1. Yahwe akagamba ngu kiki ekiribaho omu kasumi akaturumu?

YAHWE akabazaaho obwire obuturumu nagamba ati: “Abantu ikumi abomu ndimi zona ezamahanga, balikwata ha rugoye rwogu ali Omuyudaya, nibagamba ngu tuligenda hamu nainywe, baitu tuhuliire ngu Ruhanga ali nainywe.” (Zak. 8:23) “Omuyudaya” arukubazibwaho omu rukarra runu, nakiikiirra abo Ruhanga abaasesereho amagita nakozesa omwoyo ogurukwera. Kandi nibetwa ‘Isareri eya Ruhanga.’ (Bag. 6:16) “Abantu ikumi” nibakikirra abo abaine okunihira okw’okwikara omu nsi ebiro n’ebiro. Bakimanyire ngu Yahwe ahaire ekitebe eky’abaseserweho amagita omugisa kandi nibakitwara kuba ky’omuhendo kuramya Yahwe bali n’ekitebe kinu.

2. “Abantu ikumi” bagenda bata n’abaseserweho amagita?

² N’obukiraaba kitarukusoboka kasumi kanu * kumanya ibara lya buli muntu anyakuseserweho amagita omu nsi, abo abaine okunihira kw’okwikara omu nsi nibasobora ‘kugenda’ naabo abaseserweho amagita. Omu mulingo ki? Baibuli n’egamba ngu “abantu ikumi” bakaba nibagenda ‘kukwata ha rugoye rw’ogu ali Omuyudaaya, nibagamba ngu tuligenda hamu nainywe, baitu tuhuliire ngu Ruhanga ali nainywe.’ Orukarra runu nirubazaaho Omuyudaaya omu. Baitu ekigambo “nainywe” nikimanyisa abantu abarukukira hali omu. Kinu nikimanyisa ngu Omuyudaaya onu tali muntu omu, baitu nakikirra ekitebe eky’abaseserweho amagita boona. Abo abataseserweho amagita beteranizaaho abaseserweho  amagita omu kuheereza Yahwe. Baitu tibarora abaseserweho amagita nk’abebembezi babo, habwokuba bakimanyire ngu Yesu nuwe mwebembezi wabo.​—Mat. 23:10.

3. Bikaguzo ki ebiragarukwamu omu kicweka kinu?

³ Nk’oku omu kasumi kanu omu baheereza ba Ruhanga hakyarumu abaseserweho amagita, abamu nibasobora kwekaguza: (1) Abaseserweho amagita basemeriire kwerora bata? (2) Tusemeriire kutwaza tuta abo abarukulya ha mugaati kandi bakanywa ha viini ha Kiijukyo? (3) Tusemeriire kweralikirra kakuba omuhendo gwabo abarukulya ha mugaati kandi bakanywa ha viini gweyongera? Ekicweka kinu nikiija kugarukamu ebikaguzo binu.

4. Kuterererwa ki okuli omu 1 Abakolinso 11:27-29 abaseserweho amagita okubasemeriire kutekerezaaho muno kandi habwaki?

⁴ Abaseserweho amagita basemeriire kutekerezaaho muno okuterererwa okuli omu 1 Abakolinso 11:27-29. (Soma.) Ha kiro ky’Ekiijukyo, anyakuseserweho amagita nasobora ata kulya ha mugaati kandi akanywa ha viini “atabisemeriire”? Kinu nasobora kukikora kakuba alya kandi akanywa baitu atarukuhondera endengo za Yahwe ez’okuhikirra. (Baheb. 6:4-6; 10:26-29) Abaseserweho amagita bakimanyire ngu basemeriire kwikara bali besigwa  obubaraaba nibagonza kutunga “empera ey’okweta kwa Ruhanga okwahaiguru [kuraba] omu Kristo Yesu.”​—Baf. 3:13-16.

5. Abaseserweho amagita basemeriire kwerora bata?

⁵ Omwoyo gwa Yahwe ogurukwera gukonyera abaheereza be kuba bebundaazi, hatali kuba b’emyehembo. (Bef. 4:1-3; Bak. 3:10, 12) Nahabweki abaseserweho amagita tiberora kuba b’omugaso muno kukira abandi. Bakimanyire ngu Yahwe tabaha omwoyo ogurukuwera kukira abaheereza be abandi. Tibetwara nk’abarukwetegereza muno Baibuli kukira abantu abandi. Kandi tibasemeriire kugambira omuntu ondi ngu nauwe aseserweho amagita kandi ngu asemeriire kutandika kulya ha mugaati n’okunywa ha viini ha Kiijukyo. Oihireho, n’obuculeezi bwingi bakimanyire ngu Yahwe wenka nuwe araaliza abantu abaralema hamu na Yesu omu iguru.

6. Kusigikirra ha 1 Abakolinso 4:7, 8, Abakristaayo abaseserweho amagita basemeriire kwetwaza bata?

⁶ N’obukiraaba ngu abaseserweho amagita bagurora nk’omugisa gw’amaani obubaralizibwa kugenda omu iguru, tibanihirramu abandi kubatwaza omu mulingo gw’embaganiza. (Baf. 2:2, 3) Kandi bakimanyire ngu Yahwe obuyabasesereho amagita, atagambire abantu abandi. Nahabweki anyakuseserweho amagita tikimuhuniriza kakuba abantu abamu banga kwikiriza ngu aseserweho amagita. Akimanyire ngu Baibuli etuhabura kweriinda kwikiriza bwangu omuntu wena anyakugamba ngu Yahwe amuhaire obujunanizibwa obw’embaganiza. (Kus. 2:2) Omukristaayo anyakuseserweho amagita tagonza abantu kumutwaza omu mulingo gw’embaganiza. Nahabweki tagambira buli muntu ow’atangaana nk’oku aseserweho amagita. Kandi tasemeriire kukyepankisa obwarukuba ali n’abandi.​—Soma 1 Abakolinso 4:7, 8.

7. Bintu ki abaseserweho amagita ebi basemeriire kwetantara kukora, kandi habwaki?

⁷ Abakristaayo abaseserweho amagita tibatekereza ngu basemeriire kwikara n’abaseserweho amagita bagenzi babo bonka, bakasisana nk’abaine ekitebe eky’abo bonka. Tibaserra abaseserweho amagita abandi, nukwo babazeeho nk’oku baaseserweho amagita rundi kutandikaho obutebe obutaito obw’okwesomesa Baibuli. (Bag. 1:15-17) Ekitebe nikiba kitali omu bumu kakuba abaseserweho amagita bakora ebintu bya mulingo ogu. Nibaba nibahakaniza omwoyo ogurukwera ogukonyera abantu ba Ruhanga kwikara omu businge n’omu bumu.​—Bar. 16:17, 18.

8. Habwaki osemeriire kwegendereza omulingo otwazaamu abo abalya omugaati kandi bakanywa ha viini ha kiro ky’Ekiijukyo? (Rora obugambo obuli hansi.)

⁸ Tusemeriire kutwaza tuta ab’oruganda n’abanyaanya itwe abaseserweho amagita? Tikihikire  kwegomba omuntu ekihinguraine n’obwaraaba ali mugenzi wa Kristo anyakuseserweho amagita. (Mat. 23:8-12) Baibuli obw’ebazaaho abagurusi, etutererra kwegera ha kwikiriza kwabo, baitu tetugambira kufoora omuntu wena omwebembezi waitu. (Baheb. 13:7) Ky’amananu ngu Baibuli egamba ngu abamu basemeriire kutekwamu “ekitinisa ekirukukira obwingi.” Kinu nitukikora habwokuba batwebembera kurungi kandi ‘batalibana omu kigambo n’okwegesa,’ hatali ngu habwokuba baseserweho amagita. (1 Tim. 5:17) Kakuba tuhaisaniza muno abaseserweho amagita, kisobora kubaletera kuswara. * Rundi ekyakabi muno, nitusobora kubaletera emyehembo. (Bar. 12:3) Busaho muntu wena omulitwe ayakugondeze kukora ekintu kyona ekisobora kuletera ab’oruganda bagenzi ba Kristo abaseserweho amagita kukora ensobi ez’amaani nka zinu!​—Luk. 17:2.

9. Nitusobora tuta kwoleka ngu nitutamu Abakristaayo abaseserweho amagita ekitiinisa?

⁹ Nitusobora kwoleka tuta ngu nitutamu ekitiinisa abo Yahwe abasesereho amagita? Titusemeriire kubakaguza omulingo baaseserweho amagita. Kinu tikiri kyaitu kumanya, habwokuba nubo bonka bakimanyire. (1 Bas. 4:11; 2 Bas. 3:11) Kandi titusemeriire kutekereza ngu basaija babo, bakazi babo, abazaire babo rundi abanyabuzaale babo, nabo baseserweho amagita. Omuntu tagwetwa okunihira okw’okugenda omu iguru kuruga ha b’omu ka y’owabu. Okunihira kunu akutunga kuruga hali Ruhanga. (1 Bas. 2:12) Tusemeriire n’okwetantara kukaguza ebikaguzo ebisobora kutabaijura abandi. Ekyokurorraho, titusemeriire kukaguza mukazi w’ow’oruganda anyakuseserweho amagita omulingo arukwehurramu ha kunihira okw’okwikara omu nsi ebiro n’ebiro atali na iba. Nitukigumiza kimu ngu omu nsi empyaka, Yahwe naija “[kwigusa] ekintu kyona ekyomiire ekikigonza.”​—Zab. 145:16.

10. Kweriinda kwegomba abantu, kituliinda kita?

¹⁰ Kakuba twetantara kutwaza abaseserweho amagita nk’abantu ab’omugaso muno kukira abandi naitwe tuba nitweriinda. Omu mulingo ki? Baibuli etugambira ngu abaseserweho amagita abamu basobora kulemwa kwikara bali besigwa. (Mat. 25:10-12; 2 Pet. 2:20, 21) Baitu kakuba twetantara kwegomba abantu, titurukwija kubahondera, otwaliremu abaseserweho amagita, ab’oruganda abamanyirwe muno rundi abaheeriize Yahwe kumara emyaka nyingi. (Yud. 16.) Kandi kakuba balemwa kuliinda obwesigwa bwabo rundi bakaruga omu kitebe, okwikiriza kwaitu omuli Yahwe tikurukwija kuceka rundi tukaleka kumuheereza ngu habwokuba barugire hali Yahwe.

11. Kiki ekikaire nikibaho ha muhendo ogw’abo abarukulya ga mugaati kandi bakanywa ha viini ha kiiro ky’Ekiijukyo?

¹¹ Kumara emyaka nyingi, omuhendo gw’abantu abarukulya ha mugaati kandi bakanywa ha viini gwali nigukeeha. Baitu omu myaka nke enyuma, omuhendo gunu gwikaire nigweyongera buli mwaka. Eki kisemeriire kutweralikiriza? Nangwa. Leka turole habwaki tutasemeriire kweralikirra.

12. Habwaki omuhendo gw’abo abarukulya ha mugaati kandi bakanywa ha viini ha kiro ky’Ekiijukyo gutasemeriire kutweralikiriza?

¹² “[Yahwe] amanyire abe.” (2 Tim. 2:19) Ab’oruganda ababara abantu abaliire ha mugaati kandi baanywa ha viini ha kiro ky’Ekiijukyo baba batamanyire nibaha bonyini abaseserweho amagita baitu Yahwe wenka nuwe amanyire. Nahabweki omuhendo ogu gutwarramu naabo abarukutekereza ngu baseserweho amagita kandi kunu nangwa. Ekyokurorraho, abamu abaalyaga kandi bakanywa bakahika baleka. Abamu  nibasobora kuba baine oburwaire obw’omutwe rundi obw’ebitekereezo ekibaletera kutekereza ngu nibaija kulema na Kristo omu iguru. Amananu gali, titumanyire omuhendo gwonyini ogw’abaseserweho amagita abakyali omu nsi.

13. Baibuli etugambira omuhendo gw’abaseserweho amagita abaliba basigaireho nambere omuhito omwingi guli tandikira?

¹³ Yesu obwaliija kutwara abaseserweho amagita omu iguru, nibaija kuba bali omu biikaro bingi eby’ensi. (Mat. 24:31) Baibuli egamba ngu omu biro ebya ha mpero nihaija kuba haroho omuhendo muke ogw’abaseserweho amagita omu nsi. (Kus. 12:17) Baitu teyoleka omuhendo gwonyini oguliba gusigaireho omuhito omwingi nambere guli tandikira.

14. Nk’oku kyolekerwe omu Abarumi 9:11, 16, kiki ekitusemeriire kwetegereza ha mulingo abaseserweho amagita bakomwamu?

¹⁴ Yahwe nuwe acwamu obwire akomeramu abaseserweho amagita. (Bar. 8:28-30) Yahwe akatandika kukoma abaseserweho amagita hanyuma ya Yesu kuhumbuuka. Nikizooka ngu Abakristaayo boona ab’omu kyasa ky’okubanza, baali baseserweho amagita. Baitu omu byasa ebyahondiireho, baingi abayeyetaga Bakristaayo bakaba batali bahondezi ba Kristo ab’amananu. N’obukiraaba nukwo kiri, omu myaka egi, Yahwe akasesaho amagita abo abaali Bakristaayo ab’amananu. Bakaba bali nk’engano Yesu eyiyabalizeeho ngu ekaba negenda kukurra hamu n’irungu. (Mat. 13:24-30) Omu biro ebya ha mpero, Yahwe aikaire nakoma abantu abaraaba bamu ha 144,000. * Nahabweki, Ruhanga kakuba acwamu kukoma abantu abamu abaraaba bamu ha 144,000 obu nihaburayo akasumi kake empero ehike, nituba tutasemeriire  kugurukyagurukya amagezi ge. (Soma Abarumi 9:11, 16.) * Tusemeriire kwegendereza nukwo tutetwaza nk’abakozi Yesu abayabalizeeho omu kimu ha by’okurorraho bye. Bakabiihirwa habw’omulingo mukama wabo yatwaizeemu abakozi abaizire omu saaha ey’okumalirra.​—Mat. 20:8-15.

15. Abaseserweho amagita boona bali kicweka ‘ky’omwiru omwesigwa kandi ow’amagezi’ arukubazibwaho Matayo 24:45-47? Soborra.

¹⁵ Tibali boona abaine okunihira okw’okugenda omu iguru ngu bali kicweka ‘ky’omwiru omwesigwa kandi ow’amagezi.’ (Soma Matayo 24:45-47.) Nk’oku kikaba kiri omu kyasa ky’okubanza, n’omu kasumi kanu, Yahwe na Yesu nibakozesa ab’oruganda bake kuliisa rundi kwegesa abaingi. Omu kyasa eky’okubanza Abakristaayo bake muno nubo bakozesiibwe kuhandiika Ebyahandiikirwe eby’Oruyonaani. N’omu kasumi kanu Abakristaayo bake muno nubo Ruhanga ahaire obujunaanizibwa obw’okuheereza abantu be “ebyokulya omu kasumi [akasemeriire].”

16. Kiki ekyoyegere omu kicweka kinu?

¹⁶ Ekicweka kinu kikwegeseze ki? Yahwe acwiremu kuha abantu be abarukukira obwingi obwomeezi obutahwaho omu nsi kandi abake abalirema hamu na Yesu balitunga obwomeezi obutahwaho omu iguru. Yahwe aha empeera abaheereza be boona​—“Omuyudaya” hamu ‘n’abantu ikumi,’ kandi nagonza borobere ebiragiro ebyataireho kandi baikale bali besigwa. Boona basemeriire kwikara bali bebundaazi. Boona hamu basemeriire kumuheereza omu bumu. Kandi boona basemeriire kukora n’amaani kwikazaaho obusinge omu kitebe. Nk’oku turukweyongera kwirra haihi n’empero, leka itwena twikale nituheereza Yahwe kandi nituhondera Yesu ‘nk’igana limu.’​—Yoh. 10:16.