ARTÍCULO NEMA NATALIKGALHTAWAKGA 5
«Akinin nakkataʼanan»
«Akinin nakkataʼanan, xlakata kkgaxmatnitaw pi Dios katalaman» (ZAC. 8:23).
TAKILHTLIN 26 «La kapaxki xlakan, kimpaxki akit»
TUKU NATALICHUWINAN *
Amakgapitsin borregos («kgalhakaw lakchixkuwin») lu lanka xtapalh akxilhkgo akxtum nakataskujnanikgo Jehová tiku xatalaksakni («judío») (Kaʼakxilhti párrafos 1 chu 2).
1. ¿Tuku lichuwinalh Jehová pi xʼama kgantaxtu kkinkilhtamakujkan?
AKXNI xlichuwinama tuku xʼama kgantaxtu kkinkilhtamakujkan, Jehová wa: «Uma kilhtamaku kgalhakaw lakchixkuwin xalak tipalhuwa kachikinin chu tipalhuwa xtachuwinkan nachipakgo, chuna, xlikana nachipakgo klhakgat chatum chixku judío, chu nawankgo: “Xlikana akinin nakkataʼanan, xlakata kkgaxmatnitaw pi Dios katalaman”» (Zac. 8:23). Uma «judío» kilhchanima tiku Dios kalilaksaknit xʼespíritu santo, tiku na kalilakgapaskan «Israel nema tapakgsini Dios» (Gál. 6:16). Chu «kgalhakaw lakchixkuwin» kilhchanima putum latamanin tiku kgalhikgo takgalhkgalhin nalatamakgo unu kKatiyatni. Xlakan katsikgo pi Jehová kalaksaknit tiku naʼankgo kʼakgapun chu lanka xtapalh liʼakxilhkgo akxtum kataskujnanikgo Dios.
2. ¿Tuku kilhchanima pi kgalhakaw lakchixkuwin lakxtum kataʼamakgo tiku xatalaksakni?
2 Maki la uku ni katsikan putum xtukuwanikan xatalaksakni tiku lamakgolhku kKatiyatni, * tiku kgalhkgalhikgo nalatamakgo unu kKatiyatni tlan lakxtum «nakataʼankgo». ¿La natlawakgo? Biblia lichuwinan pi «kgalhakaw lakchixkuwin» liwana «nachipakgo klhakgat chatum chixku judío» chu pi xʼama wankgo: «Xlikana akinin nakkataʼanan, xlakata kkgaxmatnitaw pi Dios katalaman». Uma versículo kajwatiya lichuwinan chatum judío. Pero akxni kgalhakaw lakchixkuwin tachuwinankgo, wanikgo: «nakkataʼanan» chu «katalaman». Uma limasiya pi «judío» ni kajwatiya chatum chixku, wata akgtum grupo tiku kalaksakkanit. Tiku ni xatalaksakni akxtum kataskujkgo tiku xatalaksakni. Pero, ni xpulalinanin kaliʼakxilhkgo, xlakata xlakan liwana katsikgo pi kaj chatum xPulalinakan, Jesús (Mat. 23:10).
3. ¿Tukuya takgalhskinin nakgalhtiyaw kʼuma artículo?
3 La uku lamakgolhku unu kKatiyatni makgapitsi tiku xatalaksakni. Wa xlakata, max wi tiku nalakpuwan: ¿la xlikatsitkan tiku xatalaksakni?, ¿la nakalikatsiniyaw tiku wakgo kaxtalanchu chu vino Akxni lakapastakkan akxni tinilh Cristo? chu ¿kililakgaputsatkan xlakata akgatunu kata taliwaka tiku wakgo kaxtalanchu chu vino? Kʼuma artículo nakgalhtiyaw umakgolh takgalhskinin.
¿LA XLIKATSITKAN TIKU XATALAKSAKNI?
4. Chuna la wan 1 Corintios 11:27-29, ¿tuku lu xlakaskinka kuenta natlawakgo tiku xatalaksakni, chu tuku xlakata?
4 Tekgsaw akgtum lu xlakaskinka tastakyaw anta 1 Corintios 11:27-29 nema kamaxkikan tiku xatalaksakni (kalikgalhtawakga). ¿Tuku kilhchanima pi chatum xatalaksakni «ni lakgchan» naway kaxtalanchu chu vino? «Ni lakgchan» xlakata ni putum makgantaxtima xlimapakgsin Jehová (Heb. 6:4-6; 10:26-29). Tiku xatalaksakni liwana katsikgo pi talakaskin nikxni namakgxtakgkgo Dios komo xlikana makglhtinamputunkgo «tasikulunalin» nema Dios nakamaxki xpalakata Cristo Jesús (Filip. 3:13-16).
5. ¿La xlikatsitkan tiku xatalaksakni?
5 Xʼespíritu santo Jehová tlawa pi latamanin tlakg xataktujun namakgkatsikgo, chu ni kaj lanka nakamakgkatsikan (Efes. 4:1-3; Col. 3:10, 12). Wa xlakata tiku xatalaksakni ni tlakg xlakaskinka kamakgkatsikan. Liwana katsikgo pi Jehová ni tlakg kamaxkinit espíritu santo nixawa amakgapitsin xlakskujnin. Nachuna, ni lakpuwankgo pi tlakg lakgapaskgo xtamasiy Biblia nixawa amakgapitsin. Chu nikxni katiwanikgolh achatum: «Na xatalaksakni wix chu miliwat kaxtalanchu chu vino akxni talakapastaka Cristo». Wata xlakan taktujukgo chu liwana katsikgo pi kajwatiya Jehová lakgchan nakalaksaka tiku natamapakgsinankgo Cristo kʼakgapun.
6. Chuna la wan 1 Corintios 4:7, 8, ¿tuku xlitlawatkan tiku xatalaksakni?
6 Maski tiku xatalaksakni liwana katsikgo pi akgtum lanka talakgalhaman xlakata kalaksakka naʼankgo kʼakgapun, ni lakpuwankgo pi amakgapitsin nakamalankikgo (Filip. 2:2, 3). Nachuna, liwana katsikgo pi akxni Jehová kalaksakli, ni putum latamanin kamakatsinikgolh. Wa xlakata, chatum tiku xatalaksakni ni kaks lilakawan komo chatum tala tuwa namakgkatsi naʼakgatekgsa pi Dios laksaknit. Biblia lichuwinan pi ni tunkun kakanajlaniw tiku wan pi Dios lakgayawanit akgtum lu xlakaskinka taskujut (Apoc. 2:2). Nachuna, xlakata ni lakaskin pi amakgapitsin namalankikgo, tiku xatalaksakni ni kawanikgo pi xlakan naʼankgo kʼakgapun tiku aku kalakgapasmakgolh. Chu, nikxni lanka kalimakgkatsikan pi xlakan xatalaksakni (kalikgalhtawakga 1 Corintios 4:7, 8).
7. ¿Tuku ni tlawakgo tiku xatalaksakni?
7 Tiku xatalaksakni ni kaj xman wa akxtum katalakgo tiku na xatalaksakni. Nachuna, ni katatamakxtumikgo amakgapitsin natalan tiku na xatalaksakni xlakata nalakputsananikgo Biblia o nalichuwinankgo xtakgalhkgalhinkan (Gál. 1:15-17). Komo chuna xtlawakgolh, ni xmakgtayanankgolh xlakata Congregación makxtum xtawilakgolh. Wata xlimasiyakgolh pi ni stalanikgo xtapulalit espíritu santo, nema tlawa pi kaʼanalh takaksni kxkachikin Dios chu tlawa pi makxtum natawila (Rom. 16:17, 18).
¿LA NAKALIKATSINIYAW TIKU XATALAKSAKNI?
Ni kilimalankitkan tiku xatalaksakni o tiku kinkapulalinkgoyan (Kaʼakxilhti párrafo 8). *
8. ¿Tuku xlakata kuenta natlawayaw la kalikatsiniyaw tiku xatalaksakni? (Na kaʼakxilhti nota).
8 ¿La nakalikatsiniyaw natalan tiku xatalaksakni? Ni xlilat pi nakamalankiyaw amakgapitsin, maski xatalaksakni (Mat. 23:8-12). Akxni kalichuwinan lakgkgolotsin, Biblia wan: «Kastalanitit xtakanajlakan», pero ni wan pi wa kakastalaniw latamanin (Heb. 13:7). Xlikana pi Biblia na wan pi xlakan “kalakgchan tlakg nakamaxkiyaw kakni”. Pero ni wa xlakata xatalaksakni litaxtukgo, wata wa xlakata «liwana pulalinkgo congregación» chu palha skujkgo chuna la «masiyakgo» (1 Tim. 5:17). Komo lu nakamalankiyaw tiku xatalaksakni, max nitlan katikamamakgkatsiniw * o asta uma natlawa pi tlankajwa nakamakgkatsikan (Rom. 12:3). Chu xlikana pi nitu tlawaputunaw nema max natlawa pi namakglakgalhinankgo (Luc. 17:2).
9. ¿La tlan nakalimasiyaniyaw kakni kinatalankan tiku xatalaksakni?
9 ¿La tlan nakalimasiyaniyaw kakni tiku kalaksaknit Jehová? Pulana, ni kakakgalhskiw la katsikgolh komo xatalaksakni xwakgonit. Uma ni kinkalakgchanan nakatsiyaw, kajwatiya xlakan katsikgo (1 Tes. 4:11; 2 Tes. 3:11). Nachuna, ni nalakpuwanaw pi tiku tamakgaxtokga, xnatlatni o atanu tiku xalak xfamilia na xatalaksakni. Uma talakgalhaman ni lamatitaxtinikan, wa Jehová tiku masta (1 Tes. 2:12). Nachuna, ni katitlawaw takgalhskinin nema max ni tlan katikamamakgkatsinilh amakgapitsin. Akgtum liʼakxilhtit, nikxni kilikgalhskinitkan xpuskat chatum tala tiku xatalaksakni la makgkatsi akxni lilakpuwan pi putum kilhtamaku nalatama unu kKatiyatni chu nialh akxtum katitatawilalh xchixku. Xlakata liwana katsiyaw pi kxasasti kakilhtamaku Jehová nakamaxki xlakskujnin tuku namaklakaskinkgo (Sal. 145:16).
10. ¿Tuku xlakata ni kilimalankitkan chatum tala?
10 Nachuna, akxni ni kamalankiyaw tiku xatalaksakni o ni tlakg lanka kaliʼakxilhaw nixawa amakgapitsin, tamakgatlinimaw pulaktum tuku max lu tuwa xkitaxtulh. ¿Tuku uma? Biblia wan pi makgapitsin tiku xatalaksakni max xmakgxtakgkgolh Jehová (Mat. 25:10-12; 2 Ped. 2:20, 21). Pero komo akinin ni nakamalankiyaw amakgapitsin, nikxni katikastalaniw lakchixkuwin, maski xatalaksakni, tiku lu kalakgapaskan o tiku lhuwata kata la skujnanimakgo Jehová (Jud. 16, nota). Chuna, komo xlakan xmakgxtakgkgolh Dios o xmakgxtakgkgolh congregación, akinin ni katimakgxtakgwi Jehová.
¿KILILAKGAPUTSATKAN XLAKATA AKGATUNU KATA TALIWAKA TIKU WAKGO KAXTALANCHU CHU VINO?
11. ¿Tuku kitaxtunit xlakata tiku wakgo kaxtalanchu chu vino?
11 Makgasa, kata kata xlitakta la kgalhalit xwakgonit tiku xwakgo kaxtalanchu chu vino. Pero la uku, kata kata taliwakama tiku wakgo kaxtalanchu chu vino. ¿Talakaskin nalilakgaputsayaw uma? Ni. Kaʼakxilhwi tuku xlakata.
12. ¿Tuku xlakata ni kililakgaputsatkan xlakata taliwakama tiku wakgo kaxtalanchu chu vino?
12 «Jehová kalakgapasa tiku tapakgsinikgo» (2 Tim. 2:19). Jehová liwana kalakgapasa tiku xlikana kalaksaknit, pero natalan tiku kaputlakgakgo tiku wakgo kaxtalanchu chu vino Akxni lakapastakkan Cristo ni katsikgo. Wa xlakata, la uku lhuwa tiku wakgo kaxtalanchu chu vino pero ni putum xlikana xatalaksakni. Makgapitsi tiku xwakgo kaxtalanchu chu vino nialh wakgo. Chu wilakgolh tiku lakpuwankgo pi natamapakgsinankgo Cristo kʼakgapun xlakata kgalhikgo akgtum tajatat nema laktlawa xtalakapastaknikan. Wa xlakata ni liwana katsiyaw la kgalhalit tiku xatalaksakni lamakgolhku unu kKatiyatni.
13. ¿Lichuwinan Biblia la kgalhalit lamakgolhku nawan tiku xatalaksakni akxni natsuku lanka takatsanajwat?
13 Kxlikalanka Katiyatni lamakgolhku nawan tiku xatalaksakni akxni Jesús namin xlakata nakalin kʼakgapun (Mat. 24:31). Xlikana pi Biblia kinkamaʼakgatekgsniyan pi kxaʼawatiya kilhtamaku xʼamakgolhku tawilakgo kKatiyatni tiku xatalaksakni (Apoc. 12:17). Pero ni lichuwinan la kgalhalit lamakgolhku nawan akxni natsuku lanka takatsanajwat.
¿Tuku kilitlawatkan komo akxilhaw pi chatum tala tsuku way kaxtalanchu chu vino? (Kaʼakxilhti párrafo 14).
14. ¿Tuku kinkamasiyaniyan Romanos 9:11, 16 xlakata la kalaksakkan tiku naʼankgo kʼakgapun?
14 Wa Jehová tiku laksaka akxni nakatasani tiku xatalaksakni (Rom. 8:28-30). Jehová tsukulh kalaksaka tiku naʼankgo kʼakgapun akxni lakastakwanalh Jesús. Kxapulana siglo, putum kstalaninanin Cristo xatalaksakni xwankgonit. Pero alistalh, lhuwa tiku xwankgo pi xatalaksakni xwankgonit ni xlikana xkalaksakkanit. Maski chuna, Jehová kalaksakli kstalaninanin Cristo tiku xwilakgolh ama kilhtamaku xlakata naʼankgo kʼakgapun. Xlakan xlitaxtukgo chuna la trigo nema lichuwinalh Jesús pi xʼamakgo stakkgo kxlakgstipan nixatlan tuwan (Mat. 13:24-30). Kxaʼawatiya kilhtamaku nema lamaw, Jehová chuntiya kalaksaknit tiku namakgtapakgsikgo kʼgrupo xla 144,000 * tiku natamapakgsinankgo Jesús kʼakgapun. Wa xlakata, komo Jehová nakatasani makgapitsin tiku xatalaksakni akxni chamaja lisputni nawan, ¡nitu litaxtuyaw akinin xlakata nawanaw pi nitlan tuku laksakli! (Kalikgalhtawakga Romanos 9:11, 16). * Akinin ni litaxtuputunaw chuna la skujnin tiku kalichuwinalh Jesús kʼakgtum parábola, tiku nitlan akxilhkgolh pi xmalanakan nachuna kamaskgawilh la amakgapitsin tiku kaj akgtum hora skujkgolh (Mat. 20:8-15).
15. ¿Tuku xlakata katsiyaw pi ni putum tiku xatalaksakni «skujni xatalipaw chu xaskgalala» litaxtukgo nema litachuwinan kMateo 24:45-47?
15 Ni putum tiku kalaksakkanit xlakata nalatamakgo kʼakgapun «skujni xatalipaw chu xaskgalala» litaxtukgo (kalikgalhtawakga Mateo 24:45-47). Xtachuna la kxapulana siglo, la uku Jehová chu Jesús ni lhuwa tiku kamaklakaskinkgo xlakata nakamasiyani xlakskujnin. Kxapulana siglo, ni lhuwa tiku kamaklakaskinka xlakata natsokgwilikgo Tatsokgni xaGriego. La uku, ni lhuwa tiku xatalaksakni kamaxkikanit talakgalhaman nakamaxkikgo «liwat akxni maklakaskinkgo» xlakskujnin Dios.
16. ¿Tuku katsininita kʼuma artículo?
16 Kalakapastakwi tuku akxilhnitaw kʼuma artículo. Jehová laksaknit pi tlakg lhuwa tiku nakamaxki latamat unu kKatiyatni chu ni lhuwa tiku nakamaxki latamat kʼakgapun xlakata natamapakgsinankgo Jesús. Dios kasikulunatlawa putum xlakskujnin, maski xatalaksakni o ni xatalaksakni, chu putum kaskini pi kakgalhakgaxmatkgolh xlimapakgsin chu pi nikxni kamakgxtakgkgolh. Putum xlitaktujutkan. Chu putum xliskujatkan xlakata namakgtayanankgo naʼanan takaksni kcongregación. Chali chali tlakg talakatsuwima lisputni, wa xlakata chuntiya kaskujnaniw Jehová chu chuntiya makxtum kastalaniw Cristo (Juan 10:16).
^ párr. 5 Kʼuma kata, kakgotanun martes 7 xla abril natalakapastaka Akxni tinilh Cristo. ¿La nakalikatsiniyaw tiku wakgo kaxtalanchu chu vino Akxni lakapastakkan akxni tinilh Cristo? ¿Kililakgaputsatkan xlakata akgatunu kata taliwakama tiku wakgo kaxtalanchu chu vino? Nakgalhtiyaw umakgolh takgalhskinin kʼuma artículo, nema takilhtinit krevista Makatsinina xla enero kata 2016.
^ párr. 2 Chuna la wan Salmo 87:5, 6, max alistalh Jehová namasiya xtukuwanikan putum tiku natamapakgsinankgo Jesús kʼakgapun (Rom. 8:19).
^ párr. 8 Kaʼakxilhti recuadro «Tapaxkit “ni tlawa tuku xalimaxana”», krevista Makatsinina xla enero kata 2016.
^ párr. 14 Maski Hechos 2:33 lichuwinan pi wa Jesús tiku kalimatsama espíritu santo latamanin, wa Jehová tiku kalaksaka latamanin xlakata naʼankgo kʼakgapun.
^ párr. 14 Tlakg natekgsa xlakata uma krevista La Atalaya 1 xla mayo kata 2007, ksección «Preguntas de los lectores».
TAKILHTLIN 34 Ni kmakgxtakgan, nakkgalhakgaxmatan
^ párr. 56 TUKU TASIYA KDIBUJO: Kalilakpuwanti pi akxni pinita kʼakgtum lanka tamakxtumit, lhuwa natalan lakgankgo chatum representante xalak central mundial chu xpuskat xlakata namaxtukgo fotos. ¡Uma ni limasiya kakni!
