CIBALO CAKWIIYA 5
Tuyanda Kuunka Andinywe
“Tuyanda kuunka andinywe, nkaambo twamvwa kuti Leza ulaandinywe.”—ZEK. 8:23.
LWIIMBO 26 Mwakali Kucitila Ndime
IZILI MUCIBALO *
Bambelele zimbi (“bantu bali kkumi”) bacibona kuba coolwe cipati kukomba Leza antoomwe abananike (“mu Juda”) (Amubone muncali 1-2)
1. Ino ncinzi ncaakaamba Jehova kuti ciyoocitika mumazuba eesu?
JEHOVA wakasinsima kujatikizya mazuba eesu kuti: “Bantu bali kkumi bazwa mumyaambo yoonse yamasi bayoojata, inzya, bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” (Zek. 8:23) Mu “Juda” aawa wiiminina baabo Leza mbaakananika amuuya wakwe uusalala. Alimwi baambwa kuti “iba Israyeli ba Leza.” (Gal. 6:16) “Bantu bali kkumi” baiminina baabo ibajisi bulangizi bwakuyoopona anyika mane kukabe kutamani. Balizyi kuti Jehova wakakalongezya kabunga aaka kabananike alimwi balimvwa kuti ncoolwe cipati kukomba Leza antoomwe ambabo.
2. Ino mbuti bantu “bali kkumi” ‘mbobaunka’ abananike?
2 Nokuba kuti tacikonzyeki kwaazyiba mazina aabananike boonse ibali aanyika mazuba aano, * aabo ibajisi bulangizi bwakuyoopona anyika balakonzya “kuunka” abananike. Munzila nzi? Bbaibbele lyaamba kuti “bantu bali kkumi” “bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” Kapango kamu Bbaibbele aaka kaamba mu Juda omwe. Pele kwaamba kuti “andinywe” alimwi akuti “ulaandinywe” caamba kuti mbantu banji kutali muntu omwe pe. Aboobo eeci citondezya kuti mu Juda tali muntu omwe, pele wiiminina nkamu yoonse yabananike. Aabo ibatali bananike balamubelekela Jehova antoomwe abananike. Nokuba boobo, bananike tabababoni kuti mbasololi babo, balizyi kuti Jesu ngo Musololi wabo.—Mt. 23:10.
3. Ino mibuzyo nzi itiingulwe mucibalo eeci?
3 Mbwaanga Banakristo bananike nkobacili akati kabantu ba Leza mazuba aano, ibamwi balakonzya kubuzya kuti: (1) Ino bananike beelede kulibona buti? (2) Ino tweelede kubabona buti aabo ibalya cinkwa akunywa waini lya Ciibalusyo? (3) Sena tweelede kulibilika ikuti naa mweelwe wabaabo ibalya wayungizyika? Cibalo eeci cilayiingula mibuzyo eeyi.
INO BANANIKE BEELEDE KULIBONA BUTI?
4. Nkucenjezya nzi ikuli kulugwalo lwa 1 Bakorinto 11:27-29 nkobeelede kubikkila maano kapati bananike, alimwi nkaambo nzi?
4 Bananike beelede kukubikkila maano kapati kucenjezya kujanika mulugwalo lwa 1 Bakorinto 11:27-29. (Amubale.) Ino mbuti munanike mbwanga walya cinkwa akunywa waini munzila “iiteelede” lya Ciibalusyo? Inga wacita oobo kuti walya cinkwa akunywa waini pele kataponi kweelana azyeelelo zya Jehova ziluleme. (Heb. 6:4-6; 10:26-29) Bananike balayeeya kuti beelede kusyomeka kuti kabayanda kuyootambula ‘bulumbu bwakujulu mbwabaitila Leza kwiinda muli Kristo Jesu.’—Flp. 3:13-16.
5. Ino Banakristo bananike beelede kulibona buti?
5 Muuya uusalala wa Jehova ulabagwasya babelesi bakwe kulicesya, muciindi cakulisumpula. (Ef. 4:1-3; Kol. 3:10, 12) Aboobo bananike tabaliboni kuti balayandika kapati kwiinda bamwi. Balizyi kuti Jehova tabapi muuya uusalala munji kwiinda babelesi bakwe bambi. Tabaliboni kuti balo balalimvwisya kapati Bbaibbele kwiinda bamwi. Alimwi kunyina nobaambila muntu umwi kuti awalo wakananikwa aboobo weelede kulya cinkwa alimwi akunywa waini lya Ciibalusyo. Muciindi caboobo, balizyi kuti alikke Jehova nguutamba bantu kuunka kujulu.
6. Kweelana alugwalo lwa 1 Bakorinto 4:7, 8, ino Banakristo bananike beelede kulibona buti?
6 Nokuba kuti bananike balimvwa kuti ncoolwe cilibedelede kutambwa kuunka kujulu, tabalangili kuti ibamwi kabababona munzila yaalubazu. (Flp. 2:2, 3) Alimwi balizyi kuti ciindi Jehova naakabananika, tanaakapa kuti muntu uuli woonse azyibe kuti bananikwa. Aboobo munanike tacimugambyi ikuti naa bamwi tabasyomi mpoonya-mpoonya kuti wakananikwa. Ulayeeya kuti Bbaibbele litwaambila kuti tatweelede kufwambaana kusyoma muntu uutwaambila kuti Leza wakamupa mukuli uulibedelede. (Ciy. 2:2) Akaambo kakuti tayandi kuti bamwi bamubikkile maano kapati, munanike takonzyi kwaambila baabo mbaabonana limwi ciindi cakusaanguna kuti ulinanikidwe. Alimwi kunyina nalisumpula kuli bamwi akaambo kakuti ulinanikidwe.—Amubale 1 Bakorinto 4:7, 8.
7. Ncinzi bananike ncobateelede kucita alimwi nkaambo nzi?
7 Banakristo bananike tabalimvwi kuti beelede kuyanzana buyo abananikenyina, mbuli kuti bali mukabunga kamwi. Kunyina nobasoleka kuyandaula bananikenyina kutegwa babandike kujatikizya kunanikwa kwabo naa kuswaangana mutubunga kutegwa babale zyamu Bbaibbele. (Gal. 1:15-17) Mbungano noitakamantene kuti bananike nobali kucita zintu zili boobu. Ikuti nobali kucita boobo, nobali kukazyanya amuuya uusalala walo uugwasya bantu ba Leza kuba aluumuno alimwi alukamantano.—Rom. 16:17, 18.
INO TWEELEDE KUBABONA BUTI BANANIKE?
Tatweelede kubona bananike naa aabo basololela mbuli bantu bakunyika ibalaampuwo (Amubone muncali 8) *
8. Nkaambo nzi ncomweelede kucenjela kujatikizya mbomubabona bananike? (Amubone abupanduluzi buyungizyidwe.)
8 Ino tweelede kubabona buti bakwesu alimwi bacizyi bananike? Inga tiicaba kabotu kuyandisya muntu nokuba kuti mwanookwabo Kristo uunanikidwe. (Mt. 23:8-12) Ciindi Bbaibbele nolyaamba kujatikizya baalu, litukulwaizya “kwiiya lusyomo lwabo,” pele talitwaambili kubona muntu uuli woonse kuti musololi wesu. (Heb. 13:7) Masimpe kuti Bbaibbele lyaamba kuti bamwi “baleelela kupegwa bulemu kapati.” Tweelede kucita oobo akaambo kakuti “beendelezya kabotu” alimwi ‘balabeleka canguzu mukukanana akuyiisya,’ ikutali akaambo kakuti mbananike. (1Tim. 5:17) Ikuti twaciindizya kubalumbaizya alimwi akubabikkila maano kapati bananike, inga twabapa kumvwa nsoni. * Ciinda kubija ncakuti, ambweni inga twapa kuti batalike kulisumpula. (Rom. 12:3) Kunyina uunga wayanda kuti acite cintu cili coonse icikonzya kupa umwi wabanabokwabo Kristo kuti alubizye munzila eeyi!—Lk. 17:2.
9. Mbuti mbotukonzya kutondezya kuti tulabalemeka Banakristo bananike?
9 Mbuti mbotukonzya kutondezya kuti tulabalemeka aabo bananikidwe a Jehova? Tatweelede kubabuzya mbobakananikwa. Aaya makani aatatujatikizyi alimwi buya tatuyandiki akwaazyiba. (1Tes. 4:11; 2Tes. 3:11) Alimwi tatweelede kuyeeya kuti balumi babo naa bakaintu babo, bazyali, naa banamukwasyi bambi balinanikidwe abalo. Muntu takonzyi kukona bulangizi bwakujulu kumukwasyi wakwe. Pele ulabutambula kuzwa kuli Leza. (1Tes. 2:12) Alimwi tatweelede kubuzya mibuzyo iikonzya kubanyemya bamwi. Mucikozyanyo, tatweelede kubuzya mukaintu wamunanike kujatikizya mbwalimvwa kuyoopona anyika kukabe kutamani kakunyina mulumi wakwe. Ncotuzyi ncakuti, munyika mpya Jehova ‘uyookkutya cilenge coonse cipona kwiinda mukucipa ncociyanda.’—Int. 145:16.
10. Mbuti mbotulikwabilila tobeni kuti katutaciindizyi ‘kulumbaizya bantu’?
10 Ikuti bananike katutababoni kuba bantu bayandika kapati kwiinda bamwi, andiswe tulalikwabilila. Munzila nzi? Bbaibbele litwaambila kuti bananike bamwi ambweni tabakazumanani kusyomeka. (Mt. 25:10-12; 2Pet. 2:20, 21) Pele ikuti katutaciindizyi ‘kulumbaizya bantu,’ tatukatobeli bantu, nobaba baabo bananikidwe naa aabo ibamubelekela Jehova kwaciindi cilamfwu. (Jud. 16) Mpoonya ikuti naa baleka kusyomeka naa bazwa mumbungano, tatukaleki kumusyoma Jehova naa kuleka kumubelekela.
SENA TWEELEDE KULIBILIKA KUJATIKIZYA MWEELWE WABAABO IBALYA?
11. Ncinzi cali kucitika kumweelwe wabaabo ibalya cinkwa alimwi akunywa waini lya Ciibalusyo?
11 Kwamyaka minji, mweelwe wabaabo ibalya cinkwa akunywa waini lya Ciibalusyo wakazumanana kuyaansi. Pele mazuba aano, mweelwe ooyu ulayungizyika mwaka amwaka. Sena eeci ceelede kutupa kulibilika? Peepe. Atulange-lange twaambo ncotuteelede kulibilika.
12. Nkaambo nzi ncotuteelede kulibilika kujatikizya mweelwe wabaabo balya cinkwa akunywa waini lya Ciibalusyo?
12 “Jehova ulibazyi aabo bazulilwa kulinguwe.” (2Tim. 2:19) Mukwiimpana a Jehova, bakwesu ibabala mweelwe wabaabo ibalya cinkwa akunywa waini lya Ciibalusyo tabazyi uunanikidwe ncobeni. Aboobo mweelwe ulabikkilizya abaabo ibayeeya kuti balinanikidwe pele tabananikidwe pe. Mucikozyanyo, bamwi ibakali kulya cinkwa akunywa waini, mukuya kwaciindi bakacileka. Bamwi balinyongene mumizeezo aboobo basyoma kuti bayoolela a Kristo kujulu. Mubwini, tatuuzyi kabotu mweelwe wabananike bacisyeede anyika.
13. Sena Bbaibbele lilaamba naa banooli bongaye bananike anyika mapenzi mapati aakutalika?
13 Kunooli bananike mumasena manji anyika ciindi Jesu aakuboola kubabweza kuya kujulu. (Mt. 24:31) Bbaibbele lyaamba kuti kumazuba aamamanino, kunooli buyo mweelwe musyoonto wabananike ibacinooliko anyika. (Ciy. 12:17) Pele talyaambi naa bali bongaye ibacinooliko anyika ciindi mapenzi mapati aakutalika.
Ino tweelede kucita buti kuti umwi walya cinkwa alimwi akunywa waini lya Ciibalusyo? (Amubone muncali 14)
14. Kweelana alugwalo lwa Baroma 9:11, 16, ncinzi ncotwiiya kujatikizya kusalwa kwabananike?
14 Jehova ulasala ciindi nayoobasala bananike. (Rom. 8:28-30) Jehova wakatalika kusala bananike Jesu naakabusyigwa. Kuboneka kuti mumwaanda wamyaka wakusaanguna, Banakristo bakasimpe boonse bakalinanikidwe. Mumyaka yoonse yakatobela, bunji bwabaabo ibakali kulyaamba kuti Mbanakristo mubwini tiibakali kumutobela Kristo. Nokuba boobo, mumyaka eeyo, Jehova wakananika basyoonto ibakali Banakristo bakasimpe. Bakali mbuli wiiti njaakaamba Jesu kuti iyookomena akati kansaku. (Mt. 13:24-30) Kumazuba aakumamanino, Jehova wazumanana kusala bantu bambi kuti bakabe cibeela caba 144,000. * Aboobo ikuti naa Leza waakubasala bantu aaba kakusyeede buyo ciindi cisyoonto kuti mamanino asike, tatweelede kubudooneka busongo bwakwe. (Amubale Baroma 9:11, 16.) * Tweelede kucenjela kutegwa tutabi mbuli babelesi mbaakaamba Jesu mucikozyanyo cakwe cimwi. Bakatongooka kujatikizya simalelo wabo mbwaakalanganya baabo ibakatalika mulimo muwoola lyamamanino.—Mt. 20:8-15.
15. Sena bananike boonse ncibeela ‘camuzike uusyomeka alimwi uucenjede,’ iwaambidwe kulugwalo lwa Matayo 24:45-47? Amupandulule.
15 Tabali boonse ibajisi bulangizi bwakujulu ibali ncibeela “camuzike uusyomeka alimwi uucenjede.” (Amubale Matayo 24:45-47.) Mbubwenya mbuli mumwaanda wamyaka wakusaanguna, Jehova a Jesu mazuba aano babelesya buyo bakwesu basyoonto kusanina, naa kuyiisya bantu banji. Banakristo bananike basyoonto buyo mbabakabelesyegwa kulemba Magwalo aa Banakristo aa Chigiriki mumwaanda wamyaka wakusaanguna. Mazuba aano, Banakristo bananike basyoonto buyo mbabajisi mukuli wakupa bantu ba Leza “cakulya aciindi ceelede.”
16. Ncinzi ncomwaiya mucibalo eeci?
16 Ino ncinzi ncotwaiya mucibalo eeci? Jehova wasala kupa buumi butamani anyika kubantu banji alimwi abuumi bwakujulu kuli baabo basyoonto ibayoolela antoomwe a Jesu. Jehova ulabalongezya babelesi bakwe boonse, nkokuti “mu Juda” ‘abantu bali kkumi,’ alimwi uyanda kuti kabatobela milawo iikozyenye alimwi akuti bazumanane kusyomeka. Boonse beelede kuzumanana kulicesya. Boonse beelede kumubelekela antoomwe alimwi akukamantana. Alimwi boonse beelede kusumpula luumuno mumbungano. Mbotuyaabuswena kumamanino, atuzumanane kubelekela Jehova akumutobela Kristo katuli “tanga lyomwe.”—Joh. 10:16.
^ munc. 5 Mwaka uuno, Ciibalusyo ca lufwu lwa Kristo ciyoocitwa muli Bwabili, April 7. Ino tweelede kuyoobabona buti aabo bayoolya cinkwa alimwi akunywa waini mangolezya aayo? Sena tweelede kulibilika akaambo kakuyungizyika kwamweelwe wabaabo ibalya? Tulabujana bwiinguzi bwamibuzyo eeyi mucibalo eeci iciyeeme aacibalo icili mu Ngazi Yamulindizi yamu January 2016.
^ munc. 2 Kweelana alugwalo lwa Intembauzyo 87:5, 6, kumbele, Leza ambweni uyakwaayubununa mazina aabaabo boonse banooyendelezya a Jesu kujulu.—Rom. 8:19.
^ munc. 8 Amubone kabbokesi kakuti “Luyando ‘Talukwe Cisapi’” mu Ngazi Yamulindizi yamu January 2016.
^ munc. 14 Nokuba kuti lugwalo lwa Milimo 2:33 lutondezya kuti muuya uusalala ulatilwa kwiinda muli Jesu, Jehova nguutamba muntu uuli woonse.
^ munc. 14 Kutegwa muzyibe zinji, amubone “Mibuzyo Yabasikubala” mu Ngazi Yamulindizi, yamu Chikuwa yamu May 1, 2007.
LWIIMBO 34 Kweenda Kamutakwe Kampenda
^ munc. 56 BUPANDULUZI BWACIFWANIKISO: Amweezyeezye kuti mwiiminizi waku maofesi mapati alimwi amukaintu wakwe babumbililwa abasikufwotola amuswaangano wacooko. Eelo kaka ooku nkubula bulemu!
