NKHANI YAKUSAMBIRA 5
Tikukhumba Kuluta Namwe
“Tikukhumba kuluta namwe, pakuti tapulika kuti Chiuta wali namwe mwaŵanthu imwe.”—ZEK. 8:23.
SUMU 26 Mukachitira Ine
CHILATO CHA NKHANI IYI *
Ŵamberere zinyake (“ŵanthu 10”) mbakukondwa kusopa Yehova pamoza na ŵakuphakazgika (“Muyuda”) (Wonani ndime 1-2)
1. Kasi Yehova wakati ntchivichi chizamuchitika mu nyengo yithu yino?
YEHOVA wakayowoyerathu ivyo vizamuchitika mu nyengo yithu yino, wakati: “Ŵanthu 10 ŵakufuma mu mitundu ya viyowoyero vyose ŵazamukora, enya, ŵazamukoleska munjilira wa Muyuda, na kuyowoya kuti: ‘Tikukhumba kuluta namwe, pakuti tapulika kuti Chiuta wali namwe mwaŵanthu imwe.’” (Zek. 8:23) “Muyuda” uyo wakuyowoyeka apa wakwimira awo Chiuta waŵaphakazga na mzimu utuŵa. Ŵakumanyikwaso kuti “Israyeli wa Chiuta.” (Gal. 6:16) “Ŵanthu 10” ŵakwimira awo ŵali na chigomezgo cha kuzakhala na umoyo wamuyirayira pa charu chapasi. Ŵakumanya kuti Yehova wali kusora gulu la ŵakuphakazgika, ndipo ŵakuwona kuti ni mwaŵi wapadera kusopera lumoza na gulu ili.
2. Kasi “ŵanthu 10” “ŵakuluta” wuli na ŵakuphakazgika?
2 Nangauli vingachitika yayi kumanya zina la wakuphakazgika waliyose pa charu chapasi, * kweni awo ŵali na chigomezgo chakuzakakhala pa charu chapasi ‘ŵangaluta’ lumoza na ŵakuphakazgika. Kasi ŵangaluta wuli? Baibolo likuti “ŵanthu 10 . . . ŵazamukoleska munjilira wa Muyuda, na kuyowoya kuti: ‘Tikukhumba kuluta namwe, pakuti tapulika kuti Chiuta wali namwe mwaŵanthu imwe.’” Nangauli vesi ili likuyowoya vya Muyuda yumoza, kweni mazgu ghakuti “namwe” na ghakuti “mwaŵanthu imwe” ghakuyowoya vya ŵanthu ŵanandi. Ichi chikung’anamura kuti Muyuda ni munthu yumoza yayi, kweni wakwimira gulu lose la ŵakuphakazgika. Awo ŵandaphakazgike ŵakuteŵetera Yehova lumoza na awo ŵali kuphakazgika. Ndipouli, ŵakuwona kuti awo ŵali kuphakazgika ndiwo mbalongozgi ŵawo yayi, chifukwa ŵakumanya kuti Yesu ndiyo ni Mulongozgi.—Mat. 23:10.
3. Kasi nkhani iyi yizgorenge mafumbo wuli?
3 Pakuti pachali Ŵakhristu ŵakuphakazgika pakati pa ŵanthu ŵa Chiuta mazuŵa ghano, ŵanyake ŵangafumba kuti: (1) Kasi ŵakuphakazgika ŵakwenera kujiwona wuli? (2) Kasi awo ŵakurya vimanyikwiro pa Chikumbusko tikwenera kuŵawona wuli? (3) Kasi tikwenera kufipa mtima para chiŵelengero cha awo ŵakurya vimanyikwiro pa Chikumbusko chikukwera? Nkhani iyi yizgorenge mafumbo agha.
KASI ŴAKUPHAKAZGIKA ŴAKWENERA KUJIWONA WULI?
4. Kasi ni chenjezgo wuli ilo lili pa 1 Ŵakorinte 11:27-29 ilo ŵakuphakazgika ŵakwenera kughanaghanirapo chomene, ndipo chifukwa wuli?
4 Ŵakuphakazgika ŵakwenera kughanaghanirapo chomene chenjezgo ilo lili pa 1 Ŵakorinte 11:27-29. (Ŵazgani.) Kasi wakuphakazgika wangarya wuli chingwa na kumwa vinyo “mwambura kwenelera” pa Chikumbusko? Wangachita nthena usange wangarya panji kumwa uku wakupulikira yayi malango gha Yehova. (Heb. 6:4-6; 10:26-29) Ŵakuphakazgika ŵakumanya kuti ŵakwenera kulutilira kugomezgeka para ŵakukhumba kuzakapokera “njombe ya ntchemo yakuchanya iyo Chiuta wakupeleka kwizira mwa Khristu Yesu.”—Fil. 3:13-16.
5. Kasi Ŵakhristu ŵakuphakazgika ŵakwenera kujiwona wuli?
5 Mzimu wa Yehova ukovwira ŵateŵeti ŵake kuti ŵaŵe ŵakujiyuyura, kujitukumura yayi. (Efe. 4:1-3; Kol. 3:10, 12) Ntheura ŵakuphakazgika ŵakujiwona kuti mbapachanya kuluska ŵanyawo yayi. Ŵakumanya kuti Yehova wakuŵapa mzimu utuŵa unandi kuluska ŵateŵeti ŵanyake yayi. Kweniso ŵakujiwona kuti ŵakulipulikiska chomene Baibolo kuluska ŵanyawo yayi. Ndipo ŵakuphalira waliyose yayi kuti nayo waphakazgika ndipo wambepo kurya vimanyikwiro pa Chikumbusko. M’malo mwake, ŵakumanya kuti ni Yehova pera ndiyo wali na udindo wakuchemera ŵanthu kuchanya.
6. Kuyana na 1 Ŵakorinte 4:7, 8, kasi Mkhristu wakuphakazgika wakwenera kuchita wuli?
6 Nangauli ŵakuphakazgika ŵakuwona kuti ni mwaŵi wapadera kuti ŵachemekera kuchanya, kweni ŵakukhazga kuti ŵanyawo ŵaŵapenge ntchindi zapadera yayi. (Fil. 2:2, 3) Kweniso ŵakumanya kuti apo Yehova wakaŵaphakazganga, wakaphalirapo munthu waliyose yayi. Ntheura wakuphakazgika wakuzizwa yayi usange ŵanji ŵakugomezga yayi kuti ngwakuphakazgika nadi. Wakumanya kuti Baibolo likuti tileke kuchimbilira kugomezga munthu uyo wakuti Chiuta wamupa uteŵeti wapadera. (Chivu. 2:2) Mkhristu wakuphakazgika wakukhumba yayi kuti ŵanthu ŵamupenge ntchindi zapadera. Ntheura wakuphalira ŵanthu yayi kuti ngwakuphakazgika, ndipo wakujikuzga yayi chifukwa chakuti ngwakuphakazgika.—Ŵazgani 1 Ŵakorinte 4:7, 8.
7. Kasi ŵakuphakazgika ŵakugega kuchita vichi, ndipo chifukwa wuli?
7 Ŵakhristu ŵakuphakazgika ŵakuwona kuti ŵakwenera kuchezga na ŵakuphakazgika ŵanyawo pera yayi, nga ni para kuti ŵali mu gulu linyake lapadera chomene. Ŵakupenja ŵakuphakazgika ŵanyawo yayi na chilato chakuti ŵakadumbiskane vya kuphakazgika kwawo panji kusambira Baibolo mu magulu ghaŵekha. (Gal. 1:15-17) Mpingo ungaŵa wakukolerana yayi usange ŵangachita nthena. Nakuti kuchita ivi nkhulimbana na mzimu utuŵa wa Chiuta, uwo ukovwira ŵanthu kuŵa pamtende kweniso ŵakukolerana.—Rom. 16:17, 18.
KASI ŴAKUPHAKAZGIKA TIKWENERA KUŴAWONA WULI?
Tikwenera yayi kuŵapa ntchindi zapadera ŵakuphakazgika panji awo ŵakulongozga mu gulu la Yehova (Wonani ndime 8) *
8. Chifukwa wuli tikwenera kuŵa maso na umo tikuwonera awo ŵakurya vimanyikwiro pa Chikumbusko? (Wonaniso mazgu ghamusi.)
8 Kasi tikwenera kuŵawona wuli ŵabali na ŵadumbu ŵakuphakazgika? Ntchiwemi yayi kumupa ntchindi zapadera munthu munyake, nanga wangaŵa kuti ni mubali wakuphakazgika wa Khristu. (Mat. 23:8-12) Para Baibolo likuyowoya vya ŵalara, likutichiska kuti ‘tiyezge chipulikano chawo.’ Kweni likutiphalirapo yayi kuti tikwenera kuwona munthu munyake kuŵa mulongozgi withu. (Heb. 13:7) Mbunenesko kuti Baibolo likuti ŵanyake ŵakwenera ‘kupika ntchindi zikuru.’ Ndipouli, ŵakwenera kupika ntchindi chifukwa chakuti mbakuphakazgika yayi, kweni chifukwa chakuti “ŵakulongozga makora” kweniso “ŵakulimbikira kuyowoya na kusambizga.” (1 Tim. 5:17) Usange ŵakuphakazgika tikuŵalumba mwakutalulira, ŵangajipulika makora yayi. * Chiheni chomene ntchakuti tingaŵapangiska kuti ŵambe kujitukumura. (Rom. 12:3) Nakuti palije yumoza wa ise uyo wangatemwa kuchita vinthu ivyo vingapangiska mubali wa Khristu kuchita ubudi ukuru uwu.—Luka 17:2.
9. Kasi tingalongora wuli kuti tikuŵachindika Ŵakhristu ŵakuphakazgika?
9 Kasi tingalongora wuli kuti tikuchindika awo ŵali kuphakazgika na Yehova? Tileke kuŵafumba umo ŵakaphakazgikira. Iyi ni nkhani ya munthu waliyose payekha, tilije wanangwa pa nkhani iyi. (1 Tes. 4:11; 2 Tes. 3:11) Tikweneraso yayi kughanaghana kuti mfumu panji muwoli, ŵapapi, panji ŵachibali ŵanyake nawo mbakuphakazgika. Munthu wakuchita kuhara yayi kuphakazgika kufuma mu mbumba yakwake, kweni wakuchita kupokera kufuma kwa Chiuta. (1 Tes. 2:12) Tikweneraso kugega kufumba mafumbo agho ghangakhuŵazga ŵanji. Mwachiyelezgero, tikwenera yayi kufumba muwoli wa mubali wakuphakazgika umo wakujipulikira kuzakakhala kwamuyirayira pa charu chapasi kwambura mfumu wake. Nakuti, tikugomezga kuti mu charu chiphya, Yehova ‘wazamukhorweska chamoyo chose.’—Sal. 145:16.
10. Kasi tikujivikilira wuli para tikugega kuwona ŵanthu ŵanyake kuti mbapachanya chomene kuluska ŵanji?
10 Kweniso tikujivikilira usange tikuleka kuŵawona ŵakuphakazgika kuti mbapachanya chomene kujumpha ŵanji. Kasi tikuvikilirika wuli? Baibolo likuti ŵakuphakazgika ŵanyake ŵangatondeka kulutilira kugomezgeka. (Mat. 25:10-12; 2 Pet. 2:20, 21) Usange tagega kuwona ŵanthu ŵanyake kuti mbapachanya chomene kuluska ŵanji, tilondezgenge ŵanthu yayi, nanga mbakuphakazgika, kwali mbakumanyikwa panji awo ŵateŵetera Yehova nyengo yitali. (Yuda 16) Ntheura usange ŵatondeka kugomezgeka, panji ŵaleka kuwungana, tizamuleka yayi kugomezgeka kwa Yehova panji kuleka kumuteŵetera.
KASI TIKWENERA KUFIPA MTIMA NA CHIŴERENGERO CHA AWO ŴAKURYA VIMANYIKWIRO PA CHIKUMBUSKO?
11. Kasi ntchivichi chikuchitika na chiŵelengero cha awo ŵakurya vimanyikwiro pa Chikumbusko?
11 Kwa vyaka vinandi, chiŵelengero cha awo ŵakaryanga vimanyikwiro pa Chikumbusko chikakhiranga. Kweni mu vyaka vyasonosono, chiŵelengero ichi chikukwera chaka chilichose. Kasi ivi vikwenera kutifipiska mtima? Yayi. Tiyeni tidumbiskane fundo zinyake izo tikwenera kumanya pa nkhani iyi.
12. Chifukwa wuli tikwenera kufipa mtima yayi na chiŵelengero cha awo ŵakurya vimanyikwiro pa Chikumbusko?
12 “Yehova wakuŵamanya awo mbake.” (2 Tim. 2:19) Awo ŵakupenda awo ŵarya vimanyikwiro pa Chikumbusko ŵakumanya yayi uyo ngwakuphakazgika nadi, kweni Yehova wakumanya. Ntheura chiŵelengero cha ŵakuphakazgika chikusazgapo na awo ŵakughanaghanira waka kuti mbakuphakazgika. Mwachiyelezgero, ŵanyake awo kale ŵakaryanga na kumwa pa Chikumbusko ŵali kuleka. Ŵanyake ŵali na suzgo la maghanoghano, ŵanyake kamutu nkhakuchimbira, lekani ŵakuwona nga kuti ŵamuwusa na Yesu kuchanya. Kuyowoya unenesko, tikumanya yayi unandi wa ŵakuphakazgika nadi awo ŵachali pa charu chapasi.
13. Kasi Baibolo likuti vichi pa chiŵelengero cha ŵakuphakazgika awo ŵazamuŵapo para suzgo yikuru yikwamba?
13 Ŵakuphakazgika ŵanyake ŵazamuŵa kuti ŵachali pa charu chapasi pa nyengo iyo Yesu wazamwiza kuti waŵatolere kuchanya. (Mat. 24:31) Baibolo likuti mu mazuŵa ghaumaliro, pazamuŵa ŵakuphakazgika ŵachoko waka pa charu chapasi. (Chivu. 12:17) Kweni likuyowoyapo yayi unandi wa ŵakuphakazgika awo ŵazamuŵapo para suzgo yikuru yikwamba.
Kasi tikwenera kumuwona wuli uyo wakurya vimanyikwiro pa Chikumbusko? (Wonani ndime 14)
14. Nga umo pakulongolera pa Ŵaroma 9:11, 16, kasi tikwenera kumanya vichi pa nkhani ya kusoleka kwa ŵakuphakazgika?
14 Yehova ndiyo wakumanya nyengo yakusolera ŵakuphakazgika. (Rom. 8:28-30) Yehova wakamba kusora ŵakuphakazgika pamanyuma pakuti Yesu wawuskika. Vikuwoneka kuti mu nyengo ya Ŵakhristu ŵakwambilira, Ŵakhristu wose ŵaunenesko ŵakaŵa ŵakuphakazgika. Kweni pamanyuma, ŵanandi awo ŵakatenge Mbakhristu, ŵakaŵa ŵatesi. Nangauli ndimo vikaŵira, kweni Yehova wakalutilira kuphakazga Ŵakhristu ŵaunenesko. Ŵakhristu aŵa ŵakaŵa nga ni tirigu uyo Yesu wakati wazamukura pakati pa duru. (Mat. 13:24-30) Mu mazuŵa ghaumaliro agha, Yehova wakulutilira kusora awo ŵamuŵa mu gulu la 144,000. * Ntheura para Chiuta wasankha kuti wasore ŵanyake apo umaliro waneng’enera, tikwenera yayi kukayikira vinjeru vyake. (Ŵazgani Ŵaroma 9:11, 16.) * Tikwenera kuŵa maso kuti tileke kudandawura nga mba ntchito awo Yesu wakaŵayowoya mu ntharika yake. Ŵakadinginyikira bwana wawo chifukwa cha umo wakachitira na ŵantchito awo ŵakiza paumaliro.—Mat. 20:8-15.
15. Kasi ŵakuphakazgika wose ŵali mu gulu la “muzga wakugomezgeka na wavinjeru,” ilo likuzunulika pa Mateyu 24:45-47? Longosorani.
15 Ni wose yayi awo ŵakuluta kuchanya ŵali mu gulu la “muzga wakugomezgeka na wavinjeru.” (Ŵazgani Mateyu 24:45-47.) Nga umo vikaŵira mu nyengo ya Ŵakhristu ŵakwambilira, mazuŵa ghano napo Yehova na Yesu ŵakulyeska panji kusambizga ŵanthu ŵanandi kwizira mu ŵabali ŵachoko waka. Ŵakhristu ŵakuphakazgika ŵachoko waka ndiwo ŵakalemba Malemba gha Chigiriki. Mazuŵa ghano napo, Ŵakhristu ŵakuphakazgika ŵachoko waka ndiwo ŵali na mulimo wakupeleka “chakurya pa nyengo yakwenelera” ku ŵanthu ŵa Chiuta.
16. Kasi mwasambira vichi mu nkhani iyi?
16 Kasi mu nkhani iyi tasambira vichi? Yehova wali kusankha kuti ŵanthu ŵake ŵanandi ŵazakasange umoyo wamuyirayira pa charu chapasi ndipo ŵachoko waka ndiwo ŵakawuse na Yesu kuchanya. Yehova wakupeleka njombe ku ŵateŵeti ŵake wose, awo ŵali mu gulu la “Muyuda” na awo ŵali mu gulu la “ŵanthu 10,” ndipo wakukhumba kuti ŵateŵeti ŵake wose ŵapulikirenge malango ghamoza na kulutilira kugomezgeka. Wose ŵakwenera kuŵa ŵakujiyuyura. Wose ŵakwenera kuteŵetera pamoza kweniso mwakukolerana. Kweniso wose ŵakwenera kuŵikapo mtima kuti mu mpingo mulutilire kuŵa mtende. Apo umaliro ukusendelera, tiyeni tose tilutilire kuteŵetera Yehova na kulondezga Khristu pakuŵa “mskambo umoza.”—Yoh. 10:16.
^ ndime 5 Chaka chino, Chikumbusko cha nyifwa ya Khristu chizamuŵako pa Chiŵiri, Epulero 7. Kasi tikwenera kuŵawona wuli awo ŵakurya vimanyikwiro pa Chikumbusko? Kasi tikwenera kufipa mtima usange chiŵelengero cha awo ŵakurya chikulutilira kukwera? Mafumbo agha ghazgolekenge mu nkhani iyi, iyo yikukolerana na nkhani iyo yili mu Gongwe la Mulinda la Janyuwale 2016.
^ ndime 2 Kuyana na Salimo 87:5, 6, kunthazi, Chiuta wangazakavumbura mazina ghose gha awo ŵamuwusa na Yesu kuchanya.—Rom. 8:19.
^ ndime 8 Wonani bokosi lakuti “Chitemwa ‘Chikuchita Mwambura Kwenelera Yayi’” mu Gongwe la Mulinda la Janyuwale 2016.
^ ndime 14 Nangauli pa Milimo 2:33 pakulongora kuti mzimu ukupungulika kwizira mwa Yesu, kweni Yehova ndiyo wakuchemera munthu kuchanya.
^ ndime 14 Kuti mumanye vinandi, wonani “Mafumbo ghakufuma ku ŵaŵazgi” mu Gongwe la Mulinda la Chicheŵa la Meyi 1, 2007.
SUMU 34 Kwenda mu Urunji
^ ndime 56 MAZGU GHAKULONGOSORA CHITHUZI: Tingalongora ntchindi yayi usange pa ungano tingazingilizga mwimiliri wa ofesi yithu yikuru na muwoli wake kuti tiŵajambure vithuzi.
