1. Yehova o amba uri hu ḓo itea mini tshifhingani tshashu?

YEHOVA o dzula o amba uri tshifhingani tshashu “vhathu vha fumi vhane vha bva kha tshaka dza nyambo dzoṱhe vha ḓo fara tshiambaro tsha Muyuda, vha ri: ‘Ri ṱoḓa u ṱuwa na iwe, ngauri ro zwi pfa uri Mudzimu u na inwi.’” (Sak. 8:23) Kha heyi ndimana “Muyuda” u imela vhaḓodzwa. Vha dovha vha vhidzwa “Isiraele wa Mudzimu.” (Vhagal. 6:16) “Vhathu vha fumi” vha imela vhathu vha re na fhulufhelo ḽa u tshila tshoṱhe kha ḽifhasi. Vha a zwi ḓivha uri Yehova o khetha vhaḓodzwa nahone vha zwi dzhia i ndugelo u gwadamela Yehova vhe navho.

2. “Vhathu vha fumi” vha “ṱuwa” hani na vhaḓodzwa?

² Naho zwi sa konadzei u ḓivha madzina oṱhe a vhaḓodzwa vhane vha kha ḓi vha kha ḽifhasi, * vha re na fhulufhelo ḽa u tshila kha ḽifhasi vha nga “ṱuwa” na vhaḓodzwa. Nga nḓila ḓe? Bivhili i ri “vhathu vha fumi” vha ḓo “fara tshiambaro tsha Muyuda, vha ri: ‘Ri ṱoḓa u ṱuwa na iwe, ngauri ro zwi pfa uri Mudzimu u na inwi.’” Heyi ndimana i amba nga ha Muyuda muthihi. Fhedzi “iwe” na “inwi” zwi ambela kha vhathu vhanzhi. Hezwi zwi amba uri Muyuda a si muthu muthihi, fhedzi ndi vhaḓodzwa vhoṱhe. Vhaḓodzwa na vha si vhaḓodzwa vha shumela Yehova. Vha si vhaḓodzwa a vha dzhii vhaḓodzwa sa vharangaphanḓa vhavho, fhedzi vha dzhia Yesu e ene Murangaphanḓa wavho.—Mat. 23:10.

3. Hu ḓo fhindulwa mbudziso dzifhio kha ino thero?

³ Samusi hu tshee na vhaḓodzwa kha ḽifhasi, vhaṅwe  vha nga ḓivhudzisa uri: (1) Vhaḓodzwa vha tea u ḓidzhia hani? (2) Vhane vha ḽa na u nwa Tshihumbudzoni vha tea u farwa hani? (3) Naa ri tea u vhilaela arali tshivhalo tsha vhane vha ḽa na u nwa tshi tshi engedzea tshi tshi ya? Ino thero i ḓo fhindula dzenedzo mbudziso.

4. Ndi ifhio tsivhudzo i re kha 1 Vhakorinta 11:27-29 ine vhaḓodzwa vha tea u i dzhiela nṱha nahone ndi ngani?

⁴ Vhaḓodzwa vha tea u dzhiela nṱha tsivhudzo i re kha 1 Vhakorinta 11:27-29. (Vhalani.) Arali muḓodzwa a si tsha tshila u tendelana na zwine Yehova a funa, u ḓo vha a tshi khou ḽa na u nwa Tshihumbudzoni “a sa fanelei.” (Vhahev. 6:4-6; 10:26-29) Vhaḓodzwa vha a zwi ḓivha uri vha tea u dzula vha tshi fhulufhedzea u itela “u wana malamba ngei ṱaḓulu a zwe Mudzimu a [vha] vhidzela zwone nga Kristo Yesu.”—Vhafil. 3:13-16.

5. Vhaḓodzwa vha tea u ḓidzhia hani?

⁵ Muya mukhethwa wa Mudzimu u thusa vhathu vhawe uri vha si ḓikukumuse fhedzi vha ḓiṱukufhadze. (Vhaef. 4:1-3; Vhakol. 3:10, 12) Ndi ngazwo  vhaḓodzwa vha sa ḓidzhii vha khwine u fhira vhaṅwe. Vha a zwi ḓivha uri Yehova ha vha ṋei muya mukhethwa u fhiraho une a u ṋea vhaṅwe vhashumeli vhawe. A vha ḓidzhii vha tshi pfesesa Bivhili u fhira vhaṅwe. Nahone a si vhone vho no khetha vhaṅwe vhaḓodzwa na u vha vhudza uri vha thome u ḽa na u nwa Tshihumbudzoni. Nṱhani ha zwenezwo, vha a zwi ḓivha uri ndi Yehova fhedzi ane a vhidza vhathu uri vha ḓe ṱaḓulu.

6. U ya nga 1 Vhakorinta 4:7, 8, vhaḓodzwa vha tea u ḓifara hani?

⁶ Naho vhaḓodzwa vha tshi zwi ḓivha uri vho huliswa vhukuma nga u vhidzwa ngei ṱaḓulu, a vha lavheleli uri vhathu vha vha fare nga nḓila yo khetheaho. (Vhafil. 2:2, 3) Hafhu vha a zwi ḓivha uri musi Yehova a tshi vha ḓodza ha rambi ḽa tswuka. Nga zwenezwo, muḓodzwa a zwi mu mangadzi arali vhaṅwe vhathu vha sa ṱavhanyedzi vho tenda uri u muḓodzwa. U a zwi ḓivha uri Bivhili i ri vhudza uri ri songo ṱavhanyedza u tenda musi muthu a tshi ri vhudza uri Yehova o mu ṋea ndugelo yo khetheaho. (Nzumb. 2:2) Muḓodzwa ha sokou vhudza muṅwe na muṅwe uri u muḓodzwa ngauri ha ṱoḓi u ḓiita mmboneni. Nahone a nga si ṱoḓe u ita mazuwo nga hazwo.—Vhalani 1 Vhakorinta 4:7, 8.

7. Ndi mini zwine vhaḓodzwa vha tea u zwi iledza nahone ndi ngani?

⁷ Vhaḓodzwa a vha ḓifhandekanyi na vhaṅwe Vhakriste. A vha fhedzi tshifhinga nga tshavho zwa tou nga vha ḓipfa vhe vha ndeme u fhira vhaṅwe. A vha ṱoḓi vhaṅwe vhaḓodzwa u itela u haseledza nga ha u ḓodzwa havho kana u guda Bivhili tshiphirini nga tshavho. (Vhagal. 1:15-17) Arali vha ita zwenezwo, tshivhidzo tshi nga fhandekana. Vha ḓo vha vha tshi khou lwisana na muya mukhethwa une wa thusa vhathu vha Mudzimu uri vha vhe na mulalo na vhuthihi.—Vharoma 16:17, 18.

8. Ri tea u fara hani vhane vha ḽa na u nwa Tshihumbudzoni? (Sedzani ṱhaluso i re magumoni.)

⁸ Ri tea u fara hani vhaḓodzwa? Naho e muḓodzwa, zwi ḓo vha zwo khakhea uri ri mu khoḓe lwo kalulaho. (Mat. 23:8-12) Musi Bivhili i tshi amba nga ha vhahulwane, i ri ṱuṱuwedza uri ri “edzise lutendo lwavho,” fhedzi a zwi ambi uri ri tea u dzhia muṅwe muthu ra mu ita murangaphanḓa washu. (Vhahev. 13:7)  Ndi ngoho uri i amba uri vhaṅwe vho fanelwa nga uri vha “ṱhonifhiwe zwihulu.” Fhedzi ri vha ṱhonifha ngauri vha “ranga phanḓa zwavhuḓi” nahone vha “shuma nga maanḓa kha u amba na u funza,” hu si ngauri ndi vhaḓodzwa. (1 Tim. 5:17) Arali ra vha khoḓa lwo kalulaho, ri nga ita uri vha pfe vha tshi shona. * Kana ri nga ita uri vha ḓikukumuse. (Vharoma 12:3) A hu na muthu ane a nga ṱoḓa u itisa muṅwe wa vharathu vha Kristo vho ḓodzwaho vhukhakhi vhuhulwane nga u ralo!—Luka 17:2.

9. Ri nga sumbedza hani uri ri ṱhonifha vhaḓodzwa?

⁹ Ri nga sumbedza hani uri ri ṱhonifha vhaḓodzwa? A ri nga ḓo vha vhudzisa uri zwo ḓa hani uri vha vhe vhaḓodzwa. Hayo ndi mafhungo ane a ro ngo tea u ḓidzhenisa khao. (1 Vhathes. 4:11; 2 Vhathes. 3:11) A ro ngo tea u humbulela uri vhanna vhavho, vhafumakadzi vhavho, vhabebi vhavho kana miṅwe miraḓo ya muṱa na vhone ndi vhaḓodzwa. U vha muḓodzwa a si ifa ḽine wa nga ḽi wana kha vhabebi, fhedzi u ḽi fhiwa nga Mudzimu. (1 Vhathes. 2:12) Zwiṅwe hafhu, ri tea u iledza mbudziso dzine dza nga vhaisa vhaṅwe. Sa tsumbo, a ro ngo tea u vhudzisa mufumakadzi wa muḓodzwa uri u ḓipfa hani nga ha uri u ḓo tshila shangoni ḽiswa munna wawe e siho. Zwine ra zwi ḓivha ndi uri shangoni ḽiswa Yehova u ḓo “fusha lutamo lwa tshiṅwe na tshiṅwe tshi tshilaho.”—Ps. 145:16.

10. U sa khoḓa lwo kalulaho zwi ri tsireledza hani?

¹⁰ Arali ri sa fari vhaḓodzwa u nga ndi vha ndeme u fhira vhaṅwe, ri vha ri tshi khou ḓitsireledza. Nga nḓila ḓe? Bivhili i amba uri zwi nga itea uri vhaṅwe vhaḓodzwa vha si bvele phanḓa vha tshi fhulufhedzea. (Mat. 25:10-12; 2 Pet. 2:20, 21) Arali ra iledza u vha khoḓa lwo kalulaho, a ri nga ḓo vha vhatevheli vha vhathu naho vhe vhaḓodzwa, vha tshi ḓivhea kana vho shumela Yehova lwa tshifhinga tshilapfu. (Yuda 16) Zwenezwo zwi ḓo ita uri ri dzule ri tshi shumela Yehova na u vha na lutendo naho zwa nga itea uri vha si fhulufhedzee kana vha ṱutshele tshivhidzo.

11. Ndi mini zwine zwa khou itea kha tshivhalo tsha vhane vha ḽa na u nwa Tshihumbudzoni?

¹¹ Tshivhalo tsha vhane vha ḽa na u nwa Tshihumbudzoni tsho vha tshi tshi khou ḓi fhungudzea miṅwahani yo fhiraho. Fhedzi zwino tshenetsho tshivhalo tshi khou ya nṱha ṅwaha muṅwe na muṅwe. Naa zwenezwo zwi tea u ri vhilaedzisa? Hai. Kha ri ṱolisise mbuno dza ndeme dzine ra tea u dzi humbula.

12. Ndi ngani ri songo tea u vhilaedziswa nga tshivhalo tsha vhane vha ḽa na u nwa Tshihumbudzoni?

¹² “Yehova u a ḓivha vha re vhawe.” (2 Tim. 2:19) Vhahashu vhane vha vhala vhathu vhane vha ḽa na u nwa Tshihumbudzoni a vha fani na Yehova ngauri a vha ḓivhi uri o ḓodzwaho zwa vhukuma ndi ufhio. Kha tshenetsho tshivhalo, hu vha ho katelwa na vhane vha humbula uri vha vhaḓodzwa. Sa tsumbo, vhaṅwe vho thoma vha tshi ḽa na u nwa fhedzi nga murahu vha litsha. Vhaṅwe vha humbula u nga vha khou ya u vhusa na Yesu ṱaḓulu nga nṱhani ha vhulwadze ha muhumbulo. Ngoho ndi uri a ri ḓivhi uri  ndi vhangana vhaḓodzwa vho salaho kha ḽifhasi.

13. Naa Bivhili i a amba uri hu ḓo vha ho sala vhaḓodzwa vhangana musi maṱungu mahulu a tshi thoma?

¹³ Hu ḓo vha hu tshi kha ḓi vha na vhaḓodzwa kha maṅwe mashango musi Yesu a tshi ḓa u vha dzhia uri vha ye ṱaḓulu. (Mat. 24:31) Bivhili i amba uri tshifhingani tsha vhufhelo hu ḓo vha hu tshi kha ḓi vha na vhaḓodzwa vha si gathi kha ḽifhasi. (Nzumb. 12:17) Fhedzi a i ambi uri hu ḓo vha ho sala vhangana musi maṱungu mahulu a tshi thoma.

14. Samusi zwo sumbedzwa kha Vharoma 9:11, 16, ri tea u pfesesa mini nga nḓila ine vhaḓodzwa vha khethwa ngayo?

¹⁴ Yehova ndi ene ane a ita phetho ya uri u ḓo khetha vhaḓodzwa lini. (Vharoma 8:28-30) O thoma u khetha vhaḓodzwa musi Yesu o no vuswa. Zwi vhonala u nga Vhakriste vhoṱhe vha ḓanani ḽa u thoma ḽa miṅwaha vho vha vhe vhaḓodzwa. Maḓanani a tevhelaho a miṅwaha, vhunzhi ha vhe vha ḓivhidza Vhakriste vho vha vhe si vhatevheli vhawe vha vhukuma. Naho zwo ralo, Yehova o khetha Vhakriste vha vhukuma. Vho vha vha tshi nga goroi ine ya khou hula vhukati ha tsheṋe. (Mat. 13:24-30) Na maḓuvhani a vhufhelo, Yehova o bvela phanḓa a tshi khetha vhane vha ḓo vha vhaṅwe vha vha 144 000. * Arali a bvela phanḓa a tshi khetha, a zwo ngo tea u ri vhilaedzisa ngauri u a  ḓivha zwine a khou ita. (Vhalani Vharoma 9:11, 16.) * Ri tea u ṱhogomela uri ri sa fane na vhashumi vhe Yesu a amba nga havho kha tshiṅwe tshifanyiso tshawe. Vho gungula ngauri muṋe wavho o holela vhashumi vhe vha shuma awara nthihi muholo une wa eḓana na wavho.—Mat. 20:8-15.

15. Naa vhaḓodzwa vhoṱhe ndi “mulanda a fhulufhedzeaho na wa vhuṱali” o ambiwaho kha Mateo 24:45-47? Ṱalutshedzani.

¹⁵ A si vhaḓodzwa vhoṱhe vhane vha vha “mulanda a fhulufhedzeaho na wa vhuṱali.” (Vhalani Mateo 24:45-47.) Yehova na Yesu vha khou shumisa vhaḓodzwa vha si gathi u itela u ṱhogomela vhanzhi u fana na nḓila ye zwa vha zwi ngayo ḓanani ḽa u thoma ḽa miṅwaha. Nga tshenetsho tshifhinga, ho shumiswa vhaḓodzwa vha si gathi u itela u ṅwala Maṅwalo a Tshigerika. Na ṋamusi, ndi vhaḓodzwa vha si gathi vhane vha vha na vhuḓifhinduleli ha u ṋea vhathu vha Mudzimu “zwiḽiwa zwavho nga tshifhinga tsho teaho.”

16. No guda mini kha ino thero?

¹⁶ Ro guda mini kha ino thero? Yehova u ḓo ṋea vhunzhi ha vhathu vhutshilo vhu sa fheli kha ḽifhasi nahone vha si gathi vha ḓo vhusa na Yesu ṱaḓulu. U ḓo lambedza vhashumeli vhawe vhane vha vha “Muyuda” na “vhathu vha fumi” nahone u ṱoḓa uri vhoṱhe vha tevhedze milayo yawe na u dzula vha tshi fhulufhedzea. Vhoṱhe vha tea u dzula vha tshi ḓiṱukufhadza. Vha tea u mu gwadamela nga vhuthihi. Muṅwe na muṅwe u tea u shela mulenzhe kha u ita uri tshivhidzoni hu dzule hu na mulalo. Samusi vhufhelo ho sendela, kha ri bvele phanḓa ri tshi shumela Yehova na u tevhela Yesu sa “sambi ḽithihi.”—Yoh. 10:16.