1. Die yen Jihova tare nẹ ọ cha phia vwẹ ọke rẹ avwanre na?

JIHOVA tare nẹ vwẹ ọke rẹ avwanre nana, “eshare ihwe che ne ẹgborho rẹ ephẹre kephẹrẹ rhe cha yọnre ewun rẹ ohwo rẹ Ju, ta nẹ, Jẹn avwanre nene uwe, kidie [avwanre] nyori nẹ Ọghẹnẹ vẹ ovwan herọ.” (Zek. 8:23) “Ohwo ri Ju” na mudiaphiyọ ihwo rẹ Ọghẹnẹ vwẹ ẹwẹn ọfuanfon rọyen vwọ jẹreyọ na. E ji se ayen “Izrẹl rẹ Ọghẹnẹ.” (Gal. 6:16) “Eshare ihwe” na de rhe mudiaphiyọ ihwo ri vwo iphiẹrophiyọ rẹ ayen vwọ dia otọrakpọ na bẹdẹ. Ayen riẹnre nẹ Jihova ku ebruphiyọ rọyen ku ẹko rẹ ihwo ra jẹreyọ na, ayen ji no nẹ ọyen ọghọ rode rẹ ayen vwo kuomakugbe ihwo nana vwọ ga Jihova.

2. Idjerhe vọ yen “eshare ihwe” na vwo “nene” ihwo ra jẹreyọ na?

² Dede nẹ a cha sa riẹn odẹ ọvuọvo rẹ ihwo ra jẹreyọ rehẹ otọrakpọ na nonẹna-a, * jẹ ihwo ri vwo iphiẹrophiyọ re vwọ dia otọrakpọ na se “nene” ayen. Vwẹ idjerhe vọ? Baibol na tare nẹ “eshare ihwe” cha “yọnre ewun rẹ ohwo rẹ Ju, ta nẹ, Jẹn avwanre nene uwe, kidie [avwanre] nyori nẹ Ọghẹnẹ vẹ ovwan herọ.” Ẹkpo ri Baibol nana djunute ohwo ri Ju. Ẹkẹvuọvo, eta na “uwe” vẹ “ovwan,” djerephia nẹ ọ ghwa dia ohwo ọvo-o. Ọtiọyena, ohwo ri Ju na mudiaphiyọ ẹko rẹ ihwo ra jẹreyọ na eje. Igegede ri chekọ na kuomakugbe ihwo nana ga Jihova. Ayen ni ihwo ra jẹreyọ na kerẹ isu-un, kidie ayen  riẹnre nẹ Jesu yen Osun rẹ avwanre.—Mat. 23:10.

3. Enọ vọ yen a cha kpahenphiyọ vwẹ uyono nana?

³ Rọ vwọ dianẹ Inenikristi ra jẹreyọ jehẹ ohri rẹ ihwo rẹ Ọghẹnẹ nonẹna, ihwo evo se roro: (1) Ẹro vọ yen ofori nẹ ihwo ra jẹreyọ na vwo ni oma rayen? (2) Ẹro vọ yen ofori ne avwanre vwo ni ihwo re riemu ovwọnvwọn na? (3) Siẹrẹ uchunu rẹ ihwo re riemu ovwọnvwọn na de buẹnphiyọ, ofori ọnana vwo kpokpo ẹwẹn rẹ avwanre? A cha mrẹ ẹkpahọnphiyọ rẹ enọ nana vwẹ uyono nana.

4. Orhọ-esio vọ ra mrẹ vwẹ 1 Kọrẹnt 11:27-29 yen ihwo ra jẹreyọ na nabọ roro kokodo kpahen, kẹ diesorọ?

⁴ Ofori nẹ ihwo ra jẹreyọ na nabọ roro kokodo kpahen orhọ-esio rọhẹ 1 Kọrẹnt 11:27-29. (Se.) Mavọ yen ohwo ra jẹreyọ sa vwọ riemu ovwọnvwọn na “vwẹ idjerhe ro je fo”? Ọ da dianẹ o yerẹn akpọ nene uwan ọgbagba ri Jihova-a, jọ riemu ovwọnvwọn na, kọyen ọ riọ vwẹ idjerhe ro je fo. (Hib. 6:4-6; 10:26-29) Ihwo ra jẹreyọ na riẹnre nẹ ayen cha sẹro rẹ  evun-ẹfuọn rayen tavwen “osa” rẹ use rẹ “obenu vwẹ evun ri Kristi Jesu” ki se te ayen obọ.—Fil. 3:13-16.

5. Ẹro vọ yen ofori nẹ Inenikristi ra jẹreyọ vwo ni oma rayen?

⁵ Ẹwẹn ọfuanfon ri Jihova chọn idibo rọyen uko vwọ vwomakpotọ, ọ nẹrhẹ ayen kparoma-a. (Ẹfe. 4:1-3; Kọl. 3:10, 12) Ọtiọyena, e ra jẹreyọ na ni oma rayen nẹ ayen yovwin nọ ihwo efa-a. Ayen riẹnre nẹ ẹwẹn ọfuanfon rẹ Jihova vwọ kẹ ayen na vrẹ ọ rẹ ihwo efa-a. Ayen ji roro nẹ ayen vwo ẹruọ ri Baibol na vrẹ ihwo efa-a. Ayen je cha sa vuẹ ohwo ọfa nẹ a jẹrẹ reyọ, ọtiọyena ọ ton ẹriọ rẹ emu ovwọnvwọn na phiyọ-ọ. Ukperẹ ọtiọyen, ayen vwomakpotọ, ayen je riẹn nẹ Jihova yen durhie ihwo ri che kpo odjuvwu.

6. Vwo nene obo rehẹ 1 Kọrẹnt 4:7, 8, uruemu vọ yen ofori nẹ ihwo ra jẹreyọ na djephia?

⁶ Dede nẹ ihwo ra jẹreyọ na niro nẹ ọyen uphẹn rode rẹ ayen vwo kpo odjuvwu, ayen rhẹro nẹ e muọghọ oghẹresan kẹ aye-en. (Fil. 2:2, 3) Ayen je riẹn nẹ ọke rẹ Jihova vwọ jẹ ayen reyọ, ọ vuẹ ohwo ọfa kpahọ-ọn. Ọtiọyena, siẹrẹ ihwo efa rhe vwo imuẹro nẹ a jẹ ayen reyọ-ọ, o rhe gbe ayen unu-u. Ohwo ra jẹreyọ riẹnre nẹ Baibol na vuẹ avwanre nẹ a fobọ vwo imuẹro kpahen ohwo rọ tare nẹ Ọghẹnẹ kẹ ọyen uphẹn rẹ oghẹresa-an. (Ẹvwọ. 2:2) Rọ vwọ dianẹ ohwo ra jẹreyọ guọnọre nẹ ihwo muọghọ roghẹresan kẹ na-a, ọ rha vuẹ ihwo nẹ a jẹrẹ reyọ ẹsosuọ-ọ. Ọ je cha reyọ vwọ yeyan kẹ ihwo efa-a.—Se 1 Kọrẹnt 4:7, 8.

7. Die yen e ra jẹreyọ na cha kẹnoma kẹ, kẹ diesorọ?

⁷ Ihwo ra jẹreyọ na ọvo siomakoko kerẹsiẹ a da mrẹ nẹ ayen vwo ukoko romobọ raye-en. Ayen je guọnọ ihwo efa ra jẹreyọ rere ayen ta ota kpahen uphẹn rayen na yẹrẹ yono Baibol na komobọ-ọ. (Gal. 1:15-17) E ra jẹreyọ na de ru ọnana, ukoko na cha sa dia ọvuọvo-o. Kọyen ayen gbevwọso ẹwẹn ọfuanfon na, rọ chọn idibo Ọghẹnẹ uko vwo vwo ufuoma vẹ oyerinkugbe.—Rom 16:17, 18.

8. Diesorọ ro vwo fo nẹ wọ jomaotọ kpahen ubiẹro wo vwo nẹ ihwo re riemu ovwọnvwọn na? (Ni eta rehẹ obotọ na.)

⁸ Ẹro vọ yen ofori nẹ wo vwo ni iniọvo rẹ eya vẹ eshare ra jẹreyọ na? Ọ chọre re vwo muọghọ roghẹresan vwọ kẹ oniọvo,  ọ da tobọ dia nẹ ọyen Onenikristi ra jẹreyọ. (Mat. 23:8-12) A da ta ota kpahen ekpako na vwẹ Baibol na, a vuẹ avwanre nẹ a “vwẹ ẹro kere esegbuyota rayen,” ọ dia a vwọ vwẹ ohworakpọ vwo ru onini-i. (Hib. 13:7) Vwọrẹ uyota, Baibol na tare nẹ evo usun rẹ ekpako na fo ihwo re mu “omamọ rẹ ọghọ” kẹ kidie ayen “riẹn sun,” ayen je “wian owian rẹ eghwoghwo kugbe uyono,” ọ dia kidie nẹ a jẹ ayen reyọ-ọ. (1 Tim. 5:17) Siẹrẹ e de jiri yẹrẹ titi ihwo ra jẹreyọ na gan nọ, oma cha vwerhen aye-en. * Ọ sa tobọ nẹrhẹ ayen phuoma. (Rom 12:3) Avwanre guọnọ ru emu vuọvo rọ sa nẹrhẹ iniọvo ri Kristi ra jẹreyọ na she ro uruemu ọtiọyena-a!—Luk 17:2.

9. Mavọ yen avwanre se vwo djephia nẹ e muọghọ kẹ ihwo ra jẹreyọ na?

⁹ Mavọ yen avwanre se vwo djephia nẹ e muọghọ kẹ ihwo ri Jihova jẹreyọ na? Ofori nẹ a nọ ayen kpahen obo ra jẹ ayen reyọ wa-an. Ọyen ota romobọ rayen, ota yena te avwanre-e. (1 Tẹsa. 4:11; 2 Tẹsa. 3:11) O ji fo re vwo roro nẹ a je jẹ ọshare yẹrẹ aye, ọsẹ vẹ oni, yẹrẹ ihwo rẹ orua rayen reyọ-ọ. Ọnana dia uku rẹ ohwo ria mie orua rọye-en. Ọghẹnẹ yen jẹ ayen reyọ. (1 Tẹsa. 2:12) E jẹ avwanre je kẹnoma kẹ enọ re sa nẹrhẹ ihwo muomaphiyọ. Kerẹ udje, ofori nẹ a nọ aye rẹ oniọvo ra jẹreyọ kpahen obo rẹ oma che ruo vwẹ iparadaisi siẹrẹ ọshare rọyen de kpo odjuvwu nu-u. Kidie, avwanre vwo imuẹro nẹ vwẹ akpọ kpokpọ na, Jihova cha “vwẹ obo ri kohwo kohwo ọkpokpọ guọnọre kẹ.”—Une 145:16.

10. Mavọ yen a vwọ kẹnoma kẹ uruemu re vwo “brugun hẹ ihwo oma” sa vwọ dia ochọnvwe kẹ avwanre?

¹⁰ Avwanre rhe muọghọ roghẹresan kẹ ihwo ra jẹreyọ na-a, ọnana jẹ ochọnvwe vwọ kẹ avwanre. Vwẹ idjerhe vọ? Baibol na vuẹ avwanre nẹ evo usun rẹ ihwo ra jẹreyọ na cha fuevun te oba-a. (Mat. 25:10-12; 2 Pita 2:20, 21) Ofori nẹ a kẹnoma kẹ re vwo “brugun hẹ ihwo oma.” E de ru ọtiọyen, avwanre rhe che nene ihwo-o, tobọ te e ra jẹreyọ dede yẹrẹ e re ga Jihova krẹ re. (Jude 16) Ọke yena, ayen da tobọ she nẹ ukoko na dede, avwanre ji che mudiagan.

11. Mavọ yen uchunu rẹ ihwo ri riemu ovwọnvwọn na hepha?

¹¹ Vwẹ ikpe buebun re wan re, uchunu rẹ ihwo re riemu ovwọnvwọn na shekpotọ. Ẹkẹvuọvo vwẹ ikpe evo rhire na, uchunu rẹ ihwo na ke rhoma buẹnphiyọ kukpe kukpe. Ofori nẹ ọnana kpokpo uwe ẹwẹn? Ẹjo. Ẹ jẹ a mrẹ oboresorọ.

12. Diesorọ uchunu rẹ ihwo re riemu ovwọnvwọn na vwo jẹ ẹwẹn avwanre ekpokpo?

¹² “Ọrovwohwo riẹn otu re dia ọrọye.” (2 Tim. 2:19) Vwọ fẹnẹ Jihova, iniọvo ri kere ihwo re ria emu ovwọnvwọn na riẹn e ra ghene jẹreyọ-ọ. Ọtiọyena, ihwo ri rorori nẹ a jẹ ayen reyọ jehẹ ukeri nana. Kerẹ udje, evo re riemu na jovwo, dobọji enẹna. Efa riọ kidie iroro rayen gbare-e, ọtiọyena, kọ nẹrhẹ ayen roro nẹ ayen che nene Kristi sun vwẹ odjuvwu. Vwọrẹ uyota, avwanre ghwa riẹn uchunu rẹ ihwo ra jẹreyọ rehẹ akpọ na nonẹna-a.

13. Baibol na vuẹ avwanre uchunu rẹ ihwo ra jẹreyọ ri che chekọ siẹrẹ ukpokpogho rode na da tonphiyọ?

 ¹³ A cha mrẹ ihwo ra jẹreyọ na vwẹ ẹkuotọ buebun ọke ri Jesu cha vwọ rhe, rhe reyọ ayen kpo odjuvwu. (Mat. 24:31) Baibol na ji djephia nẹ vwẹ ọke rẹ oba na, a je cha mrẹ imihwo ri chekọ usun rẹ e ra jẹreyọ na vwẹ otọrakpọ na. (Ẹvwọ. 12:17) Ẹkẹvuọvo, ọ vuẹ avwanre uchunu ri che chekọ siẹrẹ ukpokpogho rode na da tonphiyọ nu-u.

14. Kirobo ri Rom 9:11, 16 tare, die ofori nẹ a riẹn kpahen ẹsanọ rẹ ihwo ra jẹreyọ na?

¹⁴ Jihova yen che brorhiẹn rẹ ọke rọ cha vwọ sane ihwo ra jẹreyọ na. (Rom 8:28-30) Jihova tuẹn ẹsanọ rẹ ihwo ra jẹreyọ na phiyọ vwo nẹ ọke ra vwọ rhọvwọn Jesu nẹ ushi. Ọhọhọre nẹ Inenikristi eje rẹ ẹgbukpe ujorin ẹsosuọ yen a jẹreyọ. Ikpe ujorin evo vwọ wan nu, buebun re tare nẹ ayen Inenikristi, ghini nene Kristi-i. Dedena, Jihova je sane imihwo re dia Inenikristi uyota re herọ vwẹ ọke yena. Ayen pha kerẹ irosu ri Jesu tare nẹ e rho kugbe vẹ ego na. (Mat. 13:24-30) Vwẹ ọke rẹ oba na, Jihova je sane ihwo re cha dia usun rẹ 144,000 * na. Ọtiọyena, Ọghẹnẹ da sane ihwo nana ọmọke krẹn tavwen oba na ki te, a cha sa nọ orhiẹ-ẹn. (Se Rom 9:11, 16.) * E jẹ avwanre jomaotọ re vwo jẹ dia kerẹ ewiowian ri brenu kidie onini rayen hwa  uche osa ra hwa kẹ ayen vwọ kẹ ihwo re rhe owian vwẹ unọke rọ koba.—Mat. 20:8-15.

15. Ihwo ri che kpo odjuvwu eje yen ẹbẹre ọvo rẹ “odibo esiri” rọ fuevun re djunute vwẹ Matiu 24:45-47? Djekpahọn.

¹⁵ Ọ dia ihwo ri che kpo odjuvwu eje yen ẹbẹre ọvo rẹ “odibo esiri” rọ fuevun na-a. (Se Matiu 24:45-47.) Kirobo rọ hepha vwẹ ẹgbukpe ujorin ẹsosuọ, Jihova vẹ Jesu vwẹ imihwo vwọ ghẹrẹ yẹrẹ yono ihwo buebun nonẹna. Vwẹ ẹgbukpe ujorin ẹsosuọ, imihwo vwẹ usun rẹ e ra jẹreyọ na, yen si Ẹbẹre ri Baibol na ra vwẹ Grik vwo si. Nonẹna, imihwo vwẹ usun rẹ e ra jẹreyọ na yen vwo oghwa ra vwọ vwẹ “emu” kẹ ihwo rẹ Ọghẹnẹ vwẹ “ọke” ro fori.

16. Die yen wo yono nẹ uyovwinrota nana rhe?

¹⁶ Die yen avwanre yono nẹ uyovwinrota nana rhe? Jihova tare nẹ ọ cha vwẹ arhọ ri bẹdẹ vwọ kẹ idibo rọyen buebun vwẹ otọrakpọ na, ọ je tanẹ imihwo evo che nene Jesu sun vwẹ odjuvwu. Jihova cha hwosa kẹ idibo rọyen eje re vwo dje “ohwo rẹ Ju” vẹ “eshare ihwe” na. Ọ guọnọre nẹ ayen yọnrọn irhi rọyen, je fuevun ga. Ofori nẹ ayen eje vwomakpotọ, ji kuomakugbe ga. A je guọnọ nẹ ayen eje sẹro rẹ ufuoma rọhẹ evunrẹ ukoko na. Rẹ oba na vwo siẹkẹrẹ na, e jẹ avwanre eje ga Jihova ji nene Jesu Kristi kerẹ “ekrun rẹ igodẹ ọvo.”—Jọn 10:16.