1. Jehova i tok profet long wanem samting bai kamap long taim bilong yumi?

JEHOVA i tok profet long wanpela samting bai kamap long taim bilong yumi: “Tenpela man bilong olgeta tokples bilong ol kantri bai kam na ol bai holim longpela klos bilong wanpela Juda, na ol bai tok olsem: ‘Mipela i laik go wantaim yupela, long wanem, mipela i harim olsem God i stap wantaim yupela.’” (Sek. 8:23) Dispela man “Juda” i makim ol manmeri em God i anointim ol long holi spirit. Baibel i kolim ol olsem “lain Israel bilong God.” (Gal. 6:16) Dispela “10-pela man” i makim ol manmeri em ol i gat hop bilong kisim laip oltaim long graun. Ol i save olsem Jehova i blesim ol manmeri em i bin anointim, na ol i amamas tru olsem ol inap bung wantaim dispela lain na lotuim God.

2. Olsem wanem “10-pela man” bai “go wantaim” ol Kristen em God i anointim?

² Yumi no inap save long nem bilong olgeta manmeri em God i anointim na ol i stap yet long graun, * tasol ol lain i hop long kisim laip long graun, ol i ken “go wantaim” ol Kristen em God i anointim. Hau bai ol inap go wantaim ol? Baibel i tok “10-pela man” bai “holim longpela klos bilong wanpela Juda, na ol bai tok olsem: ‘Mipela i laik go wantaim yupela, long wanem, mipela i harim olsem God i stap wantaim yupela.’” Baibel i tok wanpela Juda. Tasol dispela tok “yupela” i makim  planti manmeri. Dispela i makim olsem dispela Juda i no wanpela man tasol, nogat, em i makim grup olgeta bilong ol Kristen God i makim. Ol lain em ol i gat hop long kisim laip long graun, ol bai wok bung wantaim lain God i anointim na lotuim Jehova. Tasol ol i luksave olsem Jisas em Lida bilong ol, na ol i no tingim ol Kristen em God i anointim olsem ol lida bilong ol.—Mat. 23:10.

3. Dispela atikol bai bekim wanem ol askim?

³ Long nau, sampela Kristen em God i anointim i stap yet wantaim yumi, olsem na sampela inap tingting olsem: (1) Ol Kristen em God i anointim i mas holim wanem tingting long ol yet? (2) Yumi mas soim wanem pasin long ol lain em ol i kisim bret na wain long Memorial? (3) Yu ting i stret long yumi tingting planti sapos namba bilong ol lain i kisim bret na wain i go antap? Dispela atikol bai bekim ol dispela askim.

4. Ol Kristen em God i anointim i mas tingim gut wanem tok lukaut i stap long 1 Korin 11:27-29? Wai?

⁴ Ol Kristen em God i anointim i mas tingim gut tok lukaut i stap long 1 Korin 11:27-29. (Ritim.) Sapos wanpela Kristen em God i anointim i no save bihainim ol stretpela lo bilong Jehova, tasol em i kisim bret na wain long Memorial, orait dispela i makim  olsem em “i no soim rispek” long taim bilong Memorial. (Hib. 6:4-6; 10:26-29) Ol Kristen em God i anointim i luksave olsem ol i mas stap gut long God sapos ol i laik kisim “prais em singaut bilong i go antap, na em i kam long God long rot bilong Krais Jisas.”—Fili. 3:13-16.

5. Ol lain em God i anointim i mas holim wanem tingting long ol yet?

⁵ Holi spirit i save helpim ol wokman bilong Jehova long bihainim pasin daun, na sakim pasin antap. (Efe. 4:1-3; Kol. 3:10, 12) Olsem na ol lain em God i anointim i no pilim olsem ol i gutpela moa winim ol narapela. Ol i save olsem Jehova i givim wankain skel bilong holi spirit long olgeta wokman bilong em, na i no olsem ol i kisim bikpela skel bilong holi spirit na ol narapela i kisim liklik skel tasol. Ol i no pilim olsem save bilong ol long ol tok bilong Baibel i winim save bilong ol narapela. Ol i no inap tru long tokim narapela olsem God i anointim em tu na em i mas stat long kisim bret na wain long Memorial. Long pasin daun, ol i luksave olsem Jehova tasol inap invaitim ol manmeri long i go long heven.

6. Olsem 1 Korin 4:7, 8 i kamapim, ol Kristen i gat hop long go long heven i no ken mekim wanem?

⁶ Ol Kristen God i anointim i pilim olsem ol i kisim biknem taim ol i kisim invatesen bilong go long heven, tasol ol i no ekspektim ol narapela long preisim ol. (Fili. 2:2, 3) Ol i save tu olsem taim Jehova i anointim ol, em i no tokim olgeta manmeri long dispela samting. Olsem na ol i save olsem sampela bai hatwok long tingim olsem God i bin anointim ol. Ol i save olsem Baibel i tok yumi no ken hariap long bilipim wanpela man husat i tok God i givim em wanpela spesel wok. (Rev. 2:2) Ol i no laik bai ol narapela i givim biknem long ol, olsem na taim ol i bungim ol narapela long fes taim, ol i no inap toksave olsem God i bin anointim ol. Ol i no inap apim nem bilong ol yet.—Ritim 1 Korin 4:7, 8.

7. Ol Kristen em God i anointim i abrusim wanem ol pasin? Wai?

⁷ Ol Kristen em God i anointim i no pilim olsem ol i mas bung tasol wantaim ol wanlain Kristen em God i anointim; i olsem ol i gat klap bilong ol yet. Ol i no save painim ol wanlain Kristen husat i gat wankain hop olsem ol na bai ol i stori long hop bilong ol o kamapim ol grup bilong ol yet long stadi long Baibel. (Gal. 1:15-17) Sapos ol i mekim olsem, ol inap brukim lain na kongrigesen i no inap stap wanbel. Ol i no bihainim pasin bilong holi spirit, em strong bilong God we i save helpim ol manmeri bilong God long stap bel isi na stap wanbel.—Rom 16:17, 18.

8. Wai na yu mas was gut long pasin yu mekim long ol lain husat i kisim bret na wain? (Lukim tu futnot.)

⁸ Yumi mas soim wanem pasin long ol bratasista em God i anointim? I no stret long laikim tumas narapela, maski sapos em i Kristen God i anointim na em i kamap brata bilong Krais. (Mat. 23:8-12) Taim Baibel i stori long wok bilong ol elda, em i kirapim yumi long “bihainim pasin bilong ol long bilip,” tasol Baibel i tok yumi no ken tingim wanpela man olsem lida bilong yumi. (Hib. 13:7) Baibel i tok i gat sampela em yumi mas “givim bikpela rispek long ol.” I no olsem yumi tingim hop bilong ol long go long heven, nogat, yumi rispektim ol bikos ol i “mekim gut wok wasman” na “wok hat long tokaut long tok bilong God na skulim ol man.” (1 Tim. 5:17) Sapos yumi laikim tumas na preisim ol lain em God i anointim, yumi inap semim ol. * O yumi inap kirapim ol long mekim pasin i nogut moa, em pasin antap. (Rom 12:3) Yumi olgeta i no laik tru long mekim wanpela samting we inap kirapim wanpela brata bilong Krais long mekim kain bikpela rong olsem!—Luk 17:2.

9. Olsem wanem yumi inap soim olsem yumi rispektim ol Kristen em God i anointim?

⁹ Olsem wanem yumi inap soim olsem yumi rispektim ol Kristen em Jehova i anointim? Yumi no ken askim ol long hau ol i save olsem God i bin anointim ol. Dispela em samting bilong ol yet na yumi no gat rait long save. (1 Tes. 4:11; 2 Tes. 3:11) Yumi no ken ting olsem God i anointim tu poroman marit bilong ol, papamama, o ol narapela wanfamili bilong ol. Man i no inap kisim hop bilong i go long heven sapos God i bin anointim wanfamili bilong em. God yet i save givim dispela hop long man. (1 Tes. 2:12) Yumi no ken givim ol askim we inap bagarapim bel bilong ol narapela. Olsem, yumi no ken askim meri bilong wanpela brata em God i anointim long em i pilim olsem wanem long em bai stap laip oltaim long graun na man bilong em i no stap wantaim em. Yumi ken save tru olsem long nupela taim, Jehova bai “inapim laik bilong olgeta samting i gat laip.”—Sng. 145:16.

10. Olsem wanem yumi lukautim yumi yet taim yumi abrusim pasin bilong “mekim ol switpela tok”?

¹⁰ Sapos yumi abrusim pasin bilong givim biknem long ol Kristen God i anointim, yumi bai lukautim yumi yet. Hau? Baibel i tok sampela Kristen God i anointim inap lusim bilip. (Mat. 25:10-12; 2 Pita 2:20, 21) Sapos yumi abrusim pasin bilong laikim tumas ol narapela na “mekim ol switpela tok” long ol, yumi no inap bihainim ol, maski God i anointim ol o planti man i save long ol o ol i mekim wok bilong Jehova inap planti yia. (Jut 16) Olsem na sapos ol i no stap gut long God o ol i lusim kongrigesen, yumi bai bilip yet long Jehova na wok yet long lotuim em.

11. Wanem samting i kamap long namba bilong lain i save kisim bret na wain long Memorial?

¹¹ Inap planti yia, namba bilong ol lain i kisim bret na wain long Memorial i wok long i go daun. Tasol inap sampela yia nau, dispela namba i wok long i go antap long olgeta yia. Yu ting i stret long yumi tingting planti long dispela samting? Nogat. Yumi ken skelim sampela risen.

12. Bilong wanem yumi no ken tingting planti long namba bilong lain i kisim bret na wain long Memorial?

¹² “Jehova i save gut long ol manmeri bilong em yet.” (2 Tim. 2:19) Ol brata i kaunim namba bilong ol lain i kisim bret na wain long Memorial, ol i no save long husat tru em God i  anointim—Jehova tasol i save long ol. Olsem na ol i kaunim tu namba bilong ol lain husat i ting olsem God i anointim ol, tasol tru tru God i no anointim ol. Olsem, sampela i bin kisim bret na wain, tasol bihain ol i stop long kisim. Ating sampela i gat sik long tingting o bel hevi i daunim ol, olsem na ol i ting olsem ol bai mekim wok king wantaim Krais long heven. Yumi no inap save stret long hamas Kristen God i anointim i stap yet long graun.

13. Olsem wanem? Baibel i kolim stret namba bilong hamas lain bai stap long graun taim traipela hevi tru i kirap?

¹³ Ol Kristen God i anointim bai stap long planti hap bilong graun taim Jisas i kam bilong kisim ol i go long heven. (Mat. 24:31) Baibel i tok liklik hap lain tasol bilong lain God i anointim bai stap long graun long haptaim bilong las de. (Rev. 12:17) Tasol Baibel i no kolim stret namba bilong hamas lain bai stap taim traipela hevi tru i kirap.

14. Olsem Rom 9:11, 16 i kamapim, yumi lainim wanem samting long pasin bilong God long makim ol man em i anointim?

¹⁴ Jehova yet i mekim disisen long wanem taim em bai makim ol Kristen em i laik anointim. (Rom 8:28-30) Bihain long taim Jisas i dai na kirap bek, Jehova i stat long makim ol man em i laik anointim. I luk olsem God i bin anointim olgeta Kristen long dispela taim bipo. Kirap long dispela taim na i kam, planti manmeri i tok ol i Kristen, tasol ol i no bihainim Krais. Maski i olsem, Jehova i anointim sampela em ol i Kristen tru. Ol i olsem ol wit em Jisas i tok ol bai gro namel long ol gras nogut. (Mat. 13:24-30) Long haptaim bilong las de, Jehova i wok yet long makim ol Kristen bilong inapim namba bilong lain 144,000. * Olsem na sapos God i mekim disisen long makim  sampela bilong ol dispela Kristen klostu long taim bilong pinis, orait yumi no ken holim tupela tingting. (Ritim Rom 9:11, 16.) * Yumi mas was gut bambai yumi no ken kisim pasin bilong ol wokman em Jisas i stori long ol long wanpela tok piksa. Ol i komplein long pasin em papa bilong gaden i mekim long ol wokman i stat long wok long las aua.—Mat. 20:8-15.

15. Yu ting olgeta Kristen God i anointim i stap olsem “gutpela wokboi i gat savetingting” em Matyu 24:45-47 i stori long en? Eksplenim.

¹⁵ I no olgeta husat i gat hop bilong kisim laip long heven i stap olsem “gutpela wokboi i gat savetingting.” (Ritim Matyu 24:45-47.) Olsem long taim bilong ol aposel, Jehova na Jisas i yusim sampela brata tasol long givim kaikai, o skulim planti manmeri. Long taim bilong ol aposel, sampela tasol bilong ol Kristen God i anointim i raitim Ol Skripsa Grik. Long nau, sampela tasol bilong ol Kristen God i anointim i “givim kaikai long ol [manmeri bilong God] long taim stret.”

16. Yu kisim wanem skul long dispela atikol?

¹⁶ Dispela atikol i givim wanem skul long yumi? Jehova bai givim laip oltaim long bikpela lain manmeri hia long graun, na liklik lain Kristen bai kisim laip oltaim long heven na ol bai mekim wok king wantaim Jisas. Jehova bai givim gutpela pe long olgeta wokman bilong em—man “Juda” na “10-pela man”—tupela lain wantaim i mas bihainim ol wankain lo na stap gut long God. Olgeta i mas bihainim pasin daun. Olgeta i mas wok bung wantaim long mekim wok bilong God na stap wanbel. Na olgeta wantaim i mas strongim pasin bilong i stap bel isi insait long kongrigesen. Klostu tru nau pinis bai kamap, olsem na yumi olgeta i mas mekim yet wok bilong Jehova na bihainim Krais “olsem wanpela lain sipsip.”—Jon 10:16.