyi yimukengi mafumbu ngenanga.

4. Mwakukoliyana ndi 1 Akorinto 11:27-29, kumbi Akhristu akusankhika atenere kuŵanaŵaniyanji, ndipu ntchifukwa wuli?

⁴ Ŵanthu wo aturya chiŵandi ndi kumwa vinyu pa Chikumbusu atenere kuŵanaŵaniya vo Paulo wangutcheŵeska pa 1 Akorinto 11:27-29 (Ŵerengani.) Kumbi Mkhristu wakusankhika ‘wangaryiyamu wuli bweka’ chiŵandi pamwenga kumwa vinyu pa Chikumbusu? Iyu wangachita viyo asani waturya chiŵandi ndi kumwa vinyu kweni wavwiya cha marangu ngaku Yehova. (Ahe. 6:4-6; 10:26-29) Akhristu  akusankhika aziŵa kuti atenere kulutirizga kugomezgeka asani akhumba kuzilonde “mphotu ya mdanu wakuchanya waku Chiuta kuporote mwaku Khristu Yesu.”—Afi. 3:13-16.

5. Kumbi Akhristu akusankhika atenere kujiwona wuli?

⁵ Mzimu wakupaturika waku Yehova utovya ateŵeti ŵaki kuti aje akujiyuyuwa, akujikuzga cha. (Aefe. 4:1-3; Ako. 3:10, 12) Akhristu akusankhika atijiwona kuti mbakuzirwa kuphara anyawu cha. Yiwu aziŵa kuti Yehova watiŵapaska mzimu unandi cha kuphara ŵanthu wo azamuja pacharu chapasi. Ndipuso atijiwona kuti aziŵa vinthu vinandi cha kuluska Mkhristu weyosi. Yiwu akambiya anyawu cha kuti nawu asankhika ndipu angayamba kurya chiŵandi ndi kumwa vinyu pa Chikumbusu. Mumalu mwaki, aziŵa kuti Yehova ndiyu wasankha wo aluta kuchanya.

6. Mwakukoliyana ndi 1 Akorinto 4:7, 8, kumbi Akhristu akusankhika akhumbika kuchita wuli?

⁶ Chinanga kuti Akhristu akusankhika awona kuti ndi mwaŵi kuluta kuchanya, kweni akhazga kuti ŵanthu aŵapaskengi ulemu wapade cha. (Afi. 2:2, 3) Yiwu aziŵa so kuti Yehova wati waŵasankha, wanguziŵiska munthu weyosi cha. Mwaviyo, Mkhristu wakusankhika wazizwa cha asani ŵanthu anyaki akayikiya kuti wakusankhika nadi. Iyu waziŵa kuti Bayibolu likamba kuti tingagomezganga liŵi cha asani munthu wakamba kuti Chiuta wamupaska udindu wapade. (Chivu. 2:2) Mkhristu wakusankhika wakambiya anyaki cha kuti wasankhika. Wachita viyo kuti ŵanthu aleki kumupaska ulemu wapade. Kweniso watijiŵikamu cha kuti watiya kuchanya.—Ŵerengani 1 Akorinto 4:7, 8.

7. Kumbi ndi vinthu wuli vo Akhristu akusankhika akhumbika cha kuchita, ndipu ntchifukwa wuli?

⁷ Akhristu akusankhika awona kuti akhumbika kucheza ndi akusankhika anyawu pe cha, nge kuti nkhagulu kapade. Yiwu afufuza akusankhika anyawu cha kuti akambiskanengi nawu nkhani yakusankhika kwawu pamwenga kupanga magulu ngawu kuti asambirengi Bayibolu. (Aga. 1:15-17) Kuchita viyo kungachitiska kuti mpingu ugaŵikani. Ivi vingaŵa vakupambana ndi vo mzimu wakupaturika uchita, wo utovya ateŵeti aku Chiuta kuti ajengi mwachimangu ndipuso mwakukoliyana.​—Aro. 16:17, 18.

8. Ntchifukwa wuli mutenere kuphwere ndi mo muchitiya vinthu ndi wo aturya chiŵandi ndi kumwa vinyu pa Chikumbusu? (Wonani mazu ngamumphata.)

⁸ Kumbi titenere kuchita nawu wuli abali ndi azichi wo akusankhika? Mbumampha cha kumukhumbira ukongwa munthu chinanga  wangaŵa mubali wakusankhika waku Yesu. (Mate. 23:8-12) Mbuneneska kuti Bayibolu lititichiska kuti ‘tiyezgengi chivwanu’ cha ŵara. Kweni likana kuti tidanengi munthu munyaki kuti ndi mulongozgi widu. (Ahe. 13:7) Bayibolu likamba nadi kuti ŵanthu anyaki tiŵapaskengi “ulemu ukulu.” Kweni ŵanthu aviyo titiŵapaska ulemu chifukwa chakuti “alongozga umampha” ndipuso “alimbikiya kulongoro ndi kusambiza,” chifukwa chakuti mbakusankhika cha. (1 Timo. 5:17) Akhristu akusankhika angachita soni asani ŵanthu angaŵapaska ulemu mwakujumphisa. * Chinthu chiheni ukongwa ntchakuti angaŵachitiska kuti ayambi kujikuzga. (Aro. 12:3) Palivi yo wangakhumba kuchita chinthu cho chingachitiska abali akusankhika aku Yesu kuti ayambi kujikuzga!​—Luka 17:2.

9. Kumbi tingalongo wuli kuti titiŵapaska ulemu Akhristu akusankhika?

⁹ Kumbi tingalongo wuli kuti titiŵapaska ulemu wakwenere ŵanthu wo Yehova wasankha? Titenere cha kuŵafumba mafumbu ngakukwaskana ndi mo akusankhikiya. Iyi ndi nkhani ya munthu pakuyija ndipu tikhumbika cha kuseleriyapu pa nkhani zo zileka kutikwaska. (1 Ate. 4:11; 2 Ate. 3:11) Ndipuso titenere cha kuŵanaŵana kuti apapi ŵawu, munthu yo akutorana nayu pamwenga abali ŵawu, nawu akusankhika. Munthu wachita kuhara kwa apapi ŵaki cha chilindizga chakuluta kuchanya. Chiuta ndiyu watimudana. (1 Ate. 2:12) Tikhumbika so cha kufumba mafumbu ngo ngangakwiyisa anyidu. Mwakuyeruzgiyapu, tikhumbika cha kufumba muwolu wa mubali wakusankhika mo wavwiya chifukwa chakuti wazamuja yija pacharu chapasi kwambula mulumu waki. Tosi tikayika cha kuti mucharu chifya, Yehova ‘wazamukhorwesa vakukhumba va chamoyu chechosi.’​—Sumu 145:16.

10. Kumbi titijivikiliya wuli asani tileka ‘kulumba ŵanthu’?

¹⁰ Asani tileka kuwona Akhristu akusankhika kuti mbakuzirwa ukongwa kuphara Akhristu anyawu, titijivikiliya taŵeni. Kumbi titijivikiliya wuli? Bayibolu likamba kuti Akhristu anyaki akusankhika angaleka kuja akugomezgeka. (Mate. 25:10-12; 2 Petu. 2:20, 21) Asani tileka ‘kulumba ŵanthu,’ tiŵalondongi cha, chinanga angaŵa Akhristu akusankhika, abali ndi azichi akuziŵika pamwenga wo ateŵete Yehova kwa nyengu yitali. (Yuda 16) Ndipu asani abali ŵenaŵa aleka kugomezgeka pamwenga atuwa mu mpingu, isi tingaleka cha kugomezgeka kwaku Yehova pamwenga kumuteŵete.

11. Kumbi ntchinthu wuli cho chichitika ndi chiŵerengeru cha ŵanthu wo aturya chiŵandi ndi kumwa vinyu pa Chikumbusu?

¹¹ Kwa vyaka vinandi, chiŵerengeru cha ŵanthu wo aryanga chiŵandi ndi kumwa vinyu pa Chikumbusu chasikanga. Kweni mazuŵa nganu chiŵerengeru ichi chikwera chaka chechosi. Kumbi titenere kufipa mtima ndi venivi? Awa. Tiyeni tikambiskani vifukwa vinyaki vo tikambiya viyo.

12. Ntchifukwa wuli titenere cha kufipa mtima ndi chiŵerengeru cha ŵanthu wo aturya chiŵandi ndi kumwa vinyu pa Chikumbusu?

¹² “Yehova waziŵa ŵanthu wo mbaki.” (2 Timo. 2:19) Mwakupambana ndi Yehova, abali wo aŵerenga ŵanthu wo aturya chiŵandi ndi kumwa vinyu pa Chikumbusu, angaŵaziŵa cha ŵanthu wo mbakusankhika nadi. Mwaviyo, yiwu aŵerenga ŵanthu wosi kusazgapu wo aŵanaŵana kuti mbakusankhika, penipo mbakusankhika cha. Mwakuyeruzgiyapu, anyaki wo aryanga chiŵandi ndi kumwa vinyu pa Chikumbusu sonu akuleka. Anyaki agomezga kuti amuwusa ndi Khristu kuchanya chifukwa chakuti mitu yawu yitenda umampha cha.  Mwaviyo, tiziŵa umampha cha chiŵerengeru chayichu cha Akhristu akusankhika wo ŵeche pacharu chapasi.

13. Kumbi Bayibolu likamba unandi wa Akhristu akusankhika wo azamukuŵa pacharu chapasi pa nyengu yo chisuzgu chikulu chazamuyambiya?

¹³ Akhristu anyaki akusankhika azamukuŵa kuti ŵeche pacharu chapasi pa nyengu yo Yesu waziyengi kuti waziŵatore kuchanya. (Mate. 24:31) Bayibolu likamba kuti mu mazuŵa ngakumaliya Akhristu akusankhika amanavi azamukuŵa kuti ŵeche pacharu chapasi. (Chivu. 12:17) Kweni likamba cha kuti pazamukuŵa Akhristu akusankhika alinga pa nyengu yo chisuzgu chikulu chazamuyambiya.

14. Nge mo pakambiya pa Aroma 9:11, 16, kumbi tikhumbika kuziŵanji pa nkhani ya kusankha Akhristu akusankhika?

¹⁴ Yehova ndiyu waziŵa nyengu yo wasankhiya Akhristu ŵenaŵa. (Aro. 8:28-30) Yehova wangwamba kusankha Akhristu akusankhika Yesu wati wayuskika. Viwoneka kuti mu nyengu ya akutumika, Akhristu wosi auneneska ŵenga akusankhika. Kweni pati pajumpha nyengu, ŵanthu anandi wo akambanga kuti alondo Yesu ŵenga Akhristu aboza. Chinanga kuti venga viyo, Yehova wangusankha Akhristu amanavi wo ŵenga akugomezgeka kuti aziluti kuchanya. Yiwu ŵenga nge tirigu yo Yesu wangukamba kuti wazamukuliya limoza ndi duru. (Mate. 13:24-30) Mu mazuŵa ngakumaliya, Yehova weche kusankha ŵanthu kuti aje mu gulu la Akhristu a 144,000. * Mwaviyo, asani Chiuta wakhumba kuzisankha Akhristu anyaki asani kwazija kwamanavi kuti charu chimali,  kumbi isi te ayani kususka khumbu laki? (Ŵerengani Aroma 9:11, 16.) * Titenere kuphwere kuti tileki kuchita nge mo anguchitiya antchitu wo Yesu wangukonkhoska mu ntharika yaki yinyaki. Yiwu angudandawula chifukwa cha mo bwana wawu wanguchitiya ndi wo angwamba kugwira ntchitu mu ora lakumaliya.​—Mate. 20:8-15.

15. Kumbi Akhristu wosi akusankhika ŵe mu gulu la “kapolu wakugomezgeka ndi wazeru” yo wakambika pa Mateyu 24:45-47? Konkhoskani.

¹⁵ Ndi wosi cha wo alindizga kuluta kuchanya wo ŵe mu gulu la “kapolu wakugomezgeka ndi wazeru.” (Ŵerengani Mateyu 24:45-47.) Nge mo ve nge mu nyengu ya Akhristu akwambiriya, mazuŵa nganu napu Yehova ndi Yesu agwiriskiya ntchitu ŵanthu amanavi kuti aliski pamwenga kusambiza ŵanthu anandi. Mu nyengu yakali, Yehova wangugwiriskiya ntchitu Akhristu amanavi akusankhika kuti alembi Malemba Ngachigiriki Ngachikhristu. Mwakuyanana waka, mazuŵa nganu Akhristu amanavi akusankhika ndiwu apereka “chakurya chauzimu pa nyengu yakwenere” ku ŵanthu aku Chiuta.

16. Kumbi mwasambiranji mu nkhani iyi?

¹⁶ Kumbi tasambiranji mu nkhani iyi? Yehova wakhumba kuti ŵanthu anandi azije ndi umoyu wamuyaya pacharu chapasi ndipuso kuti ŵanthu amanavi aziluti kuchanya kuchiwusa ndi Yesu. Chiuta wapereka mphotu ku ateŵeti ŵaki wosi, kwa “Myuda” ndipuso kwa “anthulumi 10.” Iyu wakhumba kuti wosi avwiyengi marangu ngaki ndi kulutirizga kuja akugomezgeka. Wosi atenere kuja akujiyuyuwa. Wosi atenere kumuteŵete mwakukoliyana. Kweniso wosi atenere kuyesesa kuti mu mpingu muje chimangu. Penipo umaliru uŵandika, tosi tikhumbika kulutirizga kuteŵete Yehova ndi kulondo Khristu nge “mskambu umoza.”​—Yoha. 10:16.