1. Мар азьло ик вераз Иегова асьме нуналъёс сярысь?

 ИЕГОВА асьме нуналъёс сярысь азьло ик вераз: «Вань кылъёсын вераськись калыкъёс пӧлысь дас мурт басьтӥськоз, иудей пилэн дӥсянэзлэн сӧзы бордаз кутӥськозы но шуозы: „Ми тон сьӧры мыномы, уго кылӥмы, Инмар тӥ пӧлын улэ шуыса“» (Зах. 8:23). Та кылбурын «иудей пи» возьматэ соосты, кинъёсты Иегова святой духеныз зырӟиз. Соос «Инмарлэн израиль калыкез» шуыса нимамын (Гал. 6:16). «Дас мурт» — со адямиос, кудъёсызлэн музъем вылын пырак улыны осконзы вань. Соос тодо, зырӟем христианъёсты Иегова бырйиз шуыса, но соосын ӵош ужан-тыршонэз дано ужен лыдъяло.

2. Кызьы валано, «дас мурт» зырӟем христианъёсын ӵош «мыныны» быгато шуыса?

² Музъем вылын улӥсь вань зырӟем христианъёсты туннэ нимзыя тодыны уг луы ке но, адямиос, кудъёсыз музъем вылын улыны оско, соосын ӵош «мыныны» быгато b. Кызьы? Библиын гожтэмын: «Дас мурт басьтӥськоз, иудей пилэн дӥсянэзлэн сӧзы бордаз кутӥськозы но шуозы: „Ми тон сьӧры мыномы, уго кылӥмы, Инмар тӥ пӧлын улэ шуыса“». Татын одӥг иудей пи сярысь вераське ке но, «тӥ пӧлын» кылъёс возьмато, вераськон одӥг гинэ зырӟем мурт сярысь уг мыны шуыса, нош кӧня ке зырӟем христианъёс сярысь. Соос, кинъёс зырӟемын ӧвӧл, зырӟем христианъёсын ӵош огкылысь ужало-тыршо. Озьы  ке но зырӟем муртъёсты соос азьветлӥсьёсынызы уг лыдъяло, нош валало, Иисус Христос сьӧры мыныны кулэ шуыса (Матф. 23:10).

3. Кыӵе юанъёсты ми та статьяын эскеромы?

³ Зырӟем христианъёс асьме нуналъёсы музъем вылын уло на бере, куд-ог юанъёс кылдо: 1) Кызьы зырӟем христианъёслы асьсэ шоры учкыны кулэ? 2) Кызьы учконо соос шоры, кинъёс Тодэ ваён ӝытанын нянез сиё но винаез юо? 3) Кулэ-а сюлмаськыны, сыӵе христианъёс тросгес луо шуыса? Ойдолэ та юанъёслы валэктонъёсты эскеромы.

4. 1 Коринфъёслы 11:27—29 лыдэ басьтоно ке, мар вылын умой малпаськоно зырӟем христианъёслы но малы?

⁴ Зырӟем христианъёслы умой малпаськоно алон вылын, кудӥз гожтэмын 1 Коринфъёслы 11:27—29 (лыдӟе). Кыӵе учыре вераны луоз, зырӟем христиан мурт Ӝытанын «нокыӵе кариськытэк» нянез сиыны но винаез юыны кутске шуыса? Озьы луыны быгатэ, куке Ӝытанын со нянез но винаез веръя, нош ачиз Инмарлэн шонерлыко курон-косонъёсызъя уг улы (Евр. 6:4—6; 10:26—29). Зырӟем христианъёс  валало, соослэн «Иисус Христос пыр... Инмысь кузьым» басьтэмзы потэ ке, соослы Иеговалы оскымон кылёно шуыса (Флп. 3:13—16).

5. Кызьы зырӟем христианъёслы асьсэ шоры учкыны кулэ?

⁵ Иеговалэн святой духез христиан муртъёслы зӥбыт-востэм луыны юрттэ, нош вылтӥяськись луыны уг (Еф. 4:1—3; Кол. 3:10, 12). Соин ик зырӟем христианъёс асьсэды мукетъёсызлэсь умоесьгес уг лыдъяло. Соос валало, музъем вылын улыны оскись христианъёсын ӵошатыса, Иегова святой духсэ соослы одно ик тросгес уг сёты шуыса. Та христианъёс уг малпало, Библиысь зэмлыкъёсты умойгес валало шуыса. Озьы ик мукетъёсызлы уг верало, соос но святой духен зырӟемын но соослы Ӝытанын нянез но винаез веръяны кулэ шуыса. Соос зӥбыт-востэмен валало: Иегова гинэ быръе, кинъёс адямиос пӧлысь инме тубозы.

6. 1 Коринфъёслы 4:7, 8 верамъя, кызьы асьсэды возёно зырӟем христианъёслы?

⁶ Инмын улыны оскон зырӟем христианъёс понна туж бадӟым дан ке но, соос уг возьмало, соосты мед данъялозы шуыса (Флп. 2:2, 3). Зырӟем христианъёс тодо, Иегова, соослы святой духсэ сётыкуз, мукетъёсызлы та сярысь уг вера шуыса. Соин ик соос уг паймо, куке куд-огъёсыз соку ик уг оско, соослэн инмын улыны осконзы вань шуыса. Со интые, соос тодазы возё Библиысь визь-кенешез: соку ик осконо ӧвӧл, куке кин ке но вера, Инмар сое нимысьтыз ужез быдэстон понна бырйиз шуыса (Усьт. 2:2). Асьсэлы мултэс саклык медаз висъялэ шуыса, зырӟем христианъёс, адямиен нырысетӥзэ пумиськыкузы ик, инмын улыны осконзы сярысь уз вераське. Озьы ик соос уз ушъяське, соосты Инмар бырйиз шуыса. (Лыдӟе 1 Коринфъёслы 4:7, 8.)

7. Малэсь палэнско зырӟем христианъёс но малы?

⁷ Зырӟем вын-агайёс но сузэр-апайёс асьсэды нимо-дано адямиосын уг лыдъяло но уг малпало, мукет зырӟем христианъёсын гинэ дырзэс ортчытъяно шуыса. Осконзы сярысь вераськон понна яке Библиез эскеронъя нимысьтыз группа кылдытон понна, соос уг утчало мукет христианъёсты, кудъёсыз верало, соослэн инмын улыны осконзы вань шуыса (Гал. 1:15—17). Озьы соос кенеше люкиськонъёс пыртысалзы но пумит мынысалзы святой духлы, кудӥз Инмарлэн калыкезлы тупаса но огкылысь улыны юрттэ (Рим. 16:17, 18).

8. Малы эскероно сое, кызьы ми учкиськомы соос шоры, кинъёс Ӝытанын нянез но винаез веръяло? (Озьы ик учке сноскаез.)

⁸ Кызьы милемлы учконо зырӟем христианъёс шоры? Шонертэм луысал адямиосты вылӥе пуктыны, соос Христослэн зырӟем вын-агайёсыз луо ке но (Матф. 23:8—12). Кылсярысь, Библия мылкыдмес ӝутэ тӧроослэсь оскемзэс адӟем карыны, озьы ке но со уг дышеты, кыӵе ке адямиез вылӥе пуктыны (Евр. 13:7). Зэм но, Библиын вераське, куд-огъёссэ «нимысьтыз сӥлы карыны кулэ» шуыса. Со озьы, малы ке шуоно соос ужзэс ӟеч нуо но Инмар кылэз тыршыса тодыто но дышето (1 Тим. 5:17). Ми зырӟем христианъёсты данъямы ке яке соослы укыр трос саклыкмес висъямы ке, соослы со умой уз поты, вылды c. Со сяна, соослэн вылтӥяськон сямзы потыны быгатоз (Рим. 12:3). Милям уг поты, асьмеды шонертэм воземмы сэрен, Христослэн вын-агайёсыз пӧлысь кин ке бадӟым янгыш мед лэсьтоз шуыса! (Лука 17:2).

9. Кызьы зырӟем христианъёслы гажаммес возьматоно?

⁹ Кызьы гажаммес возьматоно соослы, кинъёсты Иегова инмын улон понна бырйыны малпаз? Кылсярысь, соослэсь юано ӧвӧл, кызьы соос зырӟем христианъёс луизы. Со соослэн ужзы, но со сярысь тодыны милям правомы ӧвӧл (1 Фес. 4:11; 2 Фес. 3:11). Озьы ик ми ум малпалэ, зырӟем христиан муртлэн анай-атаез, кузпалыз яке мукет ӵыжы-выжыосыз но инмын улыны оско шуыса. Адямилы инмын улыны оскон семьяезлэсь уг выжы. Сое Инмар сётэ (1 Фес. 2:12). Со сяна, зырӟем христиан муртлэсь картсэ яке кышнозэ ёртоно ӧвӧл юанъёсын со сярысь, мае соос шӧдо, куке малпасько, музъем вылын пырак дауръёс ӵоже кузпалзытэк улозы шуыса. Сыӵе вераськонъёс вӧсь карыны быгато. Озьы ик ми быдэсак оскиськомы, выль дуннеын Иегова «вань улэп макеосты, ваньзэс тыр» кароз шуыса (Пс. 144:16).

10. Малэсь ми асьмеды утёмы, адямиосты нимо-даноен ӧм лыдъялэ ке?

¹⁰ Соос, кинъёс зырӟем христианъёс шоры шонер учко, асьсэды бадӟым кышкытлыклэсь утё. Кыӵе? Библия алэ, куд-ог зырӟем христианъёс осконлэсь куштӥськыны быгато шуыса (Матф. 25:10—12; 2 Пётр 2:20, 21). Мукетъёссэ нимо-даноен ӧм лыдъялэ ке, ми ноку но ум мынэ адями сьӧры, со зырӟем вын-агай, тодмо христиан мурт яке Инмарлы кема дыр ӵоже ужась-тыршись Адӟись-Ивортӥсь луэ ке но. Соку, со малпамтэ шорысь оскымон ӧз луы ке но кенешысь кошкиз ке, милям Иеговалы осконмы уз лябӟы но ми солы ужамысь-тыршемысь ум дугдэ.

11. Кызьы вошъяськылӥз Ӝытанын нянез но винаез веръясьёслэн лыдзы?

¹¹ Трос дасо аръёс ӵоже Тодэ ваён ӝытанын нянез но винаез веръясьёслэн лыдзы ӧжытгес но ӧжытгес луэ вал. Нош берло аръёсы ми мукет югдурез чакласькомы: соослэн лыдзы будэ. Кулэ-а милемлы со понна сюлмаськыны? Кулэ ӧвӧл. Ойдолэ эскеромы малы.

12. Малы сюлмаськоно ӧвӧл, Ӝытанын нянез но винаез веръясьёс тросгес луо шуыса?

¹² «Аслэсьтызъёссэ Кузё-Инмар тодма» (2 Тим. 2:19). Иеговаен ӵошатыса, вын-агайёс,  кудъёсыз Ӝытанын нянез но винаез веръясьёсты лыдъяло, уг тодо, кинлэн соос пӧлысь зэмзэ но инмын улыны осконэз вань. Соин ик та лыдпусэ пыро соос но, кинъёс янгышаса малпало, соос святой духен зырӟемын шуыса. Кылсярысь, дыр ортчыса, куд-огез сыӵе адямиос Ӝытанын нянез но винаез веръямысь дугдӥзы. Мукетъёсыз психической яке эмоциональной висёнзы сэрен малпаны кутскизы, соос Христосэн ӵош инмын кивалтозы шуыса. Кызьы адӟиське, пыр-поч вераны уг луы, кӧня зырӟем христианъёс музъем вылын уло на.

13. Гожтэмын-а Библиын, кӧня зырӟем христианъёс музъем вылын луозы, бадӟым куректон кутскыку?

¹³ Куке Иисус лыктоз, зырӟем христианъёсты инме басьтон понна, соос музъемлэн пӧртэм палъёсаз луозы (Матф. 24:31). Библиын верамын, та дуннелэн берпум нуналъёсаз музъем вылын кӧня ке зырӟем христианъёс луозы шуыса (Усьт. 12:17, ВД). Нош отын гожтэмын ӧвӧл, кӧня соос луозы, бадӟым куректон кутскыку.

14. Римъёслы 9:11, 16 верамъя, мае валаны кулэ зырӟем христианъёсты быръён пумысен?

¹⁴ Иегова ужпум кутэ, ку бырйыны зырӟем христианъёсты (Рим. 8:28—30). Инмар зырӟем христианъёсты бырйыны кутскиз, Иисуслэн улӟемез бере. Нырысетӥ даурын вань зэмос христианъёс зырӟемын вал, дыр. Нош берло дыре тросэз соос пӧлысь, кинъёс веразы, Христос сьӧры мыно шуыса, зэмзэ вераса, Христослэн дышетскисьёсыз ӧй вал. Та шоры учкытэк, Иегова со дыре но святой духеныз зырӟылӥз соосты, кинъёс солы оскымон ужазы-тыршизы. Соосты пыртыны луэ «чабей» пӧлы,  кудӥз, Иисуслэн верамезъя, жуг-жаг пӧлын будӥз (Матф. 13:24—30). «Берпум аръёсы» Иегова азьланьтӥз бырйыны соосты, кинъёс 144 000 пӧлы пырозы d. Соин ик, Инмар та дыр йылпумъяськон азьын инмын улыны кинэ ке бырйыны ужпум кутӥз ке, милемлы малпано ӧвӧл, Инмар визьмо лэсьтӥз-а, ӧз-а шуыса. (Лыдӟе Римъёслы 9:11, 16.) e Милемлы палэнсконо со ужасьёслэн мылкыдзылэсь, кудъёсыз сярысь Иисус одӥг мадёназ вераз. Соос ӝожтӥськыса улӥзы со понна, кыӵе уждун тыриз виноград бакчалэн кузёез одӥг час ӵоже гинэ ужасьёслы (Матф. 20:8—15).

15. Вань зырӟем христианъёс-а «оскиськымон, визьмо ляльчи» луо, кудӥз сярысь вераське Матфейлэсь 24:45—47? Валэктэ.

¹⁵ Ваньзы, кинъёс инмын улыны оско, «оскиськымон, визьмо ляльчи» уг луо. (Лыдӟе Матфейлэсь 24:45—47.) Нырысетӥ даурын кадь ик, туннэ Иегова но Иисус сюдо, яке дышето, троссэ ӧжытэз пыр. Нырысетӥ даурын святой духен зырӟем куд-ог христианъёс гинэ Христиан Грек Гожтэмъёсты гожъянэ пыриськизы. Туннэ «ас дыраз сиён» сётъяны куд-ог зырӟем христианъёс гинэ косэмын.

16. Мае тӥ тодӥды та статьяысь?

¹⁶ Озьыен, мае ми тодӥмы та статьяысь? Иегова ужпум кутӥз ужась-тыршисьёсыз пӧлысь тросэзлы музъем вылын пырак улон сётыны, нош инмын улон — соослы гинэ, кинъёс Иисусэн ӵош кивалтозы. Иегова бакель кароз вань ужась-тыршисьёссэ — кызьы «иудей пиез», озьы ик «дас муртэ» но. Но со возьма, ваньзы соос одӥг курон-косонъёслэсь кылзӥськозы но солы оскымон кылёзы шуыса. Милемлы ваньмылы зӥбыт-востэм луоно. Ми ӵош ужаны-тыршыны но огкылысь улыны кулэ. Но милемлы ваньмылы кенешын тупаса улонэз возёно. Та берпум аръёс ӝоген йылпумъяськозы бере, ойдолэ Иеговалы ужаломы-тыршомы но Христос сьӧры «одӥг уллё» кадь мыномы (Иоанн 10:16).