1. Ne a pati a Ieova e uiga ki mea ka ‵tupu i ‵tou taimi?

NE ‵VALO mai a Ieova e uiga ki ‵tou taimi: “E tokosefulu tāgata mai i ‵gana katoa o atufenua ka puke ‵mau, ao, ka puke ‵mautakitaki latou ki te gatu ‵loa o te tino Iutaia, kae fai atu: ‘A matou e ma‵nako o olo fakatasi mo koe, me ne ‵logo matou i te Atua e ‵kau fakatasi mo koutou.’” (Saka. 8:23) A te “tino Iutaia” i konei e sui ne ia a latou kolā ne fakaekegina ne te Atua ki te agaga tapu. E fakaigoa foki latou ki “te Isalaelu a te Atua.” (Kala. 6:16) A te “tokosefulu tāgata” e sui ne latou a tino kolā e fakamoe‵moe ke ola i te lalolagi nei ki te se-gata-mai. E iloa ne latou me ne fakamanuia ne Ieova a te potukau tenei o tino fakaekegina kae mafau‵fau me se tauliaga eiloa ke tapuaki atu ki a ia fakatasi mo latou.

2. I te auala fea e “olo fakatasi” ei a te “tokosefulu tāgata” mo te kau fakaekegina?

² E tiga eiloa e se mafai o iloa ne tatou a igoa o tino fakaekegina taki tokotasi i te lalolagi i aso nei, * a latou kolā e fakamoe‵moe ke ola i te lalolagi nei e mafai o “olo fakatasi” mo te kau fakaekegina. I te auala fea? E fai mai te Tusi Tapu me i “te tokosefulu tāgata” ka “puke ‵mautakitaki latou ki te gatu ‵loa o te tino Iutaia, kae fai atu: ‘Matou e ma‵nako o olo fakatasi mo koe, me ne ‵logo matou i te Atua e ‵kau fakatasi mo koutou.’” E fakaasi mai i te fuaiupu o te Tusi Tapu a te tino Iutaia e tokotasi. Kae ko  “koe” mo “koutou” e fakasino atu ki tino e tokouke. E fakauiga i ei me i te Iutaia tenei e sē se tino e tokotasi, kae e sui ne ia a te potukau kātoa o tino fakaekegina. A latou kolā seki fakaekegina e tavini atu ki a Ieova fakatasi mo te kau fakaekegina. Kae e se ‵kilo atu latou ki tino fakaekegina e pelā me ko olotou takitaki, me e iloa ne latou me ko Iesu eiloa te lotou Takitaki.—Mata. 23:10.

3. Ne a fesili ka tali aka ne tatou i te mataupu tenei?

³ Ona ko te mea koi isi eiloa ne Kelisiano fakaekegina e ‵nofo mo tino o te Atua i aso nei, e mafai o mafau‵fau nisi tino penei: (1) E ‵tau o pefea te kilokiloga a te kau fakaekegina ki a latou eiloa? (2) E ‵tau o pefea ‵tou faifaiga ki a latou kolā e fakaaoga ne latou a mea fakatusa i te Fakamanatuga? (3) E mata, e ‵tau o manava‵se tatou ki te fanakaga o te aofaki o tino kolā e fakaaoga ne latou a mea fakatusa? Ka tali mai i te mataupu tenei a tali o fesili konā.

4. Se a te faka‵pulaga i te 1 Kolinito 11:27-29 e ‵tau o mafau‵fau faka‵lei ki ei a tino fakaekegina, kae kaia?

⁴ E ‵tau mo tino fakaekegina o mafaufau ‵loto ki te faka‵pulaga telā e fakaasi mai i te 1 Kolinito 11:27-29. (Faitau.) E mafai pefea ne se tino fakaekegina o fakaaoga a mea fakatusa i te  Fakamanatuga i se auala “sē ‵tau”? Ka fai eiloa a ia penā māfai ne kai kae inu ki mea fakatusa kae e se ola e ‵tusa mo tulaga amio‵tonu o Ieova. (Epe. 6:4-6; 10:26-29) E iloa ne tino fakaekegina me e ‵tau mo latou o tumau i te fakamaoni, māfai e ma‵nako latou ke maua a “te failoga o te kalagaga ki te lagi mai te Atua e auala i a Keliso Iesu.”—Fili. 3:13-16.

5. E pefea a lagonaga o Kelisiano fakaekegina e uiga ki a latou eiloa?

⁵ A te agaga tapu o Ieova e fesoasoani atu ki ana tavini ke loto maulalo, kae ke sē fakamata‵mata. (Efe. 4:1-3; Kolose 3:10, 12) Tela la, e se mafau‵fau a tino fakaekegina me i a latou e ‵lei fakafia atu i nisi tino. E iloa ne latou me e se sili atu te agaga tapu e maua ne latou mai i a Ieova i lō nisi tavini. E se mafau‵fau latou me e ‵poko atu te lotou malamalama i muna‵tonu i te Tusi Tapu i lō so se tino. Kae ka se fai atu latou ki se isi tino me i a ia foki ko oti ne fakaekegina kae ko ‵tau o fakaaoga ne ia a mea fakatusa i te Fakamanatuga. I lō te fai penā, e fakailoa atu ne latou mo te loto maulalo me ko Ieova fua e ‵kami ne ia a tino ke olo ki luga i te lagi.

6. E ‵tusa mo te 1 Kolinito 4:7, 8, e ‵tau o pefea a faifaiga a Kelisiano fakaekegina ki a latou eiloa?

⁶ E tiga eiloa e mafau‵fau a te kau fakaekegina me se tauliaga gali ke maua se ‵kamiga ke olo atu ki luga i te lagi, e se fakamoe‵moe eiloa latou ke maua se fakaaloaloga fakapito mai nisi tino. (Fili. 2:2, 3) E iloa foki ne latou me ko Ieova eiloa ne fakaekegina ne ia latou, e se fakailoa atu ne ia ki tino katoa. Tela la, e se ‵tau o poi se tino fakaekegina māfai e se tali‵tonu a nisi tino me ko oti ne fakaekegina latou ki te agaga tapu. E iloa ne ia me e fakailoa mai te Tusi Tapu ke mo a e tali‵tonu vave ki tino kolā e fai mai me ko oti ne filifiligina latou ne te Atua. (Faka. 2:2) Ke mo a e ‵saga fakapitoa atu a tino ki a ia, e se manako se Kelisiano fakaekegina o fakamatala atu ki tino e fetaui mo ia mō te taimi muamua me i a ia se tino fakaekegina. Kae e mautinoa eiloa me ka sē fakamatamata a ia o fakailoa atu ki nisi tino.—Faitau te 1 Kolinito 4:7, 8.

7. Ne a mea e ‵tau o ‵kalo kea‵tea mai i ei a tino fakaekegina, kae kaia?

⁷ E se ‵tau o mafau‵fau a Kelisiano fakaekegina me e ‵tau o fakamāumāu fua olotou taimi mo nisi tino fakaekegina, ona i a latou e ma‵luga atu i nisi tino. E se ‵sala atu latou ki nisi tino fakaekegina, ko te mea ke sau‵tala ki te auala ne fakaekegina ei latou io me faka‵tu aka ne potukau mō sukesukega faka-te-Tusi Tapu. (Kala. 1:15-17) E se mafai eiloa o ‵kau fakatasi a te fakapotopotoga māfai e fai ne tino fakaekegina a mea konā. Ka ‵teke atu latou ki te galuega a te agaga tapu, telā e fesoasoani atu ki tino o te  Atua ke maua te filemu mo te ‵kau fakatasi.—Loma 16:17, 18.

8. Kaia e ‵tau ei o fakaeteete tatou e uiga ki ‵tou faifaiga ki a latou kolā e fakaaoga a mea fakatusa i te Fakamanatuga? (Ke onoono foki ki te fakamatalaga mai lalo.)

⁸ E ‵tau o pefea ‵tou faifaiga ki taina mo tuagane fakaekegina? Se mea ‵se ke fakamaluga ne tatou se tino, faitalia i a latou ne taina fakaekegina o Keliso. (Mata. 23:8-12) E uiga ki toeaina, e fakamalosi mai te Tusi Tapu ki a tatou ke “fakaakoako ki te lotou fakatuanaki,” kae e se fai mai me e mafai ne tatou o fai so se tino mo fai ‵tou takitaki. (Epe. 13:7) E tonu, me e fai mai te Tusi Tapu ke “fakalasi aka te āva” ki nisi tino. Me e “fai ne latou te takitakiga i se auala ‵lei” kae e “ga‵lue malosi i te fai‵pati mo te faiga o akoakoga,” kae e se ona ko latou ne fakaekegina. (1 Timo. 5:17) Kafai e tavae kae ‵saga fakapitoa atu tatou ki tino fakaekegina, e mafai eiloa o ‵mā latou. * Kae sili atu la i te masei, me e mafai o fakamalosi aka ne tatou a te fakamatamata i a latou. (Loma 12:3) E seai se tino i a tatou e manako o fai so se mea telā e fai ei ke fai ne se taina fakaekegina o Keliso se mea ‵se matagā!—Luka 17:2.

9. E mafai pefea o fakaasi atu ne tatou me e āva tatou ki Kelisiano fakaekegina?

⁹ E mafai pefea o fakaasi atu ne tatou te āva ki a latou kolā ne fakaeke ne Ieova? E se ‵tau o ‵sili atu ne tatou a fesili e uiga ki te auala ne fakaeke ei latou. A te mea tenei se mea totino loa, telā e seai lele eiloa se ‵tou fekau ke iloa ne tatou. (1 Tesa. 4:11; 2 Tesa. 3:11) E se ‵tau o mafau‵fau tatou me i olotou avaga, mātua mo olotou nisi kāiga ne tino fakaekegina foki. E se maua ne te tino a te fakamoemoega faka-te-lagi tenei mai i tena kāiga. E maua ne ia mai te Atua. (1 Tesa. 2:12) E ‵tau foki o ‵kalo keatea tatou mai te ‵sili atu o fesili kolā e mafai o fakafanoanoa atu ki nisi tino. Pelā me se fakaakoakoga, ka se ‵sili atu tatou ki se avaga a se taina fakaekegina e uiga ki ana lagonaga ki te fakamoemoega ke ola i te lalolagi nei ki te se-gata-mai e aunoa mo tena avaga. Tela la, e mafai o tali‵tonu tatou me i te lalolagi fou, a Ieova ka “fakama‵lie ne [ia] a manakoga o mea ola katoa.”—Sala. 145:16.

10. I te auala fea e puipui ne tatou a tatou eiloa māfai e ‵kalo kea‵tea mai te “tavae” faeloa se tino?

¹⁰ Kafai e se fakatāua ne tatou a tino fakaekegina ke tāua atu i nisi tino, ko puipui ne tatou a tatou eiloa. Kaia? E fai mai te Tusi Tapu me i nisi tino fakaekegina e mafai o se tumau i te fakamaoni. (Mata. 25:10-12; 2 Pe. 2:20, 21) Kae kafai e ‵kalo kea‵tea tatou mai te “tavae” faeloa se tino, ka se tau‵tali eiloa tatou i nisi tino, ke oko foki loa ki tino fakaekegina io me ko latou kolā e lauiloa io me ko latou kolā ko leva ne tavini atu ki a Ieova. (Iuta 16) Kae kafai ko sē fakamaoni latou io me tiakina te fakapotopotoga, kae ka sē galo atu loa ‵tou fakatuanaki io me fakagata a te ‵tou taviniga ki a ia.

11. Se a te mea ne tupu ki te aofaki o latou kolā e fakaaoga a mea fakatusa i te Fakamanatuga?

¹¹ I se fia tausaga, ne fanaifo eiloa ki lalo a te aofaki o tino kolā ne fakaaoga a mea fakatusa i te Fakamanatuga. Kae i tausaga fakamuli nei, ko lavea atu te fanakaga o te aofaki i tausaga katoa. E mata, e ‵tau o manava‵se tatou e uiga ki te mea tenei? Ikai. Ke na sau‵tala nei tatou ki nisi pogai tāua e ‵tau o masaua ne tatou.

12. Kaia e se ‵tau ei o manava‵se tatou ki te aofaki o latou kolā e fakaaoga a mea fakatusa i te Fakamanatuga?

¹² “E iloa ne Ieova ana tino.” (2 Timo. 2:19) E se pelā mo Ieova, a taina kolā e lau ne latou te aofaki o tino kolā e fakaaoga a mea fakatusa i  te Fakamanatuga e se mautinoa i a latou me ko oi tonu eiloa ko oti ne fakaekegina. Tela la a te aofaki e aofia ei a tino kolā e mafau‵fau i a latou ko oti ne fakaekegina, kae e se fai loa penā. E pelā me se fakaakoakoga, nisi kolā ne fakaaoga muamua ne latou ko oti ne taofi. Nisi tino kāti e ma‵saki ki olotou mafaufau io me ko mea tau lagonaga, kae tali‵tonu latou me ka pule fakatasi latou mo Keliso i te lagi. E manino ‵lei, me e se mautinoa tonu i a tatou a te aofaki o tino fakaekegina kolā koi ‵toe i te lalolagi nei.

13. E mata, e fakaasi mai i te Tusi Tapu a te aofaki o tino fakaekegina kolā ka ‵toe mai i te lalolagi nei māfai ko kamata a te fakalavelave lasi?

¹³ Ka isi eiloa ne tino fakaekegina i feitu katoa o te lalolagi i te taimi e vau ei a Iesu o fakamaopoopo latou ki te lagi. (Mata. 24:31) E fai mai te Tusi Tapu me i aso fakaoti, se aofaki foliki fua o tino fakaekegina ka ‵toe mai i te lalolagi nei. (Faka. 12:17) Kae e se fakaasi mai i ei a te aofaki o latou kolā ka ‵toe mai māfai ko kamata a te fakalavelave lasi.

14. E pelā mo te mea ne fakaasi mai i te Loma 9:11, 16, ne a mea e ‵tau o malamalama tatou i ei e uiga ki te filifiliga o tino fakaekegina?

¹⁴ E fakaiku ne Ieova a te taimi ka filifili ne ia a tino fakaekegina. (Loma 8:28-30) Ne kamata o filifili ne Ieova a tino fakaekegina mai tua o te toetuga o Iesu. E foliga mai me i te senitenali muamua, a Kelisiano ‵tonu katoa ne fakaekegina. I se fia selau tausaga mai tua, a te tokoukega o latou kolā ne fai pelā me i a latou ne Kelisiano ne seki tau‵tali atu eiloa i a Keliso. E se gata i ei, i tausaga konā, ne fakaeke ne Ieova nāi tino kolā ne fai mo Kelisiano ‵tonu. Ne fai eiloa latou pelā mo saito kolā ne fai mai a Iesu me ka ola tasi aka mo mouku ma‵sei. (Mata. 13:24-30) I aso fakaoti, e tumau eiloa a Ieova i te filifili  ne ia a latou kolā ka aofia i te toko 144,000. * Tela la, kafai e fakaiku aka ne te Atua ke filifili ne ia a nisi tino mō te tauliaga tenā mai mua o oko mai te gataga, e mautinoa eiloa me e se ‵tau o fakafesili aka ne tatou a tena poto. (Faitau te Loma 9:11, 16.) * E ‵tau mo tatou o fakaeteete ke mo a ma fai tatou e pelā mo tino ga‵lue kolā ne fakamatala mai ne Iesu i se tasi o ana tala fakatusa. Ne fā‵meo latou e uiga ki te auala ne saga atu ei a te matai ki a latou kolā ne ga‵lue fakamuli.—Mata. 20:8-15.

15. E mata, a tino fakaekegina katoa e aofia i te “tavini fakamaoni kae poto,” telā ne fakasae mai i te Mataio 24:45-47? Fakamatala mai.

¹⁵ E se ko tino katoa e fakamoe‵moe ke ola i te lagi e aofia i te “tavini fakamaoni kae poto.” (Faitau te Mataio 24:45-47.) E pelā mo mea ne fai i te senitenali muamua, e fakaaoga fua ne Ieova mo Iesu i aso nei a nāi taina ke fagai, io me akoako a te tokoukega. Ne nāi Kelisiano fakaekegina fua i te senitenali muamua ne fakaaoga ke tusi ne latou a te Tusi Tapu i Tusitusiga Eleni. I aso nei, ne nāi Kelisiano fakaekegina fua e maua ne latou te tiute ke fakasoa mai ne latou ki tino o te Atua a “mea‵kai i te taimi tonu.”

16. Ne a mea ne tauloto ne koe mai te mataupu tenei?

¹⁶ Ne a mea ne tauloto ne tatou mai te mataupu tenei? Ko oti ne fakaiku aka ne Ieova ke tuku mai ne ia a te fakamoemoega ko te ola se-gata-mai i te lalolagi nei ki te tokoukega o ana tino, kae tuku atu te ola i te lagi ki nāi tino fua kolā ka pule fakatasi mo Iesu. E fakamanuia ne Ieova ana tavini katoa—te “Iutaia” pelā foki mo te “tokosefulu tāgata”—kae e manako a ia ko latou ke faka‵logo ki tulafono konā kae tumau i te fakamaoni. E ‵tau mo tino katoa o loto maulalo. E ‵tau mo latou katoa o tavini fakatasi atu ki a ia kae ‵kau fakatasi. Kae e ‵tau mo latou katoa o ga‵lue ke fakatumau te filemu i te fakapotopotoga. I te taimi ko pilipili atu ei tatou ki te gataga, ke na tumau eiloa i te tavini atu ki a Ieova kae tau‵tali atu i a Keliso e pelā me se “lafu mamoe e tasi.”—Ioa. 10:16.