1. Ginani egi Jehovha a nga ganeya gu khuye gi di hadzi dugeleya dziteponi dzathu?

JEHOVHA profetide maningano ni dziteponi dzathu khuye: “Likhumi vama nya gute khu mafumbu yatshavbo nya malimi ma ganedwago khu vathu nya mayigo, va na phara tshoka nya mwendra wa moyo nya Mujudha nya gukari, va mu embela, khavo: ‘Ethu ha guvbweta gu hongola gumogo nanu, kholu hi pwide gupwani Nungungulu womo gwanu.’” (Zak. 8:23) “Mujudha” go thudwa vathu vale Nungungulu a va todzidego khu liphuvbo nya guage. Avo va gu ranwa gambe pwani “Israyeli wa Nungungulu.” (Gal. 6:16, NM) “Likhumi vama” go thudwa vathu vale va gu na ni gutumba nyo vbanye mafuni kala gupindruga. Avo va ngu dziti gu khavo khu Jehovha a hathidego tsawa wowo nya ava va todzidwego nigu va gu li wona nari lithomo gu khozeya Jehovha gumogo navo.

2. “Likhumi vama” va gu “hongola gumogo” ni ava va todzidwego khu ndziya muni?

² Ambari olu si gu mba kodzega guti malina nya moyo ni moyo nya ava va todzidwego va gomogo mafuni muhuno, * ava va gu ni gutumba nyo vbanye mafuni si ngu kodzega gu va “hongola” ni ava va todzidwego. Khu ndziya muni? Bhibhiliya yari khiyo “likhumi vama” va di hadzi gu “phara tshoka nya mwendra wa moyo nya Mujudha va mu embela, khavo: ‘Ethu ha guvbweta gu hongola gumogo nanu, kholu hi pwide gupwani Nungungulu womo gwanu.’” Bhibhiliya ya gu ganeya khu muJudha moyo. Ganiolu “nanu” ni “gwanu” kha si thuli muthu moyo basi. Isoso so thula gu khiso muJudha yoyu khandri muthu moyo basi ganiolu a gu  emeya tsawa watshavbo nya ava va todzidwego. Ava nya mba todzwa va gu thumeya Jehovha gumogo ni vale va todzidwego. Ganiolu avo kha va woni ava va todzidwego kha nga vathangeyi vawe kholu va ngu dziti gu khavo Muthangeyi wawe khu Jesu. — Mat. 23:10.

3. Siwudziso muni hi na si hlamulago avba nya ndrima yeyi?

³ Kha nga olu gu ngarigo ni maKristo ma todzidwego vbakari nya vathu va Jehovha muhuno, si nga gira gu vathu va dzi wudzisa esi: 1) Ava va todzidwego va yede gu dzi wona kharini? 2) Hi yede gu va phara kharini vale va hodzago gibaba ni gu seya vhinyu teponi nya Gidundrugiso? 3) Ina hi yede gu garadzega khu gu engedzeya nya tengo nya ava va hodzago gibaba ni gu seya vhinyu? Ndrima yeyi yi na hlamula siwudziso soso.

4. Gigengedzo muni gi gomogo omu ga 1 Vakorinto 11:27-29, egi ava va todzidwego va yedego gu dundrugeya gwadi khigyo nigu khu ginani?

⁴ Ava va todzidwego va yede gu dundrugeya gwadi khu gigengedzo gi gomogo omu ga 1 Vakorinto 11:27-29. (Leri.) Si nga girega kharini gu muthu a todzidwego a hodza gibaba ni gu seya vhinyu avba nya Gidundrugiso “nari mwalo  fanelo”? Isoso si nga girega khu gu a hodza gibaba ni gu seya vhinyu ganiolu na si vbanyi khu milayo nya gululame ya Jehovha. Ava va todzidwego va ngu dziti gu khavo va yede gu simama na va tumbegide gasi va kodza gu hakha “tshatshazelo Nungungulu a tumbisidego guya [va] ninga Ndzadzini khu ga Kristo Jesu.” — Filp. 3:13-16.

5. Makristo ma todzidwego ma yede gu dzi wona kharini?

⁵ Liphuvbo nya guage la Jehovha la gu phasa sithumi saye gu dzi nogisa nasiri gu dzi khusedza. (Efes. 4:1-3; Kol. 3:10, 12) Khu kharato, ava va todzidwego kha va dzi woni na vari va lisima guvbindra vambe. Avo va ngu dziti gu khavo khandri khatshi Jehovha a gu ninga ngudzu liphuvbo nya guage ava va todzidwego guvbindra simbe sithumi saye. Avo kha va pimisi gu khavo va ngu pwisisa gwadi lisine nya Bhibhiliya guvbindra vambe. Nigu gima kha va embeyi mumbe muthu gu khavo anuye a todzidwe khu kharato a yede gu pheya gu hodza gibaba ni gu seya vhinyu avba nya Gidundrugiso. Wulangani nya isoso, avo khu gu dzinogisa va ngu dziti gu khavo khu Jehovha enga a ranago vathu gasi va hongola ndzadzini.

6. Guya khu 1 Vakorinto 4:7, 8, maKristo ma todzidwego ma yede gu vbanya kharini?

⁶ Ambari olu ava va todzidwego va dzitigo gu khavo wuzundzo gu ranwa gasi gu hongola ndzadzini, avo kha va vireyi gu khavo vathu va va phara khu ndziya nyo hathege. (Filp. 2:2, 3) Gimbe gambe khu gu, avo va ngu dziti gu khavo tepo Jehovha a nga va todza kha embeya mumbe muthu. Khu kharato muthu a todzidwego kha si mu samadzisi va gu tshuka vambe va si dzegeyi gu khodwa gu khavo uye kamo todzidwe. Uye a ngu dziti gu khuye Bhibhiliya yi ngu ganeya gu khiyo kha hi yeli gu vbiredzeya gukhodwa a gu tshuka muthu a hi embeya gu khuye a ningidwe thumo nyo khaguri nyo hathege khu Nungungulu. (Gutu. 2:2) Muthu a todzidwego kha vbweti gu khuye vathu va mu wona khu yimbe ndziya. Khu kharato tepo a tivanago ni vathu uye kha va embedzeyi gu khuye a todzidwe. Nigu uye kha dzi khusedzi khu kotani nya isoso. — Leri 1 Vakorinto 4:7, 8.

7. Ginani gi gu mba girwa khu vale va todzidwego nigu khu ginani?

⁷ Makristo ma todzidwego kha ma dzi woni khatshi ma yede gu pwana mwendro gu hagana basi ni vambe va todzidwego nga khatshi va gu gira gipandre nya tsawa nyo khaguri. Avo kha va vbwetedzeyi vambe va todzidwego gasi va bhula khu gutodzwa gwawe mwendro gu gira mitsawa yawe gasi gu hevbula Bhibhiliya. (Gal. 1:15-17) Libandla li di hadzi gu mba manega ni wuhengeyi nari khatshi ava va todzidwego va di gu gira isoso. Avo va di hadzi gu ba va wugeya liphuvbo nya guage, ilo li phasago vathu va Nungungulu  gu manega ni gurula ni gupwanana.— Rom. 16:17, 18.

8. Khu ginani u yedego gu dzi woneya maningano ni edzi u pharago khidzo vale va hodzago gibaba ni gu seya vhinyu avba nya Gidundrugiso? (Wona tshamuselo wa vbavbatshi.)

⁸ Hi yede gu phara kharini vandriyathu va todzidwego? Si vivbide gu wona muthu na hathegide ngudzu ambari a gu ba ari ndriye wa Kristo a todzidwego. (Mat. 23:8-12) Ya gu ba yi ganeya khu madhota, Bhibhiliya ya gu hi kutsa gu “landrisa mwendro gu pimedzeya gukhodwa gwawe,” ganiolu isoso kha si thuli gu khiso hi yede gu gira muthu nyo khaguri muthangeyi wathu. (Hebh. 13:7) Lisine gu Bhibhiliya yi ngu ganeya gu khiyo vambe va ngu yedwa khu gu zundzwa ngudzu. Ganiolu va gu zundzwa kharato kholu va “thumago gwadi” ni olu va dzi ‘garadzeyago gu tshumayela ni gu hevbudza’ nasiri khu gu na va todzidwe. (1 Thim. 5:17) Ha gu va zundza gu vbindra pimo vale va todzidwego hi na gira gu va si dzipwi gwadi. * Mwendro gu va gira va dzi khusedza, a gu gilo gi vivbidego. (Rom. 12:3) Mwalo ni moyo vbakari gwathu a dzinago gu gira gu vandriye va Kristo va todzidwego va gira gihoso gyogyo nya gikhongolo! — Luka 17:2.

9. Hi nga yeyedza kharini gu khethu hi ngu ninga githawo ava va todzidwego?

⁹ Hi nga yeyedza kharini gu khethu hi ngu ninga githawo vale va todzidwego khu Jehovha? Khu gu mba va wudzisa edzi va todzidwego khidzo. Ayoyo mahungo nya muthu enga hi si yeligo gu mati. (1 Tes. 4:11; 2 Tes. 3:11) Nigu kha hi yeli gu pimisa gu khethu mwama mwendro mwangadzi waye, vavelegi vawe mwendro sivbango nya ndranga yawe anavo va todzidwe. Muthu kha mani gutumba ga ndzadzini khu kotani nya ava va ndrangani gwaye. A gu ningwa khu Nungungulu. (1 Tes. 2:12) Kha hi yeli gambe gu gira siwudziso si nga hadzi gira vambe vapwa guvbisa. Khu giyeyedzo, kha hi yeli gu wudzisa mwangadzi wa ndriyathu a todzidwego gu khethu a gu dzipwa kharini khu guti gu khuye a na vbanya mafuni kala gupindruga nya mba na mwama waye. Khu lisine, hi nga tiyisegani gu khethu mafuni nya maphya, Jehovha a na “khurisa mwendro gu tadzisa gudogoreya nya sivangwa satshavbo nya guvbanye.” — Ndzi. 145:16.

10. Gu potsa gu hlamaleya makhalelo nya vathu si na hi vhikeya kharini?

¹⁰ Ha gu mba wona ava va todzidwego na vari ni lisima guvbindra vambe ha gu dzi vhikeya nethu. Khu ndziya muni? Bhibhiliya yari khiyo si nga gira gu vambe va todzidwego va diga gu tumbega. (Mat. 25:10-12; 2 Ped. 2:20, 21) Ha gu potsa gu hlamala makhalelo nya vathu kha hi na nga landreya vambe ambari vale va todzidwego mwendro vambe vathu va tidwago ngudzu mwendro vale va thumedego Jehovha khu myaga nya yingi. Khu kharato ambari va gu tshuka va diga Jehovha ethu kha hi na nga vbeledwa khu gukhodwa gwathu ga Jehovha mwendro gu diga gu mu thumeya.

11. Ginani gi dugeleyago khu tengo nya ava va hodzago gibaba ni gu seya vhinyu avba nya Gidundrugiso?

¹¹ Khu myaga nya yingi tengo nya ava va hodzago gibaba ni gu seya vhinyu avba nya Gidundrugiso wu di gu vbunguga. Ganiolu ga myaga yeyi tengo wowo wa guya wu engedzeya mwaga ni mwaga. Ina hi yede gu garadzega khu isoso? Ahihi. Hongoleni ho wone gu khethu khu ginani hi gu mba yela gu garadzega.

12. Khu ginani hi si yeligo gu garadzega khu gu engedzeya nya tengo nya vathu va hodzago gibaba ni gu seya vhinyu avba nya Gidundrugiso?

¹² “[Jehovha] a ngu vati avo va gu vaye.” (2 Thim. 2:19) Vandriyathu va kotareyago vale  va hodzago gibaba ni gu seya vhinyu avba nya Gidundrugiso kha va vati ava va todzidwego khu lisine ni vale va nga ne todzwa ganiolu Jehovha a ngu vati. Khu kharato tengo nya vathu vovo wu ngu pata ni vale va pimisago gu khavo va todzidwe narigu khu lisine kha va todzwa. Khu giyeyedzo, vambe va nga ba va hodza gibaba ni gu seya vhinyu avba nya Gidundrugiso gale, khu gu gimbiya nya tepo va emide. Vambe vathu va na ni madwali nya mapimo ma va girago va pimisa gukhavo va naya fuma ni Kristo ndzadzini. Khu lisine kha hi dziti gwadi gwadi gu khethu vathu vangani va todzidwego va nga tshadego mafuni.

13. Ina Bhibhiliya yi ngu ganeya gu khiyo vathu vangani va todzidwego va na gu ba va tshade mafuni tepo yi na pheyago tshanisa nya yikhongolo?

¹³ Gu na ba gu ngari ni vathu va todzidwego mafuni tepo Jesu a na guta va dzegago va hongola ndzadzini. (Mat. 24:31) Bhibhiliya yari khiyo matshiguni nya guhegise gu na ba guri ni tengo nya wudugwana nya vathu va todzidwego mafuni. (Gutu. 12:17) Ganiolu kha yi ganeyi gu khiyo vangani va na gu ba va tshade tepo yi na pheyago tshanisa nya yikhongolo.

14. Guya khesi si tshamusedwago omu ga Varoma 9:11, 16, ginani hi yedego gu gi pwisisa maningano ni gu hathwa ga ava va todzidwego?

¹⁴ Khu Jehovha a hungago gu khuye lini a na gu hathago va nya gu todzwa. (Rom. 8:28-30) Jehovha phede gu hatha va nya gu todzwa hwane nya guwuswe ga Jesu. So wonega khatshi ga lizana myaga nya gupheye yatshavbo maKristo ma di gu todzidwe. Ga lizana myaga yi nga landreya nya vangi va nga ba va ganeya gu khavo maKristo kha va nga ba va landreya Kristo khu lisine. Ambari ulolo, ndrani nya myaga yoyo kamo Jehovha a di gu todza vale va nga ba vari maKristo nya lisine. Avo va di gu fana ni tirigo a nga khuye kha Jesu yi di hadzi dandra vbakari nya nyasavari. (Mat. 13:24-30) Ndrani nya matshigu  nya guhegise, Jehovha a nga gu simama gu hatha vathu va na girago gipandre nya ava nya 144 000. * Khu kharato, abari gu Nungungulu a di hunga gu hatha vathu vovo na gu keneleya vbadugwana gasi gu vboha mahegiso, kha hi yeli gu kanakaneya guti gwaye. (Leri Varoma 9:11, 16.) * Hi yede gu dzi woneya gasi hi si fani ni sithumi si tshamusedwego khu Jesu avba nya gimwegyo nya sipimaniso saye. Avo va di ngurangura khedzi mune wawe a pharidego khidzo sithumi si nga hegiseya gu vboha. — Mat. 20:8-15.

15. Ina vatshavbo va todzidwego va ngu gira gipandre nya ‘githumi nya gutumbege ni nya gugengeye,’ gi ganedwago omu ga Matewu 24:45-47? Tshamuseya.

¹⁵ Khandri vatshavbo va gu ni gutumba nya guya vbanye ndzadzini va girago gipandre nya ‘githumi nya gutumbege ni nya gugengeye.’ (Leri Matewu 24:45-47.) Kha nga ga lizana myaga nya gupheye, muhuno Jehovha ni Jesu va gu thumisa vandriyathu nya vadugwana gasi gu hodzisa mwendro gu hevbudza nya vangi. Ga lizana myaga nya gu pheye gu thumisidwe maKristo madugwana basi nya gutodzwe gasi gu lova Milowo nya giGreki nya wuKristo. Muhuno nugo, maKristo nya madugwana basi nya gu todzwe ma gu ni thumo nya gu ninge vathu va Jehovha “guhodza khu gikhati gi vbwetegago.”

16. Ginani u gi hevbudego avba nya ndrima yeyi?

¹⁶ Ginani hi gi hevbudego avba nya ndrima yeyi? Jehovha hungide gu ninga womi nya gupindruge ga vathu nya vangi mafuni ni guvbanya ndzadzini ga vale va na guya fuma ni Jesu. Jehovha a ngu tshatshazeya sithumi saye satshavbo— “muJudha” ni “likhumi vama” — nigu uye a gu vbweta gu khuye vatshavbo va engisa milayo yayimweyo ni gu simama na va tumbegide. Vatshavbo va yede gu dzi nogisa. Vatshavbo va yede gu mu thumeya gumogo khu gupwanana. Nigu vatshavbo va yede gu dzi garadzeya gu andrisa gurula libandlani. Kha nga olu hi yago hi hidzimeya vbafuvbi ni mahegiso, hongoleni hi simama gu thumeya Jehovha ni gu landreya Kristo kha nga tshambi moyo. — Joh.10:16.